Jamiyat
Andijonda FVB inspektori 1800 dollar bilan ushlandi
Andijon viloyati Baliqchi tumanida Favqulodda vaziyatlar bo‘limi inspektori qarindoshni ishga kiritib qo‘yish va’dasi evaziga 1800 AQSh dollari talab qilgani aytilmoqda. U pulni olgan vaqtda tezkor tadbirda ashyoviy dalillar bilan ushlangan.
Andijon viloyati Baliqchi tumani Favqulodda vaziyatlar bo‘limi inspektori xizmat mavqeidan foydalanib, fuqaroning ishonchiga kirgan holda, mansabdor tanishlari orqali uning qarindoshini mazkur sohaga ishga kiritib qo‘yish evaziga 1800 AQSh dollari talab qilgan.
Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda inspektor so‘ralgan pul mablag‘ini tumandagi umumiy ovqatlanish shoxobchalaridan birida olgan vaqtida ashyoviy dalillar bilan ushlangan.
Hozirda unga nisbatan Jinoyat kodeksining 168-moddasi 3-qismi “v” bandi va 28, 211-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.