Sport
«Arsenal» «Atletiko»ga imkon qoldirmadi, «Barsa» 6 ta, «PSJ» 7 ta gol urdi
«Napoli» kutilmaganda safarda yirik hisobda yutqazdi, «Qayrat» deyarli 90 daqiqa bir kishi ko‘p o‘ynab gol urolmadi. Seshanba oqshomida YeChLning 3-turi doirasidagi asosiy voqealar, o‘yinlardagi gollar va turnir jadvalidagi vaziyat.
«Arsenal»da ideal o‘yin
«Arsenal» – «Atletiko» 4:0
Gollar: Gabriel Magalyayns, 57 (1:0). Martinelli, 64 (2:0). Yokeresh, 67 (3:0). Yokeresh, 70 (4:0)
«Arsenal»: Rayya, Saliba, Gabriel Magalyayns (Moskera, 72), Lyuis-Skelli, Timber (Uayt, 83), Subimendi (Norgar, 72), Rays, Eze (Nvaneri, 72), Martinelli, Saka, Yokeresh (Merino, 83)
«Atletiko»: Oblak, Ximenes (Rudjyeri, 63), Le Norman, Gansko, Liorente, Koke (Gallaher, 63), Barrios, Gonsales (Baena, 63), Simeone (Almada, 72), Serlot (Grizmann, 72), Alvares
Ogohlantirishlar: Subimendi, 38 – Ximenes, 33. Le Norman, 75
«Kanonirlar» bu mavsumda ham chempionlik uchun asosiy da’vogarlar qatorida ekanini namoyish etmoqda. Arteta shogirdlari oldingi turlarda nisbatan osonroq raqiblar – «Atletik» va «Olimpiakos» ustidan 2:0 hisoblarida g‘alaba qozongandi. Bu safar esa «Atletiko»ga qarshi o‘yin jamoa uchun ilk jiddiy sinov bo‘lishi kutilgandi. Ammo Diyego Simeone jamoasi birinchi bo‘limda chuqur himoyalanib, darvozasi daxlsizligini saqlab qolgan bo‘lsa-da, tanaffusdan keyin 13 daqiqa ichida to‘rtta gol o‘tkazib yubordi. Avvaliga londonliklar odatdagi kabi standart vaziyatdan unumli foydalanishdi, Rays jarima zarbasidan to‘pni oshirib berdi, Magalyayns boshi bilan aniq zarba berdi. Keyin esa chap qanot himoyachisi Lyuis-Skelli to‘pni jarima maydoniga qadar olib borib, Martinellini golli pas bilan ta’minladi. Golsiz seriyasi uchun tanqidga uchrayotgan Yokeresh esa dubl rasmiylashtirdi. U dastlab Ezening zarbasidan keyin to‘pga ega chiqib, darvozani ishg‘ol etdi, keyin esa yana bir standart vaziyatni yakunlab berdi. Rays burchak zarbasidan keyin to‘pni olis ustun tomon yetkazdi, Magalyayns esa to‘pni darvozabon hududiga tashlab berdi va Viktor kerakli joyda paydo bo‘ldi. «Arsenal» uchinchi o‘yinda ham darvozasi daxlsizligini saqlab qoldi va uch o‘yinda uch g‘alaba bilan peshqadamlar safida bormoqda.
Son jihatdan ustunlik – kafolat emas
«Qayrat» – «Pafos» 0:0
«Qayrat»: Anarbekov, Martinovich, Sorokin, Luish Mata, Tapalov (Tuyakbayev, 46), Arad (Rikardinio, 90+2), Gleyzer (Zariya, 61), Jorjinio, Gromiko (Kasabulat, 89), Mrinskiy, Satpayev
«Pafos»: Mixail, David Luiz, Lyukkassen, Pileas (Goldar, 66), Brunu (Langa, 90), Shunich, Pepe (Sema, 79), Dragomir, Orshich (Dimata, 79), Kina (Bassauamina, 66), Joau Korreya
Ogohlantirishlar: Satpayev, 21. Arad, 40. Tuyakbayev, 82 – Shunich, 80
Chetlatish: Joau Korreya, 4
«Qayrat» Chempionlar ligasidagi ilk ochkosini qo‘lga kiritdi, ammo Almatidagi stadionga yig‘ilgan muxlislarni bu qoniqtirgani dargumon. Birinchidan, raqib Qozog‘iston chempionlari yengishi mumkin bo‘lgan jamoalar sirasidan edi, qolaversa, «Pafos» to‘rtinchi daqiqadayoq Korreyaning chetlatilishi tufayli bir kishi kam bo‘lib qoldi. Kiprliklar ozchilik holatda ham hujumlarda xavfli o‘ynadi va o‘yin tugashiga 20 daqiqa qolganida darvozani ishg‘ol qildi ham. Ammo hakamlar «Pafos»ning ushbu hujumi vaqtidagi ofsayd holatini qayd etib, «Qayrat»ning joniga ora kirdi. Shundan keyin Rafael Urazbaxtin shogirdlarida ham chinakamiga xavfli vaziyat yuzaga keldi, ammo Aradaning zarbasidan keyin to‘p darvoza ustuniga tegdi. Umuman, mezbonlar o‘yin davomida 22 marta zarba berdi, ammo shundan faqat 2 tasi darvoza sohasiga to‘g‘ri bordi, mehmonlarda esa 9 zarbadan 6 tasi aniq bo‘ldi. Yakunda «Pafos» YeChLda ikkinchi ochkosini qo‘lga kiritdi.
Ferminning tarixiy het-trigi
«Barselona» – «Olimpiakos» 6:1
Gollar: Fermin Lopes, 7 (1:0). Fermin Lopes, 39 (2:0). Al-Kaabi, 54 – penalti (2:1). Yamal, 68 – penalti (3:1). Reshford, 74 (4:1). Fermin Lopes, 76 (5:1). Reshford, 79 (6:1)
«Barselona»: Shchensni, Kubarsi, Garsiya, Balde (Arauxo, 75), Kunde (Martin, 75), Pedri (Bernal, 80), Kasado, Fernandes (de Yong, 59), Fermin Lopes, Yamal (Bardji, 75), Reshford
«Olimpiakos»: Tzolakis, Pirola, Retsos, Ortega (Onemayechi, 53), Koshtinya, Dani Garsiya, Esse, Shikinyu (Diogu Nasimentu, 31), Podense (Yaremchuk, 77), Martinsh (Muzakitis, 46), Al-Kaabi (Taremi, 77)
Ogohlantirishlar: Balde, 23 – Esse, 35. Dani Garsiya, 39. Podense, 55
Chetlatish: Esse, 57 (ikkinchi sariq)
Birinchi bo‘limda Fermin Lopes ikkita gol urdi. «Olimpiakos» esa ikkinchi bo‘lim boshida turnirdagi ilk golini urib, o‘yinga intrigani qaytardi. Bu vaziyatda Erik Garsiya to‘pni qo‘li bilan o‘ynadi va Al-Kaabi penaltini aniq ijro etdi. Ammo arbitrning keyingi qarori greklar zarariga bo‘ldi. Hakam to‘p uchun kurash vaqtida Esse raqibning yuziga urib yuborgan deb topdi va argentinalik futbolchiga ikkinchi sariq kartochkani ko‘rsatdi. Holbuki bu vaziyatda mezbonlar futbolchisi Kasado aktyorlik mahoratini ishga solgandi, ammo VAR vaziyatga aralashmadi va xatoni tuzatmadi.
Shundan keyin pireyliklarning kayfiyati tushib ketdi va o‘yinning qolgan qismida kataloniyaliklar istaganini qilishdi. 68-daqiqada hakam Shnider yana bir bahsli qaror chiqardi, Reshford raqib jarima maydoni ichida darvozabon bilan kontaktdan keyin yiqildi va mehmonlar darvozasiga penalti qo‘yildi, holbuki bu vaziyatda darvozabon to‘pga birinchi ulgurgandi. 11 metrlik zarbani Yamal aniq ijro etdi. Qolgan vaqt mobaynida Reshford dublni rasmiylashtirdi, Fermin esa uchinchi golini urdi – 6:1. E’tiborli jihati Lopes «Barsa» safida YeChL o‘yinida het-trik qayd etgan ilk ispaniyalik futbolchiga aylandi. Kataloniyaliklar Yevropa maydonlarida sakkiz yarim yildan buyon bir o‘yinda oltita gol urmagandi (bunaqasi oxirgi marta «PSJ» bilan o‘sha mashhur o‘yindagi 6:1 hisobi bo‘lgandi).
«10 ga 10» formatidagi yirik hisob
«Bayyer» – «PSJ» 2:7
Gollar: Pacho, 7 (0:1). Garsiya, 38 – penalti (1:1). Due, 41 (1:2). Kvaratsxeliya, 44 (1:3). Due, 45+3 (1:4). Nunu Mendesh, 50 (1:5). Garsiya, 54 (2:5). Dembele, 66 (2:6). Vitinya, 90 (2:7)
Aniq ijro etilmagan penalti: Grimaldo, 25’
«Bayyer»: Flekken, Bade, Tapsoba, Andrix, Fernandes (Mensa, 81), Garsiya, Grimaldo, Artur, Echeverri (Maza, 46), Poku (Ben Segir, 63), Kofane (Belosyan, 52)
«PSJ»: Shevale, Zabarniy, Pacho, Nunu Mendesh, Hakimi, Vitinya, Due (Ernandez, 46), Zair-Emeri (Ndjantu, 76), Barkolya (Mbay, 72), Kvaratsxeliya (Li Kan In, 63), Mayulu (Dembele, 63)
Ogohlantirishlar: Echeverri, 43. Tapsoba, 45 – Zabarniy, 24
Chetlatishlar: Andrix, 31. Zabarniy, 37
Erik ten Hag iste’foga chiqarilib, uning o‘rniga Kasper Yulmann tayinlanganidan buyon mag‘lubiyatsiz seriya qayd etib kelayotgan «Bayyer» «PSJ» mashinasini to‘xtata olmadi. Bu jamoalar kunning eng sermahsul o‘yinini o‘tkazib berishdi – muxlislar jami to‘qqizta gol ko‘rishdi. Shundan yettitasi parijlik futbolchilar nomiga yozildi.
Yirik g‘alabaga qaramay, Yevropaning amaldagi chempionlari himoyasida muammolar ko‘zga tashlanmoqda. Zabarniyning folidan keyin parijliklar darvozasiga penalti qo‘yildi, ammo Grimaldo bu imkoniyatdan foydalana olmadi, ko‘p o‘tmay Andrix tirsagi bilan Duening yuziga urib yuborgani uchun qizil kartochka oldi va mezbonlar bir kishi kam bo‘lib qolishdi. Ammo Zabarniy yana hunar ko‘rsatdi va yana jarima maydoni ichida qo‘pollik ishlatib, ikkinchi penaltiga sababchi bo‘ldi, yetmaganiga qizil kartochka olib maydonni tark etdi. «10 ga 10» formatida ham Luis Enrike shogirdlari mezbonlarga hech qanday imkoniyat qoldirmadi. Due dubl muallifiga aylandi. Uchinchi golli hujumda Dezirega assistentlik qilgan Kvaratsxeliya bo‘lim oxirida kuchli zarba bilan hisobni tenglashtirdi. Ikkinchi bo‘lim boshida Mendesh hisobdagi farqni oshirdi, zaxiradan o‘yinga qo‘shilgan Dembele ham o‘z golini urdi, so‘nggi daqiqalarda esa Vitinya yakuniy hisobni o‘rnatdi – 7:2. Uch o‘yinda uch g‘alabaga erishgan «PSJ» to‘plar nisbatiga ko‘ra yaxshiroq ko‘rsatkichga ega bo‘lgani uchun turnir jadvalini boshqarishda davom etmoqda.
Holandda superseriya
«Vilyarreal» – «Manchester Siti» 0:2
Gollar: Holand, 17 (0:1). Bernardu Silva, 40 (0:2)
«Vilyarreal»: Luis Junior, Foyt, Veyga, Pedrasa (Kardona, 46), Mourinio, Komesanya (Peres, 72), Parti, Geyye (Parexo, 81), Byukenen (Moleyro, 66), Mikautadze (Oluvaseyi, 66), Pepe
«Manchester Siti»: Donnarumma, Ruben Diash, Stouns, Gvardiol, Mateus Nunes, Bernardu Silva, Lyuis (Reynders, 73), Gonsales (Kovachich, 57), Doku (Bobb, 72), Savio (Marmush, 86), Holand (Sherki, 86)
Ogohlantirishlar: Pedrasa, 11. Mourinio, 45. Geyye, 75. Moleyro, 85 – Bernardu Silva, 22. Ruben Diash, 65
«Vilyarreal» Holandning navbatdagi qurboniga aylandi, norvegiyalik hujumchi tezkor gol urib, rasmiy o‘yinlardagi golli seriyasini 12 taga yetkazib qo‘ydi. Lyuisning uzatmasidan keyin to‘pni bir teginishda darvoza to‘riga yo‘llagan hujumchida YeChLda o‘tkazgan o‘yinlaridan ko‘ra ko‘proq golga ega – 51 o‘yinda 53 gol. Erling ikkinchi gol urilishida ham muhim rol o‘ynadi, mezbonlar himoyachilari Savinio aynan unga uzatma berishini kutib, Bernardu Silvani bo‘sh qoldirishgandi. Mezbonlar munosib qarshilik ko‘rsatishdi va xG bo‘yicha nomdor raqibdan unchalik ortda qolmadi – 1,50 ga qarshi 1,38, zarbalar soni bo‘yicha esa ustunroq ham bo‘ldi (11:10), ammo hujumlarni yakunlashda oqsash kuzatildi. Ishonchli g‘alabadan keyin «shaharliklar» 7 ochko bilan kuchli sakkizlikda qoldi, uch o‘yinda atigi bir ochko olgan «sariq submarinalar» esa umumiy jadvalning quyi qismiga sho‘ng‘idi.
«Inter» ham gol o‘tkazmayapti
«Yunion» – «Inter» 0:4
Gollar: Dyumfris, 41 (0:1). Martines, 45+1 (0:2). Hoqon Chalxono‘g‘li, 53 – penalti (0:3). Espozito, 76 (0:4)
«Yunion»: Sxerpen, Berdjyess, Leysen, Makallister, Rasmussen (Rodriges, 61), van de Perre, Zorgan (Sxofs, 84), Nyang (Patris, 75), Xalaili, Ait Al-Hoji (Floruch, 60), Devid (Jiger, 61)
«Inter»: Zommer, de Vrey (Akanji, 46), Bastoni (Dimarko, 59), Bissek, Zelinski, Frattezi, Hoqon Chalxono‘g‘li (Suchich, 59), Karlos Augustu, Dyumfris (Luis Enrike, 77), Martines (Bonni, 58), Espozito
Ogohlantirishlar: Sxofs, 89 – de Vrey, 31
«Inter»da ideal start – uch turda uch g‘alaba. YeChLning o‘tgan mavsumi finalchisi bu safar Belgiyada «Yunion»ga rahm qilmadi. Mezbonlar o‘yinni yaxshi boshlagandi, ammo o‘z imkoniyatlaridan foydalana olmadi, Zommer ikki bor seyv qilishiga to‘g‘ri keldi, yana bir vaziyatda himoyachilardan biri to‘pni darvoza chizig‘i oldida to‘xtatdi. Shundan keyin mehmonlar tashabbusni o‘z qo‘liga ola boshladi va tanaffus arafasida Dumfris va Martinesning sa’y-harakatlari bilan ikki gol urishdi. Ikkinchi bo‘lim boshida esa «neradzurrilar» penalti ishladi, Chalxono‘g‘li odatdagidek sovuqqonlik bilan aniq zarba berib, hisobni yiriklashtirdi. Keyin esa «Inter»ning yosh yulduzi Espozito asosiy yevrokubokdagi ilk golini nishonladi. Milanliklar ham xuddi «Arsenal» kabi uchinchi o‘yinda ham darvozasi daxlsizligini saqlab qolishdi.
«Napoli» 6 ta gol o‘tkazib yubordi
«PSV» – «Napoli» 6:2
Gollar: Maktominay, 31 (0:1). Buondjorno, 35 – avtogol (1:1). Saybari, 38 (2:1). Man, 54 (3:1). Man, 80 (4:1). Maktominay, 86 (4:2). Pepi, 87 (5:2). Driosh, 89 (6:2)|
«PSV»: Kovarj, Gaserovski (Obispo, 46), Sxauten, Salax-Eddin (Dest, 85), Flamingo, Mauro Junior, Verman, Saybari (Vanner, 88), Perishich (Pepi, 85), Man, Til (Driosh, 85)
«Napoli»: Milinkovich-Savich, Buondjorno, Bekema (Guterres, 58), Spinatssola (Juan Jyezus, 58), Di Lorenso, Gilmor (Lang, 58), De Bryuyne (Elmas, 85), Zambo Angissa, Maktominay, Politano (Neres, 73), Lukka
Ogohlantirishlar: Gaserovski, 28. Verman, 30. Saybari, 70. Driosh, 90 – Spinatssola, 42
Chetlatish: Lukka, 76
Eyndhovenda esa sensatsiya qayd etildi. Italiyaning amaldagi chempioni «Napoli» Niderlandiyada oltita gol o‘tkazib yuborishini hech kim kutmagandi. Antonio Konte jamoasi mudofaasi shu kuni ochiq eshiklar kuni o‘tkazdi, shu tufayli Maktomineyning dubli durang uchun ham yetarli bo‘lmadi. 76-daqiqada mehmonlar hujumchisi Lukka maydondan chetlatilishi hisob yiriklashib ketishiga sabab bo‘ldi. Shundan keyin ruminiyalik vinger Man dublni rasmiylashtirdi, ko‘pchilikka tanish bo‘lmagan marokashlik Driosh 1+1 qayd etdi. Italiya jamoalari YeChLda o‘n yildan buyon buncha gol o‘tkazmagandi. O‘shanda «Roma» «Barselona» tomonidan tor-mor etilgan (1:6). Ammo Yevropa grandiga bunday yutqazish boshqa ish, odatda o‘zi yirik hisobda yutqazib yuradigan PSVdan buncha ko‘p gol o‘tkazish boshqa ish, Niderlandiya jamoalari asosiy yevrokubokda 1979 yildan buyon bir o‘yinda 6 ta gol urgani ham ko‘p narsani anglatadi.
Dortmundliklarda barqarorlik
«Kopenhagen» – «Borussiya» D 2:4
Gollar: Nmecha, 20 (0:1). Anton, 33 – avtogol (1:1). Bensebaini, 61 – penalti (1:2). Nmecha, 76 (1:3). Silva, 87 (1:4). Dadason, 90 (2:4)
«Kopenhagen»: Kotarski, Gabriel Pereyra, Xatzidiakos (Garananga, 75), Meling (Lopes, 63), Sudzuki, Lerager, Klem (Zage, 81), Ashuri (Madsen, 81), Larsson (Dadason, 75), Klasson, Mukoko
«Borussiya» D: Kobel, Shlotterbek, Bensebaini (Anselmino, 85), Anton, Bellinghem, Nmecha (Zabitser, 77), Svensson, Koutu (Ryuerson, 62), Bayyer (Chukvuemeka, 62), Brandt (Silva, 62), Girassi
Ogohlantirishlar: Lerager, 60. Zage, 89 – Bensebaini, 75
«Borussiya» uchun barchasi ajoyib boshlandi – Nmecha jarima maydoni chizig‘i oldidan turib, to‘pni to‘sin ostidan darvoza to‘riga yo‘lladi. Ammo «Kopenhagen» tarkibida shu kuni dortmundliklarga qarshi katta ishtiyoq bilan to‘p surishi aniq bo‘lgan futbolchi bor edi. Bu shu yozda «asalarilar» safidan Daniya klubiga o‘tgan Mukoko. Aynan ushbu forvard burchak zarbasidan keyin jarima maydoni markazidan kuchli zarba yo‘llab, mehmonlar mudofaasida vahima uyg‘otdi, Bensebaini to‘pni uzoqlashtirishga urinib, jamoadoshi Antonga qarata tepdi va avtogol yuzaga keldi. Lekin jazoirlik futbolchi ikkinchi bo‘limda penaltini aniq ijro etib, o‘z aybini yuvdi. Nmechaning uzoq masofadan yo‘llagan yana bir aniq zarbasi esa o‘yin masalasini hal qildi. O‘yin oxirida jamoalar bittadan gol urishdi va hisob 2:4 ko‘rinishini oldi. E’tiborli jihati, dortmundliklar uch turda ham to‘rttadan gol urishmoqda, bundan oldingi turlarda «Yuventus» bilan 4:4, «Atletik» bilan 4:1 hisoblari qayd etilgandi.
Mourinio tubda
«Nyukasl Yunayted» – «Benfika» 3:0
Gollar: Gordon, 32 (1:0). Barns, 71 (2:0). Barns, 83 (3:0)
«Nyukasl Yunayted»: Poup, Botman, Tshau, Bern, Trippiyer, Mayli, Remsi (Joelinton, 63), Gimarayns (Uillok, 90), Gordon (Osula, 85), Merfi (Barns, 63), Voltemade (Elanga, 85)
«Benfika»: Trubin, Otamendi, Silva, Arauju, Barrenechea, Rios, Eursnes, Dedich (Ivanovich, 63), Sudakov, Lukebakio, Pavlidis
Ogohlantirishlar: Tshau, 17 – Lukebakio, 45
Joze Mourinioning «Benfika» bosh murabbiyligiga tayinlanganidan keyin Angliyaga qilgan ikkinchi safari ham muvaffaqiyatsiz yakunlandi. Lissabonliklar «Chelsi» ortidan «Nyukasl»ga ham yutqazishdi. Hisob 0:0 holatida Lukebakio qulay vaziyatdan foydalana olganida o‘yin butunlay boshqacha kechishi mumkin edi, Gordon esa bo‘lim o‘rtalaridan o‘tganda o‘z imkoniyatidan aniq foydalanib, hisobni ochdi. Ikkinchi bo‘limda esa «Benfika» na hujumda, na himoyada yaxshi harakatlandi. Mezbonlarning zaxiradan tushgan forvardi Barns 12 daqiqa ichida dublni rasmiylashtirdi. E’tiborli jihati, uning birinchi goliga Poup hammualliflik qildi, u to‘pni qo‘li bilan otib, 59 metr masofaga yetkazib berdi. Eddi Hau jamoasi qatorasiga ikkinchi yirik g‘alabaga erishdi, uch o‘yinda ham yutqazgan «Benfika» esa turnir jadvalining quyi qismida.
Umumiy jadval:
Ariza berish 2026 yil 13 yanvarga qadar davom etadi. Chipta egalari 2026 yil fevral oyida FIFA tomonidan tasodifiy tanlov orqali aniqlanadi.
11 dekabrdan futbol bo‘yicha 2026 yilgi jahon chempionati o‘yinlariga chiptalar sotuvining navbatdagi – tasodifiy tanlov bosqichi boshlandi.
Bunda chipta sotib olishni xohlovchilar FIFA rasmiy platformasi orqali ariza yuborishi talab etiladi.
O‘zbekiston milliy jamoasi muxlislari ariza berish jarayonida «My Team Uzbekistan» bandini tanlab, o‘zbekistonliklar uchun ajratilgan sektorlar bo‘yicha chipta so‘rovi yuborishi mumkin.
Ariza berish 2026 yil 13 yanvarga qadar davom etadi. Chipta egalari 2026 yil fevral oyida FIFA tomonidan tasodifiy tanlov orqali aniqlanadi va to‘lovlar arizada ko‘rsatilgan karta ma’lumotlari asosida avtomatik amalga oshiriladi.
Muhim eslatma: ayni paytda chiptalar narxi ma’lum emas. Narx 13 yanvar kuni chiptalar uchun ariza berish bosqichi tugagandan so‘ng, har bir o‘yinga bo‘lgan talab aniq tushunarli bo‘lganda belgilanadi. Bundan tashqari, o‘ynaydigan jamoalar, o‘yin o‘tkaziladigan joy, o‘yinning boshlanish vaqti va kuni kabi omillar ham inobatga olinadi.
Eslatib o‘tamiz, O‘zbekiston milliy jamoasi guruh bosqichi o‘yinlarini quyidagi taqvim asosida o‘tkazadi:
– 17 iyun, Mexiko (Meksika), O‘zbekiston – Kolumbiya
– 23 iyun, Hyuston (AQSh), Portugaliya – O‘zbekiston
– 27 iyun, Atlanta (AQSh), Saralashdan o‘tgan jamoa – O‘zbekiston
«Liverpul» hujumchisi Muhammad Saloh ketma-ket uch o‘yinda zaxirada qolib ketganidan keyin norozi kayfiyatda shov-shuvli intervyu berdi. «Liverpul» uchun ko‘p mehnat qilgani, lekin klub uni «avtobus tagiga tashlayotgani» haqida gapirdi. Quyida shu haqda.
{Yii::t(}
O’tkazib yuborish 6s
O’tkazib yuborish
«Meni muammo sifatida ko‘rsatishmoqchi»
APL 15-turida «Liverpul» «Lids» mehmoni bo‘ldi. Arne Slot jamoasi ikkinchi bo‘lim boshida Ugo Ekitike urgan ikki gol evaziga bir qarashda oson g‘alabaga erishayotgandi, lekin 73 daqiqadan «otishma» boshlanib, «Liverpul» nazoratni boy berdi — 3:3. O‘yindan keyin ko‘pchilik nega Muhammad Saloh maydonga tushmagani bilan qiziqdi, chunki hujumchi salomat zaxirada o‘tirgandi. Klub afsonasi shu kuni ketma-ket uchinchi o‘yinda zaxirada qolib ketdi, Slot uni bir daqiqa ham maydonga tushirmadi. Va o‘yindan keyin miks-zonada Saloh «yorildi».
«Bo‘layotgan ishlarni qabul qila olmayman. Klub uchun ko‘p narsa qildim. To‘g‘ri, o‘zimni boshqalardan katta deb hisoblamayman, lekin o‘z pozitsiyamda o‘ynash uchun doim kurashishga majbur emasman, bu uchun yetarlicha ish qilib qo‘yganman.
Kimdir meni hammasiga aybdordek ko‘rsatmoqchi, meni muammo deyishmoqchi. Murabbiy bilan munosabatimiz yaxshi edi, lekin endi hech qanday munosabat yo‘q. Nega bunday bo‘layotganini bilmayman, kimdir meni klubda ko‘rmoqchi emas.
Klub yozda ko‘p va’dalar bergandi, lekin ko‘rib turibsizki uchta o‘yindan buyon zaxiradaman. Shunchaki va’dangizni bajaring, demoqchiman. Men «Liverpul»ni doim yaxshi ko‘rganman, bolalarim ham klubni yaxshi ko‘radi. Klub uchun ko‘p ish qildim, Premiyer-ligaga kelganimdan keyin hammadan ko‘p gol urdim, o‘zimni muammo deb hisoblamayman.
Boshqalar bilan bunaqa bo‘lsa, uni qo‘llagan bo‘lishardi, lekin men bilan bunday emas. Masalan, Hari Keyn o‘nta o‘yinda gol urolmaganida ham mediada «Harri albatta gol uradi», deb chiqishgandi. Menga kelganda hamma «Muhammad zaxirada o‘tirishi kerak» demoqda. Harri, meni kechir. Ota-onamga «Brayton» bilan o‘yinga kelinglar, dedim. Men «Enfild»da muxlislar bilan xayrlashib Afrika kubogiga ketmoqchiman, keyin nima bo‘lishini bilmayman», dedi futbolchi.
Muammo nimada?
Aslida muammo «Liverpul»ning natijalarida, menimcha. O‘tgan yil Slot asosan Kloppdan qolgan jamoa bilan APLni yutdi, Yevropaning eng stabil jamoalaridan biriga aylandi, Muhammad Saloh esa juda zo‘r mavsum o‘tkazib liganing eng yaxshi futbolchisi bo‘ldi. Yangi mavsum oldidan «Liverpul» juda zo‘r transferlar qildi: Virs, Ekitike, Isaak kabi juda qimmatbaho futbolchilarni sotib oldi. Ko‘pchilik bu «Liverpul» APL va Chempionlar Ligasini yutish uchun asosiy da’vogar deya boshladi. Lekin Slot jamoasi mavsumni yomon o‘tkazmoqda: APLda o‘ninchi o‘rin, yangi o‘yinchilar deyarli o‘zini ko‘rsata olmayapti, qo‘shimchasiga Saloh bilan bog‘liq muammo.
Muhammad Saloh bungacha murabbiylarga muammo tug‘diradigan xulq-atvori bilan tanilmagan. To‘g‘ri, Saloh va Mane o‘rtasida kelishmovchilik bor edi, senegallik futbolchi klubdan ketishiga katta ehtimol shu ham sabab bo‘lgan. Lekin Yurgen Klopp bu nizoni klub ichida hal qilib yuborgandi. Bu gal barchasi boshqacha.
Aftoritet o‘yini
Salohning demarshidan keyin angliyalik sobiq futbolchilar uni tanqid qildi, futbolchi klub ichidagi muammoni ko‘chaga olib chiqishi kerak emas, deyishdi. Xususan, «Liverpul» safida «Oltin to‘p»ni yutgan oxirgi futbolchi Maykl Ouen ham shu ma’noda fikr bildirdi.
Klub ichidagilar ham Salohni ochiqchasiga qo‘llab chiqqani yo‘q. Van Deyk Salohni qo‘llashini aytdi, lekin barcha muammo klubda, natijalarda ekanini ham qo‘shimcha qildi, murabbiyni tanqid qilmadi.
Saloh asosiy tarkibdagi o‘rni uchun kurashishga majbur emasligini aytgani ko‘pchilikni hayron qoldirdi. Chunki zamonaviy futbolda hech kimga asosiy tarkibda joy kafolatlanmagan.
Murabbiy Saloh bilan shu masalada kelishmay qolgan bo‘lishi mumkin. Aytaylik, Slott qaysidir o‘yinga Salohni ikkinchi bo‘limda tushirmoqchi bo‘lgan-u, hujumchi asosiy tarkibda tushishni talab qilgandir. Bu borada Slotni ham tushunish mumkin: Saloh APLdagi eng zich taqvim vaqtida Afrika kubogiga ketadi, klub o‘ntacha o‘yinni usiz o‘tkazadi. Tabiiyki murabbiy Saloh yo‘qligida qanday o‘ynashni sinab ko‘rishni istaydi.
Saloh klub yozda bergan va’dalarini bajarishi kerak, dedi, lekin shartnomada hech bir klub hech bir futbolchiga asosiy tarkibdagi o‘rnini kafolatlamasa kerak, shunchaki o‘yinlar, natijalarga qarab bonus hisoblanishi mumkin.
Bir qarashda Saloh o‘zini klubdan ham katta tutayotgandek ko‘rinishi mumkin, lekin bu gaplar qachon aytilganini unutmaslik kerak. Futbolchi ketma-ket uchta o‘yinda zaxirada qolib ketgan, jamoasi oxirgi daqiqada gol o‘tkazib g‘alabani boy bergan vaqtda juda asabiy bo‘ladi, bunaqa qizigan vaqtda aytgan gap bilan xulosa qilib bo‘lmaydi.
Men Muhammad Salohni ham, Arne Slotni ham katta professional deb bilaman. Hozir klubdagi vaziyat qanday ekani 13 dekabrdagi «Brayton» bilan o‘yinda bilinadi. Saloh shu o‘yindan keyin Afrika kubogiga ketadi. O‘zining aytishicha, qit’a chempionatidan keyin klubdan ketishi ham mumkin. Lekin menimcha, «Liverpul» vaziyatni o‘nglab, hammasini joyiga tushira oladi, bu katta klub. Muhammad Saloh atrofidagi vaziyat izga tushib, u yana Liverpul safida gollar ura boshlashini juda istayman. Chunki butun musulmon olamidagi eng katta atlet Saudiya chempionatida emas, dunyodagi eng zo‘r ligada eng zo‘r futbolchilar bilan raqobatlashib yurishga munosib.
O‘tkir Jalolxonov tayyorladi
Tasvirchi va montaj ustasi — Faxriddin Hotamov
«Arsenal» 100 foizlik ko‘rsatkich bilan amalda pley-offni hal qildi, «PSJ» gol urolmadi. Chorshanba oqshomida YeChLning 6-turi doirasidagi asosiy voqealar, o‘yinlardagi gollar va turnir jadvalidagi vaziyat.
Alonsoning kursisi qimirlamoqda
«Real» – «Manchester Siti» 1:2
Gollar: Rodrigu, 28 (1:0). O`Rayli, 35 (1:1). Holand, 43 – penalti (1:2)
«Real»: Kurtua, Raul Asensio (Endrik, 79), Ryudiger, Karreras, Valverde, Tshuameni, Bellinghem, Sebalyos (Dias, 67), Vinisius Junior, Rodrigu, Garsiya (Arda Guler, 58)
«Manchester Siti»: Donnarumma, Ruben Diash, Gvardiol, O`Rayli, Mateus Nunes, Gonsales, Foden (Reynders, 70), Bernardu Silva, Sherki (Marmush, 70), Doku (Ake, 88), Holand (Savio, 70)
Ogohlantirishlar: Ryudiger, 43. Rodrigu, 87. Karreras, 88 – Foden, 11. O`Rayli, 76. Bernardu Silva, 90
«Real»da qulashda davom etdi, bu safar jamoa o‘z uyida «Manchester Siti»ga yutqazdi – 1:2.
Habi Alonsoni to‘g‘ri tushunish mumkin, hozirda «Real» mudofaasi ayanchli ko‘rinishda qolgan – Militao, Hausen, Karvahal, Trent va Mendi jarohatlangan. Natijada Alonso markaziy himoyada Ryudigerga yosh Asensioni sherik qilib tushirdi, zaxira o‘rindig‘ida o‘tirgan Martines va Valdepenyas kabi futbolchilarni jamoa muxlislari ham tanimasdi. Hujumda esa bundan ham jiddiyroq yo‘qotish bor edi, Kilian Mbappe o‘yindan bir kun oldin oyog‘ida og‘riq his qildi va mashg‘ulotlarni ham o‘tkazib yubordi, o‘yin kuni esa zaxira o‘rindig‘ida qoldirildi. Uning o‘rniga hujumda klublar o‘rtasidagi jahon chempionatida porlagan, lekin shundan buyon o‘yin amaliyotiga ega bo‘lmayotgan Gonsalo Garsiyani tushirishga to‘g‘ri keldi.
Shunga qaramay, mezbonlar o‘yinni hujumkor boshlagan va tezkor gol urishi mumkin edi. O‘yinning 2-daqiqasidayoq bosh hakam Kleman Tyurpen avvaliga mehmonlar darvozasiga penalti belgiladi, ammo VAR uning xatosini tuzatdi: videotakrorda Mateush Nunesh Vinisiusni jarima maydoni tashqarisida yiqitgani ma’lum bo‘ldi. Mezbonlar hujumkorlikni davom ettirishdi, 28-daqiqada esa «Siti»ga qarshi o‘yinlarda porlaydigan Rodrigo yana o‘zini ko‘rsatdi.
Braziliyalik vinger bungacha qatorasiga 32 o‘yinda (mart oyidan buyon) gol ura olmagandi, lekin o‘zi uchun sevimli bo‘lgan raqibga qarshi o‘yinda bu seriyasini buzishga qaror qildi.
O‘tkazib yuborilgan gol «Siti»ga ijobiy ta’sir ko‘rsatdi va darhol javob qaytarildi. Gol burchak zarbasidan keyin urildi: Gvardiol to‘p uchun kurashda Bellinghemdan ustun keldi va bosh bilan zarba yo‘lladi, Kurtua to‘pni qaytardi, ammo to‘pga birinchi bo‘lib O’Rayli yetib keldi.
43-daqiqada esa mezbonlar darvozasi tomon penalti belgilandi: Antonio Ryudiger jarima maydoni ichida Erling Holandni ushlab qoldi. 11 metrlik nuqtaga yaqinlashgan Erling zarbani aniq ijro etdi.
Shundan keyin «Real» ochiqchasiga sochilib ketdi va faqat Kurtuaning seyvlari jamoani yirik mag‘lubiyatdan qutqarib qoldi.
Ikkinchi bo‘limda o‘yin qarama-qarshi kurslarda kechdi. «Real» va «Siti» navbati bilan hujum uyushtirdi, ammo shunday xaotik o‘yinda ham madridliklar vaziyatni o‘z tomoniga og‘dira olmadi. «Siti» asosan Dokuning qanotidan oldinga o‘tdi va ikkinchi bo‘limda ham Kurtua Doku va Sherkining murakkab zarbalarini qaytarib, jamoasini o‘yinda olib qoldi.
Mezbonlarda ham bir necha yaxshi vaziyatlar bo‘ldi, ammo Bellinghem va Vinisiusga qulay pozitsiyalardan zarba berishda aniqlik yetishmadi. O‘yin oxirlarida, Alonso va-bankka qo‘l urib, Endrikni ham maydonga tushirganida esa Vini superimkoniyatni yo‘qqa chiqardi – u olis ustun yaqinida turib to‘g‘ri zarba berolmadi. Endrikning boshda yo‘llagan zarbasidan keyin esa to‘p to‘singa tegib, maydondan chiqib ketdi. «Real» o‘yinni ajablanarli statistika bilan yakunladi: jamoa o‘yin davomida jami 16 bor zarba berdi va shundan faqat bittasi (Rodrigoning goli urilgan vaziyatda) darvoza sohasiga to‘g‘ri bordi.
● «Real» so‘nggi sakkiz o‘yinda atigi ikki g‘alabaga erishgan: bu oraliqda «Liverpul» va «Selta» kabi klublardan ham yutqazdi, yana uch o‘yinda durang o‘ynadi.
● «Manchester Siti» «Real»ni 2023 yildan buyon so‘nggi besh o‘yinda ilk bor mag‘lub etdi.
● Holandning goli – YeChLdagi 55-gol bo‘ldi. U turnirdagi o‘yinlari sonidan gollari soni ko‘proq bo‘lib turgan yagona futbolchi.
Keyingi turda «Real» «Monako»ni qabul qiladi, «Siti» Holandning vataniga safar qilib, «Bude-Glimt» mehoni bo‘ladi.
«Arsenal»da ideal ko‘rsatkich
«Bryugge» – «Arsenal» 0:3
Gollar: Madueke, 25 (0:1). Madueke, 47 (0:2). Martinelli, 56 (0:3)
«Bryugge»: van den Hevel, Ordones, Mehele, Seys (Sabbe, 74), Sike (Meyyer, 67), Onedika (Vetlesen, 74), Stankovich, Vanaken, Tzolis, Borjyesh (Dyakon, 83), Tresoldi (Furo, 67)
«Arsenal»: Rayya, Inkapiye (Kalafiori, 63), Norgar, Lyuis-Skelli, Uayt (Salmon, 83), Subimendi, Merino, Edegor (Nvaneri, 72), Martinelli, Madueke (Saka, 71), Yokeresh (Gabriel Jyezus, 62)
Ogohlantirishlar: Norgar, 65. Uayt, 68
Tarkib borasida muammolarga uchrayotgan Arteta YeChLdagi vaziyat yengilroq ekanini hisobga olib, «Bryugge»ga qarshi aralash tarkibni tushirdi. Saka, Eze, Rays, Timber, Kalafiori kabi yetakchilarga dam berildi, yarimhimoyachi Norgar esa markaziy himoyada tushdi.
Yaqinda murabbiyni almashtirgan mezbonlar esa o‘yinga katta ishtiyoq bilan tushishgandi va qator vaziyatlarga ega bo‘ldi, ammo David Rayya ishonchli harakat qildi. Bo‘lim o‘rtalarida esa shu kuni Saka o‘rnida o‘ng qanot hujumida tushgan Noni Madueke shedevr gol muallifiga aylandi. U maydon markaziga yaqin hududda to‘pni egallab, jarima maydoni atrofigacha bordi va qaytarib bo‘lmas zarba yo‘lladi.
Shundan keyin «Arsenal» o‘yinni xotirjam nazorat qildi. Ikkinchi bo‘lim boshida avvaliga Madueke dublni rasmiylashtirdi, 56-daqiqada Gabriel Martinelli turnirda qatorasiga beshinchi o‘yinda gol urib, hisobni yiriklashtirdi. O‘yin taqdiri hal bo‘lgach, Arteta uzoq vaqt (qariyb bir yil) jarohatini davolagan Gabriel Jyezusni, shuningdek, 16 yoshli himoyachi Marli Salmonni ham maydonga tushirdi. Rayya esa o‘yin oxirigacha 7 ta seyv amalga oshirib, darvozasi daxlsizligini saqlab qoldi.
● «Arsenal» APLda «Aston Villa»ga qarshi o‘yinda qayd etilgan 1:2 hisobidan keyin o‘ziga kelib olganini namoyish etdi. Jamoa o‘sha mag‘lubiyatgacha uch oy davomida mag‘lubiyat nimaligini bilmagan (18 o‘yin), ammo sobiq bosh murabbiyi Unai Emeridan yana bir bor yengilib (5), turnir jadvalida ta’qibchilarini yaqinlashtirib olgandi. Ammo Mikel Arteta bosimni yengib o‘ta oldi.
● «Arsenal»ning YeChLdagi ishlari ideal darajada: olti g‘alaba, 18 ochko va to‘plar nisbati 17:1. Hozircha umuman ochko yo‘qotilmayapti va amalda keyingi bosqich masalasi hal qilindi.
● Gabriel Martinelli YeChLda o‘zi tushgan qatorasiga besh o‘yinda gol urdi. Bunaqasi «Arsenal» tarixida kuzatilmagan: u «Atletik Bilbao», «Olimpiakos», «Atletiko», «Bavariya» va «Bryugge»ga qarshi o‘yinlarda golli seriya qayd etdi.
Keyingi turda «Arsenal»ni «Inter» maydoniga qiyin safar kutmoqda; «Bryugge» Qozog‘istonda «Qayrat» mehmoni bo‘ladi.
«PSJ»da nursiz durang
«Atletik» – «PSJ» 0:0
«Atletik»: Simon, Vivian, Berchiche, Boyro, Areso (Gorosabel, 73), Ruis de Galarreta (Vesga, 78), Xauregisar (Rego, 73), Sanset (Yyerro, 73), Uilyams, Berenger, Guruseta (Gomes, 62)
«PSJ»: Safonov, Markinos (Zabarniy, 46), Pacho, Nunu Mendesh, Zair-Emeri, Vitinya, Ruis, Joau Nevesh, Kvaratsxeliya, Barkolya (Ramush, 78), Mayulu (Due, 62)
Ogohlantirishlar: Xauregisar, 27. Berenger, 48. Gomes, 90 – Zair-Emeri, 30
«PSJ» 90 daqiqa davomida «Atletik» darvozasiga yo‘l topa olmadi va YeChLda ikkinchi bor ochko yo‘qotdi (avvalroq «Bavariya»ga yutqazgandi – 1:2). Umuman olganda, parijliklar bu mavsumda barqaror o‘yin namoyish eta olmayapti, noyabr oyida ichki chempionatda bir kishi kam bo‘lib o‘ynagan «Monako»ga yutqazgan (0:1), YeChLda «Tottenhem»dan uchta gol o‘tkazib yuborgandi (5:3). Hozircha Luis Enrike shogirdlari YeChL turnir jadvalida 13 ochko bilan kuchli sakkizlikda qolmoqda, ammo endi qolgan ikki turda «Sporting» va «Nyukasl»ga qarshi o‘yinlarning ahamiyati ortib ketdi.
David Luis «Yuventus»ni to‘xtatolmadi
«Yuventus» – «Pafos» 2:0
Gollar: Makkenni, 67 (1:0). David, 73 (2:0)
«Yuventus»: Di Gregorio, Kelli, Kopmeyners, Kalyulyu, Lokatelli (Openda, 60), Miretti (Adjich, 74), Kambiyaso, Makkenni, Kenan Yildiz (Kabal, 84), Jyegrova (Konseysau, 46), David (Tyuram, 74)
«Pafos»: Mixail, David Luiz, Goldar (Pileas, 78), Lyukkassen, Shunich, Pepe, Orshich (Bassauamina, 78), Brunu, Dragomir (Jaja, 78), Joau Korreya (Langa, 89), Anderson Silva (Kina, 62)
Ogohlantirishlar: Lokatelli, 55 – Shunich, 45
Hozirgi «Yuventus»ga hech qaysi o‘yinda ishonib bo‘lmaydi. O‘yinning birinchi bo‘limida turinliklar faqat darvozabon Di Gregorioning qahramonliklari evaziga gol o‘tkazmadi. Kiprliklar muntazam ravishda xavfli qarshi hujumlar uyushtirishdi, bu hujumlardan biri Andersonning zarbasi ustunga borishi bilan yakunlandi, yana bir hujumda darvozabon Dragomirning zarbasidan keyin to‘sin ostiga borayotgan to‘pni qaytarib qoldi.
Ammo ikkinchi bo‘limda vaziyat o‘zgara boshladi. Fransishku Konseysau zaxiradan tushishi «Yuve»ning o‘yinini kuchaytirdi va 67-daqiqada David Luiz boshchiligidagi mehmonlar himoyasi baribir gol o‘tkazib yubordi: Kambiyazoning uzatmasidan keyin Makkenni hisobni ochdi. Olti daqiqa o‘tib Kenan Yildiz Devidni darvozabon bilan yakkama-yakka vaziyatga chiqardi va shu bilan o‘yin taqdiri hal bo‘ldi.
Keyingi turda «Yuventus» «Benfika»ni qabul qiladi, «Pafos» «Chelsi»ga qarshi safar o‘yiniga boradi – bu David Luiz uchun muhim o‘yin bo‘lishi tayin.
«Bayyer» darvozaboni qovun tushirdi
«Bayyer» – «Nyukasl Yunayted» 2:2
Gollar: Gimarayns, 13 – avtogol (1:0). Gordon, 51 – penalti (1:1). Mayli, 74 (1:2). Grimaldo, 88 (2:2)
«Bayyer»: Flekken, Andrix, Tapsoba, Kuansa, Garsiya, Maza, Grimaldo, Artur (Bade, 90), Poku (Tella, 71), Tillman (Echeverri, 85), Shik (Kofane, 46)
«Nyukasl Yunayted»: Ramsdeyl, Tshau, Bern, Holl, Livramento, Tonali, Joelinton (Mayli, 60), Gimarayns, Gordon (Remsi, 90+3), Barns (Merfi, 78), Voltemade (Vissa, 90+3)
Ogohlantirishlar: Poku, 47. Garsiya, 50 – Tshau, 21. Ramsdeyl, 82
«Bayyer» uyda «Nyukasl» bilan durang o‘ynadi – 2:2. O‘yin qarama-qarshi kursda kechdi va yakuniy natija o‘yinga mos bo‘ldi.
Nemislar 13-daqiqadayoq hisobni ochishdi: Robert Andrix burchakdan oshirilgan to‘pga u qadar muvaffaqiyatli zarba bera olmagandi, ammo to‘p mehmonlar sardori Bruno Gimaraesning orqasiga tegib, darvoza to‘riga yo‘l oldi. «Bayyer» shundan keyin ham hujumkor o‘ynashda davom etdi, «Nyukasl» esa odatdagi kabi safar o‘yinida qiynaldi.
Ammo tanaffusdan keyin darvozabon Mark Flekken Eddi Hau shogirdlari joniga ora kirdi: u oddiy vaziyatda to‘pni yo‘qotdi va raqib forvardi Nik Voltemadega qo‘pollik ishlatishga majbur bo‘ldi. Entoni Gordon esa bu fol uchun belgilangan penaltini aniq ijro etdi.
Shundan keyin «Nyukasl» tashabbusni qo‘lga oldi va vaziyat yaratish borasida mezbonlardan o‘zib ketdi. Bu hisobda ham aks etdi va 74-daqiqada Mayli Gordonning uzatmasini golga aylantirib, jamoasini hisobda oldinga olib chiqdi. Mehmonlar o‘yin taqdirini hal qilib qo‘yishi mumkin edi, ammo Flekken aybini yuvdi va muqarrar goldan qutqardi, yana bir vaziyatda to‘p darvoza ustuniga tegdi. 88-daqiqada esa mezbonlar himoyachisi Grimaldo yana bir bor katta sahnaga chiqib, hisobni tenglashtirdi. «Bayyer» xarakter ko‘rsatdi va muhim ochkoga ega bo‘ldi.
Keyingi turda «Bayyer» «Olimpiakos» mehmoni bo‘ladi, «Nyukasl» o‘z uyida PSVni qabul qiladi.
«Napoli»da safar o‘yinlari kompleksi
«Benfika» – «Napoli» 2:0
Gollar: Rios, 20 (1:0). Barreyru, 49 (2:0)
«Benfika»: Trubin, Otamendi, Arauju, Dal, Dedich, Barrenechea, Rios, Barreyru (Netu, 90+5), Sudakov (Silva, 76), Eursnes (Freytash, 90+4), Ivanovich (Pavlidis, 76)
«Napoli»: Milinkovich-Savich, Rraxmani, Buondjorno (Juan Jyezus, 59), Bekema (Spinatssola, 46), Maktominay, Elmas (Vergara, 81), Olivera (Politano, 46), Di Lorenso, Lang (Lukka, 74), Neres, Hoylund
Ogohlantirishlar: Dedich, 78 – Lang, 52. Vergara, 87
«Da Luj»dagi o‘yinning birinchi bo‘limi boshida ikki murabbiyda ham maydonda bo‘layotgan voqealar uchun haqli e’tirozlar yuzaga keldi. Antonio Konte o‘z shogirdlarining bu qadar ilojsiz holda qolganini tushana olmasdi, Joze Mourinio esa «Benfika» futbolchilari vaziyatlarni ko‘kka sovirishidan fig‘oni falakka chiqardi. Xususan, shu kuni markaziy hujumchi pozitsiyasida tushgan Ivanovich mehmonlar darvozaboni Milinkovich-Savich bilan yakkama-yakka vaziyatdan foydalana olmadi.
Ammo bo‘lim o‘rtalarida mezbonlar baribir hisobni ochishdi, Ivanovich «Napoli» jarima maydonida ikkinchi qavatda to‘p uchun kurashda Maktominaydan ustun keldi va qulay pozitsiyada o‘zini taklif etgan Riosni golli pas bilan ta’minladi. Ikkinchi bo‘lim ham ushbu kolumbiyalik yarimhimoyachining golli harakati bilan boshlandi, uning qanotdan uzatmasini Leandru Barreyru darvoza to‘riga to‘g‘rilab yubordi – 2:0. Mourinio asta-sekinlik bilan lissabonliklarning holatini yaxshilamoqda (oxirgi ikki turda ikki g‘alabaga erishgan jamoa turnir jadvalining quyi qismidan 25-o‘ringa ko‘tarildi). YeChLdagi barcha safar o‘yinlarida yutqazayotgan (bungacha «Siti» bilan 0:2, PSV bilan 2:6 hisoblari qayd etilgandi) «Napoli» esa 23-o‘ringa quladi va bu tempda o‘tish o‘yinlariga o‘tish imkoniyatini qo‘ldan chiqarishi mumkin.
Keyingi turda «Napoli» «Kopenhagen» mehmoni bo‘ladi, «Benfika» «Yuventus» maydoniga safar qiladi.
Dortmundda triller
«Borussiya» D – «Bude-Glimt» 2:2
Gollar: Brandt, 18 (1:0). Aleyesami, 42 (1:1). Brandt, 51 (2:1). Hauge, 75 (2:2)
«Borussiya» D: Kobel, Anton (Svensson, 33), Shlotterbek, Anselmino (Ryuerson, 76), Bellinghem, Nmecha, Bensebaini, Koutu (Emre Jan, 76), Brandt, Bayyer (Girassi, 67), Silva (Adeyyemi, 67)
«Bude-Glimt»: Xaykin, Bertuft, Aleyesami (Nilsen, 68), Myayattya (Klyunge, 82), Sevold, Berg, Fet (Saltnes, 46), Even, Hauge, Blomberg (Helmersen, 68), Heg (Yyergensen, 68)
Ogohlantirish: Adeyyemi, 90
Dortmundliklar kutilmaganda o‘z uyida «Bude-Glimt» bilan durang o‘ynadi – 2:2. Holbuki barchasi yaxshi boshlangandi: 18-daqiqada mezbonlar ikkita pas bilan «Bude» himoyasini yorib o‘tib, Yulian Brandt hisobni ochgandi. Tanaffus arafasida esa muammolar boshlandi, avvaliga «Borussiya» jarohat tufayli Valdemar Antonni yo‘qotdi. Keyin esa norvegiyaliklar hisobni tenglashtirishdi.
Bu holatni esa jamoaning sobiq futbolchisi va sodiq fanati Marko Roys tribunada ma’yus holda kuzatib o‘tirdi.
Ikkinchi bo‘lim ham nemislar uchun yaxshi boshlandi: 51-daqiqada Brandt dubl rasmiylashtirdi, keyin esa yana bir necha golli vaziyatlar yaratildi, ammo shu kuni darvozabon Nikita Xaykin ishonchli harakat qildi. Keyin esa «Bude» yana bir bor hisobni tenglashtirdi – vinger Yyens Heuge o‘z nomini tabloga yozdirib qo‘ydi. Qolgan vaqt mobaynida mehmonlar matonat ko‘rsatishdi va durang hisobni ushlab qolishdi. Bunday Xaykinning xizmatlari katta bo‘ldi: «Bude» darvozaboni yetti bor muqarrar goldan qutqardi.
Natijada «Borussiya» kuchli sakkizlikni tark etdi, Niko Kovach shogirdlarini keyingi turda «Tottenhem» maydoniga qiyin safar kutmoqda.
«Vilyarreal» – turnir omadsizlaridan biri
«Vilyarreal» – «Kopenhagen» 2:3
Gollar: Al-Yunussi, 2 (0:1). Komesanya, 47 (1:1). Ashuri, 48 (1:2). Oluvaseyi, 56 (2:2). Kornelius, 90 (2:3)
«Vilyarreal»: Luis Junior, Marin, Veyga, Pedrasa (Kardona, 83), Navarro, Komesanya, Geyye, Moleyro (Solomon, 63), Byukenen (Axomax, 46), Mikautadze (Oluvaseyi, 46), Pepe (Peres, 46)
«Kopenhagen»: Kotarski, Gabriel Pereyra, Sudzuki, Lopes, Zage (Meling, 71), Madsen (Dileyni, 81), Klem (Klasson, 81), Al-Yunussi, Robert (Ashuri, 46), Larsson, Dadason (Kornelius, 71)
Ogohlantirishlar: Pedrasa, 34. Axomax, 58. Geyye, 89 – Kornelius, 77. Ashuri, 83
«Kopenhagen» bungacha yevrokuboklarda biror marta ham ispan jamoalarini mag‘lub etolmagandi: to‘rt durang va sakkiz mag‘lubiyat. Ammo bu safar daniyaliklar «Vilyarreal» bilan o‘yinda noxush an’anaga barham berdi. «Sariq submarinalar» bu mavsum La ligada qanchalik muvaffaqiyatli ishtirok etayotgan bo‘lsa («Atletiko»dan oldinda va zaxira o‘yinda g‘alaba qozonib, «Real»ni ham quvib o‘tishi mumkin), YeChLda shunchalik yomon o‘ynamoqda.
Marselino Toral shogirdlariga bu turda nisbatan osonroq raqib duch kelgandi, lekin 71-soniyadoq gol o‘tkazib yuborildi. Ikkinchi bo‘lim boshida hisob tenglashtirildi, ammo mezbonlarning quvonchi uzoqqa cho‘zilmadi va bir daqiqa o‘tib Ashuri yana mehmonlarni hisobda oldinga olib chiqdi. Mezbonlar shundan keyin ham o‘yinga qayta olishdi va 56-daqiqada Oluvaseyi muvozanatni tikladi. Ammo «Kopenhagen» 90-daqiqada baribir g‘alaba golini urib ketdi. Natijada 6 turda atigi bir ochko olgan ispanlar «Qayrat» bilan oxirgi o‘rinlarni bo‘lishib turibdi. «Kopenhagen» esa 24-o‘ringa ko‘tarildi va o‘tish o‘yinlari uchun imkoniyat saqlab turibdi. «Vilyarreal» keyingi turda «Ayaks»ni, «Kopenhagen» «Napoli»ni qabul qiladi.
«Ayaks»ning uzoq kutilgan g‘alabasi
«Qorabog‘» – «Ayaks» 2:4
Gollar: Duran, 10 (1:0). Dolberg, 39 (1:1). Silva, 47 (2:1). Gluh, 79 (2:2). Goei, 83 (2:3). Gluh, 90 (2:4)
«Qorabog‘»: Koxalski, Mustafozoda, Medina, Jafarguliyev (Bolt, 86), Silva (Bayramov, 86), Yankovich, Pedru Bikalyu (Montiel, 86), Zubir, Adday, Leandru Andrade (Oxunzoda, 59), Duran (Kashchuk, 70)
«Ayaks»: Yarosh, Bas, Bauman, Roza, Goei, Itakura (Reger, 65), Ster (Klassen, 76), Mokio (Fits-Jim, 84), Moro (Gods, 76), Gluh, Dolberg (Konadu, 65)
Ogohlantirish: Bas, 45
«Qorabog‘» o‘yin davomida ikki bor hisobda oldinga chiqib oldi, ammo baribir inqirozdagi «Ayaks»ni mag‘lub etolmadi. Amsterdamliklar bungacha YeChLning besh turida ham yutqazgandi. Va ular faqat 79-daqiqaga borib o‘yinda burilish yasadi va o‘yin yakunida 1:2 hisobi 4:2 ko‘rinishiga keltirildi. Oskar Gluh ikkita gol bilan o‘yin taqdirini hal qildi. Natijada YeChLda 1135 kundan buyon ilk g‘alabasiga erishgan «Ayaks» Niderlandiyaning turnir guruh bosqichida qatorasiga olti o‘yinda yutqazgan ilk jamoasi bo‘lishdan qutulib qoldi. Dastlabki turlarda sensatsiya ko‘targan «Qorabog‘»ning vaziyati esa yomonlashmoqda. Jamoa hozircha o‘tish o‘yinlariga yo‘llanma olish imkoniyatini saqlab turibdi, ammo keyingi turlarda «Ayntraxt» (uy) va «Liverpul» (safar) kabi kuchli raqiblar kutmoqda.
YeChL umumiy guruhi jadvalidagi vaziyat:
Har ikkala futbolchining transfer qiymati 200 mln yevroga baholanmoqda.
«Manchester Siti» klubining norvegiyalik hujumchisi Erling Holand Transfermarkt portali talqiniga ko‘ra dunyoning eng qimmat ikki futbolchisidan biriga aylandi.
Angliya premiyer-ligasi (APL) futbolchilari qiymati yangilanganidan so‘ng, Holand narxiga 20 mln yevro qo‘shildi va uning transfer qiymati 200 mln yevroga yetdi. Hozir «Barselona» va Ispaniya milliy jamoasi forvardi Lamin Yamal ham shunchaga baholanmoqda.
Avvalroq, ushbu marraga «Pari Sen-Jyermen»da o‘ynagan davrida Kilian Mbappe (hozir «Real Madrid» futbolchisi) va «Real Madrid» yarimhimoyachisi, braziliyalik Vinisius Junior yetib olgan edi.
APL eng qimmat 5 futbolchisi quyidagilar:
– Erling Holand (Manchester Siti) – 200 mln yevro;
– Bukayo Saka (Arsenal) – 130 mln yevro;
– Koul Palmer (Chelsi) – 120 mln yevro;
– Deklan Rays (Arsenal) – 120 mln yevro;
– Aleksander Isak (Liverpul) – 120 mln yevro.
Joriy mavsumda Holand 24 o‘yinda 23 ta gol urib, APL to‘purarlar poygasida peshqadamlik qilmoqda va yaqinda APL tarixida 100 ta gol marrasiga eng tezkor yetib olgan futbolchiga aylandi (111 o‘yinda).
25 yoshli futbolchi «Manchester Siti» tarkibida Chempionlar Ligasida g‘olib chiqqan va ikki marta Angliya chempioni bo‘lgan. Uning klub bilan shartnomasi 2034 yilgacha mo‘ljallangan.
Holandning jamoadoshi, o‘zbekistonlik himoyachi Abduqodir Husanov portal tomonidan 35 million yevroga baholangan.
Prezident Shavkat Mirziyoyev 9 dekabr kuni Xalqaro avtomobil federatsiyasining (FIA) Toshkent shahrida bo‘lib o‘tadigan Bosh assambleyasida ishtirok etish uchun mamlakatimizda bo‘lib turgan ushbu nufuzli tashkilot prezidenti Muhammad bin Sulaym boshchiligidagi delegatsiyani qabul qildi.
Uchrashuvda delegatsiya tarkibida FIA Senati prezidenti Karmelo Sans de Barros hamda mobillik va turizm bo‘yicha vitse-prezidenti Tim Shirman ham ishtirok etdi.
Avtosportni tartibga soluvchi va yo‘l harakati xavfsizligini targ‘ib qiluvchi ushbu global tashkilot bilan o‘zaro manfaatli hamkorlikni kengaytirishning dolzarb masalalari muhokama qilindi. Mamlakatimizda avtomobil sportining kartingdan tortib, to «Formula» poygalarigacha bo‘lgan barcha yo‘nalishlarini rivojlantirishda yaqindan hamkorlik qilish muhimligi qayd etildi.
FIA universitetining imkoniyatlaridan foydalangan holda o‘zbekistonlik poygachilar, karting haydovchilari, muhandislar, konstruktor va mexaniklarni tayyorlash, O‘zbekistonda zamonaviy avtosport infratuzilmasini yaratish, piyoda va transport vositalari harakati xavfsizligini ta’minlash dasturlarini amalga oshirishga ko‘maklashish hamda mazkur xalqaro tashkilot shafeligida xalqaro musobaqalar, avvalo, «Formula-1» bosqichlarini o‘tkazish masalalariga alohida e’tibor qaratildi.
Uchrashuv yakunida davlat rahbari FIA bilan hamkorlikni rivojlantirish, shuningdek, O‘zbekistonda avtosportni xalqaro standartlarga muvofiq ommalashtirishga qo‘shgan katta shaxsiy hissasi uchun FIA rahbariga davlatimizning yuksak mukofoti – «Do‘stlik» ordenini topshirdi.
Ta’kidlash joiz, O‘zbekiston 2019 yildan buyon federatsiyaning faol a’zosi hisoblanadi. O‘tgan yili Samarqandda FIA 120 yilligiga bag‘ishlangan navbatdan tashqari Bosh assambleyasi bo‘lib o‘tgan edi. Bu yilgi tadbir doirasida 12 dekabr kuni «Humo Arena» majmuasida yuqori martabali xorijiy mehmonlar va chempion poygachilar ishtirokida eng namunali sportchilar va jamoalarni taqdirlash marosimi o‘tkaziladi.
JCh-2026 chiptalari uchun arizalar qabuli boshlandi
Saloh «yorildi»: muammo nimada?
Shavkat Mirziyoyev Ashxobodda Gurbanguli Berdimuhammedov bilan uchrashdi
-
Jamiyat3 days agoToshkent viloyatida 13 yoshli qiz orqali dori sotgan ayol va uning sheriklari ushlandi
-
Jamiyat3 days agoTo‘qqiz qizli Jasur – to‘rt egiz tug‘ilgan xonadondan reportaj
-
Jamiyat2 days agoO‘zbekistondagi muzey va ziyoratgohlarga «virtual sayohat» qilish imkoni yaratiladi
-
Dunyodan3 days agoYaponiyaning shimoli-sharqiy sohilining asosiy zilzilasi
-
Dunyodan3 days agoPiknik tugadi. Kelajakda Zelenskiy hukumatini kim boshqaradi?
-
Siyosat2 days agoO’zbekiston va Rossiya xalqaro temir yo’l xizmatlari uchun moslashuvchan narxlar haqida kelishib oldilar
-
Dunyodan2 days agoBashar Asadning Suriyadagi ag’darilganligining 1 yilligi
-
Jamiyat2 days agoNavoiyda portlovchi modda sotgan shaxs qamaldi