1 iyuldan pensiya, nafaqa va moddiy yordam to‘lovi, 1 sentabrdan oylik-maoshlar oshiriladi. O‘zbekiston futbol milliy jamoasi jahon chempionatida Portugaliyaga yirik hisobda yutqazdi. Qirg‘iziston va O‘zbekiston o‘zaro kelishuvga ko‘ra hududlarni almashdi. Soliq qo‘mitasi bank siriga keng miqyosda kirish imkoniyatini olmoqchi. Xavfli deb topilgan yonilg‘i shoxobchalari xavfsiz hududlarga ko‘chiriladi. Kunning muhim yangiliklari bilan tanishtiramiz.

1 iyuldan pensiya va nafaqalar, 1 sentabrdan oylik-maoshlar oshadi

Prezident farmoniga ko‘ra, 1 iyuldan pensiya va nafaqa hamda Ijtimoiy reyestrga kiritilgan oila bolalari nafaqasi va moddiy yordam to‘lovi miqdori 7 foizga oshiriladi.

Bunda yoshga doir eng kam pensiya miqdori oyiga 983 ming so‘m, nogironlik pensiyasining eng kam miqdori oyiga 1 mln 83 ming so‘m bo‘ladi.

1 sentabrdan budjet tashkilotlarida ish haqi, shuningdek, stipendiya miqdori ham 7 foizga oshiriladi. Jumladan, mehnatga haq to‘lashning eng kam miqdori oyiga 1 mln 360 ming so‘m, bazaviy hisoblash miqdori 440 ming so‘m etib belgilandi.

Milliy jamoa jahon chempionatida Portugaliyaga yirik hisobda yutqazdi

Bosh murabbiy Fabio Kannavaro shogirdlari JCh-2026 guruh bosqichining 2-turida Yevropaning nomdor vakiliga jiddiy qarshilik ko‘rsata olmadi va 0:5 hisobida yutqazdi. Krishtianu Ronaldu o‘yinda ikkita gol urdi. Shunday bo‘lsa-da, o‘zbekistonliklar guruhdan chiqish imkoniyatini yo‘qotmadi.

O‘yindan keyin Fabio Kannavaro ushbu jahon chempionati futbolchilar uchun tajriba bo‘lishini aytdi. Hujumchi Eldor Shomurodov mag‘lubiyat uchun muxlislardan uzr so‘radi va yakuniy o‘yinda g‘alaba uchun harakat qilishga va’da berdi.

Qirg‘iziston va O‘zbekiston o‘zaro kelishuvga ko‘ra hududlarni almashdi

O‘zbekiston bilan davlat chegarasini demarkatsiya qilish doirasida ikkita aholi punkti – Cho‘ng‘ara va Tosh-Tobo Qirg‘iziston tarkibiga o‘tdi. Ilgari Farg‘ona viloyati tarkibiga kirgan ushbu qishloqlarning 2 ming 500 ga yaqin aholisi etnik qirg‘izlar bo‘lib, endi Qirg‘iziston fuqaroligini oladi. Qirg‘iziston tomoni O‘zbekistonga chegara zonasida teng maydonli yer uchastkalarini bergan.

Eslatib o‘tamiz, ikki davlat tashqi ishlar vazirlari 2022 yil noyabr oyida Qirg‘iziston-O‘zbekiston davlat chegarasining alohida uchastkalari to‘g‘risidagi shartnomani imzolagan, 2023 yil yanvar oyida Shavkat Mirziyoyevning Bishkekka davlat tashrifi doirasida ikki davlat prezidentlari ratifikatsiya yorliqlarini almashgan edi.

Soliq qo‘mitasi bank siriga keng miqyosda kirish imkoniyatini olmoqchi

Soliq qo‘mitasi banklarga mijozlari haqidagi ko‘plab axborotlarni uzatib turish majburiyatini yuklovchi qaror loyihasini muhokamaga qo‘ydi.

Loyihada “Bank-soliq” nomli avtomatlashtirilgan axborot almashish modulini ishlab chiqish va joriy etish masalasi ilgari surilgan. Unda kartasiga oyiga 206 mln so‘mdan ortiq pul o‘tkazilgan fuqarolar haqidagi ma’lumotlar soliq organiga taqdim etib borilishi nazarda tutilgan. Tadbirkorlarning hisobiga naqd yoki terminal orqali har qanday summadagi tushumlar va ularning yirik operatsiyalari haqidagi ma’lumotlar ham soliq organida jamlanishi mumkin.

Hukumat qarori shaklidagi hujjat loyihasi bo‘yicha jamoatchilik muhokamasi 8 iyulgacha davom etadi.

Xavfli deb topilgan yonilg‘i shoxobchalari xavfsiz hududlarga ko‘chiriladi

Vazirlar Mahkamasining tegishli qarori bilan yonilg‘i quyish shoxobchalari va gaz to‘ldirish inshootlarida avariya hamda noxush hodisalarning oldini olishga qaratilgan qo‘shimcha chora-tadbirlar belgilandi. Qarorga muvofiq, hokimliklar 1 sentabrga qadar xavfsizlik, sanoat va yong‘in xavfsizligi, ekologik hamda shaharsozlik normalariga javob bermaydigan yonilg‘i quyish shoxobchalari va gaz to‘ldirish inshootlari reyestrini shakllantiradi.

Shundan so‘ng mazkur obektlarni bosqichma-bosqich xavfsiz hududlarga ko‘chirish bo‘yicha chora-tadbirlar ishlab chiqiladi. Qarorda ko‘chirilgan obektlar joylashgan yer uchastkalariga bo‘lgan huquqlar tadbirkorlar ixtiyorida saqlanib qolishi belgilangan.

Mazkur choralar yonilg‘i quyish shoxobchalari va gaz to‘ldirish inshootlarida xavfsizlik talablarini kuchaytirish, avariyalar xavfini kamaytirish hamda aholi xavfsizligini ta’minlashga qaratilgani ta’kidlanmoqda.

Source link

So‘nggi tur arafasida guruhlarda qanday intrigalar bor va kimga qanday natija kerak?

2026 yilgi jahon chempionatida barcha jamoalar ikkitadan o‘yin o‘tkazib bo‘lishdi va uchinchi turni boshlash arafasida. Shundan keyin pley-offning barcha ishtirokchilari nomi ma’lum bo‘ladi.

Chempionat reglamentiga ko‘ra, yangi format bo‘yicha guruhlardan 32 ta jamoa keyingi bosqichga o‘tadi: 12 ta guruhda birinchi va ikkinchi o‘rin egalari avtomatik ravishda pley-off ishtirokchisiga aylanadi, shuningdek, uchinchi o‘rinni olgan 12 ta jamoadan eng yaxshi natijaga ega 8 jamoa ular safiga qo‘shiladi.

Bir guruhda ikki yoki undan ortiq jamoalarning ochkolari soni teng kelib qolgan taqdirda, ko‘rsatkichlar quyidagi tartibda hisobga olinadi:

– o‘zaro o‘yinlardagi ochkolar soni;

– o‘zaro o‘yinlardagi gollar nisbati;

– o‘zaro o‘yinlarda urilgan gollar soni;

– umumiy to‘plar nisbati;

– jami urilgan gollar soni;

– feyr-pley reytingidagi intizomiy ballar soni kamligi: sariq kartochka – 1 ball, to‘g‘ridan to‘g‘ri bo‘lmagan qizil kartochka – 3 ball, to‘g‘ridan to‘g‘ri qizil kartochka – 4 ball, sariq va to‘g‘ridan to‘g‘ri qizil kartochka – 5 ball;

– FIFA reytingidagi o‘rin.

Uchinchi o‘rin egalari orasidagi eng yaxshi jamoalarni aniqlash uchun:

– jami ochkolar soni;

– jami gollar nisbati;

– jami urilgan gollar soni;

– feyr-pley reytingidagi intizomiy ballar soni kamligi;

– FIFA reytingidagi o‘rin.

Ikki turdan keyin Meksika (A), AQSh (D), Germaniya (E), Argentina (J) milliy jamoalari ikkitadan o‘yinda g‘alaba qozonib, guruh g‘olibligini naqd qilishgan. Shuningdek, Fransiya va Norvegiya (ikkisi ham I guruhida) hamda Kolumbiya (K) ham ikkitadan g‘alabaga erishib, pley-off masalasini muddatidan oldin hal qilishgan, lekin bu guruhlarda kim birinchi o‘rinni egallashi hozircha aniq emas.

A guruhi

A guruhida ikki turdan keyin bitta intriga allaqachon yopilgan: Meksika birinchi o‘rinni kafolatlagan va 1/16 finalga chiqqan. Janubiy Koreya ikkinchi o‘rinda kelmoqda, Chexiya va JAR so‘nggi turda turnirda qolish uchun kurashadi.

3-tur o‘yinlari. Chexiya – Meksika, JAR – Koreya. Ikki o‘yin ham 25 iyun kuni Toshkent vaqti bilan soat 04.00 da boshlanadi.

– Meksika allaqachon guruh g‘olibligini kafolatlagan. Chexiyaga yutqazsa ham mezbonlar birinchi o‘rindan tushib ketmaydi: JAR ustidan g‘alaba qozonsa, Koreyada ham ochkolar soni 6 taga yetadi, ammo meksikaliklar o‘zaro o‘yindagi g‘alaba evaziga (1:0) yuqorida qoladi.

– Koreyaga to‘g‘ridan to‘g‘ri 1/16 finalga yo‘l olish uchun JAR bilan o‘yindagi durang ham kifoya qiladi. Osiyoliklar jamoasi o‘zaro uchrashuv natijasiga ko‘ra (2:1) Chexiyadan ustun. Janubiy afrikaliklardan mag‘lubiyat koreyaliklar uchun jiddiy muammolar tug‘dirishi mumkin: agar chexlar ham Meksikani yengadigan bo‘lsa, Son Heung Ming jamoadoshlari uch ochko bilan to‘rtinchi o‘ringa tushib ketadi, agar chexlar g‘alaba qozona olmasa, uchinchi o‘rin egalarining yakuniy turnir jadvali shakllanishini kutishga to‘g‘ri keladi.

– To‘g‘ridan to‘g‘ri yo‘llanmaga ega bo‘lish uchun Chexiyaga birinchi navbatda Meksika ustidan g‘alaba qozonish, shu bilan birga, Koreya JAR bilan o‘yinda kerakli hisobda yutqazishi kerak bo‘ladi. Chexiya va JAR o‘rtasidagi o‘zaro o‘yinda durang qayd etilgandi – 1:1, ochkolar teng kelib qolgan taqdirda barchasini umumiy gollar nisbati hal qiladi, hozircha Yevropa vakillarida vaziyat yaxshiroq (+1). Chexlarni minimal hisobdagi g‘alaba ham qoniqtirishi uchun janubiy afrikaliklar ham bittadan ortiq gol farqi bilan g‘alaba qozonmasligi talab etiladi. Agar Chexiya JARga qaraganda bitta kamroq gol ursa, bu jamoalarda to‘plar nisbati bo‘yicha ham tenglik yuzaga keladi – shundan keyin urilgan gollar soniga qaraladi, undan keyin ish intizomiy ballarni hisoblash va FIFA reytingidagi o‘rinlarni ko‘rib chiqishgacha borishi mumkin. Lekin to‘rt ochko ham uchinchi o‘rin bilan guruhdan chiqish imkoni bo‘ladi – buning uchun kamida to‘rtta guruhdagi uchinchi o‘rin egalaridan yaxshiroq ko‘rsatkichlarga ega bo‘lish talab qilinadi.

– JARni Koreya bilan o‘yinda faqat g‘alaba qoniqtiradi. Shu shart bajarilsa va Chexiya Meksikani yenga olmasa, janubiy afrikaliklar ikkinchi o‘rin bilan to‘g‘ridan to‘g‘ri pley-offga chiqadi. Agar chexlar ham o‘z o‘yinida g‘alaba qozonadigan bo‘lsa, janubiy amerikaliklarga Yevropa vakillariga qaraganda yirikroq g‘alaba kerak bo‘ladi. Va yana shu gap – jamoa 4 ochko bilan uchinchi o‘rinda qolsa ham, umumiy reytingda yuqoriroqda joylashib, pley-offga o‘tishi aniq, lekin ikki ochko bilan uchinchi o‘rin orqali guruhdan chiqish amalda imkonsiz.

A guruhi vakillariga pley-offda kim raqib bo‘ladi?

Ushbu guruh g‘olibi C, E, F, H yoki I guruhlaridan uchinchi o‘rin bilan chiqqan jamoalardan biriga qarshi o‘ynaydi. Meksika allaqachon guruhdagi o‘z o‘rnini biladi, ammo kim raqib bo‘lishi aniq emas.

Guruhdagi ikkinchi o‘rin B guruhidan ikkinchi o‘rin bilan chiqadigan jamoaga (hozir bu Shveytsariya) qarshi o‘ynaydi.

Guruhning uchinchi jamoasi (agar turnirdagi ishtirokini davom ettirsa), E yoki G guruhlari g‘olibiga to‘qnash kelishi mumkin.

B guruhi

Kanada va Shveytsariya 4 tadan ochko jamg‘arib, Bosniya va Hersegovina hamda Qatardan oldinlab ketishgan. Hozircha bu jamoalar to‘g‘ridan to‘g‘ri yo‘llanmani rasmiylashtirmadi, ammo guruh jadvali yetakchilariga o‘zaro o‘yinda yutqazmaslik yetarli bo‘ladi. Bosniyaliklar va qatarliklarda uchinchi o‘rin uchun imkoniyat saqlanib qolmoqda, guruhdan to‘g‘ridan to‘g‘ri yo‘llanmaga ega bo‘lish uchun esa so‘nggi turda jamolardan biri yirik hisobda g‘alaba qozonishi talab etiladi.

3-tur o‘yinlari. Shveytsariya – Kanada, Bosniya va Hersegovina – Qatar. Ikki o‘yin ham 24 iyunga o‘tar kechasi soat 00.00 da boshlanadi.

– Kanadaga guruh g‘olibi bo‘lish uchun Shveytsariya bilan o‘yinda durang natija kifoya qiladi. Ochkolar tengligicha qolgan taqdirda, turnir mezbonlari to‘plar nisbati bo‘yicha ustunlikka ega bo‘ladi: kanadaliklarda – +6, shveysarlarda – +3.

– Shveytsariya faqat Kanadani yengish orqali birinchi o‘ringa chiqishi mumkin. Durang natija yevropaliklarni ikkinchi o‘rin orqali pley-offga olib chiqadi, hatto mag‘lubiyatga uchralgan taqdirda ham eng yaxshi ko‘rsatkichga ega uchinchi o‘rinlardan biri sifatida 1/16 finalga yo‘l olish mumkin.

– Ikkinchi turda Qatarni yirik hisobda mag‘lub etgan (6:0) Kanada faqat quyidagi shart bilan uchinchi o‘ringa tushib ketishi mumkin: Shveytsariyadan mag‘lubiyatga uchrab, Bosniya Qatar ustidan yirik hisobda g‘alaba qozonsa. Ikki o‘yindagi to‘plar farqi 9 taga yetsa (masalan, kanadaliklar 0:3 hisobida yutqazsa va bosniyaliklar 6:0 hisobida g‘alaba qozonsa), o‘zaro o‘yinda durang qayd etilgani (1:1) tufayli keyingi o‘lchovlarga (urilgan gollar soni, intizomiy reyting, FIFA reytingi) qaraladi.

– Ikkinchi turda Bosniyani yirik hisobda (4:1) mag‘lub etgan Shveytsariya uchinchi o‘ringa tushib ketishi uchun quyidagi shartlar bajarilishi kerak: Kanadaga yutqazishi va Qatar Bosniya ustidan yirik hisobda g‘alaba qozonishi. Va bu yerda ham to‘plar farqi roppa-rosa 9 ta bo‘lsa, unda o‘zaro uchrashuvdagi tenglik (1:1) tufayli keyingi o‘lchovlarga qaraladi.

– Bosniyaga Qatar ustidan g‘alaba kerak. 4 ochkoga ega bo‘ladigan istalgan jamoa uchinchi o‘rin egalari orasida kuchli sakkizlikka kiradit. To‘g‘ridan to‘g‘ri yo‘llanma uchun esa o‘z o‘yinida yirik hisobda g‘alaba qozonish va Kanada va Shveytsariyadan yirik hisobda yutqazishini kutish kerak bo‘ladi.

– Qatarni Bosniya bilan o‘yinda faqat g‘alaba qoniqtiradi. To‘g‘ridan to‘g‘ri chiqish uchun esa Bosniyani yirik hisobda yengish va Shveytsariya Kanadaga yirik hisobda yutqazishiga umid qilish kerak bo‘ladi.

– Bosniya va Qatar o‘rtasidagi bahsda durang ikki jamoani ham guruhda qoldiradi: 2 ochko – uchinchi o‘rin egalari reytingida sakkizlikka kirish uchun yetarli bo‘lmaydi. Bunday ssenariyda to‘plar nisbati tufayli Bosniya uchinchi, Qatar to‘rtinchi bo‘ladi.

B guruhi vakillariga pley-offda kim raqib bo‘ladi?

Ushbu guruh g‘olibi E, F, G, I yoki J guruhlaridan uchinchi o‘rin bilan chiqadigan jamoalardan biriga qarshi o‘ynaydi.

Guruhning ikkinchi vakili A guruhining ikkinchi vakiliga (hozir bu Koriya) to‘qnash keladi.

Guruhning uchinchi vakili (agar guruhdan chiqa olsa), D yoki E guruhlari g‘oliblaridan biri bilan o‘ynashi mumkin.

C guruhi

Braziliya va Marokash 4 tadan ochkoga ega, ammo 1/16 final yo‘llanmasini hali rasmiylashtirmagan. 3 ochkoga ega Shotlandiya ham top-2 uchun kurashda qolmoqda. Haiti esa so‘nggi tur natijalaridan qat’i nazar o‘zaro o‘yindagi mag‘lubiyat tufayli shotlandlarni quvib o‘ta olmaydi va to‘rtinchi o‘rindan yuqoriga ko‘tarila olmaydi.

3-tur o‘yinlari. Shotlandiya – Braziliya, Marokash – Haiti. Ikki o‘yin ham 25 iyunga o‘tar kechasi soat 03.00 da boshlanadi.

– Braziliya 1/16 finalga to‘g‘ridan to‘g‘ri yo‘llanma olishi uchun Shotlandiyani mag‘lub etishi kifoya. Parallel uchrashuvda Marokash Haitini yenga olmasa, guruhda birinchi o‘rin pentakampeonlarda qoladi. Shu bilan birga, Marokash Haitini mag‘lub etgan taqdirda ham Braziliya o‘z o‘yinida g‘alaba qozonib ham birinchi o‘rinda qolishi mumkin. Brazillar marokashliklar bilan o‘zaro o‘yinda durang hisob qayd etishgan (1:1), hozircha to‘plar nisbati afrikaliklarnikiga qaraganda yaxshiroq (+2), shuning uchun janubiy amerikaliklar ochkolar teng kelgan taqdirda yuqorida qolishadi.

– Marokashga 1/16 finalga chiqish uchun Haitiga yutqazmaslik kifoya qiladi. G‘alaba afrikaliklarni birinchi o‘ringa olib chiqishi mumkin, ammo buning uchun Braziliya Shotlandiya bilan o‘yinda ochko yo‘qotishi yoki marokashliklar o‘z o‘yinida yirikroq hisobda g‘alaba qozonib, to‘plar nisbatini yaxshiroq qilib olishi kerak bo‘ladi. Shu bilan birga, mag‘lubiyat ham Marokashni uchinchi o‘ringa tushirib yubormasligi mumkin – buning uchun Shotlandiya Braziliyani mag‘lub etmasligi kerak, ochkolar teng kelib qolgan taqdirda marokashliklar shotlandlar bilan o‘zaro o‘yin natijasiga ko‘ra (1:0) yuqorida qoladi. Marokash uchun eng xavfli ssenariy – o‘z o‘yinida Haitiga mag‘lub bo‘lishi va Shotlandiya Braziliyadan ustun kelishidir, bu holda brazillar bilan qo‘shimcha ko‘rsatkichlar bo‘yicha bahslashishga to‘g‘ri keladi.

– Agar Braziliya va Marokash o‘z o‘yinlarida yutqazadigan bo‘lsa, ularda 4 tadan ochko bo‘ladi, o‘zaro o‘yinda durang qayd etilgani tufayli barchasini to‘plar nisbati hal qiladi. Hozirda Braziliyada bu yaxshiroq – +3, Marokashda esa – +1. Brazillar voqealarning salbiy rivojida ham ikkinchi o‘rinni o‘zida saqlab qolishadi, buning uchun Anchelotti shogirdlari oxirgi turda ikki yoki undan ko‘p to‘p farqi bilan yutqazmasligi kerak – aks holda afrikaliklar Janubiy Amerika vakillaridan yuqoriga chiqib ketadi.

– To‘g‘ridan to‘g‘ri pley-offga chiqish uchun Shotlandiya Braziliya ustidan g‘alaba qozonishi kerak bo‘ladi. Britanlar jamoasi shunda 6 ochko bilan top-2 dan o‘rin olishi aniq, Marokash Haiti bilan o‘yinda ochko yo‘qotgan taqdirda birinchi o‘rinni ham o‘ziniki qiladi. Braziliya bilan durang hisob Shotlandiyani 4 ochko bilan uchinchi o‘rinda qoldiradi va bu uchinchi o‘rinlar orasidagi eng yaxshi natijalardan biri bo‘lishi aniq. Mag‘lubiyat ham shotlandlarni uchinchi o‘rindan pastga tushirib yubormaydi, ammo bu holda ular boshqa guruhlardagi 3-o‘rin egalarining natijalari yomonroq bo‘lishiga umid qilishi kerak bo‘lib qoladi.

– Haiti allaqachon 1/16 finalga chiqish imkoniyatini yo‘qotgan. KONKAKAF vakillari so‘nggi o‘yinida Marokashni mag‘lub etgan taqdirda ham uchinchi o‘rin uchun raqobatchisi Shotlandiya bilan o‘zaro o‘yindagi mag‘lubiyat (0:1) tufayli yuqoriga ko‘tarila olmaydi.

C guruhi vakillariga pley-offda kim raqib bo‘ladi?

Ushbu guruh g‘olibi F guruhidan ikkinchi o‘rin bilan chiqqan jamoaga qarshi o‘ynaydi (hozir bu Yaponiya).

Guruhning ikkinchi o‘rin egasi F guruhi g‘olibiga (hozir bu Niderlandiya) qarshi maydonga tushadi.

Guruhda uchinchi o‘rinni olgan jamoa (agar turnirda qolsa), A, E yoki I guruhi g‘oliblaridan biriga qarshi o‘ynashi mumkin.

Source link

Jahon chempionati guruh bosqichi ikkinchi turidan o‘rin olgan Kolumbiya – Kongo uchrashuvi bo‘lib o‘tdi.

JCh-2026. Guruh bosqichi, 2-tur

Kolumbiya – Kongo 1:0 

Gol: Munoz 76, 1:0.

Natijada O‘zbekiston termasining guruhdan chiqishi oxirgi turga bog‘liq bo‘lib qoldi. Uchinchi turda termamiz Kongo bilan o‘ynaydi. 

Jahon chempionati L guruhi 2-turi doirasidagi uchrashuv yakunlandi.Angliya Gana termasini yenga olmadi. 

JCh, L guruhi, 2-tur

Angliya — Gana 0:0

Xorvatiya 2026-yilgi FIFA Jahon chempionatida Panamani mag‘lub etib, o‘zining ilk g‘alabasini qo‘lga kiritdi. 

L guruhining ikkinchi bosqich o‘yini Torontoda bo‘lib o‘tdi va 1:0 hisobida yakunlandi. Ante Budimir yagona golni urdi. 

Luka Modrich Xorvatiya terma jamoasi safida 200-uchrashuvini o‘tkazdi. Faqat Portugaliya terma jamoasi vakili Krishtianu Ronaldu (230), Quvayt terma jamoasi vakili Bader Al-Mutava (202) va Argentina terma jamoasi vakili Lionel Messi (201) o‘z terma jamoalari safida ko‘proq o‘yin o‘tkazgan. 

Xorvatiya 2026 yilgi FIFA Jahon chempionatida o‘zining ilk g‘alabasini qo‘lga kiritdi va uch ochko to‘pladi. Ular guruhda Angliya va Ganadan keyin uchinchi o‘rinda, ikkalasida ham to‘rt ochko bor.

Source link

Kolumbiya Kongo DR bilan o‘yinda minimal hisobda g‘alaba qozondi va O‘zbekiston uchun imkon qoldirdi. Endi nazariy jihatdan so‘nggi turda O‘zbekiston kongoliklarni yengish orqali, 3-o‘rin bilan pley-offga chiqishi mumkin bo‘ladi.

Ronaldu qatorasiga oltinchi chempionatda gol urdi

Portugaliya – O‘zbekiston 5:0

Gollar: Ronaldu, 6 (1:0). Mendesh, 17 (2:0). Ronaldu, 39 (3:0). Ne’matov, 60 avtogol (4:0). Leau, 87 (5:0)

Portugaliya: Koshta, Ruben Diash, Veyga, Nunu Mendesh, Joau Kanselu (Semedu, 46), Joau Nevesh (Bernardu Silva, 76), Vitinya (Leau, 83), Brunu Fernandesh, Joau Feliks (Trinkau, 63), Pedru Netu (Konseysau, 46), Krishtianu Ronaldu

O‘zbekiston: Ne’matov, Abdullayev, Ashurmatov, Husanov, Shukurov (Esonov, 90+2), Hamrobekov (Alijonov, 46), Nasrullayev (Mozgovoy, 46), Karimov (Jiyanov, 90+2), G‘aniyev, Fayzullayev (Sergeyev, 73), Shomurodov

Ogohlantirishlar: Veyga, 68 – Hamrobekov, 14

Jahon chempionatining 1-turida Kongo DR bilan o‘yindagi nursiz o‘yindan (1:1) keyin Krishtianu Ronaldu tanqidlar yomg‘iri ostida qolgandi. Ikkinchi turda O‘zbekistonga qarshi kechadigan o‘yin esa u va jamoa bu tanqidlarga javob qaytarishi uchun imkon edi.

Portugallar ilk daqiqalardanoq kuchli bosim o‘tkazdi va o‘zbekistonliklarni chuqur himoyalanishga majbur qildi. Yevropa vakillari ko‘pchilik bo‘lib hujumga o‘tib, pozitsiyalarni almashtirib harakatlanishdi va tezkor kombinatsiyalar uyushtirishdi. Natijada 6-daqiqadayoq hisob ochildi: Kanselu o‘ng qanotdan reyd uyushtirib, jarima maydonida ochilgan Krishtianuni to‘p bilan ta’minladi, 41 yoshli hujumchi esa bu imkoniyatdan foydalandi. Bu orqali portugaliyalik yulduz qatorasiga oltinchi jahon chempionatida gol urgan ilk futbolchiga aylandi – unga bu borada eng yaxshi natija qayd etgan Lionel Messi (5) bu natijani faqat 2030 yilgi jahon chempionatiga borsa takrorlashi mumkin.

Ronaldu portugallarning ikkinchi golida ham ishtirok etdi – barcha Hamrobekovning jarima maydoni yaqinidagi qo‘polligidan keyin belgilangan jarima zarbasini aynan u ijro etishini kutib turganida u to‘pni Nunu Mendeshga qoldirdi, «PSJ» himoyachisi esa pastlatib yo‘llagan zarbasi bilan to‘pni darvozaning o‘ng burchagiga joylab qo‘ydi.

Shundan keyin O‘zbekiston ham oldinga chiqa boshladi va bir necha vaziyatlarga ega bo‘ldi: avvaliga Nasrullayevning yaqin burchakka yo‘llagan zarbasiga aniqlik yetishmadi, G‘aniyev esa juda chiroyli zarbasi bilan Koshta qo‘riqlayotgan darvozani ishg‘ol etdi ham.

Ammo vaziyatga VAR aralashib, gol bekor qilindi – videotakrorda to‘p G‘aniyevga kelib tushishidan oldin Abbos Fayzullayev Kanseluga qo‘pollik ishlatgani oydinlashdi.

O‘zbekistonliklar katta kuch bilan hujumga o‘tishda davom etishdi va buning uchun jazolanishdi. Markazda to‘p yo‘qotilgach, raqib tezkor qarshi hujum uyushtirdi va Fernandesh Ronalduni amalda darvozabon bilan yakkama-yakka vaziyatga chiqib yubordi, u esa Ne’matovga hech qanday imkoniyat qoldirmadi – 0:3.

U bo‘lim oxirigacha het-trik muallifiga aylanishi ham mumkin edi, ammo darvozabon ustidan oshirib tashlangan to‘pni Husanov darvoza chizig‘i ustidan qaytarib yubordi.

Kannavaro tanaffusda birinchi bo‘limda ko‘p xatoga yo‘l qo‘ygan Hamrobekov va Nasrullayevni zaxiraga olib, Mozgovoy va Alijonovni tushirdi, Martines ham aynan o‘ng qanotini almashtirib, Semedu va Konseysauni maydonga tashladi.

O‘zbekiston ikkinchi bo‘lim boshida faol harakat qilib, pressing uyushtirdi, ammo 60-daqiqada esa yana bir bor standart vaziyat portugallar foydasiga ishladi. Burchakdan pastlatib oshirilgan to‘pga Feliks zarba berdi, to‘p avval Husanovga, keyin darvozabonga tegib, to‘rga borib tushdi.

Qolgan daqiqalarda hech bo‘lmaganda bitta javob golini urish uchun o‘zbekistonliklarda kuch ham, shijoat ham yetishmadi. O‘yin yakuniga yaqinlashganda zaxiradan tushgan Rafael Leau yakuniy hisobni o‘rnatdi – 5:0.

Portugaliya – butkul boshqa ligada ekanini namoyish etdi. Ronaldu esa shu yoshda ham to‘xtashni istamayapti. O‘yindan keyin kameralarga qarata shunday dedi: «Men qaytdim!»

Husanov esa o‘yindan keyin ko‘z yoshlarini tiya olmadi, uni «Manchester Siti»dagi sobiq jamoadoshi Bernardu Silva yupatishiga to‘g‘ri keldi.

Umuman, Husanov o‘yinni yomon o‘tkazmadi: to‘pga 39 teginish, 25 tadan 22 ta aniq uzatma, to‘rt marta to‘pni olib qo‘yish, to‘rt marta to‘pni egallash, bitta bloklangan zarba va uch marta to‘pni uzoqlashtirish.

Jodulangan Keyn

Angliya – Gana 0:0

Angliya: Pikford, Konsa, Geyi, Spens (O`Rayli, 66), Jyeyms, Rays, Anderson (Eze, 74), Bellinghem (Rodjyers, 73), Gordon (Saka, 65), Madueke (Reshford, 83), Keyn

Gana: Asare, Adjyeti, Opoku, Mensa, Senayya (Pepra Oppong, 87), Parti, Yirenkiy, Sibo, Semenyo, Inyaki Uilyams (Fatavu, 66), Ayyu (Adu, 67, Baba, 90)

Ogohlantirishlar: Rays, 41 – Inyaki Uilyams, 60

Guruh bosqichining 1-turida inglizlar xorvatlar bilan shou uyushtirib berishgandi (4:2). Ammo Ganaga qarshi bahsda muxlislar kutgan o‘yin bo‘lmadi – bu o‘yinda birorta gol urilmadi va Angliya muddatidan oldin guruh bosqichi masalasini hal qila olmadi.

Karlush Keyrush boshchiligidagi afrikaliklar ilk daqiqalardan 4-5-1 sxemasida chuqur himoyalanishdi va raqibga bo‘sh zonalar qoldirishmadi. Tomas Tuxel shogirdlari faqat standart vaziyatlardan omadini izlashga majbur bo‘ldi, lekin bu ham ish bermadi.

Inlizlar birinchi bo‘limda to‘pga egalik qilish bo‘yicha 81 ga 19 foiz, uzatmalar bo‘yicha 347-98, zarbalar bo‘yicha 6-0 nisbatida ustunlikka erishishdi,, ammo bu zarbalardan birortasi darvoza sohasiga to‘g‘ri bormadi.

Tanaffusdan keyin inglizlar raqibni o‘ziga chorlash uchun orqaroqqa qaytishdi, ammo ganaliklar bu tuzoqqa tushmadi. Ikkinchi bo‘lim davomida Tuxel Saka, Eze, Rodjyers va O’Rayli kabi futbolchilar hisobiga o‘yinni jonlantirishga harakat qildi, ammo kartina o‘zgarmadi.

Aksincha, ikkinchi bo‘limning ikkinchi yarmida ganaliklarda ketma-ket ikkita xavfli vaziyat yuzaga keldi. Avvaliga Adu darvozabon bilan yakkama-yakka vaziyatga chiqib bordi, ammo Pikford jarima maydonini tashlab chiqib, xavfni bartaraf etdi. Keyin esa ushbu futbolchining hujumini himoyachi Konsa podkat bilan to‘xtatib qoldi.

Angliya so‘nggi daqiqalarda shturm uyushtirishga va xavfli vaziyatlar yaratishga muvaffaq bo‘ldi. Avvaliga Saka aylanma zarbasi bilan ganalik muxlislar yuragiga g‘ulg‘ula soldi, keyin esa O’Raylining yaqin masofadan yo‘llagan zarbasidan keyin to‘p to‘sindan qaytdi, ammo qaytgan to‘pga Keyn to‘g‘ri zarba bera olmadi.

Shu pallada ko‘pchilik ganalik shaman Nana Kvaku Bonsamni yodga oldi – u o‘yindan oldin inglizlar forvardini la’natlaganini aytgandi.

«Men Keyn bo‘yicha ishlayapman. Unga jiddiy jarohat tilamayman – u mening mamlakatimga qarshi o‘zini ko‘rsata olmasligi uchun yengil ta’sir yetarli bo‘ladi», – degandi u.

Golsiz durangni ganaliklar g‘alabadek nishonlashdi – bu natija amalda jamoaga pley-offni kafolatlaydi. Tuxel esa bunday ssenariy uchun nimadir o‘ylab topishi kerak bo‘ladi – turnir davomida uning jamosiga qarshi shunday uslubda harakat qiladigan jamoalar hali yana bo‘ladi.

Panama turnir bilan xayrlashdi

Panama – Xorvatiya 0:1

Gol: Budimir (54).

Panama: Moskera, Murillo, Ramos (Uoterman, 71), Kordoba, Andrade, Blekmen (Devis, 90), Martines, Harvi, Barsenas (Rodriges, 90), Rodriges, Fajardo (Londono, 83).

Xorvatiya — Livakovich, Stanishich, Shutalo, Pongrachich, Gvardiol (Kramarich, 46), Modrich (Mario Pashalich, 81), Kovachich (P.Suchich, 72), Marko Pashalich (L.Suchich, 72), Baturina, Perishich, Musa (Budimir, 46).

Ogohlantirishlar: Barsena (61), P.Suchich (90+2).

Panama birinchi turda Ganadan atigi bitta gol o‘tkazib yuborgandi. Xorvatiya bilan o‘yin taqdirini ham yagona gol hal qildi. 

KONKAKAF vakillari ancha vaqtgacha nomdor raqiblarning bosimiga dosh berib turdi, shu kuni milliy jamoadagi 200-o‘yinini o‘tkazgan Luka Modrich ham bu himoyaga qarshi hech narsa o‘ylab topolmadi, ammo ikkinchi bo‘lim boshlarida yevropaliklar baribir o‘z maqsadiga erishdi – Marko Pashalich to‘pni tovoni bilan Yosip Stanishichga yetkazdi, uning olis burchakka yo‘llagan zarbasi ustundan qaytdi, to‘pga birinchi bo‘lib yetib kelgan Budimir g‘alaba golini urdi.

O‘yinda shu hisob saqlanib qoldi va Panama oxirgi tur natijasidan qat’i nazar turnir bilan xayrlashadigan bo‘ldi. So‘nggi turda Angliya Panama bilan (28 iyun), Gana – Xorvatiyaga qarshi maydonga chiqadi.

Kolumbiyadan yordam

Kolumbiya – Kongo DR 1:0

Gol: Deniyel Munios (76)

Kolumbiya: Vargas, Munios, Sanchez, Lukumi, Mohika, Puerta, Lerma, Arias (Rios 78), Rodrigez (Kintero 58) Suarez (Kordoba 58) Diaz.

​Kongo DR: Mpasi-Nzau, Bakambu (23. Banza, 58), Vissa, Kayyembe (Pikel, 72) Mutussami (Mbuku 82), Mukau (Sadiki 46), Masuaku (Kayyembe, 72) Kapuadi, Tuanzebe, Mbemba, Van-Bissaka

Ogohlantirishlar: Lukumi (56), Lerma (90+4) – Pikel (90+4).

Kongo DR birinchi turda jahon chempionatidagi kutilmagan natijalardan birini qayd etib, yulduzli Portugaliyadan ochko tortib olgandi (1:1). Ammo ushbu jamoaning Luis Diaz boshchiligidagi kolumbiyaliklarga kuchi yetmadi.

Janubiy Amerika vakillari ilk daqiqalardan tashabbusni qo‘lga olib, birin-ketin xavfli vaziyatlar yaratishdi. 19-daqiqaga kelib zarbalar statistikasi 8:1 ko‘rinishida bo‘lgani ham ko‘p narsani anglatadi (taqqoslash uchun, portugallar o‘yin davomida jami 7 bor zarba berishgandi).

Afrikaliklarning 31 yoshli darvozaboni Lionel Mpasi-Nzo birinchi bo‘lim davomida 6 bor seyv ijro etdi. U ikkinchi bo‘limda ham qahramonlik ko‘rsatishda davom etdi – Dias yana yaqin masofadan turib Mpasi-Nzoni dog‘da qoldira olmadi, Aryas esa darvozabon hududidan turib burchakka to‘g‘ri zarba berolmadi.

76-daqiqaga kelibgina kongoliklar devori buzib o‘tildi – o‘tgan turda o‘zbekistonliklar darvozasiga ham gol urgan himoyachi Kristian Munios Xuan Kinteroning uzatmasidan keyin qulay vaziyatga chiqib borib, to‘pga bir teginishda darvozani ishg‘ol etdi. 

Qolgan vaqt davomida o‘yin hakami Diasning ikki golini bekor qildi. Birinchi holatda «Bavariya» vingeri to‘pni Mpasi-Nzo ustidan oshirib tashlagandi, ammo bundan oldin raqib himoyachisini qo‘li bilan turtgani ma’lum bo‘ldi. Ikkinchi epizodda esa mikroskopik ofsayd qayd etildi.

Bu g‘alaba orqali Kolumbiya O‘zbekiston uchun imkoniyat qoldirdi. Agar bugun kongoliklar g‘alaba qozonganida o‘zbekistonliklar so‘nggi tur natijalaridan qat’i nazar to‘rtinchi o‘rindan yuqoriga ko‘tarila olmagan bo‘lardi.

Endi 3-turda muxlislarni supero‘yin kutmoqda – Kolumbiya Portugaliyaga qarshi guruh g‘olibligi uchun kurash olib boradi. Pley-off masalasini hal qilib bo‘lgan janubiy amerikaliklarga birinchi o‘rin uchun durang ham yetarli bo‘ladi.

O‘zbekiston esa guruhdan chiqish uchun Kongoni imkon qadar yirik hisobda mag‘lub etishi va boshqa guruhlarda o‘zi uchun kerakli natijalar qayd etilishini kutishi kerak bo‘ladi.

Source link

O‘zbekiston milliy jamoasi bosh murabbiyi Fabio Kannavaro va jamoa futbolchilari JCh-2026 2-turidan o‘rin olgan Portugaliya milliy jamoasiga qarshi uchrashuvdan (5:0) so‘ng jurnalistlarga intervyu berdi. 

Foto: O‘FA 

Fabio Kannavaro

“Albatta jahon chempionatidagi ilk ishtirok oson bo‘lmasligi tabiiy. Qur’a natijalari chiqqanidan so‘ng Kolumbiya va Portugaliyani ko‘rib, bizni juda qiyin guruh kutayotganini kutgandik.

Kolumbiyaga qarshi o‘yindan keyin ham jamoamdan faxrlanishimni aytgandim, bugun ham jamoam bilan faxrlanaman. Chunki ularni ko‘rdim. Ha, qiyinchiliklarga duch kelishdi, ammo bir soniya ham taslim bo‘lishmadi.

Albatta, barcha chiziqlarda yuqori saviyadagi futbolchilarga ega jamoaga qarshi o‘ynash doim qiyin. Shubhasiz, ular juda katta motivatsiya bilan maydonga tushishgan edi. Biroq aytganimdek, bu jahon chempionati biz uchun tajriba”. 

Foto: O‘FA 

Eldor Shomurodov

“Birinchi navbatda, bu turnir O‘zbekiston futboli uchun juda katta tajriba bo‘lmoqda. Biz qanaqa yutkazgan taqdirimizda ham, bu narsadan O‘zbekiston ko‘p narsa yutdi, deb o‘ylayman. Shunga qaramay, yirik hisobda uchralgan mag‘lubiyat uchun muxlislardan uzr so‘raymiz. Bugungi natija (Kolumbiya-Kongo uchrashuvi natijasi)ga qarab, 3-turda oxirgi imkoniyatimiz bo‘ladi. 3-o‘yinda jahon chempionatidagi birinchi g‘alabamizni qo‘lga kiritishga harakat qilamiz.

Bizni qo‘llab turgan barcha muxlislarga rahmat aytamiz. Bunaqa mag‘lubiyat uchun uzr so‘raymiz. Keyingi o‘yinlarda qo‘llab turishlarini so‘raymiz”. 

Abbos Fayzullayev

“Bugun himoyada ulgurmaganimiz sababi – raqib hujumchilarining darajasi ham kuchli. Dunyodagi eng kuchli yarimhimoyaga ega jamoaga qarshi o‘ynadik va bu biz uchun katta tajriba bo‘ldi. O‘zbekligimdan va shu bayroq ostida terma jamoamizni himoya qilayotganimdan juda ham faxrlanaman. Yutkazgan paytimizda ham, yutgan paytimizda ham borimizni berib, butun terma jamoa O‘zbekiston uchun o‘ynaymiz”.

Behruz Karimov

“O‘yindan oldin murabbiyimiz Krishtianu Ronalduni “The Best” deb ta’rifladi. Raqibning har bir o‘yinchisi kuchli bo‘lgani uchun ularning har biriga ko‘rsatma berildi, lekin aynan Ronalduni yopamiz, deyilmadi. Chunki Ronalduni yopsak, uning atrofidagi o‘yinchilar ham tajribali”.

Ravshan Ermatov (O‘FA birinchi vitse-prezidenti)

“2:0 vaqtida golimiz hisoblaganda edi… Salgina adolatsiz bo‘ldi. Nima bo‘lganda ham biz rivojlanish bosqichidan o‘tayapmiz. Hurmatli prezidentimiz hamma sharoit yaratib bergan. Ozgina vaqt kerak. 1-sinf bolasi 9-sinf bolasi bilan raqobatlasha olmaydi. Biz 1-sinf bo‘lsak, ular 9-sinf. O‘zbekistonda katta salohiyat bor. Yillar o‘tib Portugaliyadek jamoalar ham O‘zbekiston qarshi qo‘rqib tushadigan bo‘ladi.

Bu musobaqa biz qayerda ekanimizni, nimaning ustida ishlashimizni ko‘rsatib beradigan ilk tajriba bo‘ldi”.

Source link