Sport
«Real»da og‘ir start, Turinda yana triller, «Qorabog‘»da sensatsiya. Kun o‘yinlari
Yevropa Chempionlar ligasining yangi mavsumi start oldi. Seshanba oqshomida birinchi tur doirasidagi asosiy voqealar, o‘yinlardagi gollar va turnir jadvalidagi vaziyat.
Madridliklarda yana bir qiyin g‘alaba
«Real» – «Marsel» 2:1
Gollar: Vea, 22 (0:1). Mbappe, 29 – penalti (1:1). Mbappe, 81 – penalti (2:1)
«Real»: Kurtua, Eder Militau, Hausen, Karreras, Aleksandr-Arnold (Karvahal, 5), Tshuameni, Arda Guler (Raul Asensio, 74), Valverde, Rodrigo (Dias, 63), Mastantuono (Vinisius Junior, 63), Mbappe
«Marsel»: Ruli, Balerdi, Medina, Emerson (Murilio, 78), Pavar (Igan-Rayli, 87), Kondogbiya (Vermeren, 66), Heyberg, O`Rayli (Payshan, 66), Vea (Guiri, 78), Grinvud, Obameyang
Ogohlantirishlar: Tshuameni, 35. Eder Militau, 54. Karreras, 90 – Pavar, 46. Medina, 75
Chetlatish: Karvahal, 72
O‘yinning boshlang‘ich qismi «Real»ning to‘liq ustunligida kechdi. Fransuzlar anchagacha himoyadan chiqishda uch-to‘rttadan ortiq aniq pas bera olishmadi va raqibning kuchli pressingi ostida to‘p yo‘qotaverishdi. Mbappe ikkita yaqqol vaziyatdan foydalana olmadi — avvaliga yaqin masofadan turib qaychi uslubida yo‘llagan zarbasi darvoza ustuni yonginasidan o‘tib ketdi, keyin esa Pavarni aldab o‘tib yo‘llagan zarbasini darvozabon Ruli qaytarib qoldi. Yana bir ajoyib vaziyat Mastantuonoda bo‘ldi, ammo darvoza ustuni mehmonlar joniga ora kirdi. Bu voqealarning barchasi dastlabki o‘n daqiqa ichida bo‘lib o‘tdi.
«Marsel» qarshi hujumlarda imkon poyladi va o‘zining chopqir hujumchilariga umid qildi. Va bu taktika o‘zini oqladi. Barchasi kutilmaganda ro‘y berdi: Guler to‘p yo‘qotdi, Grinvud uni egallab olib, oldinga yurdi hamda jarima maydoniga kirib kelgan Veani to‘p bilan ta’minladi, amerikalik hujumchi esa yaqin masofadan yo‘llagan zarbasi bilan Kurtuaga imkon qoldirmadi.
Tablodagi 0:1 hisobiga qaramay, madridliklarning ustunligi ertami kechmi golga aylanishi kundek ravshan edi. Va bu ancha tez ro‘y berdi. O‘tkazilgan goldan yetti daqiqa o‘tganida Rodrigo driblingini ishga solib, raqib jarima maydonida Kondogbiani o‘ziga fol ishlatishga majbur qildi, Mbappe 11 metrdan qaytarib bo‘lmas zarba yo‘lladi.
Birinchi bo‘limda jamoalar birgalikda 26 zarba yo‘llashdi, shundan 18 tasi — «Real» hisobida (darvoza sohasiga to‘g‘ri borgan 11 zarba). Tshuameni, Mbappe va Guler navbati bilan olis masofadan xavfli zarbalar yo‘llashdi, lekin jamoalar tanaffusga 1:1 hisobida yo‘l olishdi. Bu birinchi navbatda Rulining xizmati bo‘ldi. Opta ma’lumotiga ko‘ra, argentinalik posbon birinchi bo‘lim davomida o‘nta (!) seyv amalga oshirib, turnirning bir bo‘lim davomidagi seyvlari bo‘yicha rekord o‘rnatgan.
Ikkinchi 45-daqiqalik Mbappening zarbasi to‘singa borishi bilan boshlandi, muxlislar «Real»ning kuchli bosimi davom etishini kuta boshlashdi. Ammo bu aldamchi tuyg‘u bo‘lib chiqdi. Aksincha, «Marsel» shundan so‘ng o‘ziga keldi va to‘pni ishonch bilan nazorat qila boshladi, madridliklarning hujumlari natija beravermagach, o‘yin sur’ati ham tushib ketdi.
Alonso o‘zgarishlar qilishiga to‘g‘ri keldi — qanotlarni jonlantirish uchun Dias va Vinisius maydonga tushirildi. Ammo shunday kutilmagan voqea ro‘y berdi: o‘yinning 5-daqiqasidayoq jarohat olgan Aleksandr-Arnold o‘rniga tushgan tajribali Dani Karvahal asablarini jilovlay olmadi va qarshisida qizil kartochkani ko‘rdi. YeChLning olti karra g‘olibi sanalgan ushbu futbolchi Rulining provokatsiyasiga uchib, jamoasini ozchilikda qoldirib ketdi.
Ammo «Real» o‘n kishi holatida o‘yinni kuchaytira oldi. Vinisius tashabbusni qo‘lga olib, driblingni ishga soldi, himoyachi Medina podkatda ehtiyotsizlik qilib, to‘pni qo‘li bilan o‘ynadi. O‘yinning bosh hakami Irfan Pelto yana bir penalti belgiladi va Mbappe bu safar ham zarbada adashmadi.
Yakunda «Real» qiyin g‘alabani qo‘lga kiritdi — 2:1. Mbappe o‘yinning eng yaxshi futbolchisiga atalgan sovrinni oldi, ammo Rulining harakatlarini ham e’tirof etish kerak. Agar u bo‘lmaganida, mezbonlar yirikroq hisobda g‘alaba qozonishi mumkin edi.
Oltin kolleksiya uchun o‘yin
«Yuventus» – «Borussiya» D 4:4
Gollar: Adeyyemi, 52 (0:1). Kenan Yildiz, 63 (1:1). Nmecha, 65 (1:2). Vlahovich, 67 (2:2). Koutu, 74 (2:3). Bensebayni, 86 – penalti (2:4). Vlahovich, 90+4 (3:4). Kelli, 90+6 (4:4)
«Yuventus»: Di Gregorio, Bremer, Kelli, Kalyulyu, Kopmeyners (Lokatelli, 69), Tyuram, Kambyaso, Makkenni (Joao Mariu, 59), Kenan Yildiz (Jyegrova, 87), David (Vlahovich, 58), Openda (Adjich, 69)
«Borussiya» D: Kobel, Anton, Bensebayni, Ryuerson, Nmecha (Bellinghem, 71), Zabitser, Svensson, Koutu, Bayyer (Brandt, 71), Adeyyemi, Girassi (Gros, 90)
Ogohlantirish: Anton, 42
Turinda qatorasiga ikkinchi o‘yinda muxlislar gollar yomg‘iriga guvoh bo‘lishdi. Bir necha kun oldin A Seriya doirasida «Inter»ga qarshi o‘yinda yakunda g‘alabani ilib ketgan mezbonlar bu safar YeChL o‘yinini sakkiz gol urilgan trillerga aylantirib berishdi. Holbuki, birinchi bo‘limdan keyin golsiz durang saqlanib qolgandi.
«Yuve» birinchi bo‘limda to‘liq ustunlik qildi, dortmundliklar esa 45 daqiqa davomida biror marta darvoza sohasiga to‘g‘ri borgan zarba yo‘llay olmadi. Lekin tanaffusdagi ko‘rsatmalardan keyin boshqacha ishtiyoq bilan maydonga qaytgan mehmonlar Adeyyemining goli bilan hisobni ochishdi.
«Keksa sinioralar» tarkibida esa doimgidek Kenan Yildiz o‘zini ko‘rsatdi. Uning olis «to‘qqizlik» tomon aylantirib yo‘llagan zarbasi — futbol oqshomi bezagiga aylandi. Faqat mezbonlarning quvonchi ko‘pga cho‘zilmadi, ikki daqiqa o‘tib tinim bilmas Adeyyemi Nmechani golli pas bilan ta’minladi. O‘yindagi dastlabki uch gol ham olis masofadan yo‘llangan zarbalar orqali urildi. Biroz o‘tib o‘rta masofadan ham darvoza ishg‘ol etildi — bu safar Vlahovich hisobni tenglashtirdi. Katta ehtimol bilan, turinliklar safida so‘nggi mavsumini o‘tkazayotgan serbiyalik hujumchi Yildizning ajoyib pasi evaziga darvozabon bilan yakkama-yakka holatga chiqib ketdi. Jamoalar o‘n besh daqiqa ichida ikkitadan gol urishdi va bu hali hammasi emasdi.
75-daqiqada Yan Kouto ham jarima maydoni tashqarisidan yo‘llagan zarbasi bilan to‘pni yaqin burchakka kiritdi. «Borussiya»ning uchta goli ham olis masofadan urildi. Keyin esa hakam turinliklar darvozasiga penalti qo‘ydi – kutilmaganda Girassiga emas, Rami Bensebayniga ishonch bildirildi. U esa 11 metrdan benuqson zarba berdi.
Ko‘p jamoalar voqealarning bunday rivojidan keyin taslim bo‘lib qo‘ya qolgan bo‘lardi, ammo Igor Tyudor boshqaruvidagi «Yuventus» emas. Dam olish kunlarida «Inter»ga qarshi o‘yinning so‘nggi daqiqalarida kambek qilgan (4:3) turinliklar bu safar o‘yinga hakam tomonidan qo‘shib berilgan daqiqalarda ikki to‘p farqini yo‘qqa chiqarishdi. 90+4-daqiqada Vlahovich dublni rasmiylashtirdi, ikki daqiqa o‘tib uning qanotdan uzatmasidan keyin Lloyd Kelli bosh bilan darvozani ishg‘ol qildi – ingliz himoyachisi qatorasiga ikkinchi o‘yinda muhim gol urmoqda.
Turinliklar va dortmundliklar muxlislar uchun haqiqiy bayram qilib berishdi, YeChLda bunga qadar ikkinchi bo‘limda sakkiz gol urilishi faqat bir marta kuzatilgan. Faqat bir yil oldin «Bavariya»ning Zagrebda mahalliy «Dinamo»ga qarshi o‘yinida gollar asosan bir darvozaga urilgandi (9:2). Bu safargi o‘yin esa — jahon futbolidagi eng yaxshi turnirning oltin kolleksiyasidan o‘rin oladi.
«Kanonirlar»ning kuchli zaxirasi
«Atletik» – «Arsenal» 0:2
Gollar: Martinelli, 72 (0:1). Trossar, 87 (0:2)
«Atletik»: Simon, Vivian, Paredes, Boyro (Berchiche, 68), Gorosabel, Vesga (Rego, 81), Xauregisar, Sanset (Guruseta, 68), Navarro (Gomes, 61, Serrano, 81), Berenger, Inyaki Uilyams
«Arsenal»: Rayya, Moskera, Gabriel Magalyayns, Kalafiori (Inkapiye, 90+1), Timber, Subimendi, Merino, Rays, Eze (Martinelli, 71), Madueke (Norgar, 90+1), Yokeresh (Trossar, 65)
Ogohlantirishlar: Xauregisar, 85 – Rays, 7. Madueke, 85. Subimendi, 90
«Atletik» katta tanaffusdan keyin YeChLdagi ilk o‘yiniga jiddiy tayyorgarlik ko‘rgandi. Maydondagi futbolchilar ham, tribunalardagi muxlislar ham birinchi bo‘lim davomida mehmonlarni kuchli bosim ostida ushlab turishdi. «Kanonirlar»da Saka, Edegor va Havers kabi yetakchilar yo‘qligi sezildi, jamoaning yangi futbolchilari Eze va Yokereshda hali moslashish jarayoni davom etmoqda.
Basklar kamida golsiz durangni saqlab qoladigandek ko‘rinayotgandi, ammo ikkinchi bo‘limning ikkinchi yarmida ular juda alamli gol o‘tkazib yuborishdi. Bu vaziyatda mezbonlarning deyarli barcha futbolchilari maydonning raqib darvozasi joylashgan ikkinchi qismiga o‘tishgandi, darvozabon Unai Simon kuchli zarba bilan to‘pni oldinga yo‘lladi. U yerda esa to‘p uchun kurashda inglizlar ustun kelishdi va bir necha uzatmadan keyin maydonga tushganiga hali bir daqiqa ham bo‘lmagan Gabriel Martinelli yakkama-yakka vaziyatga chiqib ketib, o‘yin taqdirini hal qildi. Unga esa ikkinchi bo‘limda zaxiradan tushgan boshqa bir futbolchi Leandro Trossar assistentlik qildi.
Ko‘p o‘tmay Martinellining uzatmasidan keyin Trossar ikkinchi golni urdi. Mikel Artetaning topqirligi, shuningdek, jamoaning keng zaxira o‘rindig‘i turnirni uch ochko bilan boshlash imkonini berdi.
«PSV» – «Yunion» 1:3
Gollar: Devid, 9 – penalti (0:1). Ait Al-Hoji, 39 (0:2). Makallister, 81 (0:3). van Bommel, 90 (1:3)
«PSV»: Kovarj, Obispo (Salohiddin, 46), Flamingo, Gaserovski, Dest, Shauten (Til, 46), Verman, Saybari (Vanner, 74), van Bommel, Perishich, Pepi (Boadu, 74, Man, 80)
«Yunion»: Sherpen, Makallister, Berdjyess, Leysen, Xalaili, Zorgan, Rasmussen, Ait Al-Hoji (van de Perre, 75), Nyang, Rodriges (Sxofs, 88), Devid (Jiger, 67)
Umumiy guruh bosqichidagi ilk sensatsiya Niderlandiyada qayd etildi: kamtarona «Yunion» Erediviziyaning amaldagi chempionlari darvozasini safar o‘yinida uch bor ishg‘ol etdi. O‘yinda hisob to‘qqizinchi daqiqadayoq penaltidan ochildi va bu mezbon futbolchilarni ochilishga majbur qildi – belgiyaliklar esa ularni qarshi hujumlarda jazoladi. «Yunion» ikki bo‘lim yakunida bittadan gol urib, hisobni yirik ko‘rinishga keltirdi va zarbalar bo‘yicha ham yaqqol ustunlikka erishdi (18-10). Agar darvoza daxlsizligi saqlab qolinganida, o‘yinni ideal deb atash mumkin edi, ammo so‘nggi daqiqada taniqli futbolchining o‘g‘li Ruben van Bommel bunga rozi bo‘lmadi va stadionga yig‘ilgan muxlislarga taskin beruvchi javob golini urdi. Lekin bu gol Belgiya vakili YeChL doirasida Niderlandiyada o‘tgan o‘yinda 2000 yildan buyon ilk bor g‘alabaga erishishiga to‘sqinlik qilolmadi.
«Benfika» – «Qorabog‘» 2:3
Gollar: Barrenechea, 6 (1:0). Pavlidis, 16 (2:0). Leandru Andrade, 30 (2:1). Duran, 48 (2:2). Kashchuk, 86 (2:3)
«Benfika»: Trubin, A. Silva, Otamendi, Dal, Dedich, Barrenechea, Rios (Barreyru, 79), Sudakov, Shelderup (Ivanovich, 70), Eursnes (Prestianni, 70), Pavlidis (Enrike Arauju, 79)
«Qorabog‘»: Koxalski, Mustafozoda, Medina, Jafarguliyev (Bayramov, 77), M. Silva, Yankovich (Kashchuk, 77), Pedru Bikalyu, Borjyes, Zubir, Leandru Andrade (Adday, 66), Duran (Qurbonli, 90)
O‘yin lissabonliklar uchun oson kechishi taxmin qilingandi va amalda ham shunday boshlandi. «Benfika» 16-daqiqaga kelib ikki gol farqi bilan oldinga chiqib olgandi. Barrenechea burchak zarbasidan keyin darvozani ishg‘ol etdi, Sudakov ikkinchi golli pasi bilan Pavlidisni darvozabon qarshisiga chiqarib yubordi. Bu ushbu gretsiyalik hujumchi uchun YeChLdagi sakkizinchi gol bo‘ldi va u «Benfika»ning asosiy yevrokubokdagi to‘purarlari o‘nligiga kirib oldi.
Ammo shu bilan o‘yinning lissabonliklar uchun yoqimli onlari yakunlandi. Sakkiz yillik tanaffusdan keyin YeChLga qaytgan ozarboyjonliklar katta kuch bilan oldinga tashlandi. Gurban Gurbanov jamoasi hujumkor o‘yini bilan o‘yinda burilish yasadi. «Qorabog‘» safiga shu yozda kelib qo‘shilgan Kamilo Duran yaqqol ajralib turdi. Kolumbiyalik futbolchi avvaliga burchak zarbasidan keyin Leandro Andradeni golli pas bilan ta’minladi, ikkinchi bo‘lim boshida esa Yankovichning himoyachilar orasidan o‘tkazib bergan pasini o‘tkir burchakda turganiga qaramay darvoza to‘riga aniq yo‘naltirdi.
Ikkinchi bo‘lim davomida bir necha vaziyatda Trubinning seyvlari hamda darvoza ustunlari mezbonlarni goldan qutqarib qoldi. Ammo yakunda mehmonlar baribir g‘alabani ilib ketishdil. Darvozabon tomonidan uzatilgan to‘pni egallab olgan Kashchuk Zubir bilan devor uslubida o‘ynadi hamda yaqin burchakni aniq nishonga oldi. Ozarboyjon jamoasi YeChLning asosiy turnirida ilk g‘alabasini nishonladi.
«Tottenhem» – «Vilyarreal» 1:0
Gollar: Luis Junior, 4 avtogol
«Tottenhem»: Vikario, Romero, van de Ven, Spens (Udodji, 69), Porro, Bentankur, Bergvall (Danso, 90+2), Sarr (Palinya, 69), Simons (Jonson, 77), Quddus, Risharlison (Kolo Muani, 77)
«Vilyarreal»: Luis Junior, Foyt, Veyga, Kardona (Pedrasa, 75), Mourinio, Komesanya (Parexo, 78), Geyye (Partey, 78), Byukenen (Moleyro, 82), Pepe, Mikautadze, Peres (Axomax, 75)
Ogohlantirishlar: Simons, 30. Risharlison, 33. Kolo Muani, 78. van de Ven, 84 – Komesanya, 35. Mourinio, 36. Veyga, 53
«Vilyarreal» Londondagi o‘yinni tezkor gol o‘tkazib yuborish bilan boshladi. Bergvalning o‘ng qanotdan oddiy uzatmasi mehmonlar darvozaboni Luiz Junior to‘pni ushlab qololmasdan, o‘z darvozasiga kiritib yuborishi bilan yakunlandi. Braziliyalik darvozabon bu harakati bilan YeChL tarixidagi eng tezkor avtogol (4-daqiqada) muallifi bo‘lgan posbonga aylandi. «Vilyarreal»ning hujum chizig‘i vakillarida javob golini urish uchun yaxshi imkoniyatlar bo‘ldi: Teyjon Byuneken hech qanday qarshilikka uchramasdan, olis burchakni nishonga olishi mumkin edi, ammo kanadiyalik futbolchiga aniqlik yetishmadi. Mehmonlar safidagi eng faol futbolchi Nikolya Pepening ham shu kuni ishlari yurishmadi, uning uchta zarbasi ham xato ketdi. Shu kuni ispan jamoasi vakillari darvoza sohasiga to‘g‘ri borgan birorta zarba bera olmadi. «Shporlar» ustozi Tomas Frank YeChLdagi ilk mavsumini g‘alaba bilan boshladi.
O‘zbekiston milliy terma jamoasi 22-martdan Toshkentda o‘quv-mashg‘ulot yig‘inlarini boshlaydi.
Fabio Kannavaro FIFA Series uchun jalb etilgan futbolchilar ro‘yxatini e’lon qildi.
Kengaytirilgan ro‘yxatdan o‘rin olgan futbolchilarimiz — Jaloliddin Masharipov, Husniddin Aliqulov, Abbosbek Fayzullayev, Dilshod Komilov, Ibrohimhalil Yo‘ldoshev, Abdulla Abdullayev, Alibek Davronov va Husayn Norchayev jarohati tufayli yig‘inni o‘tkazib yuborishi ma’lum bo‘ldi.
Eslatib o‘tamiz, milliy jamoa FIFA Series doirasida 27 mart kuni Gabon, 30 mart kuni esa Venesuyealaga qarshi maydonga tushadi. O‘yinlar «Bunyodkor» stadionida soat 19:00 da start oladi.
Sport
FIFA Nigeriya e’tirozini rad etdi – Kongo DR O‘zbekiston bilan bir guruhdan joy olish uchun kurashadi
Afrika futbolida katta mojaro: JCh-2026 yo‘llanmalaridan biri uchun kurash maydondan tashqarida kechmoqda. FIFA Nigeriyaning Kongo Demokratik Respublikasi milliy jamoasi tarkibidagi ehtimoliy qoidabuzarliklar bo‘yicha shikoyatini rad qildi. Endi nigeriyaliklar xalqaro Sport arbitraj sudida (CAS) «adolat izlashga» urinib ko‘radi. Holat O‘zbekiston milliy jamoasining JCh-2026 guruh bosqichidagi ehtimoliy raqibini o‘zgartirishi mumkin.
FIFA tartib-intizom qo‘mitasi Nigeriya futbol federatsiyasining Kongo Demokratik Respublikasi milliy jamoasi ustidan bergan shikoyatini rad qildi. Bu haqda ESPN Nigeriya futbol federatsiyasiga (NFF) tayanib xabar berdi. NFF zudlik bilan apellyatsiya jarayonini boshlaganini ma’lum qildi.
Avvalroq, NFF kongoliklar tarkibidagi bir necha futbolchi fuqarolik haqidagi FIFA talablarini buzgani bo‘yicha e’tiroz bildirib, ushbu milliy jamoaga texnik mag‘lubiyat yozgan holda JCh-2026 saralash o‘yinlaridan chetlatishni talab qilgan edi.
«Biz FIFA Tartib-intizom qo‘mitasining arizamiz bo‘yicha qarorini oldik, biroq arizamiz rad etilgan qaror bizni qoniqtirmaydi», dedi NFF bosh kotibi Muhammad Sanusi. «Nigeriyaliklarni ishontirib aytamanki, NFF zudlik bilan qaror ustidan shikoyat qilish jarayonini boshladi».
Endi shikoyat Sport arbitraj sudiga (CAS) yuborilishi kutilmoqda, ammo apellyatsiya jarayoni 26 mart kuni – qit’alararo pley-off boshlangunga qadar yakunlanishi dargumon.
Kongo DR futbol federatsiyasi bu xabarga munosabat bildirmadi.
Mojaro mazmuni
2025 yil noyabr oyida Kongo DR milliy jamoasi Afrika pley-offida Nigeriyani mag‘lub etdi (asosiy vaqtda 1:1 va penaltilar seriyasida 4:3). Bu kongoliklarga JCh-2026 yo‘llanmasi uchun qit’alararo pley-off o‘yinlariga yo‘llanmani taqdim etdi. Nigeriya esa JCh-2026 yo‘llanmasidan mahrum bo‘ldi.
Dekabrda AQSh poytaxti Vashingtonda JCh-2026 guruh bosqichiga qur’a tashlandi. O‘zbekiston milliy jamoasi K guruhida Portugaliya, Kolumbiya va saralashdan o‘tadigan yana bir jamoaga (Kongo DR/Yamayka/Yangi Kaledoniya) qarshi o‘ynashi ma’lum bo‘ldi.
Nigeriya futbol federatsiyasi (NFF) Kongo DR fuqarolik va milliy mansublikni o‘zgartirish talablariga javob bermaydigan o‘yinchilardan foydalangani haqida FIFAga rasmiy shikoyat bilan chiqdi.
Shikoyat nimaga asoslangan
Nigeriya futbol federatsiyasi (NFF) Kongo DR tarkibidagi 9 nafargacha futbolchi fuqarolikni o‘zgartirish tartibini buzgan deb hisoblamoqda – ularda Yevropa pasporti bor, ammo Kongo DR qonunlariga ko‘ra ikki fuqarolikka ruxsat berilmaydi.
Nigeriyaliklarning ta’kidlashicha, bu futbolchilar Yevropa pasportidan voz kechmagan va Kongo DR futbol federatsiyasi FIFAni milliy fuqarolik hujjatlari bilan «chalg‘itgan».
FIFA futbol qoidalariga ko‘ra, futbolchidan faqat mamlakatning amaldagi pasporti talab qilinadi. Ammo Kongo DR fuqarolik qonunchiligi bo‘yicha ikki fuqarolik taqiqlangan. Ushbu holat shikoyatga sabab bo‘lgan.
Kongo DR futbol federatsiyasi barcha o‘yinchilar FIFA tomonidan ma’qullanganini va maydonga tushish huquqiga ega ekanini ta’kidlamoqda va Nigeriyani maydondagi mag‘lubiyatdan so‘ng «orqa eshikdan bostirib kirishga» urinishda ayblamoqda.
Dastlab FIFA 2025 yil dekabr oyida futbol qoidalari uchun futbolchi vakil bo‘lgan mamlakatning amaldagi pasporti bo‘lishi yetarli ekanini aytib, shikoyatni rad qilgan edi. Ammo fevral oyi o‘rtalarida bir qator ommaviy axborot vositalarida (jumladan, The African Mirror va Eye Witness News) FIFA Tartib-intizom qo‘mitasi o‘yin paytida futbol fuqaroligini o‘zgartirish jarayoni tugallanmagan «X futbolchi» uchun ishni qayta ko‘rib chiqayotgani haqida xabarlar paydo bo‘ldi.
FIFA qaroridan keyin, endi NFF xalqaro Sport arbitraj sudida (CAS) «adolat izlashga» urinib ko‘radi.
Osiyo futbol konfederatsiyasi (OFK) 2031 va 2035 yilgi Osiyo Kubogi mezbonlarini tanlash jarayonlarini bekor qildi. Musobaqalar FIFA talabiga ko‘ra juft yillarga ko‘chirildi. Endi mezbon tanlash jarayoni qaytadan boshlanadi. Avvalroq, 2031 yilgi turnir mezbonligiga O‘zbekiston, Tojikiston va Qirg‘iziston qo‘shma ariza topshirgan edi.
Foto: REUTERS/Ibraheem Al Omari
Osiyo futbol konfederatsiyasi (OFK) 2031 va 2035 yilgi Osiyo Kubogi mezbonlarini tanlash jarayonlari bekor qilingani haqida milliy federatsiyalarni rasman xabardor etdi, deb yozdi Reuters.
Turnir mezbonligiga O‘zbekiston, Tojikiston va Qirg‘izistonning qo‘shma arizasi ham da’vogarlik qilayotgan edi.
Bekor qilinishiga sabab FIFA tashabbusi bo‘lib, u qit’a turnirlari jadvalini o‘zgartirish va ularni juft yillarga ko‘chirishni taklif qilgan. Muhokamalardan so‘ng OFK bu taklifga rozi bo‘ldi.
Nima o‘zgaradi?
Asosiy oqibat – turnirlarning to‘liq ko‘chirilishi: Osiyo kubogi-2031 endi 2032 yilga rejalashtirilgan, Osiyo kubogi-2035 esa 2036 yilga ko‘chirilgan. Shunday qilib, turnirni o‘tkazishning an’anaviy tizimi buziladi va musobaqalar boshqa vaqt oralig‘ida o‘tkaziladi. Shu bilan birga, Osiyo Kubogi-2027 reja bo‘yicha o‘z muddatida bo‘lib o‘tadi.
Osiyo Kubogining juft yillarga ko‘chirilishi yana bir muammoni keltirib chiqarmoqda – boshqa konfederatsiyalarning eng yirik turnirlari bilan bir vaqtga to‘g‘ri kelmoqda. Endi bir yil davomida quyidagi musobaqalar o‘tkazilishi mumkin: Yevropa chempionati (UYeFA Yevro), Amerika Kubogi (Copa America), Osiyo Kubogi.
FIFA nega tizimni o‘zgartirmoqda?
O‘zgarishlar xalqaro taqvimni markazlashgan holda boshqarish bilan bog‘liq. FIFA allaqachon 2030 yilgacha bo‘lgan global musobaqalar rejasini tasdiqlagan bo‘lib, unda milliy jamoalar o‘yinlari uchun oynalar, saralash turnirlari, final bosqichlari va o‘rtoqlik o‘yinlari aniq ko‘rsatilgan. Ushbu tizimda har bir konfederatsiya umumiy jadvalga moslashishi kerak. Osiyo Kubogi qarori – mana shu katta islohotning bir qismi.
Mezbonlikka nomzodlar bilan vaziyat qanday?
Turnirlar sanasining o‘zgarishi mezbonlikka da’vogarlarning barcha arizalarini avtomatik ravishda bekor qiladi. Bu shuni anglatadiki, mezbonlarni tanlash jarayoni qaytadan boshlanadi, hamma yangi tartibni kutishiga to‘g‘ri keladi. OFK amalda ikki turnirga tayyorgarlik siklini qaytadan boshlaydi.
2031 yilgi Osiyo Kubogi mezbonligiga Avstraliya, Hindiston, Indoneziya, Kuvayt, Janubiy Koreya, shuningdek, O‘zbekiston, Qirg‘iziston va Tojikiston qo‘shma ariza topshirgan edi. Endi O‘zbekistonning yangi turnirlar mezbonligi uchun ariza topshirishi masalasi noma’lum. Hozircha, O‘zbekiston futbol assotsiatsiyasi (O‘FA) vaziyatga munosabat bildirmadi.
Fudbol bo‘yicha O‘zbekiston milliy jamoasi Toshkentda bo‘lib o‘tadigan FIFA Series xalqaro o‘rtoqlik turnirida qatnashadi. Musobaqa 27–30 mart kunlari tashkil etiladi va unda Gabon, Trinidad va Tobago hamda Venesuela jamoalari ishtirok etadi.
Mart oyining oxirida Toshkent shahri FIFA Series xalqaro o‘rtoqlik turniriga mezbonlik qiladi. Milliy terma jamoa bosh murabbiyi Fabio Kannavaro maskur yig‘in uchun jalb etilgan futbolchilar ro‘yxatini e’lon qildi.
Darvozabonlar: O‘tkir Yusupov («Navbahor»), Abduvohid Ne’matov («Nasaf»), Botirali Ergashev («Neftchi»).
Himoyachilar: Rustamjon Ashurmatov («Istiqlol», Eron), Umarbek Eshmurodov («Nasaf»), Abduqodir Husanov («Manchester Siti», Angliya), Muhammadrasul Abdumajidov, Hojiakbar Alijonov, Sherzod Nasrullayev, Muhammadqodir Hamraliyev («Paxtakor»), Behruz Karimov («Surxon»), Jahongir O‘rozov («Dinamo»), Farruh Sayfiyev («Neftchi»).
Yarim himoyachilar: Umarali Rahmonaliyev («Sabah», Ozarbayjon), Ibrohim Ibragimov, Dostonbek Hamdamov, Akmal Mozgovoy («Paxtakor»), Alisher Odilov, Jamshid Iskanderov («Neftchi»), Otabek Shukurov («Baniyas», BAA), Azizjon G‘aniyev («Al Bataeh», BAA), Oston O‘runov («Persepolis», Eron).
Hujumchilar: Eldor Shomurodov («Istanbul Bashakshehir»), Igor Sergeyev («Persepolis», Eron), Sherzod Temirov («Erbil», Iroq).
Musobaqa 27-30 mart kunlari o‘tkaziladi.
27 mart
15:00 Venesuela – Trinidad va Tobago («Paxtakor» stadioni);
19:00 O‘zbekiston – Gabon («Bunyodkor» stadioni).
30 mart
15:00 Gabon – Trinidad va Tobago («Paxtakor» stadioni);
19:00 O‘zbekiston – Venesuela («Bunyodkor» stadioni).
Ma’lumot uchun, FIFA Series 2026 turnirlari o‘rtoqlik o‘yinlari o‘rnini bosishi nazarda tutilgan va butun dunyo bo‘ylab o‘tkaziladi. Erkaklar o‘rtasidagi bahslarga Avstraliya, Ozarboyjon, Indoneziya, Qozog‘iston, Yangi Zelandiya, Puerto-Riko, Ruanda va O‘zbekiston mezbonlik qiladi. Ayollar o‘rtasidagi musobaqalar Braziliya, Kot-d’Ivuar va Tailandda bo‘lib o‘tadi.
Turnirda ishtirok etayotgan beshta erkaklar milliy jamoasi – Avstraliya, Kabo-Verde, Kyurasao, Yangi Zelandiya va O‘zbekiston 2026 yilgi jahon chempionati ishtirokchisi sanaladi.
O‘zbekiston Superligasida 4-tur o‘yinlari o‘tkazildi. «Neftchi» mavsumda birinchi marta gol o‘tkazdi, ammo g‘alabali qadamini davom ettirdi. «Navbahor» va «Nasaf» so‘nggi daqiqalarda gol o‘tkazib, mag‘lubiyatga uchradi. Jizzaxda 6 ta gol urilgan o‘yinda «Paxtakor» uch ochkoni qo‘lga kiritdi. OKMK birinchi marta g‘alaba qozondi, bosh murabbiy Mirjalol Qosimov mobil o‘yinlar tufayli futbolchilarda ishtiyoq pasayib ketganini aytdi.
18-20 mart kunlari futbol bo‘yicha O‘zbekiston Superligasida 4-tur o‘yinlari o‘tkazildi.
QIZILQUM 0:1 OKMK
Gol: Abror Karimov, 34 (0:1)
OKMK mavsumdagi birinchi g‘alabasini Navoiyda qo‘lga kiritdi. Yagona gol «Qizilqum»ni mag‘lub etish uchun yetarli bo‘ldi. Olmaliqliklar ushbu g‘alabadan keyin musobaqa jadvalida 10-o‘ringa ko‘tarilib oldi.
«Qizilqum» bosh murabbiyi Akmal Rustamov jamoa yagona xato tufayli yutqazganini aytdi. OKMK ustozi Mirjalol Qosimov futbolchilarning ishtiyoqini telefondagi o‘yinlar olib qo‘yayotganidan shikoyat qildi. «Hozir telefon chiqib ko‘plarning xayolini olyapti, telefondagi o‘yinlar maydondagi futboldan ko‘proq azart beryapti. Qaniydi maydonda ham shunday kurash kechsa. Telefondagi o‘yinlar yoshlarning miyasini buzyapti», dedi u.
QO‘QON-1912 2:1 NAVBAHOR
Gollar: Anri Chichinadze, 14 (0:1), Javohir Husanov, pen 28 (1:1), Muhammadanas Hasanov, 90+4 (2:1)
Qo‘qonda kutilmagan natija qayd etildi. G‘alaba nimaligini bilmay kelayotgan mezbonlar «Navbahor»ni irodali tarzda mag‘lub etishga erishdi. G‘alaba keltiruvchi gol so‘nggi daqiqalarda urildi.
«Qo‘qon-1912» ustozi Andrey Shipilov bugun omad kulib boqqanini tan oldi. «Navbahor» bosh murabbiyi Temur Kapadze mag‘lubiyatni boshqa narsalar qatori maydon holati bilan ham bog‘ladi. «Maydon ham og‘ir, o‘t baland ekan, bu esa raqibga qo‘l keldi. Maydonda to‘p sekin yurdi, bizga og‘irlik qildi, maydon holati bilan kurash olib bordik», dedi u.
XORAZM 1:2 BUNYoDKOR
Gollar: Nosirjon Abdusalomov, 16 (0:1), Matiya Krivokapich, 43 pen (0:2), Temur Ismailov, 54 (1:2)
Chetlatish: Sardor Rahmonov, 62 (Bunyodkor)
«Bunyodkor» Urganchdagi qiyin o‘yinda 3 ochkoni qo‘lga kiritdi. Toshkentliklar so‘nggi yarim soatni raqibga nisbatan kamchilikda o‘tkazdi, ammo g‘alabani ushlab qolishga erishdi.
«Xorazm» bosh murabbiyi Sergey Tokov ikkita gol o‘tkazib yuborilgan birinchi bo‘lim haqida «uyalishimiz kerak» dedi. «Bunyodkor» ustozi Ilyos Zeytullayev g‘alabadan xursandligini yashirmadi va o‘zini «o‘zbek Spalettisi» deb atalishiga xotirjam munosabatda ekanini ta’kidladi. «Men o‘zimni o‘zbek spagettisi deyman (kulib). Menga Spaletti murabbiy sifatida yoqadi, lekin men angrenlikman», dedi u.
BUXORO 3:1 DINAMO
Gollar: Ravshan Xayrullayev, 45, avtogol (0:1), Temur Mamasidiqov, 48 (1:1), Shahzodbek Ubaydullayev, 54 (2:1), Ravshan Xayrullayev, 63 (3:1)
Yana bir kutilmagan natija Buxoroda qayd etildi. Aleksandr Xomyakov qo‘l ostidagi «Buxoro» Samarqandning «Dinamo» klubini irodali tarzda mag‘lub etdi. Bu natijadan so‘ng, buxoroliklar musobaqa jadvalida ikkinchi o‘ringa ko‘tarilib oldi va chempionat startidagi asosiy kashfiyot bo‘lib turibdi.
«Buxoro» bosh murabbiyi o‘yindan keyin «dastlab uyatli gol o‘tkazdik va tezkor gol urdik. Ikkinchi golda omadimiz keldi, uchinchi golimiz esa o‘yinga yakun yasab berdi», dedi. «Dinamo» ustozi Vadim Abramov maydon sifatiga e’tiroz bildirdi. «O‘ylashimcha, bu maydonda futbol o‘ynashga boshqa ruxsat berishmasa kerak», dedi u.
ANDIJON 2:0 MASh’AL
Gollar: Martin Boake, 18 (1:0), Doniyor Abdumannopov, 76 (2:0)
Chetlatish: Ibrohim G‘anixonov, 12 (Mash’al)
«Andijon» autsayder ustidan ishonchli tarzda g‘alaba qozondi. «Mash’al» o‘yin boshidayoq bir futbolchi kam bo‘lib qoldi. Ibrohim G‘anixonov «Andijon» himoyachisi Igor Golbanga tirsagi bilan zarba bergan deb topildi va maydondan chetlatildi. Vaziyat ijtimoiy tarmoqlarda faol muhokama qilindi, qoidabuzarlik yaqqol emasdek ko‘rindi. O‘yindan keyin Futbol hakamlari markazi Igor Golbanning yorilgan qoshi fotosuratini e’lon qildi. Mezbonlar tarkibdagi ustunlikni g‘alabaga aylantira oldi. «Mash’al» hali birorta gol urmadi va jadval tubiga «o‘rnashib» qoldi.
«Andijon» bosh murabbiyi Samvel Babayan o‘yindan keyin tanqidiy fikr bildirdi: «Jamoam o‘yinidan to‘liq qoniqmadim. Qoniqdim degan murabbiy faoliyatini tugatib qo‘yavergani yaxshi deb o‘ylayman», dedi. «Mash’al» ustozi Igor Surov «agar bir kishi kam bo‘lib qolmaganimizda, umuman boshqacha futbol namoyish etgan bo‘lardik», dedi.
SO‘G‘DIYoNA 2:4 PAXTAKOR
Gollar: Filip Ivanovich, 2 (1:0), Flamarion, 36 (1:1), Rustam Turdimurodov, 50 (1:2), Rustam Turdimurodov, 57 pen (1:3), Hojimat Erkinov, 74 pen (1:4), Feysal Mulich, 90+5 pen (2:4)
Turning eng «quvnoq» o‘yini Jizzaxda o‘tkazildi. 6 ta gol urilgan bahsda «Paxtakor» ishonchli g‘alabani qo‘lga kiritdi va uchinchi o‘ringa ko‘tarilib oldi. Mehmonlar tarkibida Rustam Turdimurodov ikkita gol urdi. «So‘g‘diyona» uchun mavsum starti muvaffaqiyatsiz kechdi – jamoa 1 ochko bilan so‘nggi o‘rinlardan birini egallab turibdi.
«So‘g‘diyona» bosh murabbiyi Ivan Boshkovich dastlabki to‘rtta o‘yinda atigi bir ochko to‘plangani haqida gapirar ekan, buni inqiroz ekanini qisman tan oldi, lekin jamoa yanada yaxshiroq harakat qilishiga ishontirdi. Moliyaviy muammolar haqidagi savolni esa javobsiz qoldirdi.
NASAF 0:1 SURXON
Gol: Tornike Dzebniauri, 90+2 (0:1)
Yana bir kutilmagan natija Samarqandda qayd etildi. «Nasaf» so‘nggi daqiqalarda gol o‘tkazib, «Surxon»ga yutqazdi. Termizliklar bundan oldin bosh murabbiy Stanislav Kudryashov bilan xayrlashib, o‘rniga Anvar G‘ofurovni tayinlagan edi. Uning debyuti muvaffaqiyatli chiqdi. «Nasaf» bosh murabbiyi Ro‘ziqul Berdiyev mag‘lubiyatni «hujumlarda yetarlicha faol bo‘lmagani» bilan izohladi. Anvar G‘ofurov g‘alabani omad bilan izohladi.
NeFTChI 3:1 LOKOMOTIV
Gollar: Ibrohimhalil Yo‘ldoshev, 11 (1:0), Temurxo‘ja Abduxoliqov, 36 pen (1:1), Stipe Peritsa, 65 (2:1), Alisher Odilov, 89 (3:1)
«Neftchi» navbatdagi g‘alabani qo‘lga kiritdi. Farg‘onaliklar 15 yilda ilk marotaba «Lokomotiv»ni o‘z maydonida yengishga muvaffaq bo‘ldi va chempionatda yo‘qotishsiz bormoqda. Bu o‘yinda ular mavsumdagi ilk golini o‘tkazdi (penaltidan), ammo yana uchta gol urishga muvaffaq bo‘ldi. «Neftchi» bosh murabbiyi Islombek Ismoilov dastlabki o‘tkazib yuborilgan goldan ranjiganini tan oldi: «gol o‘tkazmaslik seriyasini uzoq davom ettirishni maqsad qilgandik», dedi. «Lokomotiv» ustozi Mirko Yyelichich: «Hozircha darajamiz «Neftchi» bilan bir xil emas va buni to‘g‘ri tushunish kerak», dedi.
4-tur o‘yinlaridan keyin Superliga jadvali
Superliga to‘purarlari
Turkmanistonda talabalarga suratlarini ijtimoiy tarmoqlarga joylashtirish taqiqlandi
Eron 10 million riyollik banknotni muomilaga chiqardi
Prezident Shavkat Mirziyoyev Imom Buxoriy majmuasiga tashrif buyurdi
-
Dunyodan3 days ago
Eron Hormuz boʻgʻozi orqali cheklangan oʻtishga ruxsat beradi
-
Iqtisodiyot5 days ago“Markaziy Osiyo umumiy investitsiya makonini yaratishi zarur” – Alisher Umirdinov
-
Jamiyat3 days ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Siyosat3 days agoSoʻnggi savdo maʼlumotlariga koʻra, Oʻzbekiston temir yoʻllari importi eksportdan 2,5 barobar koʻp
-
Iqtisodiyot3 days agopayme Tez QR orqali to‘lovni 3% keshbek bilan ishga tushirmoqda
-
Iqtisodiyot5 days agoMetandan go‘shtgacha. Narxi keskin oshgan mahsulot va xizmatlar
-
Dunyodan3 days ago
Istanbulda yetti yil avval sodir etilgan qotillik ishi fosh etildi. O’zbek ayoli vafot etdi
-
Iqtisodiyot5 days agoPokiston Toshkent viloyatida shakar zavodi qurishga qiziqish bildirdi