Sport
Merino turklarni yakson etdi, Qozog‘iston ham 6 ta javobsiz gol o‘tkazdi. Kun o‘yinlari
Qozog‘iston bosh murabbiyi Ali Aliyev qatorasiga to‘rt mag‘lubiyatdan keyin iste’foga chiqmoqchi. JCh-2026 saralashi doirasida Yevropada yakshanba kuni o‘tkazilgan o‘yinlar va guruhlardagi vaziyat.
E guruhi
Turkiya – Ispaniya 0:6
Gollar: Pedri, 6 (0:1). Merino, 22 (0:2). Merino, 45+1 (0:3). Torres, 53 (0:4). Merino, 57 (0:5). Pedri, 62 (0:6)
Turkiya: Ugurjan Chakir, Merix Demiral, Abdulkarim Bardakchi, Eren Elmali (Zeki Chelik, 63), Mert Mo‘ldur (Ferdi Kadio‘g‘li, 63), Hoqon Chalxono‘g‘li (O‘rxun Ko‘kchi, 68), Ismail Yukshek (O‘zjan, 82), Arda Guler, Kenan Yildiz, Yunus Oqkun (O‘g‘uz Aydin, 46), Karim Oqturko‘g‘li
Ispaniya: Simon, Le Norman, Hausen, Kukurelya, Porro, Subimendi (Rodri, 73), Pedri (Fermin Lopes, 68), Merino, Uilyams (Torres, 44), Yamal (Morata, 73), Oyyarsabal (De Frutos, 68)
Ispaniya saralashdagi ikkinchi o‘yinini ham safarda o‘tkazdi, Luis de la Fuente esa uch kun oldin Bolgariyada o‘ynagan boshlang‘ich tarkibga birorta o‘zgartirish kiritmadi. Murabbiyning bu qarori Bilbaodagilarda norozilik uyg‘otishi tayin, Niko Uilyams birinchi bo‘lim oxirida jarohat tufayli almashtirildi. U maydondaligidayoq o‘yin taqdiri hal qilib bo‘lingandi, «Qizil furiya» darhol turklar darvozasini qamal qildi va tezkor gol bilan hisob ochildi. 6-daqiqadayoq Pedri Hoqon Chalxono‘g‘lini aldab o‘tib, to‘pni olis burchakka aniq yo‘naltirdi.
Bo‘lim o‘rtalarida urilgan ikkinchi golni esa maktab darsliklariga kiritish mumkin – chap qanot orqali rivojlantirilgan hujumda mehmon futbolchilar mashg‘ulotlardagidek erkin harakat qilib, jarima maydoni ichida ham aniq paslar bilan raqibni shoshirib qo‘yishdi va bu hujumni Merino aniq zarba bilan yakunladi. Mikelning bo‘limga qo‘shib berilgan daqiqalarda urilgan ikkinchi goli haqida ham shunday ta’rifni ishlatish mumkin, ikkinchi bo‘lim boshida jarima maydoni tashqarisidan chap oyog‘ida aylanma zarba bilan yana bir shedevr gol muallifiga aylandi. U 2025 yil boshidan buyon terma jamoa safida olti o‘yinda olti golga mualliflik qilgan. Ushbu yarimhimoyachi o‘tgan mavsumda «Arsenal»da hujumchi qolmaganida Arteta tomonidan majburan hujumchi pozitsiyasida o‘ynatilgani terma jamoaga qo‘l kelmoqda.
Ispaniya uchun bu jahon chempionatlari saralash bosqichlarida safarda qozonilgan eng yirik g‘alabalardan biri bo‘ldi. 2005 yilda San-Marinoga qarshi o‘yinda ham xuddi shunday hisob qayd etilgan, rekord ko‘rsatkich esa 2017 yilda Lixtenshteyn darvozasiga javobsiz sakkizta gol urilishi bo‘lgandi. Ammo bu raqiblarni Turkiya bilan tenglashtirib bo‘lmaydi. Yanicharlar uchun bu 41 yildan buyon uydagi eng og‘riqli mag‘lubiyat bo‘ldi — o‘shanda Angliyaga 0:8 hisobida mag‘lub bo‘lingan.
Gurjiston – Bolgariya 3:0
Gollar: Kvaratsxeliya, 30 (1:0). Gagnidze, 44 (2:0). Mikautadze, 65 (3:0
Gurjiston: Mamardashvili, Goglichidze, Lochoshvili, Azarov, Kakabadze (Lobjanidze, 83), Mekvabishvili, Kochorashvili (Mamuchashvili, 77), Gagnidze, Kvaratsxeliya (Zivzivadze, 77), Davitashvili (Lominadze, 83), Mikautadze (Guliashvili, 77)
Bolgariya: Vutsov, Bojinov, Dimitrov, Nedyalkov, Minkov (Gruyev, 46), Krayev (Nyurnberger, 46), Tsenov, Milanov (Chochev, 67), Kirilov, Petkov (Shopov, 80), Nikolov (Kolev, 67)
Ogohlantirishlar: Mekvabishvili, 3. Lochoshvili, 9 – Tsenov, 18. Petkov, 39. Krayev, 45. Dimitrov, 53
Gurjistonning o‘tgan turda o‘z uyida Turkiyaga mag‘lubiyati o‘ta og‘riqli qabul qilindi. O‘sha o‘yinda Villi Sanyol shogirdlari hisobdagi uchta gol farqini yo‘qqa chiqarishi va saralashni ochko olish bilan boshlashi ham mumkin bo‘lgandi, ammo bunga vaqt yetmadi. Qatorasiga ikkinchi o‘yinda esa barchasi birinchi bo‘limdayoq hal bo‘ldi. O‘tgan turda turklar darvozasiga ikkinchi golni urgan Xvicha Kvaratsxeliya Bolgariya darvozasini ham ishg‘ol etib, terma jamoa safidagi 20-golini nishonladi, bo‘lim oxirida esa mehmonlarning yana bir xatosidan Davitashvili unumli foydalandi va Gagnidzeni golli pas bilan ta’minladi. Ikkinchi bo‘lim o‘rtalarida Jorj Mikautadze yakuniy hisobni o‘rnatdi. Katta ehtimol bilan, gurjilar turklar bilan ikkinchi o‘rin uchun kurash olib borishadi.
11 oktyabr. Bolgariya – Turkiya, Ispaniya – Gurjiston.
14 oktyabr. Turkiya – Gurjiston, Ispaniya – Bolgariya.
A guruhi
Virs hal qildi
Germaniya – Shimoliy Irlandiya 3:1
Gollar: Gnabri, 7 (1:0). Prays, 34 (1:1). Amiri, 69 (2:1). Virs, 72 (3:1)
Germaniya: Baumann, Ryudiger (Ta, 82), Kox, Raum, Anton, Gros (Goretska, 66), Kimmih, Virs, Leveling, Gnabri (Amiri, 61), Voltemade (Bayyer, 61)
Shimoliy Irlandiya: Pikok-Farrell, Makneyr, Toal (Makkonvill, 88), Hyum, Gelbreyt (Sevill, 76), Makkann (Marshall, 76), Sh. Charlz, Devenni, Bredli, Rid (D. Charlz, 70), Prays (Makdonnell, 88)
Ogohlantirishlar: Ryudiger, 26 – Gelbreyt, 53. Devenni, 62. Bredli, 63. Sevill, 90.
Ishonchsiz start va Slovakiyadagi mag‘lubiyatdan keyin nemislar qattiq tanqidga uchradi. Natijada Yulian Nagelsmann shogirdlari maydonga katta ishtiyoq bilan chiqib kelishdi va tezkor gol urishdi. 7-daqiqada Voltemade to‘p uchun kurashda ustun chiqqach, Gnabri yakkama-yakka vaziyatdan foydalandi. Ammo mezbonlar muvaffaqiyatni rivojlantira olishmadi va Shimoliy Irlandiya burchak zarbasidan keyin hisobni tenglashtirdi. Bu vaziyatda Gnabri javob goli muallifi Praysni qo‘riqlay olmadi.
Lekin Germaniya ikkinchi bo‘lim boshidayoq o‘yindagi intrigaga barham berdi. Mehmonlar darvozaboni Pikok-Farrell avvaliga Virsning yaqin masofadan yo‘llagan zarbasini qaytardi, ammo ko‘p o‘tmay yaqqol xatoga yo‘l qo‘ydi. Darvozabon va himoyachilar bor e’tiborini Raumning uzoq masofadan bergan pasiga yeta olmagan Bayyerga qaratishgandi, ildamroq harakat qilgan Amiri esa bo‘sh darvozani ishg‘ol etdi. Keyin esa Florian Virs jarima zarbasini ajoyib ijro etdi va raqibni uzil-kesil taslim etdi.
Lyuksemburg – Slovakiya 0:1
Gol: Rigo, 90 (0:1)
Lyuksemburg: Mori, Maxmutovich, Karlson, Olesen (Duarte, 90+1), Bonert, Yans, Moreyra (Till, 83), Barreyru, Dardari, Sinani, Muratovich (Borjyes Sanshes, 70)
Slovakiya: Dubravka, Shatka (Obert, 46), Shkrinyar, Gansko, Dember, Lobotka, Duda (Benesh, 78), Bero, Sauer (Tupta, 89), Dyurish (Rigo, 46), Strelets (Bojyenik, 66)
Ogohlantirishlar: Yans, 28. Maxmutovich, 78. Sinani, 90 – Shatka, 27. Duda, 56. Shkrinyar, 69
Slovaklar esa barcha kuch va hissiyotlarini Germaniya bilan o‘yinda qoldirgani ma’lum bo‘ldi. Lyuksemburg jiddiy raqobat ko‘rsatdi va Franchesko Kalsona jamoasidagi muammolar ko‘rinib qoldi. Avvaliga Dubravkaning xatosidan keyin Muratovich jazolashi mumkin edi, keyin esa mehmonlar darvozasi oldida xavfli vaziyatlar tizimli tus oldi. Birgina Sinanining o‘zida ikki zarba ustunga bordi. Lyuksemburg butun o‘yin davomida yaxshi harakat qildi, ammo yakunda gol o‘tkazib yubordi. Jokerlar Slovakiyaga qatorasiga ikkinchi g‘alabani taqdim etishdi. 90-daqiqada Tuptaning zarbasidan keyin mezbonlar darvozaboni Antoni Moris xatoga yo‘l qo‘yib, o‘ziga kelgan to‘pni qarshisiga tashlab berdi, Rigo esa bu sovg‘adan foydalandi.
10 oktyabr. Shimoliy Irlandiya – Slovakiya, Germaniya – Lyuksemburg.
13 oktyabr. Shimoliy Irlandiya – Germaniya, Slovakiya – Lyuksemburg.
G guruhi
Depay – rekordchi
Litva – Niderlandiya 2:3
Gollar: Depay, 11 (0:1). K. Timber, 33 (0:2). Gineytis, 36 (1:2). Girdvaynis, 43 (2:2). Depay, 64 (2:3)
Litva: Gertmonas, Girdvaynis, Armalas, Lekiatas, Gineytis, Antanavichus (Vorobev, 46), Lasitskas, Upstas (Beneta, 50), Doljnikov (Magdushauskas, 76), Sirgedas (Golubikas, 67), Yansonas (Paulauskas, 46)
Niderlandiya: Verbryuggen, van Deyk, de Vrey (van de Ven, 62), Ake (Yu. Timber, 62), Dyumfris, K. Timber, Shauten, Reynders (Steyn, 62), Gakpo, Malen (de Liht, 88), Depay (Veghorst, 83)
Ogohlantirishlar: Lasitskas, 28. Golubikas, 90
O‘tgan turda Polsha bilan uy o‘yinida g‘alabani qo‘ldan boy bergan niderlandiyaliklar bor alamini Litvadan olishi kutilgandi. Depayning tezkor goli ham bu fikrni tasdiqlayotgandi, bo‘lim davomida Kventin Timber mehmonlarning ustunligini mustahkamladi. Ammo Boltiqbo‘yi jamoasi safida voqealarning bunday rivojiga qati’yan qarshi bo‘lgan futbolchi topildi. «Torino» safida o‘ynayotgan Gineytis Malta bilan o‘yinda Litvaga durang keltirgandi, endi esa Niderlandiyaga qarshi o‘yinda burilish yasashiga sal qoldi.
U avvaliga yerlatib burchakka yo‘llagan zarbasi bilan hisobni qisqartirdi, bo‘lim oxirida esa jarima maydoni markazidagi Girdvanisni golli pas bilan ta’minladi va hisob qisqa muddat ichida 0:2 dan 2:2 ko‘rinishiga o‘zgardi. Favoritlar anchagacha vaziyatni o‘z tomoniga og‘dira olmadi va faqat 64-daqiqada yana shu Depay o‘zini ko‘rsatdi. U Dumfrisning qanotdan uzatmasini golga aylantirib, jamoasiga g‘alaba keltirdi. Shu bilan birga, Robin van Persini ortda qoldirgan holda Niderlandiya tarixidagi eng yaxshi to‘purarga (52 gol) aylanib oldi.
Polsha – Finlandiya 3:1
Gollar: Kesh, 27 (1:0). Levandovski, 45+2 (2:0). Kaminski, 55 (3:0). Kelman, 88 (3:1)
Polsha: Skorupski, Visnevski, Bednarek, Kiver, Kesh (Vsholek, 47), Slish (Kapustka, 67), Shimanski, Zelinski, Zalevski, Kaminski (Buksa, 80), Levandovski (Sviderski, 67)
Finlandiya: Yoronen, Koski, Uronen (Vyayanyanen, 80), Peltola (Stol, 64), Alxo, Marxiyev (Kamara, 64), Kayrinen, Tenxo (Ivanov, 35), Lod, Antman (Kelman, 64), Poxyanpalo
Ogohlantirishlar: Visnevski, 74 – Kelman, 80
Yozda polyaklar finnlarga yutqazgandi (1:2), ammo o‘shanda murabbiy ham boshqa edi, Robert Levandovski esa tarkibga jalb etilmayotgandi. Murabbiy almashgach, tarkibga qaytgan «Barselona» forvardi birinchi bo‘lim oxirida darvozabon bilan yakkama-yakka vaziyatdan foydalanib, hisobni ishonchli ko‘rinishga keltirdi. Ungacha Metti Kesh hisobni ochgandi — ushbu himoyachi qatorasiga ikkinchi o‘yinda o‘z nomini tabloga yozdirib qo‘ymoqda.
Ikkinchi bo‘lim boshida mezbonlar raqibni uzil-kesil taslim etishdi. Endi polyaklar guruh jadvalida finnlarni quvib o‘tgan holda ikkinchi o‘ringa ko‘tarildi.
9 oktyabr. Finlandiya – Litva, Malta – Niderlandiya.
12 oktyabr. Litva – Polsha, Niderlandiya – Finlandiya.
J guruhi
Ikki o‘yinda 11 gol
Belgiya – Qozog‘iston 6:0
Gollar: De Breyne, 42 (1:0). Doku, 44 (2:0). Raskin, 51 (3:0). Doku, 60 (4:0). De Breyne, 84 (5:0). Mene, 87 (6:0)
Belgiya: Kurtua, Debast, Teat, De Keyper (Mene, 71), Kastan, Raskin (Vanaken, 71), Tilemans, De Breyne (Vanxutte, 86), Doku (Salemakers, 63), Trossar (Fofana, 63), De Ketelare
Qozog‘iston: Seysen, Jaksibayev, Alip, Kasim, Mujikov (Xalmatov, 73), Orazov (Kasabulat, 58), Vorogovskiy, Astanov, Samorodov (Karaman, 81), Kenjyebek (Chesnokov, 46), Omirtayev (Satpayev, 46)
Ogohlantirishlar: Kasim, 20. Mujikov, 67
Beshinchi turgacha uch o‘yinda yutqazgan va guruhdan chiqish imkoniyatini pasaytirib yuborgan Qozog‘istondan kurashni davom ettirish uchun Belgiya maydonidan ochko bilan qaytish talab etilardi. Osiyoliklar deyarli bir bo‘lim davomida kurashishdi, ammo 42-daqiqada Kevin De Bryuyne jarima maydoni tashqarisidan olis to‘qqizlikni aniq nishonga olib, mehmonlar mudofaa devorini yorib o‘tdi. Ikki daqiqa o‘tib esa aynan u Jyeremi Dokuni golli pas bilan ta’minladi. «Manchester Siti» futbolchisi tanaffusdan keyin ham to‘xtash haqida o‘ylamadi va dublni rasmiylashtirib, bitta golli pasni ham o‘z hisobiga yozib qo‘ydi. O‘yin oxirlarida De Bryuyne ham ikkinchi golini urdi, himoyachi Mene esa 87-daqiqada yakuniy hisobni o‘rnatdi – 6:0.
Saralash bosqichini kechroq boshlagan belgiyaliklar ikkinchi o‘rinda va Shimoliy Makedoniyani ta’qib qilishda davom etmoqda. Qozog‘iston esa yo‘llanmadan deyarli umid uzdi. Qatorasiga to‘rtinchi mag‘lubiyatdan keyin jamoa bosh murabbiyi Ali Aliyev natija uchun bor javobgarlikni o‘z zimmasiga olishini va iste’foga chiqish uchun ariza yozishini ma’lum qildi.
Shimoliy Makedoniya – Lixtenshteyn 5:0
Gollar: Elmas, 15 (1:0). Bardi, 52 (2:0). Churlinov, 56 (3:0). Kamili, 82 (4:0). Stankovski, 90 (5:0)
Shimoliy Makedoniya: Dimitriyevski, Stoychevski, Zaykov, Alioski, Iliyevski, Bardi, Alimi (Ramadani, 71), Elmas (Stankovski, 83), Churlinov (Kamili, 59), Traykovski (Rastoder, 59), Miovski (Ristovski, 71)
Lixtenshteyn: Byuxel, Traber (Bek, 38), Xofer (Obervaditser, 46), Malin, Zele, Lyuxinger (A. Xasler, 61), N. Xasler, Geppel, Volfinger (Mayyer, 61), Lyuk-Notaro, Saglam (Netser, 75)
Ogohlantirishlar: Iliyevski, 21. Ramadani, 88 – Obervaditser, 56
Shimoliy Makedoniya terma jamoasi hamon guruh jadvalini boshqarmoqda. Bolqonliklar hali biror marta yutqazmagan — uch g‘alaba va ikki durang. Bu safar barchasi silliq kechdi, jamoa o‘z maydonida «karlik»larni tor-mor etdi, Enis Bardi «gol+pas» tizimida 2 (1+1) ochko ishladi. E’tiborli jihati, shimoliy makedoniyaliklar besh goldan to‘rttasini tanaffusdan keyin urishdi.
10 oktyabr. Qozog‘iston – Lixtenshteyn, Belgiya – Shimoliy Makedoniya.
13 oktyabr. Shimoliy Makedoniya – Qozog‘iston, Uels – Belgiya.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
