Mahalliy
quyushqondan chiqqan direktor, «tishlog‘ich» metodist va boshqalar
Ijtimoiy tarmoqlarda “Buxorodagi davlat bog‘chasida metodist va mudira tarbiyachini bolalar oldida urdi” sarlavhasi ostida tarqalgan videotasvir keng jamoatchilik o‘rtasida muhokamaga aylandi. Buxoro viloyati maktabgacha va maktab ta’limi boshqarmasi axborot xizmati rahbari Iroda Oripovaning «Xabar.uz»ga ma’lum qilishicha, holat joriy yilning 22-aprel kuni sodir bo‘lgan.
Tasvirda Olot tumanidagi 27-sonli davlat maktabgacha ta’lim tashkiloti oshxonasida bolalar ovqatlanayotgan vaqtida bir nechta ayollarning o‘zaro mushtlashuvi aks etgan. Bildirilishicha, bu janjallashganlar: bog‘cha mudirasi, metodist va tarbiyachidan iborat bo‘lgan. Mudira va metodist tomonidan tarbiyachining kaltaklanishi bolalar ko‘z o‘ngida sodir etilgan.
«Judayam xunuk, to‘g‘rirog‘i, biz uchun uyatli holat. Bolalar tarbiya maskanida shunday ko‘ngilsiz holatning kelib chiqqani tarbiyalanuvchilar uchun ham, tarbiyachilar uchun ham, hatto, shu voqeaga guvoh bo‘lgan bo‘lsa, ota-onalar uchun ham xunuk manzara. Tumanimizdagi ko‘zga ko‘ringan bog‘chalardan biri sifatida e’tirof etib kelingan bu maskanning mas’ullariyu tarbiyachilarining bolalar ko‘z oldidagi yoqimsiz xatti-harakatini oqlamayman. 27-sonli davlat maktabgacha ta’lim tashkiloti direktori M.J.ga nisbatan Buxoro viloyat maktabgacha va maktab ta’limi boshqarmasi boshlig‘ining 2025 yil 30 apreldagi 277-K-sonli buyrug‘iga asosan, «Hayfsan» intizomiy jazo chorasi qo‘llanildi. Tarbiyachining xatti-harakati uchun chora qo‘llash esa direktorning vazifasiga kiradi»,-dedi Olot tuman maktabgacha va maktab ta’limi bo‘limi boshlig‘i To‘xtajon Qutliyev.
Biz 27-sonli davlat maktabgacha ta’lim tashkiloti direktori M.J. bilan bog‘landik. M.J. o‘sha kuni tarbiyachi D.H. qatori boshqa tarbiyachilarga ham boshyalang holatda o‘tirgan maktabgacha ta’lim tashkiloti oshxonasiga kirishgani uchun tanbeh berganini, D.H. esa qizishib, janjal chiqarganini bildirdi.
«Oshxonada boshyalang kirish mumkin emas. Men boshqalar qatori bevosita D.H.gayam shu talabni qo‘ydim. O‘zaro muloqot qiziqqonlikka aylandi. Jahl ustida shu vaziyat yuzaga kelib qoldi. Janjaldan keyin D.H. bir hafatacha ishga kelmay qo‘ydi. Uni bog‘chamiz kasaba uyushmasiyu boshqa mas’ullarini tarbiyachining uyiga yuborish orqali chaqirtirdik. Kelmadi. Joriy yilning 28 aprelida № 9-sonli xat bilan 22 apreldan 28 aprelgacha ishga kelmagani yuzasidan tushuntirish berishi, aks holda, tegishli moddalarga asosan, u bilan tuzilgan mehnat shartnomasi bekor qilishi to‘g‘risida ogohlantiruv xatini ham jo‘natdik. Javob bo‘lmadi. 7 may kuni №12-sonli hujjat asosida 12 mayda 27-DMTTda bo‘lib o‘tadigan yig‘ilishda ishtirok etishi zarurligi yuzasidan Chaqiruv xati yuborildi. Biroq, mehnat intizomiga zid ravishda yig‘ilishga kelmadi»,-dedi DMTT direktori M.J.
Uning aytishicha, bir necha marta ogohlantiruv va chaqiruv xatlari jo‘natilishiga qaramay, yordamchi tarbiyachi ishga kelmagan. Shundan so‘ng D.H. joriy yilning 15 may kuni 60-2-31-DMM/2025-sonli hujjat asosida, mehnat intizomini muntazam ravishda buzib kelgani vaji bilan mehnat shartnomasini bekor qilish to‘g‘risida buyruq chiqarilgan. Va u ishdan bo‘shatilgan.
«Men o‘z nomimga kelgan turli mazmundagi xatlarni rad etmayman. Endi siz o‘ylab ko‘ring, 22 aprel kuni men bog‘chaning mas’ul ayollari tomonidan kaltaklandim. Stress oldim. Bolalar oldida kamsitildim. Insoniy huquqlarim poymol qilindi. Men ham jismoniy, ham ruhiy zarba olgandim. Men toki o‘zimga kelgunimcha, «shok» holatda edim. Eng qizig‘i, shaxsan o‘zim shu kaltaklanganimdan keyin ham bog‘chaga bordim. «Mudira yo‘q», deb uning xonasiga kiritishmadi. Eshigi qulf, deya ko‘rsatishdi. Aslida, u shu yerda bo‘lgan. Bundan tashqari, meni 7 may kuni 12 mayda bo‘ladigan yig‘ilishga chaqirishgan. Aslida, 4 may kuni shaxsan o‘zim stress holatida bo‘lganim sababi o‘z hisobimdan vaqtinchalik mehnat ta’tili berilishini so‘rab, ariza yozib borgandim. Arizamni qabul qilishmadi. Bog‘cha mudirasini yana «yashirishdi». 5 may kunida o‘tkazilgan yig‘ilishda ham qatnashdim. O‘shandayam stress holatida edim. Ushbu yig‘ilishda ham o‘z hisobimdan mehnat ta’tili berishlarini so‘rab, murojaat qilgandim. O‘z so‘zim isboti sifatida uni tasvirga olishga majbur bo‘lgandim. Ammo, murojaatimga e’tibor ham qilishmay, yana 7 may kuni xat jo‘natishdi. Buni qanday tushunish mumkin?»-deydi D.H. biz bilan telefon orqali muloqotda.
D.H. 22 aprelda sodir bo‘lgan janjalga tashkilot direktori aytganidek, ayollarning oshxonada boshyalang o‘tirgani haqida keltirgan vaji to‘g‘riligi, ammo, asosiy janjal boshqa masaladan kelib chiqqanini bildirmoqda.
«Bolam ham shu bog‘cha tarbiyalanuvchisi. Bilasiz, bog‘chaning tarbiyachisidan tortib, barcha ishchi-xodimlari o‘z hisoblaridan ovqatlanishadi. O‘sha kuni tushlikda direktor kirib keldi. Men bu vaqtda o‘z farzandimning idishida qolgan ovqatni tanovvul qilayotgan edim. M.J. meni ko‘pchilik oldida haqoratlab, yeganim haqini to‘lab qo‘yishimni talab qildi. Men bolam uchun puli to‘langan ovqatni yeganimni tushuntirishga harakat qildim. Afsuski, tortishuv janjalga, haqoratga aylanib ketdi»,-deydi D.H.
D.H. aslida, o‘rtada shaxsiy adovat borligi, shu sababdan o‘zining uch yildan buyon direktor tomonidan jamoa o‘rtasida doimiy kamsitilib kelinayotganini iddao qildi.
«Yolg‘on gapirgan. D.H. mening oldimga janjaldan keyin kelmagan. Kasaba uyushmasi mas’uli ham bir necha marta so‘rab bordi. Xatlar orqali chaqirildi. O‘zi ishlamasligini bildirgan»,-deydi tashkilot direktori.
D.H. 4 may kuni o‘z hisobidan mehnat ta’tili olish uchun yozgan arizasi hamda 5 may kuni o‘tkazilgan yig‘ilishda ishtirok etgani videotasvirini tahririyatga taqdim etdi. Biroq, u o‘z arizasining bog‘cha mas’ullari tomonidan qabul qilinmaganini bildirmoqda.
Tasvirga ko‘ra, tarbiyachi D.H. ham tashkilot direktori, ham metodisti tomonidan kaltaklangan, yuzi tishlangan, sochlari yulingan va cho‘ntaklari kovlangan. Bu xatti-harakati uchun M.J.ga nisbatan Buxoro viloyat maktabgacha va maktab ta’limi boshqarmasi boshlig‘i tomonidan intizomiy jazo qo‘llangan. M.J. esa o‘z xizmat vakolatidan kelib chiqib, voqeadan ma’lum vaqt o‘tgach, D.J.ni turli xat va vajlar orqali u bilan tuzilgan mehnat shartnomasini bekor qilgan.
– Xo‘p, siz yuqori turuvchi tashkilotingiz tomonidan intizomiy jazo -«Hayfsan» oldingiz, tarbiyachingiz esa siz tomoningizdan ishdan bo‘shatildi. Voqea ishtirokchilaridan yana biri – metodist-chi? Uning xatti-harakati uchun kim tomondan chora ko‘riladi?-savol yo‘llaymiz M.J.ga.
– Bu xodimga metodistlik yuklatilgan. Asosiy vazifasi – jismoniy yo‘riqchi. Ayni paytda esa u bola parvarishida. O‘sha kuni shaxsiy buyumlarini olish uchun kelgan.
– Va bevosita janjal ishtirokchisiga aylangan?
– Ha!
– Shunday qilib, uning xatti-harakati siz tomoningizdan ochiq qoldirildimi?
– Tez kunda bola parvarishidan ishga chiqadi va bu masala ko‘rib chiqiladi. O‘sha kuni og‘zaki janjal paytida yordamchi tarbiyachi, ya’ni D.H. meni qo‘l telefoniga tasvirga tushirmoqchi bo‘ldi. Men uning telefonini itarib yubormoqchi bo‘ldim, qo‘lim tegmadi. Shundan keyin mening yoqamga osilib ketdi. Metodist orqada turgan edi. «Direktorga nega qo‘l ko‘tarasan!»-deya po‘pisalanib, uni devorga qisdi. Shu bilan ikkalasi bir-birini urib ketdi..,-so‘zladi M.J.
– Rahbar rahbardek bo‘lishi kerak, deyishadi-ku! Qiziqqonlik, baribir, ustun kelibdi-da!-deymiz.
– Ha, tan olaman. Lekin, quyushqondan chiqishga majbur qiladigan qarg‘andi. «Bolalaring o‘lsin, ustida yig‘la», dedi. Man farzand dog‘ini ko‘rganman, chidolmadim! Buni hamma eshitdi! Bundan ilgari ham o‘z faoliyati davomida ko‘p qarg‘angan, juda ko‘p bor mehnat intizomini buzgan. «Hayfsan»lar berganmiz. Guruhidagi bola «katta ish» qilib qo‘yganida, o‘sha bolani ota-onasining uyiga olib borib, yuvintirib, yana qaytarib keltirgan. Shu va boshqa mazmundagi shikoyatlar bir nechta ota-onalardan tushgan. Shunga ham qaramay, biz yordamchi tarbiyachiga nisbatan keskin choralarni qo‘llamaganmiz,-so‘zlaydi M.J.
Ma’lumot o‘rnida: ushbu holat yuzasidan ichki ishlar organlari tomonidan surishtiruv-tergov harakatlari olib borilgan. Ayni paytda holat yuzasidan sud o‘z ishi davom ettirmoqda. Mavzuga qaytamiz.
Laylo Hayitova
Bugungi kunda ta’lim tizimida o‘zbek tilini davlat tili sifatida o‘qitish sifatini oshirish, pedagoglarning kasbiy salohiyatini rivojlantirish hamda ta’lim jarayoniga zamonaviy yondashuvlarni keng joriy etishga alohida e’tibor qaratilmoqda.
Bu borada belgilangan vazifalar ijrosi doirasida joriy yilning 24-28-avgust kunlari Ta’limni rivojlantirish respublika ilmiy-metodik markazi va Maktabgacha va maktab ta’limi vazirligi tomonidan “Maktabgacha va maktab ta’limida o‘zbek tilini sifatli o‘qitish: zamonaviy metodika va innovatsion yondashuvlar” mavzusida respublika o‘quv-seminari tashkil etildi.
Seminarga respublikamizning barcha hududlaridan jami 180 nafar pedagog, xususan, 120 nafar maktabgacha ta’lim tashkiloti tarbiyachisi hamda umumiy o‘rta ta’lim maktablarining 60 nafar boshlang‘ich sinf o‘qituvchisi jalb etildi.
Joriy yilning 24-avgust kuni Maktabgacha ta’lim tashkilotlari direktor va mutaxassislarini qayta tayyorlash va ularning malakasini oshirish institutida respublika o‘quv-seminarining tantanali ochilish marosimi bo‘lib o‘tdi.
Unda Maktabgacha va maktab ta’limi vazirining birinchi o‘rinbosari Sherzod Karimov, Prezident Administratsiyasi rahbarining ta’limni isloh qilish bo‘yicha o‘rinbosari bo‘linmasining loyiha koordinatori Yuliya Risyukova hamda Alisher Navoiy nomidagi Toshkent davlat o‘zbek tili va adabiyoti universiteti rektori Shuhrat Sirojiddinov va Ta’limni rivojlantirish respublika ilmiy-metodik markazi direktor o‘rinbosari Habibullo Nosirov ishtirok etdi.
Ochilish marosimida ta’lim rus va qardosh tillarda olib boriladigan maktablar hamda maktabgacha ta’lim tashkilotlarida o‘zbek tilini o‘qitish sifatini oshirish, davlat tiliga bo‘lgan e’tiborni kuchaytirish, pedagoglarning kasbiy salohiyatini rivojlantirish masalalariga alohida e’tibor qaratildi.
Tadbirda so‘zga chiqqan Prezident Administratsiyasi rahbarining ta’limni isloh qilish bo‘yicha o‘rinbosari bo‘linmasining loyiha koordinatori Yuliya Risyukova bugungi seminar sohadagi ilg‘or tajribalarni ommalashtirish, zamonaviy metodikalarni amaliyotga keng joriy etish va o‘zbek tilini o‘qitish sifatini yanada oshirishga xizmat qilishini ta’kidladi.
”Mustaqillik bizga nafaqat erkin va farovon hayot qurish, balki milliy tilimiz, madaniyatimiz va qadriyatlarimizni asrab-avaylash, ularni kelgusi avlodlarga yetkazish imkonini berdi. Shu ma’noda, bugungi “Maktabgacha va maktab ta’limida o‘zbek tilini sifatli o‘qitish: zamonaviy metodika va innovatsion yondashuvlar” mavzusidagi seminar alohida ahamiyatga ega. Chunki til – bu shunchaki muloqot vositasi emas. Til – xalqning tarixi, ma’naviyati va tafakkurini o‘zida mujassam etgan bebaho qadriyatdir. Farzandlarimizga o‘zbek tilini sifatli o‘rgatish orqali biz ularning nafaqat savodxonligini, balki Vatanga daxldorlik hissini, milliy qadriyatlarga hurmatini va jamiyat bilan erkin muloqot qilish qobiliyatini ham rivojlantiramiz. Bu jarayonda, ayniqsa, pedagogning o‘rni beqiyos. Bolada tilga muhabbat uyg‘otish uchun, avvalo, unga erkin gapirish, fikr bildirish va xato qilishdan qo‘rqmaslik imkonini berish zarur. Bugungi seminarda 180 nafar pedagog ishtirok etayotgani ham ushbu yo‘nalishdagi ishlar ko‘lami tobora kengayib borayotganini ko‘rsatadi. Ishonamanki, bugungi seminar sohadagi ilg‘or tajribalarni ommalashtirish, zamonaviy metodikalarni amaliyotga keng joriy etish va o‘zbek tilini o‘qitish sifatini yanada oshirishga xizmat qiladi.” – dedi Yuliya Risyukova.
Maktabgacha va maktab ta’limi vazirining birinchi o‘rinbosari Sherzod Karimov bu yo‘nalishda amalga oshirilayotgan ishlar, tashkil etilayotgan seminarlar, yaratilayotgan dastur va metodikalar pedagoglarning bilim va ko‘nikmalarini oshirishga xizmat qilishini ta’kidladi.
”Millatning taraqqiyoti, eng avvalo, uning tiliga bo‘lgan munosabati bilan belgilanadi. O‘z tilini qadrlagan, unda erkin fikrlay oladigan va o‘z fikrini ravon ifoda eta oladigan avlod milliy qadriyatlarni ham chuqurroq anglaydi. Shuning uchun bolalarimizga o‘zbek tilini o‘rgatish masalasi faqat ta’lim muassasalarining vazifasi bo‘lib qolmasligi kerak. Bolaning tilga bo‘lgan munosabati, avvalo, oilada shakllanadi. Ota-onalar, ayniqsa, onalar bolaning dastlabki nutqi, so‘z boyligi va fikrlash tarzining rivojlanishida katta o‘rin tutadi. Bola bilan o‘zbek tilida ko‘proq suhbatlashish, uning savollariga to‘liq va tushunarli javob berish, ertak, she’r va hikoyalar o‘qib berish juda muhim,” – dedi Sherzod Karimov.
Toshkent davlat o‘zbek tili va adabiyoti universiteti rektori Shuhrat Sirojiddinov mashg‘ulotlarda egallangan bilimlar amaliyotga tatbiq etilsa, ular o‘z samarasini beradi. Olingan tajribalar ta’lim muassasalariga, pedagoglarga va eng asosiysi, bolalarimizga yetib borishi lozimligini ta’kidladi.
”Bugungi kunda mamlakatimiz ta’lim tizimida amalga oshirilayotgan o‘zgarishlar nihoyatda katta. Prezidentimiz tashabbusi bilan yosh avlodga sifatli ta’lim va munosib tarbiya berish, ularning bilim doirasini kengaytirish hamda kelajakda yetuk inson bo‘lib shakllanishi uchun keng imkoniyatlar yaratilmoqda. Bugun pedagoglar uchun ham katta imkoniyatlar mavjud. Ilgari biz o‘rganmagan yoki yetarlicha foydalanmagan metodikalar, tajribalar va bilimlarni egallash imkoniga ega bo‘lyapmiz. Bunday seminar va uchrashuvlar orqali o‘qituvchilar bir-biridan o‘rganadi, o‘z qarashlarini boyitadi va mavjud muammolarga birgalikda yechim izlaydi. Oldimizda hali ko‘plab vazifalar va yechimini kutayotgan savollar mavjud. Ularni hal etish uchun bilim, tajriba, hamkorlik va mas’uliyat talab qilinadi. Eng muhimi, amalga oshirayotgan har bir ishimiz bolalarning kelajagiga xizmat qilishi kerak. Bugungi uchrashuv va mashg‘ulotlarda egallangan bilimlar amaliyotga tatbiq etilsa, ular o‘z samarasini beradi. Olingan tajribalar ta’lim muassasalariga, pedagoglarga va eng asosiysi, bolalarimizga yetib borishi lozim. Shundagina biz bilimli, ma’naviy yetuk, o‘z ona tilini, milliy madaniyati va Vatanini sevadigan yosh avlodni tarbiyalay olamiz.” – dedi Shuhrat Sirojiddinov.
Mazkur o‘quv-seminardan ko‘zlangan asosiy maqsad ta’lim rus va qardosh tillarda olib boriladigan umumiy o‘rta ta’lim tashkilotlari o‘zbek tili fani o‘qituvchilari hamda maktabgacha ta’lim tashkilotlari tarbiyachilarining kasbiy kompetensiyalarini rivojlantirish, ularni zamonaviy metod va vositalardan samarali foydalanishga yo‘naltirishdan iborat.
Seminar davomida umumiy o‘rta ta’lim maktablari pedagoglari uchun o‘zbek tilini o‘qitishning zamonaviy usullari, muloqotga yo‘naltirilgan ta’lim, amaliy topshiriqlar asosida o‘qitish, darslarni rejalashtirish va baholash usullari bo‘yicha mashg‘ulotlar tashkil etildi.
Mashg‘ulotlarda pedagoglar o‘quv materiallarini tahlil qilish, o‘quvchilarning nutqiy ko‘nikmalarini rivojlantirishga qaratilgan topshiriqlar ishlab chiqish, amaliy mashqlar va muloqotga asoslangan yondashuvlardan foydalanish bo‘yicha tajriba almashdi.
Maktabgacha ta’lim yo‘nalishida tashkil etilgan mashg‘ulotlarda esa bolalarga o‘zbek tilini o‘rgatishda o‘yin texnologiyalaridan foydalanish, tabiiy til muhitini yaratish, talaffuz va lug‘at boyligini rivojlantirish usullariga e’tibor qaratildi.
Seminar doirasida “O‘zbek tili” interfaol ta’lim platformasi ham taqdim etildi. Mazkur platforma maktabgacha ta’lim tashkilotlari tarbiyachilari va pedagoglar uchun o‘zbek tilini o‘rgatish jarayonini raqamli vositalar asosida tashkil etishga xizmat qiladi.
Platformada bolalarning yosh xususiyatlari hisobga olingan holda kichik va o‘rta guruh hamda katta va tayyorlov guruhi uchun alohida o‘quv resurslari shakllantirilgan. Unda mavzuli materiallar, interfaol o‘yinlar, video mashg‘ulotlar va foydalanuvchi uchun yo‘riqnomalar joylashtirilgan.
Mazkur resurslar orqali bolalarning lug‘at boyligini oshirish, og‘zaki nutqini rivojlantirish va o‘zbek tilida muloqot qilish ko‘nikmalarini shakllantirish imkoniyati yaratilgan. Platformada kundalik hayot, oila, tabiat, fasllar, hayvonot olami, kasblar, transport, milliy qadriyatlar, o‘quv qurollari hamda alifbo kabi mavzular bo‘yicha interfaol materiallar mavjud.
Shuningdek, mashg‘ulotlarda raqamli texnologiyalar, sun’iy intellekt vositalari va zamonaviy o‘quv resurslaridan foydalanish bo‘yicha amaliy tavsiyalar berildi. Ishtirokchilar guruhli ishlar, amaliy topshiriqlar va muhokamalar orqali o‘z metodik yondashuvlarini boyitdi.
Mazkur seminar ta’lim rus va qardosh tillarda olib boriladigan maktablar hamda maktabgacha ta’lim tashkilotlarida o‘zbek tilini o‘qitish sifatini oshirish, pedagoglarning kasbiy salohiyatini rivojlantirish va davlat tilini o‘qitish samaradorligini yanada yuksaltirishga xizmat qiladi.
Seminarni muvaffaqiyatli tamomlagan pedagoglarga tegishli sertifikatlar topshiriladi. Ular “Milliy mentor” sifatida o‘z hududlariga qaytgach, seminar davomida egallagan bilim va ko‘nikmalari hamda o‘zlashtirgan zamonaviy metodikalarni kaskad-kombinatsiyalashgan yondashuv asosida hududdagi boshqa pedagoglarga yetkazish va amaliyotga joriy etish ishlarini davom ettiradi.
Hukumat qarori bilan «Texnikumlar bilan dual ta’limni yo‘lga qo‘ygan hamda bitiruvchilar bandligini ta’minlagan tashkilotlarga kredit ajratish tartibi to‘g‘risida»gi nizom tasdiqlandi.
Ushbu Nizom davlat texnikumlari bilan dual ta’limni yo‘lga qo‘ygan hamda bitiruvchilar bandligini ta’minlagan tashkilotlarga kredit ajratish tartibini belgilaydi.
Quyidagi talablarga javob bergan tashkilotlar kredit olish huquqiga ega:
– texnikum bilan dual ta’limni yo‘lga qo‘ygan hamda dual ta’lim bo‘yicha texnikum bilan amal qiluvchi shartnoma mavjud bo‘lishi;
– dual ta’lim doirasida o‘quvchilar uchun ish joylari va ishlab chiqarish amaliyoti tashkil etilgan bo‘lishi;
– dual ta’lim doirasida o‘quvchilarga tashkilotning malakali mutaxassislarini “ustoz” sifatida biriktirgan bo‘lishi;
– dual ta’lim shaklida tahsil olayotgan o‘quvchilar bilan muddatli mehnat shartnomalari tuzilgan bo‘lishi hamda ish haqi to‘lashi;
– joriy yilda texnikum bitiruvchisini tashkilotdagi vakant ish o‘rniga mehnat shartnomasi asosida ishga qabul qilgan bo‘lishi.
Tashkilotlar dual ta’lim dasturi doirasida kredit olish uchun tijorat banklariga quyidagi hujjatlarni qog‘oz shaklida taqdim etadi:
kreditni olish to‘g‘risidagi ariza;
ariza beruvchi (tashkilot)larning amalda bo‘lgan tasdiqlovchi hujjatlari;
texnikum va tashkilot o‘rtasidagi hamda tashkilot va o‘quvchi o‘rtasidagi dual ta’lim bo‘yicha shartnoma nusxalari;
dual ta’lim dasturi va dual ta’limda tahsil olayotgan o‘quvchilar ro‘yxati;
tashkilot tomonidan kreditdan foydalanish rejasi;
tashkilotning soliq qarzdorligi mavjud emasligi to‘g‘risida ma’lumot.
Tashkilotning kredit ajratish bo‘yicha taqdim etgan barcha hujjatlari kreditga layoqatlilik ko‘rsatkichiga muvofiq kelgan taqdirda, tijorat banki 3 ish kunida bu haqda tashkilotga xabar beradi, shartnoma tuzadi hamda uning hisobvarag‘iga kreditni o‘tkazadi.
O‘zbekistonda 10-sinf o‘quvchilariga o‘qishini texnikumlarga ko‘chirish imkoniyatini beruvchi yangi tartib belgilandi. Bu Vazirlar Mahkamasining tegishli qarori bilan tasdiqlangan.
Qarorga ko‘ra, kasbiy ta’lim tashkilotlari o‘quvchilarining o‘qishini ko‘chirish yoki qayta tiklash, shuningdek, umumiy o‘rta ta’lim maktablarining 10-sinf o‘quvchilarini texnikumlarga ko‘chirish bo‘yicha davlat xizmatlarini ko‘rsatishning yagona tartibi joriy etiladi.
Mazkur xizmatlardan foydalanish uchun arizalar Davlat xizmatlari markazlari yoki Yagona interaktiv davlat xizmatlari portali (YaIDXP) orqali elektron shaklda topshiriladi.
10-sinf o‘quvchilarining o‘qishini texnikumlarga ko‘chirish tartibi alohida belgilanadi. Bu o‘quvchilarga kasbiy ta’lim olish imkoniyatlarini kengaytirishga xizmat qilishi kutilmoqda.
Shuningdek, kasbiy ta’lim tashkilotlariga o‘qishni ko‘chirish va qayta tiklash bo‘yicha xulosa berishning yagona tartibi joriy etiladi.
Raqamli texnologiyalar vazirligi bilan hamkorlikda ikki oy muddatda mazkur davlat xizmatlarini YaIDXP orqali ko‘rsatish imkoniyatini yo‘lga qo‘yish belgilangan.
Bundan tashqari, davlat xizmatlarini ko‘rsatish uchun zarur ma’lumotlarni tegishli davlat organlaridan elektron shaklda olish imkoniyati yaratiladi.
Milliy statistika qo‘mitasi ma’lumotlariga ko‘ra, 2025/2026-o‘quv yili boshida O‘zbekistonda 30 ta xorijiy oliy ta’lim tashkiloti faoliyat yuritgan.
Bu 2015/2016-o‘quv yilidagi 7 taga nisbatan 4,3 barobar ko‘p. Shu tariqa, o‘n yil ichida mamlakatda faoliyat yuritayotgan xorijiy OTMlar soni 23 taga oshgan.
Xorijiy oliy ta’lim tashkilotlari soni 2005/2006-o‘quv yilida 2 ta bo‘lgan. 2010/2011-o‘quv yiliga kelib bu ko‘rsatkich 6 taga yetgan.
2015/2016-o‘quv yilida mamlakatda 7 ta xorijiy oliy ta’lim tashkiloti faoliyat yuritgan bo‘lsa, keyingi besh yilda ular soni yana sezilarli ko‘paygan.
2020/2021-o‘quv yili boshida xorijiy OTMlar soni 18 taga yetgan. Bu 2015/2016-o‘quv yiliga nisbatan 11 taga ko‘pdir.
Shuningdek, 2020/2021-yildan 2025/2026-o‘quv yiligacha xorijiy oliy ta’lim tashkilotlari soni yana 12 taga oshgan. Natijada besh yillik davrda ular soni 18 tadan 30 taga yetdi.
Milliy statistika qo‘mitasi ma’lumotlariga ko‘ra, 2025/2026-o‘quv yili boshida O‘zbekistonda 11 118 ta umumiy o‘rta ta’lim tashkiloti faoliyat yuritgan.
Bu ko‘rsatkich 1991/1992-o‘quv yilidagi 8 557 ta maktabga nisbatan 1,3 barobar ko‘p. Shu tariqa, mustaqillikdan keyingi davrda mamlakatdagi umumiy o‘rta ta’lim tashkilotlari soni 2 561 taga oshgan.
Dinamikaga ko‘ra, maktablar soni ayrim davrlarda sekin o‘sgan yoki qisqargan bo‘lsa-da, so‘nggi yillarda barqaror ko‘payish kuzatilgan. 2020/2021-o‘quv yilida ular soni 10 181 tani tashkil etgan.
1995/1996-o‘quv yilida mamlakatda 9 289 ta, 2000/2001 o‘quv yilida 9 726 ta umumiy o‘rta ta’lim tashkiloti faoliyat yuritgan.
2005/2006-o‘quv yiliga kelib bu ko‘rsatkich 9 803 taga yetgan. 2010/2011-o‘quv yilida esa 9 806 ta maktab qayd etilgan. Keyingi besh yilda ko‘rsatkich biroz pasayib, 2015/2016-o‘quv yilida 9 720 tani tashkil qilgan.
2020/2021-o‘quv yilidan boshlab o‘sish yana tezlashgan. 2021/2022-yilda 10 289 ta, 2022/2023-yilda 10 522 ta, 2023/2024-yilda 10 750 ta maktab faoliyat yuritgan.
2024/2025-o‘quv yili boshida umumiy o‘rta ta’lim tashkilotlari soni 10 943 tani tashkil etgan. Bir yil o‘tib, bu ko‘rsatkich yana 175 taga oshib, 11 118 taga yetgan.
Shunday qilib, 2020/2021-o‘quv yilidan 2025/2026-o‘quv yiligacha mamlakatdagi maktablar soni 937 taga ko‘paygan.
Prezidentning Mustaqillik bayrami tabrigidan o‘rin olgan asosiy fikrlari
Oziq-ovqat ishlab chiqarishda qaysi hududlar yetakchi?
Prezident ishtirokida umumiy qiymati 50 trln so‘mlik loyihalar ishga tushirildi
-
Siyosat5 days ago
Ўзбекистон ва Озарбайжон раҳбарлари Бухоронинг машҳур обидаларини зиёрат қилдилар (фото)
-
Siyosat4 days ago
«Milliy manfaatlarni himoya qilish dunyodan yopilish degani emas» — Sherzod Asadov
-
Iqtisodiyot5 days ago
O‘zbekiston kartoshkani asosan qaysi davlatlardan sotib oldi?
-
Iqtisodiyot3 days ago
Oziq-ovqat ishlab chiqarishda qaysi hududlar yetakchi?
-
Sport5 days ago
Rossiyalik shaxmatchilar O‘zbekistonda o‘tkaziladigan Olimpiadada qatnashmaydi
-
Iqtisodiyot4 days agoPrezident ishtirokida umumiy qiymati 50 trln so‘mlik loyihalar ishga tushirildi
-
Siyosat6 hours ago
Prezidentning Mustaqillik bayrami tabrigidan o‘rin olgan asosiy fikrlari