FVB xodimiga nisbatan jinoyat ishi qo‘zg‘atildi. 

Korrupsiyaga qarshi kurashish yo‘nalishida Davlat xavfsizlik xizmatining Toshkent shahar bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti bilan hamkorlikda tezkor tadbir o‘tkazilgan. 

Unda Yangihayot tumani Favqulodda vaziyatlar bo‘limi kichik inspektori o‘z xizmat mavqeini suiiste’mol qilib, mahalliy MChJ rahbaridan 1500 AQSh dollari olgan vaqtida ashyoviy dalillar bilan ushlandi.

Aniqlanishicha, FVB xodimi hamkasblari orqali, MChJ tomonidan mazkur tumanda faoliyat yurituvchi korxona hududiga o‘rnatilgan yong‘in xavfsizligi jihozlarini qabul qilish bo‘yicha bayonnoma rasmiylashtirib berish evaziga pul talab qilgan.

Holat yuzasidan unga nisbatan Jinoyat Kodeksining 168-moddasi 3-qismi “v” bandi va 28,211-moddasi 1-qismi bilan jinoyat ishi qo‘zg‘atilib,«qamoq» ehtiyot chorasi qo‘llanildi. Hozirda tergov harakatlari olib borilmoqda. 

Avval Namangan va Surxondaryoda energetika xodimlari ushlangandi. 

Source link

Angren shahrida voyaga yetmagan qizni zo‘rlagan bir guruh shaxslarga hukm e’lon qilindi.Bu haqda Oliy sud matbuot xizmati xabar berdi. 

O‘tgan yili yozda ushbu ish keng muhokamalarga sabab bo‘lgandi. 

Bugun jinoyat ishlari bo‘yicha Angren shahar sudida S. Q. (2006 yilda Toshkent viloyatida tug‘ilgan), Z. U. (2004 yilda Toshkent viloyatida tug‘ilgan), D. O‘. (2004 yilda Toshkent viloyatida tug‘ilgan) va A. U. (2003 yilda Toshkent viloyatida tug‘ilgan)ga oid jinoyat ishini ko‘rib chiqish bo‘yicha sud jarayoni yakunlanib, sud hukmi e’lon qilindi.

Ushbu jinoyat ishi Jinoyat-protsessual kodeksining 19-moddasi (sudda jinoyat ishlarining oshkora ko‘rilishi) talablariga muvofiq yopiq sud majlisida ko‘rib chiqildi.

E’lon qilingan sud hukmiga muvofiq S. Q., Z. U., D. O‘. va A. U. voyaga yetmagan S. Ya. (qiz bola, 2010 yilda tug‘ilgan)ga nisbatan Jinoyat kodeksining 118-moddasi 3-qismi “a” bandi, 119-moddasi 3-qismi “a” bandi, 28,118-moddasi 3-qismi “a” bandi va 28,119-moddasi 3-qismi “a” bandida nazarda tutilgan jinoyatlarini sodir etganlikda aybli deb topildi.

– S. Q. (jinoyat sodir etilgan vaqtda voyaga yetmagan)ga 118-moddasi 3-qismi “a” bandi bilan Jinoyat kodeksining 85-moddasi (ozodlikdan mahrum qilish)ga asosan 10 yil,

– Z. U.ga 118-moddasi 3-qismi “a” bandi, 119-moddasi 3-qismi “a” bandi, 28,118-moddasi 3-qismi “a” bandi va 28,119-moddasi 3-qismi “a” bandi bilan 12 yil,

– D. O‘.ga 118-moddasi 3-qismi “a” bandi va 119-moddasi 3-qismi “a” bandi bilan 10 yil 6 oy,

– A. U. (II-guruh nogironi)ga 118-moddasi 3-qismi “a” bandi va 119-moddasi 3-qismi “a” bandi bilan 7 yil 6 oy ozodlikdan mahrum qilish jazosi tayinlandi. 

Birinchi instansiya sudining hukmi ustidan taraflar qonunda belgilangan tartib va muddatda Toshkent viloyat sudining apellyasiya/kassatsiya instansiyasiga shikoyat berish va protest keltirishga haqliligi ma’lum qilinadi.

Source link

Milliy statistika tizimi mutaxassislarining malakasi oshiriladi. 

«Milliy statistika tizimi mutaxassislari malakasini oshirish hamda sohaga raqamli texnologiyalarni joriy etishni yanada jadallashtirish orqali yuqori samaradorlikka erishish chora-tadbirlari to‘g‘risida» gi Prezident qarori (PQ–103-son, 13.03.2026-y.) qabul qilindi.

Qarorga ko‘ra, ushbu qarorning asosiy maqsadlari etib quyidagilar belgilandi:

– har 2 yilda 3 ming nafar milliy statistika tizimi mutaxassislarini o‘qitib borish imkonini yaratish;

– yashirin va kreativ iqtisodiyotni baholash maqsadida statistika metodologiyasini takomillashtirish.

 Qarorga bilan Milliy statistika qo‘mitasining Kadrlar malakasini oshirish va statistik tadqiqotlar instituti (Institut) faoliyatining ustuvor yo‘nalishlari tasdiqlandi.

2026-yil 1-apreldan boshlab Institutda quyidagi kurslar tashkil etiladi:

– vazirlik va idoralarning ma’muriy ma’lumotlarini yuritish, statistika uslubiyotlarini ishlab chiqish va ochiq ma’lumotlar portali bilan ishlashga mas’ul bo‘lgan xodimlari uchun har 2 yilda shartnoma asosida 48 soatgacha bo‘lgan malaka oshirish kurslari;

– statistika hisobotlarini taqdim etuvchi sub’yektlar, jumladan, tadbirkorlar uchun zarur amaliy ko‘nikmalarni rivojlantirish bo‘yicha o‘quv kurslari.

Source link

Buxoro viloyat Arxiv tizimida ishlab kelgan ayolning firibgarlik va hujjatni soxtalashtirish bilan hujjat soxtalashtirish bilan bog‘liq jinoyat fosh etildi.

Jinoyat ishlari bo‘yicha Qorako‘l tumani Sudi qaroriga ko‘ra, u pensiya chiqarib berish va’dasi bilan o‘z qarindoshi bo‘lgan fuqarodan pul olgan va soxta arxiv ma’lumotnomasini  tayyorlagan.

1987-yilda Olot tumanida tug‘ilgan E.A. bir vaqtlar Olot tumani idoralararo shaxsiy tarkib arxivida fond saqlovchi vazifasida ishlagan. Keyinchalik ishdan chiqib, uyda o‘tirgan bo‘lgan.

Tergov materiallariga ko‘ra, E.A.  2023-yilda o‘z xizmat mavqeidan foydalanib, «Denov» mahallasida yashovchi S.Q.ni aldagan. Unga pensiyaga chiqish uchun ish staji yetarli emasligini bilib, tanishlari orqali bu masalani hal qilib berishini aytgan. Uning so‘zlariga ko‘ra, pensiyani rasmiylashtirish uchun arxiv hujjatlari orqali qo‘shimcha ish staji «yozdirib berish» mumkin edi.

Buning uchun esa 300 AQSh dollari talab qilgan. S.Q. buncha miqdordagi puli bo‘lmagani uchun qo‘shnisidan qarz olgan va shu kuniyoq, E.A.ga 300 AQSh dollari topshirgan.

E.A. tayyorlagan ma’lumotnoma elektron baza orqali Davlat xizmatlari markaziga yuborilgan va uning asosida S.Q.ga shu asosda yoshga doir pensiya tayinlangan. U bir necha oy davomida pensiya olib kelgan.

Oradan vaqt o‘tib, pensiya hujjatlari qayta tekshirilganda, arxiv ma’lumotlari bilan solishtirish orqali jiddiy farqlar aniqlangan. 2025-yilning oxirida holat yuzasidan tergov ishlari boshlanib ketgan. Tergov hujjatlariga ko‘ra, E.A. arxivda saqlanayotgan «Denov kolxozi ish haqi kitoblari» asosida S.Q.ning ish kunlarini sun’iy ravishda ko‘paytirgan. Natijada, aslida, 5 yil 9 oy ish staji bo‘lgan fuqaroga 7 yil 10 oy staj borligi haqida soxta arxiv ma’lumotnomasi tayyorlangani oshkor bo‘lgan.

Tekshirish natijasida S.Q.ning 1984-yildagi ish kunlari asossiz ko‘paytirilgani, 1985-yildagi ish kunlari boshqa fuqaroga tegishli bo‘lgani hamda ayrim yillardagi ish kunlari sun’iy ravishda qo‘shib yozilgani aniqlangan. Va shu sabab bilan S.Q.ning pensiyasi bekor qilingan va u olgan 5 million 789 ming 863 so‘m pullar davlatga qaytarilishi belgilangan.

S.Q. huquqni muhofaza qiluvchi organlarga o‘z yaqin qarishdoshi tomonidan 2023-yilda pensiya hujjatlari soxtalashtirib berilganini va u ishonganini aytib, murojaat qilgan. Shundan so‘ng, departament xodimlari tomonidan tezkor tadbir tashkil etilgan. E.A. o‘z qarindoshi S.Q.dan olgan pullarini qaytarish uchun jabrlanuvchi bilan uchrashgan va 200 AQSh dollarini qaytarayotgan vaqtda tezkor xodimlar tomonidan ushlangan.

Jinoyat ishlari bo‘yicha Qorako‘l tuman sudi aybdorga Jinoyat kodeksining 168-moddasi (Firibgarlik), 28- (Jinoyat ishtirokchilarining turlari) hamda 211- ( Pora berish) moddalari bilan ish qo‘zg‘ab, 3 yil muddatga ozodlikni cheklash hamda 2 yil muddatga axloq tuzatish ishlari jazosini bergan.

Source link

O‘zgidromet 14-mart kuni kuzatiladigan ob-havo prognozini e’lon qildi.

Toshkent shahrida havo o‘zgaruvchan bo‘ladi, yog‘ingarchilik kutilmaydi. Shamol sharqdan 3-8 metr/sekund tezlikda esadi. Harorat kechasi 1 daraja sovuq — 1 daraja iliq, kunduzi 13-15 daraja iliq bo‘ladi.

Qoraqalpog‘iston Respublikasi, Xorazm viloyatida havo o‘zgaruvchan bo‘ladi, yog‘ingarchilik kutilmaydi. Ba’zi joylarga tuman tushishi mumkin. Shamol sharqdan 7-12 metr/sekund tezlikda esadi. Harorat kechasi 3 daraja sovuq — 2 daraja iliq, kunduzi 10-15 daraja iliq bo‘ladi.

Buxoro va Navoiy viloyatlarida havo o‘zgaruvchan bo‘ladi, yog‘ingarchilik kutilmaydi. Ba’zi joylarga tuman tushishi mumkin. Shamol sharqdan 9-14 metr/sekund tezlikda esadi. Harorat kechasi 3 daraja sovuq — 2 daraja iliq, kunduzi 10-15 daraja iliq bo‘ladi.

Toshkent, Sirdaryo, Jizzax, Samarqand viloyatlarida havo o‘zgaruvchan bo‘ladi, yog‘ingarchilik kutilmaydi. Ba’zi joylarga tuman tushishi mumkin. Shamol sharqdan 7-12 metr/sekund tezlikda esadi. Harorat kechasi 0-5 daraja iliq, ba’zi joylarda 2 daraja sovuqqacha, kunduzi 12-17 daraja iliq bo‘ladi.

Qashqadaryo va Surxondaryo viloyatlarida havo o‘zgaruvchan bo‘ladi, ba’zi joylarda yomg‘ir yog‘ishi mumkin. Ba’zi joylarga tuman tushishi mumkin. Shamol sharqdan 7-12 metr/sekund tezlikda esadi. Harorat kechasi 0-5 daraja iliq, kunduzi 13-18 daraja iliq bo‘ladi.

Andijon, Namangan va Farg‘ona viloyatlarida havo o‘zgaruvchan bo‘ladi, yog‘ingarchilik kutilmaydi. Ba’zi joylarga tuman tushadi. Shamol sharqdan 7-12 metr/sekund tezlikda esadi. Harorat kechasi 0-5 daraja iliq, 10-15 daraja iliq bo‘ladi.

Respublikaning tog‘oldi va tog‘li hududlarida havo o‘zgaruvchan bo‘ladi, vaqti-vaqti bilan yog‘ingarchilik (yomg‘ir, qor) bo‘ladi. Ba’zi joylarga tuman tushishi mumkin. Shamol sharqdan 7-12 metr/sekund tezlikda esadi. Harorat kechasi 3-8 daraja sovuq, kunduzi 5-10 daraja iliq bo‘ladi.

Source link