Hukumatning 2026-yil 29-apreldagi 211-sonli qarori bilan tadbirkorlar uchun imtiyoz va preferensiyalarning yagona reyestrini shakllantirish tartibi tasdiqlandi. Yangi nizom Yagona interaktiv davlat xizmatlari portali orqali ushbu ma’lumotlarni jamlash va yangilashni nazarda tutadi.

Mazkur hujjatga ko‘ra, tadbirkorlar uchun mavjud barcha imtiyozlar yagona tizimga joylashtiriladi. Shu bilan birga, imtiyoz va preferensiyalar haqidagi ma’lumotlar Iqtisodiyot va moliya vazirligining «subsidiya.mf.uz» platformasida shakllantirilib, o‘zaro integratsiya orqali portal orqali bepul taqdim etiladi.

Yangi tartibga muvofiq, davlat organlari o‘zlari taqdim etadigan imtiyozlar haqidagi ma’lumotlarni mazkur reyestrga joylashtirishi shart.

Bu ma’lumotlar qatoriga imtiyozning nomi va turi, uni taqdim etish asosi bo‘lgan normativ-huquqiy hujjat, amal qilish muddati va qo‘llanilish doirasi kiradi.

Shuningdek, imtiyoz qaysi sohalarga taalluqli ekani, kimlar foydalanishi mumkinligi va boshqa muhim ma’lumotlar ham ochiq e’lon qilinadi.

Nizomga ko‘ra, reyestrga kiritiladigan ma’lumotlar to‘liq va haqqoniy bo‘lishi shart. Bu esa davlat organlaridan mas’uliyatni yanada oshirishni talab qiladi.

Source link

2026-yilning yanvar–mart oylari yakunlari O‘zbekiston iqtisodiyoti barqaror o‘sish trayektoriyasini saqlab qolayotganini ko‘rsatmoqda. Milliy statistika qo‘mitasi hisob-kitoblariga ko‘ra, yalpi ichki mahsulot hajmi 447,9 trillion so‘mni tashkil etib, o‘tgan yilning mos davriga nisbatan 8,7 foizga o‘sgan. Bu ko‘rsatkich iqtisodiyotda ichki talab va ishlab chiqarish faolligi yuqori darajada saqlanayotganidan dalolat beradi.

Iqtisodiy o‘sishning tarmoqlar kesimidagi tahlili shuni ko‘rsatadiki, xizmatlar sohasi asosiy drayver sifatida ajralib turibdi. Ushbu sektor 8,8 foizga o‘sib, yalpi ichki mahsulot o‘sishiga eng katta – 4,9 foiz punkt hissa qo‘shgan. Ayniqsa, savdo, yashash va ovqatlanish xizmatlari (15,5 foiz), shuningdek, transport, axborot va aloqa sohalari (14,4 foiz)dagi yuqori o‘sish ichki iste’mol va logistika faolligining kuchayganini ko‘rsatadi. Bu holat xizmatlar iqtisodiyotining mamlakatda tobora muhim ahamiyat kasb etayotganini anglatadi.

Sanoat tarmog‘ida ham ijobiy dinamika saqlanib, 8 foizlik o‘sish qayd etildi. Uning yalpi ichki mahsulot o‘sishiga qo‘shgan hissasi 2,2 foiz punktni tashkil etgan. Bu ishlab chiqarish hajmlarining barqaror kengayayotgani va sanoat sektori iqtisodiyotning muhim ustunlaridan biri bo‘lib qolayotganini ko‘rsatadi.

Qurilish sohasi esa eng yuqori o‘sish sur’atlaridan birini namoyon etdi – 15 foiz. Uning yalpi ichki mahsulot o‘sishiga hissasi 0,9 foiz punktni tashkil etgan. Bu mamlakatda infratuzilma loyihalari va uy-joy qurilishi faol davom etayotganini, investitsiya jarayonlari jonlanganini ko‘rsatadi.

Qishloq, o‘rmon va baliqchilik xo‘jaligida 5,1 foizlik o‘sish kuzatildi. Garchi bu ko‘rsatkich boshqa sohalarga nisbatan pastroq bo‘lsa-da, tarmoq barqaror rivojlanishni saqlab qolmoqda va iqtisodiyotga ijobiy hissa qo‘shmoqda.

Shuningdek, mahsulotlarga sof soliqlar hajmining 8,2 foizga oshgani davlat budjeti tushumlari va iqtisodiy faollik o‘sishi bilan bog‘liq jarayonlarni aks ettiradi.

Umuman olganda, 2026-yil boshidagi makroiqtisodiy ko‘rsatkichlar O‘zbekiston iqtisodiyoti diversifikatsiyalashgan tarzda o‘sib borayotganini ko‘rsatadi. Xizmatlar sohasi yetakchi drayverga aylanib, sanoat va qurilish bilan birga iqtisodiy o‘sishni qo‘llab-quvvatlamoqda. Bu esa mamlakatda ichki talab, investitsiya va ishlab chiqarish o‘rtasidagi muvozanat saqlanayotganini anglatadi.

Biroq, kelgusi davrda ushbu o‘sishni saqlab qolish uchun tarmoqlar o‘rtasidagi muvozanatni ta’minlash, ayniqsa qishloq xo‘jaligi va sanoatda samaradorlikni oshirish muhim ahamiyat kasb etadi.

Source link

2026-yilning yanvar–mart oylarida O‘zbekistonda jami 63 trln 954,7 mlrd so‘mlik qurilish ishlari bajarildi. Bu ko‘rsatkich 2025-yilning shu davriga nisbatan 15,5 foizga oshgan.

Qayd etilishicha, qurilish ishlari hajmida eng katta ulush Toshkent shahriga to‘g‘ri keldi. Poytaxtda 17 trln 308,2 mlrd so‘mlik qurilish ishlari amalga oshirilib, o‘sish sur’ati 108,9 foizni tashkil etdi.

Toshkent viloyatida 6 trln 614,2 mlrd so‘mlik ishlar bajarildi. Shuningdek, Farg‘ona viloyatida 4 trln 699,6 mlrd so‘m, Buxoro viloyatida 4 trln 618,5 mlrd so‘mlik qurilish hajmi qayd etildi.

Qoraqalpog‘iston Respublikasida qurilish ishlari 3 trln 313,4 mlrd so‘mni tashkil etdi. Bu yerda o‘sish sur’ati 176 foizga yetgani e’tiborli.

Andijon viloyatida 3 trln 307,4 mlrd so‘mlik ishlar bajarilib, o‘sish 113,5 foizni tashkil qildi. Jizzax viloyatida esa 1 trln 733,6 mlrd so‘m va 119,4 foizlik o‘sish qayd etildi.

Namangan (3 trln 005,8 mlrd), Samarqand (3 trln 723,2 mlrd) va Surxondaryo (3 trln 207,5 mlrd) viloyatlarida ham barqaror o‘sish kuzatildi.

Navoiy viloyatida 3 trln 164,0 mlrd so‘mlik qurilish ishlari bajarilib, o‘sish 125 foizni tashkil etdi. Xorazm viloyatida esa 3 trln 409,6 mlrd so‘m va 128,4 foizlik o‘sish qayd etildi.

Sirdaryo viloyatida hajm nisbatan past — 1 trln 206,0 mlrd so‘m bo‘lsa-da, o‘sish sur’ati 115,6 foizni tashkil etdi. Qashqadaryo viloyatida 3 trln 275,4 mlrd so‘mlik ishlar bajarildi.

Source link

O‘zbekistonda elektr energiyasi va tabiiy gazni iste’molchilarni tarmoqdan ajratish va cheklov kiritish hisobidan tejashga yo‘l qo‘yilmaydi. Bu – prezident farmonida belgilab qo‘yildi. Farmon bilan, energiya samaradorligi va tejamkorligini oshirish bo‘yicha yangi choralar tasdiqlandi. Xususan, “Energiya samaradorligi – farovon hayot garovi” umummilliy harakati yo‘lga qo‘yilmoqda.

2026 yilda energiya samaradorligini oshirishga doir prezident farmoni qabul qilindi.

Hujjatda belgilanishicha, elektr energiyasi va tabiiy gazni iste’molchilarni tarmoqdan ajratish va cheklov kiritish hisobidan tejashga yo‘l qo‘yilmaydi.

2026 yil 1 iyuldan vazirlik va idoralar, davlat tashkilotlari va ijtimoiy soha muassasalari hamda davlat ishtirokidagi korxonalarning yangi quriladigan, rekonstruksiya (modernizatsiya) qilinadigan va mukammal ta’mirlanadigan bino va inshootlarida energiya samaradorligining “S” va undan yuqori toifasiga ega bo‘lish talabi kiritiladi.

Har yili energiya sarfi belgilangan normativlardan keskin oshib ketgan davlat obektlarida xalqaro standartlar va energiya servis mexanizmlari asosida energiya samaradorligini tubdan yaxshilash dasturlari amalga oshiriladi.

Energiya samaradorligi milliy agentligiga energiya servis kompaniyalari (ESKO) tomonidan davlat buyurtmalari asosida ko‘rsatiladigan energiya servis xizmatlari uchun kafolatlangan to‘lovlarni amalga oshirish huquqi beriladi. To‘lovlar Energiya samaradorligini rag‘batlantirish va qo‘llab-quvvatlash jamg‘armasidan to‘lanadi.

2026 yil 1 oktyabrga qadar obektlar kesimida katta hajmdagi ma’lumotlar (Big Data), biznes-tahlil (Business Intellegence) va sun’iy intellekt texnologiyalari asosida energiya iste’molini va samaradorlik ko‘rsatkichlarini tahlil qilib borish amaliyoti yo‘lga qo‘yiladi.

Shuningdek, har yarim yilda iqtisodiyotning energiya sig‘imini hisoblash va tegishli ma’lumotlarni e’lon qilib borish amaliyoti ham joriy qilinadi.

Kundalik hayotda energiyani tejash va energiya samaradorligini oshirish ko‘nikmalarini singdirishga qaratilgan “Energiya samaradorligi – farovon hayot garovi” umummilliy harakati yo‘lga qo‘yiladi hamda aholi o‘rtasida targ‘ibot va tashviqot ishlari amalga oshiriladi.

Oliy ta’limdagi o‘quv dasturlariga energiya samaradorligi va tejamkorligini o‘rgatuvchi mavzular kiritiladi. Maktabgacha, umumiy o‘rta, o‘rta maxsus, kasbiy va oliy ta’lim tashkilotlarida tegishlicha tarbiyalanuvchi, o‘quvchi va talabalarda energiya tejamkorligi bo‘yicha bilim va ko‘nikmalarni shakllantirishga qaratilgan tadbirlar tashkil etib boriladi.

Source link

Aprelda dollarning so‘mga nisbatan rasmiy kursi 1,9 foizga pasaydi. Kursning o‘rtacha kunlik tebranishi 0,24 foizni tashkil etdi. Oy davomidagi 22 ta savdo sessiyasining 9 tasida AQSh dollari so‘mga nisbatan mustahkamlangan bo‘lsa, 13 ta savdo sessiyasida teskari holat kuzatildi. So‘m qadrining oshishi chiqarilgan qimmatli qog‘ozlar, asosiy mehnat bozorlarida valuta kursining mustahkamlanishi, oltinsiz eksportdagi yuqori o‘sish kabi omillar bilan bog‘lanyapti.

Aprel oyida O‘zbekistonda dollarning so‘mga nisbatan rasmiy kursi 1,93 foizga yoki 235,92 so‘mga pasayib, 12 210,71 so‘mdan 11 974,79 so‘mga arzonlashdi. 

Oy davomidagi 22 ta savdo sessiyasining 9 tasida AQSh dollari so‘mga nisbatan mustahkamlangan bo‘lsa, 13 ta savdo sessiyasida teskari holat kuzatildi. Aprel oyida dollarning eng minimum qiymati 30 aprel kuni qayd etildi – 11 974 so‘m. 9 aprel kuni dollar kursi oylik maksimum — 12 228 so‘mga yetdi.

Agar mart oyi oxirida banklarning dollarni sotib olish bo‘yicha eng yaxshi taklifi 12 170 so‘mdan, sotish bo‘yicha esa 12 215 so‘mdan boshlangan bo‘lsa, 30 aprel kuni eng yaxshi xarid kursi 11 960 so‘m, sotish kursi esa 11 990 so‘mni tashkil etdi.

Iqtisodchi Mirkomil Xolboyevning yozishicha, aprel oyida tanlab olingan 39 ta valutalarning faqatgina uchtasi dollarga nisbatan qadrsizlangan. Oy davomida dollarga nisbatan eng yuqori mustahkamlangan valuta rubl – 8,1 foiz (29 aprel holatiga). Shuningdek, oy davomida tenge 5,1 foiz, yuan 1 foizga o‘z qadrini oshirgan. Shuningdek, yirik valutalardan yevro 1,6 foizga, funt 2 foizga, frank 1,4 foizga hamda iyena 0,2 foizga mustahkamlangan.

Manba: Mirkonomika Telegram kanali

«Oy davomida so‘mning mustahkamlanishi aprel oyida chiqarilgan qimmatli qog‘ozlar (1 mlrd dollar ekv.), asosiy mehnat bozorimizda valuta kursi yuqori mustahkamlanishining ta’siri, oltinsiz eksportdagi yuqori o‘sish (birinchi chorakda 25 foiz o‘sish kuzatilgan) kabi omillar bilan izohlanadi», deya qayd etgan iqtisodchi.

Aprel oyida so‘mning kunlik tebranuvchanligi 0,24 foizni tashkil etib, mart oyiga nisbatan 33 foizga kengaygan. Lekin 2025 yil may-sentabr oylariga nisbatan sezilarli past shakllanishda davom etyapti.

Source link