Iqtisodiyot va moliya vazirligi korxonalar uchun ijtimoiy soliq bo‘yicha imtiyozlarni bekor qilishni taklif etdi.

Ta’kidlanishicha, ayrim korxonalarda ijtimoiy soliq stavkasining 12 foizdan 1 foizgacha yoki 0 foizgacha pasaytirilishi pensiya sug‘urtasini moliyalashtirishda tenglik masalasini yuzaga keltirmoqda.

2025 yilda 65 mingta korxonaga jami 3,2 trln so‘mlik ijtimoiy soliq imtiyozlari berilgan. Bunda korxonalarning xarajatlari kamaygan bo‘lsa-da, ushbu korxonalarda ishlovchi xodimlarning kelgusidagi pensiya majburiyatlari saqlanib qoladi.

Shu munosabat bilan yangi ijtimoiy soliq imtiyozlarini berishni to‘xtatish, amaldagi imtiyozlarni esa 2030 yildan boshlab to‘liq bekor qilish taklif etilmoqda.

Biznesni qo‘llab-quvvatlashni esa ijtimoiy soliqdan ozod qilish orqali emas, balki davlat budjetidan ochiq va manzilli subsidiyalar ajratish orqali amalga oshirish mumkin.

Bu orqali bir xil, masalan, 6 mln so‘m ish haqi oladigan xodimlar qaysi korxonada ishlashidan qat’i nazar, ijtimoiy soliq to‘lash va pensiya huquqini moliyalashtirish bo‘yicha teng sharoitga ega bo‘lishi ko‘zda tutilmoqda.

Source link

Milliy statistika qo‘mitasi ma’lumotlariga ko‘ra, 2026-yil 1-iyul holatiga mamlakatda 122 ming 700 ta elektromobil ro‘yxatdan o‘tgan.

Elektromobillarning eng katta qismi Toshkent shahrida jamlangan — 88 496 ta. Bu berilgan hududiy ko‘rsatkichlar yig‘indisining qariyb 72 foiziga teng.

Toshkent viloyati 9 546 ta elektromobil bilan ikkinchi o‘rinda. Samarqand viloyatida 4 870 ta, Xorazm viloyatida 3 784 ta elektromobil qayd etilgan.

Qashqadaryo viloyatida 3 045 ta, Farg‘onada 2 442 ta, Navoiyda 2 227 ta elektromobil bor. Buxoroda 1 963 ta, Andijonda 1 607 ta qayd etilgan.

Qoraqalpog‘iston Respublikasida 1 387 ta, Namanganda 1 237 ta, Sirdaryoda 993 ta elektromobil ro‘yxatdan o‘tgan.

Jizzax viloyatida ularning soni 701 ta, Surxondaryo viloyatida esa 429 tani tashkil qilgan.

Toshkent shahridagi elektromobillar soni qolgan hududlardagi jami ko‘rsatkichdan qariyb 2,6 baravar ko‘p. Poytaxtdan keyingi yuqori natija Toshkent viloyatiga tegishli bo‘lib, farq 78 950 tani tashkil etadi.

Source link

Bir necha kun davomida ko‘tarilgan dollar yana pasaydi



Source link

Prezident Shavkat Mirziyoyev Qoraqalpog‘iston Respublikasi Kegeyli tumanidagi “ADM Agro” korxonasining sanoatlashgan intensiv bog‘ida yo‘lga qo‘yilgan zamonaviy agrar tajribani ko‘zdan kechirdi.

Jahon tajribasida avtomobil ishlab chiqaruvchi kompaniyalar boshqa tarmoqlarni ham rivojlantirib, ko‘p tarmoqli faoliyat yuritishi keng tarqalgan.

Jizzax viloyatida avtomobil ishlab chiqarayotgan “ADM Group” kompaniyasi ham shu yondashuv asosida faoliyatini kengaytirmoqda. Orolbo‘yida intensiv bog‘dorchilikni rivojlantirish uning yangi yo‘nalishlaridan biri bo‘ldi.

Aytishlaricha, Orolbo‘yining og‘ir iqlimida, sho‘r tuprog‘ida bog‘dorchilik o‘zini oqlamaydi. 55 milliard so‘m mablag‘ yo‘naltirilgan mazkur loyiha esa bu qarashlarni butkul o‘zgartirmoqda.

Bog‘ning umumiy maydoni 330 gektarni tashkil etadi. Eng muhimi, mahalliy aholi uchun 100 ta muqim ish o‘rni yaratildi. Ilgari doimiy daromad manbaiga ega bo‘lmagan qishloq aholisi endi o‘z hududida ishlab, oilasiga baraka kiritmoqda.

Hozirda 69 gektar maydonga AQShda seleksiya qilingan 250 ming tub qora olxo‘ri ko‘chati ekilgan. Bu nav sho‘r yerlarga juda chidamli hisoblanadi. U ekilganidan so‘ng atigi 2 yilda hosilga kiradi. Bir tup daraxt 50-60 kilogrammgacha hosil beradi. Mevaning yirikligi va danakning oson ajralishi qayta ishlash uchun juda qulay sanaladi.

Yerdan unumli foydalanish va daromadni ko‘paytirish maqsadida daraxtlar orasiga hosildor pomidor navi ekildi. Ekin maydonining har bir gektaridan o‘rtacha 40-45 tonna hosil olish mumkin.

Bog‘da qo‘llanilgan zamonaviy texnologiyalar suv tanqisligi bilan bog‘liq muammoga samarali yechim berdi. Maydonda yopiq drenaj va tomchilatib sug‘orish tizimlari joriy qilingan. Oddiy sug‘orishda bir gektar yerga 12 ming litr suv ketadi. Yangi tizim orqali esa bu sarf bor-yo‘g‘i 5 ming litrni tashkil etmoqda. Natijada suv 60 foizgacha tejaladi.

Suv to‘g‘ridan-to‘g‘ri daraxt ildiziga boradi va behuda sarf bo‘lmaydi. Suv bilan birga berilgan mineral o‘g‘itlar 90 foizgacha o‘simlik tomonidan o‘zlashtiriladi. Namlikning bir maromda saqlanishi hosildorlikni yanada oshiradi. Tizim to‘liq avtomatlashtirilgani sababli yuzlab gektar maydonni birgina operator bemalol boshqara oladi.

Iqlimning injiqliklariga qaramay, shunday zamonaviy bog‘ yaratilgani tadbirkorlarimizning jasorati va yangicha fikrlayotganidan dalolat ekani qayd etildi.

Mevani shu yerning o‘zida quritish va qayta ishlash uskunalari o‘rnatilgani mahsulot qiymatini bir necha barobarga oshirayotgani ta’kidlandi.

Loyiha doirasida tayyor mahsulotlarni sotish bo‘yicha ham aniq reja mavjud. Eksport qilish yuzasidan Xitoy, Koreya va Rossiya davlatlari bilan manfaatli shartnomalar imzolab bo‘lingan.

Kegeylidagi mazkur muvaffaqiyatli tajriba butun Qoraqalpog‘iston bo‘ylab kengaytiriladi. Intensiv bog‘lar maydonini 10 ming gektarga yetkazib, 40 mingta doimiy va mavsumiy ish o‘rinlarini yaratish ko‘zda tutilgan.

Shu yerda davlatimiz rahbari fermerlar bilan muloqot qildi. Ular mamlakatimizda amalga oshirilayotgan islohotlarni alohida qayd etib, Qoraqalpog‘iston taraqqiyotiga qaratilayotgan doimiy e’tibor uchun minnatdorlik bildirdi.

Source link

1-sentyabr holatiga O‘zbekistonda xorijiy investitsiyalar ishtirokidagi 21 490 ta korxona faoliyat yuritgan. Bu haqda Milliy statistika qo‘mitasi ma’lum qildi.

Ularning 7 637 tasi savdo sohasiga to‘g‘ri keladi. Bu jami korxonalarning qariyb 35,5 foizini tashkil etadi.

Sanoat sohasida 4 177 ta, axborot va aloqa sohasida 1 840 ta korxona ishlamoqda. Qurilish sohasida esa 1 769 ta xorijiy investitsiyalar ishtirokidagi korxona qayd etilgan.

Yashash va ovqatlanish bo‘yicha xizmatlar sohasida 945 ta korxona faoliyat yuritmoqda. Tashish va saqlash sohasidagi korxonalar soni 665 tani tashkil etgan.

Qishloq, o‘rmon va baliqchilik xo‘jaligida 541 ta xorijiy korxona ishlamoqda. Sog‘liqni saqlash va ijtimoiy xizmatlar ko‘rsatish sohasida esa 247 ta korxona qayd etilgan. Qolgan 3 669 ta korxona boshqa iqtisodiy faoliyat turlariga to‘g‘ri keladi.

Source link