Buxoro, Andijon, Namangan va Surxondaryo viloyatlarida Koreyaga ishga yoki o‘qishga yuborishni va’da qilib, fuqarolardan yirik miqdorda pul olgan shaxslar qo‘lga olindi. Ayrim holatlarda o‘nlab ming dollar mablag‘lar firibgarlik yo‘li bilan o‘zlashtirilgani aniqlangan.

Bosh prokuratura huzuridagi Departament va boshqa huquqni muhofaza qiluvchi organlar tomonidan o‘tkazilgan tezkor tadbirlarda bir nechta firibgarlik holatlariga chek qo‘yildi.

Jumladan, Buxoro viloyatida fuqaro N.J. tanishlari orqali fuqaroni Koreya Respublikasiga yuborishini aytib, 7 ming AQSh dollarini olgan vaqtida ashyoviy dalillar bilan ushlangan.

Andijon viloyatida esa N.K. nodavlat ta’lim muassasasi rahbari S.E. fuqaroga xorijiy davlat diplomini olib berish va Koreyaga ishchi viza rasmiylashtirishni va’da qilib, 6 ming AQSh dollari hamda 3 million so‘m talab qilgan. U mablag‘ning bir qismi — 500 dollar va 3 million so‘mni olgan vaqtida qo‘lga tushgan.

Tergovga qadar tekshiruvda mazkur shaxs yana 14 nafar fuqarodan Koreyaga ishchi viza olib berish bahonasida jami 44,1 ming AQSh dollarini firibgarlik yo‘li bilan olgani aniqlangan.

Namangan viloyatida G.V. MChJ rahbari A.V. ikki nafar fuqaroni Koreyadagi oliy ta’lim muassasasining magistratura bosqichiga o‘qishga va ishga joylashtirishni va’da qilib, 11 ming AQSh dollarini olgan vaqtida ushlangan.

Surxondaryo viloyatida esa fuqaro F.R. bir shaxsni 10 ming AQSh dollari evaziga Koreyaga ishga yuborishini aytib, mablag‘ning bir qismi sifatida 5 ming dollar va 61 million so‘mni olgan vaqtida qo‘lga olingan.

Mazkur holatlar yuzasidan Jinoyat kodeksining firibgarlik va pora berishga doir moddalari bilan jinoyat ishlari qo‘zg‘atilgan bo‘lib, tergov harakatlari davom etmoqda.

Source link

«Universal Mobile Systems» MChJ (MobiUz) ustav kapitalidagi davlat ulushini xususiylashtirish bo‘yicha xalqaro ochiq savdo jarayonlari muvaffaqiyatli yakunlandi.

Davlat aktivlari agentligi ma’lum qilishicha, MobiUz kompaniyasining 100 foiz davlat ulushini sotish jarayoni xalqaro standartlar asosida tashkil etilgan. Unda strategik konsultant sifatida «Rothschild & Co», moliyaviy konsultant sifatida «KPMG», mustaqil baholovchi sifatida esa «Deloitte» jalb qilingan.

Xususiylashtirish jarayoni xalqaro miqyosda keng targ‘ib qilinib, 100 dan ortiq strategik va moliyaviy investorlar bilan muzokaralar o‘tkazilgan. Shuningdek, loyiha «Bloomberg» va «Financial Times» kabi nufuzli xalqaro nashrlarda yoritilgan.

Natijada AQSh, Yaponiya, Fors ko‘rfazi mamlakatlari, Yevropa va Kavkazorti mintaqalaridan 15 dan ziyod investor qiziqish bildirgan. Ulardan 10 nafari dastlabki takliflarni taqdim etgan bo‘lsa, yakuniy bosqichga 6 nafar ishtirokchi yetgan.

Savdo natijalariga ko‘ra, AQShning «McKim and Company» kompaniyasi boshchiligidagi moliyaviy investorlar va texnologik hamkor «JVR Enterprises LLC» («JVR Capital Group») ishtirokidagi konsorsium g‘olib deb topildi.

G‘olib taklifga muvofiq, MobiUz kompaniyasi 351 million AQSh dollariga baholangan. Shuningdek, yangi investorlar telekommunikatsiya infratuzilmasini rivojlantirish uchun qo‘shimcha 500 million dollargacha investitsiya kiritishni rejalashtirmoqda.

Davlat aktivlari agentligi ma’lumotiga ko‘ra, bitimning EV/EBITDA multiplikatori 7,4 barobarni tashkil etgan bo‘lib, bu kompaniya bozorda raqobatbardosh narxda baholanganini ko‘rsatadi.

Bitimning to‘liq yakunlanishi uchun tegishli davlat organlari ruxsatnomalarini olish va barcha korporativ-huquqiy tartib-taomillarni bajarish talab etiladi.

MobiUz O‘zbekistonning yirik mobil aloqa operatorlaridan biri hisoblanadi. Uning xususiylashtirilishi davlat aktivlarini isloh qilish va telekommunikatsiya sohasiga xususiy kapitalni jalb etish bo‘yicha olib borilayotgan siyosatning muhim bosqichlaridan biri sifatida baholanmoqda. 

Source link

O‘zbekistonda muntazam shahar avtobus yo‘nalishlarida yo‘lovchi tashish tizimini takomillashtirishga qaratilgan hukumat qarori qabul qilindi.

Vazirlar Mahkamasining 2026-yil 3-iyundagi 276-son qaroriga muvofiq, jamoat transportini modernizatsiya qilish, ekologik toza transport vositalarini jalb etish va to‘lov intizomini kuchaytirish bo‘yicha qator yangiliklar joriy etiladi.

Qarorga ko‘ra, haydovchi bilan birga kamida 60 nafar yo‘lovchi tashish imkoniyatiga ega bo‘lgan, «Yevro-5» va undan yuqori ekologik talablarga javob beradigan yangi avtobus, elektrobus va trolleybuslar 2027 yil 31 dekabrga qadar O‘zbekistonga import qilinganda ularga nisbatan utilizatsiya yig‘imining nol stavkasi qo‘llaniladi.

Shuningdek, 2026-yil 1-sentyabrdan boshlab brutto-shartnoma asosida tashkil etilgan shahar avtobus yo‘nalishlarida yo‘lkira haqini to‘lashning yangi tartibi joriy etiladi.

Unga ko‘ra, yo‘lovchilar avtobusga chiqish vaqtida transport kartasini validatorga tekkizish, bank kartasi yoki smartfon orqali NFC, QR-kod, biometrik va boshqa zamonaviy texnologiyalar yordamida to‘lovni amalga oshirishi lozim bo‘ladi. Imtiyozli yoki bepul yurish huquqiga ega fuqarolar ham ijtimoiy yoki transport kartasini validatorga tekkizish orqali ushbu huquqini tasdiqlaydi.

Hukumat qaroriga muvofiq, yo‘lkira haqi avtobusga chiqish paytida belgilangan usullar orqali tasdiqlanmasa, yo‘lovchi chiptasiz harakatlanayotgan deb hisoblanadi.

Qaror bilan shahar avtobus yo‘nalishlari tushunchasiga ham o‘zgartish kiritildi. Endi shahar hududidan 5 kilometrgacha, ayrim hollarda esa tasdiqlangan bosh rejalarga muvofiq 12 kilometrgacha chiquvchi yo‘nalishlar ham shahar avtobus yo‘nalishlari sifatida e’tirof etiladi.

Bundan tashqari, Transport vazirligiga 2026-yil 1-sentyabrga qadar poytaxt jamoat transporti va shahar atrofi temir yo‘l qatnovlarida yo‘lkira haqini to‘lashning yagona integratsiyalashgan tizimini joriy etish vazifasi yuklatildi. Ushbu tizim doirasida «elektropoyezd–avtobus» va «elektropoyezd–metro» kabi jozibador tarif rejalarini ishlab chiqish ham nazarda tutilgan.

Mutaxassislar fikricha, mazkur o‘zgarishlar jamoat transportida hisob-kitoblarni shaffoflashtirish, naqd pul aylanmasini qisqartirish va yo‘lovchilar uchun yanada qulay transport tizimini shakllantirishga xizmat qiladi.

Source link

Milliy statistika qo‘mitasi ma’lumotlariga ko‘ra, 2025-yilda O‘zbekistonda jismoniy mashg‘ulotlar bilan muntazam shug‘ullanuvchi aholi ulushi 70,3 foizni tashkil etgan. Ko‘rsatkich uy xo‘jaliklari tanlanma kuzatuvlari natijalari asosida shakllantirilgan.

Statistikaga ko‘ra, mazkur ko‘rsatkich so‘nggi yillarda barqaror o‘sish tendensiyasini namoyon etgan. 2021-yilda sport bilan shug‘ullanuvchilar ulushi 60,9 foizni tashkil etgan bo‘lsa, 2025-yilga kelib bu raqam qariyb 10 foiz bandga oshgan.

Rasmiy ma’lumotlarga ko‘ra, jismoniy mashg‘ulotlar bilan shug‘ullanuvchilar ulushi 2022-yilda 62,3 foiz, 2023-yilda 63,7 foiz va 2024-yilda 67,8 foizga yetgan.

Eng katta o‘sish sur’ati 2023–2025-yillar oralig‘ida kuzatilgan. Bu davrda ko‘rsatkich 6,6 foiz bandga ko‘tarilgan.

Eslatib o‘tamiz, 2026-yil 1-yanvar holatida O‘zbekistonda mehnatga layoqatli yoshdagi aholi soni 21,3 million nafar bo‘lib, bu jami aholining 55,8 foizini tashkil etgan.

Source link

Samarqand shahrida Global ekologik jamg‘armaning sakkizinchi assambleyasi ishtirokchilariga murojaat qilgan Prezident Shavkat Mirziyoyev iqlim o‘zgarishi, suv tanqisligi va cho‘llanish Markaziy Osiyo uchun eng dolzarb tahdidlardan biri bo‘lib qolayotganini ta’kidladi.

Davlat rahbari so‘zlariga ko‘ra, bugungi kunda mintaqada qariyb 37 million kishi suv tanqisligi yuqori bo‘lgan hududlarda yashamoqda. Jahon banki tahlillariga muvofiq, 2050-yilga borib bu ko‘rsatkich 75 million nafarga yetishi mumkin.

Prezident O‘zbekiston ekologik transformatsiyani yangi taraqqiyot modeli sifatida qabul qilganini qayd etdi. Shu maqsadda atmosfera havosini muhofaza qilish, chiqindilarni boshqarish, ko‘kalamzorlashtirish, ekologik ta’lim va bioxilma-xillikni saqlashga qaratilgan beshta milliy loyiha amalga oshirilmoqda.

Shuningdek, 2030-yilga qadar muhofaza etiladigan tabiiy hududlar maydonini 21 foizgacha kengaytirish, zararli tashlamalarni qisqartirish va chiqindilardan energiya ishlab chiqarish quvvatlarini oshirish rejalashtirilgani ma’lum qilindi.

Shuningdek, bir qator yangi tashabbuslar ilgari surildi. Xususan, Samarqandni «Markaziy Osiyoning yashil investitsiyalar va innovatsiyalar poytaxti» deb e’lon qilish taklif qilindi.

Shuningdek, Kolumbiya universiteti hamkorligida Ulug‘bek nomidagi Barqaror rivojlanish ilmiy-tadqiqot instituti tashkil etilishi ma’lum qilindi. U hududlarni yashil iqtisodiyot tamoyillari asosida rivojlantirish bo‘yicha ilmiy platforma vazifasini bajaradi.

Bundan tashqari, Iqlim o‘zgarishi va gidrometeorologiya milliy markazini tashkil etish, Qozog‘iston bilan birgalikda «Toza havo» davlatlararo konsorsiumini ishga tushirish hamda Orolbo‘yida «cho‘l iqtisodiyoti» tashabbusini amalga oshirish taklif etildi.

Prezident 2027-yilgi Toshkent investitsiya forumi «Barqaror rivojlanish va yashil investitsiyalar» mavzusiga bag‘ishlanishini ma’lum qildi. Forum doirasida «Eco Expo Central Asia» xalqaro ko‘rgazmasi ham o‘tkaziladi.

Shu bilan birga, O‘zbekiston Global ekologik jamg‘armaning donor mamlakatlari qatoriga qo‘shilishga tayyor ekani bildirildi. Bu qaror ekologik loyihalarni moliyalashtirish va mintaqaviy hamkorlikni yanada kengaytirishga xizmat qilishi ta’kidlandi.

Davlat rahbari mazkur assambleya ekologik xavfsizlik va barqaror taraqqiyot sohasida yangi mintaqaviy hamkorlik arxitekturasini shakllantirish uchun muhim maydon bo‘lishiga ishonch bildirdi.

Source link