Sport
Prezident sport federatsiyalari bosh kotiblaridan lavozimiga loyiq bo‘lmaganlarni almashtirishni buyurdi
Shavkat Mirziyoyev raisligida 7 aprel kuni jismoniy tarbiya va sport sohasidagi kelgusidagi ustuvor vazifalarga bag‘ishlangan yig‘ilish o‘tkazildi. Federatsiyalarda hamkor va mablag‘ topish, tadbirkorlarni jalb qilish bo‘yicha tashabbus yo‘qligi qayd etildi. Mutasaddilarga 26 ta federatsiyadagi bosh kotib va boshqaruv kadrlarining faoliyatini o‘rganib, lavozimiga loyiq bo‘lmaganlarini almashtirish topshirildi.
Yig‘ilishda ixtisoslashgan sport maktablarining oddiy sport maktabidan farqi qolmaganiga e’tiroz bildirildi.
Masalan, Termiz shahridagi 4 ta ixtisoslashgan maktabning natijasi Jarqo‘rg‘ondagi bitta sport maktabiniki kabi bo‘lolmayapti. Jarqo‘rg‘on sport maktabi o‘tgan yili Osiyo va jahon chempionatlarida 6 ta sovrin olgan bo‘lsa, viloyatdagi 4 ta ixtisoslashgan maktabda esa jami 1 ta medal mavjud.
Har bir ixtisoslashgan sport maktabi direktori, jamoasi va murabbiylarning ish uslubini o‘zgartirib, o‘sish nuqtalarini aniq belgilab, oylik maoshini o‘quvchisining natijasiga bog‘lash zarurligi ta’kidlandi.
Mutasaddilarga yutuqlarga erishgan sport maktablarini amaldagi rag‘batlantirish miqdoriga qo‘shimcha yana 500 million so‘mdan alohida mukofotlashni yo‘lga qo‘yish topshirildi.
Oliy ta’lim muassasalarida sport yo‘nalishidagi ishlar yetarli darajada emasligi, federatsiyalar bilan hamkorlik, iqtidorli talabaga individual murabbiy biriktirish sustligi qayd etildi.
Ayrim oliygohlarda sport sohasi bo‘yicha yaxshi tajribalar bor. Masalan, Termiz davlat universiteti 4 ta klub tashkil qilib, 5 ming talabani 18 ta sport turiga qamrab oldi. Talabalar o‘tgan yili xalqaro musobaqalarda 18 ta medal oldi. Oliygohning voleybol va gandbol jamoalari oliy ligada, futzal va futbol jamoalari esa 1-ligada qatnashyapti.
Lekin Jizzax politexnika, Toshkent tibbiyot universiteti Termiz filiali, Qarshi davlat texnika universiteti, Buxoro davlat universitetlarida 70 foiz talaba jismoniy normativ topshira olmagan. Bu ulardagi klublar “nomiga” ishlayotganini anglatadi.
Shu munosabat 207 ta oliygoh rektorlariga Termiz davlat universitetining tajribasini o‘rgatish va sport bo‘yicha bir yillik reja ishlab chiqish topshirildi.
O‘q otish bazasida sharoit yaratilgani uchun ushbu sport turida natija ko‘rinayotgani ta’kidlandi. Yaqinda Osiyo chempionatida o‘q otuvchilar 3 ta oltin, 2 ta kumush medal oldi. Pnevmatikadan otishda Osiyo va jahon rekordini yangiladi. Futbol, sport kurashlari, velosport, yengil atletika, suzishda ham o‘zgarish bo‘layotgani e’tirof etildi.
Yoshlar Osiyo o‘yinlarida yengil atletikada ilk bor 9 ta medal, suzishda dastlabki medal (bronza) qo‘lga kiritildi. Velosportchilarimiz Osiyoda kuchli uchtalikdan joy oldi. Sport kurashlarida 25 yillik tanaffusdan so‘ng Jahon chempionatida oltin medalga erishildi.
Shu bilan birga, Jizzaxdagi 6 ta qilichbozlik bazasida shug‘ullanuvchilar 100 nafarga ham yetmasligi, trampolin va akrobatika bo‘yicha mavjud salohiyatdan to‘liq foydalanilmayotgani, tennis, ot sporti bo‘yicha ham natija ko‘rinmayotgani tanqid qilindi.
Dunyoda tennisga o‘xshash padel tennis, skvosh kabi zamonaviy o‘yinlar yoshlar orasida tez ommalashyapti. Lekin mutasaddilarda xususiy tadbirkorlarni jalb qilish orqali bunday sport turlarini tennis bilan uyg‘un rivojlantirib, yoshlarga qo‘shimcha sharoit yaratish bo‘yicha tashabbuskorlik yo‘qligi ko‘rsatib o‘tildi.
Federatsiyalarda hamkor va mablag‘ topish, tadbirkorlarni jalb qilish bo‘yicha tashabbus yo‘qligi qayd etildi.
Ta’kidlanishicha, salohiyati katta tadbirkorlar yildan yilga ortib bormoqda, ular orasida sportga qiziqadigan, homiylik qilishga tayyor turganlari ancha.
Lekin birorta federatsiya tadbirkorlar bilan o‘zaro manfaatli hamkorlik bo‘yicha taklif kiritmagani ko‘rsatib o‘tildi.
Mutasaddilarga 26 ta federatsiyadagi bosh kotib va boshqaruv kadrlarining faoliyatini o‘rganib, lavozimiga loyiq bo‘lmaganlarini almashtirish topshirildi.
Kataloniyaliklarga yana qizil kartochka pand berdi. «Liverpul» esa safarda yirik hisobda mag‘lub bo‘lishdan qutulib qoldi.
Madridliklar «Kamp Nou»dan maksimum natija bilan qaytdi
«Barselona» – «Atletiko» 0:2
Gollar: Alvares, 45 (0:1). Syorlot, 70 (0:2)
«Barselona»: X. Garsiya, Kubarsi, Martin, Joau Kanselu (Balde, 86), Kunde (Arauxo, 73), Pedri (Gavi, 46), E. Garsiya, Olmo, Reshford (Torres, 73), Yamal, Levandovski (Fermin Lopes, 46)
«Atletiko»: Musso, Gansko (Pubil, 31), Le Norman, Rudjyeri, Molina, Koke (Baena, 60), Liorente, Lukman (Syorlot, 60), Simeone (Almada, 80), Grizmann (Gonsales, 80), Alvares
Ogohlantirishlar: Gavi, 65. Joau Kanselu, 90 – Koke, 31. Pubil, 45. Baena, 63
Chetlatish: Kubarsi, 44
8 aprel oqshomida «Nou Kamp» o‘yingohida Yevropa Chempionlar ligasi chorakfinali doirasida «Barselona» va «Atletiko» o‘rtasida kechgan o‘yinni 44-daqiqada ro‘y bergan epizod hal qildi.
Hansi Flik jamoasiga yuqori himoya chizig‘i yana bir bor pand berdi – dam olish kunlarida la liga doirasidagi o‘yinda bo‘lganidek Juliano Simeone ofsayd qopqoniga tushmasdan himoyachilar ortiga ochildi, Kubarsi esa unga nisbatan so‘nggi umid folini ishlatib to‘xtatishga majbur bo‘ldi.
O‘yin bosh hakami Ishtvan Kovach avvaliga sariq kartochka ko‘rsatgandi.
Ammo vaziyatga VAR aralashdi va kartochkaning rangi o‘zgardi.
Kubarsi darvozabon bilan yakkama-yakka vaziyatga chiqib borayotgan Simeoneni qo‘li bilan turtib yiqitgandi.
Bu vaziyat uchun «Barsa» ikki karra jazolandi. Birinchi bo‘limning o‘zida son jihatdan ozchilik bo‘lib qolgani yetmagandek, tanaffus arafasida gol o‘tkazib yuborildi.
Belgilangan jarima zarbasini Xulian Alvares qoyilmaqom ijro etdi va to‘p darvoza to‘qqizligiga borib tushdi.
Ikkinchi bo‘limni 10 kishi bo‘lib o‘tkazganiga qaramay, ko‘k-anorranglilar hisobni tenglashtirish uchun to‘xtovsiz oldinga tashlanishdi.
«Atletiko» esa hisobdan kelib chiqib o‘ynadi va qarshi hujumlarga tayandi. Simeone ikkinchi bo‘limda baland bo‘yli Aleksandr Syorlotni maydonga tashladi va ushbu norvegiyalik hujumchi Rudjyerining jarima maydoniga uzatmasini golga aylantirib, amalda o‘yin masalasini hal qildi.
Mezbonlar ikkinchi goldan keyin ham to‘liq hujumda o‘ynadi, ammo hech bo‘lmaganda bitta javob golini urishning uddasidan chiqa olmadi va hisob o‘zgarmay qoldi.
Endi 14 aprel kuni «Metropolitano» o‘yingohida kechadigan javob bahsida «Atletiko» ikki gol ustunligini boy berishiga ishonish qiyin.
«PSJ» amalda yarimfinalda
«PSJ» – «Liverpul» 2:0
Gollar: Due, 11 (1:0). Kvaratsxeliya, 65 (2:0)
«PSJ»: Safonov, Markinos, Pacho, Nunu Mendesh, Hakimi, Vitinya, Zair-Emeri, Joau Nevesh, Kvaratsxeliya, Due (Li Kan In, 78), Dembele (Ernandez, 88)
«Liverpul»: Mamardashvili, van Deyk, Gomes, Konate, Soboslai (Jons, 79), Makallister, Gravenberh, Kerkez (Roberson, 78), Frimpong (Nioni, 90+1), Virs (Gakpo, 78), Ekitike (Isak, 79)
Ogohlantirishlar: Gomes, 28. Makallister, 31
«Liverpul» Parijda «PSJ»ga qarshi kechgan o‘yinda asosiy yulduzisiz o‘ynadi. Angliya kubogi chorakfinalida «Siti»ga qarshi o‘yinni muvaffaqiyatsiz o‘tkazgan Saloh zaxira o‘rindig‘ida qoldi. Arne Slot o‘ziga noodatiy bo‘lgan besh himoyachidan iborat sxema tanladi: Kerkez, Gomes, van Deyk, Konate va Frimpong mudofaa chizig‘i bo‘ylab joylashdi.
Ammo tig‘iz himoya jamoaga yordam bermadi. «PSJ» ilk daqiqalardanoq to‘liq tashabbusga egalik qildi va tezkor gol urdi. 11-daqiqada Duening jarima maydoniga kirib yo‘llagan zarbasi Gravenberhning oyog‘iga tekkan holda yo‘nalishini o‘zgartirib, darvoza to‘riga borib tushdi. Shundan keyin ham o‘yin «Liverpul» darvozasi tomonda kechishda davom etdi. Mezbonlar bir kishi ko‘p bo‘lib o‘ynayotgandek tasavvur uyg‘otdi.
Birinchi bo‘limni «Liverpul» uchun joriy mavsumdagi eng yomon bo‘limlardan biri deb hisoblash mumkin. Mehmonlar 45 daqiqa davomida raqib darvozasi tomon biror marta zarba yo‘llamadi – jamoada bunaqasi so‘nggi besh yilda kuzatilmagan. «Liverpul»ning birinchi bo‘limda to‘pga egalik qilish ko‘rsatkichi 25 foiz atrofida bo‘ldi, maydonda xuddi birinchi va ikkinchi liga jamoalari o‘ynayotgandek edi.
Tanaffusda o‘zgarishlar qilinmadi, ammo «Liverpul» ikkinchi bo‘limda oldinga o‘ta boshladi. Slot shogirdlari nihoyat hujumga hujum bilan javob qaytarishga kirishdi. 49-daqiqadayoq Ekitike birinchi zarbani yo‘lladi. Lekin «PSJ» yaxshiroq o‘ynashda davom etdi va 65-daqiqada amalda o‘yin masalasi hal qilindi. Xvicha jarima maydoniga yorib kirib, Gravenberh va Mamardashvilini ortda qoldirdi va bir necha metr masofadan to‘pni darvoza to‘riga kiritib yubordi.
Ko‘p o‘tmay bosh hakam «Liverpul» darvozasiga penalti belgiladi, ammo VAR uni monitor qarshisiga chaqirdi. Videotakrorda Konate to‘pni toza olib qo‘ygani oydinlashdi. U raqib oyog‘iga ortdan tashlangan bo‘lsa-da, to‘pga teginishga ulgurgandi.
«PSJ»da uchinchi golni urish uchun yetarlicha vaziyatlar bo‘ldi, ammo Mendesh avvaliga ustunni poyladi, so‘nggi daqiqalarda esa juda qulay pozitsiyada turib to‘g‘ri zarba berolmadi.
«PSJ» o‘z uyida ishonchli hisobda g‘alaba qozondi va bir oyog‘i bilan yarim finalda turibdi. «Liverpul» olti kundan keyin o‘z uyida bo‘ladigan javob bahsida ikki gol farqini yo‘qqa chiqarishi kerak bo‘ladi.
Mahallalarda aholi fitnes bilan shug‘ullanishga jalb etiladi. Maktablarda krossfit bo‘yicha to‘garaklar ochilib, fitnesning bu turi “Besh tashabbus” musobaqalariga ham kiritiladi. Aholi salomatligi yaxshilanishiga erishgan mahalla raisi, sport volontyori va trenerlar moddiy rag‘batlantiriladi.
O‘zbekiston aholisi orasida krossfit bilan shug‘ullanishni ommalashtirish choralari ko‘riladi. Bu haqda prezident Shavkat Mirziyoyev sport sohasi bo‘yicha 7 aprel kungi selektorda topshiriqlar berdi.
“Dunyoda maxsus jihoz va infratuzilma talab qilmaydigan intensiv sport mashg‘ulotlari, ya’ni krossfit ommalashyapti. Krossfit, bu nima degani? Yugurish, sakrash, egilish, turnikda tortilish kabi oddiy jismoniy mashqlarni ketma-ket bajarish.
Quronboyev (Mahallalar uyushmasi – tahr.), Sa’dullayev (Yoshlar ishlari agentligi), Ikromov (Sport vazirligi) hokimlar bilan mahalla yettiligi, trenerlar va “Sog‘lom hayot” volontyorlar ishtirokida odamlarni fitnes bilan shug‘ullanishga jalb qilishi zarur.
E’zoza Karimova (Maktab vazirligi), Azim Husanov (Kasbiy ta’lim agentligi), Ikromov va hokimlar 1 maygacha barcha maktab va texnikumlarda krossfit bo‘yicha to‘garaklar tashkil qilsin.
Ikromov, Quronboyev, Sa’dullayev kelgusi yildan krossfitni “Besh tashabbus” tizimiga kiritsin”, – dedi prezident.
Davlat rahbarining qayd etishicha, endi qaysi mahallada sport qamrovi oshib, aholining salomatligi yaxshilansa, yurak-qon tomir, diabet bilan kasallanish ko‘rsatkichi kamaysa, volontyorga va mahalla raisiga yil yakuni bilan 15 mln so‘mgacha mukofot puli beriladi. Shu mahallaga ommaviy sportga mas’ul trenerga esa 200 foizgacha oylik ustama to‘lanadi.
U navbatdagi turda durang o‘ynaganiga qaramay, eng yaqin ta’qibchisi bilan oradagi farqni uzaytirdi – ikkinchi o‘rindagi Fabiano Karuana bu turda Hikaru Nakamuraga yutqazib qo‘ydi.
O‘zbekistonlik shaxmatchi Javohir Sindorov 7 aprel kuni Nomzodlar turnirining sakkizinchi turida rossiyalik grossmeyster Andrey Yesipenko bilan durang qayd etdi.
Raqiblar 24-yurishdan keyinoq durangga rozi bo‘lishdi.
Andrey Esipenko and 🇺🇿 Javokhir Sindarov draw their Round 8 game in the FIDE Candidates 2026 by threefold repetition! ♟️#FIDECandidates #FIDE #Chess #Cyprus pic.twitter.com/RT8SASlFIF
— International Chess Federation (@FIDE_chess) April 7, 2026
Endilikda o‘zbekistonlik shaxmatchi 8 imkoniyatdan 6,5 ochko (5 g‘alaba va 3a durang) jamg‘arib, turnir jadvalidagi yakka peshqadamlikni davom ettirmoqda.
Ochko yo‘qotganiga qaramay, u eng yaqin ta’qibchisi – Fabiano Karuana bilan oradagi farqni oshirib oldi. Amerikalik shaxmatchi AQShning boshqa bir vakili Hikaru Nakamuraga mag‘lub bo‘ldi va endi Sindorovdan 2 ochkoga ortda qolmoqda.
Uchinchi o‘rinda kelayotgan niderlandiyalik Anish Giri va to‘rtinchi o‘rindagi hindistonlik Rameshbabu Pragnanandha o‘rtasidagi bahs ham durang bilan yakunlandi va ular ham yuqoriga ko‘tarila olmadi. 5 va 6-o‘rinlardagi germaniyalik Mattias Blyubaum va xitoylik Vey I ham durangga imzo chekishdi.
Bugun, 8 aprel kuni Sindorov to‘qqizinchi tur doirasida Blyubaumga qarshi qora donalarda o‘ynaydi. Ushbu shaxmatchilarning birinchi davradagi bahsida durang qayd etilgandi.
O‘zbekistonlik shaxmatchi Yesipenko bilan bahsdan keyin bergan intervyusida tavakkalchilikni emas, ishonchli strategiyani tanlaganini aytgan.
«Raqibimdan kataloncha boshlanishga o‘xshash variant kutgandim. Debyutdan keyin tayyorgarligimdagi pozitsiya yuzaga keldi va u menga yoqa boshladi. Andrey uzoq o‘yladi. Bir payt tushundimki, agar piyoda qurbon qilmasam, shunchaki biroz ustunlikka ega, lekin cho‘zilgan o‘yin bo‘ladi. Shu tufayli tashabbus uchun piyoda qurbon qildim», deydi u.
Uning fikricha, shu qurbonlikdan keyin pozitsiya ancha qulay bo‘lgan: «O‘sha vaziyat menga juda yoqdi. Umuman olganda, bugungi natijani yaxshi deb baholayman».
Durang natija uning o‘yiniga ta’sir qiladimi, degan savolga Sindarov quyidagicha javob berdi:
«Oldin ham duranglar bo‘lgan. Men uchun eng muhimi sifatli shaxmat o‘ynash. Imkoniyat paydo bo‘lsa, har doim raqibga bosim qilishga harakat qilaman».
Shuningdek, u partiyadagi birinchi yurish braziliyalik futbolchi David Luiz tomonidan amalga oshirilganini ham eslab o‘tdi:
«Men ham, Andrey ham futbol muxlisimiz. Bunday mehmonlar kelganda juda xursand bo‘laman».
O‘z tayyorgarligining tarqalib ketgani haqida gapirarkan, u gap eski variantlar haqida ketayotgani, shundan so‘ng o‘zi ancha ehtiyotkor bo‘lib qolganini qayd etdi.
Tayyorgarlik jarayonining bir qismi avvalroq Lichess platformasida sizib chiqqani haqidagi savolga javob berar ekan, Sindarov buni jiddiy muammo deb hisoblamasligini ta’kidladi:
«Umuman olganda – yo‘q, bu muammo emas. Ushbu yozuvlarni oxirgi marta qachon ochganimni ham eslamayman. Lekin Jahon kubogi paytida muxlislarim menga: „Hoy, materiallaring maxfiy emas ekan…“ deb yozishgandi».
Uning so‘zlariga ko‘ra, o‘shandan beri u «ancha ehtiyotkor bo‘lib qolgan va bunday tahlillardan foydalanmaslikka harakat qilmoqda».
«Agar kimdir ularni ko‘rgan bo‘lsa ham, bu katta ehtimol bilan eski variantlardir. Kimdir buni ko‘ra olgani haqiqatan ham hayratlanarli, chunki men doim hamma narsani maxfiy holatda ochardim. Ammo u yerda maxfiylik rejimini ikki marta yoqish kerak ekan, men esa buni tez-tez unutib qo‘yardim. Balki kimdir variantlarni ko‘rib qolgandir. Lekin bu men uchun ahamiyatsiz, chunki ular eski tayyorgarliklar», – deya tushuntirdi Sindarov.
Magnus Karlsen kabi jahon yulduzlarining e’tibori haqidagi savolga javob berarkan, grossmeyster tashqi baholarga chalg‘imaslikka harakat qilayotganini ta’kidladi.
«Ha, hozirgi ishtirokim juda kuchli ko‘rinayotganini tushunib turibman. Ammo bu shunchaki bitta turnir… Musobaqa hali davom etmoqda va men bunday narsalarga chalg‘ishni istamayman», – dedi u.
Yakunda u vatandoshi Nodirbek Abdusattorovning iliq so‘zlariga ham munosabat bildirdi. Avvalroq Abdusattorov Sindorov ushbu turnirda o‘zining asl salohiyatini ko‘rsatayotgani va g‘alabaga loyiqligini aytgandi.
«Buni eshitish juda yoqimli. Biz haqiqatan ham birga o‘sdik, ko‘plab turnirlarda birga o‘ynadik, yaqin do‘stlarmiz… Men u uchun juda xursandman – u qatorasiga uchta yirik turnirda g‘olib chiqdi. Umid qilamanki, qachondir u ham jahon chempioni bo‘ladi», – dedi Javohir.
Ma’lumot uchun, 29 mart kuni Kiprda boshlangan 2026 yilgi Nomzodlar turniri 15 aprelga qadar davom etadi. Unda sayyoraning 8 nafar kuchli grossmeysteri ishtirok etmoqda. Ishtirokchilar ikki davrada (jami 14 tur) o‘zaro kurash olib boradi. G‘olib amaldagi jahon chempioni Dommaradju Gukesh bilan shaxmat toji uchun bahs yuritish huquqini qo‘lga kiritadi.
40 yoshli Noyyer «Bernabeu»da 9 seyv amalga oshirib, o‘yin qahramoniga aylandi, «Arsenal» butun o‘yin davomida golli vaziyatga ega bo‘lmasdan, yakunda g‘alabani ilib ketdi.
Noyyer oqshom qahramoni
«Real» – «Bavariya» 1:2
Gollar: L. Dias, 41 (0:1). Keyn, 46 (0:2). Mbappe, 74 (1:2)
«Real»: Lunin, Ryudiger, Hausen (Eder Militau, 62), Karreras, Aleksandr-Arnold, Tshuameni, Pitarch (Bellinghem, 62), Arda Guler (B. Dias, 71), Valverde, Vinisius Junior, Mbappe
«Bavariya»: Noyyer, Upamekano, Ta, Laymer (Deyvis, 69), Stanishich, Kimmih, Pavlovich (Goretska, 90+3), Gnabri (Musiala, 69), L. Dias (Bishof, 90+3), Olise, Keyn
Ogohlantirishlar: Tshuameni, 36 – Ta, 71. L. Dias, 77. Noyyer, 82. Musiala, 86
«Real» Chempionlar ligasi chorakfinalidagi ilk uchrashuvda «Bavariya»ga mag‘lub bo‘ldi. Ammo Madriddagi o‘yinda mezbonlar kutilganidan yaxshiroq harakat qilishdi.
«Bavariya» o‘yinni juda kuchli boshladi. Vensan Kompani jamoasi tajovuzkor pressing evaziga o‘yin boshlanganiga 43 soniya bo‘lganidayoq ilk xavfli vaziyatini yuzaga keltirdi. O‘yin startida myunxenliklar «Real» jarima maydoni atrofida ketma-ket standart vaziyatlarga ega bo‘lishdi. «Qaymoqranglilar» darvozasida jarohatdagi Kurtua o‘rnini egallagan Lunin to‘pga chiqishda xatolarga yo‘l qo‘ydi. Shunga qaramay, mezbonlar bu oraliqdan gol o‘tkazmasdan o‘tib olishdi. To‘qqizinchi daqiqada «Bavariya»da superimkoniyat yuzaga keldi – jamoa jarima zarbasini ayyorlik bilan ijro etib, uning yakunida Yupamekano darvoza qarshisida yolg‘iz qoldi, ammo u bir necha metr masofadan turib to‘pni to‘g‘ri tepa olmadi.
Shundan keyin «Real» ham hujumga o‘ta boshladi. Guler Mbappeni yaxshi vaziyatga chiqardi, ammo Noyyer ishonchli harakat qildi. 18-daqiqada esa 40 yoshli darvozabon Vinisiusning zarbasini ham qaytardi. Mezbonlar vaqti-vaqti bilan qarshi hujumlar uyushtirishdi, ammo o‘yinda mehmonlar to‘liq ustunlik qilishdi. Myunxenliklar kuchli pressingni davom ettirishdi, shunday vaziyatlardan birida yosh Pitarch to‘pni raqibga oldirdi, ammo Lunin Gnabrining zarbasini qaytarib, jamoani muqarrar goldan qutqardi. Javob hujumida esa Mbappe hisobni ochishi mumkin edi, ammo Noyyer bunga yo‘l qo‘ymadi.
«Bavariya» birinchi bo‘limda yaxshiroq ko‘rindi va tanaffus arafasida haqli ravishda hisobda oldinga chiqib oldi. Keyn, Gnabri va Dias ishtirokidagi kombinatsiya kolumbiyalik hujumchi yakkama-yakka vaziyatga chiqib borishi va darvozabonni dog‘da qoldirishi bilan yakunlandi. Bu hujum maydon markazida Vinisius to‘pni yo‘qotishi bilan boshlandi, hujum yakunida esa Trent o‘zi qo‘riqlashi kerak bo‘lgan futbolchini ko‘zdan qochirdi.
«Real» uchun ikkinchi bo‘lim debyuti ham muvaffaqiyatsiz kechdi. Hakam hushtagi chalinishidan ko‘p o‘tmay Pavlovich maydon markazida Karrerasdan to‘pni olib qo‘ydi va golli hujumni boshlab berdi. Hujum yakunida Olisedan to‘pni qabul qilib olgan Harri Keyn yerlatib aniq zarba yo‘lladi. Biroz o‘tib fransiyalik vingerning o‘zi hisobni yanada yiriklashtirishi mumkin edi – Lunin yaqin burchagiga yo‘llangan zarbani qaytarib qoldi.
Yo‘qotadigan narsasi qolmagan «Real» futbolchilari ochilishga majbur bo‘lishdi. Natijada mehmonlarda yana bir qator vaziyatlar yuzaga keldi. 56-daqiqada Olise olis masofadan xavfli zarba berdi, keyin esa Keyn o‘z jamoasi jarima maydoni oldida to‘p yo‘qotgan Valverdeni kechirdi.
Shunga qaramay, «Real» ham baribir o‘z vaziyatlariga ega bo‘ldi: bo‘lim o‘rtalarida Vinisius Upamekanoning qo‘pol xatosidan foydalanib, darvozabon bilan yakkama-yakka vaziyatga chiqib bordi, ammo Noyyer o‘z vaqtida oldinga chiqib, braziliyalik hujumchini xato zarba yo‘llashga majbur qildi.
«Real» taslim bo‘lmadi. «Qirollik klubi» «Bernabeu»da bunday qila olmasdi ham. Arbeloa jamoasi o‘ziga kelib, jipslashdi. Ammo Noyyer o‘zini ko‘rsatishda davom etdi. 66-daqiqada Mbappe jarima maydoniga yorib kirib, xavfli zarba berdi, ammo darvozabon yana bir bor fantastik seyv ijro etdi.
Faqat keyingi hujumda, 74-daqiqada Mbappe uni baribir ojiz qoldira oldi – Trent qanotdan uzatma berdi, fransuz hujumchisi yaqin masofadan zarba berdi. Bu epizodda ham faxriy darvozabon to‘pga ulgurdi, ammo bu safar to‘p chiziqni kesib o‘tishga ulgurgandi.
«Real» shundan keyin o‘ziga o‘xshab o‘ynay boshladi va o‘yinning oxirgi qismi shiddatli kechdi. Germaniya chempionlari uchinchi golni urishi ham, ispanlar mag‘lubiyatdan qutulib qolishi ham mumkin edi. Madridliklar zarbalar soni bo‘yicha «Bavariya»ga tenglashib ham oldi – 20:20 (darvoza sohasiga to‘g‘ri borgan zarbalar – 9:8). Lekin yakunda boshqa gol urilmadi va Kompani shogirdlari haqli g‘alabaga erishdi, lekin yarimfinal taqdiri Myunxenda 15 aprel kuni bo‘lib o‘tadigan uchrashuvda hal bo‘ladi.
«Arsenal» o‘z uslubida
«Sporting» – «Arsenal» 0:1
Gol: Havers, 90+1 (0:1)
«Sporting»: Ruy Silva, Gonsalu Inasiu, Diomande, Arauxo, Fresneda, Morita, Simoyes (Bragansa, 62), Gonsalvesh (Nel, 79), Katamu, Trinkau, Suares
«Arsenal»: Rayya, Saliba, Gabriel Magalyayns, Kalafiori, Uayt, Subimendi, Rays, Edegor (Havers, 70), Trossar (Martinelli, 76), Madueke (Douman, 76), Yokeresh
Ogohlantirish: Morita, 31
«Arsenal» YeChL 1/4 finali uchrashuviga o‘ng qanotdagi muammolar bilan yetib keldi. Himoyachi Yurriyen Timber va vinger Bukayo Saka jarohat tufayli maydonga tusha olmasdi. Natijada ularning o‘rinbosarlari – Ben Uayt va Noni Madueke ilk daqiqalardan maydonda harakat qilishiga to‘g‘ri keldi. Va bu maydondagi voqealarga ta’sir ko‘rsatmay qolmadi.
O‘yinning oltinchi daqiqasida Maksimiliano Arauxo aynan Uaytning qanotidan «Arsenal» jarima maydoniga kirib bordi va kuchli zarba yo‘lladi, to‘p darvozabonning barmoqlariga tegib o‘tgan holda to‘singa bordi.
Keyin esa «Arsenal» asta-sekinlik bilan o‘yinni o‘z darvozasidan uzoqlashtira boshladi. Jamoaning ilk xavfli vaziyati kutilganidek burchak zarbasi orqali yuzaga keldi. 15-daqiqada Madueke burchakdan to‘pni to‘g‘ridan to‘g‘ri darvoza tomon yo‘lladi, faqat to‘p bu safar ham to‘sindan qaytdi.
Umuman olganda, birinchi bo‘lim teng kuchlar ostida kechdi. «Sporting»da vaziyatlar ko‘p bo‘lmadi, «Arsenal»da undan ham kamroq. Mehmonlar ko‘proq vaqt mobaynida to‘pga egalik qilishdi, ammo jamoa mezbonlarning qarshi hujumga chiqib ketishini, shuningdek, hali oldinda javob o‘yini borligini hisobga olgan holda vaziyatni keskinlashtirmaslikni ma’qul ko‘rdi.
«Arsenal» faqat ikkinchi bo‘limda statistikani to‘g‘rilashga harakat qildi va mezbonlar darvozasi oldida xavfli vaziyatlar yuzaga kela boshladi. 63-daqiqada esa mehmonlar darvozani ishg‘ol etishdi ham. Ammo VAR hujum vaqtida Viktor Yokeresh ofsaydda qolgani tufayli Subimendining chiroyli golini bekor qildi.
Birinchi bo‘limni shiddatli o‘tkazgan «Sporting»da esa kuch tugab qoldi va jamoa to‘liq himoyada o‘ynadi. Faqat o‘yin oxirida so‘nggi kuchlarini yig‘ib oldinga o‘tdi, 83-daqiqada esa hisobn ochishga juda yaqin keldi. O‘ng qanotdan to‘p uzatilganitda Hidemasa Katamo yaqin masofadan boshda zarba berdi, ammo Rayya yaqin burchakka kirib ketayotgan to‘pni to‘sishga ulgurdi. Uch daqiqa o‘tib u yaponiyalik futbolchining yana bir xavfli zarbasini qaytardi.
Shundan keyin o‘yin golsiz durangga qarab ketayotgandi, ammo Artetaning ikkinchi bo‘limdagi futbolchi almashtirishlari ish berdi. 90+1-daqiqada Gabriel Martinelli chap qanotdan markazga yurdi va himoyachilar ortiga to‘p uzatdi, Kay Havers esa to‘pga yetib borib, osonlik bilan darvozani ishg‘ol etdi. Bu g‘alaba «Arsenal»ning butun mavsumi ifodasi bo‘ldi. Jamoa tomoshabop o‘yin ko‘rsatmayapti, lekin o‘ziga kerakli natijaga erishmoqda. Endi bir haftadan keyin Londonda kechadigan javob bahsida jamoani durang ham qoniqtiradi.
Shavkat Mirziyoyev raisligida 7 aprel kuni jismoniy tarbiya va sport sohasidagi kelgusidagi ustuvor vazifalarga bag‘ishlangan yig‘ilish o‘tkazildi. Unda qayd qilinishicha, Toshkentdagi 7 ta oliy sport mahorati maktabi tugatilib, o‘rniga Olimpiya shaharchasida «Olimpiya terma jamoalari markazi» tashkil qilinadi. Joylardagi 56 ta ixtisoslashgan sport maktabi ham markazning boshqaruviga o‘tadi.
Yig‘ilishda qayd qilinishicha, Olimpiya va Paralimpiya harakatini rivojlantirish, professional sportda seleksiya tizimini takomillashtirishga alohida e’tibor qaratiladi. Joriy yildan Prezident Olimpiadasi doirasida musobaqa o‘tkaziladigan sport turlari 2 karra ko‘paytirilib, 21 taga yetkaziladi. Endi mazkur olimpiada parasport bo‘yicha ham o‘tkazilishi belgilandi.
Har bir tuman, viloyat hokimi o‘z hududida Hokim olimpiadasini tashkil qiladi. Ushbu musobaqalar g‘oliblari Prezident olimpiadasiga yo‘llanma oladi.
Olimpiya qo‘mitasining hududiy bo‘limi direktorlari bir vaqtning o‘zida viloyat hokimlariga sport bo‘yicha maslahatchi bo‘ladi.
Poytaxtdagi 7 ta oliy sport mahorati maktabi tugatilib, o‘rniga Olimpiya shaharchasida «Olimpiya terma jamoalari markazi» tashkil qilinadi. Joylardagi 56 ta ixtisoslashgan sport maktabi ham markazning boshqaruviga o‘tadi.
Adaptiv sport turlari bo‘yicha kadr tayyorlash va malakasini oshirish tizimi ham o‘zgaradi. Gersen nomidagi Rossiya davlat pedagogika universitetining Toshkent filiali inklyuziv sport bo‘yicha tayanch oliygohga aylanadi.
Sport vaziri A.Ikramov, Ijtimoiy himoya milliy agentligi direktorining birinchi o‘rinbosari Sh.Mirziyoyeva, Paralimpiya qo‘mitasi raisi M.Tashxojayevga tegishli qaror loyihasini kiritish topshirildi.
Prezident bugun para sportchilarimiz erishayotgan natijalarda ularga tun-u kun hamrohlik qilayotgan fidoyi insonlarning hissasi katta ekanini ta’kidladi.
Endi o‘quv-yig‘in mashg‘uloti, respublika va xalqaro musobaqalarda para sportchiga hamrohlik qilganlarga transport va yashash xarajatlari qoplab beriladi. Ularga har oyda sport maktablari trenerlari oyligiga teng miqdorda maosh to‘lanadi.
O‘zbekistonda bank kartalarini o‘g‘irlash maqsadida to‘lov provayderlari ustidan nazorat kuchaytiriladi
“Obnalchi” korxonaning soliq majburiyati halol tadbirkor gardaniga yuklanyapti” – tadbirkorlar Soliq qo‘mitasidan norozi
Turkiyada yashirinib yurgan qidiruvdagi shaxs O‘zbekistonga qaytarildi
-
Dunyodan5 days ago
Tehron Hurmuz boʻyicha baʼzi mintaqa davlatlari bilan kelishuvlar tuzmoqchi
-
Dunyodan3 days ago
AQSh Eron urushida kamida 7 samolyotini yo’qotdi
-
Jamiyat3 days agoJizzaxda kuchli yomg‘irdan keyin sel kuzatildi
-
Dunyodan3 days ago
Prezident Tramp Eronni Hormuz muammosi “jiddiy oqibatlarga olib kelishi” haqida ogohlantirdi
-
Iqtisodiyot2 days ago
Qurilish bozorida asosiy ulush bino va inshootlar hissasiga to‘g‘ri keldi
-
Dunyodan1 day ago
AQSh va Eron o’rtasidagi sulh bitimi bugun kuchga kirishi mumkin
-
Iqtisodiyot5 days ago
O‘zbekistonga poyabzal importi qariyb 15 foizga kamaydi
-
Sport5 days ago“Lokomotiv” o‘yinidan keyingi janjal sabablari o‘rganilmoqda