12 aprel kuni Toshkent shahrida taekvondo WT bo‘yicha yoshlar o‘rtasidagi XV jahon chempionati boshlandi. Nufuzli musobaqada 115 davlatdan qariyb 1500 nafar sportchi ishtirok etishi kutilyapti.

12 aprel kuni Toshkent shahrida O‘zbekiston taekvondo WT assotsiatsiyasi tashabbusi bilan yoshlar o‘rtasidagi XV jahon chempionati boshlandi. Musobaqa poytaxtdagi Yakkakurash majmuasida o‘tkazilmoqda.

Chempionatda 115 ta davlatdan qariyb 1500 nafar sportchi va murabbiy ishtirok etmoqda. Bahslar 20 ta vazn toifasida tashkil etilib, ularning 10 tasi yigitlar, yana 10 tasi qizlar o‘rtasida o‘tkaziladi. Musobaqada 2009 yil 1 yanvardan 2011 yil 31 dekabrgacha tug‘ilgan sportchilar qatnashmoqda.

Dastlabki kun bahslarida yigitlar o‘rtasida +78 kg, qizlar o‘rtasida esa 46 kg va 59 kg vazn toifalarida g‘oliblar aniqlanadi. Ushbu bellashuvlarda O‘zbekiston sharafini Alisher Pak (+78 kg), Komila Sultonova (46 kg) va Viktoriya Denisenko (59 kg) himoya qilmoqda. Tadbirda dunyoning nufuzli taekvondo hamjamiyati vakillari hamda O‘zbekiston rasmiylari ishtirok etishyapti. Ochilish marosimida so‘z olgan Milliy olimpiya qo‘mitasi raisining birinchi o‘rinbosari Otabek Umarov ushbu musobaqa olimpiya majmuasidagi ilk musobaqa sifatida tarixda qolishini, O‘zbekistonda taekvondo tobora sevimli sport turiga aylanayotganini ta’kidladi.

13 aprel kuni chempionat doirasida “Olimpizm va tinchlik” mavzusida xalqaro forum tashkil etildi. Chempionat 17 aprelga qadar davom etadi.

Ta’kidlash joiz, mazkur jahon chempionati O‘zbekiston sport hayotidagi muhim voqealardan biri bo‘lib, yosh sportchilar uchun xalqaro maydonda tajriba orttirish va o‘z imkoniyatlarini namoyish etish imkonini beradi.

Source link

O‘zbekistonlik shaxmatchi Nakamuraga qarshi o‘yindan oldin vaziyatdan kelib chiqib durang qayd etishga qarshi bo‘lmaganini yashirmadi. U ertaga Giriga qarshi hal qiluvchi partiyani o‘tkazadi.

Foto: Michal Walusza / FIDE

O‘zbekistonlik shaxmatchi Javohir Sindorov Nomzodlar turnirining 12-turida amerikalik grossmeyster Hikaru Nakamuraga qarshi o‘yinda qayd etilgan durang yuzasidan fikr bildirdi.

Bu partiya turnir tarixidagi eng qisqa partiyalardan biri bo‘ldi. Raqiblar kataloncha kirish variantini qo‘lladi va 35 daqiqadan so‘ng durangga kelishishdi.

Sindorov o‘yindan keyingi matbuot anjumanida bu turdagi asosiy maqsadi – kuchni tejash va tavakkalchilikni kamaytirish bo‘lganini tan oldi. U oldingi turda Fabiano Karuanaga qarshi kechgan og‘ir bahs (u o‘sha partiyada qiyin holatda qolib, yakunda durangga erishgandi) ko‘p kuchini olib qo‘yganini qayd etgan.

«Bugungi durang yaxshi natija. Hozirgi vaziyatda Hikaru bilan uzoq va og‘ir partiya o‘ynash uchun sabab ko‘rmadim. Shuning uchun imkon bor joylarda majburiy variantlarni tanladim. 

Agar u uzoq partiya o‘ynashni xohlasa, bunga ham tayyor edim. Lekin u ham ancha ishonchli yo‘llarni tanlashini kutgandim. Hatto partiyadan oldin tez durang bo‘lishini sezgandim.

Kecha juda muhim o‘yin bo‘lgandi va ancha charchagandim», – degan yosh shaxmatchi.

Bu turda Sindorovning eng yaqin ta’qibchisi, niderlandiyalik Anish Giri ham durang qayd etdi va endi turnir yakuniga ikki tur qolganida Sindorov (9) va Giri (7) o‘rtasidagi farq 2 ochkoligicha qolmoqda.

Keyingi turda ushbu ikki shaxmatchi bir-biriga qarshi dona suradi. Bu bahsdagi durang natija ham o‘zbekistonlik shaxmatchini muddatidan oldin chempionga aylantiradi. Girida esa birinchi o‘ringa chiqish uchun faqat nazariy imkoniyat saqlanib qolgan. Buning uchun Sindorov oxirgi ikki turda mag‘lub bo‘lishi, Giri esa ikki partiyani ham yutishi talab etiladi.

Sindorov Giri bilan bo‘ladigan partiyada voqealarning har qanday rivojiga tayyor ekanini ta’kidladi:

«Anish, katta ehtimol bilan, uzoq davom etadigan o‘yin o‘tkazishga harakat qiladi. Men esa kurashga tayyorman… Agar Anish yutishga harakat qilsa, men ham o‘ynayman va o‘z imkoniyatlarimni qidiraman. Lekin turnir jadvalidagi vaziyatdan kelib chiqib ish tutaman.

Anish Giriga qarshi tayyorgarlikni ChessBase orqali qilaman. Partiyalarini ko‘rib chiqaman va variantlarni takrorlayman.

U ijtimoiy tarmoqlarda nima yozayotgani bilan esa qiziqmayapman. Bu men uchun muhim emas».

13 aprel turnirda dam olish kuni. Sindorov bo‘sh vaqtida padel-tennis va kompyuter o‘yinlarini o‘ynamoqchi ekanini qo‘shimcha qilgan.

«Dam olmoqchiman, videoo‘yinlar… Balki Counter-Strike ham o‘ynarman», – deydi u.

13-tur bahslari 14 aprel kuni Toshkent vaqti bilan soat 17:45 da boshlanadi. Giriga qarshi bahsda Sindorov qora donalarda o‘ynaydi. Shaxmatchilarning birinchi davradagi bahsida durang natija qayd etilgandi.

Sindorov turnirda chempionlikni rasmiylashtiradigan bo‘lsa, jahon chempioni unvoni Dommaraju Gukesh bilan o‘ynash huquqini qo‘lga kiritadi.

Source link

Sherkining ikkita «sehrli» pasi «shaharliklar» g‘alabasini ta’minladi va jamoa «Arsenal» bilan oradagi farqni qisqartirdi. Bir haftadan keyin APLda bahorning asosiy uchrashuvi bo‘lib o‘tadi.

Foto: Marc Atkins/Getty Images

«Chelsi» – «Manchester Siti» 0:3

Gollar: O`Rayli, 51 (0:1). Geyi, 57 (0:2). Doku, 68 (0:3)

«Chelsi»: Sanches, Xato, Fofana, Kukurelya, Gyusto (Achimpong, 88), Santos (Lavia, 67), Kaysedo (Essugu, 82), Palmer, Pedru Netu, Estevao (Garnacho, 67), Joao Pedro (Delap, 81)

«Manchester Siti»: Donnarumma, Geyi, Husanov, O`Rayli (Ait Nuri, 64), Mateus Nunes, Rodri, Bernardu Silva (Kovachich, 81), Sherki (Savio, 76), Doku (Foden, 76), Semenyo, Holand

Ogohlantirishlar: Estevao, 12. Kukurelya, 54. Essugu, 90 – Semenyo, 38

«Agar bugun „Stemford Brij“da g‘alaba qozona olmasak, „Arsenal“ bilan o‘yin oldidan matbuot anjumani o‘tkazmasa ham bo‘ladi, chunki hammasi tugaydi. Buni hamma biladi. Sen buni bilasan, men buni bilaman, o‘yinchilar buni bilishadi, buni Angliyada hamma biladi. Biz qolgan barcha o‘yinlarda g‘alaba qozonishimiz kerak. Hech qanday durang qoniqtirmaydi, yo‘q, buni unuting. Bunday „Arsenal“ga qarshi to‘qqiz ochko ko‘p. Ammo „Chelsi“ni, keyin esa „Arsenal“ni yengsak, hech bo‘lmasa illyuza bilan yashasak bo‘ladi. Buni sinab ko‘rish istagi bor», – dedi Gvardiola «Chelsi»ga qarshi o‘yindan oldingi matbuot anjumanida.

Turnir jadvalida bu jamoalar o‘zaro raqobatchi emas, ammo o‘zaro bahsdagi g‘alaba mavsum oxiridagi poygaga ta’sir qilishi aniq edi.

«Manchester Siti» uchun bu «Arsenal»ga yaqinlashib olish uchun imkon edi – «shaharliklar» bir haftadan keyin turnir jadvali peshqadamiga qarshi o‘yin o‘tkazadi. «Kanonirlar» esa bu turda kutilmaganda uyda «Bornmut»ga yutqazib qo‘ydi va chempionlik poygasida intrigani jonlantirdi.

Turnir jadvalida jamoalarning o‘yini keyingi tur natijasidan keyin ham o‘zgarmaydi, ammo Pep to‘g‘ri aytgandi – bu turdagi mag‘lubiyat amalda chempionlik poygasi tugaganini anglatardi. Qolaversa, «Siti» mart oyida Angliya ligasi kubogi finalida «Arsenal» ustidan g‘alaba qozongan, keyinroq Angliya kubogi chorakfinalida «Liverpul»ni yirik hisobda tor-mor etgandi. Ammo jamoada APLning oxirgi turlarida ko‘p durang o‘ynab yuborgandi va vaziyatini qiyinlashtirib qo‘ygandi.

«Chelsi»ning ham o‘z dardlari bor. Ulardan eng asosiysi – keyingi mavsumda Chempionlar ligasida qatnashish huquqini qo‘lga kiritish. Buning uchun esa kamida «Liverpul»ni quvib o‘tish talab etiladi. Lekin Rosenior Madrid yashash uchun ajoyib shahar ekanini aytib intervyu bergan Enso Fernandesni ikki o‘yinga chetlatgandi. Qolaversa, londonliklarning «Manchester Siti»ga qarshi o‘yinlardagi statistikasi ham achinarli edi: ko‘klar ushbu jamoaga qarshi o‘yinlarda oxirgi bor besh yil muqaddam, 2021 yil mayida YeChL finalida g‘alaba qozongandi.

O‘yinning startida shunday taassurot hosil bo‘ldiki, har ikki jamoa ham maydonga g‘alabaga intilishdan ko‘ra yutqazmaslikka e’tibor qaratdi. To‘p raqibdan olib qo‘yilgan holatlarda futbolchilar oldinga borishga shoshilishmadi va xavfsiz o‘ynashga qaror qilishdi. Tabiiyki, bunday formatda xavfli vaziyatlar ham yaratilmadi.

«Chelsi» bir necha bor «Siti» mudofaasidagi xatolardan foydalanishga urindi. Birinchi holatda Palmer maydon markazi orqali yurish qilib, Netu bilan devor uslubida o‘ynadi va kuchli zarba berdi – to‘p darvoza to‘riga tashqi tomondan tegdi. Kukurelya esa Husanovning xatosidan keyin darvozani ishg‘ol qilgandi, ammo gol kichik ofsayd holati tufayli bekor qilindi. Yana bir hujumda esa Netuning zarbasi darvoza sohasiga to‘g‘ri bordi, ammo bu Donnarumma uchun qiyinchilik tug‘dirmadi. Umuman olganda, birinchi bo‘limda «Siti» himoyasining o‘ng qanotida muammolar yaqqol ko‘zga tashlandi – Mateus Nunes juda yuqoriga chiqib o‘ynadi va Silva doim ham qaytishga ulgurmadi.

Mehmonlarda hujum chizig‘ining ham ishlari yurishmadi. Sherki va Bernardu zarbdor pozitsiyalarga chiqib borishdi, ammo ikki holatda ham to‘p Sanchesning o‘ziga bordi. Raqiblar ikkinchi bo‘limga kuch tejayotgandek harakat qilishdi. Bunday o‘yinlar odatda birinchi golgacha zerikarli kechadi.

Gol esa ikkinchi bo‘lim boshidayoq urildi. Rayan Sherki o‘ng qanotdan jarima maydoni markaziga uzatma berdi, u yerda Niko O’Rayli raqib futbolchisidan ildamroq harakat qilib, bosh bilan darvozani ishg‘ol etdi.

Besh daqiqa o‘tib fransuz yarimhimoyachisi yana bir bor o‘zini ko‘rsatdi. U burchak zarbasidan keyin to‘pni istalgancha olib yurdi va darvozabon maydoniga yaqin joyda bo‘sh turgan Geyini golli pas bilan ta’minladi. «Chelsi» o‘tkazilgan goldan o‘ziga kelishga ulgurmadi va darvozasi to‘ridan ikkinchi bor to‘p olib chiqdi.

Rosenior almashtirishlar orqali reaksiya qilishga urindi va mezbonlar to‘liq kuch bilan oldinga tashlanishdi. Ammo «Siti» futbolchilarida endi o‘ziga bo‘lgan ishonch haddan tashqari oshib ketgandi va hisob yirik ko‘rinishga keltirildi. Doku raqib jarima maydoni yaqinida bosim uyushtirib, to‘pni Kaysedodan olib qo‘ydi va o‘zi Sanchesning yaqin burchagini aniq nishonga oldi – 3:0.

Qolgan daqiqalar quruq rasmiyatchilikka aylandi. Husanov to‘rtinchi golni urishi mumkin edi, ammo uning jarima maydoni tashqarisidan yo‘llagan zarbasidan keyin to‘p ustun yonidan o‘tib ketdi.

3:0 – «Manchester Siti» «Arsenal» bilan oradagi farqni 6 ochkoga qisqartirdi va APLda bahorning asosiy o‘yiniga tayyorgarlik ko‘rishni boshladi. «Chelsi» muxlislari esa o‘yin yakunini kutmasdan tribunalarni tark etishdi. Jamoaning YeChL yo‘llanmasi uchun kurashdagi imkoniyatlari pasayishda davom etmoqda.

Source link

Joriy yilgi mavsumda “Andijon” jamoasi Samvel Babayan qo‘l ostida Superligada 7 ta uchrashuv o‘tkazib, ularning 5 tasida mag‘lubiyatga uchradi va 2 ta o‘yinda g‘alaba qozondi.

“Andijon” jamoasi bosh murabbiyi Samvel Babayan Superliga 7-tur doirasida OKMKga qarshi o‘yindan (1:2) keyingi matbuot anjumanida o‘z lavozimini tark etishini ma’lum qildi.

“Birinchi navbatda bugungi natija uchun hammadan uzr so‘rayman. Nima deyishim mumkin? Tushuntirish juda qiyin. Bu hol faoliyatimda birinchi marta ro‘y berdi. Nima bo‘lishi kerak bo‘lsa bo‘ldi. Faqat «Andijon»da shu holat bo‘lgani achinarli. Bugungi raqibimiz ham qiyin holatda edi. O‘yinni yomon boshlamadik, deb o‘ylayman. Bir qator imkoniyatlarimiz bo‘ldi, standartlardan ham foydalansak bo‘lardi. Harakat qildik, ammo to‘p darvozaga kirmadi. Qanot himosidagi xatolar tufayli gol o‘tkazdik. Darvozamizdan ikkita to‘p o‘tkazdik, tushuntirishim ancha qiyin. Birinchi taymda raqib deyarli unchalik xavfli vaziyatlarni yarata olmadi. Yaxshi harakat qilsak, g‘alaba qozonishimiz ham mumkin edi. Yigitlar vaziyatni o‘zgartirishga intilishdi. Bu safar o‘xshamadi” , dedi u.

Babayanning so‘zlariga ko‘ra, qanday talablar qo‘yilgan bo‘lsa, klub barchasini bajargan.

“Bu yerga yaxshi niyatlar bilan, klub tarixini yaxshilash uchun kelgandim. «Andijon»ning chempionatda eng yaxshi natijasi 5-o‘rin bo‘lgan ekan va men buni yaxshilab, yuqoriga ko‘tarish maqsadida kelgandim. Futbolchilar ham bu yerga yuqori maqsadlarni ko‘zlab kelishgan. Jamoa uchun barcha sharoitlar yaratib berilgan. To‘g‘risi, erkakcha gapiraman: endi bu yerda boshqa harakat qila olmayman. Klub boshqaruvini boshqasiga beraman. Biz bu o‘yindan avval rahbariyat bilan ochiq va samimiy gaplashdik. Rosti, endi o‘z o‘rnimni boshqa insonga topshiraman. Yana aytaman: bu yerga natija qilish va barchani xursand qilish uchun kelgandim…

Avval ham aytganman: menda ko‘p vaqt yo‘q edi va qisqa fursat ichida natija ko‘rsatishim kerak. Yillar davomida ishlab natija ko‘rsatishga menda vaqt yo‘q edi. Viloyat hokimi barcha sharoitlarni yaratib, natija uchun jonbozlik bilan harakat qilyapti. Klub yuqori natijalarni ko‘rsatishi uchun viloyat hokimi barcha ishni amalga oshiryapti. O‘zbek futboli rivojlanishi yo‘lida aynan viloyat hokimi ko‘p ishlarni qilyapti. Men ko‘rdimki, biz birgalikda bu ishlarni bajara olardik. Kechayu kunduz 24 soat ishladik va agar 25 soat bo‘lsa ham ishlashga tayyor edik. Afsuski, mehnatlarimiz o‘xshamadi. Har doim nimadir yetishmadi. Rahbariyat bilan gaplashdik va jamoani boshqasi boshqarishi kerak. Men va mening murabbiylar shtabim iste’foga chiqamiz”, deya fikrini yakunladi “Andijon” bosh murabbiyi.

Joriy yilgi mavsumda “Andijon” jamoasi Samvel Babayan qo‘l ostida Superligada 7 ta uchrashuv o‘tkazib, ularning 5 tasida mag‘lubiyatga uchradi va 2 ta o‘yinda g‘alaba qozondi.

Source link

Endi o‘zbekistonlik yosh shaxmatchilar shu yilning dekabr oyida bo‘lib o‘tadigan Grand-finalda Afrika, Amerika va Yevropa qit’asi vakillari bilan bahs olib borishadi.

Qozog‘istonning Olmaota shahrida maktab jamoalari o‘rtasidagi shaxmat bo‘yicha World Schools Team Championship 2026 (WSTC 2026) jahon chempionati Osiyo bosqichi yakuniga yetdi.

Unda O‘zbekistonning “Wisdom school” maktabi jamoaviy hisobda birinchi o‘rinni egalladi va oltin medallarga sazovor bo‘ldi.

Kumush medal “Kurchatov School” (Rossiya) jamoasiga, bronza medal esa “Velammal MHs school” (Hindiston) jamoasiga nasib etdi.

Endi o‘zbekistonlik yosh shaxmatchilar shu yilning dekabr oyida bo‘lib o‘tadigan Grand-finalda Afrika, Amerika va Yevropa qit’asi vakillari bilan bahs olib borishadi.

Source link