XOQ tomonidan cheklovlarni bekor qilish bo‘yicha berilgan tavsiya musobaqalarga avtomatik ravishda ruxsat berilishini anglatmaydi. Har bir sport turi bo‘yicha yakuniy qarorlarni tegishli xalqaro federatsiya mustaqil ravishda qabul qiladi.

Foto: REUTERS/Denis Balibouse

Xalqaro olimpiya qo‘mitasi (XOQ) rossiyalik sportchilarga qo‘yilgan barcha cheklovlarni olib tashlashni tavsiya qildi, shuningdek, Rossiya Olimpiya qo‘mitasi (ROQ) huquqlarini vaqtincha tikladi, deyiladi tashkilot saytida.

Rossiya Olimpiya qo‘mitasiga nisbatan cheklovlar 2023 yil oktabr oyidan beri amal qilgan. Ular ROQ o‘z tarkibiga Ukrainaning o‘zini o‘zi e’lon qilgan DXR va LXR, shuningdek, anneksiya qilingan Zaporojiye va Xerson viloyatlarining olimpiya kengashlarini kiritgani munosabati bilan joriy etilgan edi.

XOQ huquqiy masalalar bo‘yicha komissiyasi tomonidan o‘tkazilgan «puxta tahlildan so‘ng» ROQ bo‘yicha qaror qabul qilindi. Shu bilan birga, Ukraina Milliy olimpiya qo‘mitasi (UMOQ) yurisdiksiyasi ostidagi hududlarda joylashgan sport tashkilotlari endi uning tarkibiga kirmasligi hisobga olindi.

ROQ anneksiya qilingan hududlarda ishlamayotganini va ishlamasligini tasdiqladi. Aprel oyida sport vaziri Mixail Degtyarev nomi ko‘rsatilmagan mintaqaviy sport tashkilotlari ROQ tarkibidan chiqarilganini ma’lum qilgan edi.

ROQ bo‘yicha cheklovlar qancha muddatga olib tashlanganiga aniqlik kiritilmagan. XOQ Ijro qo‘mitasi vaziyatni diqqat bilan kuzatib borishga va’da berdi.

Bundan tashqari, XOQ tomonidan rossiyalik sportchilarni faqat neytral maqomda qabul qilish va ularga nisbatan «himoya choralari» bo‘yicha berilgan barcha tavsiyalar bekor qilindi. Tashkilotning ta’kidlashicha, xalqaro musobaqalarga qaytayotgan barcha rossiyalik sportchilar amaldagi antidoping talablariga javob berishi kerak.

Tashkilot Olimpiya o‘yinlarida Rossiya bayrog‘i, madhiyasi, milliy ranglari va boshqa ramzlardan foydalanish bo‘yicha hali qaror qabul qilmaganini ta’kidladi. Shu bilan birga, XOQ o‘z tadbirlarini Rossiyada o‘tkazmasligini va rossiyalik amaldorlarni o‘z homiyligidagi tadbirlarga taklif etmasligini qo‘shimcha qildi.

Tegishli qarorlar bir kun avval 2028 yilda Los-Anjyelesda bo‘lib o‘tadigan Olimpiya o‘yinlari saralashining boshlanishi, shuningdek, «barcha sportchilar uchun musobaqalarga teng kirishni ta’minlash zarurati» munosabati bilan qabul qilindi.

Rossiya va Belarus sportchilari Rossiyaning 2022 yilda Ukrainaga keng ko‘lamli bostirib kirishidan so‘ng xalqaro musobaqalardan chetlatilgan edi. Keyinchalik bu mamlakat sportchilari neytral maqomda musobaqalarda ishtirok eta boshladi.

XOQ 2026 yil may oyida Belarusni jahon sportiga qaytarishni tavsiya qilgan edi.

XOQ tomonidan cheklovlarni bekor qilish bo‘yicha berilgan tavsiya musobaqalarga avtomatik ravishda ruxsat berilishini anglatmaydi. Har bir sport turi bo‘yicha yakuniy qarorlarni tegishli xalqaro federatsiya mustaqil ravishda qabul qiladi.

Source link

Paragvaylik senator fransuz futbolchisini keskin ohangda haqorat qildi. Kilian unga javob qaytardi. Makron ham futbolchining yonini olib chiqdi. Senator esa postini o‘chirib yubordi va o‘zini jabrdiyda qilib ko‘rsatmoqda: u futbolchini gender zo‘ravonlikda ayblagan.

JCh-2026 nimchorakfinalida Paragvay va Fransiya o‘rtasidagi uchrashuvda chiqqan olov tinay demayapti. Paragvaylik senator Kilian Mbappeni qattiq tanqid qildi irqchilikka yo‘l qo‘ydi.

«Mustamlakadan chiqqan kamerunlik. Takabbur va badbashara».

Paragvaylik senator Selesta Amarilya Fransiyaga qarshi o‘yindagi voqealarni shu qadar og‘ir qabul qildiki, X ijtimoiy tarmog‘idagi sahifasida Kilian haqida shunday so‘zlarni yozdi:

«Zo‘r berib o‘zini fransuz qilib ko‘rsatuvchi mustamlakadan chiqqan kamerunlik. Takabbur, puldor va badbashara. U butun o‘yin davomida asabiylashdi va butun jamoasi kabi o‘lgudek qo‘rqib ketdi, ular birorta gol ura olishmadi va faqat baxtli tasodif tufayli g‘alaba qozonishdi.

Paragvay jamoasiga ta’na qilish mumkin bo‘lgan yagona narsa – o‘yindan keyin hech kim unga shapaloq tortmagani.

Bu yigitcha hatto yozishni ham o‘rganmagan, ona suti o‘rniga kokos sutini ichgan, u tinglaganlar orasida eng o‘qimishlisi esa shimpanze bo‘lgan. Orlando Gil [Paragvay darvozabon] unga o‘rta barmog‘ini ko‘rsatishi kerak edi».

Amarilyaning Kilianga bunchalik kuchli nafrat izhor etishiga o‘yindan keyin Mbappe paragvayliklar darvozaboniga qo‘l berishdan bosh tortgani va uni masxara qilgani sabab bo‘ldi.

Shundan keyin darvozabon to‘pni unga qarata otib yuborgandi.

Qayd etish kerakki, Paragvayda juda ko‘pchilikni fransuz futbolchisining ushbu xatti-harakati qattiq norozi qildi – jamoa turnirni tark etganidan keyin mahalliy matbuotda unga hujum qilindi.

Mbappening xatti-harakati Argentina milliy jamoasi sobiq darvozaboni, o‘yinda DSpors telekanali uchun ishlagan Serxio Goykocheaga ham yoqmagan: «To‘g‘ri, buni Mbappening ijrosida ko‘rish achinarli. Men futbol folklorini tushunaman, ba’zi janjallarni tushunaman, lekin oxirida g‘alaba qozonganingda o‘zingni shunday tutish, tabassum qilish va maqtanishni emas».

«Siz lavozimiga noloyiq jirkanch ayolsiz». Mbappe javob qaytardi

Kilian Mbappe jim turishni istamadi va senatorga murojaatida to‘g‘ridan to‘g‘ri shunday dedi:

«Madam Selesta Amarilya, siz o‘z lavozimingizga munosib bo‘lmagan jirkanch ayolsiz. Siz Paragvayni – butun turnir davomida ehtirosli va sharafli o‘yin ko‘rsatgan mamlakatni ifoda etmaysiz.

Sizning so‘qirligingiz va oshkora irqchiligingiz tufayli butun dunyo futbolchilaringiz ushbu jahon chempionati davomida bosib o‘tgan yo‘lni va ko‘rsatgan tarixiy sa’y-harakatlarini allaqachon unutdi. Ular o‘z o‘rnini mamlakat uchun eng yomon imij yaratuvchi noshud xonimga bo‘shatib berishdi.

Men u kabi odamlarga nafrat va irqchilikni butun dunyo bo‘ylab bemalol yoyishga hech qachon yo‘l qo‘ymayman». 

Makron Mbappeni himoya qildi. Federatsiya senatorni sudga bermoqchi

Fransiyada hamma futbolchiga nisbatan irqchilikni qoralamoqda.

Fransiya milliy jamoasi bosh murabbiyi Dide Deshamning yordamchisi Gi Stefan bu so‘zlarni jirkanchlik deb atagan: «Biz bu haqda eshitdik. Buni hali Kilian bilan muhokama qilishga ulgurmadik. Uchta so‘z: bu nomunosib, jirkanch, qabih. Tabiiyki, men federatsiya bayonoti va Kilianning so‘zlariga qo‘shilaman» . 

Mbappeni Fransiya sport vaziri Marina Ferrari ham himoya qilib, Amarilyaning so‘zlarini g‘azabni keltiruvchi so‘zlar deb atadi va uning «irqchilik ruhidagi xuruji»ni qoraladi: «Kilian Mbappega hujum qilish orqali senator sardorimiz ifodalovchi barcha narsalarga va mamlakatimiz himoya qiladigan barcha narsalarga: erkinlik, tenglik va birodarlikka hujum qilmoqda. Kapitanimiz, murabbiyimiz va butun Fransiya milliy jamoasini to‘liq qo‘llab-quvvatlayman».

Fransiya futbol federatsiyasi prokuraturaga murojaat qilmoqchi: «Paragvaylik senator Selesta Amarilyaning Kilian Mbappega nisbatan irqchilik ruhidagi bayonotlari juda jirkanch va qabul qilib bo‘lmaydigan holdir. Qanday qilib bunday so‘zlar aytish mumkin? Bu jinoyatchilik va qoralanishga loyiqdir. Bunday so‘zlar qonun bo‘yicha ta’qib qilinishi kerak». Bunday chiqishlar mamlakatni ham haqoratlashi qo‘shimcha qilingan.

Fransiya prezidenti Emmanuel Makron ham Kilianning tarafini oldi: «Kilian Mbappe uchun yana bir gol – bu safar irqchilikka qarshi. Men uni to‘liq qo‘llab-quvvatlayman. Iflos so‘zlar ishlatilganda, qadriyatlarimiz javob beradi: qadr-qimmat, hurmat, birodarlik».

Paragvay hukumati senatorning so‘zlarini qoralab, bu so‘zlar «Paragvay xalqi pozitsiyasini aks ettirmasligi» qayd etildi:

«Paragvay – hokimiyatning bo‘linishi va uning tarmoqlari mustaqilligi tamoyili asosida boshqariladigan demokratik respublika. Bu o‘rinda mazkur senator o‘z so‘zlari uchun shaxsan javobgardir. Ular respublika hukumati yoki Paragvay xalqining pozitsiyasini aks ettirmaydi.

Hukumat inson huquqlarini himoya qilish, barcha insonlar uchun tenglik va hurmat g‘oyalariga sodiqligini, shuningdek, irqchilik, ksenofobiya, murosasizlik hamda nafrat va kamsitishning barcha shakllariga qarshi kurashda qat’iy ekanini tasdiqlaydi.

Shuningdek, u ushbu so‘zlardan jabrlanganlar bilan birdamligini bildiradi va Paragvayni uzoq yillik do‘stlik, hamkorlik va o‘zaro anglashuv munosabatlari bog‘lab turgan Fransiya xalqiga hurmatini yana bir bor izhor etadi».

«Dahshatli gender zo‘ravonligi»

Senatorning o‘zi esa chekinmoqchimas: u o‘z postini o‘chirdi, ammo futbolchini seksizmda ayblab, sud bilan tahdid qilmoqda.

«Mening postlarim his-tuyg‘ular jo‘sh urib turgan paytda, qonim qaynab turganida yozilgan edi. Oxirgi hushtakkacha siz bilan tengma-teng kurashgan ajoyib paragvaylik futbolchilarni masxara qilishingizni ko‘rib, yozgan edim.

Biroq sizga ham o‘zim haqoratlanganimdek haqorat bilan javob qaytarganimdan darhol pushaymon bo‘ldim. Men o‘zim nafratlanadigan xatti-harakatlarni takrorlaganimni anglab yetdim, shuning uchun postni o‘chirib tashladim. Mening gaplarim sizni ranjitganini tushunaman, chunki kamsitilish og‘riq beradi.

Endi sizdan ham so‘zingizdan qaytarib olib, mendan uzr so‘rashingizni talab qilaman. Men sizning haqoratlaringizga toqat qila olmayman. Siz meni tanimaysiz. Siz mening kimligimni bilmaysiz va meni o‘z lavozimiga noloyiq jirkanch ayol deb aytishga haqqingiz yo‘q.

Men Paragvay xalqining saylangan senatori hisoblanaman. Bundan oldin ham xalq tomonidan saylangan parlament deputati edim. Minglab paragvaylik erkaklar va ayollar menga ovoz berishgan va meni o‘z ovozi deb bilishadi. Mening asosiy vazifam – Paragvay xalqi nomidan gapirish, ular ayta olmaydigan narsalarni aytish va kerak bo‘lsa, mamlakatni hayotim evaziga himoya qilishdir.

Men o‘z mamlakatimni ifoda etaman, chunki meni erkin ovoz berish yo‘li bilan saylashgan. Men demokratik saylovlarda mamlakatda qonunlarni qabul qilishga yordam berish va uning ovozi bo‘lish uchun saylanganman. Siz o‘z mamlakatingizni himoya qilish va uning xalqini ifodalash uchun saylanish nimani anglatishini tasavvur ham qila olmaysiz.

Siz kimsizki, meni tanimay turib, nomunosib yoki jirkanch deysiz? Bu shafqatsiz gender zo‘ravonligi. Bu o‘z xalqining demokratik ovozi bilan o‘z lavozimiga sazovor bo‘lgan ayolga nisbatan siyosiy zo‘ravonlik hamdir.

Jinsim tufayli menga nafrat sochdingiz. Siz meni haqorat qilyapsiz, chunki men ayolman. Siz mening ayol va siyosiy vakil sifatidagi qadr-qimmatimga tajovuz qilyapsiz.

So‘zlaringizni qaytarib oling, Fransiya fuqaroligiga munosib bo‘ling va uzr so‘rang. Aks holda, gender zo‘ravonligi uchun sudga da’vo arizasi berishim mumkin».

Source link

Tunda jahon chempionatida chorakfinalning so‘nggi ishtirokchilari nomi ham ma’lum bo‘ladi.

Foto: Charlotte Wilson/Getty Images

7 iyul kuni kechqurun futbol bo‘yicha jahon chempionatida nimchorakfinal doirasida yana ikki uchrashuv o‘tkaziladi: dastlab Lionel Messi boshchiligidagi Argentina milliy jamoasi Muhammad Saloh boshchiligidagi Misrga qarshi maydonga chiqadi. Keyin esa Shveytsariya chorakfinal yo‘llanmasi uchun Kolumbiya bilan bahs olib boradi.

Hozirgacha chorakfinalning uchta juftligi aniq bo‘lgan:

Fransiya – Marokash

Angliya – Norvegiya

Ispaniya – Belgiya

Argentina–Misr va Shveytsariya–Kolumbiya juftliklari g‘oliblari keyingi bosqichda o‘zaro raqib bo‘ladi.

Argentina – Misr

7 iyul, 21:00. Mercedes-Benz Stadium, Atlanta

Boshqa turnirda bunday juftlikda Argentina shubhasiz favorit sanalgan bo‘lardi. Ammo o‘tgan bosqichda Kabo-Verde amaldagi jahon chempionlariga qarshi o‘yinda so‘nggi daqiqagacha intrigani saqlab qolgani – har qanday jamoadan syurpriz kutish mumkinligini ko‘rsatdi. Argentina o‘sha o‘yinda Sidni Lopesh Kabraldan ushbu bosqichning eng chiroyli golini o‘tkazib yubordi va faqat qo‘shimcha bo‘limlardagi avtogol evaziga keyingi bosqichga o‘tdi.

Qolaversa, argentinaliklarda bir futbolchiga qaramlik yaqqol ko‘zga tashlanmoqda: jamoa bu turnirda urgan 11 ta goldan 7 tasini 39 yoshli Lionel Messi urdi, gol+pas bo‘yicha undan keyingi eng yaxshi natija himoyachi Lisandro Martinesga (1+1) tegishli.

Leo jamoasining o‘yin natijasiga ta’sir ko‘rsatish bo‘yicha asosiy futbolchisi: har 90 daqiqada o‘rtacha gol urish (1,97), darvoza sohasiga to‘g‘ri borgan zarba berish (4,2) va jami zarbalar soni bo‘yicha (6,8) u birinchi.

Bu o‘yin uchun turnir to‘purarlari ro‘yxatida yaqqol birinchi o‘ringa chiqib olishi imkoniyati ham (hozirda undan tashqari Mbappe va Holandda ham 7 tadan gol bor). 

Messining sport formasiga savollar yo‘q – u chindan ham natija ko‘rsatmoqda, ammo futbolchining yoshidan kelib chiqilsa, Argentinaga bir futbolchiga qaramlik pand berib qolishi mumkin. 

Jazoir, Avstriya, Iordaniya va Kabo-Verde kabi jamoalarga hurmat saqlagan holda aytish mumkinki, «Albiseleste» yo‘lidan hozircha jiddiy raqiblar uchramadi. Jiddiy raqiblarga qarshi o‘yinlar boshlanganida esa Messida o‘yinning teng yarmini maydonda piyoda yurgan holda o‘tkazishga imkon bo‘lmaydi.

Bungacha bo‘lib o‘tgan o‘yinlarda ham unda charchoq sezilgan pallalarda na Lautaro, na Hulian Alvares va na Enso Fernandes mas’uliyatni o‘z zimmasiga olishga jazm etmoqda. Argentinada yuqori saviyali futbolchilar jamlangan, ammo ular bu turnirda Leo orqali hujum qilish yo‘llari yopilganida nima qilishni bilmay qolayotgandek ko‘rinmoqda. Mudofaa chizig‘i esa nisbatan kuchsiz raqiblarga qarshi o‘yinlarda ham ko‘p xatoga yo‘l qo‘ydi. Turnirning hal qiluvchi bosqichlarida esa bunday xatolar kechirilmaydi.

Albatta, argentinaliklar Misr bilan o‘yinda ham favorit bo‘lib qolaveradi, ammo katta turnirlarda toblangan raqibga (Misr Kabo-Verdedan bir bosh baland jamoa ekaniga shubha yo‘q) qarshi o‘yinda jamoa o‘yinidagi muammolar bo‘y ko‘rsatishi mumkin. Hussam Hassan shogirdlari to‘psiz holatda ham o‘zini yaxshi his qiladi, pozitsion jihatdan yaxshi himoyalanadi va qarshi hujumlarda xavfli. Bu o‘yindagi intriga Argentina qancha golli vaziyat yaratishida emas, balki butun o‘yin davomida diqqatni jamlagan holda qolish va raqibga imkon bermaslikni qanchalik uddalashida. Bu o‘yinni Messi va Salohdan qaysi biri vaziyatlardan yaxshiroq foydalanishi emas, kim jamoaviy o‘yin namoyish eta olishi hal qiladi.

Kolumbiya – Shveytsariya

8 iyulga o‘tar kechasi, 01:00. BC Place, Vankuver

Kolumbiya ham, Shveytsariya ham turnir g‘olibligi uchun asosiy da’vogarlar qatorida emas, ammo ikki jamoa ham uzoqqa borishga qodirligini ko‘rsatdi. Parallel uchrashuvlardagi favoritlar nisbatan kuchsiz jamoalarga (Paragvay, Kabo-Verde, Meksika) qarshi o‘yinlarda katta kuch yo‘qotayotgani inobatga olinsa, bu juftlik vakillarida imkoniyat yanada oshadi.

Kolumbiya ushbu o‘yinga yaxshi kayfiyatda kelmoqda, ammo 1/16 final o‘yini jamoa uchun yengil sayr bo‘lmadi. Ganaga qarshi o‘yinda Jon Ariasning yagona goli evaziga g‘alaba qozonildi, o‘yin esa Nestor Lorenso shogirdlari hisobni saqlab qolish uchun o‘ynashni juda yaxshi o‘rganganini yana bir bor ko‘rsatdi. Kolumbiyaliklar butun o‘yin davomida tashabbusga egalik qilishga intilmasdan, sabr bilan raqib xato qilishini kutdi va o‘ta xavfli qarshi hujumlar uyushtirdi. Jamoa turnir davomida atigi bir gol (Abbos Fayzullayevdan) o‘tkazgani bejiz emas.

Shveytsariya ham turnir davomida o‘zining kuchli tomonlarini namoyish eta oldi. Jazoirga qarshi o‘yinda tezkor gol urib olinganidan keyin yevropaliklar to‘pni raqibga topshirdi va butun o‘yin davomida ishonchli himoyalandi. Murat Yakin jamoasi yorqin futbol uchun tavakkalchilik qilmaydi va bu bosqichda kichik xato ham qimmatga tushishi mumkinligini juda yaxshi tushunadi.

Bu o‘yinda kim raqibni odatiy ssenariysini o‘zgartirishga majbur eta olsa, ustunlik o‘shanda bo‘ladi. Bu qarama-qarshilikda Kolumbiya birinchi raqam ostida harakat qilishi va yuqori chiziqda pressing uyushtirishini taxmin qilish mumkin, ammo Shveytsariya safida bosim ostida to‘pni ushlab turadigan va to‘p bilan oldinga bora oladigan Jaka kabi tajribali futbolchilar yetarlicha. Ikki xil o‘yin uslubidagi jamoalar bahsida ustun kelgan jamoa katta ehtimol bilan chorakfinalda Argentinaga qarshi o‘ynaydi.

Source link

Uning iqrori FIFA rahbarini noqulay ahvolda qoldirdi.

AQSh prezidenti Donald Tramp FIFAdan mamlakat milliy jamoasi hujumchisi Folarin Balogunning qizil kartochkasini bekor qilishni so‘raganini rasman tan oldi. Avvalroq Xalqaro futbol federatsiyasi shov-shuvli tarzda ushbu amerikalik futbolchining diskvalifikatsiyasini bir yilga kechiktirgandi va unga Belgiyaga qarshi o‘yinda qatnashish imkonini bergandi.

Prezidentning samimiy iqrori

Tramp 6 iyul kuni Oq uyda jurnalistlar bilan muloqot chog‘ida jahon chempionatidagi so‘nggi shov-shuvli voqealar yuzasidan bayonot berdi. Siyosatchining so‘zlariga ko‘ra, turnir 1/16 finalida Bosniya va Hersegovinaga qarshi kechgan o‘yinda (2:0) Balogunni chetlatish uchun hech qanday sabab bo‘lmagan.

«Men epizodni ko‘rdim. O‘zim yaxshi sportchi bo‘lganman, sportni yoqtiraman va uni juda yaxshi tushunaman. U yerda fol yo‘q edi. Shunchaki ikki baquvvat yigit katta tezlikda yugurayotib, o‘zaro to‘qnashib ketgan. Bu hakam esa… uning tarixini surishtiradigan bo‘lsak, savollar tug‘iladi. Bilasizmi, men mojaro keltirib chiqarishni yoqtirmayman, ammo u juda shubhali. U shunday qarorlar chiqarganki, hech kim ishonmagan. Hatto raqib jamoalar ham hayron bo‘lishgan», – dedi Tramp.

U sportdan xabardor ekanini aytganiga qaramay, futboldagi qoidalarni yaxshi tushunmasligini ko‘rsatib qo‘ydi.

«Ular bu vaziyatni sekinlashtirilgan kadrda qayta ko‘rib chiqmasligi kerak edi. Chunki u yerda barchasi boshqacha ko‘rinadi. Oddiy tezlikda qaraganda esa ikki yigit shunchaki to‘qnashib ketganini ko‘rish mumkin.

Balogun hech qanday yomon ish qilmadi. U – bizning eng yaxshi, juda muhim futbolchilarimizdan. Ular esa unga qizil kartochka ko‘rsatdi…

Men qizil kartochka nimaligini ham bilmasdim. Buni unchalik muhim emas deb o‘ylagandim. Keyin esa menga u keyingi o‘yinda qatnasha olmasligini aytishdi… Bu adolatsizlik bo‘lgan bo‘lardi. Eng yaxshi futbolchingdan o‘yin vaqtida ayrilish, kimnidir o‘yin davomida jazolash – boshqa ish. Ammo hali o‘ynalmagan o‘yin uchun jazolash – haddan tashqari adolatsizlik, bunday qilib bo‘lmaydi», – deya qayd etgan prezident.

Shundan keyin Tramp chindan ham FIFA prezidenti Janni Infantinoga qo‘ng‘iroq qilib, Balogunning diskvalifikatsiyasini bekor qilishni so‘raganini tan oldi.

«Shuning uchun, ha, men FIFAdan bu qarorni qayta ko‘rib chiqishni so‘radim. Men o‘zim juda hurmat qiladigan odam bilan gaplashdim. Darvoqe, uni endi yanada ko‘proq hurmat qila boshladim. Uni bungacha ham hurmat qilardim, endi esa o‘n karra ko‘proq hurmat qilaman. U AQShda jahon chempionatini o‘tkazish uchun juda ko‘p ish qildi.

Umuman olganda, bu yerda jahon chempionati mening sharofatim bilan o‘tkazilmoqda, Bayden tufayli emas. U vaqtda Bayden uxlayotgandi», – deya qo‘shimcha qilgan Tramp.

«Men FIFA adolatiga ishonaman»

So‘nggi kun davomida butun dunyo bo‘ylab tanqidga uchragan va iste’fosi talab qilingan Infantinoning o‘zi uchun esa Trampning iqrori yoqimsiz syurpriz bo‘ldi. Shuning uchun FIFA rahbari o‘zini oqlashga shoshilib, rasmiy murojaatini e’lon qildi. Futbol mulozimi AQSh prezidenti bilan gaplashganini tan olgan, ammo bu odatiy amaliyot ekanini va lobbizm bo‘yicha hech qanday shubha bo‘lmasligi kerakligini qayd etgan.

«Ha, men futbol bo‘yicha jahon chempionati bilan bog‘liq masalalarni muntazam ravishda Qo‘shma Shtatlar prezidenti bilan muhokama qilaman, chindan ham u menga qo‘ng‘iroq qildi. Menga dunyodan davlat rahbarlari, hukumat amaldorlari, futbol arboblari va biznes rahbarlaridan turli masalalar bo‘yicha shunday qo‘ng‘iroqlar bo‘lyapti. Suhbat davomida men FIFAning mustaqil sud organlari ishtirokida yuridik jarayon ketayotgani va bu masala vakolatli organlar tomonidan belgilangan tartibda hal etilishini tushuntirdim. FIFA tizimi shunday ishlaydi va bu men doimo amal qiladigan tamoyildir», – deydi Infantino.

FIFA prezidenti tashkilotning bunday masalalar bo‘yicha qarorlariga ta’sir ko‘rsata olmasligini va Balogunning qizil kartochkasi bekor qilinganidan boshqalar bilan bir vaqtda xabar topganini qo‘shimcha qilgan.

«FIFA sud organlari mustaqil. Ular mustaqil ravishda harakat qiladi, FIFA Intizom kodeksini qo‘llagan holda qoidalar va har bir ishning o‘ziga xos holatlarini inobatga olib, qaror qabul qilishadi. Ularning mustaqilligi futbolga ishonch va uning halolligi uchun juda muhimdir va bu har doim hurmat qilinishi kerak. Men FIFA intizomiy qo‘mitasi qarorlarini ular e’lon qilinganda o‘qiyman. Ba’zan ular meni ham hayratga soladi. Ba’zan ularga qo‘shilaman, ba’zan esa – yo‘q. Ammo men ularni va ularni qabul qiluvchi organlarning avtonomiyasini doimo hurmat qilaman. Bizga bu qaror yoqadimi yoki yo‘qmi – buning ahamiyati yo‘q», – degan Infantino.

Eslatib o‘tamiz, 6 iyul kuni Xalqaro futbol federatsiyasi jahon chempionati 1/16 finalida Bosniya va Hersegovinaga qarshi o‘yinda (2:0) qizil kartochka olgan Balogunning diskvalifikatsiyasini amalda bekor qildi (futbolchiga bir yil sinov muddati berildi, u shu vaqt ichida yana intizomiy qoidabuzarlik qiladigan bo‘lsa, jazo qo‘llanadi). Natijada amerikalik hujumchi 1/8 finalda Belgiyaga qarshi o‘ynaydigan bo‘ldi, holbuki reglament bo‘yicha u kamida ikki o‘yindan chetlatilishi ko‘zda tutilgandi. Tunda bo‘lib o‘tgan o‘yinda u maydonga tushdi va 90 daqiqa o‘ynadi, uch bor zarba berib, gol ura olmadi, AQSh esa yirik hisobda (1:4) yutqazdi.

Source link

AQShga esa katta shov-shuv ko‘tarib, o‘yinga tushirilgan Balogun ham yordam bera olmadi.

Ronaldu baribir jahon chempionatini zabt etolmadi

Portugaliya – Ispaniya 0:1

Gol: Merino, 90+1 (0:1)

Portugaliya: Koshta, Ruben Diash, Veyga, Nunu Mendesh (Semedu, 56), Joau Kanselu (Dalot, 71), Joau Nevesh, Vitinya (Bernardu Silva, 83), Brunu Fernandesh, Joau Feliks (Leau, 71), Pedru Netu (Konseysau, 83), Krishtianu Ronaldu

Ispaniya: Simon, Lyaport, Kubarsi, Kukurelya, Porro, Rodri, Pedri (Merino, 85), Olmo (Ruis, 85), Baena (Torres, 75), Yamal, Oyyarsabal (Iglesias, 90)

Ogohlantirishlar: Bernardu Silva, 89. Veyga, 90 – Torres, 90

Portugaliya 1/8 finalda Ispaniyaga qarshi o‘yinning qo‘shimcha daqiqalarida gol o‘tkazib, jahon chempionatini tark etdi. Bu Krishtianu Ronaldu uchun milliy jamoa safidagi oxirgi o‘yin bo‘lib qoldi.

O‘yinning ilk daqiqalarida – maydon markazi uchun kurash kechdi. Portugaliya maydon markazini Ispaniyaga boy bermadi. Yamal o‘yin debyutida Mendesh bosimi ostida bir necha bor oddiy vaziyatlarda to‘p yo‘qotdi. Shunga qaramay, o‘yindagi ilk xavfli vaziyat aynan ispanlarda yuzaga keldi. Sakkizinchi daqiqada Olmo chiziqlar orasini kesib o‘tuvchi pasi bilan Oyarsabalni yakkama-yakka vaziyatga chiqarib yubordi, ammo hujumchi shoshib qoldi va yaqin masofadan turib, xato zarba berdi.

Ko‘p o‘tmay Roberto Martines shogirdlari Ronalduni zarbdor pozitsiyaga chiqarish yo‘llarini izlay boshlashdi. Standart vaziyatlardan biri ijro etilganida Krishtianu Rodri bilan kontaktdan keyin jarima maydonida yiqildi. Ammo angliyalik hakam Teylor bu epizod folga tortmaydi, deb hisobladi. Keyin esa Portugaliya sardori o‘ng qanotda yaxshi ochildi va uzatmani qabul qilib, yaqin burchakka zarba berdi – ispanlar darvozaboni ishonchli harakat qildi.

Keyin esa seyv qilish navbati Diogu Koshtaga keldi: u Lamin Yamalning o‘z uslubida yo‘llagan aylanma zarbasini ham, qaytgan to‘pga Baena tomonidan berilgan ikkinchi zarbani ham qaytardi.

Bo‘lim oxirlarida esa tashabbus portugallar qo‘liga o‘tdi va Simon ham ikkitalik seyv amalga oshirdi: u avvaliga Felishning boshda yo‘llagan zarbasini, keyin Ronaldu akrobatik holatda yo‘llagan zarbani bartaraf etdi. 41-daqiqada Portugaliya bu safargi mundialda yana bir marta standart vaziyatni ayyorona ijro etdi. Mendesh olis burchakka kuchli zarba berdi, ammo to‘p Porroning boshiga tegdi va yo‘nalishini o‘zgartirib, to‘singa bordi.

Tanaffusdan keyin ham o‘yin qarama-qarshi kurslarda kechdi. Mendesh Yamalni zararsizlantirishda davom etdi, ammo 50-daqiqada amalda o‘yin natijasiga ta’sir ko‘rsatgan epizod sodir bo‘ldi. Lamin navbatdagi marta portugallar jarima maydoniga yorib kirdi, uni qarshi olgan Mendesh xavfni bartaraf etdi, ammo shu vaziyatda jarohat olib, o‘yinni davom ettira olmaydigan bo‘ldi.

Shundan keyin portugallar Yamalni ikki kishi bo‘lib qo‘riqlay boshladi, bu esa boshqalarning imkoniyatini yaxshiladi.

O‘yinning so‘nggi qismida futbolchilar charchab qolishdi va  murabbiylar shaxmat o‘ynashga kirishdi. De la Fuente Pedrini, Martines esa Vitinyani maydondan olishiga to‘g‘ri keldi.

O‘yin overtaymga qarab keta boshladi. Ammo o‘yinga qo‘shib berilgan daqiqalar boshlanganida portugallar konsentratsiyani yo‘qotishdi. Portugallar safida zaxiradan o‘yinga qo‘shilgan Bernardu Silva keraksiz vaziyatda Mikel Merinoga fol ishlatdi, ispanlar to‘pni tezda o‘yinga kiritib yuborishdi va kombinatsiya yakunida «Arsenal» yarimhimoyachisi darvozabon bilan yakkama-yakka vaziyatga chiqib borib, g‘alaba golini urdi.

Portugallar qolgan daqiqalarni to‘liq hujumda o‘tkazishdi, ammo mag‘lubiyatdan qutulib qola olishmadi.

Yevropa chempionlari jahon chempioni bo‘lish yo‘lidagi yurishini davom ettirdi. Ronaldu uchun esa jahon chempioni bo‘lish armon bo‘lib qoladigan bo‘ldi.

Belgiya AQShni jazoladi

AQSh – Belgiya 1:4

Gollar: De Ketelare, 9 (0:1). Tillman, 31 (1:1). De Ketelare, 33 (1:2). Vanaken, 57 (1:3). Lukaku, 90+3 (1:4)

AQSh: Friz, Richards, Rim, Robinson (Arfsten, 90+2), Frimen, Adams (Pepi, 72), Tillman, Makkenni, Pulishich (Berhalter, 59), Dest (Reyna, 46), Balogun (Rayt, 90+2)

Belgiya: Kurtua, Mehele, Ngoy, De Kyuyper, Kastan, Raskin (Vitsel, 89), Onana (Vanaken, 21), Tilemans, Trossar (Salemakers, 89), Lukebakio (Lukaku, 67), De Ketelare (Doku, 67)

Ogohlantirishlar: Makkenni, 35. Tillman, 69

AQSh va Belgiya milliy jamoalari o‘zaro o‘yinda chorakfinalda Ispaniyaga kim raqib bo‘lishiga oydinlik kiritishdi. Yakunda turnir mezbonlari yirik hisobda mag‘lub bo‘lishdi.

Aytish mumkinki, o‘yin oldidan bo‘lib o‘tgan voqealar Belgiya futbolchilarini yanada jipslashtirdi (FIFA Trampning so‘rovi bilan Folarin Balogunning diskvalifikatsiyasini kechiktirgan, Belgiya tomonining e’tirozi esa qanoatlantirilmagandi).

O‘yin boshlanishi arafasida jamoa sardori Romelu Lukaku butun jamoani bitta joyga yig‘di va ehtirosli nutq so‘zladi. Va «qizil iblislar» ilk daqiqalardan raqibni yanchib tashlash uchun oldinga tashlanishdi – yevropaliklar bu turnir boshidan buyon bu qadar jahldor ko‘rinishmagandi. Amerikaliklar darvozaboni Metyu Friz birinchi daqiqadayoq qahramonlik ko‘rsatib, Timoti Kastanning yuqori burchakka yo‘llagan zarbasini qaytarishiga to‘g‘ri keldi. Ammo u uzoq dosh berolmadi va Sharl De Ketelare 9-daqiqada baribir hisob ochdi. 

Mezbonlar esa maydonda umuman yo‘qolib qolishdi. Muxlislar Jyessi Marsh shogirdlarini bu turnirda hali bu qadar ilojsiz va parokanda holda ko‘rishmagandi. Va faqat suv ichish uchun qilingan tanaffusdagina Maurisio Pochettino shogirdlarini o‘ziga keltira oldi va ko‘p o‘tmay hisob tenglashdi. Bu vaziyatda Malik Tillmanning zarbasidan keyin to‘p raqib futbolchisiga tekkan holda yo‘nalishni o‘zgartirishi amerikaliklarga qo‘l keldi.

Ammo Belgiya o‘tkazib yuborilgan golni his qilmadi. Jamoa to‘p maydon markaziga keltirilishi bilan yana oldinga yugurdi va hisobda yana oldinga chiqib oldi – De Ketelare bu safar Leandro Trossarning qanotdan uzatmasini golga aylantirdi. Birinchi bo‘lim statistikasi maydondagi vaziyatni yaqqol ifodalardi: zabalar soni – 11:3, darvoza sohasiga to‘g‘ri borgan zarbalar soni – 5:1, xG – 1,90 ga 0,42. Barchasi Belgiya foydasiga.

Birinchi bo‘lim oxiri va ikkinchi bo‘lim boshini AQSh nisbatan yaxshi o‘tkazdi, ammo 57-daqiqadagi halokatli xato o‘yin taqdirini hal qildi. Darvozabon Friz himoyachilarga yordam berish uchun jarima maydonini tashlab chiqdi, ammo to‘pdan o‘z vaqtida qutulish o‘rniga sustkashlik qildi va uni Vanakenga sovg‘a qildi – belgiyaliklar yarimhimoyachisi esa osonlik bilan bo‘sh darvozani ishg‘ol etdi. Amerikaliklar sardori Tim Rim zarbani to‘sishi mumkin edi, ammo to‘p yo‘liga oyog‘ini to‘g‘ri qo‘ya olmadi.

Biroz o‘tib mezbonlar yetakchisi Kristian Pulishich jarohat olib maydonni tark etdi. Qolgan daqiqalarda amerikaliklar javob golini urishga qattiq harakat qilishdi, ammo o‘yin yirik hisobda yakunlandi. Romelu Lukaku bu safar ham zaxiradan o‘yinga qo‘shilib, o‘z nomini tabloga yozdirib qo‘ydi va jahon chempionatida to‘rtta o‘yinda joker sifatida gol urgan ilk futbolchiga aylandi.

Endi «qizil iblislar» 10 iyul kuni chorakfinal doirasida Ispaniyaga qarshi maydonga tushadi.

Source link