Jamiyat
O‘zbekiston xalqaro firibgarlar uchun “ov maydoni”ga aylanib qolmoqda
“Xavotir olmang, biz qonuniy va rasmiy kompaniyamiz” – O‘zbekistonda Seven jade nomi ostida yangi moliyaviy piramida paydo bo‘ldi. Seven jade xodimlari shu nomdagi MChJ va unga soliq qo‘mitasi tomonidan berilgan guvohnomani ko‘rsatgan holda odamlarni barchasi qonuniy ekaniga ishontirishmoqda. Uning tashkilotchisi Xitoy fuqarosi bo‘lishi mumkin.
“Bosh qarorgohimiz Gonkongda”
2026 yil 20 yanvar kuni “Seven jade manufacturing” MChJ davlat ro‘yxatidan o‘tkazilgan. Faoliyat turi ixtisoslashgan ulgurji savdo bo‘lgan MChJning yagona ta’sischisi Lin Nanzhou hisoblanadi.
MChJga soliq qo‘mitasi tomonidan QQS to‘lovchisi sifatida ro‘yxatdan o‘tganligi to‘g‘risida guvohnoma ham berilgan.
Ayni mana shu ikki hujjat Seven jade nomi ostidagi moliyaviy piramida tashkilotchilariga odamlarni go‘yoki faoliyatlari qonuniy ekaniga ishontirishda yetarli bo‘lmoqda.
O‘zbekiston uchun ishlab chiqilgan “biznes reja”da “Seven jade manufacturing” bosh qarorgohi Gonkongda joylashgan qayta ishlash korxonasi ekani aytiladi. Bu “biznes reja”ni sun’iy intellekt tayyorlaganini anglash qiyin emas.
Qolaversa, internetda Gonkongdagi ushbu kompaniya va Lin Nanzhou shaxsiga hech qanday ma’lumot yo‘q.
“Boy kelajakni birga quramiz”
Ko‘plab moliyaviy piramidalar kabi Seven jade ham odamlar qulog‘iga yoqadigan balandparvoz gaplar orqali maqsadni ulkan olmoqda.
Telegram’dagi rasmiy kanalida Seven jade xalqaro darajada zargarlik buyumlarini ishlab chiqarish va qayta ishlash bilan shug‘ullanuvchi kompaniya sifatida tanishtirilgan. Kompaniyaning savdo tarmog‘i butun dunyoga yoyilgani, O‘zbekistonda ham yangi zavodlar qurib, buyurtmalarni tez va sifatli yetkazib berishni ta’minlayotgani aytiladi.
Qayd etilishicha, kompaniya “uch tomon uchun foyda” modeli asosida ishlaydi: kompaniya ishlab chiqarishni kengaytiradi, chet el buyurtmalarini bajaradi va foydani oshiradi, xodimlar barqaror ish o‘rni hamda yaxshi daromadga ega bo‘lib, hayot sifatini yaxshilaydi, hamkorlar investitsiya va yordam orqali kompaniya o‘sishidan ulush oladi.
Hamkor bo‘lish uchun investitsiya kiritish zarurligi Seven jade aslida moliyaviy piramida ekanini anglatadi. Qolaversa, Seven jade’da boshqalarni taklif qilish orqali daromad olish va’dasi ham bor. Bu moliyaviy piramidalarning asosiy to‘rt ustunidan biri hisoblanadi.
Bundan tashqari, taklif qilingan odam sotib oladigan paketdan ham bonus va’da qilingan. Bu moliyaviy piramidaning navbatdagi ustuni.
Kunlik daromad va’dasi
Seven jade nomi bilan maxsus platforma tashkil qilingan. Unda ushbu moliyaviy piramidaning pul tikish paketlari, hisobni to‘ldirish va kunlik daromadni yechib olish usullari haqida ma’lumotlar bor. Paketlar munchoqdan yasalgan taqinchoq mahsulotlari bilan niqoblangan.
Masalan, Azure glow bracelet mahsuloti narxi 200 ming so‘m qilib belgilangan. Ushbu paket 30 kun davomida faol bo‘ladi. Uni sotib olish orqali kuniga 10 ming so‘mdan bir oyda 300 ming so‘m daromad olish va’da qilingan.
Yoki 600 ming so‘mga Vintage amethyst bracelet mahsulotini sotib olib, 30 kunda 900 ming so‘m daromad olish mumkinligi keltirilgan.
Shu tariqa narxlar va undan keladigan daromad miqdori oshirib borilgan.
Pul kimga ketmoqda?
Paket sotib olish uchun platformada ro‘yxatdan o‘tib, shaxsiy kabinet ochish kerak bo‘ladi. So‘ngra balans to‘ldiriladi. Bu jarayonda pul o‘tkazish P2P shaklida amalga oshiriladi. Platformada buning uchun Lazokat Nasriddinova nomiga ochilgan bank kartasi raqami kiritib qo‘yilgan.
Savdo tarmog‘i butun dunyoga yoyilgani, O‘zbekistonda ham yangi zavodlar qurgani aytilayotgan kompaniya odamlardan P2P orqali pul yig‘ishiga qanday qarash mumkin?
Bir manzil, bir nom
Seven jade moliyaviy piramidasi “Seven jade manufacturing” MChJga tegishlimi? Bunga amin bo‘lish uchun Seven jade’ning O‘zbekistondagi rasmiy ofisi sifatida ko‘rsatilgan manzil – Shota Rustavelli ko‘chasi 104-uyga bordik.
Davlat reyestrida “Seven jade manufacturing” MChJ manzili sifatida ham ayni shu joy ko‘rsatilgan. Qolaversa, moliyaviy piramida platformasining “mijozlarga xizmat ko‘rsatish xodimi” lokatsiya orqali shu manzilni qoldirdi. Shuningdek, u “xotirjam bo‘lishimizni, hammasi qonuniy ekanini” eslatib o‘tdi.
“Golden cash” ishi takrorlanmasin
O‘zbekistonda MChJ ochib, odamlarni chuv tushirish holati yangilik emas. Masalan, 10 oyda 2 ming nafardan ortiq o‘zbekistonlikning qariyb 6 mln dollarini qo‘lga kiritgan “Golden cash” ishi.
O‘shanda Ukraina fuqarosi bo‘lgan Maksim Muntyan nomiga “Golden cash store” MChJ davlat ro‘yxatidan o‘tkazilgan, so‘ngra odamlar ixtisoslashgan do‘konlarda soatlar va zargarlik buyumlari chakana savdosi niqobi ostida chuv tushirilgandi.
Seven jade ham ayni shu holatga o‘xshash: odamlar pulini ochiqchasiga moliyaviy piramida ko‘rinishida jalb qilmoqda.
“Golden cash” ishi qayta takrorlanmasligi uchun tegishli organlar, jumladan, kiberxavfsizlik tezkor ravishda Seven jade faoliyatini o‘rganib, bu sxema ortida turganlarni aniqlashi zarur. Ularning “mushugiga hech kim pisht demasligi” ko‘plab odamlarning aldanishiga olib kelishi mumkin.
Eslatib o‘tamiz, Jinoyat kodeksining 188-1-moddasiga ko‘ra, pul mablag‘larini va (yoki) boshqa mol-mulkni jalb etishga doir noqonuniy faoliyat bilan shug‘ullanish jinoiy javobgarlikka sabab bo‘ladi. Bunday qilmish uchun 10 yilgacha ozodlikdan mahrum qilish jazosi nazarda tutilgan.
Jinoyat protsessual kodeksi talabiga ko‘ra, Jinoyat kodeksining 188-1-moddasi bilan jinoyat ishi qo‘zg‘atish uchun jabrlanuvchining arizasi talab qilinmaydi.
Hukumatning 18-avgustdagi 443-son qarori bilan turistik startaplarga subsidiya ajratish tartibi belgilandi.
Reglamentga ko‘ra, subsidiya Turizm qo‘mitasi tomonidan davlat xizmatlari markazlari yoki Yagona interaktiv davlat xizmatlari portali orqali ajratiladi.
Startapni ishlab chiqish va amaliyotga joriy etish bilan bog‘liq xarajatlarning 50 foizi, biroq 1 mlrd so‘mdan oshmagan miqdorda qoplanadi. Mablag‘ har yili eng yaxshi 10 tagacha turistik startap uchun ajratiladi.
Subsidiya olish uchun loyihalar maxsus komissiya tomonidan baholanadi. Komissiya tarkibi Turizm qo‘mitasi raisi tomonidan shakllantiriladi.
Talabgorning arizasi kelib tushganidan keyin komissiya unga 5 ish kuni ichida suhbat o‘tkazilishi haqida xabarnoma yuboradi.
Suhbatdan so‘ng komissiya 10 ish kuni davomida talabgorning belgilangan talablarga muvofiqligini o‘rganib chiqadi. Bu jarayonda startapning turizm sohasi uchun ahamiyatiga alohida e’tibor beriladi.
Xususan, loyihaning muayyan turistik xizmatni rivojlantirishga qaratilgani, bu xizmatga turistlar ehtiyoji va talabining dolzarbligi baholanadi.
Shuningdek, startap avval mavjud bo‘lmagan yoki mavjud yechimni sezilarli darajada takomillashtirgan yangi xizmatni taklif etayotgani ham hisobga olinadi.
Xarajatlarni qoplash to‘g‘risida qaror qabul qilinganidan so‘ng Turizm qo‘mitasi mablag‘ni talabgorning xizmat ko‘rsatuvchi tijorat banklaridagi hisobvaraqlariga o‘tkazadi. Mablag‘lar qaror qabul qilingan kundan boshlab 7 ish kuni ichida ajratiladi.
Jamiyat
O‘zbekiston jurnalistlar uyushmasi Turkiyaning yetakchi media tuzilmalari bilan memorandum imzoladi
Turkiyaning tarixiy va go‘zal shaharlaridan biri — Balikesirda «Madaniyat yo‘nalishidan raqamli kelajakka: madaniyatlar, media va sun’iy intellekt» mavzusida o‘tkazilgan xalqaro mediaforum doirasida O‘zbekiston jurnalistlar uyushmasi va Turkiya media tuzilmalari vakillari ishtirokida mazmunli muloqotlar bo‘lib o‘tdi.
Uchrashuvlarda ikki mamlakat jurnalistika sohasining bugungi holati, zamonaviy media muhitida yuzaga kelayotgan yangi imkoniyat va chaqiriqlar, jurnalistlar o‘rtasida professional aloqalarni kengaytirish, tajriba almashish hamda qo‘shma media loyihalarni amalga oshirish masalalari muhokama qilindi.
Muloqotlarning muhim natijasi — O‘zbekiston va Turkiya media tuzilmalari o‘rtasida hamkorlik memorandumining imzolanganidir. O‘zbekiston jurnalistlar uyushmasi boshqaruvi raisi Shuhrat Oripov, Turkiya jurnalistlar federatsiyasi raisi Yilmaz Karaja va Turkiya Internet Media Birligi boshqaruvi raisi Sulaymon Basa tomonidan imzolangan hujjatlar ikki mamlakat jurnalistlari va media tashkilotlari o‘rtasidagi hamkorlikni tizimli va amaliy asosda rivojlantirish uchun muhim qadam bo‘ldi.
Turkiya jurnalistlar federatsiyasi bilan hamkorlik jurnalistlar delegatsiyalari almashinuvi, mahalliy matbuotni rivojlantirish tajribasini o‘rganish, raqamli jurnalistika, sun’iy intellekt va media savodxonlik bo‘yicha qo‘shma seminarlar tashkil etish, jurnalistlar malakasini oshirish hamda xalqaro media forumlar o‘tkazish kabi yo‘nalishlarni qamrab oladi.
Shuningdek, O‘zbekiston va Turkiya jurnalistlari o‘rtasida professional tarmoqni kengaytirish masalasi ham hamkorlikning muhim yo‘nalishlaridan biri sifatida belgilangan.
Turkiya jurnalistlar federatsiyasi 1996 yilda tashkil etilgan bo‘lib, jurnalistlarning kasbiy manfaatlarini himoya qilish, matbuot va so‘z erkinligi masalalarida jurnalistik hamjamiyatning umumiy pozitsiyasini ifoda etish, mahalliy va mintaqaviy matbuotni qo‘llab-quvvatlash hamda professional hamkorlikni kuchaytirish yo‘nalishlarida faoliyat yuritadi. Federatsiya Turkiyaning 81 viloyatidagi jurnalistlar uyushmalarini o‘zida birlashtiradi.
Turkiya Internet Media Birligi (TİMBİR) bilan imzolangan hamkorlik memorandumi esa ushbu jarayonning raqamli media yo‘nalishini yanada boyitadi. Mazkur tashkilot internet jurnalistikasi, raqamli media va onlayn axborot platformalarini birlashtiruvchi xalqaro maqomdagi professional media tashkilot bo‘lib, uning tarmog‘i Turkiyaning 81 viloyati va dunyoning 25 mamlakatidagi hamkorlik aloqalarini qamrab oladi. Tashkilot tarmog‘iga 800 dan ortiq media tashkiloti va 1000 dan ziyod axborot platformalari kiradi.
O‘zbekiston jurnalistlar uyushmasi TİMBİR bilan hamkorlik doirasida raqamli jurnalistika, internet media, jurnalistlar malakasini oshirish, media savodxonlik, dezinformatsiyaga qarshi kurashish, yosh jurnalistlarni qo‘llab-quvvatlash bo‘yicha qo‘shma loyihalarni amalga oshirishni rejalashtirmoqda. Ta’lim dasturlari, seminar va treninglar orqali media xodimlarining kasbiy bilim va ko‘nikmalarini oshirish, raqamli muhitda axborot ishonchliligi va jurnalistik etika masalalarida tajriba almashishga ham alohida e’tibor qaratiladi.
Balikesirdagi hamkorlik kelishuvlarini ikki mamlakat jurnalistlari o‘rtasida yangi muloqot maydonini shakllantiruvchi muhim tashabbus, yangi tajriba va yangi qo‘shma loyihalar uchun muhim qadam sifatida baholash mumkin. Bu hamkorlik O‘zbekiston va Turkiya o‘rtasidagi do‘stlik va hamkorlikni axborot makonida yanada mustahkamlashga qaratilgani bilan ahamiyatli.
Raqobat qo‘mitasiga 2023-yildan 2026-yilning iyul oyiga qadar iste’molchilardan uy-joy kommunal va transport xizmatlari, aloqa, moliya, ijtimoiy xizmatlar hamda reklama masalalari bo‘yicha 137 785 ta murojaat kelib tushgan.
Yillar kesimida murojaatlar soni 2023-yilda 20 691 ta, 2024-yilda 30 070 ta, 2025-yilda 53 670 ta, 2026-yilning dastlabki yetti oyida esa 33 354 tani tashkil etgan.
Murojaatlarning 68 326 tasi uy-joy kommunal va transport xizmatlari, 39 397 tasi savdo va umumiy ovqatlanish, 25 965 tasi aloqa, moliya va ijtimoiy xizmatlarga to‘g‘ri kelgan.
Qo‘mita ma’lumotlariga ko‘ra, murojaatlar sonining ortishi iste’molchilar huquqlarini himoya qilish mexanizmlarining ishlayotgani va aholining faolligi oshib borayotganini ko‘rsatmoqda.
Murojaatlarni ko‘rib chiqishni soddalashtirish maqsadida «Iste’molchi murojaati» elektron platformasi orqali murojaat yuborish imkoniyati yaratilgan.
O‘tgan uch yarim yildan ortiq davrda kelib tushgan murojaatlarning 116 105 tasi, ya’ni 86,7 foizi ijobiy hal etilgan. Ularning 73 foizi qanoatlantirilgan, 25 foizi bo‘yicha huquqiy tushuntirish berilgan, 2 foizi esa vakolatli organlarga yuborilgan.
Bundan tashqari, kommunal, tibbiyot va farmatsevtika, savdo va maishiy xizmat, telekommunikatsiya, sug‘urta hamda moliyaviy xizmatlar kabi 20 dan ortiq yo‘nalishda o‘rganishlar o‘tkazilgan.
Aniqlangan kamchiliklar bartaraf etilgan, qonunbuzilishlarga yo‘l qo‘ygan ayrim subyektlarga nisbatan tegishli choralar ko‘rilgan.
Qo‘mita ko‘rgan choralar natijasida 11,7 mln nafar iste’molchidan ortiqcha olingan 399,3 mlrd so‘m mablag‘ni ular foydasiga qayta hisob-kitob qilish ta’minlangan.
Bo‘ka tumaniga yangi hokim tayiinlandi.
Xalq deputatlari Bo‘ka tumani Kengashining navbatdan tashqari sessiyasi bo‘lib o‘tdi.
Sessiyada Toshkent viloyati hokimi Zoyir Mirzayev tumanni ijtimoiy-iqtisodiy rivojlantirish borasidagi maqsad va vazifalarning ijrosi yuzasidan tahliliy ma’ruza qildi.
Sessiyada tashkiliy masala ko‘rildi.
Bo‘ka tumani hokimi lavozimida ishlab kelgan Sardor Isoqulov avvalroq boshqa ishga o‘tishi munosabati bilan mazkur lavozimdan ozod etilgan edi.
Zoyir Mirzayev Bo‘ka tumani hokimi lavozimiga ayni paytda «Agrobank» ATB Toshkent viloyat boshqarmasi boshlig‘i vazifasida ishlab kelgan Abdazimov Murod Ilhomovich nomzodini tavsiya qildi.
Xalq deputatlari Bo‘ka tumani Kengashi M.Abdazimovni tuman hokimi etib tasdiqladi.
Umra ziyoratiga yuborish bilan bog‘liq noqonuniy holatlar aniqlandi.
Toshkent shahrida yashovchi, 1981 y.t. shaxs tegishli litsenziyaga ega bo‘lmagan holda, o‘zini Umra ziyoratini tashkil etishga ruxsat berilgan turfirmaning go‘yoki vakili sifatida tanishtirib, 3 nafar fuqaroni Saudiya Arabistoniga Umra safariga yuborish va muqaddas amallarni to‘liq bajarishlarini ta’minlab berish evaziga jami 3450 AQSh dollari talab qilgan.
Davlat xavfsizlik xizmati, Iqtisodiy jinoyatlarga qarshi kurashish departamenti va Ichki ishlar organlari hamkorligida o‘tkazilgan tezkor tadbirda mazkur shaxs 3400 dollar va 600 ming so‘m olgan vaqtida ashyoviy dalillar bilan ushlandi.
Farg‘ona shahrida kuzatilgan holatda esa 1998 y.t. shaxs o‘zining tanishlari orqali 4 nafar fuqaroni Umra ziyoratiga yuborishni va’da qilib, jami 4200 AQSh dollari talab qilgan.
Lekin, so‘ralgan pul mablag‘ini olgan vaqtida DXX va IIB xodimlari tomonidan uning noqonuniy harakatiga chek qo‘yildi.
Hozirda har ikki holat yuzasidan qonunbuzarlarga nisbatan jinoyat ishlari qo‘zg‘atilib, tergov harakatlari olib borilmoqda.
Turistik startaplarga 1 mlrd so‘mgacha subsidiya beriladi
Dushanbadan dollar bilan bog‘liq vaziyat qanday bo‘ladi?
O‘zbekistonda xorijiy investitsiyali korxonalar soni 21 mingga yaqinlashdi
-
Iqtisodiyot5 days agoХоразмда бугуннинг ўзида 176 млн долларлик лойиҳалар ишга туширилди
-
Iqtisodiyot5 days ago
O‘zbekiston avtomobil bozorida pasayish kuzatilmoqda
-
Iqtisodiyot4 days ago
Muddatli to‘lov operatorlari faoliyati yo‘lga qo‘yiladi
-
Siyosat4 days ago
Prezident bugun Xorazm viloyatiga boradi
-
Iqtisodiyot4 days agoIjtimoiy tadbirkorlik uchun davlat ko‘magi beriladi
-
Mahalliy5 days ago
Dadamning bir gaplari…
-
Iqtisodiyot4 days ago
O‘zbekistonda qaysi xizmat turlariga talab ortmoqda?
-
Mahalliy3 days ago
Toshkentda maktabgacha ta’lim markazi tashkil etiladi