Dunyodan
Agar AQSh Tayvanga qurol sotsa, Xitoy prezident Trampning Pekinga tashrifini bekor qilishi mumkin
Xitoy, agar Qo’shma Shtatlar Tayvanga keng ko’lamli qurol sotish rejalaridan voz kechmasa, prezident Trampning Pekinga tashrifini bekor qilish bilan tahdid qildi. Bu haqda Financial Times gazetasi tegishli shaxslarga tayanib xabar berdi.
Nashrning yozishicha, ayni damda AQSh Tayvanga yetkaziladigan yangi qurol paketi ustida ishlamoqda. Ushbu paketga Patriot havo mudofaa tizimi, NASAMS zenit-raketa tizimi va yana ikkita noma’lum turdagi qurol tizimlari kiradi. Paketning umumiy qiymati 20 milliard dollar atrofida bo’lishi mumkin.
Tayvanga qurol sotish masalasini Xitoy Xalq Respublikasi raisi Si Tszinpin 4 fevral kuni prezident Donald Tramp bilan telefon orqali muloqoti chogʻida koʻtargan.Xitoy Tashqi ishlar vazirligi maʼlumotlariga koʻra, rais Si Tszinpin AQSh tomonini Tayvan masalasida “juda ehtiyotkor pozitsiya” olishga chaqirgan va qurol-aslaha xayriya qilish Xitoy-AQSh munosabatlariga jiddiy putur yetkazishini taʼkidlagan.
Bundan tashqari, Tramp maʼmuriyati 2025-yil dekabr oyida Tayvanga 11 milliard dollarlik qurol-yarogʻ yetkazib berish rejasini eʼlon qildi. Ushbu paketga HIMARS oʻq otish tizimi, gaubitsalar, tankga qarshi raketalar va hujumchi dronlar kiradi. Bunga javoban Xitoy hukumati AQShning 20 mudofaa shirkatiga qarshi sanksiyalar joriy qildi.
Financial Times nashrining yozishicha, prezident Donald Trampning Xitoyga tashrifi aprel oyiga mo‘ljallangan, biroq hozircha rasman tasdiqlanmagan. Prezident Tramp Pekinga oxirgi marta 2017 yilda birinchi muddatining boshida tashrif buyurgan edi.