Andijon viloyatida davlat organi mansabdori hamda tijorat banki xodimi tomonidan pora talab qilish bilan bog‘liq korrupsiyaviy holatlar fosh etildi. Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.

Foto: Davlat xavfsizlik xizmati

Ma’lum bo‘lishicha, Andijon viloyati Qurilish va uy-joy kommunal xo‘jaligi sohasida hududiy nazorat qilish inspeksiyasining shu’ba boshlig‘i xizmat mavqeini suiiste’mol qilgan holda fuqarodan pul talab qilgan.

Xususan, Andijon shahridagi savdo do‘konida ichimlik suvidan noqonuniy foydalanilgani oqibatida davlatga qariyb 680 million so‘m zarar yetkazilganligi yuzasidan tegishli dalolatnoma rasmiylashtirilgan. Shundan so‘ng mansabdor shaxs tanishlari orqali zarar miqdorini qayta hisoblatib, uni kamaytirish hamda ma’muriy chora ko‘rilishida yordam berish evaziga 30 million so‘m talab qilgan.

Davlat xavfsizlik xizmati, Iqtisodiy jinoyatlarga qarshi kurashish departamenti hamda ichki ishlar organlari xodimlari tomonidan o‘tkazilgan tezkor tadbirda u so‘ralgan mablag‘ni olgan vaqtida ashyoviy dalillar bilan ushlangan.

Yana bir holatda aksiyadorlik tijorat banklaridan birining Asaka tuman filiali Mahallabay ishlash bo‘limi bosh menejeri tadbirkorlik faoliyatini yo‘lga qo‘ymoqchi bo‘lgan fuqaroga 3 milliard 650 million so‘m miqdorida kredit olib berishda yordam qilishni va’da qilgan.

Buning evaziga u 8 ming AQSh dollari talab qilib, joriy yilning aprel–may oylarida fuqarodan jami 7 800 AQSh dollari olgan. Keyinchalik va’dasini bajara olmagan bank xodimi mablag‘ning 1 000 AQSh dollarini qaytarib berayotgan vaqtida DXX va ichki ishlar organlari xodimlari tomonidan qo‘lga olingan.

Hozirda har ikki holat bo‘yicha qonunbuzarlarga nisbatan jinoyat ishlari qo‘zg‘atilgan bo‘lib, tergov harakatlari davom etmoqda.

Source link

Qashqadaryo viloyatida o‘zini prokuratura xodimi sifatida tanishtirib, fuqaroning yaqinini Mudofaa vazirligi tizimiga ishga joylashtirib berishni va’da qilgan shaxs qo‘lga olindi. U kelishilgan 3 ming AQSh dollarining yarmini olgan vaqtida ushlangan.

Foto: Prokuratura Departamenti

Bosh prokuratura, departamentning Shaxsiy xavfsizlik boshqarmasi hamda departamentning Qashqadaryo viloyati boshqarmasi xodimlari hamkorligida o‘tkazilgan tezkor tadbirda firibgarlik holatiga chek qo‘yildi.

Ma’lum bo‘lishicha, zaxiradagi kichik serjant U.K. fuqaro A.O.ga o‘zini Qashqadaryo viloyati prokuraturasi xodimi sifatida tanishtirgan. U fuqaroning ukasi L.O.ni Mudofaa vazirligining yuqori lavozimlarda ishlovchi tanishlari orqali vazirlik tizimiga ishga joylashtirib berishini aytgan.

Buning evaziga u 3 ming AQSh dollari talab qilgan. Tezkor tadbir davomida kelishilgan mablag‘ning 1 500 AQSh dollarini olgan vaqtida ashyoviy dalillar bilan ushlangan.

Mazkur holat yuzasidan unga nisbatan Jinoyat kodeksining 168-moddasi (firibgarlik) hamda 28, 211-moddalari (pora berishga dalolat qilish) bilan jinoyat ishi qo‘zg‘atilgan.

Hozirda holat yuzasidan tergov harakatlari olib borilmoqda.

Source link

Sirdaryo viloyatida yer ajratish masalasini hal qilib berishni va’da qilgan Guliston shahar hokimligi mas’ul xodimi pora olish vaqtida qo‘lga olindi. U davlat zaxirasidagi yer maydonini ajratib berish evaziga 50 ming AQSh dollari talab qilgan.

Foto: Davlat xavfsizlik xizmati

Davlat xavfsizlik xizmati xodimlari tomonidan Sirdaryo viloyati prokuraturasi bilan hamkorlikda o‘tkazilgan tezkor tadbirda korrupsiyaviy holatga chek qo‘yildi.

Ma’lum bo‘lishicha, Guliston shahar hokimligining mas’ul xodimi tadbirkorlik faoliyatini boshlamoqchi bo‘lgan fuqaroning ishonchiga kirib, shaharning O‘zbekiston shohko‘chasida joylashgan davlat zaxirasidagi 2 sotix yer maydonini oziq-ovqat do‘koni tashkil etish uchun mansabdor tanishlari orqali ajratib berishni va’da qilgan.

Buning evaziga u fuqarodan 50 ming AQSh dollari talab qilgan. Dastlab mazkur mablag‘ hisobidan fuqaroning Lacetti rusumli avtomashinasini 12 ming AQSh dollariga baholab, uni boshqarish huquqini beruvchi ishonchnoma asosida rasmiylashtirib olgan.

Tezkor tadbir davomida hokimlik xodimi talab qilingan pul mablag‘ining yana 8 ming AQSh dollarini olgan vaqtida ashyoviy dalillar bilan ushlangan.

Hozirda mazkur shaxsga nisbatan jinoyat ishi qo‘zg‘atilib, unga «qamoq» ehtiyot chorasi qo‘llangan. Ayni vaqtda tergov harakatlari olib borilmoqda.

Source link

Toshkent shahrida Davlat xavfsizlik xizmati va ichki ishlar organlari xodimlari hamkorligida o‘tkazilgan tezkor tadbir davomida 34 kilogrammdan ortiq og‘ir turdagi giyohvandlik vositalari aniqlanib, musodara qilindi. Mazkur holat yuzasidan jinoyat ishi qo‘zg‘atilib, gumonlanuvchilar qamoqqa olindi.

Ma’lum qilinishicha, giyohvandlik vositalarining noqonuniy aylanmasiga qarshi kurashish doirasida Toshkent shahridagi Qo‘yliq bozori yaqinida shubhali tarzda to‘xtab turgan Lacetti rusumli avtomashina tekshiruvdan o‘tkazilgan.

Tezkor tadbir davomida transport vositasida Surxondaryo viloyatining Sariosiyo tumanida yashovchi, muqaddam sudlangan 1968 yilda tug‘ilgan shaxs hamda 1984 yilda Denov shahrida tug‘ilgan, hozirda Toshkent shahrida istiqomat qiluvchi fuqaro bo‘lgani aniqlangan.

Avtomashina salonidagi yelim idish ichida jami 30 dona o‘ramda 34 kilogramm 610 gramm og‘ir turdagi giyohvandlik vositalari saqlanayotgani ma’lum bo‘lgan. Ular orasida 12 kilogramm 960 gramm «opiy» va 21 kilogramm 650 gramm «gashish» moddalari borligi aniqlanib, ashyoviy dalil sifatida rasmiylashtirib olingan.

Qayd etilishicha, bunday turdagi giyohvandlik vositalari mamlakat hududiga xorijdan kontrabanda yo‘li bilan olib kiriladi.

Hozirda mazkur shaxslarga nisbatan DXX Tergov boshqarmasi tomonidan Jinoyat kodeksining tegishli moddalari bilan jinoyat ishi qo‘zg‘atilib, «qamoq» ehtiyot chorasi qo‘llangan.

Tergov harakatlari davom etmoqda. Shuningdek, ushbu jinoyatga aloqador bo‘lishi mumkin bo‘lgan boshqa shaxslarni aniqlash bo‘yicha chora-tadbirlar ko‘rilmoqda.

Source link

Farg‘ona viloyatidagi «Rishton» chegara bojxona posti orqali mamlakat hududiga giyohvandlik moddasi saqlovchi dori vositalarini noqonuniy olib kirishga bo‘lgan urinishning oldi olindi. Fuqaro ichki kiyimiga yashirib olgan qariyb 950 dona kapsula bojxonachilar tomonidan aniqlandi.

Foto: Bojxona qo‘mitasi

Farg‘ona viloyati bojxona boshqarmasining «Rishton» chegara bojxona posti orqali qo‘shni davlatdan kirib kelayotgan fuqaroning xatti-harakatlari bojxona xodimlarida shubha uyg‘otgan. Shundan so‘ng u belgilangan tartibda shaxsiy ko‘rikdan o‘tkazilgan.

Tekshiruv davomida fuqaro ichki kiyimiga yashirib olgan, deklaratsiyalanmagan va tegishli hujjatlari mavjud bo‘lmagan 23 dona qadoqdagi jami 950 ga yaqin «Tawon Liar» nomli dori vositasini bojxona nazoratidan yashirincha olib kirishga uringani ma’lum bo‘lgan.

Mutaxassislar xulosasiga ko‘ra, mazkur dori vositasi tarkibida giyohvandlik vositalari ro‘yxatiga kiritilgan «tapentadol» moddasi mavjudligi aniqlangan.

Hozirda mazkur holat yuzasidan bojxona organlari tomonidan jinoyat ishi qo‘zg‘atilib, tergov harakatlari olib borilmoqda.

Source link