23 yoshli Abdurasul Ahmadjonov asosiy ishidan qaytgach, kechki payt Farg‘ona shahridagi kafelardan birida ofitsiantlik qilayotgan edi. 12 aprel kuni 21:10 lar chamasi u va xo‘randa(lar) o‘rtasida janjal chiqadi, oqibatda ofitsiant reanimatsiyaga yotqizilib, keyinroq vafot etadi.

Marhumning onasi faqat bir kishi javobgarlikka tortilayotganidan shikoyat qilib, Kun.uz’ga murojaat qildi. U baquvvat farzandini bir necha kishi tepkilagan deb hisoblayapti. Ammo guvohlar buni rad etdi.

Shunisi ma’lumki, og‘zaki janjal asnosida Temur ismli yigit Abdurasulning jag‘iga musht tushirgan, u esa zarbdan yiqilgan (kafelga boshi bilan tushgani aytilyapti) va shifoxonaga olib borilib, uch marta jarrohlik amaliyotini boshdan kechirgan. Ammo jarohat jiddiyligi sabab, 10 kun hushsiz yotgan bemor vafot etgan.

Marhum Abdurasul Ahmadjonov

Onasi Gulnoza Isomiddinovaning aytishicha, farzandi hushiga kelgan paytda imo-ishora bilan uni 5-6 kishi kaltaklaganini aytgan. Ona videokamera yozuvlaridan kelib chiqib, farzandi yiqilganidan keyin bir necha kishi uning boshiga, qorniga tepgan deb hisoblayapti va nafaqat asosiy ayblanuvchi (u hozirda ehtiyot chorasi sifatida qamoqqa olingan), balki uning sheriklari ham javobgarlikka tortilishi kerakligini aytmoqda.

“O‘g‘lim unga musht tushirishganida betonga orqa miyasi bilan tushgan. Shunda ham yotgan joyida borib kaltaklashgan. Haqiqat qaror topishini xohlayman.

O‘g‘limni “gruppavoy” bo‘lib vahshiylarcha o‘ldirishdi. Eng alam qilgani, faqat bittasini aybdor qilishyapti. Qolganlar ham javob berishi kerak”, – deydi Gulnoza Isomiddinova.

Gulnoza Isomiddinova, marhumning onasi

Voqea guvohlaridan biri, kafeda ofitsiant bo‘lib ishovchi Samir Saidov biz bilan suhbatda marhum Abdurasul Ahmadjonov yuziga tushgan musht zarbidan yerga yiqilgani, shundan keyin uni hech kim qaytib kaltaklamaganini bildirdi.

“Abdurasul aka kafeda ofitsiant bo‘lib ishlardi. O‘sha kuni u kafega mijoz bo‘lib kelgan sinfdoshim bilan urishib ketdi. Keyin bir-birlarini chetga tortishayotganiga ko‘zim tushdi.

Temur degan bola Abdurasulning jag‘iga musht tushirdi. Abdurasul aka boshining orqasi bilan kafelga yiqildi. U yiqilganidan keyin boshqa hech kim qaytib urmadi. Keyin uni tez yordam mashinasi olib ketdi”, – deydi u.

Holat bo‘yicha Farg‘ona shahar IIB tomonidan Jinoyat kodeksining 104-moddasi (qasddan badanga og‘ir shikast yetkazish) 1-qismi bilan jinoyat ishi qo‘zg‘atilgan.

Bemor vafot etgandan keyin jinoyat ishi 104-moddaning 3-qismi “d” bandi bilan qayta malakalanib, Farg‘ona viloyati IIB tergov bo‘limiga o‘tkazilgan.

Source link

Qoraqalpog‘iston Respublikasining Beruniy tumanida tadbirkorlarni Soliq ilovasi orqali shikoyat qilish bilan qo‘rqitib, ulardan pul talab qilib kelgan shaxslar fosh etildi. Ularga nisbatan tovlamachilik moddasi bilan jinoyat ishi qo‘zg‘atildi.

Bosh prokuratura huzuridagi departamentning Beruniy tumani bo‘limi hamda boshqa huquqni muhofaza qiluvchi organlar xodimlari hamkorligida o‘tkazilgan tezkor tadbir davomida fuqarolar D.A. va A.Yu. ashyoviy dalillar bilan ushlandi.

Tergovga qadar tekshiruv materiallariga ko‘ra, gumonlanuvchilar fuqaro M.X.ga tegishli U.Z. oilaviy korxonasi savdo do‘konida chek berilmaganligi yuzasidan Soliq mobil ilovasi orqali murojaat qilmaslik evaziga 3 million so‘m talab qilib, ushbu mablag‘ni olgan vaqtda qo‘lga olingan.

Tezkor tadbirlar davomida D.A.ning tumanda faoliyat yuritayotgan yana uch nafar tadbirkordan ham chek bermaganlik holatlari bo‘yicha Soliq ilovasiga murojaat qilmaslikni va’da qilib, turli miqdorda pullarni tovlamachilik yo‘li bilan olib kelgani aniqlangan.

Mazkur holat yuzasidan Jinoyat kodeksining 165-moddasi (tovlamachilik) bilan jinoyat ishi qo‘zg‘atilgan. Hozirda ish bo‘yicha tergov harakatlari davom ettirilmoqda.

Source link

Yo‘l harakati xavfsizligi xizmati 2026 yil 4 fevraldan 10 iyulgacha bo‘lgan davrda yo‘l harakati qoidalarini buzgani uchun 399 269 nafar fuqaroga nisbatan ma’muriy ogohlantirish chorasi qo‘llanganini ma’lum qildi. Shuningdek, 671 nafar haydovchi 12 balldan ortiq jarima balli to‘plagan.

Ma’lumotlarga ko‘ra, hisobot davrida eng ko‘p qayd etilgan qoidabuzarliklar xavfsizlik kamarini taqmasdan transport vositasini boshqarish, haydovchilik vaqtida mobil telefondan foydalanish, harakatlanish jarayonida video tomosha qilish, belgilangan tezlikni oshirish, to‘xtash va to‘xtab turish qoidalarini buzish hamda yo‘l harakati qoidalari talablariga rioya etmaslik bilan bog‘liq bo‘lgan.

Shuningdek, piyodalar tomonidan yo‘lning qatnov qismini belgilanmagan joydan kesib o‘tish holatlari ham eng ko‘p uchragan qoidabuzarliklar qatoriga kiritilgan.

Yo‘l harakati xavfsizligi xizmati ma’lum qilishicha, hozirga qadar 671 nafar haydovchi 12 balldan ortiq jarima balli to‘plagan. Amaldagi qonunchilikka muvofiq, bunday hollarda ularga nisbatan belgilangan tartibda javobgarlik choralari qo‘llanadi.

YHXB haydovchilar va piyodalarni yo‘l harakati qoidalariga qat’iy rioya qilishga chaqirib, bu yo‘l-transport hodisalarining oldini olish va barcha harakat ishtirokchilarining xavfsizligini ta’minlashda muhim ahamiyatga ega ekanini ta’kidladi.

Source link

Samarqand viloyatida prokuratura organi mansabdori pora olish bilan bog‘liq jinoyatda gumonlanib ushlandi. Tergov ma’lumotlariga ko‘ra, u davlatga yetkazilgan zarar miqdorini kamaytirish va sudda yengil jazo tayinlanishiga ko‘maklashish evaziga yirik miqdorda pul olgan va talab qilgan.

Davlat xavfsizlik xizmatining Samarqand viloyati bo‘yicha boshqarmasi tomonidan Bosh prokuratura va viloyat prokuraturasi bilan hamkorlikda o‘tkazilgan tezkor-qidiruv tadbirlari natijasida Urgut tumani prokurori o‘rinbosarining noqonuniy harakatlari fosh etildi.

Tergov materiallariga ko‘ra, u Past Darg‘om tumani prokuraturasida faoliyat yuritgan davrida xizmat mavqeidan foydalanib, mahalliy mas’uliyati cheklangan jamiyat tomonidan tabiiy gazdan noqonuniy foydalanish oqibatida davlatga yetkazilgan 2 milliard 887 million so‘m zarar miqdorini 805,9 million so‘mgacha kamaytirib berish evaziga vositachilar orqali 6,5 ming AQSh dollari va 35 million so‘m olgani aniqlangan.

Shuningdek, u mazkur MChJ mansabdorlariga nisbatan Jinoyat kodeksining 169-moddasi bilan qo‘zg‘atilgan jinoyat ishi doirasida zarar miqdorini 150–200 million so‘mgacha kamaytirish hamda sud organlaridagi tanishlari orqali yengilroq jazo tayinlanishiga yordam berishini aytib, korxona egasidan yana 15 ming AQSh dollari talab qilgani ma’lum qilindi.

Huquqni muhofaza qiluvchi organlar tomonidan prokurorning noqonuniy harakatlari yuzasidan ashyoviy dalillar protsessual tartibda rasmiylashtirilgan.

Mazkur holat yuzasidan unga nisbatan jinoyat ishi qo‘zg‘atilib, «qamoq» ehtiyot chorasi qo‘llandi. Ayni paytda ish bo‘yicha dastlabki tergov harakatlari davom ettirilmoqda.

Source link

Toshkent metropoliteni parki yana uchta zamonaviy to‘rt vagonli harakat tarkibi bilan to‘ldirildi. Yangi poyezdlar yo‘lovchilarga yanada qulay sharoit yaratish, harakat intervalini qisqartirish va metropolitenning tashish quvvatini oshirishga xizmat qiladi.

Mamlakatda jamoat transporti tizimini rivojlantirish, aholiga ko‘rsatilayotgan transport xizmatlari sifatini oshirish hamda yo‘lovchilar uchun zamonaviy va qulay sharoitlar yaratish bo‘yicha izchil ishlar amalga oshirilmoqda. Bu borada Toshkent metropolitenining moddiy-texnik bazasini mustahkamlashga alohida e’tibor qaratilmoqda.

Yo‘lovchilarning talab va takliflarini inobatga olgan holda metropolitenga yana uchta zamonaviy to‘rt vagonli harakat tarkibi olib kelindi. Mazkur poyezdlar yoz oylarida samarali sovitish, qish mavsumida esa isitish tizimi bilan jihozlangan bo‘lib, yo‘lovchilar uchun har qanday mavsumda qulay safar sharoitini ta’minlaydi.

Yangi poyezdlarning ekspluatatsiyaga topshirilishi poyezdlar harakati intervalini yanada qisqartirish, yo‘lovchilarga ko‘rsatilayotgan xizmat sifatini oshirish hamda xizmat muddati uzoq bo‘lgan eski turdagi harakat tarkiblarini bosqichma-bosqich zamonaviy poyezdlar bilan almashtirish imkonini beradi.

Shuningdek, zamonaviy harakat tarkiblari sonining ortishi metropolitenning tashish quvvatini kengaytirish, harakat jadvalining barqarorligini ta’minlash va kun sayin oshib borayotgan yo‘lovchilar oqimiga sifatli xizmat ko‘rsatishda muhim ahamiyatga ega.

Ma’lum qilinishicha, joriy yil yakuniga qadar Toshkent metropoliteni uchun yana 11 ta zamonaviy harakat tarkibini olib kelish rejalashtirilgan. Yangi poyezdlarni bosqichma-bosqich foydalanishga topshirish orqali metropoliten infratuzilmasini yanada rivojlantirish va aholiga ko‘rsatilayotgan transport xizmatlari sifatini oshirish ko‘zda tutilgan.

Source link