Sport
Alonso «Real»da. Endi kim o‘zgaradi – klub yoki murabbiy?
Klub yangi murabbiy uchun kerakli futbolchilarni olib beradimi? Murabbiy Leverkuzenda ish bergan uslublarini Madridda qo‘llashda davom etadimi?
Madridning «Real» klubi Habi Alonso bilan kelishuvni rasman e’lon qildi. Ispaniyalik murabbiy 2028 yilgacha jamoani boshqaradi va iyun oyida boshlanadigan klublar o‘rtasidagi jahon chempionatidayoq murabbiy sifatida rasman ishga kirishadi.
Iqtiboslar
«…Men uyga qaytdim. Bu klub bilan rishtalar hech qachon uzilmagan, Valdebebasga qaytishim bilan tuyg‘ular jonlandi»
«…Men bu yerga o‘z talablarim bilan emas, jamoa bo‘lib birga ishlash uchun keldim»
«…Istaymanki, odamlar bizning o‘yinimizga qarab, mana bu haqiqiy jamoa, deyishsin va zavq olish umidida stadionga oshiqishsin» (Habi Alonso)
«Sen 2018 yilda „Real“ning yoshlar tarkibini boshqarib yurgan paytingdayoq qayerga bo‘lishingni bilardik. Shu yerda. Bu sening taqdiring» (Florentino Peres)
Muqarrar voqea
Habi Alonso va «Real» yana topishishi vaqt masalasidek tuyulgandi va shunday bo‘ldi ham. Uning «Real» bilan umumiy o‘tmishi borligi har ikki tomon uchun masofani yaqinlashtirgani tabiiy – Habi «Bayyer» bilan kelishuvlarda agar o‘zi o‘ynagan klublardan taklif chiqsa, xayrixohlik qilinishini shart qilib qo‘ygan bo‘lsa, Florentino Peresning so‘zlarini yuqorida o‘qidingiz.
Peres 2018-19 yillar haqida gapirgan bo‘lsa, orada o‘tgan mana shu olti yil ichida «Real» ham, Alonso ham bu uchrashuv uchun kerakli qadamlarni tashladi, deyish mumkin. Habi Alonso Madriddan ketgach, uch yil «Sosiyedad»ning yoshlar jamoasini boshqargan bo‘lsa, 2022 yilda mavsum yarmida jar yoqasida turgan «Bayyer» boshqaruvini oldi. Qisqa vaqt ichida u leverkuzenliklarni avval peshqadamlardan biriga, keyin esa Bundesliga chempioniga aylantirdi. Aynan o‘sha chempionlik, ya’ni o‘tgan mavsumdan boshlab murabbiy Alonso haqida eng yuqori doiralarda gaplasha boshlashdi. «Liverpul», «Bavariya», «Real» va yana bir qator top-klublar Alonsoni taklif qilish uchun navbatga turdi. Mana shu Alonsoning «Real» tomon tashlagan qadamlari edi, zero futbolda shunaqa, eng zo‘r bo‘ldingizmi, sizni «Real» kutadi. Qisqasi, «Bayyer»da muvaffaqiyat qozonayotgan Habi Alonso «Real» uchun go‘yoki Chexov hikoyalaridagi devorda osig‘liq turgan miltiq edi va bu qachon otilishini, ya’ni murabbiy qachon Madridda paydo bo‘lishini kutish qolgandi, xolos.
«Real» esa o‘z navbatida tizimli futbolga qarshi kurashib charchadi. Boshqa top-klublar turli taktikalar, tizimlar ustida bosh qotirayotgan bir paytda «Real» eng sodda yo‘l bilan yil sayin eng muvaffaqiyatli klub sifatida namoyon bo‘lar, bu ham Madrid uchun qo‘shimcha unikallik yaratardi. Lekin so‘nggi mavsum bu qarash ham doim natija bermasligi ko‘rinib qoldi. «Real» shu paytgacha individual mahoratga, shuningdek ulardan hosil bo‘lgan Kroos – Modrich, Vinisius – Mbappe kabi bog‘lamlarga tayangan bo‘lsa, yildan yilga ketganlarni almashtirish qiyinlashib ketmoqda. Chunki Modrich ham, Kroos yoki Benzema ham o‘ziga yarasha unikal, ularning ketishi tabiiy ravishda jamoa o‘yinidan nimanidir yulib ketadi. Doim izlanishda bo‘lish, individual yulduzlarning o‘rnini bosishga urinish ham qimmat, ham doim ham o‘xshamaydi. O‘z-o‘zidan Florentino Peres soat kabi ishlaydigan va arzimas tuzatishlar bilan uzoq yillarga yarashi mumkin bo‘lgan tizimli jamoaga ehtiyoj seza boshladi.
Alonso esa buning uchun ideal nomzod. Ham o‘z tizimi va uslubi bilan tanilgan, ham natija ko‘rsatgan, shu bilan birga, tipaj sifatida ham ayni muddao – muxlislar yoqimtoyi, futbolchi sifatida katta tajribasi bor, deyarli hamma yulduzlar bilan birga to‘p surgan, ya’ni yangi avlod yulduzlari bilan qanday gaplashishni biladi.
Bundan tashqari, ayniqsa ilk mavsumlarda kerak bo‘ladigan fazilat – yetarli darajada moslashuvchan. U futbolchilik paytidayoq ham pragmatika qiroli Joze Mourinio, ham taktik Pep Gvardiola ostida to‘p surib, kerakli tahsillarni olgan.
3-4-3 – yangi «Real»mi?
Shu kunlarda hatto ba’zi jiddiy nashrlarda ham qandaydir xavotirli mulohazalar yangray boshladi. Bu Alonsoning taktik sxemasi bilan bog‘liq. Habi yosh murabbiy, katta futbolda faqat «Bayyer»dagi ikki yillik tajribasi bor va ahamiyatlisi, uning barcha yutuqlari 3-4-3 sxemasi bilan bog‘liq. Shundoq ham ma’lum bir taktik qoliplarga o‘rganmagan «Real» futbolchilari uchun endi yanada murakkabroq davr kelmoqdami? Ayniqsa, Ruben Amorimning «MYu»dagi muammolari vaziyatni yanada muhim masalaga aylantiradi, zero to‘rt himoyachi bilan o‘ynayotgan jamoaning qisqa fursatda uch himoyachiga o‘tishi ancha og‘riqli jarayon deb aytilmoqda.
Keling, «Real» tarkibini ko‘rib chiqamiz va mabodo Alonso o‘zining eng yaxshi bilgan uslubini qo‘llamoqchi bo‘lsa, qanday muammolar paydo bo‘lishi mumkinligini taxmin qilamiz.
Markaziy himoya: Menimcha, uch markaziy himoyachi «Real»da bemalol topiladi. Alaba, Ryudiger kabi futbolchilar biroz oldinga chiqib o‘ynay olishi hatto 3-4-3 «Real» himoyasi uchun yanada mosroq degan xulosaga olib kelishi ham mumkin.
Qanot futbolchilari: Bu birinchi muammo. Ham hujumda, ham himoyada birdek foydali harakat qiladigan futbolchilar kerak. Bu sxemada qanot futbolchilari markazlashib emas, maydonni kengaytirishi, ya’ni yanada qanotda o‘ynashini e’tiborga olsak, Valverde va Kamavingadan hozirgidek foydalanish qiyinlashib ketadi.
Tayanch zona. To‘p uchun kurashadigan va yaxshi pasga ega bo‘lgan futbolchilar kerak. Menimcha, Sebalios, Valverde, Bellinhem, Kamavinga, Tchuameni kabilar bilan eng komplektlashgan pozitsiya.
Hujumkor yarimhimoyachilar. Odatda «Bayyer»da yaqqol hujumchi ortida ikki nafar «o‘nlik»lar to‘p suradi. Virs masalan bu sxema uchun ideal futbolchi. Nafaqat tezkor va dribling bilan o‘zi gol uradigan, balki o‘tkir paslarga usta, o‘yinni boshqarish xususiyati bo‘lishi lozim. «Real»da uchlikda to‘p suradigan na Vini, na Rodri, na Dias to‘liq bu profilga tushadi. Ikki «o‘nlik»dan boshqacharog‘i sifatida o‘ynashlari mumkin, ammo ikkinchi futbolchi uchun albatta kerakli tipaj kerak. Hozirgi tarkibdan faqat Arda Gulerdan kerakli futbolchi yasash mumkin. Ammo Guler qanchalik tayyor, bu mavsum javob bermadi.
Hujumchi. Bu tizimdayam Kilian Mbappe har qanday hujumchidan foydaliroq bo‘lishiga ishonish mumkin. Ammo bir muhim jihat bor. Bu sistemada hujumchi doim kerakli paytda jarima maydonida ochilishi, doim yakunlash uchun tayyor turishi lozim. Ortga qaytib, kombinatsiyalarda ishtirok etish talab etilmaydi. Agar Alonso tizimi Mbappega har o‘yinda 3-4 vaziyat yaratib berishga qodir bo‘lsa, ya’ni Mbappe har o‘yinda 1-2 gol urib tursa, mana shu statistika uchun ham u berilgan rolga rozi bo‘lishi, dribling yoki chiroyli gollar ketidan quvmasligi mumkin. Masalan, kechki Ronaldu tezligi va driblingni yo‘qotgach, moslashib, yaqqol hujumchiga aylangan. Avvalgidek «rohatlanib o‘ynamagan» bo‘lsa-da, gollar soni kompensatsiya bo‘lib xizmat qilgan. Yoki Manchesterga kelgan Erling Holandni olaylik. Bir safar u butun o‘yin davomida 9 marta to‘pga tegib, 3 gol urgandi. Agar Mbappe futbol o‘ynash emas, gol urishga rozi bo‘lsa, bemalol mashinaga aylanishi mumkin.
Demak, «Real» yoz bo‘yi tranfer bozorida faol bo‘lishi, kamida qanotga ikki futbolchi, shuningdek, kamida bir nafar hujumkor yarimhimoyachi sotib olishi shart bo‘ladi.
Habi Alonso aslida ancha moslashuvchan murabbiy ekani, uning asosiy yutug‘i mavjud ijrochilardan kelib chiqib tizim yaratishi ko‘p bor aytilmoqda. Ammo uning bu borada Anchelotti kabi tajribali emasligini ham tan olish kerak. Ha, «Bayyer»da u aynan o‘sha paytdagi tarkibdan kelib chiqib 3-4-3 sxemasini tanlagan bo‘lishi mumkin, ba’zi katta o‘yinlarda 4 himoyachi bilan ham muvaffaqiyatli to‘p surgani («Bavariya», «Borussiya», «Inter»ga qarshi) ham fakt, ammo aynan top-murabbiy sifatida uzoq muddatli muvaffaqiyatlar hozircha baribir 3-4-3 bilan bog‘liq va agar Alonso boshqa shartlar va sxemada ham o‘zini ko‘rsatishi ehtimol bor, lekin bu haqida hozircha aniq bilmaymiz.
Transferlar
«Real»da Habi Alonso kelishi bilan o‘zgarayotgan yana bir jihat transfer siyosatidir. Shu paytgacha Florentino Peres o‘zi istaganini, «Real» imiji va moliyaviy daromadlari uchun xizmat qiladigan har qanday futbolchini sotib olar va uni tarkibga moslashtirish, qay tariqa foydalanish butunlay murabbiyning zimmasidagi ish bo‘lib qolardi. Shuning uchun ham aytaylik, Kamavinga, Tchuameni kabi futbolchilar ancha iste’dodli bo‘lishsa-da, «Real»da odatiy o‘rniga ega bo‘lishmadi, asosan kemtik nuqtalarni yopish bilan shug‘ullanib kelishdi.
Katta ehtimol bilan, Alonso bunga ko‘nmaydi. Yosh murabbiy o‘z tizimi ishlashi uchun ma’lum profildagi futbolchilarga ehtiyoj sezadi va rahbariyatdan ularni olib berishni so‘rashi tabiiy. Muzokaralarda ham bu yetarlicha kelishib olingani shubhasiz.
Habi Alonsoning Madriddagi ilk transferi Din Hausen bo‘lmoqda. Ispaniyalik 20 yoshli markaziy himoyachi APL kashfiyotlaridan biri bo‘ldi. To‘pni yaxshi nazorat qila oladi, maydonni ko‘rish va turli masofalarga to‘pni yetkazib berish xususiyati top-darajada. Hujumlarni boshlashda va odatda uzoq davom etadigan «alonsocha» bild-aplarda asosiy figuralardan biri bo‘lishi shubhasiz.
Ikkinchi transfer ham aynan himoya chizig‘iga – Trent Aleksandr-Arnold. Bu futbolchini ortiqcha tanishtirish shart emas. Portugaliya kubogi finalidan so‘ng esa «Real» chap qanot uchun «Benfika» bilan Alvaro Karreras bilan muzokalarni boshladi. 22 yoshli futbolchi aslida Madrid tarbiyalanuvchisi hisoblanadi, 2017-20 yillarda «Kastilya»da shug‘ullanib, keyinchalik Manchester akademiyasiga yo‘l olgan.
«Real» ko‘rib chiqayotgan yana bir futbolchi – Anjyelo Shtiller. 24 yoshli markaziy yarimhimoyachi bir necha yildan beri top-klublar ko‘z ostida. «Shtutgart» tarkibida bu mavsum nafaqat Bundesligada, balki kuchli beshlik chempionatlarida ko‘p ko‘rsatkichlar bo‘yicha eng yaxshilardan bo‘ldi. Aytishlaricha, Shtillerni jamoaga Toni Kroos tavsiya qilgan.
«Arsenal» bilan deyarli kelishuvga erishgani aytilayotgan Martin Subimendi uchun ham «Real» kurashib ko‘rishi mumkin ekan. Habi Alonso o‘z vaqtida Subimendini «Sosiyedad» yoshlar jamoasidan asosiy tarkibga uchirma qilganini unutmasligimiz kerak.
E’tibor bersangiz, bu nomlar asosan to‘pni nazorat qilishga usta bo‘lgan va elit darajada uzatmalarni amalga oshiradigan ijrochilar. Ayniqsa, Trent, Hausen va Shtiller. Shu bilan birga jismoniy tomondan, katta zonalarni yopish, yakkakurashlar borasida muammolar bo‘ladi. Xuddi Kroosni Kazemiro, Bellinghemni Valverde doim qo‘llagani singari, mazkur futbolchilar uchun ham o‘ziga yarasha mos tizim va kerakli sharoitlar juda muhim hisoblanadi. Habi Alonso o‘z sistemasini qurishda Tchuameni, Valverde kabi mehnatkash futbolchilarning ahamiyati ham katta bo‘lishini hozirdan taxmin qilish mumkin.
Bundan tashqari, ma’lum bo‘lishicha, Habi Alonso «Komo»da ijarada to‘p surgan «Real» tarbiyalanuvchisi Niko Pasni jamoaga qaytarish tarafdori ekan. Italiyaliklar Nikodan rozi va ijara muddatini yana bir yilga cho‘zishni so‘rayotgan bo‘lishsa-da, murabbiy jamoani tark etgan Luka Modrichning o‘rnida Niko Pasdan foydalanmoqchi. Umuman, Habi qayerda ishlamasin, yoshlarga ko‘proq e’tibor qaratadi va tarkibga faol tarzda jalb qilib keladi. Bu jihatdan Endrik, Guler kabi yetarlicha imkoniyatga ega bo‘lmayotgan yoshlar uchun ham ayni muddao.
Shuningdek, matbuot anjumanida Alonso kelajak haqida juda ko‘p to‘xtaldi va jumladan, Bellinghem jamoada asosiy figuralardan biri bo‘lib qolishi, Vinisius va Mbappening juftlikda to‘p surishi muammo emasligi, shuningdek, Rodrigo hech qayerga ketmasligi haqidagi mulohazalari bilan o‘rtoqlashdi.
Xulosa
Har qancha taxmin bildirilmasin, «Real»ning kuchayishi yoki ortga qaytishi haqida turlicha fikrlar yangramasin, jamoa yangi mavsumda boshqacha bo‘ladi. Ayniqsa, Alonsoning dinamik futbolga tayanishi, faol pressing va to‘p nazorati o‘rtasidagi muvozanat jihatidan Flik, Slot kabi murabbiylarga yaqin ekani hammaga ma’lum va Alonso Madridda ham bu asosiy prinsiplaridan voz kechmaydi. Axir u Madridga ulardan voz kechish uchun emas, o‘z g‘oyalarini kattaroq maydonda, kattaroq futbolchilar bilan namoyish qilish uchun kelyapti.
Demak, futbol uchun bu ajoyib yangilik. Chempionlar Ligasida endi kim yutadi, klasikolar taqdiri qanday o‘zgaradi, buni aytish qiyin-u, lekin bir narsa aniq – endi hammasi yanada qiziqroq bo‘ladi.
Ozarbayjonlik tadbirkor va xonanda Emin Agalarovga tegishli Sea Breeze Resort & Residences kompaniyasi Isroilning Premer-ligada ishtirok etuvchi «Makkabi Netaniya» futbol klubining bosh homiysi hisoblanadi.
Isroil nashrlari ma’lumotiga ko‘ra, klub bilan imzolangan homiylik shartnomasi qiymati yiliga 2,5 million isroil shekelini, ya’ni taxminan 850–860 ming AQSh dollarini tashkil etadi. Ushbu kelishuv so‘nggi yillarda klub tarixidagi eng yirik tijorat shartnomalaridan biri sifatida baholanmoqda. Kelishuvga muvofiq, Sea Breeze logotipi jamoa futbolchilari formasining old qismiga joylashtirilgan.
«Makkabi Netaniya» rahbariyati mazkur hamkorlik klubning xalqaro aloqalarini kengaytirish va uzoq muddatli rivojlanish strategiyasining muhim qismi ekanini ta’kidlagan.
Avvalroq Emin Agalarov intervyularidan birida Bokudagi Sea Breeze kurort majmuasida sotilgan 600 ta kvartiraning 400 tasini Isroil fuqarolari xarid qilganini aytgan. Uning so‘zlariga ko‘ra, bu loyiha bilan hamkorlik qiluvchi kompaniyalardan biri Isroil kompaniyasi bo‘lgani sababli isroillik xaridorlar ulushi yuqori bo‘lgan.
Eslatib o‘tamiz, Emin Agalarovga qarashli Agalarov Development kompaniyasi O‘zbekistonda ham yirik investitsiya loyihasini amalga oshirmoqda. Kompaniya Toshkent viloyati Bo‘stonliq tumanidagi Chorvoq suv ombori sohilida Sea Breeze Uzbekistan umummavsumiy kurort majmuasini barpo etmoqda. Loyiha doirasida mehmonxonalar, villalar, turar joylar va turistik infratuzilma qurilishi rejalashtirilgan.
Sport
Irqchilik ayblovlari va persona non grataga aylangan amaldor. Fransuzlar yana mojaro markazida
Bu safargi mundial – haqoratlash bo‘yicha jahon chempionatiga aylandi.
Fransiya milliy jamoasi bu safargi jahon chempionatida nafaqat maydonda, balki siyosiy arenada ham jang qilishiga to‘g‘ri kelmoqda. Paragvaylik senator Selesta Amarilya ortidan argentinalik siyosatchi Ebe Kasado bilan ham yana bir ziddiyat yuzaga keldi – u Dide Desham shogirdlarini «tarbiyasiz afrikaliklar jamoasi» deb atadi va darhol persona non grata maqomini oldi.
Ispaniyaning sobiq bosh vaziri Mariano Raxoy ham tinch turgani yo‘q, u «Uchranglilar» jamoasida fransuzlar yo‘qligiga urg‘u qaratgan.
Ispaniyadagi keys
Shu kunlarda Ispaniyadagilarning xayoli JCh-2026 yarimfinalida Fransiyaga qarshi kechadigan o‘yinda. Mamlakat sobiq bosh vaziri Mariano Raxoydan ham «Qizil furiya»ning ushbu o‘yindagi imkoniyatlari haqida so‘rashgan. U esa Desham jamoasini maqtadi, ammo «tilidan ilindi».
«Ular bu jahon chempionatida barcha o‘yinlarida g‘alaba qozonmoqda va FIFA reytingida birinchi o‘rinda joylashgan. Ularning tarkibidagi futbolchilar ham juda yuqori darajada. Shu bilan birga, ularning safida birorta fransuz futbolchisi yo‘q. Ular esa juda yaxshi o‘ynashmoqda va dahshatli raqib bo‘lishadi», – degan Raxoy RMC Sport nashriga.
Fransiyaning Ispaniyadagi elchixonasi sobiq bosh vazirning so‘zlarini e’tiborsiz qoldirmadi. Elchixonadagilar Mariano nohaq ekanini isbotlashga qaror qilishdi.
«Bahslashishni istamaymiz, ammo faktlarni eslatib o‘tish joiz. Jamoamizning barcha futbolchilari – fransuzlar. 26 futbolchidan 23 nafari mamlakat hududida tug‘ilgan. Fransiyadan tashqarida dunyoga kelgan uch nafari ham bizning fuqarolarimiz hisoblanadi», – deyiladi elchixona bayonotida.
Ispaniya bosh vaziri Pedro Sanches bu borada munosabat bildirib, ayrimlar hali ham insonning mamlakatga mansubligini familiyasi, tug‘ilgan joyi yoki teri rangi bilan baholashini, boshqalar esa uning mamlakatga sadoqati va uning taraqqiyotiga qo‘shgan hissasi bilan o‘lchashini ta’kidladi.
«Ispaniya uni sevadigan va uning ravnaqi uchun mehnat qiladigan barchaga tegishli. Ksenofobik bayonotlar bilan mamlakat obro‘siga putur yetkazadiganlarga emas. Fransiya, yarimfinalda ko‘rishamiz. Kuchli jamoa g‘alaba qozonsin, irqchilik esa mag‘lub bo‘lsin», – deya yozdi Sanches.
Ispaniya transport vaziri Oskar Puente ham Raxoyning fikrlarini qattiq qoraladi. U sobiq bosh vazirni Fransisko Franko diktaturasi davri g‘oyalariga moyillikda ayblab, keskin tanqid qildi.
Argentinalik mulozim ayol Mbappega qarshi
Barchasi fransuzlarning jahon chempionati 1/8 finalida Paragvay ustidan g‘alaba qozonishi (1:0) ortidan boshlangandi. O‘sha uchrashuv janubiy amerikaliklarning qasddan qo‘pol o‘ynashi bilan yodda qolgandi, ammo ushbu mintaqadagi siyosatchilar Yevropa jamoasiga nafratini sochish bilan mashg‘ul bo‘lmoqda.
Argentinaning Mendosa provinsiyasi vitse-gubernatori Ebe Kasado ham bu borada yaqqol ajralib turibdi. O‘yin yakunlanishi bilan u paragvayliklarni maqtashga qaror qildi, ammo buni juda g‘alati tarzda ifodaladi.
«Barakalla, Paragvay. Afrikaliklar jamoasi o‘zini juda tarbiyasiz tutdi. Mbappega toqat qila olmayman», – deya yozgan Kasado X ijtimoiy tarmog‘ida.
Bu bayonoti keng tarqalib ketganidan keyin ham ushbu siyosatchi o‘z so‘zlari uchun uzr so‘ramasligini bildirdi. «To‘g‘risini aytsam, bu izohda irqchilik ko‘rmayapman. Agar kimdir uni shunday qabul qilsa, demak, u afrikaliklarni noto‘liq deb hisoblaydi. Kimnidir afrikalik deb atashni – haqorat deb hisoblovchilar diskriminatsiya bilan shug‘ullanayotgan bo‘ladi», – deya javob qaytargan ushbu amaldor.
Bunga javoban Kasado persona non grata deb e’lon qildi: endi u o‘z so‘zlarini qaytarib olmagunicha, Fransiya elchixonasiga tashrif buyurishi va mamlakat rasmiylari bilan tadbirlarda qatnashishi mumkin emas.
«Irqchilik – bu fikr emas, jinoyat. Unga bizning elchixonamizda joy yo‘q», – deya qayd etgan Fransiyaning Argentinadagi elchisi Romen Nadal.
Paragvaydagi mojaro
Paragvaylik senator Selesta Amarilya bilan bo‘lgan voqea eng shov-shuvlisi bo‘lgandi. JCh 1/8 finalidagi o‘sha o‘yindan keyin u Mbappeni «o‘zini zo‘r berib fransuzdek ko‘rsatishga urinadigan, aslida mustamlakadan chiqqan kamerunlik» deb atagandi.
Bu so‘zlar Kiliangacha yetib bordi va u javob qaytarishga qaror qildi. «Siz o‘z lavozimingizga noloyiq bo‘lgan jirkanch ayolsiz», – degandi futbolchi.
Shundan keyin Selesta Kilianning o‘zini «gender zo‘ravonlik»da aybladi va sudga berish bilan tahdid qildi. Lekin senatorni vatanida ham qo‘llab-quvvatlashmadi.
Avvaliga uning bayonoti Paragvay hukumati tomonidan qoralandi. Ko‘p o‘tmay bu ish rasmiy rezolyutsiya bilan mustahkamlandi. Le Parisien ma’lumotiga ko‘ra, senatorni irqchilikda ayblash to‘g‘risidagi qaror parlament yuqori palatasida deyarli besh soatlik muhokamalardan so‘ng qabul qilingan. Yakuniy hujjatda Senat kamsitishning har qanday shaklini «mutlaqo rad etishi» bildirilgan.
Ispaniyaning sobiq bosh vaziri Mariano Raxoy futbol bo‘yicha jahon chempionatida ishtirok etayotgan Fransiya milliy jamoasi haqida bildirgan fikrlari ortidan irqchilik va ksenofobiyada ayblanmoqda. Uning «Fransiya jamoasida birorta ham fransuz futbolchisi yo‘q», degan gaplari Ispaniya va Fransiya siyosatchilari hamda jamoatchilik tomonidan keskin tanqid qilindi.
Ma’lum qilinishicha, mojaroga Raxoyning 10 iyul kuni Ispaniyaning El Debate internet nashrida e’lon qilingan maqolasi sabab bo‘lgan. Unda sobiq hukumat rahbari futbol bo‘yicha Jahon chempionati-2026 haqida fikr yuritar ekan, 14 iyul kuni yarimfinalda Ispaniyaning raqibi bo‘ladigan Fransiya jamoasini kuchli raqib sifatida baholagan. Biroq shu bilan birga, jamoada «birorta ham fransuz futbolchisi yo‘q» degan bahsli fikrni ham ilgari surgan.
Bu bayonotga birinchi bo‘lib Ispaniya bosh vaziri Pedro Sanches munosabat bildirdi. U ijtimoiy tarmoqda ayrimlar hali ham insonning mamlakatga mansubligini familiyasi, tug‘ilgan joyi yoki teri rangi bilan baholashini, boshqalar esa uning mamlakatga sadoqati va uning taraqqiyotiga qo‘shgan hissasi bilan o‘lchashini ta’kidladi.
«Ispaniya uni sevadigan va uning ravnaqi uchun mehnat qiladigan barchaga tegishli. Ksenofobik bayonotlar bilan mamlakat obro‘siga putur yetkazadiganlarga emas. Fransiya, yarimfinalda ko‘rishamiz. Kuchli jamoa g‘alaba qozonsin, irqchilik esa mag‘lub bo‘lsin», — deya yozdi Sanches.
Ispaniya transport vaziri Oskar Puente ham Raxoyning fikrlarini qattiq qoraladi. U sobiq bosh vazirni Fransisko Franko diktaturasi davri g‘oyalariga moyillikda ayblab, keskin tanqid qildi.
Raxoyning bayonoti Fransiyada ham keng muhokamalarga sabab bo‘ldi. Mamlakat ichki ishlar vaziri Loran Nunes BFMTV telekanaliga bergan intervyusida bu so‘zlarni «mutlaqo qabul qilib bo‘lmaydigan» bayonot deb baholadi.
Fransiyaning dengizorti hududlari bo‘yicha vaziri Naima Muchu esa ushbu fikrlarni Fransiyaga va mamlakat ifodalaydigan qadriyatlarga qarshi yo‘naltirilgan nafratning yana bir ko‘rinishi sifatida baholadi.
Fransiyaning Madriddagi elchixonasi ham ijtimoiy tarmoqlarda rasmiy munosabat bildirdi. Unda Fransiya milliy jamoasining barcha futbolchilari Fransiya fuqarolari ekani ta’kidlandi. Qayd etilishicha, jamoaning 26 nafar futbolchisidan 23 nafari Fransiya hududida tug‘ilgan, xorijda tug‘ilgan uch nafar futbolchi ham Fransiya fuqaroligiga ega.
Mazkur voqea Yevropa jamoatchiligida milliy mansublik, fuqarolik va ko‘p millatli jamiyatlar haqidagi bahslarni yana bir bor kun tartibiga olib chiqdi.
Germaniyalik tennischi Aleksandr Zverev Uimbldon–2026 turniri finalida jahonning birinchi raqami, italiyalik Yannik Sinnerga mag‘lub bo‘ldi. Bu Zverevning «Katta dubulg‘a» turnirlari finallaridagi to‘rtinchi mag‘lubiyati bo‘ldi.
Uimbldonning erkaklar o‘rtasidagi hal qiluvchi bahsi 12 iyul kuni Londonda bo‘lib o‘tdi. To‘rt set davom etgan uchrashuvda Yannik Sinner g‘alaba qozonib, o‘z faoliyatidagi ikkinchi ketma-ket Uimbldon chempionligini qo‘lga kiritdi.
Final keskin va murosasiz kurash ostida o‘tdi. Ilk ikki setda har ikki tennischi ishonchli harakat qildi. Birinchi set taqdirini hal qilgan tay-breykda Zverev ustun kelgan bo‘lsa, ikkinchi setda xuddi shunday vaziyatda Sinner muvaffaqiyat qozondi.
Uchinchi set o‘rtasida Aleksandr Zverev maysali qoplamada yiqilib, tizzasini shikastlab oldi. Shundan so‘ng u muhim ochkoni boy berdi va raqibiga breyk qilish imkonini taqdim etdi. Natijada set 3:6 hisobida Sinner foydasiga hal bo‘ldi.
To‘rtinchi setda ham italiyalik tennischi hal qiluvchi breykni amalga oshirib, 6:4 hisobida ustun keldi va chempionlikni qo‘lga kiritdi. Bu Sinnerning faoliyatidagi beshinchi «Katta dubulg‘a» sovrini bo‘ldi. Shu vaqtgacha u yirik turnirlar finalida atigi ikki marta mag‘lubiyatga uchragan.
Ushbu uchrashuvdan keyin Sinner va Zverevning «Katta dubulg‘a» turnirlaridagi o‘zaro hisobida italiyalikning ustunligi 4:2 ko‘rinishiga keldi. 2025 yilda Avstraliya ochiq chempionati finalida ham Sinner Zverevni mag‘lub etgan edi.
29 yoshli Aleksandr Zverev o‘z faoliyatida beshinchi marta «Katta dubulg‘a» turniri finalida maydonga tushdi. Biroq u shularning to‘rttasida mag‘lub bo‘ldi. Bundan avval u 2020 yilda US Open finalida avstriyalik Dominik Timga, 2024 yilda esa «Rolan Garros» finalida ispaniyalik Karlos Alkarasga yutqazgan edi.
Shunga qaramay, Zverev jahon reytingida uchinchi o‘rinni saqlab qolmoqda. Uning Karlos Alkaras bilan ochkolar bo‘yicha farqi katta emas. Uimbldon yakunlari bo‘yicha e’lon qilingan vaqtinchalik reytingda esa germaniyalik tennischi ikkinchi o‘ringa ko‘tarilgan.
Zverev joriy yil iyun oyida Parijdagi «Rolan Garros» turnirida g‘olib chiqib, so‘nggi 30 yil ichida Germaniyaga «Katta dubulg‘a» chempionligini keltirgan ilk tennischiga aylangan edi. Ungacha bu natijaga 1996 yilda afsonaviy tennischi Boris Bekker erishgan.
Shuningdek, Aleksandr Zverev Germaniya tarixida «Katta dubulg‘a»ning barcha to‘rt turniri finaliga chiqqan yagona tennischi hisoblanadi.
Ayollar o‘rtasidagi Uimbldon–2026 finalida esa chexiyalik Linda Noskova o‘z hamyurti Karolina Muxovani mag‘lub etib, chempionlikni qo‘lga kiritdi.
U «har bir mamlakat orzu qilish imkoniyatiga ega bo‘lishi lozimligi»ni ta’kidlamoqda.
FIFA prezidenti Janni Infantino kelgusida jahon chempionati ishtirokchilari soni 64 tagacha kengaytirilishi mumkinligini istisno qilmayapti. U bu haqda AQSh, Meksika va Kanada yashil maydonlarida ilk bor 48 jamoa ishtirokida o‘tkazilayotgan turnir fonida ma’lum qildi.
Barcha uchun imkon
56 yoshli funksioner kelgusidagi rejalar haqidagi savollarga javob berish asnosida bunday g‘oyani ham «ko‘rib chiqish zarurligi»ni aytgan.
«48 ta jamoa ishtirokidagi turnir haqiqatan ham muvaffaqiyatli o‘tdi. Har bir jamoa yuqori saviyada o‘yin namoyish etdi. Barcha qit’alardan kelgan jamoalar gol urishdi va kamida bitta ochkoga ega bo‘lishdi. Afrikaning 10 ta jamoasidan to‘qqiztasi pley-offga chiqdi. So‘nggi jahon chempionatida Afrikaning atigi beshta vakili bor edi… Bu barcha jamoalarni jalb qilish – ularga ishtirok etish imkoniyatini berish qanchalik muhimligini yana bir bor tasdiqlaydi.
Bu, albatta, jahon chempionatidan keyin ko‘rib chiqiladigan masala. Turnirni tashkillashtirishda uni nafaqat Yevropa va Janubiy Amerika, balki butun dunyo uchun ochiq qilish muhimdir. Har bir mamlakat jahon chempionatida ishtirok etishni orzu qilish imkoniyatiga ega bo‘lishi kerak», – deya Infantino so‘zlarini keltiradi Blue Sport.
Jahon chempionati ishtirokchilari sonini 64 tagacha kengaytirish haqidagi muhokamalar 2025 yildayoq boshlangandi. O‘shanda turli darajadagi futbol funksionerlari, jumladan, KONMeBOL rahbari Alexandro Dominges o‘z konfederatsiyasining aprel oyidagi kongressida shunday g‘oya bilan chiqqandi. U yangi formatni FIFA turnirning 100 yilligini nishonlaydigan 2030 yilgi mundialda sinab ko‘rishni taklif etgandi. Infantino o‘shanda ushbu hamkasbini qo‘llab-quvvatlagandi.
«Har bir g‘oya – yaxshi g‘oya. Biz yuz yillikni qanday nishonlash haqida o‘ylashimiz lozim», – degandi shveysariyalik mulozim ESPN nashriga.
Ishonchdan qolish
Infantino anchada vaqtdan buyon turnirni kengaytirishni orzu qiladi, ammo u boshlangan ishni oxirigacha yetkaza olishi dargumon. Folarin Balogun bilan bog‘liq mojarodan keyin prezidentning FIFA ichidagi pozitsiyasi sezilarli daajada zaiflashgan.
Eslatib o‘tamiz, AQSh milliy jamoasi forvardi JCh 1/16 finalida Bosniya va Hersegovinaga qarshi o‘yinda (2:0) qizil kartochka olgandi, ammo uning diskvalifikatsiyasi kechiktirildi va keyingi bosqichda Belgiyaga qarshi o‘yinda maydonga tushdi. Keyinroq ma’lum bo‘lishicha, Balogunning jazosini shartliga almashtirishni Infantinodan Amerika prezidenti Donald Tramp iltimos qilgan.
Ushbu yangilik turli futbol assotsiatsiyalari va futbol nashrlari tomonidan keskin tanqid qilindi. The Times nashri xabariga ko‘ra, Infantino tashkilot ichkarisida ham, o‘zi hamkorlik qiladigan mamlakatlarda ham ishonchni yo‘qotgan.
«Futbolga Trampnikidan ko‘ra kattaroq siyosiy aralashuv bo‘lmaydi, FIFAning tushuntirish berishga urinishlari esa bema’ni chiqdi», – degan yuqori martabali manbalardan biri ushbu nashrga.
Janni Infantinoning o‘zi qandaydir qoidabuzarlikka yo‘l qo‘yganini tan olmayapti, ammo uning obro‘siga jiddiy putur yetdi. Nashr ma’lumotiga ko‘ra, u 2027 yilgi saylovga ham o‘z nomzodini qo‘yishni rejalashtirmoqda. Ammo, katta ehtimol bilan, u bu safar jiddiy raqobatga duch keladi – allaqachon unga muqobil nomzod tayyorlash imkoniyati muhokama qilinmoqda.
Ishtirokchilar soni kengaytirilmagan taqdirda ham, 2030 yilgi jahon chempionati tarixdagi eng keng ko‘lamlisi bo‘lishi tayin: turnirni bir vaqtda uchta qit’adagi 6 mamlakat qabul qiladi – Janubiy Amerika (Urugvay, Argentina, Paragvay), Yevropa (Ispaniya, Portugaliya) va Afrike (Marokash). Ishtirokchilar soni yanada ko‘payishi turnirni misli ko‘rilmagan darajaga olib chiqadi, ammo uning amalga oshishi fakt emas.
Andijonda 5 qavatli uy tomida yong‘in sodir bo‘ldi
Farg‘onada menejer 1,7 mlrd so‘mlik ko‘mirni o‘zlashtirgani aniqlandi
Zangiotada soliqchi, Buvaydada muhandis pora bilan ushlandi
-
Iqtisodiyot5 days ago
O‘zbekistonda pensiya oluvchilar 4,4 mln nafardan oshdi
-
Jamiyat5 days agoSaida Mirziyoyeva yetakchi fransuz kompaniyalari vakillari bilan uchrashdi
-
Dunyodan5 days ago
Fransiya jangovar robot qo‘shinlarini sinovdan o‘tkazishni boshladi
-
Iqtisodiyot4 days agoO‘zbekistonning eng yirik savdo hamkorlari ma’lum bo‘ldi
-
Siyosat5 days agoSaida Mirziyoyeva Fransiyaning yirik kompaniyalari rahbarlari bilan uchrashdi
-
Sport2 days agoAngliya-Norvegiya bahsi boshlanish vaqti kechiktirilishi mumkin
-
Iqtisodiyot5 days agoBYD O‘zbekistonda tezkor quvvatlash stansiyalari tarmog‘ini quradi
-
Iqtisodiyot4 days ago
O‘zbekiston Quvaytga qishloq xo‘jaligi mahsulotlari eksportini qayta tikladi