Mahalliy
Toshkent davlat sharqshunoslik universitetida xalqaro ilmiy konferensiya bo‘lib o‘tdi
Toshkent davlat sharqshunoslik universitetida «Xorijiy tillarni o‘qitishdagi yangi tendensiyalar: inklyuziv ta’lim va EFL/ESPdagi innovatsiyalar» mavzusida tashkil etilgan ilmiy konferensiya xalqaro va mahalliy oliy ta’lim muassasalari professorlarini oflayn va onlayn shaklda bir joyga jamladi.
Mazkur anjuman xorijiy tillarni o‘qitishda zamonaviy yondashuvlar, inklyuziv ta’limning dolzarb masalalari hamda EFL (ingliz tilini xorijiy til sifatida o‘qitish) va ESP (maxsus maqsadlar uchun ingliz tili) yo‘nalishlaridagi innovatsion usullarni muhokama qilishga bag‘ishlandi.
Unda xorijiy va mahalliy olimlar tomonidan til o‘qitish metodikasi, madaniyatlararo kommunikatsiya, korpus lingvistikasi, inklyuziv ta’lim, sun’iy intellektning metodik imkoniyatlari hamda leksik xaritalash orqali so‘z boyligini oshirish kabi dolzarb mavzularda ma’ruzalar taqdim etildi.
Konferensiya doirasida xorijiy tillarni o‘qitishda innovatsion metodlarni joriy etish, inklyuziv ta’limni rivojlantirish, zamonaviy pedagogik texnologiyalardan samarali foydalanish hamda xalqaro tajribalarni o‘rganishga bag‘ishlangan sho‘’ba yig‘ilishlari ham tashkil etildi.