Sport
«Chelsi» va «Benfika» bahsi boshlanganidan 4,5 soat o‘tib yakunlandi
Amerikada o‘tayotgan klublar o‘rtasidagi jahon chempionatida ob-havo tufayli muammolar davom etmoqda. Uzoq to‘xtalishdan keyin davom ettirilgan o‘yinda g‘olib chiqqan «Chelsi» endi chorakfinalda «Palmeyras» bilan o‘ynaydi.
Brazillar to‘qnashuvi
«Palmeyras» – «Botafogo» 1:0 (ekstra-taymlarda)
Gol: Paulinio 100.
«Palmeyras»: Veverton, Pikeres, Fuks, Gomes, Giay, Martines (Moreno, 91), Maurisio (Torres, 84), Rios, Allan (Mayke, 81), Vitor Roke (Paulinio, 63, Mikael, 103), Estevao (Luiji, 63).
«Botafogo»: Viktor Jon, Aleks Telles (Kuyabano, 66), Barbosa, Jair (Kayo, 83), Vitinio, Barbosa (Nevton, 83), Freytas (Kabral, 102), Allan (Montoro, 66), Savarino (Korrea, 71), Igor Jyezus, Artur.
Ogohlantirishlar: Gomes, 40, Pikeres, 85, Moreno, 120+3 – Barbosa, 3, Aleks Telles, 35, Artur, 65, Montoro, 105+3.
Chetlatish: Gomes, 116.
Pley-off Braziliyaning «Palmeyras» va «Botafogo» klublari o‘yini bilan boshlandi, bu jamoalar o‘tgan mavsumda mamlakat chempionligi uchun o‘zaro qattiq kurash olib borgandi. Ular bir-birini juda yaxshi bilishadi, shuning uchun mas’uliyatli uchrashuvda tomoshaboplik kutish qiyin edi. Qolaversa, «Botafogo» turnir guruh bosqichida natijani ustun qo‘yib o‘ynadi va ikkinchi raqamda harakatlanishdan uyalmadi. Lekin «PSJ»ga qarshi boshqacha o‘ynab ham bo‘lmasdi. Uchinchi turda «Atletiko» bilan hal qiluvchi o‘yinda ham oxirgi daqiqalarga qadar darvoza daxlsizligi saqlab turildi, guruhdan chiqish uchun esa muhimi yirik hisobda yutqazmaslik edi.
Renatu Payva «Palmeyras»ga qarshi o‘yinda uslubni o‘zgartirishi to‘g‘ri bo‘lmasdi. Shunday ekan, o‘yin qanday kechishini oldindan taxmin qilish oson edi. Maydonda yashil-oqlar ustunlik qilishdi, «Botafogo» esa qarshi hujumlarda imkon kutdi. O‘yinni tezkor gol ochib yuborishi mumkin edi, ammo tanaffusga qadar darvozalar qarshisida yaqqol golli vaziyatlar yuzaga kelmadi.
Keyingi mavsumda «Chelsi» safida o‘ynashi aniq bo‘lgan Estevao bu o‘yinda hujum uchligida chap qanotdan o‘rin oldi. Abel Ferreyra raqibni ajablantirmoqchi bo‘lgandi va bu ikkinchi bo‘lim boshida ish berishi ham mumkin edi. Ammo muntazam ravishda o‘z darvozasiga xafvni bartaraf etib turgan Jon Viktor Estevaoning ikkita xavfli zarbasini qaytardi, ko‘p o‘tmay ushbu vunderkind hamda chalqancha uslubdagi zarbasi bilan yodda qolgan Vitor Roke almashtirildi. Zaxira o‘rindig‘i kengligi — «Palmeyras»ning ustunliklaridan biri. Qolaversa, guruhdagi to‘rt gol (avtogol hisobga olinmaganda)dan uchtasini jokerlar urishgan. Jumladan, «Inter Mayami»ga qarshi 0:2 hisobidan chiqib ketilgan o‘yinda ham, bu durang 1/8 finalda «PSJ»dan qochib qolishga imkon berdi.
Almashtirishlar bu safar ham ish berdi. Ancha yoshligida «Bayyer»ga yo‘l olgan, «Atletiko Mineyro»da yulduzga aylangan Paulinio overtaymlarda to‘pni burchakka yo‘lladi hamda dekabr oyida Libertadores kubogi finalidagi mag‘lubiyat uchun «Botafogo»dan o‘ch oldi. O‘yin qahramoni darhol qo‘shimcha himoyachiga almashtirildi va qolgan daqiqalarda jamoalar amalda rollarini almashib olishdi. «Botafogo» ham hujumkor o‘yin ko‘rsata olishini namoyish etdi, klublar o‘rtasidagi jahon chempionati oldidan tarkibga qo‘shib olingan Artur Kabral («Benfika») va Xoakin Korrea («Inter») jamoani mag‘lubiyatdan qutqarib qolish uchun qattiq harakat qilishdi.
Ammo poyezd allaqachon o‘tib ketgandi. «Palmeyras» favorit maqomiga mos tarzda chorakfinalga yo‘l oldi. Lekin keyingi o‘yinda jamoa Braziliya ligasidagi eng yaxshi himoyachi Gomessiz o‘ynashiga to‘g‘ri keladi. Paragvaylik sardor ikkinchi sariq kartochka ishlab oldi va endi yashil-oqlar uchun keyingi o‘yingacha Murilo safga qaytishi muhim.
To‘qqiz sariq va bir qizil kartochka
KJCh. Nimchorakfinal.
«Benfika» – «Chelsi» 1:4
Gollar: Jyeyms (64), Di Mariya (pen, 90+5), Nkunku (108), Netu (114), Dyuzberi-Holl (117).
«Benfika»: Trubin, Dal, Otamendi, Silva, Eursnes (Guveyya, 86), Go‘kchi (Velozu, 85), Florentinu (Prestianni, 70), Barreyro, Di Mariya, Skelerap (Oqturko‘g‘li, 46), Pavlidis (Belotti, 70).
«Chelsi»: Sanches, Kukurelya, Badyashil (Adarabiyoyo, 64), Koluill (Ansenmino, 118), Jyeyms (Gyusto, 80), Kaysedo, Laviya, Palmer, Fernandes (Dyuzberi-Holl, 81), Netu, Delap (Nkunku, 81).
Ogohlantirishlar: Pavlidis (50), Kaysedo (61), Florentinu (63), Go‘kchi (83), Palmer (92), Koluill (102), Silva (90+2), Prestianni (90+6), Guveyya (120+1).
Chetlatish: Prestianni (92).
Braziliyaning ikki klubidan farqli o‘laroq «Benfika» va «Chelsi» o‘n ikki yildan buyon rasmiy o‘yinlarda to‘qnashmagandi — o‘shanda ko‘klar «burgutlar»ni Yevropa Ligasi finalida mag‘lub etgan. Lissabonliklar safida o‘shanda Luizao, Garay, Matich kabilar to‘p surgan, londonliklarga g‘alaba keltirgan golni esa Ivanovich urgandi (2:1). O‘shanda Rori Delap faoliyatidagi so‘nggi mavsumni o‘tkazgan, uning 10 yoshli o‘g‘li Liam esa endigina «Derbi» akademiyasida futbol sirlarini o‘rganishni boshlagan, qachondir «Chelsi» hujumida birinchi raqam bo‘lishini faqat orzu qilardi.
Ushbu yosh futbolchi ikki o‘yinga diskvalifikatsiya qilingan Jyekson yo‘qligi uchun emas, murabbiyning tanlovi sifatida bu safar ham londonliklarning boshlang‘ich tarkibidan o‘rin oldi. Lekin birinchi bo‘limda lissabonliklar darvozasi oldidagi eng xavfli vaziyatlar lateral Kukurelya tomondan keldi. Birinchi holatda uning yuqori burchak tomon yo‘llagan va qaytarib bo‘lmasdek ko‘ringan zarbasini himoyachi Antoniu Silva bosh bilan to‘sib qoldi. Ikkinchi holatda esa Trubin ajoyib reaksiya ko‘rsatdi. «Benfika» umuman Sanches darvozasi tomon xavf sololmadi va Brunu Lajye chap qanotni jonlantirish uchun tanaffusdan keyinoq Karim Oqturko‘g‘lini maydonga tashlashga qaror qildi.
Faqat bu bilan o‘yinda amalda prinsipial o‘zgarish yuz bermadi. Aurshnes uzatma bermoqchi bo‘lganida to‘p kutilmagan yo‘nalish oldi va darvozabon dog‘da qoldirilishi mumkin edi, ammo Sanches pozitsiyani to‘g‘ri tanladi va to‘pni chiziq ustida to‘xtatib qoldi, Trubin esa Jyeymsning qanot tomondan yo‘llagan jarima zarbasi «jonli devor»ni aylanib o‘tib, yaqin burchakka borib tushishiga qarshilik ko‘rsata olmadi.
Bu vaqtda o‘yinning 64-daqiqasi o‘tib borayotgandi. Besh daqiqa o‘tib inglizlar klubi jarohat tufayli Benua Badyashildan ayrildi. Ko‘p o‘tmay Liam Delap darvozabon bilan yakkama-yakka vaziyatni aniq ijro etdi. Ammo ofsayd holati tufayli gol bekor qilindi. Shundan keyin esa o‘yinga yana Amerika ob-havosi aralashdi. O‘yin 85-daqiqada, stadion ustini qora bulutlar qoplaganida to‘xtatildi. «Chelsi»ning norozi qiyofadagi futbolchilari majburiy pauzaga qanday munosabatda ekanini ko‘rsatib turardi.
Shu tariqa, turnirda oltinchi marta o‘yin noqulay ob-havo sharoiti tufayli to‘xtab qoldi. AQShda barcha darajadagi sport tadbirlariga taalluqli bo‘lgan qoidalar mavjud. Arenadan 10 mil radiusda (16,09 km) chaqmoq qayd etilganida, o‘yin to‘xtatiladi va muxlislar tribunalarni tark etadi. 30 daqiqalik tanaffus e’lon qilinadi, ammo bu vaqt ichida yana bir bor chaqmoq ro‘y bersa, hisoblash qaytadan boshlanadi. Klublar o‘rtasidagi jahon chempionatida «Benfika» va «Oklend» ikkinchi bo‘limni birinchi bo‘lim yakunidan keyin qariyb ikki soat keyin boshlagan klublar sifatida rekord qo‘yishgan.
Bu safar ham xuddi shunday uzoq tanaffus yuzaga keldi, ammo futbolchilar hech qayoqqa keta olmagan bo‘lsa, muxlislar uylariga tarqalishdi. Ularni tushunish mumkin edi — referi tomonidan qo‘shib beriladigan vaqt ham qo‘shilganda o‘ynash uchun 10 daqiqa atrofida vaqt qolgandi. Amalda esa futbolchilar ko‘proq o‘ynashiga to‘g‘ri keldi. O‘yin davom ettirilganida standart vaziyatdan keyin to‘p Gyustoning qo‘liga tegdi va 37 yoshli Di Mariya sovuqqonlik bilan to‘pni darvoza markaziga yo‘lladi va qo‘shimcha yarim soatni ta’minladi. Bu Anxel turnirda aniq ijro etgan to‘rtinchi 11 metrlik jarima zarbasi bo‘ldi.
Birinchi ekstra-taymning ikkinchi daqiqasida portugallar klubi o‘n kishi bo‘lib qoldi. Janluka Prestianni Livaya Koluillning oyog‘iga zarba berdi va qarshisida ikkinchi sariq kartochkani ko‘rdi. «Benfika» himoyaga yotmasdan, to‘liq kuch bilan qarshi hujumga o‘tdi. Ammo Karim Oqturko‘g‘lining zarbasini Sanches bartaraf etdi.
108-daqiqada esa «Chelsi» baribir hisobda oldinga chiqib oldi. Trubin Moyses Kaysedoning zarbasidan keyin to‘pni raqib tomon qaytardi va Kristofer Nkunku to‘pni yaqin masofadan to‘qqizlikka mixladi. Biroz o‘tib Pedru Netu «Benfika» himoyachilaridan qochib ketdi va darvozabonni osonlik bilan dog‘da qoldirdi — 1:3. Ikki daqiqa o‘tib Kirman Dyusberi-Holl Palmerning uzatmasidan keyin to‘pni Trubinning ustidan oshirib tashladi — 1:4.
«Chelsi» endi chorakfinalda «Palmeyras»ga raqib bo‘ladi. «Benfika» safidagi so‘nggi o‘yinini o‘tkazgan Di Mariya esa maydonni ko‘zda yosh bilan tark etdi. 37 yoshli futbolchi keyingi mavsumni Argentinaning «Rosario Sentral» klubida o‘tkazadi.
«Manchester Siti» va O‘zbekiston milliy terma jamoasi himoyachisi Abduqodir Xusanov birinchi marta ota bo‘ldi. Uning oilasida o‘g‘il tug‘ildi, deb xabar beradi mahalliy OAVlar.
Bu 20 yoshli himoyachining ilk farzandi sanaladi.
Abduqodir Xusanov «Manchester Siti» va O‘zbekiston milliy terma jamoasida o‘ynaydi. U o‘z avlodining eng istiqbolli himoyachilaridan biri hisoblanadi va Yevropa futbolida raqobatlashishda davom etmoqda.
Eslatib o‘tamiz, futbolchi 2025-yil 27-mayda — Angliya Premer-ligasi mavsumi tugaganidan so‘ng darhol turmush qurgandi.
«Arsenal» so‘nggi daqiqalarda muhim g‘alabaga erishdi, qatorasiga ikkinchi o‘yinda durang o‘ynagan «Siti» endi 9 ochkoga ortda qolmoqda. «Chelsi» yana yutqazdi, «Real»da yirik g‘alaba.
«Arsenal» – «Everton» 2:0
Gollar: Yokeresh, 89 (1:0). Douman, 90+7 (2:0)
«Arsenal»: Rayya, Saliba, Gabriel Magalyayns, Kalafiori (Inkapiye, 74), Timber (Moskera, 38), Subimendi (Douman, 74), Rays, Eze, Madueke (Martinelli, 61), Saka, Havers (Yokeresh, 61)
«Everton»: Pikford, Kin, O`Brayyen, Mikolenko, Garner, Gana Guyye (Jorj, 90+5), Iroegbunam (Rel, 86), Dyusberi-Holl, Ndiay, Makneyl (Armstrong, 86), Betu (Barri, 69)
«Arsenal» o‘z maydonida kechgan o‘yinda to‘pga egalik qildi, ammo dastlabki 20 daqiqa ichida qarshi hujumlardan ikki bor gol o‘tkazib yuborishi mumkin edi. Birinchi holatda Rayyaning xatosidan keyin Maknilning zarbasidan keyin darvozaga kirib ketayotgan to‘pni yotgan holatda oyog‘ini ko‘tarib qolish orqali to‘xtatib qoldi.
Maknilning uzoq masofadan yo‘llagan zarbasi ustundan qaytdi, qaytgan to‘pga birinchi bo‘lib yetib kelgan Ndiay esa vaziyatdan foydalana olmadi. Keyinroq Maknilning bir necha metr masofadan yo‘llagan zarbasini darvozabon qaytardi.
«Kanonirlar» esa tinimsiz hujum uyushtirganiga qaramay (birinchi bo‘limning o‘zida 13 zarba berildi), hisobni ocha olmadi. Birinchi bo‘limdagi eng yodda qolgan vaziyat Havers jarima maydoni ichida yiqilishi bo‘ldi. Bu epizodda Kin avvaliga raqib hujumchisining oyog‘ini bosib oldi, keyin esa qo‘llari bilan turtib yiqitdi, ammo bosh hakam va VAR xonasidagilar kontakt penalti uchun yetarli emas deb topdi.
Ikkinchi bo‘limda esa mezbonlar uzoq masofadan zarba berishga e’tibor qarata boshladi, xususan, Ezening aylantirib yo‘llagan zarbasiga Pikford yetib bora olmadi, ammo to‘p darvoza ustuni yonidan o‘tib ketdi. Keyin esa Arteta katta tavakkalchilikka qo‘l urdi va tayanch yarimhimoyachisi Martin Subimendi o‘rniga o‘ng qanot vingeri Doumanni maydonga tashladi. Aynan shu o‘zgarish o‘yinni hal qildi. Avvaliga ushbu yosh yarimhimoyachining o‘ng qanotdan uzatmasidan keyin Pikford to‘pga chiqishda xatoga yo‘l qo‘ydi, Inkapiye esa to‘pni bo‘sh darvoza qarshisiga yetib kelgan Yokereshning oyoqlari ostiga tashlab berdi.
So‘nggi daqiqalarda mehmonlar hisobni tenglashtirish umidida to‘liq tarkib bilan oldinga tashlandi, Douman esa burchak zarbasidan keyin uyushtirilgan qarshi hujumda bo‘sh darvozani ishg‘ol etib, APL tarixiga kirdi. Maks 16 yosh-u 73 kunligida liga tarixida gol urgan eng yosh futbolchiga aylandi. Bu orqali u Jyeyms Von tomonidan 2005 yilda o‘rnatilgan rekordni (16 yosh-u 270 kun) yangiladi.
Shu tariqada, bu mavsumda zaxiradan tushgan futbolchilari 11 bor gol urgan Mikel Arteta jamoasi qiyinchilik bilan bo‘lsa-da muhim g‘alabaga erishdi.
«Chelsi» – «Nyukasl Yunayted» 0:1
Gol: Gordon, 18 (0:1)
«Chelsi»: Sanches, Chaloba, Fofana (Xato, 82), Kukurelya, Gyusto (Delap, 46), Jyeyms, Kaysedo (Lavia, 61), Fernandes, Garnacho, Palmer, Joao Pedro
«Nyukasl Yunayted»: Ramsdeyl, Botman, Tiau, Holl, Livramento, Uillok (Byorn, 77), Remsi, Voltemade (Joelinton, 67), Barns, Myorfi (Elanga, 78), Gordon
Ogohlantirishlar: Fofana, 23. Kaysedo, 25 – Ramsdeyl, 84. Holl, 89
«Chelsi» «qarg‘alar»ga qarshi Londonda o‘tgan oldingi 12 o‘yindan 11 tasida g‘alaba qozongandi va shanba oqshomidagi o‘yinni ushbu seriyani davom ettirish maqsadida hujumkorlik bilan boshladi. Ammo mezbonlar o‘z imkoniyatlaridan foydalana olishmadi. 18-daqiqada Palmer qulay vaziyatni yo‘qqa chiqarganidan keyin «Nyukasl» muvaffaqiyatli qarshi hujum uyushtirdi va Uillok Gordonni bo‘sh darvoza qarshisiga chiqarib yubordi.
Tanaffusdan keyin Entoni dublga erishishi mumkin edi, ammo darvozaga qaytgan Sanches jamoasini qutqardi. U Liam Rosenior jamoasini o‘yinda qoldirdi, ammo jamoa mag‘lubiyatdan qutulib qolishni uddalay olmadi. «Chelsi» yana ochko yo‘qotib, raqobatchilarga imkon berdi: bugun «MYu» va «Aston Villa» o‘yinida g‘olib bo‘lgan jamoa ilgarilab ketadi, «Liverpul» esa «Chelsi»ni quvib o‘tib, beshinchi o‘ringa ko‘tarilishi mumkin.
«Vest Hem» – «Manchester Siti» 1:1
Gollar: Bernardu Silva, 31 (0:1). Mavropanos, 35 (1:1)
«Vest Hem»: Hermansen, Mavropanos, Disasi, Todibo, Fernandesh, Souchek, Diuf, Van-Bissaka, Pablo (Magassa, 64), Bouen (Kante, 90+6), Kastelyanos (Traore, 75)
«Manchester Siti»: Donnarumma, Geyi, Husanov, Ayt Nuri (Sherki, 60), Mateus Nunes, Rodri, Bernardu Silva (Reynders, 75), O`Rayli, Semenyo (Foden, 75), Marmush (Doku, 60), Holand
Ogohlantirishlar: Magassa, 76. Fernandesh, 89 – Marmush, 11. Bernardu Silva, 37
Birinchi bo‘lim o‘rtalaridan o‘tganida Bernardu Silvaning Holandga uzatmasi to‘g‘ridan to‘g‘ri zarbaga aylanib, hisob ochilganida ko‘pchilik bu o‘yin taqdiri hal bo‘lgani haqida o‘ylay boshlagandi. Ammo «Siti» bu mavsumda ishonchli o‘ynay olmayapti. Biroz o‘tib «Vest Hem» muvozanatni tikladi. Burchak zarbasidan keyin Donnarumma to‘pga chiqishda xatoga yo‘l qo‘ydi va «Arsenal»ning sobiq futbolchisi Mavropanos muvozanatni tikladi.
Bu mezbonlar uchun o‘yindagi ilk zarba edi va bu zarba chempionlik poygasida ishtirok etayotgan jamoaning oyog‘idan chalib qolish uchun yetarli bo‘ldi. Qolgan vaqt davomida «shaharliklar»ning hech qaysisi mezbonlar himoya devorida o‘tmadi, to‘p darvoza sohasiga yetib borganida esa darvozabon Hermansen ishonchli harakat qildi. Endilikda shu kuni o‘yinni diskvalifikatsiya tufayli tribunada o‘tirib kuzatishga majbur bo‘lgan Gvardiola jamoasi «Arsenal»dan 9 ochkoga ortda qolmoqda. «Siti»da bitta zaxira o‘yini borligiga qaramay, deyarli hech kim endi jamoa bu farqni yo‘qqa chiqara olishiga ishonmayapti.
Ispaniya: Molinaning zambarak zarbasi va tinim bilmas Valverde
«Atletiko» – «Xetafe» 1:0
Gol: Molina, 8 (1:0)
«Atletiko»: Musso, Ximenes, Langle, Pubil (Alvares, 66), Koke, Almada (Simeone, 66), Vargas (Liorente, 73), Gonsales, Molina, Baena (Grizmann, 73), Syorlot (Lukman, 66)
«Xetafe»: Soriya, Abkar, Duarte (Riko, 83), Romero, Iglesias, Kiko Femeniya (Birmanchevich, 46), Dakonam, Arambarri (Martin, 74), Milya (Munos, 90+2), Satriano, Vaskes (Liso, 74)
Ogohlantirishlar: Syorlot, 55. Vargas, 68. Molina, 90 –Romero, 60. Liso, 77. Satriano, 90
Chetlatish: Abkar, 55
Yaqinda «Real»ni mag‘lub eta olgan «Xetafe» «Atletiko»ga ham jiddiy muammolar tug‘dirdi. Shu kuni Oblak o‘rniga darvozaga turgan Musso olti seyv ijro etishiga to‘g‘ri keldi. Ammo mezbonlarning qariyb ikki yildan buyon gol urmayotgan himoyachisi Molina o‘yin startidayoq o‘yin taqdirini hal qildi. Argentinalik futbolchining jarima maydoni tashqarisidan yo‘llagan kuchli zarbasidan keyin to‘p olis «to‘qqizlik»ka borib tushdi.
Mehmonlar esa ancha osonroq vaziyatlardan gol ura olmadi. «Matraschilar»ni goh Musso qutqardi, goh «Xetafe» futbolchilari to‘g‘ri zarba bera olmadi. Ikkinchi bo‘lim boshlarida Abkar qizil kartochka olib maydonni tark etganidan keyin esa amalda o‘yin taqdiri hal bo‘ldi. Diyego Simeone jamoasi uchinchi o‘rinni yanada mustahkamladi.
«Real» – «Elche» 4:1
Gollar: Ryudiger, 39 (1:0). Valverde, 44 (2:0). Hausen, 66 (3:0). Manuel Anxel, 85 – avtogol (3:1). Arda Guler, 89 (4:1)
«Real»: Kurtua, Ryudiger (D. Aguado, 61), Hausen, F. Garsiya, Karvahal, Tshuameni (Arda Guler, 58), Pitarch (Palasios, 64), Kamavinga, Valverde (G. Garsiya, 58), Vinisius Junior (Yanez, 58), Dias (Manuel Anxel, 63)
«Elche»: Dituro, Petro (M. Aguado, 64), Affengryuber (Bigas, 74), Chust, Valera, Sangare (Pedrosa, 23), Redondo (Mir, 64), Febas, Sepeda (Xosan, 64), Andre Silva, Neto (Diangana, 74)
Ogohlantirishlar: Kamavinga, 55 – Valera, 62. Affengryuber, 66. Mir, 88
Hafta o‘rtasida YeChL o‘yinida katta kuch sarflagan «Real» futbolchilari ancha vaqtgacha autsayder darvozasi tomon yo‘l topa olmadi. Ammo yarimhimoyaga qaytganidan keyin yayrab o‘ynayotgan Valverdeda bu o‘yinga ham yetarli kuch qolgandi. «Selta» darvozasiga g‘alaba goli, «Siti»ga qarshi o‘yinda het-trik, shanba kuni esa uning seriyasi darvom etdi. Avvaliga Fedening zarbasidan keyin darvozabon to‘pni amallab qaytardi, qaytgan to‘pga esa Ryudiger birinchi bo‘lib yetib keldi va hisob ochildi. Bir necha daqiqa o‘tib esa barchasini Valverdening o‘zi bajardi. U jarima maydoniga yaqinlashib kelib, bir harakat bilan himoyachini yo‘lidan oldi va to‘pni to‘sin ortidan darvoza to‘riga kiritdi.
Alvaro Arbeloa 58-daqiqadayoq Vinisius Junior, Valverde va Tshuameni kabi yetakchi futolchilarini, biroz o‘tib Ryudigerni ham zaxiraga oldi, ular keyingi hafta o‘rtasida «Siti»ga qarshi javob o‘yinida kerak bo‘ladi. Ularning o‘rniga o‘yinni davom ettirgan futbolchilar ham ikkita gol urishdi. Avvaliga 18 yoshli Yanesning uzatmasidan keyin Hausen hisobdagi farqni oshirdi. O‘yin oxirlarida esa Guler maydonning ikkinchi qismidan turib fantastik gol muallifiga aylandi. U zarba bergan nuqtadan darvoza chizig‘igacha bo‘lgan masofa 68 metr chiqadi.
Yirik g‘alabadan keyin madridliklar turnir jadvalida yana «Barselona»ga bir ochkolik masofada yaqinlashib oldi, lekin kataloniyaliklar yakshanba kuni «Sevilya»ga qarshi o‘yin natijasiga ko‘ra yana to‘rt ochkolik farqni tiklashi mumkin.
Bugun, Turkiya Superligasining 26-turi doirasida peshqadam «Galatasaroy» o‘z maydonida «Bashakshehir»ni qabul qiladi.
Uchrashuv Toshkent vaqti bilan soat 22:00 da Istanbuldagi «RAMS Park» stadionida boshlanadi.
«Galatasaroy» 25 o‘yindan so‘ng 61 ochko bilan jadvalda 1-o‘rinda bormoqda. «Bashakshehir» esa 42 ochko bilan 5-pog‘onani egallab turibdi va yevrokuboklar uchun kurashmoqda.
«Istanbul Bashakshehir» bugungi o‘yin uchun asosiy tarkibni e’lon qildi. Eldor Shomurodov — asosiyda, Abbosbek Fayzullayev qaydnomaga ham kiritilmagan.
2026-yilgi Osiyo Kubogi chorak finalida O‘zbekiston ayollar terma jamoasi Janubiy Koreya ayollar terma jamoasidan mag‘lubiyatga uchradi. 6:0 hisobida g‘alaba qozongan koreyslar yarim final yo‘llanmasini qo‘lga kiritdi.
Shunga qaramasdan, milliy jamoamiz Jahon chempionati yo‘llanmasi uchun kurashni davom ettiradi. Bo‘lg‘usi raqib Yaponiya – Filippin uchrashuvida aniqlanadi — ushbu uchrashuvda yengilgan jamoa ustidan g‘alaba qozonsa, O‘zbekiston terma jamoasi 2027-yilda Braziliyada o‘tkaziladigan ayollar o‘rtasidagi JChga yo‘llanma oladi.
Agar jamoa ushbu o‘tish bahsida ham yengilsa, KXDR/Xitoy Taypeyi o‘rtasidagi o‘yinda mag‘lub bo‘lgan jamoa bilan to‘qnash keladi. Bu uchrashuv g‘olibi xalqaro pley-off o‘yinlari orqali mundial yo‘llanmasi uchun kurashni davom ettiradi, mag‘lub musobaqani tark etadi.
2026-yilgi ayollar o‘rtasidagi Osiyo Kubogida 12 ta terma jamoa ishtirok etmoqda. Ular uchta guruhga bo‘lingan holda bahs olib bordi. Guruhlarda dastlabki ikki o‘rinni egallagan jamoalar hamda eng yaxshi ko‘rsatkich qayd etgan ikki nafar uchinchi o‘rin sohibi chorak final bosqichiga yo‘l oldi.
Chorak final g‘oliblari to‘g‘ridan-to‘g‘ri Jahon chempionati yo‘llanmasiga ega bo‘ladi. Mag‘lub jamoalar esa oldindan aniqlangan setka asosida pley-off bosqichida ishtirok etadi. Pley-offda g‘alaba qozongan jamoalar Osiyoning 5 va 6-vakili sifatida mundial yo‘llanmasini qo‘lga kiritadi.
JCh-2027 yo‘llanmasi uchun pley-off o‘yinlari:
O‘zbekiston — Yaponiya/Filippin
KXDR — Xitoy Taypeyi
Yarim finalga yo‘l olgan Avstraliya, Xitoy va Janubiy Koreya terma jamoalari allaqachon Jahon chempionati ishtirokchisiga aylanishga ulgurdi. So‘nggi yarim finalchi nomi Yaponiya – Filippin uchrashuvidan keyin ma’lum bo‘ladi.
Ma’lumot uchun: 2029-yilgi ayollar o‘rtasidagi Osiyo Kubogi O‘zbekistonda o‘tkaziladi.
Sport
Futbol bo‘yicha O‘zbekiston ayollar terma jamoasi Osiyo kubogi chorak finalida yirik hisobda mag‘lub bo‘ldi
Endi ular jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Avstraliyada bo‘lib o‘tayotgan ayollar o‘rtasida Osiyo kubogi chorak finalida O‘zbekiston terma jamoasi futbolchilari Janubiy koreyalik raqibalariga qarshi maydonga tushdi.
Bahs 6:0 hisobida Janubiy Koreya ayollar terma jamoasi g‘alabasi bilan yakunlandi.
O‘zbekistonlik ayol futbolchilar bangladeshlik raqibalarini 4:0 hisobida yengib chorak finalga chiqishgandi.
Endi ular 19 mart kuni jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Osiyo kubogida eng yaxshi natijaga erishgan olti jamoa 2027 yilgi ayollar o‘rtasidagi Jahon chempionatiga to‘g‘ridan-to‘g‘ri yo‘llanmani qo‘lga kiritadi.
Sobiq turmush o‘rtoqdan rozi bo‘ling — baxt eshigi ochiladi
Abduqodir Husanov oilasida o‘g‘il farzand dunyoga keldi
Prezidentning yangi qarori e’lon qilindi
-
Jamiyat4 days agoNogironlar uchun onlayn platforma tenderida shubhali holatlar aniqlandi
-
Siyosat2 days agoPrezident Mirziyoyev fuqarolardan murojaatlar ko‘payib borayotgan bir paytda militsiya xodimlarining qo‘pol xatti-harakatlarini tanqid qildi
-
Jamiyat4 days agoRulda kamar taqmagan Sardor Mamadaliyev jarimaga tortildi
-
Dunyodan5 days ago
Ali Xomanaiyning o‘g‘li Eronning yangi oliy rahbari etib saylandi
-
Siyosat3 days agoIkki nafar O‘zbekiston fuqarosi firibgarlik va o‘g‘irlik hodisasidan so‘ng Bahrayn va AQShdan qaytib keldi
-
Turk dunyosi5 days agoEron urushi kuchayib borayotgan bir paytda Turkiya o’rtada qoldi
-
Sport4 days agoAvstraliyadan boshpana so‘ragan eronlik futbolchilardan biri fikrini o‘zgartirdi
-
Iqtisodiyot3 days ago
13-mart kuni ham dollar kursi pastlaydi