Dunyodan
Savdo, Tayvan va geosiyosat muhokama qilindi.
Donald Tramp 9 yil ichida birinchi marta Xitoyga tashrif buyurdi. AQSh prezidenti uch kunlik davlat tashrifi doirasida Pekinda Xitoy rahbari Si Szinpin bilan uchrashdi. Ma’lumotlarga ko‘ra, yig‘ilish Xalq majlisi palatasida ikki soatdan ortiq davom etgan.
Prezident Trampga Davlat kotibi Marko Rubio, mudofaa vaziri Pit Xegset, moliya vaziri Skott Bessent va AQSh savdo vakili Jeymison Greer hamrohlik qildi. Delegatsiya tarkibiga Amerikaning 20 dan ortiq yirik kompaniyalari vakillari kirdi.
Uchrashuvda tomonlar savdo-iqtisodiy aloqalar, Tayvan muammosi, geosiyosiy xavfsizlik, ikki davlat oʻrtasidagi strategik raqobat masalalarini muhokama qildi.
Prezident Donald Tramp 2026-yilni AQSh-Xitoy munosabatlari uchun “tarixiy yil” deb atadi va ikki tomonlama aloqalar yaxshilanishiga umid bildirdi. Uning so‘zlariga ko‘ra, Qo‘shma Shtatlar Xitoy bilan “o‘zaro manfaat asosida” biznes yuritmoqchi.
Si Tszinpin savdo urushida g‘alaba yo‘qligini va AQSh va Xitoy o‘rtasidagi ziddiyat har ikki tomonga zarar yetkazishini ta’kidladi. Xitoy rahbari Tayvan muammosini ikki tomonlama munosabatlardagi “eng muhim masala” deb atadi va masalaga noto‘g‘ri yondashish to‘g‘ridan-to‘g‘ri mojaroga olib kelishi mumkinligidan ogohlantirdi.
Si Tszinpin, shuningdek, Xitoy va Qo’shma Shtatlar “Thusidid tuzog’i” dan qochish kerakligini ta’kidladi. Bu atama tarixan yuksalib borayotgan kuch va hukmron kuch oʻrtasidagi ziddiyat urushga aylanib ketishi xavfini bildiradi.
Marko Rubioning aytishicha, Qo’shma Shtatlar Xitoy taraqqiyotini to’xtatish niyatida emas.
Tahlilchilarga ko’ra, uchrashuv so’nggi yillarda taranglashgan AQSh-Xitoy munosabatlarida yangi diplomatik bosqichni boshlashi mumkin. Muzokaralar, ayniqsa, savdo cheklovlari, texnologiya raqobati va Tayvan bilan bog’liq keskinliklar sharoitida xalqaro hamjamiyatning e’tiborini tortdi.