Sport
«Siti» g‘alaba qozonishni boshladi, «Real» «Barsa»ni quvib o‘tdi. Kun o‘yinlari
Husanov muntazam ravishda asosiy tarkibda tushmoqda, «Liverpul» so‘nggi daqiqada gol o‘tkazib yutqazdi, Mbappe panenka bo‘yicha dars berdi, Italiyada YeChLga kutilmagan da’vogar, «Bavariya»ning mag‘lubiyatsiz seriyasiga chek qo‘yildi. Shanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Angliya: Holandsiz ham uddaladi
«Manchester Siti» – «Vulverhempton» 2:0
Gollar: Marmush, 6 (1:0). Semenyo, 45+2 (2:0)
«Manchester Siti»: Donnarumma, Gehi, Husanov, O`Rayli, Mateus Nunes, Rodri, Reynders (Foden, 61), Bernardu Silva, Sherki (Holand, 73), Semenyo, Marmush (Doku, 74)
«Vulverhempton»: Joze Sa, S. Bueno, Kreychi, Moskera, Andre, Gomes, Mane, U. Bueno, Chachua (Gomesh, 46), Arias (Larsen, 46), Hvang Hi Chhang (Arokodare, 71)
Ogohlantirishlar: Mateus Nunes, 71 – Andre, 57. Gomes, 67. Moskera, 88
Murakkab davrni boshdan kechirayotgan «Manchester Siti» APL autsayderiga qarshi o‘yinda o‘ziga kelib oldi. «Bo‘rilar» ham so‘nggi vaqtlarda yaxshi o‘ynay boshlagan, so‘nggi besh o‘yinda yutqazmagan, «MYu» va «Nyukasl»ga qarshi o‘yinlarda durangga erishgandi. «Shaharliklar» tezkor gol urishdi – Afrika kubogidan qaytgan Marmush joriy mavsumdagi ilk goli bilan hisobni ochdi. Misrlik hujumchining jamoadagi barcha gollari (8) «Etihad»da urilmoqda.
YeChLning yakuniy turi oldidan dam berilgan Holand bu voqeani zaxira o‘rindig‘ida o‘tirib kuzatdi va faqat ikkinchi bo‘limning ikkinchi yarmida maydonga tushirildi. Bu vaqtga kelib hisob 2:0 ko‘rinishini olib bo‘lgandi, birinchi bo‘limga qo‘shib berilgan daqiqalarda Semenyo «Siti»ning ustunligini ta’minlagandi. «Bornmut»dan transfer qilingan ushbu yangi futbolchi uchta ichki turnirda gol urishga ulgurdi. Shu kuni jamoaning qishki transferlardagi yana bir futbolchisi Mark Gehi ham debyutini amalga oshirdi. Angliya milliy jamoasi futbolchisi himoya markazida mustahkam o‘rin egallagan Abduqodir Husanov bilan juftlikda harakat qilishni boshladi. Yakunda mezbonlar ustunlikni saqlab qolishdi va bu jamoaning APLda yil boshidan buyon ilk g‘alabasiga aylandi.
«Bornmut» – «Liverpul» 3:2
Gollar: Evanilson, 26 (1:0). Ximenes, 33 (2:0). van Deyk, 45 (2:1). Soboslai, 80 (2:2). Adli, 90+5 (3:2)
«Bornmut»: Petrovich, Senesi, Hill, Tryuffer, Smit, Kuk, Skott, Krupi (Kristi, 67), Adli, Ximenes (Tot, 85), Evanilson (Enes Yunal, 90+3)
«Liverpul»: Alisson, Gomes (Endo, 35), van Deyk, Kerkez (Roberson, 46), Frimpong (Jons, 59), Makallister (Ekitike, 59), Gravenberh, Virs, Soboslai, Saloh, Gakpo (Ngumoxa, 74)
Ogohlantirishlar: Krupi, 45 – Gravenberh, 90
«Liverpul» o‘yinning dastlabki yigirma daqiqasida shunday o‘yin ko‘rsatdiki, muxlislar jamoa inqirozdan butkul chiqib ketganiga ishona boshlashdi. Ammo «Bornmut»ning ilk jiddiy hujumi Evanilson hisobni ochishi bilan yakunlandi. To‘p jarima maydoni ichiga yetkazib berilganida van Deyk qo‘pol xatoga yo‘l qo‘ydi va Skott to‘pni qulay vaziyatda turgan braziliyalik forvardga tashlab berdi. Keyin esa yozda «Bornmut»dan Liverpulga o‘tgan Kerkez sobiq jamoasiga yordam berib yubordi, u sun’iy ofsayd hosil qilishda xatoga yo‘l qo‘ydi va Ximenes hisobdagi farqni oshirdi.
Bu vaziyatda mezbonlar o‘n kishi bo‘lib o‘ynayotgandi: birinchi gol urilgan hujum vaqtida himoyachi Gomes jarohat olgandi, mersisaydliklar esa uning o‘rniga Endoni tushirishga ulgurmadi.
Faqat tanaffus arafasida van Deyk aybini qisman yuvib, Soboslai burchakdan oshirgan to‘pni boshi bilan raqib darvozasiga yo‘lladi. Ikkinchi bo‘limda esa vengriyalik yarimhimoyachi jarima zarbasini golga aylantirib, hisobni tenglashtirdi. Soboslai joriy mavsumda jarima maydoni tashqarisidan urilgan gollar soni (5) bo‘yicha Foden bilan tenglashib oldi. Ammo bu natija uchun yetarli bo‘lmadi. O‘yinga qo‘shib berilgan to‘rtinchi daqiqa tugayotganida mehmonlar jarima maydoni ichidagi tartibsizlikdan Adli foydalanib, jamoasiga g‘alaba keltirdi.
Bu mag‘lubiyat «Liverpul»ning turnir jadvalidagi holatini og‘irlashtiradi. Jamoa yakshanba kungi o‘yinlar natijalariga ko‘ra kuchli to‘rtlikdan chiqib ketishi mumkin: nazariy jihatdan «MYu» va «Chelsi» Arne Slot shogirdlarini quvib o‘tish, «Nyukasl» va «Brentford» ochkolar soni bo‘yicha tenglashib olish imkoniyatiga ega. «Fulhem» ham maksimal darajada yaqinlashib kelgan.
Ispaniya: Mbappe Diasga dars o‘tdi
«Vilyarreal» – «Real» 0:2
Gollar: Mbappe, 47 (0:1). Mbappe, 90+4 – penalti (0:2)
«Vilyarreal»: Luis Junior, Foyt (Marin, 24), Veyga, Pedrasa, Navarro, Parexo (Parti, 77), Guyye, Moleyro, Byukenen (Pepe, 70), Moreno (Oluvaseyi, 70), Mikautadze (Peres, 77)
«Real»: Kurtua, Raul Asensio, Hausen, Karreras, Valverde, Kamavinga, Bellinghem, Arda Guler (Dias, 80), Vinisius Junior, Mastantuono (Garsiya, 74), Mbappe
Ogohlantirishlar: Foyt, 2. Byukenen, 51. Navarro, 57 – Mastantuono, 62
La liganing ikkinchi va uchinchi o‘rindagi jamoalari o‘rtasidagi uchrashuvga qiziqish yuqori edi. Raqiblar kutilganidek yuqori temp namoyish etishdi va navbat bilan qiziqarli hujumlar uyushtirishdi. Shu bilan birga, bu hujumlarni yakunlashda muammolar kuzatildi, madridliklar dastlabki 45 daqiqalikda Kurtua darvozasi tomon birorta zarba to‘g‘ri borishiga yo‘l qo‘yishmadi. Tanaffus arafasida Vinisius Junior golga yaqin keldi, ammo uning olis burchak tomon yo‘llagan zarbasidan keyin to‘p ustun yonginasidan o‘tib ketdi.
Bu vaqtga kelib «Vilyarreal» asosiy himoyachisi Foytdan ayrilgandi. Kuzda ham ushbu argentinalik jarohat tufayli bir oy maydonga tusha olmagandi, bu safargi jarohati esa jiddiyroq bo‘lib chiqishi mumkin – u maydonni shifokorlarga tayangancha tark etdi. Foytsiz qolgan mezbonlar ikkinchi bo‘lim boshida gol o‘tkazib yuborishdi, himoyachi Vinining maydon chizig‘idan uzatgan pasini to‘sishda muvaffaqiyatsiz harakat qildi va to‘p qulay pozitsiyada turgan Mbappega borib tushdi. Biroz o‘tib «sariq submarinalar» o‘ta qulay imkoniyatni qo‘ldan chiqardi – Jyerar Moreno jarima maydoni markazida turib yo‘llagan zarba to‘sin yuqorisidan o‘tib ketdi.
Shundan keyin madridliklar raqibga hujumda hech qanday imkon qoldirmadi, Mbappe esa o‘yinga qo‘shib berilgan daqiqalarda penalti ishlab, chempionatdagi 21-golini panenka uslubida ijro etdi. Translatsiya rejissyorlari Afrika kubogi finalida ro‘y bergan dramani yodga olib, Kilian golini Braim Diasni quchoqlagancha nishonlayotganini yirik planda ko‘rsatishdi. O‘yindan keyin fransuz hujumchisi bu golini ushbu jamoadoshiga bag‘ishlaganini tan oldi. Bu g‘alabadan keyin «Real» kamida yakshanba kungi o‘yinlar yakuniga qadar turnir jadvalining birinchi pog‘onasida qoladi.
Italiya: «Komo» «quturdi»
«Komo» – «Torino» 6:0
Gollar: Duvikas, 8 (1:0). Baturina, 16 (2:0). Da Kunya, 59 – penalti (3:0). Duvikas, 66 (4:0). Kyun, 70 (5:0). Kakere, 76 (6:0)
«Komo»: Byute, Kempf, Ramon, Vale, Voyvoda, Perrone (Kakere, 68), Da Kunya, Pas (Moreno, 73), Baturina (Serji Roberto, 68), Rodriges (Kyun, 68), Duvikas (Smolchich, 73)
«Torino»: Paleari, Ismayli (Maripan, 21), Koko, Tamez (Obrador, 67), Amirxan Ilhan (Andjorin, 67), Kazadei, Lazaro, Pedersen, Vlashich, Adams, Ngonge (Sapata, 67)
Ogohlantirish: Pedersen, 17
Bir hafta oldin «Milan»ga qarshi o‘z uyida yutqazgan (1:3) Sesk Fabregas jamoasi o‘zini yo‘qotib qo‘ymadi. Yevrokuboklar yo‘llanmasi uchun kurashayotgan (5-o‘rin) «Komo» YeChLda qatnashish uchun ham real da’vogar bo‘lib qolmoqda. Ushbu jamoa o‘tgan turda Rimda kechgan o‘yinda «Latsio»ni yirik hisobda taslim etgandi (3:0). Bu turda esa «Torino»ga qarshi o‘yin taqdiri birinchi bo‘limning dastlabki qismidayoq aniq bo‘lib ulgurdi.
Hisobni ochgan Duvikas maydonning ikkinchi qismidan reyd uyushtirib, darajadagi farqni yaqqol namoyish etdi. Turinliklar himoyasidagi ketma-ket xatolar biroz o‘tib Baturin ikkinchi golni urishi bilan yakunlandi. Ikkinchi bo‘limda ushbu xorvatiyalik yarimhimoyachi Duvikasning dubliga hammualliflik qildi. Ikkinchi bo‘limda Kyun va Kakre ham uzoq masofadan yo‘llagan zarbalari bilan turning eng chiroyli gollarini urishdi.
Umuman, shu kuni mezbonlar raqiblar darvozasini jami 6 bor ishg‘ol etishdi va turnir jadvalidagi raqobatchilarning yakshanba kungi o‘yinlari yakuniga qadar top-4 dan ikki ochkolik masofada bo‘lishadi. 22 turdan keyingi 40 ochko – jamoa tarixidagi rekord ko‘rsatkichdir. «Torino» esa o‘z tarixida ilk bor bir mavsumda bir jamoaning o‘zidan 11 gol o‘tkazib yubormoqda – ushbu jamoalarning birinchi davradagi o‘yinida 1:5 hisobi qayd etilgandi.
Germaniya: «Bavariya»da qoqilish
«Bavariya» – «Augsburg» 1:2
Gollar: Ito, 23 (1:0). A. Chaves, 75 (1:1). Massengo, 81 (1:2)
«Bavariya»: Urbig, Kim Min Je (F. Chaves, 85), Ta, Ito (Bishof, 79), Deyvis (Kimmix, 61), Goretska (Jyekson, 79), Pavlovich, Karl (Musiala, 61), Dias, Olise, Keyn
«Augsburg»: Damen, Shlotterbek, Tseziger, A. Chaves (Volf, 85), Massengo, Rejbechay (Kaytel, 74), Yannulis, Fellhauer, Klod-Moris, Rider (Kemyur, 74), Kade (Essende, 63)
Ogohlantirish: Ta, 73
Bundesligada turning asosiy voqeasi – «Bavariya»ning mag‘lubiyati bo‘ldi, myunxenliklar shu kungacha «Alyans Arena»da mavsum boshidan buyon yutqazmayotgan, umuman olganda, jamoaning o‘z uyidagi mag‘lubiyatsiz seriyasi 27 turdan buyon davom etayotgandi. Myunxenliklar bir oy oldin ham fiaskoga yaqin kelishgandi, ammo «Mayns»ga qarshi o‘yinda mag‘lubiyatdan qutulib qolishgandi (2:2). Bu safar esa magiya limiti tugab qolgani ma’lum bo‘ldi va so‘nggi daqiqada Olisening Robben uslubidagi zarbasidan keyin to‘p to‘sin va ustun birlashgan nuqtaga bordi.
Birinchi bo‘lim o‘rtalarida uning uzatmasi bilan Uto hisobni ochgandi. Ammo ikkinchi bo‘limning ikkinchi yarmida mezbonlar safida Noyyer o‘rniga darvozani qo‘riqlagan Urbig to‘pga chiqishda qo‘pol xatoga yo‘l qo‘ydi va hisob tenglashdi. Bir necha daqiqa o‘tib esa mezbonlar safida zaxiradan tushgan ikki taniqli futbolchi himoyada xatoga yo‘l qo‘yishdi: Kimmih golli pas muallifi Yannulisni to‘xtata olmadi, keyin esa og‘ir jarohatdan tuzalib, endi safga qaytayotgan Musiala gol muallifi Massangoga qarshi o‘ynay olmadi. «Augsburg» bir necha daqiqa ichida o‘yinda burilish yasab, Myunxenda 2015 yil mayidan buyon ilk g‘alabasiga erishdi.
«Union» B – «Borussiya» D 0:3
Gollar: Emre Jan, 10 – penalti (0:1). Shlotterbek, 53 (0:2). Bayyer, 84 (0:3)
«Union» B: Rennov, Kverfeld, Diogu Leyte (Shefer, 76), Duki, Kemlyayn (Berk, 76), Xedira, Yuranovich (Nsoki, 66), Xaberer (Trimmel, 86), Chon U Yen, Ilich, Ansa (Burju, 66)
«Borussiya» D: Kobel, Anton, Shlotterbek, Emre Jan (Anselmino, 69), Bellinghem, Nmecha (Mane, 90+3), Svensson, Ryuerson (O‘zjan, 90+3), Silva (Chukvuemeka, 79), Bayyer, Girassi
Ogohlantirishlar: Emre Jan, 59
Bundesligada kunning so‘nggi o‘yini «Borussiya»ning tezkor goli bilan boshlandi. Girassi darvozabonni o‘ziga qo‘pollik ishlatishga majbur qildi, Emre Jan esa qatorasiga ikkinchi turda penaltini aniq ijro etdi. Ikkinchi bo‘lim boshida dortmundliklar o‘z uslubida gol urishdi. Ryuersonning burchakdan uzatmasidan keyin Shlotterbek hisobdagi farqni oshirdi. O‘yin oxiriga borib Bayyer Job Bellinghemning uzatmasidan keyin hisobni yirik ko‘rinishga keltirdi.
«Asalarilar» «Bavariya» bilan oradagi farqni sakkiz ochkogacha qisqartirdi. Chempionlik intrigasi haqida gapirishga hali erta. Myunxenliklarning bu mavsumdagi yagona raqibi – ularning o‘zi. O‘z navbatida «Borussiya» eng yaqin ta’qibchisi bilan oradagi farqni olti ochkoga yetkazdi. Niko Kovach shogirdlari qatorasiga to‘qqiz o‘yina darvozasi daxlsizligini saqlab qolmoqda.
Sport
«Siti» poygaga qaytdi. Kun o‘yinlari «Manchester Siti» yirik g‘alabaga erishgan o‘yinda Husanov qaydnomaga ham kiritilmadi, Turkiyada esa Shomurodov va Fayzullayev bittadan gol urdi.
«Siti» poygaga qaytdi. Kun o‘yinlari
«Manchester Siti» yirik g‘alabaga erishgan o‘yinda Husanov qaydnomaga ham kiritilmadi, Turkiyada esa Shomurodov va Fayzullayev bittadan gol urdi.
Source link
O‘zbekiston milliy jamoasiga B guruhida Bahrayn, Shimoliy Koreya va Iordaniya kabi jamoalar raqiblik qiladi.
2027 yil Saudiya Arabistonida bo‘lib o‘tadigan Osiyo kubogi ishtirokchilari o‘z guruhdoshlarini bilib oldi.
Qur’a natijalariga ko‘ra, O‘zbekiston milliy terma jamoasi Bahrayn, KXDR va Iordaniya kabi jamoalar bilan birga B guruhidan joy oldi.
A guruhi
Saudiya Arabistoni
Kuvayt
O‘mon
Falastin
B guruhi
O‘zbekiston
Bahrayn
KXDR
Iordaniya
C guruhi
Eron
Suriya
Qirg‘iziston
Xitoy
D guruhi
Avstraliya
Tojikiston
Iroq
Singapur
E guruhi
Janubiy Koreya
BAA
Vetnam
Livan/Yaman
F guruhi
Yaponiya
Qatar
Tailand
Indoneziya
Navbatdagi Osiyo kubogi 2027 yil 7 yanvardan 5 fevralga qadar bo‘lib o‘tadi. Unda 24 ta milliy jamoa 6 guruhga bo‘lingan holda qit’a chempionligi uchun kurash olib boradi.
Ma’lumot uchun, O‘zbekiston milliy jamoasi 2024 yil yanvarida bo‘lib o‘tgan oxirgi Osiyo kubogida chorakfinalga chiqqan, ammo mezbon Qatarga penaltilar seriyasida yutqazib qo‘ygandi. O‘sha turnirda qatarliklar finalga chiqib, Iordaniyani mag‘lub etibgan holda ketma-ket ikkinchi bor qit’a chempionligini qo‘lga kiritgandi.
Urugvaylik Federiko Valverde va fransiyalik Oleren Tchuameni o‘zaro janjal uchun jazolandi.
«Real» futbol klubi urugvaylik Federiko Valverde va fransiyalik Oleren Tchuamenini mashg‘ulotdagi mushtlashuv uchun 500 ming yevrodan jarimaga tortdi. Bu haqda Madrid klubi saytida xabar berildi.
«O‘yinchilar sodir bo‘lgan voqeadan to‘liq pushaymon ekanligini bildirib, bir-biridan uzr so‘radi. Bundan tashqari, ular klubdan, jamoadoshlaridan, murabbiylar shtabi va muxlislardan ham uzr so‘radi va ikkalasi ham klub munosib deb hisoblagan har qanday jazoni qabul qilishga tayyor ekanligini bildirdi», deyiladi xabarda.
Natijada «Real» ularni jarimaga tortishga qaror qildi va bu bilan tegishli ichki tekshiruvni yakunladi.
Bir kun avval Marca nashri xabariga ko‘ra, futbolchilar mashg‘ulotdan so‘ng kiyinish xonasida mushtlashgan, oqibatda urugvaylik yiqilib, boshi bilan urilgan va keyinchalik shifoxonaga yotqizilgan. Unga chok qo‘yilgani, klub esa shoshilinch yig‘ilish o‘tkazib, intizomiy ish qo‘zg‘atgani xabar qilingandi.
Shu bilan birga, Valverdening o‘zi bahs paytida tasodifan stolga urilib, jarohat olganini va shifoxonaga yotqizilganini aytgandi. U Tchuameni uni urmaganini ta’kidlab, voqeani bo‘rttirib ko‘rsatmaslikka chaqirdi.
Nodirbek Abdusattorov Shvetsiyadagi nufuzli TePe Sigeman Chess 2026 turnirini uchinchi o‘rinda yakunladi.
O‘zbekistonlik grossmeyster 7 tur yakunlariga ko‘ra turkiyalik 14 yoshli shaxmatchi Yag‘iz Kaan Erdogmush bilan 3-o‘rinni bo‘lishdi.
Qayd etilishicha, Abdusattorov turnir davomida birorta ham partiyada mag‘lub bo‘lmadi. U startda g‘alaba qozonib, keyingi olti bahsni durang bilan yakunladi.
1-o‘rin — Magnus Karlsen (Norvegiya)
2-o‘rin — Arjun Erigaysi (Hindiston)
Turnir 1–7 may kunlari Shvetsiyaning Malmyo shahrida bo‘lib o‘tdi.
Urugvaylik futbolchi boshidan jarohatlangan va safdan chiqqan. Klub ikki futbolchini ham jazolashi mumkin.
«Real»da ichki muhit kundan kunga yomonlashmoqda. «Barselona» bilan o‘yinga bir necha kun qolganida madridliklar mojaro girdobida qoldi – ish shu darajaga borib yetdiki, futbolchilar o‘zaro janjallashmoqda.
Chuameni va Valverdening janjali
So‘nggi kunlarda futbol olamidagi asosiy yangilik – Oreliyen Chuameni va Federiko Valverde o‘rtasidagi mushtlashuv bo‘ldi. Marca ma’lumotiga ko‘ra, ushbu yarimhimoyachilar dastlab chorshanba kungi mashg‘ulot chog‘ida nizolashib qolgan, ammo o‘shanda ish ochiq mushtlashuvgacha borib yetmagan.
Payshanba kuni futbolchilar hissiyotlarini jilovlay olishmagan. Xabar qilinishicha, fransiyalik futbolchi mojaroga chek qo‘yish uchun Fededan uzr so‘ragan, ammo urugvaylik uning uzrini qabul qilmagan. Mashg‘ulot vaqtida esa jamoadoshiga qarshi qo‘pol o‘ynay boshlagan. Murabbiy Alvaro Arbeloa vaziyatni to‘g‘rilash uchun ularni mashg‘ulotda bitta jamoa safida o‘ynatgan. Lekin vaziyat yumshamagan.
As nashri yozishicha, kiyim almashtirish xonasida Valverde Chuamenini bir kun oldin bo‘lgan janjalni OAVga sizdirishda ayblagan. Oreliyen esa buni qat’iy rad qilib, jamoadoshidan uni ayblashni to‘xtatishni talab qilgan. Fede esa to‘xtamagan, shundan so‘ng Oreliyen unga musht tushirgan. Zarbadan so‘ng Valverde yiqilgan va stol burchagiga urilib boshi yorilgan. Shundan so‘ng uni shifoxonaga olib ketishgan va boshini tikishgan.
Valverdening raddiyasi
Hozirda futbolchi bazaga qaytgan. «Real» matbuot xizmati rasmiy bayonotida aytilishicha, unda bosh miya jarohati qayd etilgan. Bunday holatlarda futbolchi ikki haftagacha maydonga tusha olmasligi mumkin.
Ko‘p o‘tmay Valverde ijtimoiy tarmoqlardagi sahifasida holat yuzasidan izoh berdi: u vaziyat bo‘rttirib yuborilgani, bu har qanday jamoada bo‘lishi mumkin bo‘lgan holatligi va bunday xabar kiyim almashtirish xonasidan tashqariga chiqmasligi kerakligini aytgan.
«Jamoadoshim meni urgani yo‘q, men ham uni urmadim. Lekin tushunaman: biz mushtlashganimizga yoki bu ataylab qilinganiga ishonishingiz osonroq, lekin unday emas. Bahs paytida men tasodifan stolga urildim, bu esa peshonamda kichik tirnalishga va shifoxonaga borishimga sabab bo‘ldi», – deya yozgan Fede.
Futbolchi «Real»ning og‘ir mavsumi va Chempionlar ligasini tark etishni qabul qilish og‘ir bo‘lganini tan olgan.
«Biz yana bir yilni behuda sarfladik. Men g‘azab va alamimni ichimga yutardim, ammo oxir-oqibat hammasi bema’ni janjalga aylanib ketdi», – degan futbolchi.
U bo‘lgan voqea uchun uzr so‘ragan va hamon klubga sodiqligini qayd etgan.
«Real» – hayotimdagi eng muhim narsalardan biri va men unga befarq bo‘la olmayman», – deya qo‘shimcha qilgan urugvaylik futbolchi.
Valverde o‘z murojaatini shunday yakunlagan: «Men klub va jamoadoshlarim zarur deb hisoblagan har qanday qarorga rozi bo‘laman».
Futbolchilar jazolanadi
«Real» klubiga yaqin bo‘lgan jurnalistlar bu voqea rahbariyatning g‘azabini keltirgani, ikki futbolchi ham intizomsizligi uchun qat’iy jazolanishi haqida yozishdi.
Ko‘p o‘tmay «Real» klubi Valverde va Chuameni o‘rtasida chiqqan mojaroni rasman tasdiqlab, ularga nisbatan intizomiy ish ochilganini ma’lum qildi:
«Real Madrid futbol klubi ertalabki mashg‘ulot paytida Federiko Valverde hamda Orelen Chuameni o‘rtasida ro‘y bergan vaziyat yuzasidan surishtiruv ishlarini boshlanganini ma’lum qiladi. Klub tegishli jarayonlarni yakunlaganidan keyin ikki futbolchiga nisbatan qo‘llangan choralar haqida batafsil ma’lumot beradi».
Bunday holatlar uchun futbolchilar bir necha o‘yinga chetlatilib, moliyaviy jarima qo‘llanishi mumkin. Ichki protokolga ko‘ra, jiddiy darajada muammo keltirib chiqqan futbolchilar bilan shartnoma bekor qilinishi ham ko‘zda tutilgan.
Umuman olganda, xaos «Real» uchun odatiy holga aylangan. Xabarlarga ko‘ra, jamoa a’zolari ikki guruhga ajralib olgan va o‘zaro muloqot qilmaydi. Olti nafar futbolchi esa bosh murabbiy Alvaro Arbeloaning so‘zlariga quloq tutmaydi.
Bu vaqtda klub himoyachilari Antonio Ryudiger va Alvaro Karreras o‘rtasida ham so‘nggi vaqtlarda ikki bor janjal ro‘y bergani haqida ham xabarlar tarqalgan. Mundo Deportivo ma’lumotiga ko‘ra, ikkinchi janjaldan keyin jamoadoshlari Ryudigerni uzr so‘rashga majbur qilishgan.
Mbappe bilan bog‘liq vaziyat
Bu voqealar Kilian Mbappe bilan bog‘liq katta mojaro fonida ro‘y bermoqda: jarohatlangan hujumchi tiklanish jarayonini o‘tash o‘rniga sevgilisi bilan Italiyaga ketib qolishi jamoadoshlarini ham, klub muxlislarini ham g‘azablantirgan. Muxlislar fransiyalik futbolchini jamoadan ketkazish talabi bilan petitsiya boshlagan va u allaqachon 34 million kishi tomonidan imzolangan.
Lekin Mbappe allaqachon klub bazasiga qaytdi va aftidan hech narsadan xavotirda emas – u tez orada maydonga qaytishi ham mumkin. Chuameni va Valverdening janjali ro‘y bergan mashg‘ulotda Kilian ham bor edi va bazani juda mamnun holatda tark etgan. Jurnalistlar hujumchi bazadan qattiq kulgancha chiqib ketayotganini ko‘rishgan.
Mendining og‘ir jarohati
Bu vaqtda madridliklar tarkibida yana bir jiddiy yo‘qotish ro‘y berdi. Mavsumning katta qismini jarohatini davolash bilan o‘tkazib yuborgan himoyachi Ferlan Mendi la liganing 34-turi doirasida «Espanyol»ga qarshi kechgan o‘yinda (2:0) yana jarohat oldi. U o‘yin boshida tezlik olayotganida bel qismida og‘riq sezdi va gazonga o‘tirib oldi.
Avvaliga shifokorlar uning davolanish va tiklanish jarayoni besh oy davom etishini prognoz qilishgandi. Ammo 7 may kuni Mendi o‘ng son mushagining payi uzilgani va operatsiya qilinishi, kamida bir yilni o‘tkazib yuborishi ma’lum qildi. COPE nashri ma’lumotiga ko‘ra, endi 30 yoshli fransuz futbolchilik faoliyatini yakunlash haqida o‘ylamoqda.
Shunday muammolar girdobida qolgan «Real» 10 may kuni «Kamp Nou»ga safar qiladi va la liganing 35-turi doirasida «Barselona»ga qarshi maydonga tushadi. Kataloniyaliklar shu kuni chempionga aylanishi mumkin – buning uchun mezbonlar azaliy raqibiga yutqazmasligining o‘zi yetarli bo‘ladi. Madridliklar bu o‘yinga qanday holatda borishi hisobga olinsa, bu qiyin vazifa bo‘lib ko‘rinmayapti.
Orzu qilishga qo‘rqadigan yigitga maslahatlar
O‘zbekistonda savdo xizmatlari hajmi 75 trln so‘mdan oshdi
Yaponiya viza tartibini buzgan yana bir o‘zbekistonlikni deportatsiya qildi
-
Dunyodan4 days agoXitoyda pirotexnika zavodining portlashi oqibatida 26 kishi halok bo‘ldi
-
Siyosat3 days agoOliy sud 161 nafar Sovet repressiyasi qurbonlarini reabilitatsiya qiladi
-
Siyosat3 days agoOʻzbekistonda Mudofaa vazirligi tarkibida sunʼiy intellekt boʻlimi va kiberxavfsizlik instituti tashkil etildi
-
Iqtisodiyot5 days ago
budjet tarkibida qaysi soliqlarning ulushi ko‘proq?
-
Dunyodan4 days agoTahlilchilar neft haqida xavotirli ma’lumotlarni e’lon qilishdi
-
Jamiyat4 days ago
Askiya nozikfahm zakiylar bahsi, «tor» hazillar emas!
-
Iqtisodiyot3 days ago
Dollar kursi 12 100 so‘mdan oshib ketdi
-
Jamiyat3 days ago
Farg‘onada sohalar rivoji: sanoat, IT va turizm