Jamiyat
“Biz Xitoydan “optom” olamiz” – Toshkentda yana bir shubhali “avtosalon” paydo bo‘ldi
Shu yil fevralida davlat ro‘yxatidan o‘tgan, 30 maydan “sotuv” reklamalarini boshlagan “Global avto kredit” MChJ odamlarga foizsiz bo‘lib to‘lash sharti bilan qimmatbaho elektromobillarni va’da qilmoqda. GM mashinalari esa yillik 10 foizli ustama bilan 5 yilgacha nasiya savdoga berilishi aytilgan. Firma ijtimoiy tarmoqlardagi kanaliga bir nechta mashina “mijozlarga yetkazib berilgani” haqida videolavha joylashtirgan. Kun.uz bu mashinalar boshqa avtosalonlardan xarid qilinganini aniqladi.
Xo‘rak
Jozibali reklama, oson shartlar va arzon narx – O‘zbekistonda mashina sotib olmoqchi bo‘layotganlarni chuv tushirish uchun mana shu va’dalar yetarli, qanchalik shubhali bo‘lmasin odamlar o‘z oyoqlari bilan sirtmoq ichiga kirib boraverishadi. Buni qariyb 10 yildan buyon davom etib kelayotgan, biri qamalsa boshqasi paydo bo‘layotgan “Avto 60 oy”dan to “Halol avtolizing”gacha bo‘lgan qator firmalar misolida ko‘rish mumkin.
Afsuski, bu ketma-ketlik zanjiri hamon uzilgani yo‘q: “yig‘aman-u, qochaman” qabilidagi shubhali avtosalonlar paydo bo‘lishda va odamlarni chuv tushirishda davom etmoqda. Shunday shubhali firmalardan biri “Global avto kredit” MChJ hisoblanadi. Ushbu firma “xo‘rak” sifatida odamlarga qimmatbaho elektromobillarni foizsiz bo‘lib to‘lash sharti bilan olib berishni va’da qilmoqda.
“Xitoyda odamimiz bor”
“Global avto kredit” MChJ 2025 yil 10 fevral kuni davlat ro‘yxatidan o‘tkazilgan. Faoliyat turi – avtomobillar va yengil motorli transport vositalarining chakana savdosi.
Ustav kapitali 500 mln so‘m sifatida ko‘rsatilgan MChJ ta’sischisi va rahbari Baxtimurodov Bekzod Baxtimurod o‘g‘li hisoblanadi.
MChJ Telegram’da kanal ochib, joriy yil 30 may kunidan “sotuv” reklamalarini e’lon qila boshlagan. Xususan, birinchi reklamada Cobalt mashinalarini “salon narxida” va “halol nasiya” asosida xarid qilish mumkinligi aytiladi. Nasiya savdo sharti sifatida 1 yildan 5 yilgacha yillik foizli ustama taklif qilingan. Qolaversa, mashina mijozning o‘z nomiga rasmiylashtirilishi aytilgan.
“Global avto” menejerlari qimmatbaho elektromobillarni foizsiz bo‘lib to‘lash sharti bilan olib berishni ham bildirishyapti. Ular tomonidan hatto rasmiy distribyutori bank orqali yillik 29 foizli kreditda taklif etayotgan Kia Sonet’ni ham yillik 10 foizli ustamada 5 yilgacha bo‘lgan muddatda bo‘lib to‘lashga olib berish va’da qilinmoqda.
Kun.uz vakili mijoz sifatida firma ofisiga borib, menejer bilan suhbatlashdi. Ularning suhbati quyidagicha kechdi:
Kun.uz vakili: “Foizsiz berasizlarmi?”
Firma menejeri: “Ha”.
Kun.uz vakili: “Unda sizlar qayerdan foyda ko‘rasizlar?”
Firma menejeri: “Tannarxidan”.
Kun.uz vakili: “Tannarxini ham o‘zi arzon qilib beryapsizlar-ku. O‘zi men Leapmotor C11’ni so‘rasam, 24 ming dollar deyishgandi”.
Firma menejeri: “24 mingga naqdga bor. Bizda 23 ming, ming dollar arzon. Biz “zakaz” bilan ob’yomda olamiz-ku mashinani, shunga “optom” sifatida arzon tushadi”.
Kun.uz vakili: “Malibu’ga 60 foiz boshlang‘ich to‘lovini to‘lasam, qolganini 1 yilga foizsiz to‘lov qilib bera olasizlarmi?”
Firma menejeri: “Ha, qilib beramiz agar 60 foizi to‘lasangiz”.
Kun.uz vakili: “Qancha paytda to‘lash kerak bo‘ladi boshlang‘ich to‘lovni?”
Firma menejeri: “Shartnoma olgandan so‘ng 1 kunda. Chunki bizda shartnoma almashadi-da. C11 bo‘lsinmi?”
Kun.uz vakili: “Ha”
Firma menejeri: “Boshlang‘ich to‘lovi 183 mln 960 ming so‘m, oylik to‘lovi 9 mln 733 ming so‘m bo‘ladi 12 oyga. 3 foizlik “kamissionniy” bor, hamma narsasi, sug‘urtasi ham ichida, xarajat qilmaysiz”.
Kun.uz vakili: “Banklarda ham 20 foizdan yuqori, sizlar GM mashinalariga 10 foiz deyapsizlar, qayerdan foyda qilasizlar?”
Firma menejeri: “Bu firmaning o‘zining puli. To‘lovlarning barchasi bank orqali bo‘ladi. Bizda arzonligining sababi, biz to‘g‘ri Xitoydagi zavoddan olib kelamiz, o‘rtada ikkinchi “qo‘l” yo‘q. Xitoyda yetkazib beruvchimiz bor, biz unga aytamiz, u olib jo‘natadi. Ob’yomda buyurtma qilsak yaxshigina chegirmada keladi. GM bilan esa ochilganda shartnoma qilib qo‘yamiz va yil davomida olaveramiz. Masalan, Gobalt mashinasini 147 mln so‘mga olamiz. 3 mln so‘m xizmat narxi qo‘shiladi va yillik 10 foiz ustama bilan beramiz. Har hafta mashina chiqaramiz va sotamiz bizlar. Mijoz chaqirish uchun 10 foiz qilganmiz boshida, taxminan sentabr oylaridan 15 foizga ko‘tariladi”.
Shuningdek, firma menejeri agar 50 foiz boshlang‘ich to‘lov amalga oshirilsa, Cobalt mashinasini ham 1 yil muddatga bo‘lib to‘lash sharti bilan foizsiz berishini ma’lum qilgan. U bugunga qadar mashinalar eng tez 53 kunda, eng uzog‘i esa 68 kunda keltirib berilganini aytgan. Va bunga bojxonada rasmiylashtiruv bilan bog‘liq qiyinchiliklar sabab bo‘lganini keltirgan. Bundan tashqari, u mashinani Piskentdan o‘zlari o‘tkazib berishini ham qo‘shimcha qilgan.
Kun.uz vakili firma menejeridan suhbatlashib ko‘rish uchun bugunga qadar “Global avto”dan mashina olgan biror mijozning telefon raqamini so‘radi. Biroq menejer mashina olgan mijozlar raqamini bera olmasligini, to‘lov aniq bo‘lsagina birortasi bilan gaplashtirishini ma’lum qilgan.
Hamma harakatlari yolg‘on!
“Global avto” Telegram’dagi kanalida “mijozlarga mashina qilib berishgani” haqida bir nechta videolavhalarni joylashtirgan. Ularning aksariyati Cobalt mashinasi.
Jumladan, 2025 yil 15 iyul kuni mijozga Cobalt mashinasi topshirilgani haqida videolavha e’lon qilingan. Videolavhada mashina hujjatlari ham ko‘rsatilgan. Ammo hujjatdagi sotuvchi firma nomi nimagadir yashirilgan.
Hujjatga ko‘ra, Shahrisabz tumanining Sarchashma qishlog‘ida yashovchi fuqaro Kimyo Sharipova ushbu mashinani “Autograph Automotive Group” MChJdan sotib olgan.
Kun.uz Kimyo Sharipovaning mashinani sotib olishda bosh-qosh bo‘lgan jiyani bilan suhbatlashdi.
“Global avto”ga bordik, ular bizni katta avtosalonga olib borishdi, pulni o‘sha yerda to‘ladik va mashinani oldik. U boshqa firma edi. Keyin “Global avto” ofisi yoniga olib borib, tasvirga olishdi. Biz mashinaning pulini to‘liq to‘lagan holda sotib olganmiz”, deydi u.
11 iyul kuni e’lon qilingan videolavhada esa fuqaro Sherali Bekbo‘tayevga “o‘zining nomiga Cobalt rasmiylashtirib berilgani” aytiladi.
Biroq ushbu mashina aslida “Oscar Motorcars” MChJdan xarid qilingan hamda “Global avto” ofisi oldiga olib borilib, tasvirga olingan.
Kun.uz vaziyatga oydinlik kiritish maqsadida “Oscar Motorcars” MChJ rahbari bilan bog‘landi. U fuqaro Sherali Bekbo‘tayevga rostdan ham mashina sotilganini, ammo “Global avto” haqida eshitmaganini, ushbu firma bilan o‘zaro shartnoma yoki boshqa aloqalari yo‘qligini ma’lum qildi.
“Global avto” xuddi shu kabi “Luckycar”, “Toshkent Avtomarkaz”, “Mega Oil Biznes”, “Avtotexxizmat” kabi MChJlar sotgan mashinalarni ham go‘yoki o‘zlari mijozlarga yetkazib berganday tasvirga olib, e’lon qilishgan.
“To‘lov kechiksayam kechiramiz”
Bu “Global avto” vakillari tomonidan aytilayotgan navbatdagi “shirin va’da”. Firma vakiliga ko‘ra, BYD Song Plus EV Champion mashinasi 50 foizlik boshlang‘ich to‘lov bilan 3 yil muddatga yillik 10 foizli ustamada bo‘lib to‘lashga beriladi. Menejyer agar mashina narxining 50 foizi boshlang‘ich to‘lov sifatida to‘lansa, 2 yil muddatga foizsiz bo‘lib to‘lashga ham berilishini ma’lum qildi. U mashina narxi 340 mln so‘m ekanini aytgan.
Shuningdek, menejer to‘lov firmaning o‘ziga to‘lanishini, bu bank emasligini, oylik to‘lov kechiksa ham penya qo‘shilmasligini ma’lum qildi.
“Global avto” ayni kunlarda mijozlar bilan “avtomobilning boshlang‘ich to‘lovi to‘g‘risida” shartnoma tuzmoqda. Qizig‘i, unda sotuvchi “ijaraga beruvchi”, xaridor esa “ijaraga oluvchi” sifatida ko‘rsatilgan. Shuningdek, shartnoma bekor qilinganda to‘langan summa 50 ish kunida qaytarilishi belgilangan.
Odamlar aldanmasin
“Global avto kredit” MChJning faoliyati va berayotgan va’dasi Kun.uz surishtiruvidan so‘ng jinoiy ish ochilib, rahbarlari qamoqqa olingan “Halal Auto Leasing kompany” MChJnikiga juda o‘xshash. Hatto “Global avto kredit” firmasida aynan “Halal Auto Leasing kompany” MChJda ishlagan menejerlar faoliyat yuritayotgani aytilmoqda.
“Global avto kredit” MChJning bank aylanmalaridan xabardor manbaning aytishicha, firmaning hisob raqami fevral va mart oylarida pul mablag‘lari kelib tushmagan. Apreldan pul tushumlari boshlangan. Iyun-iyul oylarida tushumlar ancha ko‘paygan va qariyb 1,5 mlrd so‘m pul mablag‘i kirim bo‘lgan. Biroq firma hisob raqamiga kelib tushayotgan pullarning barchasi bank plastik kartasiga moliyaviy yordam sifatida chiqarib yuborilmoqda. Bu ham firma faoliyatini shubha ostiga qo‘yadi.
Shu sababli huquqni muhofaza qiluvchi organlar ushbu firma faoliyatini kechiktirmasdan tekshirib ko‘rishi lozim. Yo‘qsa, yana ko‘plab odamlar aldanishi mumkin.
Ruslan Saburov,
Kun.uz
“Poytaxtdagi aksariyat teatrlarning moddiy-texnik bazasi davlat ko‘magiga o‘ta muhtoj. Vaziyatni shaxsan o‘zim nazoratga oldim”, dedi Prezident administratsiyasi rahbari. Uning qo‘shimcha qilishicha, Alisher Navoiy nomidagi Davlat adabiyot muzeyiga ham alohida e’tibor qaratiladi.
Prezident administratsiyasi rahbari Saida Mirziyoyeva Toshkentdagi teatrlar faoliyati bilan tanishdi.
“Toshkent teatrlarida hayot har doim qizg‘in qaynagan. Ammo, shu bilan birga, aksariyat poytaxt teatrlarining moddiy-texnik bazasi davlat ko‘magiga o‘ta muhtoj.
Poytaxtdagi uchta teatrni ko‘zdan kechirdik. Muqimiy nomidagi akademik teatr, Yoshlar teatri hamda “Arena” yotoqxonasi binolari anchadan buyon jiddiy ta’mirtalab holatda.
Biz hamma sharoitni yaratsakkina, repertuarlar yangilanib turadi, tomoshabin ko‘nglidan joy oladigan, dolzarb mavzulardagi spektakllar sahnalashtiriladi”, – deya yozdi Mirziyoyeva Telegram-kanalida.
Uning qayd etishicha, nodir qo‘lyozmalarni raqamlashtirib, kitobxonlarga taqdim etayotgan Alisher Navoiy nomidagi Davlat adabiyot muzeyiga ham alohida e’tibor qaratilmoqda.
“Moliyalashtirish masalalarini hal qilish uchun mas’ul shaxslar tayinlangan. Vaziyatni shaxsan o‘zim nazoratga oldim”, – dedi Administratsiya rahbari.
Jamiyat
Buxoro va Surxondaryoda Afg‘onistondan kontrabanda qilingan opiyning katta partiyasi aniqlandi
Buxoroda haydovchi Lacetti mashinasining motor qismiga qariyb 1 kg opiy yashirgani fosh bo‘ldi. U giyohvand moddani Termiz tumanida yashovchi, xalqaro yuk tashish faoliyati bilan shug‘ullanuvchi shaxsdan olgani aniqlanib, tadbir davom ettirilgan. Ikkinchi shaxsning yonidan muqaddam Afg‘onistondan kontrabanda qilingan 5 kg va yashash xonadonidan esa 7 kg opiy topilgan.
Buxoro va Surxondaryoda qariyb 13 kg giyohvand moddaning noqonuniy aylanmasiga chek qo‘yildi. Bu haqda Davlat xavfsizlik xizmati xabar berdi.
Ma’lum qilinishicha, DXXning Buxoro va Surxondaryo viloyatlari bo‘yicha boshqarmalari hamda bojxona idoralari hamkorligida tezkor tadbir o‘tkazilgan. Unda Buxoro shahrida yashovchi 32 yoshli shaxs shaxs boshqaruvidagi Lacetti “Surxondaryo–Buxoro” yo‘nalishida harakatlanayotgan vaqtida Kogon tumani hududida to‘xtatilgan.
Mashina xolislar ishtirokida ko‘zdan kechirilganda uning motor qismidagi havo filtri ostiga 993 gr opiy yashirib qo‘yilgani fosh etilgan.
Muqaddam ham narkojinoyat sodir etgani uchun sudlangan haydovchi narkotik moddani Termiz tumanida yashovchi, xalqaro yuk tashish faoliyati bilan shug‘ullanuvchi 46 yoshli shaxsdan olgani aniqlangan.
Tezkor tadbir davom ettirilib, ikkinchi shaxs ham ushlangan. Uning yonidan muqaddam Afg‘onistondan kontrabanda qilingan 5 kg va yashash xonadonidan esa 7 kg opiy topilgan.
Hozirda mazkur shaxslarga nisbatan jinoyat ishi qo‘zg‘atilib, tergov harakatlari olib borilmoqda.
Avvalroq Afg‘onistondan olib kelingan qariyb 9 kg opiy musodara qilingandi.
Kelayotgan may oyida kutilayotgan ob-havo ma’lumoti e’lon qilindi.
Bu yil may oyi beqaror ob-havo bilan boshlanadi. Birinchi besh kunlikda respublika hududi bo‘yicha ba’zi joylarda momaqaldiroq va kuchli shamol bilan qisqa muddatli yomg‘irlar yog‘adi. Havo harorati asosan kechalari 13-18 daraja, kunduz kunlari 22-27 daraja bo‘ladi.
Keyinchalik, oyning oxirigacha harorat kechalari 13-18 darajadan 18-23 darajagacha, kunduz kunlari 25-30 darajadan 30-35 darajagacha, shimolda, janubda va cho‘l hududlarda 36-38 darajagacha o‘zgarib turadi. Ushbu davrning ayrim kunlarida ba’zi joylarda qisqa muddatli momaqaldiroqli yomg‘irlar yog‘ishi mumkin.
2026-yil may oyida o‘rtacha oylik harorat iqlimiy me’yordan 1,5-2 darajaga yuqori bo‘lishi kutilmoqda.
Iqlimiy xususiyatlarga ko‘ra (ko‘p yillik davr uchun o‘rtacha qiymatlar), may oyi aprel oyiga nisbatan 4–6 darajaga iliqroq bo‘ladi.
Respublika hududining katta qismida kunduzgi o‘rtacha harorat oyning birinchi yarmida 24-27 darajani, ikkinchi yarmida esa 28-31 darajani tashkil etadi. Deyarli har yili may oyida yozga xos issiq davrlar harorat 34-37 darajagacha ko‘tarilishi kuzatiladi.
Meterologik kuzatuvlarning barcha yillari uchun may oyi haroratining mutlaq maksimumlari 38-41 darajani, shimolda, janubda va cho‘l hududlarda esa ba’zi joylarda 43-45 darajani tashkil etadi. Qoraqalpog‘iston Respublikasi, Xorazm, Buxoro viloyatlari va Navoiy viloyati cho‘l hududlarida may oyidagi harorat rekordlari yaqin orada – 2020, 2021 va 2025-yillarda yangilandi.
May oyida yomg‘irlar, ko‘pincha, qisqa muddatli tavsifga ega bo‘lib, deyarli har doim momaqaldiroq va kuchli shamol bilan kuzatiladi.
Shu kunlarda “Yangi sahifa” nashriyotida taniqli diplomat Yodgorxo‘ja Shodmonovning “Ikki qutb orasida” nomli kitobi chop etildi. Har bir insonning o‘z hayot yo‘li, manzillari va yorqin xotiralari bo‘ladi. Ammo shunday kasblar borki, ular nafaqat sharafli, balki nihoyatda mas’uliyatlidir – elchilik faoliyati ana shunday sohalardan biri.
2005-2009 yillarda Afg‘onistonning Mozori Sharif shahrida Bosh konsul, 2012-2021 yillarda esa O‘zbekistonning Afg‘onistondagi Favqulodda va Muxtor elchisi sifatida sermahsul faoliyat yuritgan muallifning ushbu asari ham tarixiy, ham ilmiy va badiiy jihatdan beqiyos qimmatga ega. Ta’kidlash joizki, so‘nggi yillarda diplomat Abror G‘ulomovning avtobiografik asari nashr etilib, xalqimizga armug‘on qilinganiga guvoh bo‘lgan edik. Endilikda ushbu an’ananing Yodgorxo‘ja Shodmonov tomonidan davom ettirilishi quvonarli hol.
Men Yodgorxo‘ja aka haqida “Jahon” axborot agentligida ishlab yurgan kezlarimda hamkasblar va ustozlarimizdan ko‘p ijobiy fikrlar eshitganman. 1961 yilda tug‘ilgan muallif o‘z faoliyati davomida dastlab yoshlar tashkilotlarida, Toshkent davlat texnika universiteti prorektori lavozimida hamda “Yoshlik” talabalar shaharchasi hokimi o‘rinbosari sifatida samarali mehnat qilgan.
1999-2000 yillarda Tashqi ishlar vazirligining Diplomatik servis xizmati kotibiyati mudiri, 2000-2005 yillarda Kadrlar va o‘quv muassasalari boshqarmasi boshlig‘ining o‘rinbosari, keyinchalik boshlig‘i, Afg‘onistondagi Bosh konsullikdan qaytgach esa 2010-2012 yillarda Konsullik boshqarmasi boshlig‘ining o‘rinbosari lavozimida sidqidildan xizmat qildi. Ko‘plab insonlarga yordam qo‘lini cho‘zgan, Vatan ravnaqi yo‘lida bor bilim va tajribasini safarbar etgan kamtarin va malakali diplomatning mehnatlari davlatimiz tomonidan yuksak qadrlanib, 2022 yilda “Do‘stlik” ordeni bilan taqdirlangani ham fikrimiz isbotidir.
Qiziqarli va samimiy tilda yozilgan ushbu kitobni mutolaa qilar ekansiz, elchilik davri muallif uchun chinakam sinov va mazmunli hayot maktabi bo‘lganiga amin bo‘lasiz.
“Bu yillar davomida men nafaqat xizmat burchimni ado etdim, balki dunyoqarashimni kengaytirdim, inson qiymatini, tinchlik qadrini va mehr-oqibatning beqiyos kuchini yanada teranroq his etdim. Bu yurtda vaqt bilan yuzma-yuz turib zamon va hayot ziddiyatlari bilan to‘g‘ridan-to‘g‘ri to‘qnash keldim, o‘zligimni teran angladim. Ana shu ikki qutb o‘rtasida kechgan hayot menga sabrning chegarasiz kuchini, do‘stlikning beqiyos qudratini, osoyishtalikning eng bebaho ne’mat ekanini chuqurroq anglatdi. Diplomatik xizmatning mashaqqati, kunu tun mas’uliyati, xavf-xatar va sinovlari mening irodamni chindan ham chiniqtirdi”, deb yozadi muallif.
Kitob orqali Afg‘oniston bizga qo‘shni bo‘lsa-da, ichki vaziyati va murakkab siyosiy-harbiy jarayonlari biz uchun ancha notanish bo‘lgan davlatning haqiqiy manzarasini anglaymiz. Salkam yarim asrdan buyon tinchlik nimaligini bilmay kelayotgan bu yurt odamlarining yuksak g‘ururi, samimiyati va mehmondo‘stligi o‘quvchida katta taassurot qoldiradi. Muallif Balx, Jauzjon, Samangon, Faryob, Hirot kabi viloyatlar, Kobul, Mozori Sharif, G‘azni kabi shaharlar haqida shunday mahorat bilan hikoya qiladiki, voqealar beixtiyor ko‘z oldingizda jonlanadi.
Ayniqsa, Afg‘onistonning 100 ga yaqin yetakchilari, qo‘mondonlari va nufuzli shaxslari haqidagi ma’lumotlar, ularning siyosiy tiynati va salohiyati tarixiy izchillikda mahorat bilan ochib berilgan. Shuningdek, muallifning oddiy afg‘on dehqoniga bo‘lgan ehtiromi, ularning matonati va yashovchanligiga bergan ta’rifi kitobning ta’sirchanligini oshirgan.
Yodgorxo‘ja Shodmonov Afg‘oniston Islom Respublikasining ikki prezidenti davrida ham, “Tolibon” hokimiyatga kelgan og‘ir kunlarda ham o‘z burchiga sodiq qoldi. Elchixona yaqinidagi mudhish terrorchilik harakati oqibatida og‘ir jarohat olib, uzoq muddat davolangan bo‘lsa-da, mardlik bilan o‘z missiyasini davom ettirdi. Uning siymosida o‘z davlati manfaatini har narsadan ustun qo‘yadigan, vatandoshlarini himoya qilishni muqaddas burch deb biladigan haqiqiy vatanparvar diplomatni ko‘ramiz.
Asarning keyingi boblarida 2016 yildan buyon Prezident Shavkat Mirziyoyev tomonidan olib borilayotgan ochiqlik, konstruktiv muloqot va pragmatik tashqi siyosatning mazmun-mohiyati shaxsiy tajribalar asosida batafsil yoritilgan.
“Ikki qutb orasida” kitobi shunchaki voqealar bayoni emas, balki elchining qalb iztiroblari, hayratlari va teran mushohadalari in’ikosidir. Nodir fotosuratlar bilan boyitilgan ushbu asar diplomatlar, afg‘onshunoslar, talabalar va keng kitobxonlar ommasi uchun qimmatli qo‘llanma bo‘lib xizmat qiladi.
Laziz Rahmatov,
Siyosiy fanlar bo‘yicha falsafa doktori (PhD),
O‘zbekiston Yozuvchilar uyushmasi a’zosi
Hukumatning 202-son qarori bilan 2026–2027-yillarda jamiyatda huquqiy madaniyatni yuksaltirish bo‘yicha chora-tadbirlar dasturi tasdiqlandi. Ushbu dastur aholining huquqiy ongi va savodxonligini oshirishga qaratilgan kompleks choralarni o‘z ichiga oladi.
Dastur doirasida «Onlayn-mahalla» platformasi va «mahalla yettiligi» orqali aholi muammolari tahlil qilinib, ularga qonuniy yechimlar beruvchi sodda media materiallar tayyorlanadi. Bu materiallar annotatsiya, video, infografika va bukletlar ko‘rinishida taqdim etiladi.
Yil yakunida fuqarolar murojaatlari asosida «TOP-100 huquqiy tavsiya» to‘plami shakllantiriladi. Shuningdek, yangi qonunlar mutaxassislar ishtirokida intervyu va podkastlar orqali tushuntirilib, «Adliya TV»da joylashtiriladi.
Dasturda zamonaviy texnologiyalarga alohida e’tibor qaratilgan. Xususan, qurilish sohasida qonunchilikni tushuntiruvchi AI-chatbotli «Qurilishda qonuniylik» mobil ilovasi yaratiladi.
Ushbu ilova orqali foydalanuvchilar interaktiv o‘yinlar, testlar va videolar yordamida bilim olishi mumkin. Shu bilan birga, noqonuniy qurilish holatlari haqida xabar berish imkoniyati ham yaratiladi.
Bundan tashqari, «Advice.uz» va «Gender-madad» platformalari takomillashtiriladi. Ijtimoiy tarmoqlarda «sovrinli viktorinalar» o‘tkazish orqali aholining huquqiy bilimlari oshiriladi.
Dastur doirasida bolalar o‘rtasida huquqiy madaniyatni shakllantirishga ham katta e’tibor berilgan. Huquqiy videoroliklar ishlab chiqilib, keng targ‘ib qilinadi.
Shuningdek, «Oilani asrang – zo‘ravonlikni to‘xtating!» shiori ostida ijtimoiy chellenjlar va roliklar tanlovi tashkil etiladi. Ta’lim muassasalarida «Huquqiy bilimlar oyligi» o‘tkazish ham rejalashtirilgan.
Qarorga muvofiq, dasturda belgilangan chora-tadbirlarni o‘z vaqtida va sifatli amalga oshirish uchun tegishli davlat organlari rahbarlari shaxsan javobgar hisoblanadi hamda har chorakda Adliya vazirligiga hisobot taqdim etadi.
O‘zbekistonda vaziyat “juda og‘ir”ligicha qolmoqda
O‘zbekistonda qurilish ishlari hajmi bo‘yicha qaysi viloyat yetakchi?
Energiyani tejash maqsadida gaz va svet iste’moliga cheklov kiritish taqiqlandi
-
Iqtisodiyot5 days agoBiznes-ombudsman Toshkentning dizayn-kodi masalasida e’tiroz bildirdi
-
Jamiyat4 days agoJomboyda mast haydovchi YTH sodir etdi
-
Dunyodan4 days ago
AQSh Eronga qarshi urush uchun har soniyada 11,5 ming dollar sarflamoqda
-
Dunyodan5 days ago
Livan-Isroil o’t ochishni to’xtatish muddati uch haftaga uzaytirildi
-
Jamiyat4 days ago
Toshkentda uy-joy ijarasi narxlari qariyb 11 foizga qimmatlagan
-
Jamiyat2 days agoNavoiyda maktab o‘quvchilari boshqaruvidagi mashina YTHga uchradi
-
Sport5 days agoSuperliga. «Paxtakor» va «Neftchi» ta’qibchilardan ilgariladi
-
Dunyodan4 days agoPrezident Tramp delegatsiya parvozini bekor qildi