Bug‘doydan bo‘shagan yerlarni yoqish bilan bog‘liq huquqbuzarliklar aerokosmik ma’lumotlardan foydalangan holda aniqlanmoqda. 

Foto: Ekologiya va iqlim o‘zgarishi milliy qo‘mitasi

Ekopolitsiyaning hududiy organlari tomonidan o‘tkazilgan nazorat tadbirlari va «O‘zbekkosmos» agentligi tomonidan kosmik suratlarni qayta ishlash va tahlil qilish orqali 744 ta bug‘doydan bo‘shagan yer maydonlarida yonish holatlari bo‘yicha 172 nafar huquqbuzarga 212,5 mln so‘m miqdorida ma’muriy jarimalar qo‘llanildi.

Shuningdek, 652,3 mln so‘m tabiatga yetkazilgan zarar hisoblangan.

Bundan tashqari, dala va aholi punktlarida ang‘iz, xazon va shox-shabbalarni yoki o‘simliklarning boshqa qoldiqlarini yoqib yuborish, shuningdek, qurilish chiqindilarini yoqish bilan bog‘liq holatlarning oldini olish bo‘yicha olib borilgan nazorat tadbirlari davomida bugungi kun holatiga 9 821 ta huquqbuzarlik holati aniqlanib, bayonnomalar rasmiylashtirilgan.

Source link

Respublika shtabining navbatdagi yig‘ilishida Toshkent shahridagi ayrim podstansiyalarda kuzatilgan nosozliklar va ular oqibatida yuzaga kelgan avariyaviy uzilishlar tanqidiy muhokama qilindi.

Energetika vazirligida Yoqilg‘i-energiya resurslaridan foydalanish ustidan davlat nazoratini samarali tashkil etish va muvofiqlashtirish bo‘yicha respublika shtabining navbatdagi yig‘ilishi o‘tkazildi.

Yig‘ilishda yoz mavsumini betalafot o‘tkazish, elektr energiyasi iste’moli keskin oshadigan kunlarda iste’molchilarni uzluksiz elektr energiyasi bilan ta’minlash, energetika obektlarining 24 soatlik ish rejimini kuchaytirish, avariya brigadalarining shayligini oshirish hamda rejali ta’mirlash ishlarini jadallashtirish masalalari muhokama qilindi.

Kutilayotgan issiq kunlarda respublika bo‘yicha sutkalik elektr energiyasi iste’moli 280 mln kVt·soat, maksimal yuklama esa 13–13,3 GVtgacha yetishi prognoz qilinishi bois barcha tizim korxonalariga elektr uzatish tarmoqlari va podstansiyalarning ishonchli ishlashini ta’minlash, avariyaviy holatlarning oldini olish hamda profilaktik nazoratni kuchaytirish yuzasidan qo‘shimcha vazifalar belgilandi.

Shuningdek, Toshkent shahridagi ayrim podstansiyalarda kuzatilgan nosozliklar va ular oqibatida yuzaga kelgan avariyaviy uzilishlar tanqidiy muhokama qilindi. Yo‘l qo‘yilgan kamchiliklar uchun tegishli mas’ullarning shaxsiy javobgarligi belgilanib, ayrim rahbarlar egallab turgan lavozimidan ozod etildi.

Kutilayotgan issiq ob-havo sharoitida benzin, dizel yoqilg‘isi va suyultirilgan gazni ortish-tushirish ishlarini sanoat va yong‘in xavfsizligi talablariga qat’iy rioya etgan holda, kuchaytirilgan nazorat asosida tashkil etish topshirildi.

Yong‘in va portlash xavfini kamaytirish maqsadida havo harorati yuqori bo‘lgan vaqtlarda suyultirilgan gazni ortish-tushirish ishlarini vaqtincha to‘xtatib turish belgilandi.

Source link

Ayol o‘zi bilan birga yashovchi sobiq turmush o‘rtog‘ini uy-joy nizosi bilan bog‘liq adovat zamirida qasddan o‘ldirishni maqsad qilib, uch ming dollar evaziga yollanma qotil izlayotgani aniqlangan.

Andijon viloyati Asaka tumanida yollanma qotil orqali sobiq erini o‘ldirishni rejalashtirgan ayol qo‘lga olindi.

Xabar qilinishicha, olingan tezkor ma’lumotlarga ko‘ra, ayol o‘zi bilan birga yashovchi sobiq turmush o‘rtog‘ini uy-joy nizosi bilan bog‘liq adovat zamirida qasddan o‘ldirishni maqsad qilib, 3 ming dollar evaziga yollanma qotil izlayotgani aniqlangan.

Shundan so‘ng, tezkor tadbir o‘tkazishga kirishilib, shartli yollanma qotil tadbirga jalb etilgan. Ayol 10 iyul kuni qotillik bo‘yicha yollamoqchi bo‘lgan shaxs bilan ko‘rishib, unga 5 mln so‘m bergan. Erining o‘lganiga ishonch hosil qilgandan so‘ng qolgan pullarni berishni va’da qilib, tilxat yozib bergan.

11 iyulga o‘tar kechasi o‘tkazilgan tezkor tadbirda yollanma qotil ayolning turmush o‘rtog‘ini Asaka tumanidagi adirlikka olib borib, uning o‘ldirilganini bildirib, buyurtmachi ayolni voqea joyiga chaqirgan.

Eri o‘lganligiga ishonch hosil qilgan ayol kelishilgan pullarni berish uchun avtomashinaga o‘tirgan vaqtda ashyoviy dalillar bilan qo‘lga olingan.

Mazkur holat yuzasidan unga nisbatan bilan jinoyat ishi qo‘zg‘atilgan.

Source link

Avvalroq soliq organlari ayrim bank kartalariga kelib tushgan mablag‘larni tekshirishi haqida xabar berilgan edi.

Soliq qo‘mitasi bank siri va P2P-o‘tkazmalari monitoringi masalalari bo‘yicha Markaziy bankning pozitsiyasiga munosabat bildirdi.

Ta’kidlanishicha, banklar bilan har qanday axborot almashinuvi faqat qonun doirasida, bank sirini saqlash, shaxsga doir ma’lumotlarni himoya qilish va fuqarolarning bank tizimiga bo‘lgan ishonchini ta’minlash sharti bilan amalga oshirilishi lozim.

Konstitutsiyaning 41-moddasida bank operatsiyalari, omonatlar va hisobvaraqlar sirining qonun bilan kafolatlanishi belgilangan. Ushbu masalalar qonunchilikda, xususan, «Bank siri to‘g‘risida»gi Qonun va Soliq kodeksi bilan tartibga solinadi.

«Bank siri to‘g‘risida»gi Qonunda bank mijozining soliqqa oid masalalari bo‘yicha ma’lumotlar qonunchilikka muvofiq soliq organlariga taqdim etilishi nazarda tutilgan.

Soliq kodeksida ham banklarning soliq organlariga axborotni soliq qonunchiligida nazarda tutilgan hollarda va tartibda taqdim etish majburiyatlari belgilangan.

«Shu bilan birga, jismoniy shaxslar o‘rtasidagi P2P-o‘tkazmalar o‘z-o‘zidan soliq solish obyekti hisoblanmaydi va bu fuqarolarning shaxsiy o‘tkazmalari ustidan ommaviy nazorat o‘rnatishni anglatmaydi», — deyiladi xabarda.

Aytilishicha, loyihaning mohiyati banklar bilan o‘zaro hamkorlikning xavfsiz, aniq va xalqaro amaliyotga mos formatini shakllantirishdan iborat.

Ayni damda loyihaning jamoatchilik muhokamasi yakunlangan. Kelib tushgan barcha takliflar, jumladan Markaziy bankning pozitsiyasi diqqat bilan o‘rganilib, shundan so‘ng tegishli xulosalar chiqarilishi aytilmoqda.

Source link

«O‘zgidromet» ma’lumotlariga ko‘ra, bugun O‘zbekiston hududida havo biroz bulutli, ayrim joylarda o‘zgaruvchan bo‘ladi. Respublika bo‘ylab yog‘ingarchilik kutilmaydi.

Shamol sharqdan 7–12 m/s tezlikda esadi, ayrim hududlarda 13–18 m/s gacha kuchayishi va chang-to‘zonlar kuzatilishi mumkin. Havo harorati 35–40 daraja, shimoliy, janubiy va cho‘l hududlarida esa 43 darajagacha ko‘tariladi.

Toshkent shahrida ham yog‘ingarchilik kutilmaydi. Havo biroz bulutli bo‘ladi, shamol sharqdan 5–10 m/s tezlikda esadi. Harorat 38–40 daraja atrofida bo‘ladi.

Tog‘oldi va tog‘li hududlarda esa havo biroz bulutli, ba’zi joylarda o‘zgaruvchan bo‘ladi. Ayrim hududlarda qisqa muddatli yomg‘ir yog‘ishi va momaqaldiroq kuzatilishi mumkin. Harorat 27–32 darajani tashkil etadi.

Source link