Prezident Shavkat Mirziyoyev 25-mart kuni Toshkent xalqaro moliya markazini tashkil etish, Raqamli texnologiyalar xalqaro markazi faoliyatini yo‘lga qo‘yish hamda bank tizimida islomiy moliya mexanizmlarini joriy qilish bo‘yicha taqdimot bilan tanishdi.

Jahondagi geosiyosiy keskinlashuv sharoitida investitsiyalarni jalb qilish uchun raqobat tobora kuchayib bormoqda. Yurtimizning boy tabiiy resurslari, iqtisodiy salohiyati va islohotlari esa bu borada katta ustunlik yaratmoqda.

– Ko‘plab xalqaro kompaniyalar mintaqaviy xavf-xatarlarni baholab, yangi bozorlarni o‘rganishni boshlagan. Bu biz uchun tarixiy imkoniyat. Shu vaziyatda fursatni boy bermasdan, xalqaro moliya kompaniyalarini o‘zimizga tezroq jalb qilishimiz shart, – dedi Prezidentimiz.

Joriy yilda 50 milliard dollardan ziyod investitsiya jalb qilish maqsadiga erishish uchun investorlarning O‘zbekiston bozoriga kirishini yengillashtirish, ularga zamonaviy infratuzilma, xalqaro standartlarga mos huquqiy rejim, qo‘shimcha qulayliklar va eng muhimi, ishonchli hamda shaffof biznes muhitini ta’minlash zarur.

Shu bois, taqdimotda mamlakatimiz investitsiyaviy jozibadorligini yanada oshirishga qaratilgan uchta ustuvor yo‘nalish – xalqaro moliya va raqamli texnologiyalar markazlarini tashkil etish hamda islomiy moliya xizmatlarini joriy qilish masalalari ko‘rib chiqildi.

Toshkent xalqaro moliya markazi muhokama qilinar ekan, ushbu markaz yangi turdagi investitsiyalarni jalb qilish va barqaror iqtisodiy o‘sishning samarali vositasi bo‘lishi qayd etildi. Hisob-kitoblarga ko‘ra, 2030-yilgacha moliya markazi iqtisodiyotga qo‘shimcha 20-25 milliard dollar jalb qilish, yalpi ichki mahsulot o‘sishiga har yili qo‘shimcha 1 foizgacha hissa qo‘shish, 15 mingtagacha yangi yuqori malakali ish o‘rni yaratish, 10 ming nafar mutaxassis malakasini oshirishga xizmat qilishi mumkin.

Markaz faoliyati uchun maxsus huquqiy rejim joriy etish ko‘zda tutilgan. Bunda Angliya va Uelsning umumiy huquqi markaz to‘g‘risidagi qonunga zid bo‘lmagan darajada tatbiq qilinadi, markazning boshqaruv organlari o‘z normativ-huquqiy hujjatlarini qabul qilish vakolatiga ega bo‘ladi, nizolarni ko‘rib chiqishga ixtisoslashgan Toshkent xalqaro tijorat sudi va xalqaro arbitraj markazi faoliyati yo‘lga qo‘yiladi.

Markaz rezidentlari uchun kapitalning erkin harakati va repatriatsiyasi, erkin valyuta operatsiyalari, zamonaviy to‘lov vositalari, jumladan, raqamli aktivlar bilan ishlash, imtiyozli soliq rejimi, soddalashtirilgan viza tartibi kabi keng imkoniyatlar yaratilishi belgilangan. Moliya-investitsiya va bank faoliyati, sug‘urta, raqamli aktivlar, qimmatli qog‘ozlar, to‘lov tizimlari va xizmatlari, moliyaviy texnologiyalar bilan bog‘liq xizmatlar markazning asosiy faoliyat yo‘nalishlari bo‘ladi

Ikkinchi yo‘nalish – “Enterprise Uzbekistan” brendi ostida Raqamli texnologiyalar xalqaro markazini tashkil etish va rivojlantirish.

Taqdimotda mazkur markaz uchun 2100-yilga qadar amal qiladigan maxsus huquqiy rejim nazarda tutilgani ma’lum qilindi. Markazda tartibga solish “qumdoni” doirasida yangi yechimlarni sinovdan o‘tkazish, ish haqini xorijiy valyutada to‘lash, xalqaro mehnat standartlarini joriy qilish, shaxsga doir ma’lumotlarni xalqaro standartlar va bulutli texnologiyalar asosida qayta ishlash mumkin bo‘ladi. Intellektual mulkni himoya qilish, investitsiyalar, startaplar va eksport uchun qulay sharoitlar yaratiladi, bojxona va soliq bo‘yicha yengilliklar beriladi.

Sun’iy intellekt texnologiyalari, raqamli transformatsiya, tadqiqot va ishlanmalar, sertifikatlashtirish, startaplar hamda ma’lumotlar markazlari ushbu markaz faoliyatining asosiy yo‘nalishlari etib belgilanmoqda.

Taqdimotda 2030-yilgacha mazkur markaz orqali 1 mingtagacha kompaniyani jalb qilish, 300 mingdan ziyod ish o‘rni yaratish va 5 milliard dollarlik eksport salohiyatiga chiqish maqsadi belgilangani aytildi. Bir qator yirik xalqaro texnologik kompaniyalar ushbu tashabbusga qiziqish bildirgani qayd etildi.

Uchinchi yo‘nalish sifatida mamlakatimizda islomiy moliya xizmatlarini joriy qilish masalasi ko‘rib chiqildi.

Yurtimizda tovarni nasiyaga sotish orqali mijozni moliyalashtirish – murobaha, foydani taqsimlash sharti asosida mijozni moliyalashtirish yoki pul mablag‘larini jalb etish – muzoraba, vakillik shartnomasi orqali pul mablag‘larini berish yoki jalb etish – vakala, tovarlar uchun oldindan haq to‘lash orqali moliyalashtirish – salam va istisno, birgalikdagi faoliyat orqali mijozni moliyalashtirish – mushoraka, mol-mulkni islomiy ijaraga berish kabi operatsiyalar, shuningdek, qonunchilikka zid bo‘lmagan boshqa islomiy moliya instrumentlarini joriy qilish nazarda tutilmoqda.

Bunda sotilgan tovar ustamasiga qo‘shilgan qiymat solig‘i hisoblanmasligi, investitsiyaviy omonatdan olingan daromad soliqdan ozod qilinishi, islomiy ijara shartnomalari moliyaviy ijara va lizingga tenglashtirilishi belgilanmoqda.

Sohada tizimli boshqaruvni ta’minlash maqsadida Markaziy bank huzurida Islomiy moliya kengashi tashkil etiladi. Shuningdek, islomiy moliya xizmatlarini ko‘rsatuvchi banklarda ham alohida kengashlar tuziladi. Ushbu kengashlar standartlar ishlab chiqish, me’yoriy-huquqiy hujjatlar loyihalarini tayyorlashda ko‘maklashish, bahsli masalalarga izoh berish, shartnomalar va ichki hujjatlarni ko‘rib chiqish, muvofiqlik ustidan nazoratni ta’minlash bilan shug‘ullanadi.

Joriy yilda kamida bitta tijorat bankida islomiy “darcha” faoliyatini yo‘lga qo‘yish, 2026-2030-yillarda esa to‘liq islomiy bank faoliyatini amalga oshiruvchi ikkita bank tashkil etish rejalashtirilgan. Umuman, sohadagi yangiliklar orqali 2026-2030-yillarda qo‘shimcha 1 milliard dollar miqdorida investitsiya va depozitlarni jalb qilish imkoniyati yaratilishi qayd etildi.

Davlatimiz rahbari mazkur uch yo‘nalish mamlakatimizda zamonaviy moliyaviy va texnologik ekotizimni shakllantirishga xizmat qilishini ta’kidlab, ularni amaliyotga tatbiq etish ishlarini jadallashtirish yuzasidan topshiriqlar berdi.

Source link

Milliy statistika qo‘mitasi ma’lumotlariga ko‘ra, 2026-yil yanvar-fevral oylarida 1 081 612 nafar O‘zbekiston fuqarosi turistik maqsadlarda chet elga safar qilgan.

Bu ko‘rsatkich o‘tgan yilning mos davri bilan solishtirilganda qariyb 49,3 ming nafarga oshgan.

2026-yilning dastlabki ikki oyida O‘zbekiston fuqarolari eng ko‘p borgan mamlakatlar (top-10):

Qirg‘iziston — 426 421 nafar;
Tojikiston — 179 390 nafar;
Qozog‘iston — 166 017 nafar;
Saudiya Arabistoni — 115 350 nafar;
Rossiya — 62 054 nafar;
Turkiya — 34 634 nafar;
BAA — 26 449 nafar;
Tailand — 10 946 nafar;
Xitoy — 8 890 nafar;
Misr — 8 872 nafar.

Source link

Ijtimoiy tarmoqlarda vodiyning ayrim tumanlarida qoramollar ommaviy kasallanayotgani haqida mish-mish tarqaldi. Veterinariya boshqarmasiga ko‘ra, kuzatilayotgan kasallik chorvadorlar aytayotganidek oqsil (yashur) emas, balki qoramol stomatiti bo‘lib, havo harorati ko‘tarilishi bilan o‘tib ketadi.

Kun.uz muxbiri chorvasi kasallikka chalingan bir nechta xonadonda bo‘lib, rasmiylar bilan suhbatlashdi.

Ma’lumotlarga ko‘ra, chorvalarni holdan toydirgan kasallik bir necha oy avval boshlangan va bu qo‘shni tumanlarga ham tarqala boshlagan.

Kasallikka chalingan qoramollar holatini o‘rganish jarayonida chorva egalaridan ma’lumot olishning imkoni bo‘lmadi. Aniqrog‘i, ular negadir bu haqda gapirishni xohlamadi.

Veterinariya boshqarmasi mutaxassislari esa kuzatilayotgan kasallik odamlar aytayotgan yashur (oqsil) emas, balki qoramol stomatiti ekanini ma’lum qildi.

“Vahimaga o‘rin yo‘q”

Farg‘ona viloyati veterinariya boshqarmasi virusologiya laboratoriyasi mudiri Asqarali G‘oziyev:

— Oqsil kasalligi aksariyat juft tuyoqli hayvonlarda, ya’ni ko‘proq qoramollarda, qo‘y, echki va ohularda kuzatiladi. Kasallik qo‘zg‘atuvchi virus haqiqatan ham juda tez tarqaladi. Asosiy klinik belgilariga keladigan bo‘lsak, albatta, hayvonlarda birinchi navbatda og‘zida, shilliq pardalarida, tillarida, milklarida yaralar hosil bo‘lishi bilan, sigirlarning yelinlari og‘rishi bilan va ayrim holatlarda tuyoqlarining orasida yaralar paydo bo‘lish bilan xarakterlanadi.

Lekin biz ko‘rgan holatlarda oqsil kasalligining alomatlari ko‘rinmayapti. Chunki mana, bir xonadonda, mana shu joyning o‘zida ham qo‘ylar, ham echkilar, ham qoramollar turibdi, klinik belgilari ko‘rildi, hech qanday bu aytilgan kasallikning alomatlari kuzatilmadi. Bir tomonda og‘zidan ko‘pik oqayotgan sigir turibdi, bir tomonda esa qo‘ylar. Qo‘ylarga kasallik tegmagan. Agar tarqagan kasallik haqiqatan ham yashur bo‘lganida, qo‘ylar ham kasallangan bo‘lardi.

Bahorga kelib chorvalarda ozuqa yetishmasligi sababli avitaminoz hosil bo‘ladi. Natijada chorvalarning og‘iz bo‘shlig‘i, tili, milklari shilinib, yaralanish paydo bo‘ladi. Buni oddiy tilda stomatit desa ham bo‘ladi.

Asqarali G‘oziyev

Albatta, chorvadorlar qoramollarining og‘zida yaralar paydo bo‘lishi bilan darhol mutaxassisga murojaat qilishlari kerak. Agar haqiqatan ham yashur kasalligi paydo bo‘lgan holatlarda, mutaxassisga murojaat qilinsa, kerakli chora-tadbirlar ko‘rish mumkin.

Oddiy stomatitlar og‘iz bo‘shlig‘ida yaralar paydo bo‘lishi bilan xarakterlanadi. Bu oddiy usul bilan davolanadi: uy sharoitida oddiy dezinfeksiyalovchi vositalar, rivanol, furatsilin, margansovka, kaliy permanganat rastvori bilan og‘iz bo‘shlig‘ini yuvib xlor tetrasiklin, oksi tetrasiklin kabi sprey dorilar sepib turilsa, uzog‘i bilan to‘rt kun ichida kasallikni davolash mumkin. Bunday yuqumli kasalliklar odatda kuz va bahor oylarida kuzatiladi. Havo harorati ko‘tarilishi bilan kasalliklar barham topadi.

Bugungi kunda viloyatimizda epizootik holat barqaror. Ya’ni ayrim stomatit holatlarni e’tiborga olmaganda, vaziyat barqaror. Aholi vahimaga tushmasa ham bo‘ladi.

“Hayvonlardagi stomatit – mavsumiy kasallik”

Farg‘ona viloyati veterinariya va chorvachilikni rivojlantirish boshqarmasi boshlig‘i Azizbek Abdusamiyev:

— Internet tarmoqlarida hayvonlar o‘rtasida kasallik avj oldi mazmunidagi asoslanmagan ma’lumotlar tarqalyapti. Yuqumli, ya’ni oqsil kasalligi bilan hayvonlardagi stomatit kasalligining farqiga bormaganlar xalq orasida vahima uyg‘otishyapti xolos.

Joylarda emlash guruhlari muntazam ishlayapti. Uy hayvonlari muntazam ravishda vaksinatsiya qilinyapti. Bu degani bir yilda va olti oyda bir marta o‘tkaziladigan emlash tadbirlari amalda. Viloyatda 55 ta emlash guruhi tashkil qilingan bo‘lib, ularga 351 nafar veterinariya mutaxassislari biriktirilgan.

Bundan tashqari, viloyat veterinariya va chorvachilikni rivojlantirish boshqarmasida emlash guruhlari faoliyatini muvofiqlashtiruvchi shtablar tashkil qilingan. Xuddi shu shtablar tuman veterinariya bo‘limlarida ham mavjud.

Azizbek Abdusamiyev

Ayni paytda chorvalarda uchrayotgan stomatit bu – mavsumiy kasallik. Hayvonlar zax sharoitda parvarish qilinganda, stomatit kelib chiqishiga sabab bo‘ladi. Havo harorati ko‘tarilishi bilan bu kasalliklar yo‘qolib ketadi.

Hayvon egalariga murojaatim – chorvalarni o‘z vaqti emlating. Kasallik paydo bo‘lganida o‘z vaqtida veterinarga murojaat qiling. Har bir hududda mutaxassislarimiz faoliyat yurityapti.

Source link

Prezident Shavkat Mirziyoyev poytaxtimizning Yakkasaroy tumanidagi Milliy madaniy markazlar paviloniga tashrif buyurdi.

Mamlakatimizda 130 dan ziyod millat va elat vakillari yagona va ahil oila bo‘lib yashab kelmoqda, 157 ta milliy-madaniy markaz faoliyat ko‘rsatmoqda. Bu xilma-xillik ko‘p asrlik tarixiy jarayonlar natijasida shakllangan noyob ijtimoiy hodisa sanaladi.

Yurtimizda milliy madaniyatlarni rivojlantirish, millatlararo totuvlikni asrab-avaylash va mustahkamlash, shu orqali yosh avlodni bag‘rikenglik va hamjihatlik ruhida tarbiyalashga davlat siyosatining ustuvor yo‘nalishi sifatida doimiy e’tibor qaratib kelinmoqda.

Do‘stlik bog‘i hamda Millatlararo munosabatlar va xorijiy mamlakatlar bilan do‘stlik aloqalari qo‘mitasi binosiga tutash maydonda barpo etilgan, yigirma ikki millatning o‘ziga xos arxitekturasi aks etgan pavilon ham ushbu e’tiborning yorqin tasdig‘idir.

Bu yerda qozoq, qirg‘iz, turkman va boshqird o‘tovlari, koreys, belarus, ukrain, grek, olmon, dungan, polyak, yahudiy, gruzin, arman, tatar va qrim-tatar, uyg‘ur, turk, tojik, xitoy, rus hamda ozarbayjon xalqlarining ikki qavatdan iborat do‘stlik uylari joylashgan.

Intererlar o‘sha xalqning milliy an’analariga mos holda bezatilgan. Ekspozitsiyalarda esa milliy liboslar, cholg‘u asboblari, dekorativ-amaliy san’at namunasi, tarixiy maketlar va madaniy merosni aks ettiruvchi ko‘plab eksponatlar o‘rin olgan.

Bugun pavilonda Navro‘z shukuhi hukm surmoqda, zero, Navro‘z o‘zi bilan birdamlik, yangilanish va yaxshilikka da’vat kabi ezgu g‘oyalarni olib keluvchi bayramdir.

Davlatimiz rahbari har bir milliy maskan faoliyati bilan tanishdi. Ishtirokchilar bilan samimiy muloqot qildi.

Uchrashuvlar chog‘ida milliy-madaniy markazlarning umumxalq bayramlarini yuksak ruhda o‘tkazishdagi hissasi alohida e’tirof etildi. Yuksak vatanparvarligi, fidoyi mehnati bilan respublikamizning ijtimoiy-iqtisodiy salohiyatini oshirishga qo‘shayotgan hissasi uchun turli millatga mansub yurtdoshlarimizga minnatdorlik bildirildi.

Prezidentimiz pavilon mehmonlari uchun uchun tashkil etilgan badiiy dasturni tomosha qildi. Milliy madaniy markazlar vakillari bilan birgalikda suratga tushdi.

Source link

O‘zbekiston va Afg‘oniston davlatlari chegarasidagi neytral hududda joylashgan Amudaryo ichkarisidagi kichik orolchalarda paydo bo‘lgan qamishzorlarni rejali yoqish ishlari olib borilmoqda.

Rasmiy ma’lumotga ko‘ra, mazkur tadbir turli kasalliklar tashuvchisi hisoblangan zararkunanda hasharotlar ko‘payishi hamda yuqumli kasalliklar tarqalishining oldini olish maqsadida amalga oshirilmoqda.

Qayd etilishicha, yoqish ishlari mutasaddi idoralar ruxsati va o‘zaro kelishuv asosida tashkil etilgan.

Shuningdek, orolchalardagi yong‘in harakatlari va uning ko‘lami to‘liq nazoratga olingani ta’kidlangan.

Mutasaddilar ushbu tadbir yovvoyi qamishzorlarda belgilangan reja asosida olib borilayotganini bildirib, fuqarolardan ortiqcha vahimaga berilmaslikni so‘radi.

Ijtimoiy tarmoq foydalanuvchilari esa aholi o‘rtasida vahima keltirib chiqaruvchi yolg‘on axborotlarni tarqatmaslikka chaqirildi.

Source link