Jamiyat
“Kadisheva”da shov-shuv: bozor buzilyaptimi?
Toshkent shahridagi Aviasozlar bozorida hududni tartibga solish sababli savdo rastalari buzilgani aytilmoqda. Tadbirkorlar bu ish ogohlantirilmay boshlanganini, oqibatda ayrim mahsulotlari sotishga yaroqsiz holga kelganini aytib, norozi bo‘lmoqda. Bozor ma’muriyati ularga bozor ichidan joy ajratilganini, ammo o‘zlari u yerga kirishni istashmayotganini, muammo tez orada bartaraf etilishini ma’lum qildi. Kun.uz holatni joyiga borib o‘rgandi.
Yashnobod tumanida joylashgan, xalq tilida “Kadisheva” deb ataladigan Aviasozlar dehqon bozorida bir necha kun avval qurilish ishlari boshlangan. Sotuvchi va tadbirkorlar holatdan norozi bo‘lib, Kun.uz’ga murojaat yo‘lladi.
Tadbirkorlar nimadan norozi?
Kun.uz holatni joyiga borib o‘rgandi. Sotuvchilarning aytishicha, bozor ma’muriyati buzish va qurilish ishlarini ularni ogohlantirmagan holda boshlagan. Oqibatda qulupnay, sabzavot va boshqa iste’mol mahsulotlari sotishga yaroqsiz holatga kelgan. Bir oy avval patent va hujjatlarni rasmiylashtirgan tadbirkorlar endilikda o‘z joylarida savdo qilolmayotganini aytmoqda. Ma’lum bo‘lishicha, ularga bozor ichidan joy ajratilgan.
“Bizga berilgan joy 80 sm, mahsulotimiz sig‘mayapti. Patent oldik, to‘lovlarni amalga oshirib keldik, lekin ogohlantirmasdan joyimiz buzildi. Qulupnaylarimiz yaroqsiz holatga keldi”, deydi tadbirkorlardan biri.
Tadbirkorlarning ko‘pi uzoq yillardan beri shu bozorda ishlab kelgan. Ularga ko‘ra, ilgari o‘rtacha ikki metrli joylarda savdo qilgan, hozir berilayotgan joylar esa juda kichik. Ba’zi savdogarlar esa joy yetishmovchiligi sababli ko‘chaga chiqib, vaqtincha noqonuniy savdo qilmoqda.
“10 kunda joyiga qaytishadi”
Kun.uz Aviasozlar dehqon bozori direktori o‘rinbosari Ismatulla Inoyatovdan holat bo‘yicha izoh oldi. Uning ma’lum qilishicha, muammolar tez orada bartaraf etiladi.
“Bozorning 1-, 2- va 3-pavilonlarida bo‘sh rastalar to‘ldirilgan, ortiqcha joylar tadbirkorlar orasida taqsimlangan. Tadbirkorlar ajratilgan joyga kirmay, ko‘chaga chiqib savdo qilmoqda. Ularni belgilangan joylariga qaytarish va tartibga solish rejasini bir hafta, o‘n kunda amalga oshiramiz”, deydi u.
Ismatulla Inoyatovning qo‘shimcha qilishicha, tadbirkorlarning murojaatlariga ko‘ra, berilgan, va’da qilingan joylar bo‘yicha tekshiruv o‘tkaziladi hamda muammolar bartaraf etiladi.Konets formy
“Noqonuniy savdo qilib kelishgan”
Holat yuzasidan Yashnobod tumani hokimligi ham rasmiy munosabat bildirgan. Hokimlikka ko‘ra, olib borilayotgan ishlar bozorning rasmiy savdo rastalariga taalluqli emas.
“Gap bozor atrofi va unga tutash hududlarda tashkil etilgan betartib savdo nuqtalari haqida bormoqda.
Mazkur hududda ayrim fuqarolar tegishli ruxsatnomalarsiz hamda sanitariya-epidemiologiya talablariga rioya qilmagan holda o‘zboshimchalik bilan meva-sabzavot savdosini amalga oshirib kelgan.
Hozirda hududni tartibga keltirish, noqonuniy savdo nuqtalarini bartaraf etish hamda tadbirkorlar faoliyatini qonuniy asosda maxsus ajratilgan savdo rastalariga joylashtirish ishlari olib borilmoqda”, deyiladi hokimlik munosabatida.
Qo‘shimcha qilinishicha, bozorning asosiy savdo qismi o‘z faoliyatini odatiy tartibda davom ettirmoqda.