Sport
«Arsenal» va «Barselona»da kambek, Shomurodovda yana gol. Kun o‘yinlari
«Arsenal» so‘nggi daqiqalarda g‘alaba golini urdi, Yamal qaytishi bilan hal qildi, «Milan» «Napoli»ni taxtdan tushirdi. Yakshanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Angliya: «kanonirlar»ning kornerlari — penalti kabi
«Nyukasl Yunayted» – «Arsenal» 1:2
Gollar: Voltemade, 34 (1:0). Merino, 84 (1:1). Gabriel Magalyayns, 90+6 (1:2)
«Nyukasl Yunayted»: Poup, Botman, Tshau, Bern, Livramento (Laskelles, 77), Tonali, Joelinton (Barns, 90+4), Gimarayns, Gordon (Trippiyer, 67), Myorfi (Osula, 67), Voltemade (Elanga, 67)
«Arsenal»: Rayya, Moskera (Saliba, 46), Gabriel Magalyayns, Kalafiori (Merino, 70), Timber, Subimendi (Edegor, 82), Rays, Eze, Trossar (Lyuis-Skelli, 88), Saka (Martinelli, 70), Yokeresh
Ogohlantirishlar: Joelinton, 83. Bern, 88 – Kalafiori, 56
APLning 6-turi markaziy uchrashuvi «Nyukasl» va «Arsenal» o‘rtasida bo‘lib o‘tdi. Mehmonlar o‘yinni kuchli boshlashdi va ko‘plab golli vaziyatlarga ega bo‘lishdi, ammo «kanonirlar»ga omad kulib boqmadi. Avvaliga videotakrordan keyin penalti bekor qilindi. Hakamlar xulosasiga ko‘ra, bu vaziyatda Poup birinchi bo‘lib to‘pga ulgurgani uchun Yokereshga ishlatgan qo‘polligi inobatga olinmadi.
Keyin Trossar o‘ta qulay vaziyatdan foydalana olmadi, namunali hujum yakunida uning zarbasi ustunga tegdi. Birgina Ezening o‘zi dastlabki 45 daqiqalikda raqiblarning darvoza sohasiga to‘g‘ri borgan jami zarbalaridan ko‘proq zarba berdi (2 ga qarshi 3). Uning o‘ta xavfli zarbalarini mezbonlar darvozaboni Nik Poup qahramonlik ko‘rsatib qaytarib qoldi. Birinchi bo‘lim esa «qarg‘alar» foydasiga 1:0 ko‘rinishida yakunlandi.
Barchasi shu kuni boshlang‘ich tarkibda tushirilgan Moskera oddiy vaziyatda raqibga burchak to‘pi sovg‘a qilishi bilan boshlandi. Sandro Tonali avvaliga o‘ziga yaqin turgan Gordonga pas berdi va undan qaytgan to‘pni darvozabon hududiga oshirdi. U yerda 198 santimetrlik Voltemade barchadan baland sakrab, David Rayyaga imkon qoldirmadi. «Arsenal» futbolchilari e’tiroz bildirib, u sakrashdan oldin Gabrielga qo‘pollik ishlatganiga e’tibor qaratishdi. Ammo bu safar ham hakamlar mehmonlar zarariga qaror chiqardi. Tanaffusda Arteta Moskerani o‘yindan olib, Salibani tarkibga qaytardi.
Voqealarning bunday rivoji «Arsenal» uchun yomon signal edi, jamoa qatorasiga besh marta birinchi bo‘lib gol o‘tkazib yuborgan o‘yinlarida g‘alaba qozona olmayotgandi. Ammo «kanonirlar»da bu mavsum zaxira o‘rindig‘idan tushgan o‘yinchilar o‘zgarish qilish an’anasi ham paydo bo‘lgan. Bu safar Arteta katta tavakkalchilikka qo‘l urib, himoya vakillari o‘rniga hujum vakillarini tushirdi. Kalafiori o‘rnini egallagan Merino Raysning uzatmasidan keyin boshda gol urib, hisobni tenglashtirdi. Tayanch yarimhimoyachisi o‘rniga tushgan Edegor esa o‘yinni butkul jonlantirdi va ikkinchi golga assistentlik qildi, 90+6-daqiqada u burchakdan oshirgan to‘pni Gabriel ham bosh bilan darvozaga yo‘lladi. Yomon ssenariyda peshqadam «Liverpul»dan sakkiz ochkoga ortda qolib ketishi mumkin bo‘lgan «Arsenal» amalda farqni ikki ochkogacha qisqartira oldi.
Ispaniya: kataloncha kambek
«Barselona» – «Real Sosedad» 2:1
Gollar: Odriosola, 31 (0:1). Kunde, 43 (1:1). Levandovski, 59 (2:1)
«Barselona»: Shensni, Arauxo, Kristensen, Martin (Garsiya, 78), Kunde, Pedri (Kasado, 90+5), de Yong, Fernandes (Olmo, 46), Reshford (Torres, 78), Bardji (Yamal, 58), Levandovski
«Real Sosedad»: Remiro, Subeldiya, Chaleta-Tsar, Ayyen Munos, Odriosola (Gomes, 57), Gorrotchategi, Turrentes (Soler, 67), Marin (Mendes, 67), Barrenechea (Sodiq, 81), Gonsalu Gedesh (Kubo, 57), Oyyarsabal
Ogohlantirishlar: Kunde, 82 – Subeldiya, 17. Chaleta-Tsar, 90
Yoxan Kroyf nomidagi mitti stadionida «Barselona» ikki o‘yinda to‘qqiz gol urgandi, Olimpiyskiy stadioniga qaytib esa muammolarga uchradi. Aniqrog‘i, kataloniyaliklar uchun asosiy muammolarni «Real Sosedad» darvozaboni Remiro tug‘dirdi. Dastlabki 45 daqiqalikda uning kamida ikkita seyvi (Reshfordning zarbasini qaytarishi va o‘z himoyachilari orqali kelgan to‘pga ulgurishi) mo‘jizaga teng harakatlar edi. O‘z navbatida, mehmonlarning hujumda ham omadi keldi. Hisobni ochgan Odriosola shu kuni maydonga tushmasligi ham mumkin edi, ammo Aramburuning jarohati unga imkoniyat yaratdi. Qolaversa, ushbu lateral qadrdon klubidagi ilk golini 29 yoshiga kelib urdi.
Ammo tanaffus arafasida Reshford navbatdagi marta golli harakat amalga oshirib (qatorasiga to‘rtinchi o‘yinda o‘z hisobiga assist yozib qo‘ymoqda), burchakdan oshirgan to‘pi bilan Kunde hisobni tenglashtirishiga yordam berdi. Bu bilan klubning o‘tgan asr 40-yillaridagi rekordi takrorlandi, «Barsa» o‘shanda ham qatorasiga 44 ta rasmiy uchrashuvda maydonni golsiz tark etmagandi. Bu rekordni yangi hafta o‘rtasida YeChL doirasida «PSJ»ga qarshi o‘yinda yangilash ham mumkin, bu o‘yin arafasida Yamal sog‘ayib safga qaytgani esa ayni muddao bo‘ldi. U 58-daqiqada zaxira o‘rindig‘idan ko‘tarilganida stadiondagilar shovqin ko‘tarishdi, bir daqiqa o‘tib esa uni chinakamiga olqishlashdi. Yamal yana bir bor o‘z uslubida yurish amalga oshirib, Levandovskining g‘alaba goliga assistentlik qildi.
O‘yin taqdirini hal qilgan kataloniyaliklar yulduziga 1 daqiqayu 1 soniya yetarli bo‘ldi. U o‘z hisobiga gol yozib qo‘yishi ham mumkin edi, ammo uning goli ofsayd holati tufayli ishg‘ol etildi. Qolgan vaqt davomida ikki jamoada ham yana gol urish uchun yetarlicha imkoniyatlar bo‘ldi, ammo mehmonlar safida Oyyarsabal qaror qabul qilishda kechikdi va zarbasi to‘sin yuqorisidan o‘tib ketdi, Kuboning zarbalaridan keyin esa to‘p to‘singa bordi. O‘z navbatida, Levandovski darvozabon hududida turib to‘pni darvoza to‘riga to‘g‘ri yo‘naltira olmadi. Yakunda minimal hisob saqlanib qoldi va «Barsa» turnir jadvalida «Real»ni quvib o‘tib, birinchi o‘ringa ko‘tarildi.
Italiya: Gasperini effekti
«Roma» – «Verona» 2:0
Gollar: Dovbik, 7 (1:0). Soule, 79 (2:0)
«Roma»: Svilar, Manchini, N`Dika (Tsiolkovski, 71), Zeki Chelik, Kristante, Kone, Anxelinio (Tsimikas, 59), Uesli Vinisius (Ermoso, 59), Pellegrini, Dovbik (Fergyuson, 59), Soule (Al-Sha’roviy, 82)
«Verona»: Montipo, Nelsson, Frese, Nunes (Bella-Kotchap, 84), Serdar, Akpa-Akpro (Galyardini, 46), Berned (Kastanos, 90), Bradarich (Cham, 84), Belgali, Orban, Jovane (Sarr, 74)
Ogohlantirishlar: Akpa-Akpro, 12. Nunes, 45. Galyardini, 53. Belgali, 90
«Roma» «Yuventus» ochko yo‘qotishidan foydalandi va turnir jadvalida turinliklarni quvib o‘tdi. Jan Piyero Gasperini jamoasi o‘tgan turda byakonerilardan ochko tortib olgan «Verona»ga (1:1) imkon qoldirmadi. Joriy mavsumda chempionat o‘yinida ilk bor boshlang‘ich tarkibda tushgan Dovbik Chelikning uzatmasidan tezkor gol bilan hisobni ochdi. Ikkinchi bo‘limda esa Soule hisobni mustahkamladi. Jan Piyero Gasperini effekti yaqqol ko‘rinmoqda — rimliklar mavsum startidagi besh turda atigi bir gol o‘tkazishdi. «Roma» tarixida bunaqasi faqat uch marta (1992, 2013 va 2014 yillarda) kuzatilgan.
«Milan» – «Napoli» 2:1
Gollar: Salemakers, 3 (1:0). Pulishich, 31 (2:0). De Breyne, 60 – penalti (2:1)
«Milan»: Menyan, Gabbia, Pavlovich, Tomori (de Vinter, 80), Rabo, Modrich, Fofana (Loftus-Chik, 80), Estupinyan, Salemakers (Atekame, 68), Ximenes (Leau, 69), Pulishich (Bartesagi, 59)
«Napoli»: Meret, Juan Jyezus, Marianuchchi, Guterres, Di Lorenso, Lobotka (Gilmor, 90+3), De Breyne (Elmas, 72), Zambo Angissa, Maktominay (Neres, 73), Politano (Lang, 77), Hoylund (Lukka, 73)
Ogohlantirish: Rabio, 90
Chetlatish: Estupinyan, 57
Massimiliano Allegri boshqaruvidagi «Milan» uchun birinchi jiddiy sinov muvaffaqiyatli o‘tdi. Shu bilan birga, hozirgi «Napoli» mudofaasida jiddiy muammolar mavjudligini ham rad etib bo‘lmaydi. Shu kuni Rraxmani, Buondjorno va Spinatssola maydonga tusha olmadi, ularning o‘rinbosarlari esa mavsumni o‘ta kuchli boshlagan Pulishichga qarshilik ko‘rsata olmadi. Amerikalik futbolchi avvaliga Salemakersni golli uzatma bilan ta’minladi. Keyin esa maydonning ikkinchi qismidan turib Fofanani yakkama-yakka vaziyatga chiqardi. Fransuz futbolchisining zarbasi yuqoridan o‘tib ketdi, ammo u keyinroq Pulishichga qarzini qaytarib, ikkinchi golga assistentlik qildi.
Kristian 2023 yilda A seriyada debyut qilganidan buyon 46 (27+19) samarali ball ishlagan, bu esa shu oraliqda turnirdagi eng yaxshi ko‘rsatkichdir. Ammo, amaldagi chempionlarga qarshi o‘yinda 2:0 hisobi ham hech narsani kafolatlay olmasdi. Ikkinchi bo‘limda «Milan» bir kishi kam bo‘lib qolganida, Pulishichni qurbon qilishga to‘g‘ri keldi. Bu epizodda arbitr nafaqat mezbonlar darvozasiga penalti qo‘ydi, balki jarima maydoni ichida Di Lorensoni yiqitgan Estupinyanga qizil kartochka ham ko‘rsatdi. 11 metrdan De Bryuyne aniq zarba berdi va o‘yinga intriga qaytdi.
Allegri minimal ustunlikni saqlab qolishga o‘ynamadi. «San-Siro»ga yig‘ilganlar olqishlari ostida maydonda Rafael Leau paydo bo‘ldi, u mavsum avvalida «Bari»ga qarshi o‘yinda olgan jarohati tufayli bir yarim oydan buyon o‘ynay olmayotgandi.
Rossonerilar shu kuni 40 yoshli Modrichning harakatlari evaziga g‘alabani saqlab qolishdi, u ikki marta darvoza to‘riga kirib ketayotgan to‘pni to‘sib qoldi. Bu natijadan keyin Allegri jamoasi ochkolari sonini 12 taga yetkazib, to‘plar nisbatiga ko‘ra birinchi o‘rinda joylashdi, hisobida shunchadan ochko bo‘lgan «Roma» va «Napoli» keyingi o‘rinlarda joylashgan, «Yuventus» (11) va «Inter» (9) ham uzoqda emas, A seriyaning yangi mavsumida ham chempionlik uchun shiddatli bahs ketishi tayin. Keyingi turda rossonerilar «Yuve» mehmoni bo‘ladi.
Fransiya: «Lion» «PSJ»ga yetib oldi
«Lill» – «Lion» 0:1
Gol: Morton, 13 (0:1)
«Lill»: Bodar, Ngoy, Tiagu Santush (Mbappe, 90+2), Verdonk, Mandi, Mukau (Bentaleb, 74), Buaddi (Igaman, 79), Haraldsson, Korreya (Saxraui, 74), Fernandes, Jiru
«Lion»: Greyf, Niakate, Mata, Talyafiko, Meytland-Nayls, Tessmann, Morton, Mera (Shuls, 75), Fofana, Karabets (Moreyra, 75), Tolisso
Ogohlantirishlar: Buaddi, 43. Mandi, 69. Fernandes, 86. Igaman, 87 – Talyafiko, 46. Fofana, 72. Moreyra, 76. Shuls, 83
Turning asosiy o‘yinida «Lill» va «Lion» kuchli uchlikdagi o‘rin uchun kurash olib bordi. O‘yindagi ikki vaziyat o‘yinning maqomidan dalolat beradi. Birinchidan, mezbonlar ustozi Bryuno Jyenezio qizil kartochka oldi. Ikkinchidan, o‘yinda 44 bor qoida buzildi, bu esa «Piyer Morua»dagi o‘yinni chempionatning 2020 yil fevralidan buyon eng qo‘pol o‘yiniga aylantirdi, o‘shanda «Nim» va «Dijon» jamoalari o‘yinida shunday ko‘rsatkich qayd etilgan. Ammo autsayderlar ishtirokidagi o‘yin boshqa, Fransiya chempionatida sovrinlar uchun kurashuvchi jamoalar o‘yini boshqa. Bu o‘yin taqdirini Talyafikoning uzatmasi va Mortonning boshda qarama-qarshi burchakka yo‘llagan zarbasi hal qildi. Qolaversa, «to‘quvchilar» darvozaboni Greyfning seyvlarini e’tirof etish kerak. Bu g‘alabadan keyin Paulu Fonseka shogirdlari faqat qo‘shimcha ko‘rsatkichlar tufayli «PSJ»dan keyingi ikkinchi o‘rinda joylashgan.
Turkiya superligasi: Shomurodovda navbatdagi gol
«Konyaspor» — «Bashakshehir» 2:1
Gollar: Ndao (16), Opoku (45+1, avtogol) — Shomurodov (57).
«Konyaspor» — Ertosh, Yazgili, Yevtovich, Demirbag, Anzuana, Ibrohimo‘g‘li (Chalushich, 82), Bardi, Gillerme, Ndao (Byorlo, 68), Muleka (Pedro, 65), Nayir.
«Bashakshehir» — Muhammad, Ebosele (Shahiner, 46), Ba, Opoku, Operi, Berat (Kalujinski, 64), Yusuf (Fayzullayev, 64), Harit (Turuch, 77), Krespo, Brnich (Da Koshta, 46), Shomurodov.
Ogohlantirishlar: Bardi (60), Yazgili (62).
Chetlatish: Bardi (65).
Turkiya chempionati 7-turida «Bashakshehir» safarda «Konyaspor» bilan bahs yuritib, mag‘lubiyatga uchradi. Mezbonlar safida O‘zbekiston milliy jamoasi hujumchisi Eldor Shomurodov asosiy tarkibda tushib, jamoasining yagona goliga mualliflik qildi. Bu Shomurodovning Turkiya chempionatidagi uchinchi goli bo‘ldi, lekin uning gollari jamoaga yordam bermayapti – istanbulliklar 6 o‘yinda 1 g‘alaba, 3 durang va 2 mag‘lubiyat qayd etib, 6 ochko 12-o‘rinda qoldi.