Iqtisodiyot
Go‘sht bahosi: tumanlar kesimida narxlar qanday?
Joriy yilning 13 may holatiga ko‘ra, O‘zbekiston bo‘yicha 1 kg mol go‘shtining o‘rtacha eng yuqori narxi Yakkasaroy tumanida — 139 ming 600 so‘m, eng past narxi esa Qoraqalpog‘iston Respublikasining Mo‘ynoq tumanida — 94 ming 300 so‘m qayd etildi. Farg‘ona vodiysida eng arzon narxlar Xonobod tumanida 112 ming 500 so‘m bo‘lsa, eng qimmati To‘raqo‘rg‘on tumanida 135 ming so‘m. Ayrim hududlardagi narxlarda katta tafovutlar mavjud. Masalan, Navoiy viloyatining ikkita qo‘shni tumani Tomdi (95 ming 500 so‘m) va Uchquduqda (137 ming 500 so‘m) 1 kg mol go‘shtining o‘rtacha bahosi 42 ming so‘mga farq qilyapti.
O‘zbekistonda go‘sht narxining qimmatlashgani aholining kundalik xarajatlariga sezilarli ta’sir ko‘rsatdi. Ayniqsa, mol go‘shti narxining tez-tez o‘zgarishi nafaqat iste’molchilar, balki oziq-ovqat xavfsizligi, inflatsiya va agrar siyosat samaradorligi masalalarini ham kun tartibiga olib chiqdi. Statistika qo‘mitasi tomonidan e’lon qilingan ma’lumotlarga ko‘ra, aprel oyida qo‘y go‘shti — 3,7 foizga (2025 yil aprel oyiga nisbatan +20,3 foiz), suyakli mol go‘shti — 3,2 foizga (+16,6 foiz), suyaksiz mol go‘shti — 3,2 foizga (+17,3 foiz), go‘sht qiymasi — 2,9 foizga (+14,1 foiz) qimmatlashgan. Xo‘sh, viloyatlar va tumanlar kesimida eng qimmat go‘sht qayerda sotilyapti? Kun.uz 13 may holatiga ko‘ra, Markaziy bank tomonidan e’lon qilingan narxlarni tahlil qildi.
Vodiy viloyatlari
Namanganda o‘rtacha olinganda mol go‘shti bahosi — 129 ming 400 so‘m. Viloyatda eng qimmat go‘sht To‘raqo‘rg‘on tumanida (135 ming so‘m), eng arzoni esa Namangan shahrida (120 ming so‘m) qayd etilgan.
Farg‘ona viloyatida mol go‘shtining o‘rtacha bahosi Namanganga nisbatan arzonroq — 121 ming 700 so‘m. Viloyat miqyosida eng arzon go‘sht So‘xda —115 ming so‘m, eng qimmati esa Marg‘ilon shahrida — 133 ming 200 so‘m.
Vodiydagi eng arzon go‘sht Andijonda — 119 ming 900 so‘m. Viloyat miqyosida Xonobodda o‘rtacha narxlar 112 ming 500 so‘m bo‘lsa, Andijon shahrida 130 ming so‘mni tashkil etgan. Umuman olganda, Andijon viloyatining 9 ta tumanida narxlar 120 ming so‘mdan arzonroq.
Toshkent shahri, Sirdaryo va Toshkent viloyati
Poytaxtda 1 kg mol go‘shtining o‘rtacha bahosi — 129 ming 100 so‘m. Eng past narx Bektemirda — 120 ming 700 so‘m, eng yuqori narx Yakkasaroyda — 139 ming 600 so‘m.
Toshkent viloyatida o‘rtacha narx poytaxtga nisbatan arzonroq — 121 ming 400 so‘m. Viloyat miqyosida eng past narx Piskent tumanida — 109 ming 200 so‘m, eng baland narx esa Toshkent tumanida — 133 ming so‘m. Umuman olganda, Toshkent viloyatining 4 ta tumanida narxlar 115 ming so‘mdan arzonroq shakllangan.
Sirdaryoda o‘rtacha narxlar — 123 ming 300 so‘m. Eng past narx Guliston shahrida — 116 ming 200 so‘m, eng balandi esa Sardobada — 133 ming 900 so‘m.
Jizzax, Samarqand, Navoiy va Buxoro viloyatlari
Jizzax viloyatida o‘rtacha narx — 129 ming 600 so‘m. Viloyatda eng arzon go‘sht Jizzax shahrida — 118 ming 400 so‘m, eng qimmati Zominda – 135 ming 800 so‘m.
Samarqandda o‘rtacha narxlar Jizzaxga nisbatan arzonroq — 125 ming 500 so‘m. Viloyat miqyosida eng arzon go‘sht Bulung‘urda — 115 ming 700 so‘m, eng qimmati esa Kattaqo‘rg‘onda — 134 ming 500 so‘m.
Navoiyda 1 kg mol go‘shtining bahosi — 120 ming 600 so‘m. Eng past narx Tomdida — 95 ming 500 so‘m, eng yuqori narx Uchquduqda — 137 ming 500 so‘m. Ikkita qo‘shni tumanda narxlarning 42 ming so‘m yoki 44 foizga farq qilayotgani taajubli holat.
Buxoroda o‘rtacha narx — 114 ming 500 so‘m. Eng qimmat go‘sht Jondorda —130 ming so‘m, eng arzoni esa Qorako‘lda — 104 ming 500 so‘m.
Qashqadaryo va Surxondaryo
Qashqadaryoda o‘rtacha go‘sht narxi — 115 ming 100 so‘m. Bunda eng past ko‘rsatkich Kosonda — 105 ming 200 so‘m, eng yuqori ko‘rsatkich esa Dehqonobodda — 126 ming 300 so‘m.
Surxondaryoda 1 kg mol go‘shtining bahosi – 120 ming 900 so‘m. Eng past narx Angorda – 111 ming 700 so‘m, eng yuqori narx Termizda – 132 ming 700 so‘m.
Xorazm va Qoraqalpog‘iston Respublikasi
Xorazmda o‘rtacha go‘sht narxi — 112 ming 900 so‘m. Bunda eng past ko‘rsatkich Yangibozorda — 107 ming 500 so‘m, eng yuqori ko‘rsatkich esa Gurlanda — 119 ming 500 so‘m.
Qoraqalpog‘istonda 1 kg mol go‘shtining bahosi – 104 ming 800 so‘m. Eng past narx Mo‘ynoqda — 94 ming 300 so‘m, eng yuqori narx To‘rtko‘lda – 114 ming 100 so‘m.
Iqtisodiyot
Saida Mirziyoyeva Gonkongning Henderson Land Group xoldingi boshqaruvi raisi bilan uchrashdi
Prezident Administratsiyasi rahbari Saida Mirziyoyeva XXRning Gonkong maxsus ma’muriy hududidagi eng yirik xoldinglardan biri — Henderson Land Group boshqaruvi raisi Piter Li bilan uchrashuv o‘tkazdi.
Tomonlar qayta tiklanuvchi energetika, Yangi Toshkent infratuzilmasini rivojlantirish va ta’lim sohalaridagi istiqbolli qo‘shma loyihalarni muhokama qildi.
«Mamlakatimiz investitsiyalar uchun ochiq va biz Gonkongning yetakchi biznes doiralari bilan hamkorlikdan manfaatdormiz. Sheriklikdagi tashabbuslarni, jumladan, yangi tashkil etilayotgan Toshkent xalqaro moliya markazi orqali ham qo‘llab-quvvatlashga tayyormiz», — deb yozdi Saida Mirziyoyeva.
Administratsiya rahbari O‘zbekiston va Gonkong o‘rtasida uzoq muddatli iqtisodiy hamkorlikni rivojlantirish uchun katta imkoniyatlar borligiga ishonch bildirdi.
Markaziy bank 2026-yil 9-oktyabrdan valyutalarning yangi kursini belgiladi.
AQSh dollari 37,38 so‘mga oshib, 11 846,57 so‘m etib belgilandi.
Yevro kursi 34,69 so‘mga oshdi va 13 240,91 so‘m bo‘ldi. Funt-sterling 15 631,55 so‘mni tashkil qildi (29,25).
Rossiya rubli 138,95 so‘m etib belgilandi (+0,8).
Markaziy bank 2026-yil 6-oktyabrdan valyutalarning yangi kursini belgiladi.
AQSh dollari 5,5 so‘mga oshib, 11 778,45 so‘m etib belgilandi.
Yevro kursi 25,62 so‘mga tushdi va 13 198,93 so‘m bo‘ldi. Funt-sterling 15 580,53 so‘mni tashkil qildi (+31,99).
Rossiya rubli 138,35 so‘m etib belgilandi (-2,79).
Milliy statistika qo‘mitasi ma’lumotlariga ko‘ra, 2026-yil yanvar–iyul oylarida O‘zbekistonga 46 davlatdan qariyb 28,5 ming tonna shokolad mahsulotlari olib kirilgan.
Import qilingan mahsulotlarning umumiy qiymati 123,7 mln AQSh dollarini tashkil etgan. Bu o‘tgan yilning mos davriga nisbatan 1,6 ming tonnaga yoki 6 foizga ko‘p.
Import hajmi bo‘yicha Rossiya keskin ustunlik qilgan. Yilning dastlabki yetti oyida Rossiyadan O‘zbekistonga 19,5 ming tonna shokolad mahsulotlari yetkazib berilgan.
Rossiyadan kelgan shokolad mahsulotlari umumiy importning qariyb 70 foizini tashkil etgan. Keyingi o‘rinda Ukraina bo‘lib, undan 2,2 ming tonna mahsulot import qilingan.
Qozog‘istondan 914 tonna, Belarusdan 805,2 tonna shokolad mahsulotlari olib kirilgan. Litvadan import 746,2 tonnani tashkil etgan.
Turkmaniston 715,2 tonna, Turkiya esa 569,5 tonna ko‘rsatkich bilan keyingi o‘rinlarda qayd etilgan. Qolgan davlatlar hisobiga 3 ming tonna mahsulot to‘g‘ri kelgan.
Prezident Shavkat Mirziyoyev raisligida Andijon viloyatini ijtimoiy-iqtisodiy rivojlantirish, tadbirkorlikni qo‘llab-quvvatlash va aholi daromadlarini oshirish masalalari bo‘yicha yig‘ilish o‘tkazilmoqda.
Joriy yilning birinchi yarmida viloyat iqtisodiyoti 8,8 foiz, sanoat 9,2 foiz, xizmatlar 16,1 foiz, investitsiyalar 8,9 foizga o‘sgani qayd etildi.
– Bizga o‘sishdagi raqamlar emas, balki har bir ko‘rsatkich har bir oilaning kundalik hayotiga qanday o‘zgarish olib kirgani muhim,– dedi davlatimiz rahbari.
Andijonda yer va tabiiy boyliklar cheklangan bo‘lsa-da, harakatchan aholi, kuchli tadbirkorlik ruhi, ko‘p sonli yoshlar, sanoat maktabi va katta bozor kabi imkoniyatlar borligi ta’kidlandi.
So‘nggi o‘n yilda viloyatga respublika budjetidan 20 trillion so‘m, banklar tomonidan tadbirkorlik uchun 90 trillion so‘m yo‘naltirildi. Birgina joriy yilda aholi farovonligini oshirishga 6 trillion so‘m ajratildi.
Hokimlarga berilgan vakolatlar va yaratilgan moliyaviy imkoniyatlar shunga munosib natijaga aylanishi zarurligi ko‘rsatib o‘tildi.
