Ulardan ikkisi aka-uka bo‘lgan. O‘smirlarning jasadi 2 kunlik qidiruvdan so‘ng bugun topildi.

Navoiyda 3 nafar yigit Zarafshon daryosiga cho‘kib ketib, vafot etdi. Navoiy viloyati FVB matbuot xizmati holatni Kun.uz’ga tasdiqladi.

Ma’lum qilinishicha, Karmana tumani Katta machit mahallasida yashovchi 4 nafar yigit 8 iyul kuni tush payti Zarafshon daryosiga cho‘milishga borgan. Ulardan 3 nafari cho‘milish vaqtida suvga cho‘kib ketgan.

“Buxoro va Navoiy viloyati FVB qutqaruvchilari, maxsus texnikalar va motorli rezina qayiq jalb etilgan holda qidiruv-qutqaruv ishlari olib borildi. 10 iyul kuni 3 nafar voyaga yetmagan o‘smirning jasadi hodisa sodir bo‘lgan joydan turli masofalarda topildi”, deyiladi boshqarma ma’lumotida.

Kun.uz manbasiga ko‘ra, vafot etganlar 2008 yilda tug‘ilgan J.S., 2012 yilda tug‘ilgan J.S. hamda 2010 yilda tug‘ilgan O.T. bo‘lgan. Ularning ikkisi aka-uka ekani aytilmoqda.

Avvalroq Navoiy viloyatining Navbahor tumanida 15 yoshli ikki o‘smir kanalga cho‘milishga borib, tok urishi oqibatida vafot etgandi.

Source link

Farg‘ona, Namangan va Andijon viloyatlarida tabiiy gaz tarmog‘iga ulash, yangi abonent hisobini rasmiylashtirish hamda gazdan qarzdorlikni kamaytirib berishni va’da qilib, fuqarolardan pul olgan bir qator mas’ul shaxslar fosh etildi. Ularga nisbatan jinoyat ishlari qo‘zg‘atilib, tergov harakatlari olib borilmoqda.

Bosh prokuratura huzuridagi departamentning Rishton tumani bo‘limi o‘tkazgan tergovga qadar tekshiruvda «Rishton tumangaz» gaz ta’minoti bo‘limi xodimlari S.Sh. va M.O. fuqaro H.Uning xonadonini tabiiy gaz tarmog‘iga ulash va hujjatlarini rasmiylashtirib berish evaziga 5,2 million so‘mni firibgarlik yo‘li bilan olib, shaxsiy ehtiyojlari uchun ishlatib yuborgani aniqlangan.

Uychi tumanida o‘tkazilgan tezkor tadbirda esa «Uychitumangaz» gaz ta’minoti bo‘limi yetakchi muhandisi B.D. fuqaroning xonadonini gaz tarmog‘iga ulash va hisoblagich o‘rnatib berish evaziga o‘z xizmat xonasida 4,5 million so‘m olgan vaqtida ashyoviy dalillar bilan ushlangan.

Chortoq tumanidagi tezkor tadbirda «Yangiqo‘rg‘ontumangaz» gaz ta’minoti bo‘limi yetakchi muhandisi A.A. fuqaroning uyini gaz tarmog‘iga ulash va yangi abonent hisob raqami ochib berish evaziga filial qorovuli orqali 4,8 million so‘m olgan vaqtida qo‘lga olingan.

Andijon viloyatining Izboskan tumanida esa «Hududgaz Andijon» gaz ta’minoti filialining sobiq bo‘lim boshliqlari A.I. va K.Yu. tadbirkorni gazdan hisoblangan 76 million so‘m qarzdorlikni kamaytirib berishga ishontirgan. Ular bu xizmat uchun olingan 500 AQSh dollarining bir qismi — 2,3 million so‘mni tadbirkorga qaytarib berayotgan vaqtida ashyoviy dalillar bilan ushlangan.

Bosh prokuratura ma’lum qilishicha, mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan. Hozirda barcha holatlar bo‘yicha tergov harakatlari davom etmoqda.

Source link

O‘zbekistondan tashqarida ish qidirayotgan fuqarolarni ishga joylashtirish bilan shug‘ullanuvchi tadbirkorlik sub’yektlari faoliyati endi elektron xavf tahlili tizimi orqali baholanadi. Yangi tartib qonunbuzarlik xavfini avtomatlashtirilgan tarzda aniqlash va nazorat choralarini xavf darajasiga qarab tashkil etishni nazarda tutadi.

Adliya vazirligi tomonidan «O‘zbekistondan tashqarida ish qidirayotgan shaxslarni ishga joylashtirish bo‘yicha faoliyat ustidan nazoratni amalga oshirishda “Xavfni tahlil qilish” elektron tizimini joriy etish tartibi to‘g‘risida»gi nizom davlat ro‘yxatidan o‘tkazildi. Hujjat 2026 yil 9 iyul kuni 3895-son bilan ro‘yxatdan o‘tgan.

Nizomga ko‘ra, xorijda ishga joylashtirish xizmatlarini ko‘rsatuvchi tadbirkorlik sub’yektlari faoliyatida qonunchilik buzilishi ehtimoli avtomatlashtirilgan tarzda baholanadi.

Xavf darajasini aniqlashda davlat organlarining axborot tizimlari, statistik ma’lumotlar, jismoniy va yuridik shaxslar murojaatlari, ommaviy axborot vositalari hamda qonunchilikda nazarda tutilgan boshqa manbalardan olingan ma’lumotlardan foydalaniladi.

Shu bilan birga, xavf tahlilini o‘tkazish jarayonida tadbirkorlik sub’yektlaridan qo‘shimcha hujjatlar yoki ma’lumotlar talab qilinishiga yo‘l qo‘yilmaydi.

Yangi tartibga muvofiq, huquqbuzarlik xavfi yuqori, o‘rta va past toifalarga ajratiladi. Yuqori va o‘rta xavf toifasiga kiruvchi sub’yektlarga nisbatan qonunchilik asosida profilaktika tadbirlari va tekshiruvlar o‘tkazilishi mumkin.

Past xavf toifasiga kiritilgan tadbirkorlik sub’yektlarida esa tekshiruvlar amalga oshirilmaydi.

Nizomda alohida qayd etilishicha, elektron tizim tomonidan aniqlangan xavf darajasi tadbirkorlik sub’yektiga nisbatan to‘g‘ridan-to‘g‘ri ta’sir choralarini qo‘llash uchun mustaqil asos hisoblanmaydi.

Source link

O‘zbekistonda sobiq davlat xizmatchilarini ayrim tashkilotlarga ishga qabul qilish tartibi kuchaytirildi. Endi ularni ishga olishdan avval korrupsiyaga qarshi ichki nazorat bo‘linmasining xulosasini olish majburiy hisoblanadi.

Adliya vazirligi sobiq davlat xizmatchilarini ishga qabul qilishda korrupsiyaga qarshi ichki nazorat bo‘linmasidan xulosa olish tartibini belgilovchi idoraviy normativ-huquqiy hujjatni davlat ro‘yxatidan o‘tkazdi. Hujjat 2026 yil 8 iyul kuni 3894-son bilan ro‘yxatdan o‘tkazildi.

Mazkur tartib «Manfaatlar to‘qnashuvi to‘g‘risida»gi qonun ijrosini ta’minlash maqsadida qabul qilingan.

Qonunga muvofiq, davlat organi yoki tashkilotida ishlagan shaxs ishdan bo‘shaganidan keyin ikki yil davomida o‘zi nazorat qilgan tashkilotga ishga qabul qilinishi uchun avvalgi ish joyining korrupsiyaga qarshi ichki nazorat bo‘linmasidan majburiy xulosa olinishi shart.

Yangi tartibga ko‘ra, nazorat ostida bo‘lgan tashkilot sobiq davlat xizmatchisini ishga qabul qilishni rejalashtirsa, uning kadrlar xizmati bir ish kuni ichida korrupsiyaga qarshi ichki nazorat bo‘linmasiga murojaat qilishi lozim.

Ichki nazorat bo‘linmasi quyidagi uch turdagi xulosalardan birini taqdim etadi:

ijobiy xulosa — nomzodni ishga qabul qilish mumkin;

cheklovli ijobiy xulosa — belgilangan cheklovlar asosida ishga qabul qilish mumkin;

salbiy xulosa — ishga qabul qilish rad etiladi.

Hujjatga muvofiq, ichki nazorat bo‘linmasining xulosasi olinmagan yoki salbiy xulosa berilgan taqdirda nomzodni ishga qabul qilishga yo‘l qo‘yilmaydi.

Agar cheklovli ijobiy xulosa berilsa, xodim uch oy davomida avval nazorat qilgan tashkilotga oid qarorlarni qabul qilish jarayonida ishtirok etmaydi. Shuningdek, manfaatlar to‘qnashuviga sabab bo‘lishi mumkin bo‘lgan vazifalari qayta taqsimlanadi va uning faoliyati korrupsiyaga qarshi ichki nazorat bo‘linmasi tomonidan monitoring qilinadi.

Sobiq davlat xizmatchisi ichki nazorat bo‘linmasining xulosasidan norozi bo‘lsa, yuqori turuvchi tashkilotga yoki Korrupsiyaga qarshi kurashish agentligiga shikoyat qilish huquqiga ega.

Source link

Raqobat qo‘mitasi hamkor tashkilotlar bilan birgalikda chakana savdo nuqtalarida sotilayotgan xalq iste’moli tovarlarining sifat va xavfsizlik talablariga muvofiqligini aniqlash maqsadida muntazam nazorat xaridlarini o‘tkazib kelmoqda. Xarid qilingan mahsulotlar akkreditatsiyadan o‘tgan laboratoriyalarda ekspertizadan o‘tkazilib, davlat standartlari hamda normativ-texnik hujjatlar talablari asosida baholanadi.

2021–2025-yillar hamda 2026-yilning birinchi yarim yilligi davomida respublika bo‘yicha qariyb 2 600 nomdagi xalq iste’moli mahsuloti tekshirildi. Tahlillar natijasida 482 nomdagi mahsulot belgilangan talablarga javob bermasligi aniqlanib, ularni ishlab chiqaruvchilarga nisbatan qonunchilikda belgilangan tartibda tegishli choralar ko‘rildi.

E’tiborli jihati shundaki, talablarga javob bermagan mahsulotlar orasida dori vositalari va oziq-ovqat mahsulotlari ulushi yuqori bo‘lgan.

Nazorat xaridlari natijalari yillar kesimida ham mahsulotlar sifati bilan bog‘liq holatlar saqlanib qolayotganini ko‘rsatadi. 2021-yilda 182 ta mahsulot tekshirilib, 43 tasida nomuvofiqlik aniqlangan. 2022-yilda 242 ta mahsulotdan 55 tasi talablarga javob bermagan.

2023-yilda tekshirilgan 397 ta mahsulotning 26 tasida kamchilik qayd etilgan bo‘lsa, 2024-yilda 560 ta mahsulotdan 110 tasi sifat talablariga mos kelmagan. 2025 yilda esa 822 ta mahsulot ekspertizadan o‘tkazilib, ularning 201 tasida qonunchilik va standart talablari buzilgani ma’lum bo‘lgan.

2026-yilning birinchi yarim yilligida 394 ta mahsulot nazorat xarididan o‘tkazilib, 47 tasi normativ-texnik talablarga javob bermasligi aniqlangan.

Tahlillarga ko‘ra, nazorat xaridlarining asosiy qismi qadoqlangan oziq-ovqat mahsulotlari(15,6 foiz), dori vositalari(10,4 foiz), konservalangan mahsulotlar(9,6 foiz), yoqilg‘i-moylash materiallari(9 foiz), sut mahsulotlari(7,9 foiz), osh tuzi(7,1 foiz) va un mahsulotlari(5,7 foiz) hissasiga to‘g‘ri kelgan.

2026-yilning o‘tgan olti oyida «O‘zbekiston — 2030» strategiyasi doirasida 43 turdagi qariyb 400 nomdagi mahsulot laboratoriya ekspertizasidan o‘tkazildi. Natijada talablarga javob bermagan 47 nomdagi mahsulot bo‘yicha materiallar savdodan qaytarib olish va qonunchilikda belgilangan choralarni ko‘rish uchun O‘zbekiston texnik jihatdan tartibga solish agentligi hamda Sanitariya-epidemiologiya qo‘mitasiga yuborildi.

Source link