Sport
«PSJ» va «Chelsi» klublar mundiali finalida to‘qnashadi
Yangilangan formatdagi turnir finali haqida asosiy ma’lumotlar.
Bugun yangi formatda ilk bor tashkil qilingan va bir oydan beri davom etib kelgan turnir o‘z yakuniga yetadi. Musobaqa finalida «PSJ» va «Chelsi» to‘qnash keladi.
G‘oliblar
Bu safar biroz kengroq formatda tashkil qilinayotgan bo‘lsa-da, klublar bo‘yicha jahon chempioni degan nom asr boshlarigacha yetib boradi va an’anaviy ravishda 1960 yildan buyon Tokioda tashkil etib kelingan qit’alararo kubok o‘rniga paydo bo‘lgan. Avvaliga faqat Libertadores va YeChL g‘olibi o‘rtasida bitta uchrashuv o‘tkazish bilan kifoyalanishgan bo‘lsa, keyin boshqa qit’alar vakillari ham qo‘shila boshlaydi.
Klublar o‘rtasidagi jahon chempionatida eng ko‘p «Real» g‘alaba qozongan – 5 marta. «Chelsi» hisobida ham ushbu turnir g‘olibligi bor – 2021 yilda londonliklar «Palmeyras» ustidan 2:1 hisobida ustun kelishgandi. Umuman olganda, oxirgi 11 turnirda, jumladan bu safar ham shunday bo‘ladi, bosh sovrin Yevropa klubiga nasib qilib kelmoqda. Qizig‘i, boshqa qit’a vakili g‘alaba qozongan oxirgi final 2012 yilda bo‘lgandi va aynan «Chelsi» «Korintians»ga imkoniyatni boy bergan.
Agar bugun «PSJ» g‘olib chiqadigan bo‘lsa, klublar o‘rtasida jahon chempioniga aylangan ilk fransuz jamoasiga aylanadi. Nafaqat 2000 yildan keyin paydo bo‘lgan turnir, umuman, 1960 yildan boshlangan qit’alararo kubok tarixini qo‘shadigan bo‘lsak ham, Fransiya klublarida g‘oliblik yo‘q. E’tiborli tomoni, 1993 yilda Marselning «Olimpik» jamoasi Chempionlar Ligasini yutgan bo‘lsa-da, jahon chempioni bo‘lish nasib etmagan – moliyaviy qing‘irliklar tufayli klub diskvalifikatsiyaga uchragan edi. Demak, Enrike shogirdlari tarixiy voqea bo‘sag‘asida turishibdi.
Angliyadan esa ikki marta «Manchester Yunayted», shuningdek, bir martadan «Manchester Siti», «Liverpul» va yuqorida aytilganidek «Chelsi» dunyoning eng kuchli jamoasi sifatida qayd etilib, ushbu sovrin egasiga aylangan.
«PSJ» – yaqqol favorit
Bemalol aytish mumkinki, final oldidan deyarli hamma «PSJ»ni yaqqol favorit sifatida e’tirof etmoqda. Parijliklar bu mavsum o‘zi qatnashgan barcha musobaqalarda g‘olib chiqmoqda, yo‘lidan chiqqan barcha top-klublarni mag‘lub etmoqda.
«Chelsi» esa ushbu turnirda to‘rt yil oldingi YeChL g‘olibligi evaziga ishtirok etayotgani, shuningdek, pley-off setkasida nisbatan osonroq raqiblarga duch kelgani go‘yoki finalning tasodifiy ishtirokchisi deb baholanishga ham asoslar yaratishi mumkin, ammo londonliklar aynan mana shunday pozitsiyada natija ko‘rsata olishini ham yaxshi bilamiz. So‘nggi 10-12 yilda «Chelsi» ancha beqaror natijalarni qayd etib, juda ko‘p murabbiylar almashgan bo‘lsa-da, ayniqsa xalqaro maydonda jamoa Angliyaning eng muvaffaqiyatli klubi hisoblanadi. «Chelsi» mana shu davr mobaynida ikki marta Chempionlar Ligasini, ikki marta Yevropa Ligasini yutdi, hatto yaqinda tashkil etilgan Konferensiyalar Ligasini ham yutishga ulgurdi.
YeChL finallarida «Chelsi» «Bavariya» va «Manchester Siti»ga qarshi o‘ynagani va o‘sha o‘yinlarda ham raqiblar yaqqol favorit sifatida qaralganini eslash mumkin. Ya’ni «Chelsi»da o‘z holati va tarkibidan qat’i nazar, kerakli paytda kuchli raqibga munosib turib bera olish xususiyati mavjud.
O‘zaro o‘yinlar
«PSJ»ning «Real» yoki «Bavariya» bilan o‘yinlari kattaroq afishadek tuyulishi mumkin, ammo o‘tgan o‘n yillikda aynan «PSJ» va «Chelsi» o‘rtasidagi pley-off o‘yinlar Chempionlar Ligasining klassikalari qatoriga kirgan. Ko‘pchilik so‘nggi daqiqalarda Demba Baning goli hisobni 2:0 ga yetkazgani (birinchi o‘yinda 1:3) va Joze Mourinioning maydon cheti bo‘ylab yugurganini yaxshi eslaydi. Bundan tashqari, keyingi mavsum nimchorak finalida ikki durangdan iborat o‘yinlar safardagi gol qoidasi bo‘yicha parijliklarni keyingi bosqichga olib chiqqandi.
Umuman, agar o‘rtoqlik o‘yinlari hisobga olinmasa, bu jamoalar o‘zaro 8 marta to‘qnash kelgan va barchasi Chempionlar Ligasida. Ikki marta londonliklarning qo‘li baland kelgan bo‘lsa, «PSJ» hisobida 3 g‘alaba bor, uch o‘yinda durang qayd etilgan. To‘plar nisbati esa 11-10, «Chelsi» foydasiga.
Finalgacha yo‘l
«Chelsi» turnirni D guruhida «Los Anjyeles» klubiga qarshi boshladi va 2:0 hisobida (gollarni Netu va Fernandes urgan) g‘alaba qozondi. Ammo ikkinchi o‘yinda Braziliyaning «Flamengo» jamoasiga 1:3 (Netu) hisobida yutqazib qo‘ydi. O‘yin natijasiga hisob 1:2 ekanida Nikolas Jyekson maydondan chetlatilishi ham ta’sir ko‘rsatgani shubhasiz. Guruhdagi so‘nggi o‘yinda «Esperans» ustidan 3:0 (Tosin, Delap, Jorj) g‘alaba londonliklar 2-o‘rin bilan pley-offga chiqishini ta’minladi. Qaysidir ma’noda mana shu 2-o‘rin ham «Chelsi»ga finalgacha yo‘l ochib berdi deyish ham mumkin. Sababi, Mareska shogirdlari biroz kuchsizroq jamoalar to‘plangan tarafga tushib qolishdi.
Nimchorak finalda «Benfika» ro‘baru bo‘ldi va qo‘shimcha vaqtlarda «Chelsi» 4:1 hisobida ustun keldi. Gollarga bu safar Jyeyms, Nkunku, Netu va Holl mualliflik qilishdi. Chorakfinalda esa Palmerning goli va Uyevertonning avtogoli evaziga «Palmeyras» dog‘da qoldirildi. Yarifinalda «Chelsi» uchinchi Braziliya klubiga to‘qnash keldi. Jamoa tarkibiga turnir davomida kelib qo‘shilgan Joao Pedruning dubli «Fluminense» ustidan g‘alabani va final yo‘llanmasini ta’minladi.
«Chelsi» 2025 yilgi klublar mundialida:
Guruh bosqichi
«Chelsi» — «Los-Anjyeles» — 2:0
«Chelsi» — «Flamengo» — 1:3
«Chelsi» — «Esperans» — 3:0
Pley-off
1/8 final. «Chelsi» — «Benfika» — 4:1 q.v.
1/4 final. «Chelsi» — «Palmeyras» — 2:1
1/2 final. «Chelsi» — «Fluminense» — 2:0.
«PSJ»ning finalgacha bosib o‘tgan yo‘li raqibi bilan o‘xshash – guruhda ikki g‘alaba va bir mag‘lubiyat. Parijliklar ham Braziliya klubiga, «Batofogo»ga imkoniyatni boy bergandi (0:1). Qolgan barcha o‘yinlarda «PSJ» g‘alaba qozondi va birorta ham gol o‘tkazib yubormadi. «Atletiko» yirik hisobda tor-mor etilgan (4:0) o‘yinda Ruis, Vitinya, Mayulu va Li Kan In, «Sietl Saunders»ga qarshi guruhdagi muhim g‘alaba (2:0) qayd etilgan o‘yinda Xvicha va Hakimi gollarga mualliflik qildi, «Inter Mayami»ga qarshi o‘yinda Nevesh ikkita, Hakimi bitta gol urdi, yana bir gol mayamiliklar futbolchisi nomiga avtogol sifatida yozildi (0:4).
Chorakfinalda «Bavariya»ga qarshi o‘yin «PSJ» uchun eng qiyini bo‘ldi. O‘yinning so‘nggi qismigacha durang saqlanib turdi va 78-daqiqadagina Due hisobni ochdi. Keyin 82-daqiqada Pacho, 90+2 da Lyuka Ernandes qizil kartochka olib maydonni tark etishgach, nemislarda hisobni tenglashtirish uchun imkoniyatlar bo‘lgandi. Ammo qarshi hujumlardan birida Dembele ikkinchi golni urdi va o‘yin taqdirini hal qildi.
Finaldan oldingi final deb e’tirof etilgan «Real»ga qarshi o‘yin esa kutilmaganda «PSJ»ning oson g‘alabasi bilan tugadi. 23-daqiqagacha Ruis ikkita va Dembele bitta gol urib, hisobni yirik ko‘rinishga olib kelib qo‘yishganda final yo‘llanmasi taqdiri hal bo‘lgandi. O‘yin oxirlarida Ramush yana bir gol urib, «PSJ» uchun turnirda sevimli bo‘lib qolgan hisobni ta’minladi – 4:0.
«PSJ» 2025 yilgi klublar mundialida:
Guruh bosqichi
«PSJ» — «Atletiko» — 4:0
«PSJ» — «Botafogo» — 0:1
«PSJ» — «Sietl Saunders» — 2:0
Pley-off
1/8 final. «PSJ» — «Inter Mayami» — 4:0
1/4 final. «PSJ» — «Bavariya» — 2:0
1/2 final. «PSJ» — «Real» — 4:0
Iqtiboslar
Luis Enrike:
«Demak, bizda yana bitta o‘yin bor va g‘alaba qozonsak, mavsumda ishtirok etgan barcha turnirlarda g‘alaba qozongan jamoa sifatida nomimizni tarixga yozib qo‘yishimiz mumkin. Bu biz uchun ham, muxlislar uchun ham ahamiyatli. Biz yuzdan ortiq gol urdik, juda kam o‘tkazib yubordik. Bizni finalda «Chelsi» kutib turibdi – turnirda yaxshi natijalar qayd etayotgan kuchli jamoa. Biz jiddiy tayyorlanishimiz va tiklangan bo‘lishimiz kerak».
Enso Mareska:
«Final – katta natija. Bu ajoyib mavsum. Biz juda juda baxtlimiz. Tarkibimizda muhim gollar urishga qodir bo‘lgan futbolchilar bor va biz ishonamiz. Butun jamoa bu futbolchilarning kerakli paytda gol urish imkoniyatiga ega bo‘lishi uchun harakat qilishi kerak».
Taxminiy tarkiblar
«PSJ»: Donnarumma – Mendesh, Pacho, Markinios, Hakimi – Nevesh, Vitiniya, Ruis – Kvaratsxeliya, Due, Dembele
«Chelsi»: Sanches – Gyusto, Chaloba, Adarabioyo, Kukurelya – Kaysedo, Fernandes, Palmer – Nkaunku, Netu, Joau Pedru.
Hakam
O‘yinni kelib chiqishi eronlik bo‘lgan avstraliyalik hakam Alirizo Fag‘oniy boshqarib boradi. U faoliyatini Eronda boshlagan, lekin 2019 yilda Avstraliyaga ko‘chib o‘tib, mahalliy chempionatda ishlagan. 2022 yil may oyida FIFA Alirizoni JCh-2022 hakamlari ro‘yxatiga kiritdi va u Qatarda Braziliya – Serbiya hamda Portugaliya – Urugvay uchrashuvlarini boshqardi.
Hakam yordamchilari ham Avstraliyadan: Anton Shetinin va Eshli Bichem.
O‘yin qayerda va qachon bo‘lib o‘tadi?
Final Nyu Jyersi shtatidagi Ist-Ruterford shahrida, «Metlayf Stedium»da bo‘lib o‘tadi. O‘yingoh 2010 yilda qurilgan va o‘z bag‘riga 82 500 tomoshabinni sig‘diradi.
O‘yinni o‘zbekistonlik tomoshabinlar «Zo‘r TV» orqali to‘g‘ridan to‘g‘ri tomosha qilishi mumkin. Translatsiya bugun soat 23:50 da boshlanadi. Davron Fayziyev va Hasan Turdaliyev birgalikda mazkur bahsni sharhlab boradi.
«Arsenal» so‘nggi daqiqalarda muhim g‘alabaga erishdi, qatorasiga ikkinchi o‘yinda durang o‘ynagan «Siti» endi 9 ochkoga ortda qolmoqda. «Chelsi» yana yutqazdi, «Real»da yirik g‘alaba.
«Arsenal» – «Everton» 2:0
Gollar: Yokeresh, 89 (1:0). Douman, 90+7 (2:0)
«Arsenal»: Rayya, Saliba, Gabriel Magalyayns, Kalafiori (Inkapiye, 74), Timber (Moskera, 38), Subimendi (Douman, 74), Rays, Eze, Madueke (Martinelli, 61), Saka, Havers (Yokeresh, 61)
«Everton»: Pikford, Kin, O`Brayyen, Mikolenko, Garner, Gana Guyye (Jorj, 90+5), Iroegbunam (Rel, 86), Dyusberi-Holl, Ndiay, Makneyl (Armstrong, 86), Betu (Barri, 69)
«Arsenal» o‘z maydonida kechgan o‘yinda to‘pga egalik qildi, ammo dastlabki 20 daqiqa ichida qarshi hujumlardan ikki bor gol o‘tkazib yuborishi mumkin edi. Birinchi holatda Rayyaning xatosidan keyin Maknilning zarbasidan keyin darvozaga kirib ketayotgan to‘pni yotgan holatda oyog‘ini ko‘tarib qolish orqali to‘xtatib qoldi.
Maknilning uzoq masofadan yo‘llagan zarbasi ustundan qaytdi, qaytgan to‘pga birinchi bo‘lib yetib kelgan Ndiay esa vaziyatdan foydalana olmadi. Keyinroq Maknilning bir necha metr masofadan yo‘llagan zarbasini darvozabon qaytardi.
«Kanonirlar» esa tinimsiz hujum uyushtirganiga qaramay (birinchi bo‘limning o‘zida 13 zarba berildi), hisobni ocha olmadi. Birinchi bo‘limdagi eng yodda qolgan vaziyat Havers jarima maydoni ichida yiqilishi bo‘ldi. Bu epizodda Kin avvaliga raqib hujumchisining oyog‘ini bosib oldi, keyin esa qo‘llari bilan turtib yiqitdi, ammo bosh hakam va VAR xonasidagilar kontakt penalti uchun yetarli emas deb topdi.
Ikkinchi bo‘limda esa mezbonlar uzoq masofadan zarba berishga e’tibor qarata boshladi, xususan, Ezening aylantirib yo‘llagan zarbasiga Pikford yetib bora olmadi, ammo to‘p darvoza ustuni yonidan o‘tib ketdi. Keyin esa Arteta katta tavakkalchilikka qo‘l urdi va tayanch yarimhimoyachisi Martin Subimendi o‘rniga o‘ng qanot vingeri Doumanni maydonga tashladi. Aynan shu o‘zgarish o‘yinni hal qildi. Avvaliga ushbu yosh yarimhimoyachining o‘ng qanotdan uzatmasidan keyin Pikford to‘pga chiqishda xatoga yo‘l qo‘ydi, Inkapiye esa to‘pni bo‘sh darvoza qarshisiga yetib kelgan Yokereshning oyoqlari ostiga tashlab berdi.
So‘nggi daqiqalarda mehmonlar hisobni tenglashtirish umidida to‘liq tarkib bilan oldinga tashlandi, Douman esa burchak zarbasidan keyin uyushtirilgan qarshi hujumda bo‘sh darvozani ishg‘ol etib, APL tarixiga kirdi. Maks 16 yosh-u 73 kunligida liga tarixida gol urgan eng yosh futbolchiga aylandi. Bu orqali u Jyeyms Von tomonidan 2005 yilda o‘rnatilgan rekordni (16 yosh-u 270 kun) yangiladi.
Shu tariqada, bu mavsumda zaxiradan tushgan futbolchilari 11 bor gol urgan Mikel Arteta jamoasi qiyinchilik bilan bo‘lsa-da muhim g‘alabaga erishdi.
«Chelsi» – «Nyukasl Yunayted» 0:1
Gol: Gordon, 18 (0:1)
«Chelsi»: Sanches, Chaloba, Fofana (Xato, 82), Kukurelya, Gyusto (Delap, 46), Jyeyms, Kaysedo (Lavia, 61), Fernandes, Garnacho, Palmer, Joao Pedro
«Nyukasl Yunayted»: Ramsdeyl, Botman, Tiau, Holl, Livramento, Uillok (Byorn, 77), Remsi, Voltemade (Joelinton, 67), Barns, Myorfi (Elanga, 78), Gordon
Ogohlantirishlar: Fofana, 23. Kaysedo, 25 – Ramsdeyl, 84. Holl, 89
«Chelsi» «qarg‘alar»ga qarshi Londonda o‘tgan oldingi 12 o‘yindan 11 tasida g‘alaba qozongandi va shanba oqshomidagi o‘yinni ushbu seriyani davom ettirish maqsadida hujumkorlik bilan boshladi. Ammo mezbonlar o‘z imkoniyatlaridan foydalana olishmadi. 18-daqiqada Palmer qulay vaziyatni yo‘qqa chiqarganidan keyin «Nyukasl» muvaffaqiyatli qarshi hujum uyushtirdi va Uillok Gordonni bo‘sh darvoza qarshisiga chiqarib yubordi.
Tanaffusdan keyin Entoni dublga erishishi mumkin edi, ammo darvozaga qaytgan Sanches jamoasini qutqardi. U Liam Rosenior jamoasini o‘yinda qoldirdi, ammo jamoa mag‘lubiyatdan qutulib qolishni uddalay olmadi. «Chelsi» yana ochko yo‘qotib, raqobatchilarga imkon berdi: bugun «MYu» va «Aston Villa» o‘yinida g‘olib bo‘lgan jamoa ilgarilab ketadi, «Liverpul» esa «Chelsi»ni quvib o‘tib, beshinchi o‘ringa ko‘tarilishi mumkin.
«Vest Hem» – «Manchester Siti» 1:1
Gollar: Bernardu Silva, 31 (0:1). Mavropanos, 35 (1:1)
«Vest Hem»: Hermansen, Mavropanos, Disasi, Todibo, Fernandesh, Souchek, Diuf, Van-Bissaka, Pablo (Magassa, 64), Bouen (Kante, 90+6), Kastelyanos (Traore, 75)
«Manchester Siti»: Donnarumma, Geyi, Husanov, Ayt Nuri (Sherki, 60), Mateus Nunes, Rodri, Bernardu Silva (Reynders, 75), O`Rayli, Semenyo (Foden, 75), Marmush (Doku, 60), Holand
Ogohlantirishlar: Magassa, 76. Fernandesh, 89 – Marmush, 11. Bernardu Silva, 37
Birinchi bo‘lim o‘rtalaridan o‘tganida Bernardu Silvaning Holandga uzatmasi to‘g‘ridan to‘g‘ri zarbaga aylanib, hisob ochilganida ko‘pchilik bu o‘yin taqdiri hal bo‘lgani haqida o‘ylay boshlagandi. Ammo «Siti» bu mavsumda ishonchli o‘ynay olmayapti. Biroz o‘tib «Vest Hem» muvozanatni tikladi. Burchak zarbasidan keyin Donnarumma to‘pga chiqishda xatoga yo‘l qo‘ydi va «Arsenal»ning sobiq futbolchisi Mavropanos muvozanatni tikladi.
Bu mezbonlar uchun o‘yindagi ilk zarba edi va bu zarba chempionlik poygasida ishtirok etayotgan jamoaning oyog‘idan chalib qolish uchun yetarli bo‘ldi. Qolgan vaqt davomida «shaharliklar»ning hech qaysisi mezbonlar himoya devorida o‘tmadi, to‘p darvoza sohasiga yetib borganida esa darvozabon Hermansen ishonchli harakat qildi. Endilikda shu kuni o‘yinni diskvalifikatsiya tufayli tribunada o‘tirib kuzatishga majbur bo‘lgan Gvardiola jamoasi «Arsenal»dan 9 ochkoga ortda qolmoqda. «Siti»da bitta zaxira o‘yini borligiga qaramay, deyarli hech kim endi jamoa bu farqni yo‘qqa chiqara olishiga ishonmayapti.
Ispaniya: Molinaning zambarak zarbasi va tinim bilmas Valverde
«Atletiko» – «Xetafe» 1:0
Gol: Molina, 8 (1:0)
«Atletiko»: Musso, Ximenes, Langle, Pubil (Alvares, 66), Koke, Almada (Simeone, 66), Vargas (Liorente, 73), Gonsales, Molina, Baena (Grizmann, 73), Syorlot (Lukman, 66)
«Xetafe»: Soriya, Abkar, Duarte (Riko, 83), Romero, Iglesias, Kiko Femeniya (Birmanchevich, 46), Dakonam, Arambarri (Martin, 74), Milya (Munos, 90+2), Satriano, Vaskes (Liso, 74)
Ogohlantirishlar: Syorlot, 55. Vargas, 68. Molina, 90 –Romero, 60. Liso, 77. Satriano, 90
Chetlatish: Abkar, 55
Yaqinda «Real»ni mag‘lub eta olgan «Xetafe» «Atletiko»ga ham jiddiy muammolar tug‘dirdi. Shu kuni Oblak o‘rniga darvozaga turgan Musso olti seyv ijro etishiga to‘g‘ri keldi. Ammo mezbonlarning qariyb ikki yildan buyon gol urmayotgan himoyachisi Molina o‘yin startidayoq o‘yin taqdirini hal qildi. Argentinalik futbolchining jarima maydoni tashqarisidan yo‘llagan kuchli zarbasidan keyin to‘p olis «to‘qqizlik»ka borib tushdi.
Mehmonlar esa ancha osonroq vaziyatlardan gol ura olmadi. «Matraschilar»ni goh Musso qutqardi, goh «Xetafe» futbolchilari to‘g‘ri zarba bera olmadi. Ikkinchi bo‘lim boshlarida Abkar qizil kartochka olib maydonni tark etganidan keyin esa amalda o‘yin taqdiri hal bo‘ldi. Diyego Simeone jamoasi uchinchi o‘rinni yanada mustahkamladi.
«Real» – «Elche» 4:1
Gollar: Ryudiger, 39 (1:0). Valverde, 44 (2:0). Hausen, 66 (3:0). Manuel Anxel, 85 – avtogol (3:1). Arda Guler, 89 (4:1)
«Real»: Kurtua, Ryudiger (D. Aguado, 61), Hausen, F. Garsiya, Karvahal, Tshuameni (Arda Guler, 58), Pitarch (Palasios, 64), Kamavinga, Valverde (G. Garsiya, 58), Vinisius Junior (Yanez, 58), Dias (Manuel Anxel, 63)
«Elche»: Dituro, Petro (M. Aguado, 64), Affengryuber (Bigas, 74), Chust, Valera, Sangare (Pedrosa, 23), Redondo (Mir, 64), Febas, Sepeda (Xosan, 64), Andre Silva, Neto (Diangana, 74)
Ogohlantirishlar: Kamavinga, 55 – Valera, 62. Affengryuber, 66. Mir, 88
Hafta o‘rtasida YeChL o‘yinida katta kuch sarflagan «Real» futbolchilari ancha vaqtgacha autsayder darvozasi tomon yo‘l topa olmadi. Ammo yarimhimoyaga qaytganidan keyin yayrab o‘ynayotgan Valverdeda bu o‘yinga ham yetarli kuch qolgandi. «Selta» darvozasiga g‘alaba goli, «Siti»ga qarshi o‘yinda het-trik, shanba kuni esa uning seriyasi darvom etdi. Avvaliga Fedening zarbasidan keyin darvozabon to‘pni amallab qaytardi, qaytgan to‘pga esa Ryudiger birinchi bo‘lib yetib keldi va hisob ochildi. Bir necha daqiqa o‘tib esa barchasini Valverdening o‘zi bajardi. U jarima maydoniga yaqinlashib kelib, bir harakat bilan himoyachini yo‘lidan oldi va to‘pni to‘sin ortidan darvoza to‘riga kiritdi.
Alvaro Arbeloa 58-daqiqadayoq Vinisius Junior, Valverde va Tshuameni kabi yetakchi futolchilarini, biroz o‘tib Ryudigerni ham zaxiraga oldi, ular keyingi hafta o‘rtasida «Siti»ga qarshi javob o‘yinida kerak bo‘ladi. Ularning o‘rniga o‘yinni davom ettirgan futbolchilar ham ikkita gol urishdi. Avvaliga 18 yoshli Yanesning uzatmasidan keyin Hausen hisobdagi farqni oshirdi. O‘yin oxirlarida esa Guler maydonning ikkinchi qismidan turib fantastik gol muallifiga aylandi. U zarba bergan nuqtadan darvoza chizig‘igacha bo‘lgan masofa 68 metr chiqadi.
Yirik g‘alabadan keyin madridliklar turnir jadvalida yana «Barselona»ga bir ochkolik masofada yaqinlashib oldi, lekin kataloniyaliklar yakshanba kuni «Sevilya»ga qarshi o‘yin natijasiga ko‘ra yana to‘rt ochkolik farqni tiklashi mumkin.
Bugun, Turkiya Superligasining 26-turi doirasida peshqadam «Galatasaroy» o‘z maydonida «Bashakshehir»ni qabul qiladi.
Uchrashuv Toshkent vaqti bilan soat 22:00 da Istanbuldagi «RAMS Park» stadionida boshlanadi.
«Galatasaroy» 25 o‘yindan so‘ng 61 ochko bilan jadvalda 1-o‘rinda bormoqda. «Bashakshehir» esa 42 ochko bilan 5-pog‘onani egallab turibdi va yevrokuboklar uchun kurashmoqda.
«Istanbul Bashakshehir» bugungi o‘yin uchun asosiy tarkibni e’lon qildi. Eldor Shomurodov — asosiyda, Abbosbek Fayzullayev qaydnomaga ham kiritilmagan.
2026-yilgi Osiyo Kubogi chorak finalida O‘zbekiston ayollar terma jamoasi Janubiy Koreya ayollar terma jamoasidan mag‘lubiyatga uchradi. 6:0 hisobida g‘alaba qozongan koreyslar yarim final yo‘llanmasini qo‘lga kiritdi.
Shunga qaramasdan, milliy jamoamiz Jahon chempionati yo‘llanmasi uchun kurashni davom ettiradi. Bo‘lg‘usi raqib Yaponiya – Filippin uchrashuvida aniqlanadi — ushbu uchrashuvda yengilgan jamoa ustidan g‘alaba qozonsa, O‘zbekiston terma jamoasi 2027-yilda Braziliyada o‘tkaziladigan ayollar o‘rtasidagi JChga yo‘llanma oladi.
Agar jamoa ushbu o‘tish bahsida ham yengilsa, KXDR/Xitoy Taypeyi o‘rtasidagi o‘yinda mag‘lub bo‘lgan jamoa bilan to‘qnash keladi. Bu uchrashuv g‘olibi xalqaro pley-off o‘yinlari orqali mundial yo‘llanmasi uchun kurashni davom ettiradi, mag‘lub musobaqani tark etadi.
2026-yilgi ayollar o‘rtasidagi Osiyo Kubogida 12 ta terma jamoa ishtirok etmoqda. Ular uchta guruhga bo‘lingan holda bahs olib bordi. Guruhlarda dastlabki ikki o‘rinni egallagan jamoalar hamda eng yaxshi ko‘rsatkich qayd etgan ikki nafar uchinchi o‘rin sohibi chorak final bosqichiga yo‘l oldi.
Chorak final g‘oliblari to‘g‘ridan-to‘g‘ri Jahon chempionati yo‘llanmasiga ega bo‘ladi. Mag‘lub jamoalar esa oldindan aniqlangan setka asosida pley-off bosqichida ishtirok etadi. Pley-offda g‘alaba qozongan jamoalar Osiyoning 5 va 6-vakili sifatida mundial yo‘llanmasini qo‘lga kiritadi.
JCh-2027 yo‘llanmasi uchun pley-off o‘yinlari:
O‘zbekiston — Yaponiya/Filippin
KXDR — Xitoy Taypeyi
Yarim finalga yo‘l olgan Avstraliya, Xitoy va Janubiy Koreya terma jamoalari allaqachon Jahon chempionati ishtirokchisiga aylanishga ulgurdi. So‘nggi yarim finalchi nomi Yaponiya – Filippin uchrashuvidan keyin ma’lum bo‘ladi.
Ma’lumot uchun: 2029-yilgi ayollar o‘rtasidagi Osiyo Kubogi O‘zbekistonda o‘tkaziladi.
Sport
Futbol bo‘yicha O‘zbekiston ayollar terma jamoasi Osiyo kubogi chorak finalida yirik hisobda mag‘lub bo‘ldi
Endi ular jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Avstraliyada bo‘lib o‘tayotgan ayollar o‘rtasida Osiyo kubogi chorak finalida O‘zbekiston terma jamoasi futbolchilari Janubiy koreyalik raqibalariga qarshi maydonga tushdi.
Bahs 6:0 hisobida Janubiy Koreya ayollar terma jamoasi g‘alabasi bilan yakunlandi.
O‘zbekistonlik ayol futbolchilar bangladeshlik raqibalarini 4:0 hisobida yengib chorak finalga chiqishgandi.
Endi ular 19 mart kuni jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Osiyo kubogida eng yaxshi natijaga erishgan olti jamoa 2027 yilgi ayollar o‘rtasidagi Jahon chempionatiga to‘g‘ridan-to‘g‘ri yo‘llanmani qo‘lga kiritadi.
U 50 kg vazn toifasida vaqtinchalik chempionlik kamari uchun puerto-rikolik Jonatan Gonsalesga qarshi jang qiladi.
17–19 aprel kunlari Qirg‘iziston poytaxti Bishkek shahrida professional boks oqshomi bo‘lib o‘tadi. Unda ikki karra Olimpiya chempioni Hasanboy Do‘smatov ham ringga ko‘tarilishi kutilmoqda.
WBA reytingida oltinchi o‘rinni egallab turgan charm qo‘lqop ustasi 50 kg vazn toifasida vaqtinchalik chempionlik kamari uchun puerto-rikolik Jonatan Gonsalesga qarshi jang qiladi.
Hasanboy Do‘smatov professional ringdagi so‘nggi jangini 2025 yil 20 iyul kuni filippinlik Mark Antonioga qarshi o‘tkazib, g‘alaba qozongan edi. Shu tariqa, uning professional boksdagi janglari soni 7 taga yetdi, ularning barchasi Do‘smatov foydasiga hal bo‘lgan.
Jonatan Gonsales hisobida 29 g‘alaba, 4 durang va 1 mag‘lubiyat mavjud.
Prezidentning yangi qarori e’lon qilindi
«Siti» deyarli kurashdan chiqdi, Gulerdan shedevr gol. Kun o‘yinlari
Uch yil avval pora olgan sobiq arxiv xodimasi sudga tortildi
-
Jamiyat4 days agoNogironlar uchun onlayn platforma tenderida shubhali holatlar aniqlandi
-
Jamiyat4 days agoRulda kamar taqmagan Sardor Mamadaliyev jarimaga tortildi
-
Dunyodan4 days ago
Ali Xomanaiyning o‘g‘li Eronning yangi oliy rahbari etib saylandi
-
Siyosat2 days agoPrezident Mirziyoyev fuqarolardan murojaatlar ko‘payib borayotgan bir paytda militsiya xodimlarining qo‘pol xatti-harakatlarini tanqid qildi
-
Siyosat3 days agoIkki nafar O‘zbekiston fuqarosi firibgarlik va o‘g‘irlik hodisasidan so‘ng Bahrayn va AQShdan qaytib keldi
-
Turk dunyosi4 days agoEron urushi kuchayib borayotgan bir paytda Turkiya o’rtada qoldi
-
Sport4 days agoAvstraliyadan boshpana so‘ragan eronlik futbolchilardan biri fikrini o‘zgartirdi
-
Iqtisodiyot2 days ago
13-mart kuni ham dollar kursi pastlaydi