Jamiyat
Toshkentda odamlardan intervyu olish bahonasida pul yig‘ib kelgan shaxslar ushlandi
Hozirda mazkur holat yuzasidan Chilonzor tumani IIO FMB tomonidan tergovga qadar tekshiruv o‘tkazilmoqda.
Toshkent shahar IIBB ijtimoiy tarmoqlarda bir necha shaxs fuqarolardan intervyu olish bahonasida suhbatlashib, ulardan firibgarlik yo‘li bilan pul yig‘ayotgani aks etgan videoga munosabat bildirdi.
Qayd etilishicha, 5 iyul kuni Chilonzor tumanidagi bog‘larning birida 21 yoshli Sh.S., 24 yoshli S.S. va 20 yoshli T.A. fuqarolar bilan intervyu olish bahonasida suhbatlashib, masjid qurilishi, nogironlarga yordam kabi bahonalarni ishlatib, ulardan firibgarlik yo‘li bilan pul yig‘ayotgani ma’lum bo‘lgan.
Ko‘rilgan chora-tadbirlar natijasida, ushbu fuqarolarning shaxsi aniqlangan va ulardan ashyoviy dalil sifatida pul mablag‘lari xolislar ishtirokida rasmiylashtirib olingan.
Hozirda mazkur holat yuzasidan Chilonzor tumani IIO FMB tomonidan tergovga qadar tekshiruv o‘tkazilmoqda. Tekshiruv yakuni bo‘yicha qonuniy qaror qabul qilinishi ta’minlanadi.