Jamiyat
O‘zbekistonda Ta’lim va ilm-fan vazirligi tashkil etildi
O‘zbekistonda Maktabgacha va maktab ta’limi vazirligi hamda Oliy ta’lim, fan va innovatsiyalar vazirligi yagona Ta’lim va ilm-fan vazirligi sifatida qayta tashkil etildi.
Bu Prezident farmonida belgilandi.
Yangi vazirlik maktabgacha ta’limdan boshlab oliy ta’lim va ilmiy faoliyatgacha bo‘lgan yo‘nalishlarni yagona boshqaruv tizimiga birlashtiradi.
Islohotdan asosiy maqsad mamlakatda ta’lim, tarbiya va ilm-fanning yaxlit tizimini zamon talablari asosida tashkil etish, ta’lim sifati va samaradorligini oshirish hamda inson kapitalini rivojlantirish bo‘yicha ishlarni yangi bosqichga olib chiqishdan iborat.
Shuningdek, ta’limning barcha bosqichlari o‘rtasida uzviylik va davomiylikni ta’minlash ko‘zda tutilgan. Ya’ni maktabgacha ta’lim, maktab ta’limi, oliy ta’lim va ilmiy faoliyat yagona tizim doirasida muvofiqlashtiriladi.
Farmonda sohada samarali boshqaruv tizimini joriy qilish, turli ta’lim bosqichlari o‘rtasidagi hamkorlikni kuchaytirish va vazirlikning jamoatchilik oldidagi hisobdorligini oshirish ham nazarda tutilgan.
Yangi tuzilma orqali ta’lim va ilm-fan sohasida davlat siyosatini yagona yondashuv asosida amalga oshirish maqsad qilingan.
Jamiyat
Administratsiya huzurida maxsus ishchi guruh tuzildi va unga Zafar Hoshimov rahbar etib tayinlandi
Prezident matbuot xizmatining ma’lum qilishicha, davlat rahbari Ta’lim va ilm-fan vazirligini tashkil etish to‘g‘risidagi farmonni imzolar ekan, ta’lim sifatini oshirish va sohani yangi bosqichga olib chiqish uchun yangicha yondashuvlarni qo‘llash, bozor talablariga mos ta’limni, raqobatni hamda xususiy sektor ishtirokini rivojlantirish vazifasini qo‘ygan.
Shu maqsadda Prezident Administratsiyasi huzurida Inson kapitalini rivojlantirish va uzluksiz ta’lim strategiyasi bo‘yicha umummilliy konsepsiyani ishlab chiqadigan maxsus ishchi guruh tashkil etilmoqda. Unga jamoatchilik asosida tadbirkor Zafar Hoshimov rahbarlik qiladi.
Guruh tarkibiga ta’lim muassasalarini yo‘lga qo‘yish va samarali tizimlar yaratishda tajribaga ega tadbirkorlar, soha mutaxassislari, olimlar hamda xalqaro ekspertlar jalb qilinadi.
Prezident matbuot kotibi Sherzod Asadov ta’lim tizimidagi so‘nggi o‘zgarishlar yuzasidan izoh berdi.
Uning qayd etishicha, ikki vazirlikni birlashtirishdan asosiy maqsad — ta’limning barcha bosqichlarini yagona tizimda boshqarish va sifatni alohida nazorat qilishdan iborat.
Yangi Ta’lim va ilm-fan vazirligi bog‘cha, maktab, professional va oliy ta’lim muassasalari faoliyatini tashkil etish, ularning operatsion jarayonlari, ta’lim talablari, litsenziyalash va akkreditatsiya uchun mas’ul bo‘ladi.
Ta’lim sifatini ta’minlash milliy agentligi esa o‘quv dasturlari, qo‘llanmalar va metodik materiallarni ishlab chiqish, ularni amaliyotga joriy etish va natijalarini tahlil qilish bilan shug‘ullanadi. Bu jarayon «O‘zbek maktabi bitiruvchisining portreti» asosida yo‘lga qo‘yiladi. Prezidentning 28 sentyabrdagi taqdimotida ham yangi maktab bitiruvchisi modelida zamonaviy ko‘nikmalar, mustaqil fikrlash va qaror qabul qilish qobiliyatiga urg‘u berilgan edi.
Prezident Administratsiyasi va uning huzuridagi maxsus ishchi guruh yangi vazirlik tuzilmasi, ish jarayonlari hamda islohotning umumiy strategiyasini ishlab chiqadi.
Oliy ta’limda esa davlat aralashuvini kamaytirish, oliygohlar mustaqilligini kengaytirish, nodavlat sektor uchun imkoniyatlarni oshirish va sifatni raqobat hamda bozor talabi orqali shakllantirish ko‘zda tutilgan.
Konstitutsiyaviy sudning 2026-yil 22-sentyabrdagi QSQ–8-son qarori bilan Ma’muriy javobgarlik to‘g‘risidagi kodeks 288-moddasi ikkinchi qismining Konstitutsiyaga muvofiqligi ko‘rib chiqildi.
Mazkur masala bo‘yicha Konstitutsiyaviy sudga O‘zbekiston Respublikasi Oliy Majlisining Inson huquqlari bo‘yicha vakili — ombudsman murojaat qilgan. U kodeksning ushbu normasi Konstitutsiyaning 27-moddasi uchinchi qismiga qanchalik muvofiq ekanini aniqlashni so‘ragan.
Qaror bilan 288-moddaning huquqbuzarning shaxsi va huquqbuzarlik holatlarini aniqlash uchun ayrim hollarda uch sutkagacha, shaxsni tasdiqlovchi hujjat bo‘lmagan taqdirda esa prokuror sanksiyasi bilan o‘n sutkagacha ushlab turishni nazarda tutuvchi qismi Konstitutsiyaga muvofiq emas deb topildi.
Amaldagi normaga ko‘ra, chegara tartibini yoki O‘zbekiston davlat chegarasi orqali o‘tish punktlaridagi tartibni buzgan shaxslar bayonnoma tuzish uchun uch soatgacha ushlab turilishi mumkin edi.
Agar huquqbuzarning shaxsi va huquqbuzarlik holatlarini aniqlash zarur bo‘lsa, ushlash paytidan boshlab 24 soat ichida prokurorga yozma xabar berish sharti bilan uch sutkagacha ushlab turish nazarda tutilgan. Shaxsni tasdiqlovchi hujjat bo‘lmagan holatda esa prokuror sanksiyasi bilan ushlab turish muddati o‘n sutkagacha uzaytirilishi mumkin edi.
Endi nima bo‘ladi?
Bu qarordan keyin 288-modda to‘liq bekor bo‘lmaydi. Faqat Konstitutsiyaga zid deb topilgan 3 va 10 sutkalik ushlab turish qoidalari amal qilishini tugatadi. Bayonnoma tuzish uchun 3 soatgacha ushlab turishga oid norma esa saqlanib qoladi.
«Konstitutsiyaviy sud to‘g‘risida»gi Konstitutsiyaviy qonunga ko‘ra, Konstitutsiyaga muvofiq emas deb topilgan norma o‘z amalini tugatadi. Uni qabul qilgan organ esa hujjatni Konstitutsiyaga muvofiqlashtirishi lozim.
Shu tariqa, 288-modda saqlanib qoladi, ammo shaxsni sud qarorisiz 48 soatdan ortiq ushlab turishga yo‘l ochgan qoidalar endi qo‘llanmaydi.
Konstitutsiyaviy qonunning 73-moddasiga ko‘ra esa Konstitutsiyaga zid hujjatni qabul qilgan davlat organi uni bir oydan kechiktirmay Konstitutsiyaga muvofiqlashtirishi shart.
O‘zbekistonda 1-oktyabrdan tozalik va obodonlik bo‘yicha ikki oylik o‘tkaziladi. Bu Prezidentning «Yashil makon» umummilliy loyihasini amalga oshirishda mahallalar rolini kuchaytirishga qaratilgan farmonida belgilangan.
Farmonga ko‘ra, 1-oktyabrdan yashil hududlarni aniqlash, yerlarni tayyorlash hamda ko‘chat va butalar zaxirasini yaratish ishlari boshlanadi.
Ko‘chat va butalar ekish mavsumi hududlarga qarab turli sanalarda boshlanadi:
1 noyabrdan — Qoraqalpog‘iston Respublikasi va Xorazm viloyatida;
5 noyabrdan — Buxoro va Navoiy viloyatlarida;
10 noyabrdan — Andijon, Jizzax, Samarqand, Sirdaryo, Namangan, Toshkent va Farg‘ona viloyatlari hamda Toshkent shahrida;
20 noyabrdan — Surxondaryo va Qashqadaryo viloyatlarida.
Shuningdek, 2027-yil 1-yanvardan «Yashil mahalla» loyihasi doirasida «Mahallani yashillashtirish» paketi joriy etiladi.
Loyiha doirasida mahallalarga O‘rmon agentligi tomonidan o‘rmonchi-murabbiylar biriktiriladi. «Mahalla yettiligi» a’zolari har bir ekish mavsumi oldidan o‘rmonchi-murabbiylar tomonidan qisqa o‘quv kurslarida o‘qitiladi.
Toshkent metropoliteni vagon parki 14 ta zamonaviy harakat tarkibi — jami 56 ta yangi vagon bilan to‘ldirildi. Bu haqda metropoliten ma’muriyati ma’lum qildi.
2026 yil davomida jami 14 ta zamonaviy harakat tarkibini xarid qilish rejalashtirilgan edi. Rejadagi barcha vagonlar yangi o‘quv yili boshlanguniga qadar metropoliten parkiga olib kelindi.
Yangi harakat tarkiblarining xarid qilinishi natijasida Toshkent metropoliteni vagon parkini qariyb 70 foizga yangilashga erishildi.
Yangi poyezdlar metropolitenning to‘rtta yo‘nalishida harakatlanmoqda. Natijada, ayniqsa, kunning tig‘iz vaqtlarida poyezdlar harakati oralig‘i qisqargan.
Hozirda tig‘iz vaqtlarda poyezdlar:
Chilonzor yo‘nalishida — 1,5–2 daqiqalik;
O‘zbekiston yo‘nalishida — 3 daqiqalik;
Yunusobod yo‘nalishida — 4 daqiqalik;
Yer usti halqa yo‘nalishida — 7–8 daqiqalik interval bilan harakatlanmoqda.
