Jamiyat
Latviyaga ishga yuborish bilan bog‘liq firibgarlik holatlari aniqlandi
Latviyada ishlash uchun kerak bo‘ladigan vizani olib berish evaziga fuqarolardan pul talab qilgan shaxslar ushlandi.
Davlat xavfsizlik xizmati (DXX) va Ichki ishlar organlari xodimlari hamkorligida Urganch shahrida o‘tkazilgan tezkor tadbirda chet elga ishga yuborish bilan bog‘liq firibgarlik holatining oldi olindi.
DXX xabariga ko‘ra, Andijon viloyatining Oltinko‘l tumanida yashovchi, 1991 yilda tug‘ilgan shaxs xorijda ishlamoqchi bo‘lgan fuqarolarga maslahat va viza olish bo‘yicha zarur hujjatlarni tayyorlashda ko‘maklashish bilan shug‘ullanuvchi korxona tashkil qilib, ijtimoiy tarmoqlar orqali Xorazm viloyatining Hazorasp tumanida istiqomat qiluvchi 4 nafar fuqaroning ishonchiga kirgan. Ularga Latviyada ishlash uchun kerak bo‘ladigan vizani olib berish evaziga 10 ming AQSh dollari talab qilgan. So‘ralgan pul mablag‘ini olgan vaqtida ashyoviy dalillar bilan ushlangan.
Bunday qonunbuzarlik Toshkent viloyatida ham qayd etilib, Angren shahrida yashovchi, 1997 yilda tug‘ilgan shaxs Andijon viloyatida istiqomat qiluvchi 3 nafar fuqaroga elchixonada ishlovchi tanishlari orqali Latviyada ishlash imkonini beruvchi ishchi viza rasmiylashtirish evaziga 8250 AQSh dollari talab qilgan. So‘ralgan pul mablag‘idan 2100 AQSh dollarini oldindan olgan vaqtida ushlangan.
Ikki qonunbuzarga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.