Ispaniyaning sobiq bosh vaziri Mariano Raxoy futbol bo‘yicha jahon chempionatida ishtirok etayotgan Fransiya milliy jamoasi haqida bildirgan fikrlari ortidan irqchilik va ksenofobiyada ayblanmoqda. Uning «Fransiya jamoasida birorta ham fransuz futbolchisi yo‘q», degan gaplari Ispaniya va Fransiya siyosatchilari hamda jamoatchilik tomonidan keskin tanqid qilindi.

Ma’lum qilinishicha, mojaroga Raxoyning 10 iyul kuni Ispaniyaning El Debate internet nashrida e’lon qilingan maqolasi sabab bo‘lgan. Unda sobiq hukumat rahbari futbol bo‘yicha Jahon chempionati-2026 haqida fikr yuritar ekan, 14 iyul kuni yarimfinalda Ispaniyaning raqibi bo‘ladigan Fransiya jamoasini kuchli raqib sifatida baholagan. Biroq shu bilan birga, jamoada «birorta ham fransuz futbolchisi yo‘q» degan bahsli fikrni ham ilgari surgan.

Bu bayonotga birinchi bo‘lib Ispaniya bosh vaziri Pedro Sanches munosabat bildirdi. U ijtimoiy tarmoqda ayrimlar hali ham insonning mamlakatga mansubligini familiyasi, tug‘ilgan joyi yoki teri rangi bilan baholashini, boshqalar esa uning mamlakatga sadoqati va uning taraqqiyotiga qo‘shgan hissasi bilan o‘lchashini ta’kidladi.

«Ispaniya uni sevadigan va uning ravnaqi uchun mehnat qiladigan barchaga tegishli. Ksenofobik bayonotlar bilan mamlakat obro‘siga putur yetkazadiganlarga emas. Fransiya, yarimfinalda ko‘rishamiz. Kuchli jamoa g‘alaba qozonsin, irqchilik esa mag‘lub bo‘lsin», — deya yozdi Sanches.

Ispaniya transport vaziri Oskar Puente ham Raxoyning fikrlarini qattiq qoraladi. U sobiq bosh vazirni Fransisko Franko diktaturasi davri g‘oyalariga moyillikda ayblab, keskin tanqid qildi.

Raxoyning bayonoti Fransiyada ham keng muhokamalarga sabab bo‘ldi. Mamlakat ichki ishlar vaziri Loran Nunes BFMTV telekanaliga bergan intervyusida bu so‘zlarni «mutlaqo qabul qilib bo‘lmaydigan» bayonot deb baholadi.

Fransiyaning dengizorti hududlari bo‘yicha vaziri Naima Muchu esa ushbu fikrlarni Fransiyaga va mamlakat ifodalaydigan qadriyatlarga qarshi yo‘naltirilgan nafratning yana bir ko‘rinishi sifatida baholadi.

Fransiyaning Madriddagi elchixonasi ham ijtimoiy tarmoqlarda rasmiy munosabat bildirdi. Unda Fransiya milliy jamoasining barcha futbolchilari Fransiya fuqarolari ekani ta’kidlandi. Qayd etilishicha, jamoaning 26 nafar futbolchisidan 23 nafari Fransiya hududida tug‘ilgan, xorijda tug‘ilgan uch nafar futbolchi ham Fransiya fuqaroligiga ega.

Mazkur voqea Yevropa jamoatchiligida milliy mansublik, fuqarolik va ko‘p millatli jamiyatlar haqidagi bahslarni yana bir bor kun tartibiga olib chiqdi.

Source link

U «har bir mamlakat orzu qilish imkoniyatiga ega bo‘lishi lozimligi»ni ta’kidlamoqda.

FIFA prezidenti Janni Infantino kelgusida jahon chempionati ishtirokchilari soni 64 tagacha kengaytirilishi mumkinligini istisno qilmayapti. U bu haqda AQSh, Meksika va Kanada yashil maydonlarida ilk bor 48 jamoa ishtirokida o‘tkazilayotgan turnir fonida ma’lum qildi.

Barcha uchun imkon

56 yoshli funksioner kelgusidagi rejalar haqidagi savollarga javob berish asnosida bunday g‘oyani ham «ko‘rib chiqish zarurligi»ni aytgan.

«48 ta jamoa ishtirokidagi turnir haqiqatan ham muvaffaqiyatli o‘tdi. Har bir jamoa yuqori saviyada o‘yin namoyish etdi. Barcha qit’alardan kelgan jamoalar gol urishdi va kamida bitta ochkoga ega bo‘lishdi. Afrikaning 10 ta jamoasidan to‘qqiztasi pley-offga chiqdi. So‘nggi jahon chempionatida Afrikaning atigi beshta vakili bor edi… Bu barcha jamoalarni jalb qilish – ularga ishtirok etish imkoniyatini berish qanchalik muhimligini yana bir bor tasdiqlaydi.

Bu, albatta, jahon chempionatidan keyin ko‘rib chiqiladigan masala. Turnirni tashkillashtirishda uni nafaqat Yevropa va Janubiy Amerika, balki butun dunyo uchun ochiq qilish muhimdir. Har bir mamlakat jahon chempionatida ishtirok etishni orzu qilish imkoniyatiga ega bo‘lishi kerak», – deya Infantino so‘zlarini keltiradi Blue Sport.

Jahon chempionati ishtirokchilari sonini 64 tagacha kengaytirish haqidagi muhokamalar 2025 yildayoq boshlangandi. O‘shanda turli darajadagi futbol funksionerlari, jumladan, KONMeBOL rahbari Alexandro Dominges o‘z konfederatsiyasining aprel oyidagi kongressida shunday g‘oya bilan chiqqandi. U yangi formatni FIFA turnirning 100 yilligini nishonlaydigan 2030 yilgi mundialda sinab ko‘rishni taklif etgandi. Infantino o‘shanda ushbu hamkasbini qo‘llab-quvvatlagandi.

«Har bir g‘oya – yaxshi g‘oya. Biz yuz yillikni qanday nishonlash haqida o‘ylashimiz lozim», – degandi shveysariyalik mulozim ESPN nashriga.

Ishonchdan qolish

Infantino anchada vaqtdan buyon turnirni kengaytirishni orzu qiladi, ammo u boshlangan ishni oxirigacha yetkaza olishi dargumon. Folarin Balogun bilan bog‘liq mojarodan keyin prezidentning FIFA ichidagi pozitsiyasi sezilarli daajada zaiflashgan.

Eslatib o‘tamiz, AQSh milliy jamoasi forvardi JCh 1/16 finalida Bosniya va Hersegovinaga qarshi o‘yinda (2:0) qizil kartochka olgandi, ammo uning diskvalifikatsiyasi kechiktirildi va keyingi bosqichda Belgiyaga qarshi o‘yinda maydonga tushdi. Keyinroq ma’lum bo‘lishicha, Balogunning jazosini shartliga almashtirishni Infantinodan Amerika prezidenti Donald Tramp iltimos qilgan.

Ushbu yangilik turli futbol assotsiatsiyalari va futbol nashrlari tomonidan keskin tanqid qilindi. The Times nashri xabariga ko‘ra, Infantino tashkilot ichkarisida ham, o‘zi hamkorlik qiladigan mamlakatlarda ham ishonchni yo‘qotgan.

«Futbolga Trampnikidan ko‘ra kattaroq siyosiy aralashuv bo‘lmaydi, FIFAning tushuntirish berishga urinishlari esa bema’ni chiqdi», – degan yuqori martabali manbalardan biri ushbu nashrga.

Janni Infantinoning o‘zi qandaydir qoidabuzarlikka yo‘l qo‘yganini tan olmayapti, ammo uning obro‘siga jiddiy putur yetdi. Nashr ma’lumotiga ko‘ra, u 2027 yilgi saylovga ham o‘z nomzodini qo‘yishni rejalashtirmoqda. Ammo, katta ehtimol bilan, u bu safar jiddiy raqobatga duch keladi – allaqachon unga muqobil nomzod tayyorlash imkoniyati muhokama qilinmoqda.

Ishtirokchilar soni kengaytirilmagan taqdirda ham, 2030 yilgi jahon chempionati tarixdagi eng keng ko‘lamlisi bo‘lishi tayin: turnirni bir vaqtda uchta qit’adagi 6 mamlakat qabul qiladi – Janubiy Amerika (Urugvay, Argentina, Paragvay), Yevropa (Ispaniya, Portugaliya) va Afrike (Marokash). Ishtirokchilar soni yanada ko‘payishi turnirni misli ko‘rilmagan darajaga olib chiqadi, ammo uning amalga oshishi fakt emas.

Source link

1/4 final o‘yinlari yakunlandi.

Futbol bo‘yicha jahon chempionati chorakfinal bosqichida qolgan ikki o‘yinda ham jamoalar asosiy vaqtda masalani hal qila olishmadi. Overtaymlarda esa Angliya Norvegiyani (1:1, 2:1), Argentina Shveytsariyani (1:1, 3:1) mag‘lub etdi. Endi turnir hal qiluvchi bosqichga o‘tdi.

Stadionlar tashqarisida ham turnirga aloqador voqealar yetarlicha bo‘lmoqda: hujumchi Haminton Kampas ijtimoiy tarmoqlardagi heytlar tufayli Kolumbiyaga qaytishga qo‘rqmoqda, Tibo Kurtua esa Belgiya milliy jamoasidagi faoliyatida tanaffus qildi.

Argentinaliklar muxlislarini qiynashda davom etmoqda

Argentina – Shveytsariya 3:1

Gollar: Makallister, 10 (1:0). Ndoy, 67 (1:1). Alvares, 112 (2:1). L. Martines, 120+1 (3:1)

Argentina: E. Martines, L. Martines, Romero (Otamendi, 106), Talyafiko (Gonsales, 78), Molina (Montiel, 85), Paredes (Lopes, 110), Fernandes (Almada, 91), Makallister, de Paul (L. Martines, 85), Alvares, Messi

Shveytsariya: Kobel, Elvedi, Akanji, Rodriges (Eray Jyemert, 90), Zakariyo (Yashari, 96), Froyler (Vargas, 115), Jaka, Rider (Muhaym, 86), Ndoy (Vidmer, 86), Sou (Amduni, 86), Embolo

Ogohlantirishlar: Almada, 97. L. Martines, 98. Lopes, 114 – Embolo, 44

Chetlatish: Embolo, 72 (ikkinchi sariq)

Jahon chempionati startiga qadar Argentina va Shveytsariya o‘yini kim favorit bo‘lishi savol tug‘dirmasdi. Ammo amalda barchasi boshqacha bo‘lib chiqdi – «Albiseleste» pley-off bosqichini shu qadar asabiy o‘tkazmoqdaki, ushbu jamoa Murat Yakinning yaxshi shakllangan jamoaga qarshi qanday harakat qilishi borasida qandaydir prognoz berib bo‘lmasdi. Faqat navbatdagi drama ro‘y berishini taxmin qilish mumkin edi.

Kutilmalarga ters o‘laroq, Lotin Amerikasi vakillari o‘yinni xotirjam boshladi va 10-daqiqadayoq burchak zarbasidan keyin Aleksis Makallister hisobni ochdi. Unga ushbu turnirning asosiy qahramonlaridan biri Lionel Messi assistentlik qildi.

Argentina qariyb bir soat mobaynida hisobdagi ustunlikni saqlab turdi va ikkinchi golni urishga ham yaqinroq keldi. Ammo Lionel Skaloni bu safar ham muxlislarini oxirgi daqiqalarga qadar hayajonda o‘tirishga majbur qildi – ikkinchi bo‘lim o‘rtalarida shveysariyaliklar muvozanatni tiklashdi. Himoyachi Dan Ndoy chap qanotdan jarima maydoniga bostirib kirdi va kuchli zarbasi bilan Emiliano Martinesni ojiz qoldirdi.

Ammo yevropaliklar jamoasi muxlislarining quvonchi uzoqqa cho‘zilmadi. 69-daqiqada o‘yin taqdirini o‘zgartirib yuborgan g‘alati voqea ro‘y berdi: avvaliga bosh hakam argentinaliklar yarimhimoyachisi Paredes tomonidan fol ishlatilganini qayd etib, unga sariq kartochka ko‘rsatdi. Ammo yangi qoidalar bo‘yicha vaziyatga VAR aralashdi va hakamni monitor qarshisiga chorladi.

Vaziyatni ko‘rib chiqqanidan keyin hakam Brelyu Embolo simulyatsiya ishlatgan deb topdi va Paredesning kartochkasini bekor qilib, shveysariyalik hujumchiga sariq kartochka ko‘rsatdi, uning uchun bu o‘yindagi ikkinchi sariq kartochka bo‘ldi va u jamoasini qiyin ahvolda qoldirib, maydonni tark etdi.

Holbuki, agar hakam o‘shanda Paredesga sariq kartochka ko‘rsatmaganida, videohakamlar vaziyatga aralashmagan bo‘lardi.

Shveytsariya ozchilik bo‘lib qolganiga qaramay, o‘yinning asosiy vaqtida durang hisobni ushlab qoldi. Ammo ekstra-taymlarda Argentina son jihatdan ustunlikdan foydalandi – 112-daqiqada Hulian Alvares chap qanotdan aylanma zarbasi bilan g‘alaba golni urdi. Shveytsariyaliklar so‘nggi daqiqalarda to‘liq kuch bilan oldinga o‘tib ketganida esa Lautaro Martines yakuniy hisobni o‘rnatdi. Argentinaliklar yana bir marta o‘z muxlislarini azobladi, ammo baribir yarimfinalga yo‘l oldi.

Juddan master-klass

Bu jahon chempionatiga o‘zgacha kayfiyat bag‘ishlagan Norvegiya milliy jamoasini bu turnirda barcha yoqtirib qolgandi, lekin endi dunyo har o‘yindan keyin «eshkak eshish» marosimini uyushtiruvchi futbolchilar va muxlislarni ko‘rmaydi. O‘yindan oldingi aksar progozlarda ham Angliya skandinavlarning tarixiy safariga yakun yasashi taxmin qilinayotgandi – tarkiblar darajasi o‘rtasida farq katta edi.

Kuchlar nisbatiga qaramay, o‘yinning boshini jamoalar teng o‘tkazishdi. Bo‘lim oxirida esa norveglar faollasha boshladi va birinchi bo‘lib gol urishdi. Braziliya bilan o‘yinda burilish yasagan va bu turnirda ilk bor boshlang‘ich tarkibdan o‘rin olgan 22 yoshli Andreas Shelderup yana o‘zini ko‘rsatdi: u Edegordan pas qabul qilib olib, o‘tkir burchakda turganiga qaramay, ajoyib zarba yo‘lladi.

Tanaffusgacha norveglarda gol urish uchun yana imkoniyatlar bo‘ldi, ammo hujum vakillarida realizatsiya bo‘yicha muammolar yuzaga keldi. Keyin esa inglizlar nima uchun o‘yindan oldin favorit deb ko‘rilganini isbotlashdi – birinchi bo‘limga qo‘shib berilgan daqiqalarda Jud Bellinghem jarima maydoni ichida bir necha himoyachini ortda qoldirib, hisobni tenglashtirdi.

«Real» yarimhimoyachisi ushbu turnirni juda yuqori sur’atda o‘tkazmoqda – u guruh bosqichida ikkita gol urgandi, keyin esa 1/8 finalda o‘z dubli bilan Meksika ustidan g‘alaba keltirdi (3:2). Bu o‘yinda ham katta sahnaga chiqib, qo‘shimcha bo‘limlar boshida ikkinchi golini (turnirdagi oltinchi) urib, o‘yin taqdirini hal qildi. Norvegiya javob qaytara olmadi va turnirdagi ishtirokini yakunladi.

JCh ishtirokchisi vafot etdi

JAR milliy jamoasi futbolchisi, 2026 yilgi jahon chempionatida uchta o‘yin o‘tkazgan Jyeyden Adams o‘z uyidan jonsiz holda topildi. Bu qayg‘uli voqea haqida dastlab SoccerLaduma nashri xabar tarqatdi. Keyin Janubiy Afrika futbolchilari kasaba uyushmasi bu ma’lumotni tasdiqadi.

Jurnalist Nuxu Adams va boshqa qator manbalarga ko‘ra, 25 yoshli futbolchi so‘nggi vaqtlarda depressiyadan aziyat chekkan va katta ehtimol bilan, o‘z joniga qasd qilgan. Adamsning ruhiy holatiga turnir vaqtida buvisi vafot etgani ta’sir ko‘rsatgan bo‘lishi mumkin.

Ijtimoiy tarmoqlarda JAR JCh pley-offiga chiqqanidan keyin olingan video tarqalgan: unda kiyim almashtirish xonasida butun jamoa muvaffaqiyatni bayram qilayotgani, Jyeyden esa bir chetda qayg‘uli alpozda o‘tirgani aks etgan. Shu bilan birga, oila vakili Brendin Jonsonning aytishicha, Adamsda ruhiy muammolar bo‘lmagan.

«Men u bilan payshanba kuni gaplashgandim, u optimistik kayfiyatda edi va yangi mavsumga tayyorlanayotgandi. U vaqtni behuda sarflamas, uyda oilasi bilan birga edi. Shuning uchun hozir so‘z topolmayapman», – deya uning so‘zlarini keltiradi SoccerLaduma.

Holand Peruni zabt etmoqda

Jahon chempionatidagi yorqin ishtiroki tufayli Erling Holandning mashhurligi yanada ortdi. Ushbu norvegiyalik hujumchining yuqori darajadagi sport formasi ayniqsa peruliklarda katta taassurot qoldirgan – u yerda endi yangi tug‘ilgan chaqaloqlarga «Manchester Siti» forvadi sharafi ism qo‘yilmoqda.

Milliy identifikatsiya reyestridagi ma’lumotlarga ko‘ra, allaqachon 468 nafar chaqaloqqa Holand ismi berilgan, yana 91 nafari – Erling Holand deb ataladi. Bu bolalarning aksari JCh-2026 startidan keyin tug‘ilgan. Norvegiya Braziliyani yengib, turnir chorakfinaliga chiqqanidan keyin bunday ism qo‘yish yanada ko‘paygan.

Hozirda Peruda 3402 kishining ismi Messi deb ataladi, shundan 292 nafariga to‘liq Lionel Messi deb nom qo‘yilgan. Yana 1185 kishi Krishtianu Ronaldu sharafiga nomlangan.

Kurtua charchadi

Belgiya milliy jamoasi darvozaboni Tibo Kurtua chorakfinalda Ispaniyaga qarshi kechgan o‘yinni (1:2) jarohat tufayli oxirigacha davom ettira olmadi, uning o‘rniga tushirilgan darvozabon Lammens yo‘l qo‘ygan xato esa milliy jamoa turnirni tark etishiga sabab bo‘ldi. Shundan keyin 34 yoshli futbolchi milliy jamoadagi ishtirokida tanaffus qilish niyatini ma’lum qildi.

«Milliy jamoadagi kelajagimga kelsak – ko‘ramiz. Men tanaffus qilib, Millatlar Ligasini o‘tkazib yuborishim mumkin, chunki bu eng muhim turnir emas», – deya uning so‘zlarini keltiradi The Athletic.

Bundan tashqari, Kurtua Ispaniya bilan o‘yin uning milliy jamoa safidagi so‘nggi o‘yini bo‘lib qolishi mumkinligini qo‘shimcha qilgan.

«Keyin Yevropa chempionati saralash bosqichiga qaytarman. Ammo oxir-oqibat qaror federatsiyada qoladi. Agar yo‘q bo‘lsa, bugungi o‘yin men uchun oxirgisi bo‘lib qolishi mumkin», – deya xulosa qiladi Tibo.

Kolumbiyacha ehtiroslar

Kolumbiya milliy jamoasi hujumchisi Haminton Kampas 1/8 finalda Shveytsariyaga qarshi o‘yinda (0:0, penaltilar seriyasida 3:4) qulay imkoniyatdan foydalanmagani tufayli nafratli reaksiyalar to‘lqiniga duch keldi. Endi ushbu futbolchi vataniga qaytishga cho‘chimoqda.

«Mening Kolumbiyam, iltimos, o‘zaro hurmatni hech qachon unutma. Biz voqealarga turlicha qarashimiz, hafsalamiz pir bo‘lishi yoki xafa bo‘lishimiz mumkin, ammo hech qanday ehtiros nafrat va qo‘rquvda yashashni oqlamaydi. Butun Kolumbiyaga faqat bir narsani aytishim mumkin: men ham turnirni tark etganimizdan azob chekyapman. Biz ham kurashni davom ettirishni orzu qilgandik», – deya yozgan u ijtimoiy tarmoqda.

Bu postdan keyin ko‘pchilik 1994 yilgi mundialdan keyin kolumbiyalik himoyachi Andres Eskobar bilan ro‘y bergan fojiani yodga oldi: o‘shanda Kolumbiya guruh bosqichidayoq ishtirokini yakunlagan, Eskobar esa AQSh bilan o‘yinda (1:2) o‘z jamoasi darvozasini ishg‘ol etib qo‘ygandi. 1994 yil 2 iyulda, o‘sha o‘yindan bir necha kun o‘tib Eskobarni Medelindagi kafe oldidagi avtoturargohda otib ketishadi. Killer unga qarata olti bor o‘q uzgan va har safar tepkini bosganidan keyin «Gol!» deya hayqirgan.

Infantino qo‘llovni yo‘qotmoqda

AQSh milliy jamoasi forvardi Falorin Balogunning diskvalifikatsiyasi Donald Trampning qo‘ng‘irog‘idan keyin bir yil muddatga kechiktirilishi bilan bog‘liq keys FIFA prezidenti Janni Infantinoning nufuziga ta’sir ko‘rsatishda davom etmoqda.

The Times ma’lumotiga ko‘ra, bungacha ushbu shveysariyalik mulozim lavozimiga qayta saylanishi tarafdori bo‘lgan mamlakatlardan bir qanchasi endi pozitsiyasini o‘zgartirishi mumkin. Shunga qaramay, u keyingi saylovda ham g‘alaba qozonishi ehtimoli yuqoriligicha qolmoqda.

«Infantinoning ta’sir doirasi qisqarmoqda, hozir u yakkalanib qolgan – u real hokimiyatni yo‘qotgan prezident bo‘ladi», – deya futbol doiralaridagi yuqori martabali manbaning so‘zlarini keltiradi nashr.

Katta ehtimol bilan, u endi klublar o‘rtasidagi jahon chempionati formatini kengaytirishga yoki turnirni har ikki yilda bir marta o‘tkazish rejasini amalga oshirishga erisha olmaydi. Shuningdek, 2031 yilda oxirgi muddati tugagandan so‘ng unga yana o‘z nomzodini qo‘yishga imkon beradigan FIFA nizomiga o‘zgartirish kiritilishi deyarli istisno qilingan.

Source link

Bellinghemning birinchi bo‘limga qo‘shib berilgan daqiqalarda urgan javob goli atrofida mojaroli holat yuzaga keldi. FIFA izoh berdi.

Angliya milliy jamoasi jahon chempionati 1/4 finalida katta qiyinchilik bilan bo‘lsa-da, Norvegiya to‘sig‘idan o‘ta oldi. Shu bilan birga, Tomas Tuxel jamoasi o‘yinning asosiy vaqtida urgan yagona gol bahslarga sabab bo‘lmoqda.

Birinchi bo‘lim oxirida norveglar darvozaboni Eryan Nyuland to‘pni darvozadan o‘yinga kiritdi. Fox Spors kanalida berilgan takroriy kadrga ko‘ra, havoda to‘p yo‘l-yo‘lakay «o‘rgimchak kamera» (Spidercam) kabeliga tegib ketgan, shundan keyin darhol pastga sho‘ng‘igan.

Shundan keyin uni Anderson egallab olib, Gordonga uzatgan, u esa jarima maydoniga yaqinlashib, Bellinghemni golli pas bilan ta’minlagan.

Qoidaga ko‘ra, agar to‘p o‘yin paytida tashqi jismga tegsa, uchrashuv to‘xtatilishi va bahsli to‘p bilan qayta boshlanishi kerak. «O‘rgimchak kamera» ham tashqi jism hisoblanadi.

Sobiq hakam Mark Klattenburg Fox efirida bularning barchasi golga olib kelgan epizodning bir qismi ekani va shu tufayli bu vaziyat videotakrorda ko‘rib chiqilishi kerak bo‘lganini aytdi.

Ammo VAR vaziyatga aralasha olmasdi. Chunki tezkor videohakamlar tizimi faqat hujum fazasini tekshirish vakolatiga ega. Bu faza esa Angliya to‘pni egallab olgan soniyadan boshlanadi – undan oldingi jarayonni qamrab olmaydi.

Shu boshlanish nuqtasi sabab, golni bekor qilish vakolati faqat maydondagi hakamlarning qaroriga bog‘liq bo‘lib qolgandi. O‘yinni boshqargan hakam Kleman Tyurpen golni hisobladi va Angliya tanaffusga 1:1 hisobida yo‘l oldi.

FIFA esa to‘pdagi datchik sim bilan aloqani qayd etmaganini ma’lum qilib, bayonot berdi:

«Angliyaning Norvegiyaga qarshi o‘yinida 45+2-daqiqada urgan golidan oldin, havoda to‘p harakatlanayotgan paytda sensorli to‘p ma’lumotlarida to‘pning «yurak urishi» grafigida hech qanday yuqori cho‘qqi (peak) qayd etilmadi. Shuning uchun to‘pning stadion tepasidagi simga tegib, uning harakat yo‘nalishini o‘zgartirganini tasdiqlaydigan hech qanday dalil yo‘q».

Before England’s goal in minute 45+2 against Norway, the sensor in the Connected Ball showed no peak in the ‘heartbeat of the ball’ when in the air, and therefore no evidence that the ball touched the overhead wire and changed the movement of the ball. pic.twitter.com/gYf9ukfveT

— FIFA Media (@fifamedia) July 11, 2026

Ya’ni, sensor ma’lumotlariga ko‘ra, to‘p yuqoridagi simga tegmagan va gol bekor qilinishiga asos bo‘ladigan dalil aniqlanmagan.

Gap 500 Gs chastotali harakat sensori haqida ketmoqda, u harakatlarni o‘qiydi va har 2 millisekundda ma’lumotlarni yangilaydi. Texnologiya zarba lahzasini qayd etishga va gollar hamda ofsaydlarni avtomatik aniqlash tizimining ishlashiga yordam beradi.

JCh-2026 pley-offida ushbu texnologiya Portugaliya va Xorvatiya o‘yinida – xorvatlarning 90+13-daqiqada urilgan goli bekor qilingan epizodda katta sahnaga chiqqandi.

Ammo bu safar u to‘pga teginishni qayd etmadi.

Efirdan so‘ng Fox Spors infografika orqali to‘pning uchish trayektoriyasini ko‘rsatdi.

Quyida esa BBC grafikasi: unda to‘p simga tegishi uning harakat trayektoriyasini qanday o‘zgartirgani ko‘rsatilgan. Dastlabki marshrut – qizilda. To‘p simga tekkach, oq chiziqda ko‘rsatilgan yo‘nalishda harakatlangan va inlizlarga kelib tushgan.

Lekin bulardan ham aniq xulosaga kelish qiyin. Yaqqol ta’sirni payqab bo‘lmaydi.

To‘p yo‘nalishi o‘zgarishiga shamol sabab bo‘lgan bo‘lishi ham mumkin, ammo qizig‘i shundaki, norvegiyalik futbolchilar va murabbiylar sinxron tarzda to‘p aynan kamera simiga tegib ketganini ayta boshlashdi, buni esa oldindan rejalashtirib bo‘lmasdi.

Norvegiya milliy jamoasi bosh murabbiyi Stole Solbakken bu borada tanaffus vaqtida hakamga e’tiroz bildirgan. U goldan keyin shunchalik g‘azablandiki, shishani otib yubordi va o‘z yordamchilaridan biriga zarar yetkazishiga sal qoldi.

«Nima bo‘lganini hamma ko‘rdi. To‘p to‘ppa-to‘g‘ri pastga sho‘ng‘idi. U yerda trosga tegish bor edi. Chip hech narsa ko‘rsatmadimi? Ammo to‘p osmondan pastga uchib tushdi. Uning [to‘p kamera simiga] tegib ketgani aniq, bu g‘alati bo‘ldi», – dedi Solbakken o‘yindan so‘ng.

Erling Holandning otasi Alf-Inge esa norveglarning hakamga munosabatini quyidagicha ifodaladi: «Bellinghem va referidan ajoyib ish».

Sobiq ingliz hakami Grem Skott esa vaziyatni quyidagicha baholadi:

– Maydondagi hakamlar bunday teginishni faqat to‘p trayektoriyasi keskin o‘zgargandagina payqagan bo‘lardi. Agar jamoalardan biri yaqqol yutqiziqli pozitsiyada bo‘lsa, VAR aralashish huquqiga ega edi, ammo bu aniq qoidabuzarlik bo‘lishi kerak. Qat’iy qilib aytganda, bu yerda «tashqaridan aralashuv»ni ko‘rish mumkin, bu o‘yinni to‘xtatishni va to‘pni oldirgan jamoaga qaytarishni talab qiladi. Biroq, amalda jismoniy kontakt uchun aniq dalillar kerak. Agar to‘p qog‘oz stakanchaga yoki maysazordagi mayda jismga tegsa va bunda epizodga ta’sir bo‘lmasa, o‘yin to‘xtatilmaydi. Va VAR har qanday holatda ham hujum fazasini tahlil qilishda qush parvozi balandligidan rakursni o‘rganishi dargumon edi. Videoarbitr futbolchilarning hujum boshlanishidagi harakatlariga e’tibor qaratdi. VAR hakamlariga qo‘yiladigan umumiy talabni hisobga olsak, ularda vaziyatga chuqur kirishga sabab yo‘q edi: ulardan gol mutlaqo toza ko‘ringan joyda juda mayda tafsilotlarga berilmaslik va yo‘q joydan muammo yaratishga urinib, o‘yinni cho‘zib yubormaslik talab etiladi.

Source link

Skandinavlarda qo‘shimcha bo‘limlarda kuch qolmadi.

Norvegiya – Angliya 2:2

Gollar: Shelderup, 36 (1:0). Bellinhem, 45+2 (1:1). Bellinhem, 93 (1:2)

Norvegiya: Nyulan, Ayyer, Heggem (Estigor, 91), Volfe (Pedersen, 90), Ryuerson (Eursnes, 60), Berge, Berg, Edegor, Shelderup (Bobb, 68), Syorlot (Nusa, 68), Holand (Strann Larsen, 106)

Angliya: Pikford, Stouns, Geyi, O`Rayli (Spens, 86), Konsa (Rojyers, 89), Rays (Eze, 46), Anderson, Bellinhem (Byorn, 111), Gordon (Jyeyms, 71), Madueke (Saka, 46), Keyn

Ogohlantirish: Ayyer, 117

Angliya va Norvegiya – bir biriga yaqin bo‘lgan mamlakatlar hisoblanadi. Geografik va madaniy tomondan ham, futbol borasida ham. Bunday bog‘liqlikni ko‘rish uchun skandinavlar jamoasi tarkibiga qarash yetarli, Angliyaga qarshi o‘yinda boshlang‘ich tarkibda tushgan 11 futbolchidan olti nafari, jumladan, jamoaning asosiy yulduzlari – Erling Holand va Martin Edegor APLda to‘p suradi.

Ushbu ikkisini futbol olamidagilar anchadan buyon yaxshi taniydi, norveglar jamoasining bu turnirdagi o‘yinlari esa ko‘pchilik uchun yangilik bo‘ldi. Stole Solbakken shogirdlari 1/8 finalda Braziliyani haqli ravishda mag‘lub etdi va gap o‘sha o‘yinda Holand dubl qayd etganida ham emas – norveglar raqibdan yaxshiroq o‘ynadi va o‘z vaziyatlaridan foydalandi.

Angliya esa turnir davomida barcha o‘yinlarda ham o‘z darajasida o‘ynay olmadi. Pley-offda Kongo DR va Meksikaga qarshi kechgan o‘yinlarda «Uch sherlar» ko‘p holatlarda konsentratsiyani yo‘qotdi va turnirni tark etish xavfi ostida qoldi. Faqat futbolchilarning individual mahorati evaziga britanlar nisbatan osonroq raqiblarni taslim eta oldi. Norvegiya esa xatolardan foydalanadigan va o‘zi kam xato qiladigan, boshqa darajadagi raqib edi.

O‘yinning birinchi bo‘limining katta qismida ikki jamoa ham ehtiyotkorlik bilan o‘ynashga qaror qildi. Norveglar to‘pni inglizlarga topshirishdi va 4-5-1 sxemasida joylashib, to‘p uzatish mumkin bo‘lgan barcha yo‘laklarni yopishdi. Angliya esa to‘pga va hududlarga egalik qildi, lekin Nyuland qo‘riqlayotgan darvoza tomon yaqinlasha olmadi – inglizlar to‘pni u qanotdan bu qanotga oshirib, Madueke va Gordonning driblinglariga hamda olisdan yo‘llanadigan zarbalarga tayandi. Ammo bu ish bermadi.

Shu tufayli 35-daqiqagacha muxlislar zerikib qolishdi: ikki jamoa atigi bitta zarba berdi va yaqqol golli vaziyatlar yuzaga kelmadi. Jamoadoshlari Holand va Keynga to‘pni yetkazib bera olishmadi.

Ammo bu kabi o‘yinlarda ko‘p kuzatilganidek, bitta epizod barchasini o‘zgartirib yubordi. 36-daqiqada Harri Keyn himoyadan chiqishda to‘pni oldirdi, to‘pga ega chiqqan Edegor oldinga yurdi va chap qanotda o‘zini taklif etgan Shelderupni pas bilan ta’minladi, yosh vinger esa jarima maydoniga kirib borib, kuchli zarba yo‘llab, turnirning eng chiroyli gollaridan biriga mualliflik qildi.

Inglizlar hujum boshlanish vaqtida Berg tomonidan Keynga fol ishlatilganiga ishora qilishdi, ammo videotakrorda norvegiyaliklar futbolchisi to‘pga o‘ynagani oydinlashdi.

Bo‘limning qolgan daqiqalarida skandinavlar ikki bor ikkinchi golni urishga yaqin kelishdi. Avvaliga Pikford Edegorning olis masofadan yo‘llagan xavfli zarbasini bartaraf etdi, keyin esa Syorlot yaqqol golli vaziyatni yo‘qqa chiqardi.

U jarima maydoniga kirib kelgan Holandga to‘p uzatishi mumkin edi, ammo o‘zi zarba berishga qaror qildi va to‘pni darvozabonga topshirdi.

«Sen urmasang, senga urishadi» qoidasi darhol ishga tushdi va norvegiyaliklar tanaffusga hisobdagi ustunlik bilan yo‘l ololmadi. Nyuland oldingi chiziqqa yetkazib bergan to‘pni inglizlar egallab oldi va boshlangan tezkor qarshi hujumni Jud Bellinghem turnirdagi beshinchi golini urish bilan yakunladi.

Ikkinchi bo‘lim birinchisiga qaraganda shiddatli kechdi: Norvegiya o‘ziga ishonch bilan harakat qildi va ketma-ket hujumlar uyushtirdi, Angliya esa hisobdan kelib chiqib, xotirjamlik bilan harakat qildi.

Syorlotning bosh bilan yo‘llagan zarbasi yaqin «to‘qqizlik»ka kirib ketishiga bir baxya qoldi, Holandning pastki burchakka yo‘llagan zarbasidan keyin Pikforddan o‘zini ko‘rsatishiga to‘g‘ri keldi, 57-daqiqada esa skandinavlar baribir darvozani ishg‘ol etishdi.

Ammo Kleman Tyurpen videotakrordan keyin Heggem urgan golni bekor qildi – yangi qoidalar ishga tushib, vaziyat VAT tomonidan ko‘rib chiqildi, videotakror burchak zarbasi ijro etilishidan oldin Holand Andersonga fol ishlatganini ko‘rsatdi va hakam burchak zarbasini qaytadan ijro etish kerakligini ko‘rsatdi.

Shundan keyin Solbakken hujum qanotlarini yangila, Syorlot va Shelderup o‘rniga Bobb va Nusani tushirdi, ular muntazam ravishda inglizlarning qanot himoyachilarini tahlika ostida ushlab turishdi. Angliyada ham zaxiradan tushirilganlar o‘yinni kuchaytirishdi, Saka bir necha bor qanotdan reyd uyushtirib, xavfli vaziyatlar yuzaga keltirdi.

Ammo asosiy vaqt yakuniga qadar hisob o‘zgarmay qoldi va barchasi qo‘shimcha bo‘limlarda aniqlanadigan bo‘ldi. Qo‘shimcha bo‘limlarning birinchisi boshlanishi bilanoq Angliyaning zaxira imkoniyatlari o‘z so‘zini aytdi. Rodjyers 92-daqiqada o‘z odatiga ko‘ra jarima maydoni tashqarisidan kuchli zarba yo‘lladi, Nyuland esa to‘pni ushlab qola olmadi va barchadan ildamroq harakat qilgan Bellinghem darvozani ishg‘ol etdi. Bu uning turnirdagi oltinchi goli bo‘ldi va u endi Messi, Mbappe (8 tadan), Holand (7) va Harri Keyn (6) kabi to‘purarlar poygasida.

5 daqiqa o‘tib esa Spens chap qanotdan jarima maydoniga yorib kirib, penalti ishladi. Ammo yana VAR vaziyatga aralashdi va penalti bekor qilindi: bu vaziyatda inglizlar himoyachisi qasddan penalti ishlash uchun harakat qilgan deb topildi.

Birinchi qo‘shimcha bo‘limdan keyin Solbakken Holandni o‘yindan olib tashladi, Erlingda o‘yinni davom ettirish uchun kuch qolmagani ko‘rinib turardi. O‘z yetakchisisiz qolgan norveglar esa qolgan daqiqalarda hech narsani o‘zgartira olmadi. Faqat Nyulandning bir hujumning o‘zida ikkita zarbani qaytarishi o‘yin oxirigacha intriga saqlanib turishini ta’minladi.

Norvegiya jahon chempionatini mardonavor tark etdi, Angliya esa uzoq kutilgan chempionlik uchun yurishini davom ettiradi.

Source link