Sport
Usik endi mutlaq jahon chempioni emas. U WBO kamarini jangsiz topshirdi
Ukrainalik bokschi Oleksandr Usik o‘ta og‘ir vazn toifasida WBO chempionlik kamarini o‘z ixtiyori bilan topshirganidan so‘ng mutlaq jahon chempioni maqomini yo‘qotdi.
Butunjahon boks tashkiloti (WBO) bayonotida ta’kidlashicha, Usik «o‘z qarorini yaxshilab o‘ylab ko‘rgan va chempionlikdan voz kechish foydasiga tanlov qilgan». Bunday qadamning sababi oshkor etilmayapti.
WBO kamarini yo‘qotganiga qaramay, Usik joriy yil iyulida Londondagi «Uembli» stadionida Daniel Dyubuani mag‘lubiyatga uchratish evaziga qo‘lga kiritilgan WBA, WBC va IBF chempionlik kamarlari sohibi bo‘lib qolmoqda. O‘shanda u ikkinchi marta superog‘ir vazn toifasida mutlaq jahon chempioniga aylangandi.
Usik 2021 yil sentabr oyida Entoni Joshuani mag‘lub etib, WBO yo‘nalishi bo‘yicha jahon chempioni bo‘lgan. O‘shandan beri u kamarni besh marta muvaffaqiyatli himoya qildi va har safar g‘alaba qozondi.
Bu vaqt oralig‘ida Usik Dyubua hamda britaniyalik yana bir bokschi Tayson Fyuri bilan ikki martadan jang o‘tkazib, o‘z avlodining eng og‘ir vazn toifasidagi eng muvaffaqiyatli vakillaridan biri sifatidagi maqomini mustahkamladi. 2024 yil mayida, Fyurini ikkinchi bor mag‘lub etganida, u barcha to‘rt versiya (WBO, WBA, WBC va IBF) bo‘yicha mutlaq jahon chempioniga aylangandi.
Besh hafta o‘tgach, u kamarni majburiy himoya qilishdan bosh tortib, o‘z ixtiyori bilan IBF kamaridan voz kechgandi. Biroq bu kamar hozircha uning ixtiyorida vaqtincha turibdi. Endi Usik WBO kamaridan ham voz kechdi – shuning uchun uning mutlaq chempionlik maqomini rasman yo‘qotdi.
Usik nima uchun tituldan voz kechgan?
WBO reglamentiga ko‘ra, Usikning keyingi raqibi yangi zelandiyalik Jozef Parker bo‘lishi kerak edi.
Ammo ukrainalik sportchi belidagi jarohati tufayli jangni keyinroqqa qoldirishni so‘ragan.
Shunda tashkilot Parkerga vaqtinchalik titul uchun britaniyalik Fabio Uordliga qarshi ringga chiqishga ruxsat bergan. Bu jangda kutilmaganda Parker mag‘lubiyati uchradi va vaqtincha chempionlik Uordliga o‘tdi.
Shundan keyin Usik yangi da’vogarga qarshi himoya jangini shu yil sentabr oyi oxirigacha o‘tkazishi kerak bo‘lib qoldi. Ammo bu dedlayn kechiktirildi, muzokaralar esa tiklanmadi.
Fabio Uordli kim va nima uchun u chempion bo‘ldi?
Fabio Uordli boks bilan faqat 20 yoshida shug‘ullanishni boshlagan
30 yoshli britaniyalik Uordli – noodatiy o‘tmishga ega bokschi. U boksga faqat 20 yoshida kelgan va olimpiya tizimidan emas, havaskor janglar orqali o‘tgan.
Professional ringda u 21 jang o‘tkazgan, ammo 30 yoshida haqiqiy sensatsiya ko‘tardi: 11-raundda Jozef Parkerni mag‘lub etib, vaqtincha WBO chempioni bo‘lib oldi va avtomatik ravishda Usik bilan jang o‘tkazish huquqini qo‘lga kiritdi.
Usik kamarni bo‘sh qoldirganidan keyin, WBO Uordlining maqomini to‘laqonli chempion darajasiga ko‘tarishi kerak. Bu borada rasmiy ma’lumot berilmadi, ammo promouter Frenk Uorren bu vaqt masalasi ekaniga ishonchi komil.
«Britaniyada superog‘ir vazn toifasida yangi jahon chempioni va ushbu sport turining yangi yulduzi bor», – deya yozdi u X ijtimoiy tarmog‘ida. «Bu mening boksdagi 45 yillik faoliyatimdagi eng aql bovar qilmas voqealardan biri. Fabio Uordli uchun esa bu faqat boshlanishi», – deya qo‘shimcha qilgan u.
Bu Usik uchun nimani anglatadi?
Usik – 2012 yilgi olimpiya chempioni va zamonaviy boks tarixida superog‘ir vazn toifasidagi birinchi mutlaq jahon chempioni
Oleksandr Usik endi mutlaq chempion emas, ammo uch titul egasi bo‘lib qolaveradi: WBA, WBC va IBF.
U hali ham superog‘ir vazn toifasidagi asosiy figura bo‘lib qolmoqda, WBO kamaridan voz kechishni esa ko‘pchilik bo‘lajak katta janglar oldidan strategik qadam sifatida ko‘rmoqda.
«WBO ikki toifada hali hech kim mag‘lub etmagan jahon chempioni Oleksandr Usikka chuqur hurmat, hayrat va minnatdorchilik bildiradi», – dedi ushbu tashkilot rahbari Gustavo Oliveri. Shuningdek, u ukrainalik bokschini «chempionlar chempioni» deb atadi.
WBO, shuningdek, «Usik uchun eshiklari doimo ochiq qolishi»ni bildirdi. «Uning jamoasi ta’kidlaganidek, bu xayrlashuv emas, balki hurmat yuzasidan tanaffus», – deyiladi WBO bayonotida.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
Shavkat Mirziyoyev Shinjon usulida yetishtirilgan paxta dalasini ko‘zdan kechirdi
O‘zbekiston do‘konlarida 73 turdagi mahsulot sifatsiz deb topildi
Tadbirkorlar jarimaning 50 foizini to‘lab, qolgan qismidan ozod etilishi mumkin
-
Jamiyat5 days ago
Toshkentda xalqaro moda akademiyasi tashkil etiladi
-
Iqtisodiyot2 days ago
O‘zbekiston «Wabtec» kompaniyasi bilan lokomotivlar parkini yangilashni muhokama qildi
-
Iqtisodiyot19 hours ago
Shavkat Mirziyoyev Shinjon usulida yetishtirilgan paxta dalasini ko‘zdan kechirdi
-
Jamiyat2 days ago
Tadbirkorlar jarimaning 50 foizini to‘lab, qolgan qismidan ozod etilishi mumkin
-
Jamiyat2 days ago
O‘zbekiston do‘konlarida 73 turdagi mahsulot sifatsiz deb topildi