Sport
Toshkentda taekvondo bo‘yicha yoshlar o‘rtasidagi jahon chempionati start oldi
12 aprel kuni Toshkent shahrida taekvondo WT bo‘yicha yoshlar o‘rtasidagi XV jahon chempionati boshlandi. Nufuzli musobaqada 115 davlatdan qariyb 1500 nafar sportchi ishtirok etishi kutilyapti.
12 aprel kuni Toshkent shahrida O‘zbekiston taekvondo WT assotsiatsiyasi tashabbusi bilan yoshlar o‘rtasidagi XV jahon chempionati boshlandi. Musobaqa poytaxtdagi Yakkakurash majmuasida o‘tkazilmoqda.
Chempionatda 115 ta davlatdan qariyb 1500 nafar sportchi va murabbiy ishtirok etmoqda. Bahslar 20 ta vazn toifasida tashkil etilib, ularning 10 tasi yigitlar, yana 10 tasi qizlar o‘rtasida o‘tkaziladi. Musobaqada 2009 yil 1 yanvardan 2011 yil 31 dekabrgacha tug‘ilgan sportchilar qatnashmoqda.
Dastlabki kun bahslarida yigitlar o‘rtasida +78 kg, qizlar o‘rtasida esa 46 kg va 59 kg vazn toifalarida g‘oliblar aniqlanadi. Ushbu bellashuvlarda O‘zbekiston sharafini Alisher Pak (+78 kg), Komila Sultonova (46 kg) va Viktoriya Denisenko (59 kg) himoya qilmoqda. Tadbirda dunyoning nufuzli taekvondo hamjamiyati vakillari hamda O‘zbekiston rasmiylari ishtirok etishyapti. Ochilish marosimida so‘z olgan Milliy olimpiya qo‘mitasi raisining birinchi o‘rinbosari Otabek Umarov ushbu musobaqa olimpiya majmuasidagi ilk musobaqa sifatida tarixda qolishini, O‘zbekistonda taekvondo tobora sevimli sport turiga aylanayotganini ta’kidladi.
13 aprel kuni chempionat doirasida “Olimpizm va tinchlik” mavzusida xalqaro forum tashkil etildi. Chempionat 17 aprelga qadar davom etadi.
Ta’kidlash joiz, mazkur jahon chempionati O‘zbekiston sport hayotidagi muhim voqealardan biri bo‘lib, yosh sportchilar uchun xalqaro maydonda tajriba orttirish va o‘z imkoniyatlarini namoyish etish imkonini beradi.