Adliya vazirligi e’lon qilgan tegishli qonun loyihasida yer uchastkasi yoki uning bir qismi jamoat ehtiyojlari uchun olib qo‘yilganda mulkdorga to‘lab beriladigan kompensatsiyani «daromad» sifatida emas, balki majburiy tarzda olib qo‘yilgan mulkning evaziga berilgan qiymat deb baholash taklif qilinyapti.

Ma’lumki, hozirda mulkdorlarga to‘lanadigan mazkur kompensatsiya to‘lovlari uchun ham soliq hisoblanadi va bu buning natijasida mulkdor kompensatsiya to‘lovlarining bir qismini yo‘qotmoqda.

Ta’kidlanishicha, Hindiston hamda Ozarbayjon davlatlari qonunchiligida mulkdordan majburiy olib qo‘yilgan mol-mulklarga nisbatan to‘langan kompensatsiya to‘lovlariga daromad sifatida qaralamaydi va ular soliq solish ob’yekti hisoblanmaydi.

Shu bois hamda mulkdorlarning moliyaviy barqarorligini saqlab qolish va soliq yukini kamaytirish maqsadida loyihada yuqoridagi tartib nazarda tutilmoqda.

Shuningdek, ma’naviy zarar bo‘yicha kompensatsiya ham shaxsning sha’ni, qadr-qimmati, ruhiy holati yoki boshqa nomoddiy huquqlari buzilishi oqibatida yetkazilgan zarar ta’sirini yumshatish va huquqiy tiklanishni ta’minlash uchun belgilanadi. Bu to‘lovning vazifasi shaxsni boyitish emas, balki adolatni tiklash, jabrlanuvchining huquqiy himoyasini kuchaytirishdan iborat.

Bu borada Ozarbayjon, Latviya, Estoniya hamda Ispaniya davlatlari qonunchiligida ma’naviy zararni kompensatsiya qilish bo‘yicha pullik to‘lovlar daromad sifatida qaralamaydi va ular soliq solish obekti hisoblanmaydi.

Yuqoridagilardan kelib chiqib hamda ma’naviy zarar bo‘yicha to‘lovlarning mazmunan daromad emasligini e’tirof etish va soliq yukini kamaytirish orqali fuqarolarning ijtimoiy himoyasini mustahkamlash maqsadida Soliq kodeksiga mazkur qo‘shimcha kiritilmoqda.

Source link

Bugun Xorazmda start olgan «Media haftalik» ni oddiy trening sifatida baholash to‘g‘ri emas. Birinchi kunning o‘ziyoq shuni ko‘rsatdi – bu yerda format emas, mediaga bo‘lgan yondashuv o‘zgaryapti. 

Eng avvalo, e’tiborni tortadigan jihat – auditoriya tarkibi. Bu yerda faqat jurnalistlar emas, balki kontent yaratish zanjirining barcha bo‘g‘ini jamlangan: muharrir, muxbir, tasvirchi va montajchi. Bu esa o‘quv jarayonini bir tomonlama emas, kompleks tarzda tashkil etish imkonini beryapti. 

 Birinchi kun dasturiga qaraganda, asosiy urg‘u «nima qilish kerak» degan savolga emas,«qanday qilib yaxshiroq qilish mumkin» degan masalaga berilgan.

Masalan, bosma va internet jurnalistikasida kontent muammolarini tahlil qilishdan boshlab, tahliliy reportaj tayyorlashgacha bo‘lgan jarayon bir tizim sifatida ko‘rilyapti. 

Televideniye yo‘nalishida esa alohida bir tendensiya sezildi: operator va montajchi shunchaki texnik ijrochi emas, balki kontent muallifining bir qismi sifatida qaralyapti. Bu — hududiy media uchun jiddiy sifat o‘zgarishi. 

Kunning ikkinchi yarmida muhokama qilingan mavzular esa media sohaning eng og‘riqli nuqtalarini qamrab oldi: axborot xavfsizligi, raqamli gigiyena, siyosiy jarayonlarni yoritishda aniqlik va mas’uliyat, shuningdek, korrupsiya mavzusini yoritishdagi yondashuvlar. 

Eng muhimi – bu yerda tayyor javoblar berilmayapti. Ishtirokchilarga savol qo‘yilyapti, vaziyat berilyapti va yechimni o‘zlari topishga intilmoqda.

Source link

Ohangarondagi bog‘chalardan birida tarbiyachi kichik yoshli bolani uxlamagani uchun haqoratlab, unga nisbatan jismoniy kuch ishlatgan. Voqea tasvirga olinib tarqalgach, tarbiyachi ishdan bo‘shatildi, holat yuzasidan tekshiruv olib borilmoqda.

Toshkent viloyatining Ohangaron shahridagi maktabgacha ta’lim muassasalaridan birida tarbiyachi bolaga nisbatan jismoniy kuch ishlatib, uni haqorat qilgani ma’lum bo‘ldi.

Bolalar ombudsmani Kun.uz’ga ma’lum qilishicha, holat Ohangaron shahridagi 10-sonli davlat maktabgacha ta’lim muassasasida sodir bo‘lgan. Tarbiyachi bolani uxlamagani uchun «urod» deya haqorat qilgan va unga nisbatan zo‘ravonlik qilgan. Ushbu jarayonni tasvirga olib, tanishiga yuborgan.

«Ohangaron shahri 10-sonli DMTMda tarbiyachi Sh.A. tarbiyalanuvchi bolaga jismoniy kuch ishlatgani hamda bolaning sha’ni va qadr-qimmatini tahqirlovchi munosabatda bo‘lgani uchun 2026 yil 6 aprel kuni tarbiyachi bilan tuzilgan mehnat shartnomasi bekor qilinib, u ishdan bo‘shatilgan», – deyiladi Bolalar ombudsmani ma’lumotida.

Shuningdek, ombudsman tarbiyachining mazkur xatti-harakatlari bolaga nisbatan jismoniy kuch ishlatish va uning sha’ni hamda qadr-qimmatini tahqirlash hisoblanishini ta’kidlagan.

Hozirda holat yuzasidan Ohangaron shahar ichki ishlar organlari tomonidan tergovga qadar tekshiruv ishlari olib borilmoqda.

Bola manfaatlari nuqtayi nazaridan ish Bolalar ombudsmani nazoratiga olingan, qo‘shimcha ma’lumotlar keyinroq taqdim etiladi.

Source link

Videodagi uch kishi ham jazolangan.

Samarqand viloyati YHXB taksi yo‘lovchilari eshitish qobiliyati zaif haydovchini tahqirlagani aks etgan video yuzasidan aniqlik kiritib, jamiyatda yurish-turish qoidalarini mensimagan va buni tasvirga olib mayda bezorilik sodir etgan fuqarolarga nisbatan ma’muriy qamoq jazosi belgilangani haqida xabar berdi.

Ma’lum bo‘lishicha, aslida rul boshqaruvida kar haydovchi bo‘lmagan. 

«Uch nafar shovvoz o‘zini ko‘z-ko‘z qilib, video videotasvirga olib, ijtimoiy tarmoqlarga joylagan. Bu holat ijtimoiy tarmoq foydalanuvchilarining o‘rinli e’tirozlariga sabab bo‘lgan», deyiladi xabarda.

Olib borilgan surishtiruv ishlari natijasida huquqbuzarlar topilib, ularning ishi jinoyat ishlari bo‘yicha Samarqand shahar sudida ko‘rib chiqildi.

Ushbu holat yuzasidan avtomashina boshqargan haydovchiga nisbatan 8 sutka, ichida bo‘lgan ikki nafar yo‘lovchilarga nisbatan 10 sutkadan ma’muriy qamoq jazosi tayinlandi.

Olib borilgan surishtiruv ishlari davomida ushbu avtoulovni boshqargan haydovchining hali haydovchilik guvohnomasiga ega emasligi, ya’ni transport vositasini me’yoriy hujjatlarsiz boshqargani aniqlanib, unga nisbatan Ma’muriy javobgarlik to‘g‘risidagi kodeksning 135-moddasi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) 2-qismiga asosan ma’muriy bayonnoma rasmiylashtirilib, avtomobil vaqtinchalik jarima maydonchasiga olib kelib qo‘yildi.

Source link

Prezident Shavkat Mirziyoyev raisligida 2026-yil 13-mart kuni aholi murojaatlari bilan ishlash tizimini takomillashtirish, Xalq qabulxonalari faoliyatini yangi bosqichga olib chiqish va jamoatchilik fikrini chuqur tahlil qilish masalalari yuzasidan videoselektor yig‘ilishi bo‘lib o‘tgan edi.

Ushbu yig‘ilishda berilgan topshiriqlar ijrosini ta’minlash doirasida O‘zbekiston Respublikasi Prezidenti huzuridagi Davlat siyosati va boshqaruvi akademiyasida ichki ishlar organlari xodimlari uchun maxsus o‘quv kurslari boshlandi.

Uch kunlik mashg‘ulot ichki ishlar organlari xodimlarining aholi bilan samarali muloqot qilish, fuqarolar murojaatlarini tizimli va manzilli hal etish, shuningdek, ularning kasbiy kompetensiyalari hamda psixologik tayyorgarligini oshirishga qaratilgan muhim tashabbus sifatida yo‘lga qo‘yildi.

Kurs dasturiga ko‘ra, tinglovchilar aholi muammolarini chuqur tahlil qilish, ularga manzilli yechim topish, fuqarolar bilan muloqotda zamonaviy yondashuvlarni qo‘llash bo‘yicha nazariy bilimini mustahkamlab, amaliy ko‘nikmani rivojlantiradi.

Shu bilan birga, mashg‘ulotlar jarayonida davlat xizmatchilari odob-axloqi, xizmat intizomi, aholi bilan ishlashning ilg‘or usullariga alohida e’tibor qaratilmoqda.

Mazkur o‘quv-trening mashg‘ulotlari davomida xalqaro tajribalarga asoslangan hamda milliy uyg‘unlikdagi maxsus o‘quv dasturi ishlab chiqildi, – dedi akademiya prorektori Nosirjon Asqarov. – Asosiy maqsad – korrupsiyaga toqatsiz hamda fuqarolarning dardini tinglay oladigan, murojaatlarni yangi tartibda hal qiladigan, har bir masalani bevosita o‘ziga daxldor, ya’ni shaxsiy bir murojaat sifatida qabul qiladigan xodimlarni tayyorlashga qaratilgan. 

Shuningdek, o‘quv dasturi doirasida tergov va surishtiruv jarayonlarida qonuniylikni ta’minlash, huquqbuzarlikning oldini olish mexanizmlari, korrupsiyaga qarshi kurashishning zamonaviy yondashuvlari kabi dolzarb mavzular qamrab olinadi.

Bu ishtirokchilarning nafaqat kasbiy, balki ma’naviy-ma’rifiy salohiyatini ham yuksaltirishga xizmat qilishi bilan ahamiyatlidir.

Ma’lum qilinganidek, videoselektor yig‘ilishida Prezident Virtual va Xalq qabulxonalariga ichki ishlar organlari faoliyatiga oid murojaatlar haligacha ko‘plab tushayotgani, ayrim hollarda xodimlar muomalasi va xizmat faoliyati yuzasidan salbiy fikrlar bildirilayotgani tanqidiy muhokama qilingan edi.

O‘quv kursi mashg‘ulotlariga Prezident Administratsiyasi, Oliy Majlis Senati, Oliy sud, Bosh prokuratura, Ichki ishlar vazirligi, Korrupsiyaga qarshi kurashish agentligi, Advokatlar palatasi, Respublika Ma’naviyat va ma’rifat markazi vakillari, shuningdek, malakali professor-o‘qituvchilar, olimlar va ekspertlar jalb etilgan.

Ishtirokchilarning bilim va ko‘nikmalari dastlab kirish testlari orqali baholanib, natijalarga ko‘ra guruhlarga ajratildi hamda har bir tinglovchi bilan individual yondashuv asosida ish olib borilyapti.

Amaliy mashg‘ulotlarda real keyslar, simulyasion vaziyatlar orqali qaror qabul qilish, stressga chidamlilik, xizmat samaradorligini oshirish kabi muhim ko‘nikmalar shakllantiriladi.

Source link