Jamiyat
“Kilosini 20 ming so‘mdan sotardim” – eshak go‘shti sotib kelgan yigit iqrori
Ishlash uchun Toshkent shahriga kelgan 30 yoshli yigit eshak so‘yib sotish bilan shug‘ullangan. U Toshkent viloyatining Piskent va O‘rta Chirchiq tumanlari hududida mahalliy aholidan 100-200 ming so‘mga eshak sotib olib, go‘shtini Parkentdagi somsapazning o‘g‘liga pullab kelgan. Ishlari yurishib ketgan qassob 2 oyda 32 ta eshakni so‘yib sotgan.
Toshkent viloyatida eshak so‘yib sotgan yigit va ushbu go‘shtni xarid qilganlar jinoiy jazoga tortildi. Kun.uz sud hukmi bilan tanishdi.
Sud hujjatida keltirilishicha, 2025 yil 7 yanvar kuni huquqni muhofaza qiluvchi organlar xodimlari tomonidan Toshkent viloyatida tezkor o‘rganish o‘tkazilgan. Unda mahalla hududidagi qarovsiz dala shiyponida 23 ta tirik va 15 ta so‘yilgan holdagi eshak topilgan.
2025 yil 9 yanvar kuni Hikmat (materialdagi barcha ismlar o‘zgartirilgan) dala shiyponida eshaklarni so‘yib, go‘shtini iste’mol uchun o‘tkazish maqsadida olib ketayotganda Nurafshon shahri hududida ushlangan. Tadbir davomida u 200 kg eshak go‘shtini Toshkent shahrida yashovchi Asomiddinga kilosini 20 ming so‘mdan sotishga kelishganini aytgan. Hikmat o‘z ixtiyori bilan tezkor tadbirda ishtirok etishini ma’lum qilib, aybiga iqrorlik va pushaymonlik bildirgan.
Hikmatning arizasi asosida tadbir davom ettirilgan: Mirobod tumani hududida o‘tkazilgan tezkor tadbirda Asomiddin Sayfulladan 193 kg eshak go‘shtini 3 mln 860 ming so‘mga sotib olgan vaqtida ushlangan. Shuningdek, tadbir davomida Asomiddinning yashash xonadonidan 60 kg noma’lum hayvon go‘shti topilib, protsessual tartibda rasmiylashtirilib olingan. Asomiddin Tolib bilan birga ushbu go‘shtni Parkent tumani Guliston mahallasi hududidagi somsaxonada somsa tayyorlash va iste’molchilarga sotish maqsadida ishlatishi aniqlangan. Somsaxonadan 20 kg noma’lum hayvon go‘shti ashyoviy dalil sifatida olib qo‘yilgan.
Tuman Hayvonlar kasalliklari tashxisi va oziq-ovqat mahsulotlari xavfsizligi davlat markazi “salmonellyoz va ichak tayoqchalari ifloslanish darajasi o‘ta yuqori”ligi tufayli ushbu go‘sht mahsulotlari iste’molga yaroqsizligi haqida xulosa bergan.
Hikmat sudda aybiga to‘liq iqrorlik bildirgan.
“2024 yil dekabr oylarida ishlash maqsadida Toshkent shahriga keldim. Ish qidirib yurgan vaqtimda bir tanishim bilan qo‘ng‘iroqlashib, ish topolmayotganimni aytdim. U menga Asomiddinning telefon raqamini berib, eshak go‘shti sotib olishini, eshak so‘yib unga sotishim mumkinligini ma’lum qildi. Shundan so‘ng Asomiddinga qo‘ng‘iroq qildim. U menga eshak go‘shtining kilosini 20 ming so‘mdan sotib olishini bildirdi.
Toshkent viloyatining Piskent, O‘rta Chirchiq tumanlari hududlarida istiqomat qiluvchi mahalliy aholidan donasini 100-200 ming so‘mdan eshak sotib ola boshladim. So‘ngra ushbu eshaklarni so‘yish uchun joy qidirdim. Shunda Gallaquduq mahallasidagi eski ferma binosini topdim va cho‘pon bilan kelishdim. Unga eshak go‘shtini hayvonot bog‘iga topshirishimni aytib, yolg‘on gapirdim.
Eski fermaga jami 57 ta eshak olib borib qo‘ydim. 2024 yil dekabr oyidan 2025 yil yanvar oyiga qadar eshaklarning 32 tasini ferma hududida o‘zim so‘yib, go‘shtini Asomiddinga sotib keldim”, degan Hikmat o‘z ko‘rsatmasida.
U qilmishidan pushaymonligini, o‘ziga tegishli xulosa chiqarganini aytib, suddan yengillik so‘ragan.
Asomiddin ham sudda aybiga to‘liq iqrorlik bildirgan. U Hikmatga mol go‘shti sotib olishini aytganini bildirib, qilmishidan pushaymonligini ma’lum qilgan.
Tolib esa sudda Parkent tumani hududida somsa yopish bilan shug‘ullanishini, somsa uchun go‘shtni o‘zi Qo‘yliq dehqon bozoridan olib kelishini, kuniga 150-200 dona go‘shtli, 40-50 dona kartoshkali somsa yopishini aytgan.
Sud hukmi bilan Hikmat, Asomiddin va Tolib xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish jinoyatini sodir etganlikda aybli deb topilgan. Hikmat va Asomiddinga 2 yil muddatga ozodlikdan mahrum qilish, Tolibga esa 4 yil ozodlikni cheklash jazosi tayinlangan.
Oldinroq Qashqadaryodan Toshkent shahriga 361 kg eshak go‘shtini olib ketayotgan haydovchi Sirdaryoda to‘xtatib qolingandi.
Kun.uz bundan 2 yil oldin poytaxtga tashilayotgan o‘laksa go‘sht haqida surishtiruv qilgandi. Ushbu surishtiruvda keltirilgan muammo va holatlar hamon dolzarbligicha qolmoqda.
2026 yil yakuniga qadar begonalashtirilgan hamda jismoniy va yuridik shaxslar nomiga tegishliligi bo‘yicha mulk va ijara huquqi asosida davlat ro‘yxatidan o‘tkazilmagan suv fondi yerlari xatlovdan o‘tkaziladi.
Prezidentning “Suv xo‘jaligi sohasida bozor mexanizmlarini keng joriy qilish chora-tadbirlari to‘g‘risida”gi farmoniga muvofiq, 2026 yil 1 avgustga qadar suv fondi yerlarini ijaraga berish, monitoring qilish, shartnomalar tuzish va hisobotini onlayn yuritish imkonini beruvchi “Suv-yer-ijara” axborot tizimi ishga tushiriladi va Suv xo‘jaligi vazirligining “Raqamli suv xo‘jaligi” yagona axborot tizimiga integratsiya qilinadi.
Suv omborlari atrofidagi ijaraga berilgan suv fondi yerlarida organik qishloq xo‘jaligi mahsulotlarini yetishtirishda xalqaro sertifikatlar talablariga rioya etilishi ustidan doimiy nazorat o‘rnatiladi.
Suv xo‘jaligi vazirligi huzuridagi Suv xo‘jaligi obektlari xavfsizligini va suvdan foydalanishni nazorat qilish inspeksiyasiga quyidagi yo‘nalishlarda davlat nazoratini amalga oshirish bo‘yicha vazifalar yuklanadi:
a) suv fondi yerlaridan oqilona va maqsadli foydalanishni nazorat qilish;
b) suv fondi yerlari o‘zboshimchalik bilan egallanishining oldi olinishini nazorat qilish.
2026 yil yakuniga qadar begonalashtirilgan hamda jismoniy va yuridik shaxslar nomiga tegishliligi bo‘yicha mulk va ijara huquqi asosida davlat ro‘yxatidan o‘tkazilmagan suv fondi yerlari xatlovdan o‘tkazilib, ularga bo‘lgan huquqlar qonunchilikda belgilangan tartibda bekor qilinadi hamda ushbu yerlar suv xo‘jaligi obektlari ekspluatatsiya qiluvchi tashkilotlarga doimiy foydalanish huquqi asosida ajratiladi.
Suv xo‘jaligi obektlarini ekspluatatsiya qiluvchi tashkilotlarga doimiy foydalanish huquqi asosida ajratiladigan suv fondi yerlaridan tadbirkorlik sub’yektlari tomonidan vaqtincha foydalanish maqsadida tuzilgan ijara shartnomalari Davlat muassasasi hamda suv xo‘jaligi obektlarini ekspluatatsiya qiluvchi tashkilotlar tomonidan qayta ro‘yxatga olinadi.
Daryo o‘zanlari va suv xo‘jaligi obektlaridan qazib olinadigan qum-shag‘al materiallari hajmi Suv xo‘jaligi vazirligi mablag‘lari hisobidan va vazirlikning so‘roviga asosan Kosmik tadqiqotlar va texnologiyalar agentligi tomonidan texnik imkoniyatlardan kelib chiqib hisoblanadi.
Gonzo nomi ostida faoliyat olib boradigan bloger Geydar Aliyev ma’muriy qamoq jazosiga tortildi. Sud uni mayda bezorilik, ichki ishlar organlari xodimining qonuniy talablarini bajarmaslik hamda shaxsga doir ma’lumotlar to‘g‘risidagi qonunchilikni buzish huquqbuzarliklarida aybli deb topdi.
Bloger Geydar Aliyev ma’muriy jazoga tortildi. Kun.uz sud qarori bilan tanishdi.
Sud hujjatiga ko‘ra, Gonzo nomi ostida faoliyat olib boradigan 28 yoshli Geydar Aliyev 13 iyunda Toshkent shahrida o‘tkazilgan festivalda jamoat tartibini buzgan. U voyaga yetmagan shaxslarni ularning qarshiligiga qaramay videotasvirga olgan hamda Telegram kanalida tarqatgan.
Shuningdek, bloger ichki ishlar organi xodimining huquqbuzarlikni to‘xtatish haqidagi talabini bajarmasdan jamoat joyida so‘kingan holda odamlar osoyishtaligini buzgan.
Bundan tashqari, Geydar Aliyev 17 iyun kuni jabrlanuvchilardan birining sha’ni va qadr-qimmatini kamsituvchi ma’lumotlarni Telegram’da tarqatgani ham aniqlangan.
Geydar Aliyev sudda qilmishidan pushaymon ekanini bildirgan.
“13 iyun kuni Mirobod tumanida o‘tkazilgan “K-Vibe” festivaliga “Kimano” kiyimida borib, ukamning operatorligida bayram jarayonini jonli video orqali tasvirga olishni boshladim. O‘sha yerdagi fuqaroga birga raqsga tushishni taklif qildim. U videoga olmaslikni aytib, operatorga qarshilik qildi. O‘sha yerda xizmatni o‘tayotgan profilaktika inspektori videoga olmasligimni va o‘chirib tashlashimni so‘radi. Men qaysi asosga ko‘ra fuqarolar yoki IIO xodimlarini videoga olmaslik kerakligini so‘radim. Xodimning IIB binosiga birga borish taklifini rad qildim.
Bundan tashqari, jamoat joyida ruscha so‘zlar bilan so‘kinganim rost. Bunday qilmishi uchun chin ko‘ngildan pushaymonman”, degan bloger.
Jabrlanuvchilar suddan Aliyevga nisbatan qonuniy chora ko‘rishni so‘ragan.
JIB Mirobod tuman sudi qarori bilan Geydar Aliyev MJtKning 183-moddasi (mayda bezorilik), 194-moddasi (ichki ishlar organlari xodimining qonuniy talablarini bajarmaslik) 1-qismi, va 46-2-moddasi (shaxsga doir ma’lumotlar to‘g‘risidagi qonunchilikni buzish) 1-qismida nazarda tutilgan huquqbuzarliklarni sodir etganlikda aybli deb topilgan Unga 5 sutka ma’muriy qamoq jazosi tayinlangan.
Raqamli hukumat fuqarolarga uy qurishda hujjatlarni rasmiylashtirish hamda qurilish ishlarini amalga oshirish tartibini eslatib o‘tdi.
Ma’lum qilinishicha, avvalo litsenziyaga ega loyiha tashkilotida uy loyihasini tayyorlash lozim. Shundan so‘ng loyiha my.gov.uz portali orqali tegishli tartibda kelishilib, qurilish ishlarini boshlash mumkin. Qurilish yakunlangach esa obyektdan foydalanishga ruxsatnoma ham elektron tarzda olinadi.
Qayd etilishicha, agar uy ikki qavatdan oshmasa, balandligi 12 metrdan va umumiy maydoni 500 kvadrat metrdan katta bo‘lmasa, fuqaro litsenziyaga ega loyiha tashkilotiga murojaat qilib loyiha tayyorlatishi mumkin. Keyinchalik loyiha Qurilish va uy-joy kommunal xo‘jaligi bosh boshqarmasi bilan kelishilgach, qurilish ishlari boshlanadi.
Mutasaddilar uy aynan tasdiqlangan loyiha asosida qurilishi kerakligini ta’kidladi. Aks holda, foydalanishga ruxsatnoma olish jarayonida muammolar yuzaga kelishi mumkin. Chunki yakuniy bosqichda loyiha tashkilotining xulosasi hamda vakolatli organlarning joyiga chiqib o‘tkazadigan o‘rganish natijalari talab etiladi.
Shuningdek, fuqarolar elektron xizmatlar orqali quruvchi tashkilotning ishonchliligini tekshirish, ko‘chmas mulkning buzilish (snos) hududiga tushgan-tushmaganini aniqlash, uy-joyni QR-kod orqali tekshirish, yashash manzili bo‘yicha ro‘yxatdan o‘tish, kommunal hisobraqamlar va qurilish obyektlari haqida ma’lumot olish imkoniyatiga ega.
Mas’ullar hujjatlarsiz qurilgan obyektlar qonunchilikka muvofiq jarimaga sabab bo‘lishi, ayrim hollarda esa buzdirilishi mumkinligini eslatdi. Litsenziyaga ega loyiha tashkilotlari ro‘yxati bilan shaffofxarid.uz platformasi orqali ham tanishish mumkin.
Jamiyat
Eski mashinasini utilizatsiyaga topshirmaganlar BHMning 30 barobari miqdorida kompensatsiya to‘laydi
Yangi tartibga ko‘ra, ishlab chiqarilganiga 30 yildan oshgan transport vositalari egalaridan bozor narxida baholanib, xarid qilinadi. Avtomobil egalariga yangi avtomobilning boshlang‘ich to‘lovi uchun elektron vaucher taqdim etish yoki vaucher summasini naqdlashtirib berish taklif etiladi.
2026 yildan boshlab ishlab chiqarilganiga 30 yil va undan ortiq bo‘lgan avtomobillarni bozor narxida sotib olish va utilizatsiya qilish tizimi yo‘lga qo‘yiladi.
Yangi tartibga ko‘ra, ishlab chiqarilganiga 30 yildan oshgan transport vositalari egalaridan bozor narxida baholanib, xarid qilinadi. Avtomobil egalari bilan hisob-kitob qilish jarayonida yangi avtomobilning boshlang‘ich to‘lovi uchun elektron vaucher taqdim etish yoki vaucher summasini pulga aylantirib berish taklif etiladi.
Iste’molchi ushbu vaucher orqali O‘zbekistonda ishlab chiqarilgan yangi avtomobillarni imtiyozli shartlarda xarid qilishi mumkin bo‘ladi. Bunda vaucherdagi mablag‘ chegirma sifatida hisoblanib, qolgan to‘lovni bir yildan ortiq muddatga bo‘lib to‘lash imkoni yaratiladi.
Eski avtomashinasini o‘z vaqtida utilizatsiyaga topshirmagan fuqarolar yiliga bir marotaba bazaviy hisoblash miqdorining 30 barobari miqdorida ekologik kompensatsiya to‘laydi.
Qohira va Toshkent o‘rtasida to‘g‘ridan-to‘g‘ri aviaqatnov mavjud emasligi sababli, u Rossiya orqali tranzit tarzida olib kelingan hamda huquqni muhofaza qiluvchi organlarga topshirilgan.
O‘zbekiston va Misr Interpol Milliy markaziy byurolarining kelishilgan sa’y-harakatlari natijasida tovlamachilik jinoyatini sodir etganlikda ayblanib, xalqaro qidiruvga berilgan fuqaro O‘zbekistonga ekstraditsiya qilindi.
Xabar qilinishicha, u Misr hududida qo‘lga olingan.
“Vakolatli organlar tomonidan tegishli materiallar ko‘rib chiqilib, zarur ekstraditsiya choralari yakunlangach, uni O‘zbekiston tomoniga topshirish to‘g‘risida qaror qabul qilindi”, deyiladi Interpolning O‘zbekistondagi Milliy markaziy byurosi xabarida.
Qayd etilishicha, Qohira va Toshkent o‘rtasida to‘g‘ridan-to‘g‘ri aviaqatnov mavjud emasligi sababli, u Rossiya orqali tranzit tarzida olib kelingan.
Ekstraditsiya qilingan shaxs huquqni muhofaza qiluvchi organlarga topshirilgan.
Jahon banki O‘zbekiston qishloqlari uchun 150 mln dollar ajratadi
Shavkat Mirziyoyev YeTTB bilan hamkorlikning ustuvor yo‘nalishlarini belgiladi
Davlat ro‘yxatidan o‘tkazilmagan suv fondi yerlariga bo‘lgan huquqlar bekor qilinadi
-
Jamiyat2 days agoAbdulla Qodiriy ko‘chasida haydovchilar uchun yangi qayrilish joyi tashkil etildi
-
Iqtisodiyot2 days agoUch karra yer solig‘ining bekor qilinishi: pullar qanday qaytariladi?
-
Iqtisodiyot3 days ago
Toshkentda YIBning mintaqaviy vakolatxonasi ochildi
-
Dunyodan5 days ago
Dunyo bo’ylab qochqinlar soni 10 yil ichida birinchi marta kamaydi.
-
Siyosat4 days ago
O‘zbekistonda AQSh bilan yirik investitsiya loyihalari amaliy bosqichga o‘tadi
-
Dunyodan4 days agoEron yadro quroliga ega boʻlmaslikka rozi: Prezident Tramp
-
Sport3 days agoJCh-26. O‘zbekiston mag‘lubiyat bilan boshladi
-
Jamiyat4 days agoO‘qish maqsadida chet elga chiqqanlar soni kamaydi