Sport
UEFA Isroilni chetlatish masalasini yana bir bor muhokama qiladi – OAV
Tashkilot ijro qo‘mitasining aksariyat a’zolari sanksiyalarni qo‘llab-quvvatlamoqda. Avvalroq, UYeFA bu masala bo‘yicha bir qarorga kelmagan edi.
Yevropa futbol assotsiatsiyalari ittifoqi (UYeFA) kelasi hafta Isroilni chetlatish yoki chetlatmaslik haqida qaror qabul qilishi kerak, tashkilot ijro qo‘mitasining aksariyat a’zolari sanksiyalarni qo‘llab-quvvatlamoqda, deb yozdi The Times.
Bu hafta UYeFA Isroilning harakatlariga qanday munosabat bildirishi bo‘yicha «yuqori darajadagi jiddiy munozaralar» o‘tkazdi, deb xabar berdi gazeta.
Isroilning chetlatilishi tarafdorlari 2022 yilda Ukrainada urush boshlaganidan keyin chetlatilgan Rossiya terma jamoalari va klublari misoliga ishora qilmoqda.
Avvalroq, Israel Hayom nashri diplomatlar va sport rahbarlarining, shuningdek, «Amerika rasmiylarining» sa’y-harakatlari tufayli Isroilni UYeFA turnirlaridan chetlatish masalasi endi kun tartibida emasligi haqida xabar berdi.
Avgust oyida Falastin hududlari bo‘yicha BMT maxsus ma’ruzachisi Francheska Albaneze UYeFA tashkilotiga murojaat qilib, Isroilni barcha musobaqalardan chetlatishga chaqirgan edi.
The New York Times xabariga ko‘ra, AQSh Isroil terma jamoasini 2026 yilgi jahon chempionatidan chetlatishga qaratilgan har qanday urinishlarni «butunlay to‘xtatish» uchun barcha sa’y-harakatlarni amalga oshiradi.
Isroil terma jamoasi hali jahon chempionatiga yo‘llanma olmagan, u I saralash guruhida ikkinchi o‘rinda borayotgan Italiya bilan bir xil (to‘qqiztadan) ochko to‘plagan holda uchinchi o‘rinni egallab turibdi. Guruh yetakchisi Norvegiya hisobida 15 ochko bor. Guruh g‘olibi turnirga to‘g‘ridan-to‘g‘ri yo‘l oladi, ikkinchi o‘rinni egallagan jamoalar esa keyingi saralash bosqichiga chiqadi.