Sport
«Real» ta’qibni davom ettirdi, «Liverpul» yana ochko yo‘qotdi. Kun o‘yinlari
«Chelsi» autsayderga yutqazib qo‘ydi, «Arsenal»da ishonchli g‘alaba. Chorshanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Angliya: «Arsenal» peshqadamlikda davom etmoqda
«Arsenal» – «Brentford» 2:0
Gollar: Merino, 11 (1:0). Saka, 90+1 (2:0)
«Arsenal»: Rayya, Moskera (Timber, 44), Inkapiye, Kalafiori, Uayt, Subimendi, Rays (Yokeresh, 83), Edegor, Martinelli (Eze, 61), Madueke (Saka, 61), Merino
«Brentford»: Kelleher, van der Berg, Pinnok (Kollinz, 74), Ayyer, Yyensen (Henderson, 61), Yarmolyuk, Yanelt (Damsgor, 61), Henri (Lyuis-Potter, 74), Kayode, Shade (Tiago, 60), Uattara
Ogohlantirish: Yarmolyuk, 65
«Arsenal» kutilgan g‘alabaga erishdi, ammo yana bir markaziy himoyachisidan ayrildi. Birinchi bo‘limni oxirigacha yetkaza olmagan Moskera ham Gabriel Magalyans va Saliba ortidan lazaretga yo‘l oldi. Natijada Mikel Arteta markazda ham o‘ynay oluvchi qanot himoyachisi Timberni uning o‘rniga tushirishga majbur bo‘ldi – bu mavsumda rotatsiyasiz o‘ynab kelgan niderlandiyalik himoyachiga shu kuni dam berilgandi, ammo u to‘liq dam ololmadi.
O‘yin to‘liq mezbonlar ustunligida kechdi va shu kuni Timber o‘rnida ilk daqiqalardan maydonda harakatlangan Uayt 11-daqiqada qanotdan darvozabon hududiga uzatma berdi, Merino esa barchadan ildamroq harakat qilib hisobni ochdi. Tarkibdagi jarohatlar tufayli markaziy hujumchi pozitsiyasida o‘ynayotgan ispaniyalik yarimhimoyachi ishonchni oqlashda davom etmoqda – u 2025 yil boshidan buyon hisoblaganda «Arsenal»ning eng ko‘p gol urgan futbolchisi bo‘lib turibdi (9). O‘tgan mavsum boshidan hisoblanganda, bu uning bosh bilan urgan sakkizinchi goli bo‘ldi va bu borada unga teng keladigan boshqa futbolchi yo‘q. Xuddi APLda «Arsenal»ga teng keladigan raqib topilmayotgani kabi. Mezbonlar hisobni ochib olganidan so‘ng pragmatik o‘yin uslubiga o‘tishdi va raqibga vaziyat yaratishga ham imkon berishmadi. Ikkinchi bo‘limda zaxiradan o‘yinga qo‘shilgan Saka esa o‘yin oxirida hisobdagi farqni oshirdi. «Kanonirlar» ikkinchi o‘rindagi «Siti» bilan farqni yana 5 ochkoga yetkazib oldi.
«Brayton» – «Aston Villa» 3:4
Gollar: van Hekke, 9 (1:0). Pau Torres, 29 – avtogol (2:0). Uotkins, 37 (2:1). Uotkins, 45+7 (2:2). Onana, 60 (2:3). Malen, 78 (2:4). van Hekke, 83 (3:4)
«Brayton»: Verbryuggen, Dank, van Hekke, Ferdi Kadio‘g‘li (Uelbek, 67), Viffer, Baleba (Veltman, 78), Gomes, Gruda (Kostulas, 77), De Keyper, Minte, Tsimas (Hinshelvud, 24)
«Aston Villa»: Bizot, Konsa, Pau Torres, Matsen (Din, 70), Kesh, Onana, Kamara (Tilemans, 70), Makginn (Malen, 77), Rodjyers, Gessan (Bogard, 86), Uotkins (Buendiya, 86)
Ogohlantirishlar: Verbryuggen, 45. Gomes, 85 – Makginn, 75. Bizot, 90
Keyingi turda o‘z uyida «Arsenal»ni qabul qiladigan «Aston Villa» esa bu oqshom qiyin safar o‘yinini o‘tkazdi. «Brayton» birinchi bo‘lim o‘rtalaridan o‘tganda ikki to‘p farqi bilan oldinga chiqib olgandi, ammo shu kuni Olli Uotkins o‘tgan mavsumdagi o‘yinlarini eslab qoldi va bo‘lim oxirigacha ikkita gol urib muvozanatni tikladi. Holbuki o‘tgan mavsumda 21 ta gol urgan hujumchining o‘yinida pasayish yuz berib, APLning joriy mavsumida 13 turda atigi bitta gol urgandi.
Ikkinchi bo‘limda jamoalar yana uchta gol urishdi, shundan ikkitasi Unai Emeri shogirdlari hisobiga yozildi. O‘yin oxirida Uelbek mezbonlarni mag‘lubiyatdan qutqarib qolishi mumkin edi, ammo uning zarbasidan keyin darvozabon Bizot qutqardi. Emiliano Martines chigalyozdi mashg‘ulotlari vaqtida jarohat olgani tufayli o‘yinga tushgan zaxira darvozabon Unai Emeriga «Villa» bosh murabbiyi sifatida qo‘lga kiritilgan g‘alabalar bo‘yicha rekord o‘rnatishga (62), jamoaga esa kuchli to‘rtlikdagi o‘rnini saqlab qolishga yordam berdi.
«Liverpul» – «Sanderlend» 1:1
Gollar: Talbi, 67 (0:1). Mukiyele, 81 – avtogol (1:1)
«Liverpul»: Alisson, van Deyk, Konate, Roberson (Kerkez, 86), Gomes (Jons, 65), Makallister (Ekitike, 74), Gravenberh, Virs, Gakpo (Saloh, 46), Soboslai, Isak (Kiyeza, 86)
«Sanderlend»: Rufs, Ballard, Alderete, Mukiyele, Mandava, Hyum, Sodiqiy, Jaka, Le Fe (Gertreyda, 79), Talbi (O`Nayyen, 90+1), Brobbi (Izidor, 62)
Ogohlantirishlar: Gomes, 55 – Le Fe, 54
Saloh qatorasiga ikkinchi turda zaxira o‘rindig‘ida qoldirildi. Ammo shanba kuni «Vest Hem» maydonida kechgan o‘yinda u baribir maydonga tushmagan bo‘lsa, «Enfild»da Arne Slot misrlik hujumchini tanaffusdan keyin jangga tashlashiga to‘g‘ri keldi – mersisaydliklar qatorasiga to‘rtinchi o‘yinda dastlabki 45 daqiqada gol urolmaganidan keyin. O‘yinning ikkinchi bo‘limida mezbonlar mudofaasida parokandalik yuzaga keldi va 67-daqiqada van Deykning xatosidan foydalangan Talbi olis burchakni aniq nishonga oldi.
Faqat o‘yin oxirlarida Virsning sa’y-harakatlari bilan hisob tenglashtirildi. Jamoaning yozdagi eng qimmatbaho transferlaridan bo‘lgan germaniyalik futbolchi raqib jarima maydonida ikki himoyachidan o‘tdi, uning zarbasi kutilganidek chiqmadi, ammo to‘p mehmonlar himoyachisi Mukiyele orqali darvoza to‘riga borib tushdi. Qo‘shimcha daqiqalarda esa mersisaydliklar durangdan ham quruq qolishi mumkin edi. Bu vaqtda jamoa to‘liq kuch bilan hujumga o‘tgandi va mehmonlarning xavfli qarshi hujumi o‘tkazib yuborildi, ammo «Sanderlend» hujumchisi Izidorning darvozabondan o‘tgan zarbasini himoyaga yordamga yetib kelgan Kiyeza darvoza chizig‘i ustida to‘xtatib qoldi. Shu bilan birga, «Liverpul» 2004 yildan buyon ilk bor qatorasiga uch uy o‘yinida g‘alaba qozona olmadi va turnir jadvalida hozircha sakkizinchi o‘rinda qoldi.
«Lids» – «Chelsi» 3:1
Gollar: Biyol, 6 (1:0). Tanaka, 43 (2:0). Pedru Netu, 50 (2:1). Kalvert-Lyuin, 72 (3:1)
«Lids»: Perri, Biyol, Streyk, Rodon, Ampadu, Shtah, Tanaka (Gruyev, 67), Gudmundsson (Bornau, 90+4), Bogl (Jastin, 87), Kalvert-Lyuin (Piru, 86), Nmecha (Okafor, 67)
«Chelsi»: Sanches, Adarabioyo, Badiashile (Gyusto, 46), Kukurelya, Chaloba, Fernandes, Santos (Giu, 77), Joao Pedro, Gittens (Palmer, 61), Estevan (Pedru Netu, 46), Delap (Garnacho, 61)
Ogohlantirishlar: Shtah, 35 – Estevao, 39
O‘tgan haftada YeChLda «Barsa»ni yirik hisobda mag‘lub etgan, APLda «Arsenal»ga qarshi bir kishi kam bo‘lib o‘ynab, durangga erishgan «Chelsi» bor kuch va hissiyotlarini shu o‘yinlarga sarflab yuborgani ma’lum bo‘ldi. Lidsdagi o‘yin mehmonlar uchun tezkor gol o‘tkazish bilan boshlandi, burchak zarbasidan keyin Biyol hisobni ochdi. Bo‘lim oxirida esa Mareskaning rotatsiyasi pand berdi va himoyachilarning xatosi tufayli ikkinchi gol o‘tkazildi. Ikkinchi bo‘lim boshida Netu hisobni qisqartirishga erishdi, ammo mezbonlar yana bir bor mehmonlar himoyasidagi xatodan foydalanib, o‘yin taqdirini hal qilishdi: 72-daqiqada Tosin Adarabioyo Okaforning bosimi ostida to‘p yo‘qotdi va Kalvert-Lyuin bo‘sh darvozani ishg‘ol etish imkoniyatiga ega bo‘ldi. Mag‘lubiyat tufayli londonliklar ikkinchi o‘ringa qaytish imkoniyatidan mahrum bo‘lishdi va endi to‘rtinchi o‘ringa tushgan jamoa peshqadam «Arsenal»dan 9 ochkoga ortda qolmoqda.
Ispaniya: «Barselona» bilan poyga
«Atletik» – «Real» 0:3
Gollar: Mbappe, 7 (0:1). Kamavinga, 42 (0:2). Mbappe, 59 (0:3)
«Atletik»: Simon, Vivian, Lyaport, Boyro, Lekue (Areso, 46), Ruis de Galarreta (Gomes, 46), Rego, Xauregisar (Vesga, 69), Uilyams (Sanches, 78), Berenger (Serrano, 69), Guruseta
«Real»: Kurtua, Eder Militau (Dias, 78), Ryudiger, Karreras, Aleksandr-Arnold (Raul Asensio, 55), Tshuameni, Bellinghem, Kamavinga (Arda Guler, 69), Vinisius Junior (Rodrigu, 78), Valverde, Mbappe (Garsiya, 78)
Ogohlantirishlar: Berenger, 66. Rego, 76
Ispaniya Superkubogi o‘yinlari ishtirokchilarining La Liganing 19-turi doirasidagi o‘yinlari dekabrga ko‘chirilgandi. Bir kun oldin «Barselona» «Atletiko»ni mag‘lub etdi (3:1), endi esa «Real» qatorasiga uch durangdan keyin o‘z maydonida har qanday raqibga muammo tug‘diradigan «Atletik» qarshiligini yengishi talab etildi.
Lekin bu o‘yin Mbappe omili tufayli mehmonlar uchun ancha oson kechdi. Fransuz hujumchisi o‘yin startidayoq himoyachidan yengil harakat bilan o‘tib ketdi va to‘pni olis burchakka aniq yo‘lladi. Birinchi bo‘lim oxirida esa uzoq cho‘zilgan kombinatsiya Aleksander-Arnoldning olis ustun tomon uzatmasi va u yerda yolg‘iz turgan Kamavinga darvozani ishg‘ol etishi bilan yakunlandi. «Atletik» esa o‘z imkoniyatlaridan foydalana olmadi, shu bilan birga, Unai Simon Vinisius Juniorga hisobni yiriklashtirishga yo‘l qo‘ymadi.
Lekin ikkinchi bo‘limda baribir hisob yiriklashdi, Mbappe jarima maydoni tashqarisidan qaytarib bo‘lmas zarba yo‘lladi. Bu uning joriy yil boshidan buyon urgan 62-goliga aylandi. Bu esa XXI asrdagi eng yaxshi beshinchi ko‘rsatkich. Unda Messidan keyingi ikkinchi o‘ringa chiqib olish uchun imkoniyat bor (2012 yilda 91 gol urgan). Buning uchun dekabr oxirigacha qolgan o‘yinlarda yana yetti gol urish kerak bo‘ladi: shunda u Krishtianu (2013) va Levandovski (2021) bilan tenglashib olishi mumkin.
Bundan tashqari, Kilian bu mavsumda barcha turnirlar doirasida 25 gol va to‘rt golli uzatma bilan eng sermahsul futbolchi bo‘lib turibdi. Ammo asosiysi – duranglar seriyasidan keyin g‘alabaga erishildi va «Barselona» oldinga chiqib ketishiga yo‘l qo‘yilmadi.
Budapeshtdagi «Pushkash Arena» stadionida Parijning «Pari Sen-Jyermen» va Londonning «Arsenal» klublari o‘rtasida 2025/26 yilgi UYeFA Chempionlar ligasi finali bo‘lib o‘tdi.
Uchrashuvning 6-daqiqasida «Arsenal» futbolchisi Kay Xavers hisobni ochdi. 63-daqiqada Moskera jarima maydonida Kvaratsxeliyani yiqitdi va «Arsenal» darvozasi tomon penalti belgilandi. Dembele penaltini aniq bajarib, hisobni tenglashtirdi.
O‘yinnig asosiy vaqti va qo‘shimcha taymlarda darvozalar ishg‘ol etilmagach, penaltilar seriyasi belgilandi. Penaltilar seriyasida PSJ 5:4 hisobida g‘alaba qozondi.
Parijliklar «Real»dan keyin chempionlik unvonini himoya qilgan ikkinchi jamoaga aylanishdi. «Real» bu natijaga 2016/17 va 2017/18 yilgi mavsumlarda erishgandi.
Jamoalar o‘tgan mavsum yarim finalida o‘zaro to‘qnashgandi. O‘shanda Luis Enrike boshchiligidagi jamoa har ikki o‘yinda g‘alaba qozonib, ikki uchrashuv natijasiga ko‘ra 3:1 hisobida ustun kelgan. Keyin esa finalda “Inter”ni 5:0 hisobida mag‘lub etib, klub tarixida ilk bor Chempionlar kubogini qo‘lga kiritgandi.
Jamoalar bugunga qadar jami besh marta to‘qnash kelgan. O‘tgan mavsum yarim finaliga qadar parijliklar biror marta ham g‘alaba qozonmagan edi. O‘tgan mavsum umumiy bosqichda «Arsenal» g‘alaba qozongan, 2016/17 yilgi musobaqada esa raqiblar ikki marta durang o‘ynagan.
Budapeshtgacha bo‘lgan yo‘lda jamoalar turlicha uslubda harakat qildi. «Arsenal» himoyadagi ishonchli o‘yini bilan ajralib turdi. «To‘pchilar» to‘qqizta uchrashuvda o‘z darvozasini daxlsiz saqladi va umumiy bosqichda atigi to‘rtta gol o‘tkazib yubordi.
«PSJ»ning asosiy quroli esa hujumdagi samaradorlik bo‘ldi. Parijliklar ushbu musobaqada 1999/2000 yilgi Chempionlar ligasida 45 ta gol urgan «Barselona» rekordini takrorladi.
«Arsenal»ning yuksalishi bosqichma-bosqich kechdi: 2023/24 mavsumda chorak final, keyingi mavsumda yarim final va endi esa 2005/06 yildan beri ilk marta final.
E’tiborlisi, har ikki jamoa bu yilgi mavsumda o‘z mamlakatlari birinchiligida chempionlikni qo‘lga kiritishdi.
Toshkentda o‘tkazilayotgan dzyudo bo‘yicha Osiyo kubogida o‘smirlar o‘rtasidagi bahslar yakunlandi.
Unda O‘zbekiston terma jamoasi a’zolari 13 ta oltin, 9 ta kumush va 17 ta bronza medal bilan umumjamoa hisobida birinchi o‘rinni egallashdi.
Bugundan yoshlar toifasidagi bahslar boshlanadi.
Ispaniyaning «Real» futbol klubi ketma-ket beshinchi marta Forbes jurnali tomonidan dunyoning eng qimmat klubi deb topildi.
Foto: Gustavo Valiente/Xinhua/Getty Images
Madrid klubining qiymati 9,5 milliard dollarga baholanmoqda, bu o‘tgan yilga nisbatan (6,75 milliard dollar) 41 foizga ko‘pdir.
Kuchli uchlikka «Barselona» ($7,5 mlrd) va «Manchester Yunayted» ($7,2 mlrd) ham kirdi. Eng qimmat klublar o‘ntaligida quyidagilar bor: «Liverpul» ($6,2 mlrd), «Pari Sen-Jyermen» ($5,8 mlrd), «Bavariya» ($5,7 mlrd), «Manchester Siti» ($5,5 mlrd), «Arsenal» ($5,4 mlrd), «Chelsi» ($4,2 mlrd) va «Tottenhem» ($3 mlrd).
Forbes reytingiga jami 30 ta klub kiritilgan bo‘lib, ularning umumiy qiymati 87 milliard dollarga yetgan. Bitta klubning o‘rtacha qiymati 2,9 milliard dollarni tashkil etdi, bu 2025 yilga (2,4 milliard dollar) nisbatan 21 foizga ko‘pdir.
Ro‘yxatdagi eng ko‘p vakil Angliya Premer-Ligasidan (APL) – 11 ta klub, undan keyin Shimoliy Amerikaning MLS ligasidan 7 ta klub va Italiya A Seriyasidan 4 ta klub.
O‘tgan mavsumda «Real» so‘nggi besh yil ichida birinchi marta sovrinsiz qoldi. Madridliklar Ispaniya chempionatida «Barselona»dan keyin ikkinchi o‘rinni egalladi, shuningdek, 1/8 final bosqichida «Albasete»ga 2:3 hisobida mag‘lub bo‘lib, Ispaniya Kubogidagi kurashni yakunladi. «Real» mamlakat Superkubogida «Barselona»ga yutqazdi (2:3).
Shuningdek, klub ketma-ket ikkinchi yil Chempionlar Ligasi yarimfinaliga chiqolmadi. Jamoa 1/4 final bosqichida Myunxenning «Bavariya» klubiga yutqazdi.
2027 yilgi U-20 Osiyo Kubogi saralash bosqichiga qur’a tashlandi.
Qur’a natijalariga ko‘ra, O‘zbekiston U-20 terma jamoasi «B» guruhidan joy oldi. Jamoliddin Rahmatullayev boshchiligidagi yosh futbolchilar saralash bahslarida Suriya, Hindiston va Bangladesh terma jamoalariga qarshi maydonga tushadi.
Eslatib o‘tamiz, O‘zbekiston U-20 terma jamoasi ishtirokidagi saralash uchrashuvlari 2026 yilning 25 avgustidan 6 sentyabriga qadar Toshkent shahrida bo‘lib o‘tadi.
Foto: Jonathan Ernst/Reuters
FIFAning yangi biznes modeli muxlislarni ranjityapti. Inflatsiyani hisobga olgan taqdirda ham, AQSh, Kanada va Meksikada o‘tadigan bu galgi jahon chempionati chiptalari narxi 2022 yil Qatardagi turnirdan ikki baravar, 1994 yil AQShdagi musobaqaga nisbatan esa qariyb to‘rt baravar qimmatroq. The Economist’ning yozishicha, o‘zgargan narx siyosati katta tavakkalga asoslangan. Chiptalar hali to‘liq sotilib bo‘lingani yo‘q va mezbon shaharlardagi mehmonxonalar to‘lmagan. Yuqori narxlar savdo pasayishi oqibatida yuzaga kelgan zararni qoplasa ham, FIFAning ko‘proq daromad keltiradigan boshqa manbalariga salbiy ta’sir qilishi mumkin.
Xalqaro futbol federatsiyasi prezidenti Janni Infantino FIFAni “dunyoga baxt ulashuvchi tashkilot” deya ta’riflaydi. Ammo, bu yil Shimoliy Amerikada o‘tadigan Jahon chempionatida bu “baxt” qimmatga tushishi mumkin, deb yozadi The Economist.
Mundial guruh bosqichi o‘yinlari uchun eng arzon chiptalar narxi o‘rtacha 200 dollarni, final uchrashuvi chiptalari esa kamida 2030 dollarni tashkil etadi. Bu esa 2026 yildagi chempionatni tarixdagi eng qimmat madaniy tadbirga aylantirishi mumkin.
Odatda jahon chempionati o‘yinlari uchun chiptalar bozor ko‘tara oladigan narxdan ancha arzon sotib kelingan. Turnir tarixi davomida talab har doim taklifdan yuqori bo‘lib keladi. Shunday bo‘lsa-da, ko‘proq pul ishlash o‘rniga, FIFA narxlarni oddiy muxlislar sotib oladigan darajada ushlab kelgan va chiptalarni lotereya ko‘rinishida tarqatgan. Tashkilot moliyaviy barqarorligi uchun chipta tushumidan ko‘ra, translatsiya va homiylik huquqlari ancha muhimroq ahamiyat kasb etadi.
Bu yil esa vaziyat boshqacha. Ilk bor FIFA chiptalar savdosini mahalliy tashkilotchilarga topshirish o‘rniga, bevosita o‘z nazoratiga oldi. Tashkilot “dinamik narxlash” tizimini joriy qildi, ya’ni talab oshgani sari chiptalar narxi ham ko‘tariladi. Shuningdek, rasmiy qayta sotuv platformasi ishga tushirildi va u yerda xaridor ham, sotuvchi ham amalga oshirilgan savdo uchun 15 foizlik komissiya to‘laydi.
Inflatsiyani hisobga olgan taqdirda ham, AQSh, Kanada va Meksikada o‘tayotgan bu galgi Jahon chempionati chiptalari narxi 2022 yil Qatardagi turnirdan ikki baravar, 1994 yilgi AQSh turniriga nisbatan esa qariyb to‘rt baravar qimmatroq.
Final o‘yini uchun ayrim chiptalar qayta sotuv bozorida hatto 2 million dollargacha qimmatlashgan. Besh karra jahon chempioni — Braziliya terma jamoasi muxlislari o‘z futbolchilarining guruh bosqichidagi uchta o‘yinini tomosha qilish uchun qayta sotuv bozorida taxminan 3 800 dollar sarflashiga to‘g‘ri keladi — bu barcha mamlakatlar ichida eng yuqori ko‘rsatkich. Hatto Jahon chempionatida ilk bor qatnashayotgan Kabo-Verde muxlislari ham qariyb 1000 dollar to‘lashi kerak. Taqqoslash uchun, bu yilgi Yevropa Chempionlar ligasi finalining kattalar uchun eng arzon chiptasi 200 dollardan taklif etildi.
The Economist’ning qayt etishicha, FIFAning yangi narx siyosati katta tavakkalga o‘xshab ko‘rinyapti. Birinchidan, chiptalar hali to‘liq sotib bo‘lingani yo‘q va mezbon shaharlardagi mehmonxonalar to‘lmagan. Ayrim o‘yinlar uchun qayta sotuvdagi narxlar keyinchalik pasayishi mumkin. Ammo chiptalar arzonlashguncha, ko‘plab muxlislar safarga borish umididan voz kechish ehtimoli bor. Energetika inqirozi sabab aviachiptalar narxi keskin oshib boryapti.
Yuqori narxlar savdo pasayishi oqibatida yuzaga kelgan zararni qoplasa ham, bu FIFAning yanada daromadliroq manbalariga salbiy ta’sir qilishi mumkin. To‘la stadionlar teleekranda o‘yinlarni jozibador qiladigan shovqin va ajoyib atmosferani yaratadi. Xalqaro futbol federatsiyasi o‘tgan yil klublar o‘rtasidagi jahon chempionati vaqtida ham noqulay holatga tushgandi: tomoshabin kam kelgan o‘yinlarda muxlislar televizion kameralar tomon ko‘chirilgani haqida xabarlar tarqalgandi. Tadqiqotlar shuni ko‘rsatadiki, boyroq muxlislar sokinroq bo‘lishadi va stadionda hissiyotlarini kamroq namoyon qiladi. Masalan, 2022 yilgi amerikancha futbol ligasi muhiti “korporativ kechki ovqat”ga o‘xshatilgandi.
To‘g‘ri, boylar tobora ko‘proq pullarini qimmatbaho buyumlarga emas, balki “hayotda bir marta bo‘ladigan” jarayonlar uchun sarflashni afzal ko‘ra boshlashgan. Bu FIFA uchun yaxshi yangilikdek tuyuladi. Muammo shundaki, aynan shu boy muxlislarning o‘zi ular izlayotgan o‘sha noyob jarayonning jozibasini kamaytirib yuborishi mumkin.
oziq-ovqat narxlari nega oshib boryapti?
MIT PhD dasturiga 100 foizlik grant yutgan Munisa Jumanova hikoyasi
Prezident Zelenskiy Rossiya yana bir yirik hujumga tayyorlanayotgani haqida ogohlantirdi
-
Iqtisodiyot4 days ago1 dollar ≠ 1 so‘m ≠ 1 rubl. Valutalar qiymati nega har xil?
-
Jamiyat5 days agoToshkentda uy savdosi bilan bog‘liq mojaro tergov qilinmoqda
-
Mahalliy5 days ago
Oliy attestatsiya komissiyasi rahbari ishdan olindi
-
Sport4 days agoForbes dunyoning eng serdaromad sportchilari reytingini e’lon qildi
-
Iqtisodiyot3 days agoBirjada bug‘doy va sement narxi pasaydi
-
Jamiyat4 days agoBuxoroda YTH sodir qilgan haydovchi 10 sutkaga qamaldi
-
Iqtisodiyot4 days ago
O‘zbekistonda oilaviy korxonalar soni 36 mingtadan oshdi
-
Dunyodan4 days ago
Eronning boyitilgan uranini yo’q qilish kerak