Endi O‘zbekistonda ayollar va bolalarning himoyasi yanada kuchaytiriladi. Prezident imzolagan yangi farmon bilan bundan bu yog‘iga tazyiq holatlariga jamiyatda murorasiz kayfiyat shakllanishi kerak. Kun.uz bilan suhbatlashgan farmon ijrosiga mas’ul prezident administratsiyasi rahbari o‘rinbosari Nodira Hakimovaning aytishicha, ayollar va bolalar bilan bog‘liq salbiy statistikalar jiddiy o‘sib borgani sabab jazolarni og‘irlashtirishga talab ortgan.

O‘zbekiston prezidenti imzolagan farmon – jamiyatda ayollar va bolalarning har tomonlama himoyasini yaxshilash, ularga tazyiq, zo‘ravonlik holatlariga uzil-kesil javob qaytarish va murosasizlik kayfiyati shakllanishiga xizmat qilishi kerak. Hujjat bir nechta bandlardan iborat bo‘lib, unda erta nikohlarning oldini olishdan tortib, xotin-qizlarning ijtimoiy himoyasi hamda moliyaviy savodxonligi, ularni hayotga tayyorlash loyihalari, ta’lim imtiyozlarigacha qamrab olingan.

 Ushbu farmonda keltirilgan vazifalar ijrosini ta’minlashga mas’ullardan biri, O‘zbekiston prezidenti administratsiyasi rahbarining sud tizimini isloh qilish bo‘yicha o‘rinbosari Nodira Hakimovaning aytishicha, oxirgi yillarda yosh qizlarning farzand ko‘rish statistikasi, ayollarga zo‘ravonlik bo‘yicha hisob-kitoblar – vaziyat salbiy tomonga rivojlanayotganini ko‘rsatgan. 

“Erta tug‘uruq, maishiy va voyaga yetmaganlarga nisbatan zo‘ravonlik, ajrim va boshqa statistikalar oshgani sabab o‘zgarish qilish payti aslida bugun emas, kecha ekanligi o‘z isbotini topdi. Qisqa qilib aytganda zo‘ravon va pedofillarga qarshi urush, jang e’lon qildik”, deydi administratsiya rahbari o‘rinbosari. 

Ma’lum qilinishicha, farmon bilan ayollar va bolalarga nisbatan zo‘ravonlik holatlariga tezkor javob qaytarish uchun SOS tugmachalari ishga tushirilmoqda hamda mobil ilova orqali endi ichki ishlar organlariga xabar berish imkoni kengayadi. 

“Ichki ishlar organlari xodimlari SOS tugmachasi orqali xabar berilganda uzog‘i 10 daqiqada yetib keladigan tizim ishlab chiqyapmiz”, deydi administratsiya vakili Nodira Hakimova. 

Erta nikohlarning oldini olish – prezident farmonida alohida urg‘u berilgan jihatlardan biri. Buni har tomonlama targ‘ibot qilish uchun 21 yoshdan keyin ro‘yxatga olingan nikohlarga rag‘bat tizimi ham ishlab chiqiladi.

“18 yoshdan turmush qurish emas, 21 yoshdan keyingi nikohlarni trendga olib chiqishimiz kerak. Prezident ham shuni aytyaptilar, hayotning ma’nosini anglab, o‘qib, keyin oila qurishni yoshlarga targ‘ib qilish asosiy vazifamizga aylanmoqda”, deydi Nodira Hakimova. 

Farmon bilan pedofil va zo‘ravonlarga qarshi uzil-kesil choralar ishlab chiqiladi. O‘zbekistonda endi voyaga yetmagan shaxslarga nisbatan qilingan pedofiliya jinoyatlari uchun umrbod qamoq jazosi berilishi boshlanmoqda. Administratsiya rahbari o‘rinbosarining aytishicha, bu qarorga kelish oson bo‘lmagan va juda ko‘plab variantlar ichkarida muhokama qilingan. 

“Oson bo‘lmadi, qaysidir ma’noda umrbod bir insonni qamash va uni ushlab turish ham davlat uchun ma’lum xarajat. Lekin yosh qizlarimiz, farzandlarimiz umri va sha’ni biz uchun hamma narsadan ustun edi. Kimyoviy kastratsiya varianti ham bor edi, lekin u tibbiy jihatdan qiyin amaliyot va natijadorligi kam bo‘lgani bois biz undan voz kechdik”, deydi administratsiya rahbari o‘rinbosari. 

Bundan tashqari, farmon bilan ayollar va qizlarning har tomonlama himoyasini kuchaytirishni ta’minlash uchun ularga ta’lim ta’tillari yoki farzand ko‘rgan xotin-qizlarga masofadan o‘qish imkoniyatlari ham taqdim qilinmoqda.

Source link

Davlat xavfsizlik xizmati va huquqni muhofaza qiluvchi organlar hamkorligida o‘tkazilgan tezkor tadbirlar natijasida Farg‘ona va Navoiy hududlarida yirik miqdordagi giyohvandlik vositalari aniqlanib, qonunbuzarlar qo‘lga olindi.

Farg‘ona shahrida o‘tkazilgan tezkor tadbirda 1989 yilda tug‘ilgan mahalliy fuqaroga tegishli sumka xolislar ishtirokida tekshirildi. Natijada, sumka ichida 5 bo‘lakdan iborat jami 4 kg 463 gramm “gashish” moddasi borligi aniqlanib, ashyoviy dalil sifatida rasmiylashtirib olindi.

Tekshiruvlar davomida mazkur noqonuniy faoliyatga aloqador bo‘lgan uning 1990 yilda tug‘ilgan, muqaddam giyohvandlik jinoyati uchun sudlangan ukasi ham protsessual tartibda ushlandi. Ma’lum bo‘lishicha, aka-ukalar ushbu giyohvandlik vositasini Afg‘onistondan kontrabanda yo‘li bilan olib kirib, Farg‘ona viloyati hududida sotishni rejalashtirishgan.

Shuningdek, Navoiy shahrida o‘tkazilgan tezkor tadbirda 2000 yilda tug‘ilgan mahalliy fuqaro to‘xtatilib tekshirildi. Undan 8 ta ampulada gashish moyi va 10 dona folga qog‘ozga o‘ralgan gashish moddasi olindi.

Tezkor tadbir davomida uning yashash xonadoni ko‘zdan kechirilganda, u yerda narkolaboratoriya tashkil etilgani aniqlandi. Manzildan 34 dona izolentaga o‘ralgan gashish, 63 ta ampulada 88 gramm gashish moyi, 2 ta shpritsda 25 milligramm gashish moyi, shuningdek, 640 gramm gashish moyi va 2 gramm qo‘lbola usulda tayyorlangan gashish hamda qadoqlash uchun mo‘ljallangan vositalar — tarozi, ampula, shprits va boshqa jihozlar ashyoviy dalil sifatida olindi.

Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, gumonlanuvchilarga nisbatan “qamoq” ehtiyot chorasi qo‘llangan.

Source link

Farg‘ona viloyatida elektr energiyasidan noqonuniy foydalanish holati bo‘yicha hisoblangan yirik miqdordagi jarimani kamaytirishni va’da qilgan mansabdor shaxs pora olish vaqtida qo‘lga olindi.

Ma’lum bo‘lishicha, “Hududiy elektr tarmoqlari” AJning “Energosavdo” filiali Farg‘ona bo‘linmasi muhandisi o‘z xizmat mavqeidan foydalanib, O‘zbekiston tumanida yashovchi, 1962 yilda tug‘ilgan fuqaroga tegishli xonadon va xususiy bog‘chada elektr energiyasidan noqonuniy foydalanilgani yuzasidan rasmiylashtirilgan dalolatnoma bo‘yicha hisoblangan 1,8 mlrd so‘m jarimani 210 mln so‘mga tushirib berishni va’da qilgan.

Buning evaziga u fuqarodan 10 ming AQSh dollari miqdorida pora talab qilgan.

Davlat xavfsizlik xizmatining Farg‘ona viloyati bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda muhandis so‘ralgan pul mablag‘ining 9 ming AQSh dollarini uchinchi shaxs orqali olgan vaqtida ushlandi.

Hozirda mazkur holat yuzasidan unga nisbatan jinoyat ishi qo‘zg‘atilib, “qamoq” ehtiyot chorasi qo‘llangan. Tergov harakatlari davom etmoqda.

Source link

Jizzax viloyatida fuqaroni aldab, tabiiy gaz hisoblagichi bo‘yicha dalolatnoma rasmiylashtirmaslik evaziga pul talab qilgan gaz ta’minoti bo‘limi xodimlarining noqonuniy harakatlari fosh etildi.

Foto: Iqtisodiy jinoyatlarga qarshi kurashish departamenti

Departamentning Jizzax viloyati boshqarmasi tomonidan o‘tkazilgan tezkor tadbirda “Sharof Rashidovtumangaz” gaz ta’minoti bo‘limi gazchilari J.A. va G‘.X. o‘zaro til biriktirib, fuqaro D.I.ni aldagani aniqlandi.

Ma’lum bo‘lishicha, ular fuqaroga go‘yoki xonadonidagi tabiiy gaz hisoblagichi buzilganligini aytib, ushbu holat yuzasidan dalolatnoma rasmiylashtirmasliklari evaziga 10 mln so‘m talab qilgan. Shuningdek, ular muqaddam 5 mln so‘mni firibgarlik yo‘li bilan qo‘lga kiritgan.

Tadbir davomida gazchilar tomonidan olingan 5 mln so‘m pul mablag‘ining qaytarilishi protsessual tartibda rasmiylashtirildi.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, hozirda tergov harakatlari olib borilmoqda.

Source link

O‘zbekistonning Hindistondagi elchixonasi ko‘magida Maldiv orollarida mehnat faoliyati davomida murakkab hayotiy vaziyatga tushib qolgan vatandosh vatanga qaytarildi.

Foto: Carl Court / Getty Images

Ma’lum qilinishicha, elchixonaning tezkor harakatlari natijasida fuqaroga barcha zarur konsullik-huquqiy yordam ko‘rsatildi. Xususan, diplomatlar uning huquqiy maqomini tartibga solish va Maldiv orollaridan chiqib ketishini ta’minlash maqsadida mahalliy vakolatli organlar bilan muzokaralar olib borgan.

Natijada, u 2026 yil 15 mart kuni sog‘-omon O‘zbekistonga qaytarildi.

Shu munosabat bilan elchixona xorijda mehnat faoliyatini amalga oshirayotgan yoki rejalashtirayotgan fuqarolarni qonun talablariga qat’iy rioya qilishga chaqirdi. Jumladan, mehnat faoliyatini faqat rasmiy shartnoma va tegishli ishchi vizasi asosida amalga oshirish, borilayotgan mamlakat qonunchiligi bilan oldindan tanishish hamda xorijga yetib borgach, konsullik ro‘yxatidan o‘tish tavsiya etildi.

Shuningdek, pasport va boshqa shaxsiy hujjatlarni uchinchi shaxslarga topshirmaslik zarurligi ta’kidlandi.

Elchixona favqulodda holatlar yoki huquqiy muammolar yuzaga kelganda Dehli shahridagi diplomatik missiyaning konsullik bo‘limiga zudlik bilan murojaat qilishni so‘radi.

Source link