O‘zbekistondan tashqarida ish qidirayotgan fuqarolarni ishga joylashtirish bilan shug‘ullanuvchi tadbirkorlik sub’yektlari faoliyati endi elektron xavf tahlili tizimi orqali baholanadi. Yangi tartib qonunbuzarlik xavfini avtomatlashtirilgan tarzda aniqlash va nazorat choralarini xavf darajasiga qarab tashkil etishni nazarda tutadi.

Adliya vazirligi tomonidan «O‘zbekistondan tashqarida ish qidirayotgan shaxslarni ishga joylashtirish bo‘yicha faoliyat ustidan nazoratni amalga oshirishda “Xavfni tahlil qilish” elektron tizimini joriy etish tartibi to‘g‘risida»gi nizom davlat ro‘yxatidan o‘tkazildi. Hujjat 2026 yil 9 iyul kuni 3895-son bilan ro‘yxatdan o‘tgan.

Nizomga ko‘ra, xorijda ishga joylashtirish xizmatlarini ko‘rsatuvchi tadbirkorlik sub’yektlari faoliyatida qonunchilik buzilishi ehtimoli avtomatlashtirilgan tarzda baholanadi.

Xavf darajasini aniqlashda davlat organlarining axborot tizimlari, statistik ma’lumotlar, jismoniy va yuridik shaxslar murojaatlari, ommaviy axborot vositalari hamda qonunchilikda nazarda tutilgan boshqa manbalardan olingan ma’lumotlardan foydalaniladi.

Shu bilan birga, xavf tahlilini o‘tkazish jarayonida tadbirkorlik sub’yektlaridan qo‘shimcha hujjatlar yoki ma’lumotlar talab qilinishiga yo‘l qo‘yilmaydi.

Yangi tartibga muvofiq, huquqbuzarlik xavfi yuqori, o‘rta va past toifalarga ajratiladi. Yuqori va o‘rta xavf toifasiga kiruvchi sub’yektlarga nisbatan qonunchilik asosida profilaktika tadbirlari va tekshiruvlar o‘tkazilishi mumkin.

Past xavf toifasiga kiritilgan tadbirkorlik sub’yektlarida esa tekshiruvlar amalga oshirilmaydi.

Nizomda alohida qayd etilishicha, elektron tizim tomonidan aniqlangan xavf darajasi tadbirkorlik sub’yektiga nisbatan to‘g‘ridan-to‘g‘ri ta’sir choralarini qo‘llash uchun mustaqil asos hisoblanmaydi.

Source link

Raqobat qo‘mitasi hamkor tashkilotlar bilan birgalikda chakana savdo nuqtalarida sotilayotgan xalq iste’moli tovarlarining sifat va xavfsizlik talablariga muvofiqligini aniqlash maqsadida muntazam nazorat xaridlarini o‘tkazib kelmoqda. Xarid qilingan mahsulotlar akkreditatsiyadan o‘tgan laboratoriyalarda ekspertizadan o‘tkazilib, davlat standartlari hamda normativ-texnik hujjatlar talablari asosida baholanadi.

2021–2025-yillar hamda 2026-yilning birinchi yarim yilligi davomida respublika bo‘yicha qariyb 2 600 nomdagi xalq iste’moli mahsuloti tekshirildi. Tahlillar natijasida 482 nomdagi mahsulot belgilangan talablarga javob bermasligi aniqlanib, ularni ishlab chiqaruvchilarga nisbatan qonunchilikda belgilangan tartibda tegishli choralar ko‘rildi.

E’tiborli jihati shundaki, talablarga javob bermagan mahsulotlar orasida dori vositalari va oziq-ovqat mahsulotlari ulushi yuqori bo‘lgan.

Nazorat xaridlari natijalari yillar kesimida ham mahsulotlar sifati bilan bog‘liq holatlar saqlanib qolayotganini ko‘rsatadi. 2021-yilda 182 ta mahsulot tekshirilib, 43 tasida nomuvofiqlik aniqlangan. 2022-yilda 242 ta mahsulotdan 55 tasi talablarga javob bermagan.

2023-yilda tekshirilgan 397 ta mahsulotning 26 tasida kamchilik qayd etilgan bo‘lsa, 2024-yilda 560 ta mahsulotdan 110 tasi sifat talablariga mos kelmagan. 2025 yilda esa 822 ta mahsulot ekspertizadan o‘tkazilib, ularning 201 tasida qonunchilik va standart talablari buzilgani ma’lum bo‘lgan.

2026-yilning birinchi yarim yilligida 394 ta mahsulot nazorat xarididan o‘tkazilib, 47 tasi normativ-texnik talablarga javob bermasligi aniqlangan.

Tahlillarga ko‘ra, nazorat xaridlarining asosiy qismi qadoqlangan oziq-ovqat mahsulotlari(15,6 foiz), dori vositalari(10,4 foiz), konservalangan mahsulotlar(9,6 foiz), yoqilg‘i-moylash materiallari(9 foiz), sut mahsulotlari(7,9 foiz), osh tuzi(7,1 foiz) va un mahsulotlari(5,7 foiz) hissasiga to‘g‘ri kelgan.

2026-yilning o‘tgan olti oyida «O‘zbekiston — 2030» strategiyasi doirasida 43 turdagi qariyb 400 nomdagi mahsulot laboratoriya ekspertizasidan o‘tkazildi. Natijada talablarga javob bermagan 47 nomdagi mahsulot bo‘yicha materiallar savdodan qaytarib olish va qonunchilikda belgilangan choralarni ko‘rish uchun O‘zbekiston texnik jihatdan tartibga solish agentligi hamda Sanitariya-epidemiologiya qo‘mitasiga yuborildi.

Source link

Fransiyaning «Orano» kompaniyasi direktorlar kengashi rahbari Klod Imoven bilan energetika, ta’lim, suv ta’minoti tizimi, transport va shahar infratuzilmasi kabi sohalarda hamkorlik masalalari muhokama qilindi.

Foto: Telegram / Saida Mirziyoyeva

Prezident Administratsiyasi rahbari Saida Mirziyoyeva 9 iyul kuni yetakchi fransuz kompaniyalari vakillari bilan uchrashdi.

«Bugun Fransiya tadbirkorlari xalqaro harakati (MEDEF International) huzuridagi O‘zbekiston-Fransiya ishbilarmonlar kengashi raisi, «Orano» kompaniyasi direktorlar kengashi rahbari Klod Imoven boshchiligidagi yetakchi fransuz kompaniyalari vakillari bilan uchrashdim.

Biz energetika, ta’lim, suv ta’minoti tizimi, transport va shahar infratuzilmasi kabi ustuvor sohalarda hamkorlikni kengaytirishni maqsad qilganmiz.

Ushbu muzokaralar yaqinda prezident Emmanuel Makron bilan bo‘lib o‘tgan oliy darajadagi muloqotimizning uzviy va mantiqiy davomidir», deb yozdi Saida Mirziyoyeva ijtimoiy tarmoqdagi sahifasida.

Source link

Adliya vazirligi sobiq davlat xizmatchilarini ishga qabul qilishda korrupsiyaga qarshi ichki nazorat bo‘linmasidan xulosa olish bo‘yicha idoraviy hujjatni davlat ro‘yxatidan o‘tkazdi.

Qayd etilishicha, mazkur hujjat “Manfaatlar to‘qnashuvi to‘g‘risida”gi Qonun ijrosini ta’minlash maqsadida qabul qilingan. Unda davlat organi yoki tashkilotida ishlagan xodim ishdan bo‘shaganidan keyin 2 yil davomida uni o‘zi nazorat qilgan tashkilotga ishga olishdan oldin avvalgi ish joyining korrupsiyaga qarshi ichki nazorat bo‘linmasidan majburiy xulosa olinishi belgilangan.

Bunda, nazorat ostida bo‘lgan tashkilot sobiq davlat xizmatchisini ishga qabul qilmoqchi bo‘lsa, kadrlar bo‘limi 1 ish kuni ichida ichki nazorat bo‘linmasiga murojaat qiladi.

Ichki nazorat bo‘linmasi 3 xil xulosa berishi mumkin:

ijobiy — ishga qabul qilish mumkin;

cheklovli ijobiy — ayrim cheklovlar bilan ishga qabul qilinadi;

salbiy — ishga qabul qilish rad etiladi.

Ushbu xulosa olinmagan yoki salbiy xulosa berilgan taqdirda nomzodni ishga qabul qilish taqiqlanadi.

Cheklovli ijobiy xulosa berilganda, xodimga quyidagi choralar belgilanadi:

3 oy davomida avval nazorat qilgan tashkilot bo‘yicha qarorlar qabul qilishda ishtirok eta olmaydi;

manfaatlar to‘qnashuviga olib kelishi mumkin bo‘lgan vazifalari qayta taqsimlanadi;

faoliyati ichki nazorat bo‘linmasi tomonidan monitoring qilinadi.

Agar sobiq davlat xizmatchisi ichki nazorat bo‘linmasining xulosasidan norozi bo‘lsa, u yuqori turuvchi tashkilotga yoki Korrupsiyaga qarshi kurashish agentligiga shikoyat qilish huquqiga ega.

Source link

Senatning navbatdagi majlisida “Bolalarni ijtimoiy himoya qilish tizimi takomillashtirilishi munosabati bilan O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish to‘g‘risida”gi Qonun ma’qullandi.

Mazkur Qonun bilan Ma’muriy javobgarlik to‘g‘risidagi kodeksda ta’lim tashkilotida tarbiya va ta’lim berish jarayonida voyaga yetmagan bolaga nisbatan jismoniy zo‘ravonlik sodir etganlik, shuningdek uni tahqirlaganlik uchun ma’muriy javobgarlik belgilanmoqda.

Bundan tashqari, pedagogik faoliyatni amalga oshirish jarayonida voyaga yetmaganga nisbatan jismoniy va (yoki) ruhiy zo‘ravonlikka oid huquqbuzarlik sodir etganligi uchun ma’muriy javobgarlikka tortilgan shaxsga nisbatan bir yil muddat davomida maktabgacha ta’lim tashkilotida pedagogik faoliyat bilan shug‘ullanishi mumkin emasligi nazarda tutilmoqda.

Shuningdek, davlat yoki nodavlat muassasasining to‘liq ta’minotida bo‘lgan bola uchun ota yoki onani aliment to‘lashdan ozod qilishga yo‘l qo‘yilmasligi belgilanmoqda.

Shu bilan birga, yetim bola va ota-ona qaramog‘idan mahrum bo‘lgan bola faqat qarindoshlari tarbiyasiga berilishi qoidasi joriy etilmoqda.

Senatorlarning fikricha, ushbu Qonun bolalarning huquq va qonuniy manfaatlarini ishonchli himoya qilish, ta’lim muassasalarida ularning qadr-qimmati va daxlsizligini ta’minlash bo‘yicha huquqiy kafolatlarni mustahkamlashga zamin yaratadi.

Qonun prezident tomonidan imzolanganidan keyin kuchga kiradi.

Source link