Sport
Ispaniyada klasiko, Italiyada favoritlar jangi. Hafta o‘yinlari anonsi
Yevropa futbolida bu safargi uikend «Real» va «Barselona» uchrashuvi bilan bezaladi. Ammo boshqa qiziqarli o‘yinlar ham bor.
Shu haftaning o‘zida Italiya va Ispaniyada turnir peshqadamligi uchun o‘zaro to‘qnashuvlarni, shuningdek, «Old Trafford»da eski «MYu»ning qaytishini kuzatish mumkin. Qizig‘i, manchesterliklar yutsa ham, yutqazsa ham qaysidir ma’noda eski «MYu» qaytgan bo‘ladi. Londonda esa «Arsenal» qatorasiga uchinchi derbida maydonga tushsa, Birminghemda Husanovsiz «Manchester Siti» eng qiyin safar o‘yinlaridan birini o‘tkazadi.
«NAPOLI» – «INTeR» (25 oktyabr, 21:00)
Hozircha moliyaviy imkoniyatlar Italiya klublarini Yevropa miqyosda top-klublar qatoriga qo‘shishga xalaqit bersa-da, tarixan va Italiya darajasida katta klublar A Seriyada hatto Angliyadagidan ham ko‘p. Shuning uchun deyarli har hafta biz chempionlikka, yuqori o‘rinlarga da’vogar bo‘lgan jamoalarning o‘zaro to‘qnashuviga guvoh bo‘lamiz. Hatto mana shu o‘lchovlarda ham «Napoli» va «Inter» to‘qnashuvi bugungi kun nuqtayi nazaridan eng kattasi hisoblanadi. Zero, chempionlik poygasida aynan shu jamoalarni boshqalarga nisbatan favorit deb baholash uchun asoslar yetarli.
«Inter» tarkib va tajriba jihatidan hali ham Italiyaning eng kuchli klubi va Yevropada ham liga sharafini munosib himoya qilayotgan yagona klub. Milanliklar Chempionlar Ligasi finalchisi, bu yilgi musobaqada ham 100 foizlik natija qayd etib kelmoqda. «Napoli» esa amaldagi chempion. Janubliklar yozda Kevin de Bryuyne, Rasmus Hoylund kabi futbolchilar bilan yanada kuchaydi. O‘tgan mavsumda ham aynan shu ikki jamoa so‘nggi turlargacha chempionlik uchun kurashgandi.
Buning ustiga mezbonlar murabbiyi Antonio Konte yaqin o‘tmishda «Inter»da ham ishlagan va bu jamoa bilan ham chempion bo‘lgan. Ayni damda Milanning boshqa klubi chempionat turnir jadvalini boshqarib turgan bo‘lsa-da, ko‘pchilik «Napoli» va «Inter»ning salohiyatini yuqori baholamoqda va strategik jihatdan bu o‘yin ko‘proq chempionlik uchrashuvi sifatida ko‘rilyapti.
Juma oqshomida kutilmaganda turnir peshqadami «Milan» o‘z maydonida autsayder «Piza» bilan durang (2:2) o‘ynadi. Endi «Napoli» – «Inter» o‘yini g‘olibi shu turdan keyin peshdaqamga aylanib oladi.
Qizig‘i, jamoalar o‘rtasidagi oxirgi uch o‘yin bir xil – 1:1 hisoblarida tugagan. Agar oxirgi 36 o‘yinni olsak ham qiziq simmetriyaga duch kelamiz – har ikki jamoada 12 tadan g‘alaba va yana shuncha o‘yin durang bilan yakunlangan. Shu bilan birga, oxirgi besh o‘yinda «Napoli» «Inter»ni yuta olmayapti. Bu mavsumda «Napoli» o‘z maydonida hozircha yo‘qotishsiz o‘ynamoqda, Chempionlar Ligasidagi hozircha yagona uy o‘yinida ham «Sporting» mag‘lub etildi. Lekin hafta o‘rtasida «PSV» maydonida kechgan o‘yin Antonio Konte faoliyatidagi eng yomon mag‘lubiyatlardan biri bo‘ldi. 76-daqiqada Lukka maydondan chetlatilgach, mezbonlar yana 3 gol urishdi va hisob 2:6 ko‘rinishiga keldi. Holbuki o‘sha o‘yinda «Napoli» birinchi bo‘lib gol urgandi. Neapolliklar undan avval «Torino»dan ham mag‘lubiyatga uchraganini e’tiborga olsak, «Inter» ustidan g‘alaba muxlislar oldida aybini yuvish uchun ayni muddao bo‘ladi.
Tarkiblarga to‘xtalsak, «Napoli» tarkibida Rasmus Hoylund jarohatlangan. U aslida Lukaku jarohatlangani uchun «MYu»dan ijaraga olingandi, lekin endi Konte ikkala hujumchidan ham noyabr boshlariga qadar foydalana olmaydi. U asosiy hujumchi sifatida kimni tanlashi ham qiziq. Shuningdek, Stanislav Lobotka yo‘qligi ham so‘nggi o‘yinlardagi natijalarga ta’sir qilmay qolmayapti. Slovakiyalik markaziy yarimhimoyachi «Inter»ga qarshi o‘yinni ham o‘tkazib yuboradi. Mehmonlardan esa Markus Tyuram yo‘qligi muhim uchrashuvda bilinsa kerak. U ko‘pincha «aldamchi to‘qqizlik» sifatida tushib, Lautaroning soyasida qolishi mumkin, lekin ko‘p ko‘rsatkichlar bo‘yicha u nafaqat o‘z jamoasida, balki Yevropaning eng yaxshilaridan biri ekanini qayd etish kerak. Shuningdek, Matteo Darmiyan ham ushbu uchrashuvni o‘tkazib yuboradi.
«MANCheSTeR YuNAYTeD» – «BRAYTON» (25 oktyabr, 21:30)
Aynan shu uchrashuv tanlanganining sababi, bu o‘yin natijasi juda muhim savolga javob beradi. Agar «Manchester Yunayted» g‘alaba qozonadigan bo‘lsa, qatorasiga uch g‘alaba – Amorim shogirdlari nihoyat barqaror jamoaga aylana boshlagani va balki yuqori o‘rinlar uchun kurashishini anglatadi. Mag‘lubiyat esa «Enfild»dagi natijani umuman foydasiz qiladi. Jamoa hali ham o‘nglanmaganini, so‘nggi natijalar esa shunchaki, osonroq shartlarda hosil bo‘lgan hodisa ekanini ko‘rsatadi. Shu jihatdan ham murabbiy, ham futbolchilar va muxlislar uchun juda ahamiyatli kun.
O‘tgan mavsumda ham bir qator mag‘lubiyatlardan keyin «MYu» «Enfild»da juda yaxshi o‘yin ko‘rsatgan va hisob 2:2 bo‘lgandi. Keyin Londonda «Arsenal» kubokdan chiqarib yuborilgach, nihoyat Amorim o‘z yo‘liga tushib oldi degan xulosalar aytila boshlagan. Ammo jamoa o‘z uslubida, birinchi raqamda o‘ynashi lozim bo‘lganida, «Old Trafford»da aynan «Brayton»ga 1:3 hisobida mag‘lub bo‘lgandi.
Umuman, «Brayton» so‘nggi yillarda manchesterliklar uchun o‘ta noqulay raqib sanaladi. So‘nggi olti uchrashuvda «qizillar» atigi bir marta, u ham bo‘lsa mavsum yakunlanib, hech narsani hal qilmaydigan 38-tur o‘yinida mehmonda ustun kelgan. «Old Trafford»dagi oxirgi 3 o‘yinda faqat mehmonlarning qo‘li baland kelgan – 1:2, 1:3, 1:3.
«Brayton» bu mavsum ham yomon emas. Ayniqsa top-raqiblarga qarshi uchrashuvlarda. «Manchester Siti», «Chelsi» va «Nyukasl» mag‘lub etildi, «Tottenhem» bilan durang qayd etildi. Besh o‘yindan beri jamoa mag‘lubiyatga uchragani yo‘q. Shu bilan birga, «Brayton» bu mavsum mehmonda uncha yaxshi ko‘rinmayapti. «Everton» va «Bornmut»ga qarshi uchrashuvlarda mag‘lub bo‘ldi, «Chelsi» ustidan safarda g‘alaba qozonilgan bo‘lsa-da, jamoa hamma golini raqib bir kishi kam bo‘lib qolganda urganini ham e’tiborga olish kerak.
Yana bir qiziq savol – so‘nggi o‘yinlarda «MYu» uzun paslarga ko‘proq murojaat qila boshlagani va ayniqsa, «Liverpul»ga qarshi bahsda yuqori pressingdan deyarli voz kechganidir. «Brayton» de Dzerbi davridan beri bild-apda pastdan, qisqa paslar orqali boshlashga urinadi. Bu bir jihatdan yuqori pressing uchun o‘lja, ikkinchi tomondan, agar raqib pressingda sal xato qilsa, «Brayton» bundan foydalanishga juda usta. Misol uchun, jamoa markaziy himoyachisi van Hekke chiziqlar orasini kesuvchi o‘tkir paslar bo‘yicha APL yetakchisi hisoblanadi. Bundan kelib chiqib, Amorim tajovuzkor pressing bilan raqibni xato qilishga majbur qilishni tanlaydimi yoki biroz ehtiyotkorlik bilan avvalgi xatolarni qilmaslikka urinadimi, ko‘ramiz.
Mezbonlarda deyarli yo‘qotish yo‘q. Umuman, bu mavsumda «MYu» eng kam jarohat olayotgan jamoalardan sanaladi. Hatto Lyuk Shou shuncha uchrashuv qatorasiga asosiy tarkibda o‘ynayotgani ham katta natija. Amorim matbuot anjumanida Maguayr va Mauntda kichik shikastlanishlar borligini aytdi, ammo o‘yinga tayyor bo‘lishlari kerak. Faqat Lisandro Martines tiklangani yo‘q. Mehmonlar safida esa hammasidan ham Mitomaning yo‘qligi sezilishi mumkin – uning maydonga tusha olishi so‘roq ostida. Shuningdek, Veltman va Uebsterda ham jarohatlar bor. Solli March xuddi Lisandro kabi o‘tgan mavsumdan buyon qaytgani yo‘q.
«ASTON VILLA» – «MANCheSTeR SITI» (26 oktyabr, 19:00)
«Manchester Siti»ning so‘nggi yillarda Birminghemdagi uchrashuvlari yodingizda bo‘lsa, bu o‘yinni ham o‘tkazib yubora olmaysiz. O‘tgan mavsum tushunarli, «Manchester Siti» u qadar yaxshi holatda emasdi, lekin ikki yil oldingi o‘yinni eslasangiz, Emeri jamoasi «shaharliklar»ni deyarli «ko‘mib qo‘ygandi». Darvozalarga zarbalar soni mezbonlar foydasiga 22-2 bo‘lgan, umuman, murabbiylik faoliyatida Pep Gvardiola hech qachon bu darajada ojiz bo‘lmagandi. «Villa» maydonidagi oxirgi uch o‘yinda «Siti» g‘alaba nimaligini bilmayapti – ikki mag‘lubiyat va bir durang.
«Aston Villa» bu mavsumni yomon boshlagandi, hatto to‘rt turdan keyin ham birorta go urmagan yagona jamoa bo‘lib turdi. Liga kubogida penaltilar seriyasida «Brentford»ga mag‘lubiyatga uchradi. Lekin keyinchalik jamoa yetakchilari formasini tiklab oldi. Emeri shogirdlari barcha musobaqalar doirasida qatorasiga 5 g‘alabaga erishdi. To‘g‘ri, Yevropa Ligasidagi so‘nggi uchrashuvda Niderlandiya jamoasiga mag‘lub bo‘lishdi, lekin bu o‘yinda ayrim chiziqlarda zaxiradagi futbolchilar tushganini ham unutmaslik kerak. Kesh, Makgin, Rodjyers, Kamara, Konsa kabi asosiy tarkib o‘yinchilariga dam berildi. Tabiiyki, ular «Manchester Siti»ga qarshi o‘yin oldidan ehtiyot qilindi.
O‘z navbatida, Pep Gvardiola jamoasi ham hafta o‘rtasida yevrokuboklarda qatnashdi. Jamoa Ispaniyaga, «Vilyarreal» maydoniga safar qildi. Tabiiyki, rotatsiya qilish qiyin bo‘lgan raqib. Lekin «Manchester Siti» o‘z o‘yinini seshanba kuni, «Aston Villa» esa payshanba oqshomida o‘tkazganini ham qayd etish kerak. Ya’ni mehmonlarda tayyorgarlik uchun ikki kun ko‘proq vaqt bo‘ldi.
Mezbonlar safida Yuri Tilemans yo‘qligi bilinishi tayin. Futbolchi sentabr oyida «Everton»ga qarshi bahsda jarohat olgandi va uning qaytishiga yana bir oy bor. Qizig‘i, Yuri jamoa yetakchilaridan biri, lekin g‘alabali seriya aynan u safdan chiqqanidan keyin boshlandi. Onana – Kamara juftligi hozircha markazda juda samarali harakat qilmoqda. «Manchester Siti» tarkibida Abduqodir Husanov yana o‘ynamaydi. Matbuot anjumanida Pep Gvardiola Husanovning qaytishiga juda oz vaqt qolganini aytdi, shu bilan birga, maydonga tushish uchun xavfli bosqichda ekanini ham ta’kidladi. Undan tashqari, mehmonlar safida Rodri va Niko Gonsalesda jarohat bor. Rayan Sherki so‘nggi ikki uchrashuvning so‘nggi daqiqalarida ko‘rinish berdi, Gvardiola bu safar unga ko‘proq vaqt berishi mumkin.
«ARSeNAL» – «KRISTAL PELAS» (26 oktyabr, 19:00)
Agar statistikaga qaralsa, APL bu mavsumidagi eng yaxshi himoya va eng yaxshi hujm to‘qnash keladi deb bemalol aytish mumkin. To‘g‘ri, «Kristal Pelas» eng ko‘p gol urgan jamoa emas, lekin vaziyat yaratish bo‘yicha ayni paytda eng yaxshi ko‘rsatkichga ega. «Bornmut»ga qarshi uchrashuvda (3:3) jamoa 4.44 xG yaratishga muvaffaq bo‘ldi. Hech bir jamoa ushbu mavsumda bir o‘yinda shuncha vaziyat yarata olmagan. «Arsenal» esa aksincha, o‘z darvozasi oldida deyarli imkon qoldirmayapti. «Fulhem» va «Vest Hem»ga qarshi kechgan so‘nggi ikki uchrashuvda Rayya darvozasiga hatto biror marta ham aniq zarba berilmadi. Umuman, barcha musobaqalarni qo‘shib hisoblaganda ham, «Arsenal» o‘z darvozasidan atigi 3 gol o‘tkazib yubordi, xolos. Bu gollarning ikkitasi standart vaziyatlardan urilgandi.
Bemalol aytish mumkinki, Arteta jamoasi ayni vaqtda nafaqat Angliyada, balki butun Yevropada eng yaxshi himoya chizig‘iga ega jamoa bo‘lib turibdi. Bu shunchaki nomlar yoki tandemlar bilan ham bog‘liq emas, zero jamoa sardori Saliba jarohat olib bir necha o‘yinda tusha olmaganida ham vaziyat o‘zgarmadi. Bu natijalar zamirida struktura yotibdi, ya’ni kim maydonga tushishidan, raqib qanday uslubda o‘ynashidan qat’i nazar «Arsenal» xavfli vaziyatlar yaratilishiga, xavfli nuqtalardan zarba berilishiga yo‘l qo‘ymayapti. To‘liq nazorat.
Shu tomondan biroz xaotik, lekin samarali hujum qiladigan «Kristal Pelas» bu devorni buzib o‘ta oladimi, juda qiziqarli savol. «Kristal Pelas» ushbu mavsumda faqat bir uchrashuvda, «Chelsi»ga qarshi «Stemford Brij»da kechgan 1-tur o‘yinida 1 dan kam xG to‘plagandi. «Emireyts»da nima bo‘ladi, ko‘ramiz. Bu raqib so‘nggi yillarda «Arsenal» maydonida munosib o‘yin ko‘rsatib kelmoqda. O‘tgan mavsumda 2:2 hisobi qayd etilgandi. Umuman, «Emireyts»dagi oxirgi 8 o‘yin olinsa, «Kristal Pelas» 4 durang va 1 g‘alabaga erisha olgan. Mezbonlar atigi uch marta g‘alaba qozongan. Chempionlik ambitsiyalari uchun ancha past ko‘rsatkich.
Tarkiblarga to‘xtaladigan bo‘lsak, mezbonlar safida bu safar boshqa markaziy himoyachi – Gabriel maydonga tusha olmasligi mumkin. Uning jismoniy holati yaxshi emasligi aytilmoqda. Edegor, Havers, Maduekening qaytishi deyarli bir vaqtga – kelasi oy oxiriga to‘g‘ri kelishi kutilmoqda. Gabriyel Jyezus yana ikki oy sheriklariga yordam bera olmaydi. Mehmonlar tarkibida yo‘qotishlar yo‘q. Lekin bu jamoa payshanba oqshomida yevrokubok o‘yinida maydonga tushganini hisobga olish kerak. Buning ustiga Glasnerda rotatsiya uchun variantlar hamkasbidagi kabi katta emas. Albatta, Eberechi Ezening sobiq jamoasiga qarshi o‘ynayotgani ham uchrashuvga qo‘shimcha intriga taqdim etadi.
«ReAL» – «BARSeLONA» (26 oktyabr, 20:15)
Ispaniyada bu jamoalar to‘qnash kelganda, boshqa o‘yinlarning ahamiyati ham kamayadi. El klasiko o‘tkaziladigan hafta – mana shu iboraning o‘zi futbol muxlislari uchun dam olish kunlarida yaxshi futbol kafolatlanganini anglatadi. Aynan ispan futboliga qiziqadiganlar esa taqvim chiqishi bilanoq, mavsum boshida El Klasiko qachonligi bilan qiziqib belgilab qo‘yadilar. Bu nafaqat boshlanganda televizorni yoqib, qarshisida o‘tiradigan o‘yin, balki butun rejalaringizni shunga moslaysiz, ulfatlar, qarindoshlar aynan shu uchrashuv uchun tadbirlar tashkil qilishadi. Xullas, sizlarni tabriklaymiz, o‘sha kun yaqin.
Bevosita qarama-qarshilikka to‘xtaladigan bo‘lsak, Ronaldu va Messi La Ligani tark etganidan keyin El Klasiko darajasi biroz pasaygandek tuyulgan, an’anaviy ravishda jamoalar sovrin uchun kurashgan bo‘lishsa-da, maydonda yulduzlar kamayib qolgandek edi. Axir “Real” va “Barselona” to‘qnashganda maydonda dunyoning eng yaxshilari bo‘lishi shart. Madridga Mbappe va Bellinhemning kelishi, Lamin Yamalning paydo bo‘lishi bilan so‘nggi paytlarda o‘sha eski “vayb” yana qaytayotgandek. Chunki endi nafaqat Ispaniya chempionligi, balkim individual sovrinlar, “Oltin to‘p” kabi da’volar ham bor.
Turnir nuqtayi nazaridan ham ahamiyatli o‘yin. Ayni paytda “Real” 24 ochko bilan peshqadam bo‘lsa, “Barselona” hisobida 22 ochko bor. Ya’ni mehmonlarning g‘alabasi La Ligada peshqadamni o‘zgartiradi. “Barselona” Flik kelganidan buyon so‘nggi 4 “El Klasiko”da g‘alaba qozonayotganini ham ta’kidlash kerak. Agar o‘tgan mavsum yozda tashkil qilingan o‘rtoqlik o‘yinini ham qo‘shsak, qatorasiga 5 g‘alaba bo‘ladi. Qizig‘i, undan oldin qatorasiga 4 rasmiy o‘yinda “Real”ning qo‘li baland kelgandi.
O‘tgan mavsumdagi ilk El Klasikoni eslasangiz kerak. “Barselona”ning eng cho‘qqi formaga kirgan davriga to‘g‘ri kelgan, o‘sha o‘yindan bir necha kun oldin kataloniyaliklar “Bavariya” ustidan yirik hisobda g‘alaba qozongandilar. Keyin esa “Real” ustidan 4:0 hisobi qayd etildi. Bu safar ham El Klasiko oldidan “Barselona” Chempionlar Ligasida yirik g‘alaba qozongan bo‘lsa-da, ayni paytda kataloniyaliklar yaxshi sport formasidan emasligini ta’kidlash kerak. “Olimpiakos”dan oldin “Jirona” bilan so‘nggi daqiqalarda qo‘lga kiritilgan ishonchsiz g‘alaba, undan oldin esa “Sevilya” va “PSJ”ga qarshi uchrashuvlarda mag‘lubiyat. Go‘yoki, Flikning mashhur ofsayd qopqoni o‘xshamayotgandek tuyulmoqda va jamoalar bundan foydalanib yaqqol vaziyatlar yaratishyapti. Ko‘pchilik buni Inigo Martinesning ketgani bilan bog‘lasa, shuningdek, Rafinyaning yo‘qligi ham ta’sir qilayotganini aytish kerak. Zero aynan braziliyalik hujumchi “Barselona” pressingini boshqarar, aynan uning faolligi evaziga “Barselona” nisbatan tezroq to‘pni egallashga muvaffaq bo‘lardi. Yaxshi ma’lumki agar yaxshi kontrpressing bo‘lmasa, himoya chizig‘ining yuqoriga ko‘tarish ancha xavfli hisoblanadi. Bu struktura bilan “Barselona” go‘yoki olov bilan o‘ynashmoqda, Kilian Mbappe bilan bu uslub “Real” uchun yanada qulay bo‘lishi turgan gap.
Afsuski, Rafinya El Klasikoda ham, shuningdek yana bir necha hafta maydonga tusha olmasligi ma’lum bo‘ldi. Rafinyadan tashqari ham yana bir dunyo o‘yinchi bor – Robert Levandovski, Jyul Kunde, Gavi, Olmo, Joan Garsiya, bu sanalgan ismlar ham “Real”ga qarshi bahsni o‘tkazib yuborishadi. Flik mavjud tarkibdan kelib chiqib, o‘z uslubidan biroz chekinadimi yoki qaysarlikda davom etadimi? Darvoqe, Flikning o‘zi ham ushbu o‘yinni murabbiylar o‘rindig‘idan kuzata olmaydi, sababi, “Jirona”ga qarshi uchrashuvda maydondan chetlatilgandi. Mezbonlar tarkibida yo‘qotishlar deyarli yo‘q. Antonio Ryudiger ancha oldin, David Alaba esa undan ham avval safdan chiqqandi.
BOShQA O‘YINLAR
25 oktyabr. Borussiya M – BAVARIYa (18:30), CheLSI – Sanderlend (19:00), NYuKASL – Fulhem (19:00), Brest – PSJ (20:00), Brentford – LIVeRPUL (23:55)
26 oktyabr. Sassuolo – ROMA (19:00), BAYYeR – Frayburg (19:30), Everton – TOTTeNHEM (21:30), Latsio – YuVeNTUS (27 oktyabrga o‘tar kechasi, 00:45)
Litvalik murabbiy Kotrina Kulbite qo‘l ostidagi jamoa hal qiuvchi bahsda Filippinga yutqazdi.
Futbol bo‘yicha O‘zbekiston ayollar milliy jamoasi Avstraliyada bo‘lib o‘tayotgan Osiyo kubogidagi ishtirokini yakunladi.
Litvalik murabbiy Kotrina Kulbite qo‘l ostidagi jamoa kuchli sakkiztalikka kirdi.
Futbolchilar Bangladeshni 4:0 hisobida mag‘lub etdi. Ammo KXDR (0:3), Xitoy (0:3) va Janubiy Koreyaga (0:6) yutqazdi.
Jahon chempionati yo‘llanmasi uchun hal qiluvchi kurashda Filippin milliy jamoasiga 0:2 hisobida yutqazdi.
Endi O‘zbekiston ayollar milliy jamoasi qit’alararo saralash musobaqasida ishtirok etadi. Birinchi bosqich noyabr-dekabr oylarida markazlashgan formatda bo‘lib o‘tadi. Ikkinchi bosqich 2027 yil fevral oyiga belgilangan.
O‘zbekiston ayollar milliy jamoasi tarixda biror marta jahon chempionatida ishtirok etmagan.
Sport
«Real» «Bavariya»ga qarshi, «Barsa» yana «Atletiko» bilan o‘ynaydi. YeChLda chorakfinal juftliklari
Turnirda 8 jamoa qoldi.
Chorshanba oqshomida Chempionlar ligasi 2025/26 yillar mavsumi 1/8 finali doirasida yana to‘rt uchrashuv o‘tkazildi: «Arsenal», «Real», «PSJ» va «Sporting» ortidan «Barselona», «Atletiko», «Bavariya» va «Liverpul» jamoalari ham keyingi bosqichga yo‘llanma olishdi.
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
«Arsenal» va «Bavariya» – asosiy favoritlar
Har bir bosqichdan keyin Opta superkompyuteri Chempionlar ligasida kim g‘olib bo‘lishi bo‘yicha prognozlarini yangilab bormoqda. Turnir startidan oldin «Liverpul»ning imkoniyatlari eng yuqori baholangandi, o‘tgan mavsum Angliya chempioni bo‘lgan va yozgi transferlarda eng faol bo‘lgan jamoaga 20,6 foiz berilgandi, ammo vaqt o‘tib bu jamoaning imkoniyatlari uch baravar pasaytirildi – 7 foizgacha.
Turnir avvalida ikkinchi asosiy da’vogar «Arsenal» bo‘lib turgandi (15,3 foiz), ammo londonliklarning imkoniyatlari vaqt sayin o‘sib bordi va endi ikki baravar yuqori baholanmoqda.
Setkaning ikkinchi tomonidagi asosiy favorit – «Bavariya». Opta Angliya va Germaniya grandlari Budapeshtdagi finalga yetib kelishini bashorat qilmoqda. «Barselona» va «PSJ»da ham yarimfinalga chiqish imkoniyati yuqori baholangan.
Opta versiyasiga ko‘ra, jamoalarning Chempionlar ligasi g‘olibligi uchun imkoniyatlari:
«Arsenal»da startdan oldin 15,3 foiz, chorakfinal arafasida 30 foiz;
«Bavariya»da startdan oldin 4,5 foiz, chorakfinal arafasida 18 foiz;
«Barselona»da startdan oldin 8,8 foiz, chorakfinal arafasida 14,7 foiz;
«PSJ»da startdan oldin 12 foiz, chorakfinal arafasida 12,1 foiz;
«Real»da startdan oldin 5,8 foiz, chorakfinal arafasida 7 foiz;
«Liverpul»da startdan oldin 20,6 foiz, chorakfinal arafasida 30 foiz;
«Atletiko»da startdan oldin 0,8 foiz, chorakfinal arafasida 4,7 foiz;
«Sporting»da startdan oldin 0,8 foiz, chorakfinal arafasida 3,3 foiz.
1993 yil, aprel. Milliy basketbol assotsiatsiyasi muntazam ligasidagi navbatdagi o‘yini bo‘lib o‘tmoqda. Tanaffus paytida qiziqarli tanlov o‘tkazadi. Unga ko‘ra, xohlovchilar maydon chetidan to‘p irg‘itib, narigi tomondagi savatchaga tushirishi kerak edi. Bir yigit shu ishni uddalaydi. Biroq yutuqni to‘lashi lozim bo‘lgan sug‘urta kompaniyasi g‘irromlik qiladi va pullarini berishdan bosh tortadi. Oxir oqibat yigitga yutuqni “Chicago bulls” jamoasi to‘lab beradi.
Bugun AQSh sportini basketbol o‘yinisiz tasavvur qilib bo‘lmaydi. Bu sport turi muxlislar tashrifi bo‘yicha Amerika futboli va beysboldan so‘ng uchinchi o‘rinda turadi.
Basketbol AQShda eng ko‘p o‘ynaladigan o‘yin hisoblanadi va bilan mamlakatda 26 milliondan ortiq odam shug‘ullanadi.
Shuningdek, AQSh va Kanada jamoalari ishtirok etadian Milliy basketbol assotsiatsiyasi ligasi dunyo miqyosida eng ko‘p tomosha qilinadigan turnir hisoblanadi.
Jamoaviy o‘ynaladigan boshqa sport turlarida bo‘lgani kabi AQShda bo‘lib o‘tadigan basketbol o‘yinlari juda qiziqarli va keskin kurashlar ostida kechadi.
Shu bilan birga tanaffus paytlarida zaldagi muxlislar uchun turli tanlovlar o‘tkaziladi va o‘yinlar qiziqarli shouga aylanadi.
1993 yilda ana shunday tanlovlarning biri mojaro bilan yakun topadi. “Chicago bulls” jamoasiga homiylik qiluvchi kompaniya mukofot uchun va’da qilingan 1 mln dollarni g‘olib yigit Don Kelhunga to‘lab berishdan bosh tortadi.
Foto: spors.qq.com
Million dollarlik aniq zarba
1993 yil 14 aprel. Chikago shahridagi arenada MBA muntazam ligasida ishtirok etuvchi “Chicago bulls” va “Miami Heat” jamoalari bellashmoqda.
O‘sha paytda AQShlik jahonga mashhur basketbolchi Maykl Jordan “Chicago bulls” jamoasi sharafini himoya qilar va u ham maydonda edi.
O‘yinga tanaffus berilgan paytda “Chicago bulls” jamoasi, “Koka-kola” kompaniyasi Lettuce Entertain You restoranlar tarmog‘idan iborat tashkilotchilar yutuqli tanlov o‘tkazadi.
Tanlovga ko‘ra, avval muxlislar orasidan tasodifiy yo‘l bilan bir necha kishi tanlab olinadi. So‘ng ular navbati bilan basketbol maydonining bir chetidan, ikkinchi chetidagi savatchaga to‘pni uloqtirishi kerak edi.
Qoida aniq: 23 metr uzoqlikdan savatchaga to‘pni aniq tushirgan qatnashchi g‘olib bo‘ladi va u 1 mln dollarga ega chiqadi. Agar bu ishni bir necha kishi bajarsa mukofot puli ular orasida teng taqsimlanadi.
Yutuqni “Chicago bulls” jamoasiga homiylik qilayotgan “American Hole ‘N One” sug‘urta kompanisi to‘lab berishi lozim edi.
Tanlov boshlangach bir necha kishi to‘pni uloqtiradi, biroq savatchaga tushira olmaydi. Aslida bu ish juda qiyin bo‘lib, shu sababli ham tashkilotchilar tanlovga yutuq sifatida katta mablag‘ qo‘ygandi.
Navbat kanselariya do‘koni sotuvchisi bo‘lib ishlovchi Don Kelhunga keladi. Yigit uloqtirgan to‘p to‘g‘ri borib savatchaga tushadi. Shunda arenada o‘tirgan muxlislar yigitni olqishlay boshlaydi.
Foto: Videodan kadr
O‘sha paytda tanaffus olgan basketbolchilar tanlovni kuzatishayotgandi. Ular ham navbati bilan yigitni quchoqlab, tabriklashadi. Jumladan, maydonda bo‘lgan Maykl Jordan ham.
Don Kelhunning qo‘liga 1 dollarlik yutuqqa ega chiqqani haqidagi banner-sertifikat topshiriladi. Yigit o‘sha kuni xursand holda sevimli jamoasining arenasidan chiqib ketadi. Ertasi kuni esa muammo boshlanadi…
G‘irromlik
Don Kelhun ancha-muncha basketbolchilar ham amalga oshirolmaydigan ishni uddalab, mukofot puliga ega chiqqandi. Biroq 23 metrdan to‘pni savatchaga hech kim tushira olmasligiga ishonib pul tikkan sug‘urta kompaniyasi yutuqni to‘lashga kelganda g‘irromlik qilardi.
Kompaniya Don Kelhunga mukofot puli berilmasligini e’lon qilib, buning ikkita sababini keltiradi. Birinchi sababga ko‘ra Don Kelhun to‘pni uloqtirayotganda chiziqni bosgan.
Ikkinchisi, u avvalroq bir muddat kollejdagi jamoa safida basketbol o‘ynagan. Kompaniya tanlov oddiy muxlislar o‘rtasida o‘tkazilganini va unda Donning ishtiroki xato bo‘lganini aytadi.
Ya’ni, sug‘urta kopaniyasi tanlov ishtirokchilari so‘ngi 5 yilda basketbol bilan muntazam shug‘ullanmagan bo‘lishi kerak edi, deb turib oladi.
Foto: Videodan kadr
Shundan so‘ng sug‘urta kopaniyasining vajlari bo‘yicha tekshiruv o‘tkaziladi. Eng avval Don Kelhun to‘pni uloqtirayotgan paytda chiziqni bosganmi yoki yo‘q, shu tekshiriladi.
Jarayon tasvirga tushirilgandi. Video sinchiklab ko‘rilganda Donning chiziqni bosmagani ma’lum bo‘ladi. Ikkinchi sabab bo‘yicha ham komissiya yigitni haq deb topadi.
Chunki shartga ko‘ra, tanlovda professional sportchi, hatto faoliyatini tugatgan bo‘lsa ham qatnashishi mumkin emasdi. Don Kelhun esa hech qachon basketbol bilan professional tarzda shug‘ullanmagan, shunchaki kollejdagi havaskor jamoada o‘ynagandi.
Sug‘urta kopaniyasining ikkita vaji ham o‘rinli emas, deb topiladi. Biroq ular baribir 1 mln dollarni to‘lashni xohlamaydi.
O‘sha paytda Don Kelhun bilan sodir bo‘lgan hodisa va sug‘urta kompaniyasining g‘irromliq qilayotgani AQSh OAV lari e’tiboriga tushadi va ular birin ketin hodisa haqida yoza boshlaydi. Ammo bu ham sug‘urta kopaniyasining fikrini o‘zgartira olmaydi.
Hodisaga “Chicago bulls” jamoasining aralashuvi
Don Kelhunga qilingan g‘irromlik ommaga oshkor bo‘lgach muxlislar “Chicago bulls” jamoasini ham ayblay boshlaydi. Chunki tanlov jamoaning uy arenasida, uning o‘yini paytida tashkillashtirilgandi.
Qolaversa gazetalar va turli telekanallar har kuni Don Kelhunga qilingan g‘irromlik haqida maqola hamda ko‘rsatuvlar berib, muxlislarni yanada junbushga keltiradi.
Foto: alamy.com
Bu orada bir yilcha vaqt o‘tib ketadi va Don Kelhun sug‘urta kompaniyasidan o‘z yutug‘ini ololmaydi. Kunlarning birida “Chicago bulls” jamoasi rahbariyati 1 mln dollarlik yutuq bo‘yicha matbuot anjuani o‘tkazishi haqida e’lon beradi.
Matbuot anjumanida jamoa rahbariyati sug‘urta kompaniyasidan farqli ravishda Don Kelhun 1 mln dollarni haqqoniy yutganini tan oladi. So‘ng sug‘urta kompaniyasi to‘lashdan bosh tortgan pullarni jamoa to‘lab berishini ma’lum qiladi.
Faqat jamoa rahbariyati Donga pullarni birdaniga emas, har yili 50 ming dollardan 20 yil davomida to‘lab borilishini aytadi. Yigitning bunga ko‘nishdan o‘zga chorasi qolmaydi.
O‘shandan keyin Don Kelhun 2013 yilgacha 20 yil davomida har yili “Chicago bulls” jamoasidan 38 ming dollardan olib turadi. Qolgan 12 ming dollar daromad solig‘i uchun ushlab qolinadi. Shu tariqa yigit o‘zi yutgan mukofot pullarini to‘liq oladi.
Garchi bir urinishda million dollarni yutgan bo‘lsa-da Don Kelhun millionerga aylana olmaydi – u kanselariya mahsulotlari sotiladigan magazindagi ishini davom ettiradi.
Mashmashaga Maykl Jordanning aralashuvi
Don Kelhun to‘pni savatchaga tushirgan kuni afsonaviy basketbolchi Maykl Jordan ham maydonda edi. Boshqalar kabi u ham g‘olibni tabriklaydi.
Foto: Videodan kadr
O‘yin so‘ngida “Chicago bulls” jamoasining barcha o‘yinchilari Don Kelhun savatchaga tushirgan to‘pga dastxat qo‘yib berishlari lozim edi. O‘shanda faqat bir kishi – Maykl Jordan bu ishni qilmaydi. Jamoadoshlari dastxat qo‘yayotganda u indamay kiyinish xonasiga kirib ketadi.
Mayklning dastxat qo‘ymagani sababi bor edi. 1992 yilda u Upper Deck kompaniyasi bilan shartnoma imzolagandi.
Ushbu kelishuvga ko‘ra, Upper Deck Jordanning dastxati tushirilgan turli mahsulotlarni ishlab chiqaruvchi yagona kompaniya hisoblanardi.
Sportchi va kompaniya o‘rtasida tuzilgan shartnomada Jordanning futbolka, to‘plar va boshqa narsalarga dastxat qo‘yishi cheklangandi. Jordan faqat xayriya tadbirida yoki kasal bolalar uchun dastxat qo‘yishi mumkin edi.
Don Kelhun nima qilib bo‘lsa ham Jordanning dastxatini olishni maqsad qiladi va “Chicago bulls” jamoasining o‘yinlariga muntazam tusha boshlaydi. Biroq mashhur o‘yinchining dastxatini ololmaydi.
Oradan bir yilcha vaqt o‘tadi. Sug‘urta kompaniyasi hamon mukofot pulini to‘lab berishni kechiktirib kelar, Don esa da’vogar sifatida yurgandi. Bir kuni yigit Maykl Jordan o‘g‘lining o‘yinlarini ko‘rish uchun u o‘qiydigan maktabga borib turishini eshitadi va o‘sha yoqqa otlanadi.
Foto: memedeportes.com
Biroq tan soqchilar uni Mayklning oldiga qo‘ymaydi. Ular sportchi baribir dastxat bermasligini ta’kidlaydi. Don u yerdan chiqib ketayotganida tan soqchilardan biri uni quvib yetadi va Maykl chaqirayotganini aytadi.
Yigit Jordan bilan uchrashganda sportchi Donni taniydi va “Pulingizni oldingizmi?” deb so‘raydi. Yigit olmaganini bildiradi.
Shundan so‘ng Jordan “Chicago bulls” rahbariyatiga bosim o‘tkazadi va yigitga yutuqni to‘lab berishni talab qiladi. Avvaliga jamoa rahbariyati ko‘nmaydi.
Biroq bir muddat o‘tgach klub rahbariyati o‘zining eng yaxshi o‘yinchisi qo‘ygan talabga ko‘nishga majbur bo‘ladi.
Angliyaning olti jamoasidan to‘rttasi turnirni tark etdi. Chorakfinalning barcha juftliklari aniq bo‘ldi.
«Kamp Nou»da rekordlar va antirekord
«Barselona» – «Nyukasl» 7:2
Gollar: Rafinya, 6 (1:0). Elanga, 15 (1:1). Bernal, 18 (2:1). Elanga, 28 (2:2). Yamal, 45+7 – penalti (3:2). Fermin Lopes, 51 (4:2). Levandovski, 56 (5:2). Levandovski, 61 (6:2). Rafinya, 72 (7:2)
«Barselona»: X. Garsiya (Shchensni, 82), Kubarsi, Martin, Joau Kanselu (Espart, 66), E. Garsiya (Arauxo, 21), Pedri, Bernal, Fermin Lopes (Olmo, 66), Rafinya, Yamal, Levandovski (Torres, 66)
«Nyukasl Yunayted»: Ramsdeyl, Tiau, Byorn, Holl, Trippiyer (Livramento, 46), Joelinton (Botman, 64), Tonali (Uillok, 55), Remsi, Barns, Elanga (Myorfi, 64), Gordon (Osula, 81)
Ogohlantirishlar: Kubarsi, 44 – Joelinton, 17. Trippiyer, 45. Uillok, 60
Birinchi o‘yin: 1:1
«Kamp Nou»dagi o‘yin turli-tuman rekordlar jamlanmasiga aylandi. Birinchidan, Angliyaning hech bir klubi bungacha Chempionlar ligasi pley-offidagi bir o‘yinda 7 gol o‘tkazib yubormagandi. «Nyukasl» esa shunday imkonsiz ko‘ringan ishni uddaladi. O‘z maydonida to‘liq ustunlik qilgan va so‘nggi daqiqalarda penalti tufayli g‘alabani qo‘ldan chiqargan APL vakili javob o‘yinining birinchi bo‘limida ham munosib qarshilik ko‘rsatdi. Mehmonlar uchta gol o‘tkazib yuborgan bo‘lsa-da, o‘zi ham raqib mudofaasidagi qo‘pol xatolardan foydalanib, ikkita gol urdi.
Ammo Kiran Trippiyer birinchi bo‘limga qo‘shib berilgan daqiqalarda penaltiga sababchi bo‘ldi va Lamin Yamal uchinchi bor jamoasini hisobda oldinga olib chiqdi. Tanaffusdan keyin esa «Nyukasl»ni tanib bo‘lmay qoldi. Eddi Hau jamoasi shunchaki sochilib ketdi va 10 daqiqa ichida uchta gol qo‘yib yubordi. Bunday himoya chizig‘i bilan ko‘p narsadan umid qilib bo‘lmasdi. Ayniqsa Jyeykob Remsining xatosi yilning eng kulgili holatlari kolleksiyasidan o‘rin olishi tayin. Uning qo‘pol xatosi yettinchi gol o‘tkazilishiga olib keldi.
Rafinya bu o‘yinda «gol+pas» tizimida 4 (2+2) ochko ishladi, Robert Levandovski dublni rasmiylashtirdi. Polyak hujumchisi birdaniga bir necha rekordni urdi. U Chempionlar ligasida urgan gollari sonini 41 taga yetkazib, bu borada Lionel Messining rekordini yangiladi. Bundan tashqari, Robert endi Chempionlar ligasida dubl qayd etgan eng katta yoshli futbolchi hisoblanadi – u hozir 37 yoshda. «Barsa» uchun yagona minus – darvozabon Joan Garsiya jarohat olishi bo‘ldi. Chorakfinalda jamoa usiz qiynalishi mumkin.
Salohning benefisi
«Liverpul» – «Galatasaroy»
Gollar: Soboslai, 25 (1:0). Ekitike, 51 (2:0). Gravenberh, 53 (3:0). Saloh, 62 (4:0)
Aniq ijro etilmagan penalti: Saloh, 45+4’
«Liverpul»: Alisson, van Deyk, Konate, Kerkez, Frimpong (Jons, 67), Gravenberh (Nioni, 89), Virs (Kiyeza, 89), Soboslai, Makallister, Saloh (Gakpo, 74), Ekitike (Ngumoha, 89)
«Galatasaroy»: Ugurjan Chaqir, Abdulkarim Bardakchi (Eren Elmali, 73), Singo, Yakobs, Boe (Sane, 46), Torreyra (Yunus Oqgun, 60), Lemina, Sara, Barish Yilmaz, Sholloi, Osimhen (Lang, 46, Ikardi, 80)
Birinchi o‘yin: 0:1
Chorshanba kungi o‘yinlarda chinakamiga intriga saqlanib qolgan yagona o‘yin «Enfild»da edi, bu yerda mezbonlar minimal farqni yo‘qqa chiqarishi talab etilardi. Mezbonlar birinchi bo‘lim o‘rtalaridayoq bu vazifani uddalashdi. Mak Allister burchak zarbasini ijro etishda raqiblarni dog‘da qoldirib, to‘pni yerlatib jarima maydoni chizig‘i hududiga yetkazib berdi, u yerda ortdan kelgan Soboslaini esa hech kim kutib olmadi.
«Liverpul»ning bu mavsumdagi eng yaxshi futbolchisi bo‘lib turgan vengriyalik yarimhimoyachi jamoasi tanaffusga ikki gol farqi bilan chiqib ketishi uchun barcha ishni qildi. Ammo u ishlagan penaltini Saloh aniq ijro eta olmadi.
Misrlik hujumchi o‘z vaziyatlaridan foydalana olmagan bo‘lsa-da, ikkinchi bo‘lim boshida ikki daqiqa ichida urilgan ikki golda ham ishtirok etdi. Avvaliga tezkor qarshi hujumda u Ekitikega ideal uzatma berdi, biroz o‘tib uning zarbasidan keyin darvozabondan qaytgan to‘pni Gravenberh darvozaga kiritib yubordi va «Galatasaroy» amalda chorakfinalga chiqishdan umid uzdi. Salohning o‘zi ham yakunda o‘z nomini tabloga yozdirib qo‘ydi – Virs tovonida uzatgan pasdan keyin o‘zining eng yaxshi yillarida bo‘lgani kabi aylanma zarba yo‘lladi.
Biroz o‘tib «Enfild»da yig‘ilganlar zaxiraga olinayotgan o‘z kumirini olqishlar ostida kuzatib qo‘ydi. Bu oqshomdagi gol uning uchun YeChLdagi 50-goli edi. U shundan 47 tasini «Liverpul» safida urgan («Bazel»da 2 va «Chelsi»da 1). Saloh – bunday ko‘rsatkichga erishgan ilk afrikalik futbolchi bo‘ldi. Oldinda esa Arne Slot jamoasini chorakfinalda «PSJ»ga qarshi o‘yinlar kutmoqda. Mersisaydliklar uchun bu o‘tgan mavsumdagi mag‘lubiyat uchun revansh olish imkoniyatidir.
Inglizlarning yana bir jamoasini ispanlar chiqarib yubordi
«Tottenhem» – «Atletiko» 3:2
Gollar: Kolo Muani, 30 (1:0). Alvares, 47 (1:1). Simons, 52 (2:1). Gansko, 75 (2:2). Simons, 90+1 – penalti (3:2)
«Tottenhem Hotspur»: Vikario, Romero (Danso, 81), van de Ven, Spens, Dregushin (Udoji, 66), Grey (Gallaher, 81), Sarr, Simons, Tel (Olusesi, 81), Porro (Bergvall, 74), Kolo Muani
«Atletiko»: Musso, Gansko, Le Norman, Rudjyeri, Molina (Koke, 64), Kardozo, Liorente, Lukman (Syorlot, 64), Simeone (Ximenes, 87), Grizmann (Baena, 84), Alvares (Gonsales, 84)
Ogohlantirishlar: Porro, 57. Vikario, 58. Romero, 70. Udoji, 72 – Rudjyeri, 28. Lukman, 56. Syorlot, 90
Birinchi o‘yin: 2:5
Yaqinda «Atletiko» Ispaniya kubogi yarimfinalida «Barselona»ga qarshi birinchi uchrashuvda yirik g‘alabaga (4:0) erishgach, «Kamp Nou»dagi javob o‘yinida bu ustunlikni saqlab qolish uchun to‘liq himoyaviy o‘yin uslubini tanlagandi. Londonda esa barchasi butunlay boshqacha kechdi va dastlabki 45 daqiqalikda mehmonlar sakkizta zarba berishdi, Lukman esa darvozani ishg‘ol etishga ham muvaffaq bo‘ldi. Ammo – ofsayddan. Yana bir necha xavfli hujumlar uyushtirildi, ammo yakunda Diyego Simeone jamoasi yo‘q joydan «Tottenhem»ga o‘yinga qaytish imkonini berdi. Autdan to‘p tashlanishi, Telning jarima maydoni markaziga uzatmasi, u yerda esa yolg‘iz qoldirilgan Kolo Muani.
Mezbonlar ikkinchi golni ham urishganida ispanlar og‘ir vaziyatga tushib qolgan bo‘lardi, faqat darvozabon Musso jamoa joniga ora kirdi. Argentinalik posbon Telning burchakka yo‘naltirilgan zarbasini oyoqlari bilan to‘sib qoldi. Birinchi bo‘limdan keyin baribir intriga saqlanib qoldi va buning uchun mezbonlar Vikarioga minnatdorchilik bildirishi kerak bo‘ladi. Juliano Simeone uzoq masofadan zarba yo‘llaganida to‘p Romeroga tekkan holda o‘z trayektoriyasini o‘zgartirdi, ammo allaqachon to‘p yo‘liga yotgan italiyalik darvozabon o‘rnidan turib, xavfni bartaraf etishga ulgurdi.
Ammo ikkinchi bo‘lim boshida «Atletiko» baribir intrigani o‘ldirdi. Avvaliga Xulian Alvares Simons gol urishiga to‘sqinlik qildi (mezbonlar uning harakatini fol deb e’tiroz bildirishdi) va qarshi hujumni o‘zi gol bilan yakunlandi. U jarima maydonida Lukmandan pas qabul qilib oldi va to‘pni yuqori burchakka aniq yo‘lladi.
Hakamdan va raqiblardan ranjigan Simons bir necha daqiqa o‘tib baribir o‘z maqsadiga erishdi va jamoasini yana oldinga olib chiqdi. Bir necha daqiqa o‘tib Musso yana madridliklarni qutqarib qoldi – u Porroning shvedka uslubida olis burchakka yo‘llagan zarbasiga qo‘llarining uchi bilan yetib bordi. «Matraschilar» muxlislari Alvaresning burchakdan oshirgan to‘pi Hansko tomonidan darvozaga kiritilganidan keyingina yengil tin olishdi. O‘yin oxirida Simons o‘zi ishlagan penaltini aniq ijro etishi esa umumiy natijani o‘zgartirmadi.
Madriddagi birinchi o‘yinda londonliklar bosh murabbiyi Igor Tyudor darvozabon bo‘yicha muvaffaqiyatsiz tajriba o‘tkazmaganida «Tottenhem» «Atletiko» bilan tengma-teng kurashishi mumkin edi, ammo murabbiyning o‘sha qarori birinchi o‘yinda «shporlar»ning imkoniyatlarini keskin pasaytirib yuborgandi. Natijada ikki o‘yinda xuddi «Chelsi» kabi sakkiz gol o‘tkazib yuborgan «Tottenhem» turnirni tark etdi, «Atletiko» esa «Barselona» bilan o‘yinlarga tayyorgarlikni boshlaydi.
«Atalanta» tarixga kirdi
«Bavariya» – «Atalanta» 4:1
Gollar: Keyn, 25 – penalti (1:0). Keyn, 54 (2:0). Karl, 56 (3:0). Dias, 70 (4:0). Samarjich, 85 (4:1)
«Bavariya»: Urbig, Kim Min Je, Ta, Bishof (Pavich, 72), Stanishich (Gnabri, 72), Goretska, Pavlovich (Ofli, 55), Rafael Gerreyru (Ito, 83), Dias, Karl, Keyn (Jyekson, 72)
«Atalanta»: Sportello, Hin, Skalvini (Axanor, 83), Kossunu, Pashalich, Ederson (Samarjich, 57), Bernaskoni, Bellanova, Sulemana (Raspadori, 71), De Ketelare (de Ron, 57), Skamakka (Krstovich, 71)
Birinchi o‘yin: 6:1
Bergamodagi tennischa hisobdan (6:1) keyin ham «Bavariya» muxlislarida darvozabon pozitsiyasi tufayli xavotir saqlanib qolgandi. Zayavkadagi to‘rt darvozabon – Noyyer, Ulrayh, Klanats va Urbig – barchasi jarohat tufayli safdan chiqqandi. Faqat ularning to‘rtinchisi so‘nggi kunlarda safga qaytdi va Vensan Kompani darvozaga o‘smirlardan birini qo‘yishiga to‘g‘ri kelmadi.
Umuman olganda, xavotirlar o‘rinsiz edi. Baribir darvozabonga amalda ish topilmadi. Bergamoliklar ham bu o‘yinda darvozabonni almashtirgandi va bu mavsumda deyarli o‘ynamagan 33 yoshli Sportello Keyn ijrosidagi penaltini qaytardi. Ammo u darvoza chizig‘idan ertaroq oldinga chiqib ketgani ma’lum bo‘ldi, Harri esa takroriy zarbada adashmadi.
Ikkinchi bo‘limda esa myunxenliklarni to‘xtatib bo‘lmadi. Avvaliga Keyn o‘yindan ham gol urdi, keyin esa Dias va Karl tandemi bittadan gol urdi (ular bir-biriga golli uzatma berishdi). Bergamoliklar esa bu o‘yinda ham bitta javob goli urishga erishdi, ammo Italiyaning yevrokuboklar pley-off bosqichida ikki o‘yinda 10 gol o‘tkazgan ilk jamoasi sifatida tarixga kirdi. «Bavariya»ni esa navbatdagi bosqichda «Real»ga qarshi janglar kutmoqda.
YeChLda 8 jamoa qoldi
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
Stadion suriluvchi tom va maydonga ega bo‘ladi. Uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. 45000 tomoshabinga mo‘ljallangan arena “Al Hilol” va “Al Nassr” klublari uchun uy maydoni bo‘lishi kutilmoqda.
Saudiya Arabistonida qurilayotgan shahzoda Muhammad bin Salmon nomidagi ko‘p funksiyali stadionning yangi suratlari e’lon qilindi. U 2034 yilgi futbol bo‘yicha jahon chempionatini o‘tkazish uchun ehtimoliy arenalardan biri sifatida ko‘rilmoqda.
Qurilish ishlari Ar-Riyod shahri g‘arbidagi Qiddiya ko‘ngilochar hududida olib borilmoqda.
Foto: SaudiProject
Stadion suriluvchi tom va maydonga ega bo‘ladi, uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. Devor ochilganida, maydon atrofidagi tribunalar va Tuvayk qoyasi manzarasi namoyon bo‘ladi. Bu dunyodagi birinchi to‘liq integratsiyalashgan majmua bo‘lib, stadionni bir necha soat ichida turli tadbirlar uchun moslashtirish imkonini beradi.
Geometrik shakldagi binolarning tashqi qismi raqamli ekranlar bilan qoplanadi va ular qoyadan o‘sib chiqqandek ko‘rinadi.
Foto: SaudiProject
Stadion atrofida sport va ko‘ngilochar hududlarga ega bo‘lgan baland binolar quriladi. Ular ichki ko‘chalar orqali bog‘lanadi va bu ko‘chalar ham LED ekranlar bilan qoplanadi. Ushbu yo‘laklar tashrif buyuruvchilarni qoya chetidagi kuzatuv maydonchalariga olib boradi.
Loyihasi Populous arxitektura byurosi tomonidan ishlab chiqilgan ushbu arena 45000 tomoshabinga mo‘ljallangan.
Foto: SaudiProject
Stadion Saudiya Arabistoni professional ligasining “Al Hilol” va “Al Nassr” klublari uchun uy maydoni bo‘ladi. Shu bilan birga, bu yerda boks, kibersport, konsertlar va teatr tomoshalari kabi turli sport va madaniy tadbirlar ham o‘tkaziladi.
O‘zbekistonda yanvar oyida qog‘oz sanoatida sezilarli o‘sish kuzatildi
O‘zbekistonda 2025 yilda 48 nafar erkak 70 yoshdan keyin ota bo‘ldi
Isroil Livan janubida quruqlikdan operatsiya boshladi
-
Turk dunyosi4 days agoTurkiyaning Baykal K2 bir tomonlama hujumga uchragan uchuvchisiz samolyotining toʻda harakatini sinovdan oʻtkazdi
-
Jamiyat1 day ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Jamiyat3 days ago
Ichki ishlar xodimlarining qo‘pol muomalasi va tergov sifatidan norozilik ko‘paygan – Prezident
-
Iqtisodiyot4 days ago«Yomg‘ir va qorda ham foydalanishga tayyor bo‘ladi» – Toshkent-Andijon pulli yo‘li haqida nimalar ma’lum?
-
Dunyodan1 day ago
Eron Hormuz boʻgʻozi orqali cheklangan oʻtishga ruxsat beradi
-
Iqtisodiyot1 day agopayme Tez QR orqali to‘lovni 3% keshbek bilan ishga tushirmoqda
-
Iqtisodiyot3 days agoMetandan go‘shtgacha. Narxi keskin oshgan mahsulot va xizmatlar
-
Siyosat17 hours agoSoʻnggi savdo maʼlumotlariga koʻra, Oʻzbekiston temir yoʻllari importi eksportdan 2,5 barobar koʻp