Jamiyat
Talon-toroj va firibgarlik uchun shartli ozodlikka chiqish tartibi o‘zgardi
O‘zbekistonda talon-toroj va firibgarlik jinoyatlari uchun hukm qilingan shaxslarga nisbatan jazodan muddatidan ilgari shartli ravishda ozod qilish tartibi qat’iylashtirildi. Endi ular yetkazilgan zararni to‘liq qoplamagan taqdirda mazkur imtiyozdan foydalana olmaydi.
Prezident tomonidan imzolangan qonun bilan Jinoyat kodeksi va boshqa qonun hujjatlariga qo‘shimcha hamda o‘zgartirishlar kiritildi.
Qonunga muvofiq, o‘zlashtirish yoki rastrata qilish yo‘li bilan talon-toroj qilish, shuningdek firibgarlik jinoyatlari uchun hukm qilingan shaxslarga jazodan muddatidan ilgari shartli ravishda ozod qilish tartibi qayta ko‘rib chiqildi.
Unga ko‘ra, sodir etilgan jinoyat oqibatida yetkazilgan moddiy zararning o‘rni to‘liq qoplanmagan bo‘lsa, mahkum shartli ozodlikka chiqarilmaydi.
Shu bilan birga, qonun bilan korrupsiyaga oid jinoyatlarning aniq ro‘yxati ham belgilandi. Shuningdek, davlat organlari va tashkilotlarida komplayens hamda korrupsiyaga qarshi ichki nazorat tuzilmalarini tashkil etish, hududlarda korrupsiyaga qarshi kurashish kengashlarini shakllantirish nazarda tutilgan.
Mazkur qonun rasmiy e’lon qilingan kundan boshlab kuchga kirdi.