Jamiyat
“Hali ko‘p dalillarni oshkor qilmadim” – Gulira’no Qosimova ishi bo‘yicha sud jarayoni boshlandi
Farg‘onada IIB xodimlari tomonidan tahqirlangan Gulira’no Qosimova ishi doirasida sud jarayonlari boshlandi. Furqat tumani IIBning sobiq boshlig‘i Akmal Xo‘jayev va uning birinchi o‘rinbosari Jasur Rasulovga nisbatan qo‘zg‘atilgan jinoyat ishi JIB Quva tuman sudida ko‘rib chiqilmoqda. Kun.uz muxbiri sud majlisida ishtirok etib, reportaj tayyorladi.
{Yii::t(}
O’tkazib yuborish 6s
O’tkazib yuborish
8 oktyabr kuni jinoyat ishlari bo‘yicha Quva tuman sudida Furqat tumani IIBning sobiq amaldorlariga nisbatan qo‘zg‘atilgan jinoyat ishi doirasida sud majlisi bo‘lib o‘tdi. Jinoyat ishi JIB Quva tumani sudi raisi Avazbek Rahimov raisligida ko‘rib chiqilmoqda. Ochiq sud majlisida audio va videoga olishga ruxsat berilmadi.
Sud majlisida Quva tumani prokurori katta yordamchisi Ayubxon Umaraliyev tomonidan ayblov xulosasi o‘qib eshittirildi. Jabrlanuvchining ko‘rsatuvlari tinglandi.
Sud jarayonidan so‘ng Gulira’no Qosimova hamda uni himoya qilayotgan advokat Abduqahhor Mahmudov Kun.uz’ga intervyu berdi.
Gulira’no Qosimova suddan adolat kutayotganini, boshiga tushgan musibatlarni hatto dushmaniga ham ravo ko‘rmasligini ta’kidlab o‘tdi. Ayolga ko‘ra, u ushbu holat bo‘yicha Farg‘ona viloyati IIB boshlig‘iga murojaat qilgan, ammo natija bo‘lmagan.
“Suddan faqat adolat kutyapman. Boshimga tushgan musibatlardan keyin jamiyatimizda ayol kishi shunchalik tahqirlanishi mumkinmi, deb o‘zimga o‘zim ko‘p marotaba savol berdim. Allohga shukr, O‘zbekistonda ayollarga nisbatan adolat borligini his qildim. Holatga Parlamentimiz, Senatimiz e’tibor qaratdi. Buning uchun shu jarayonga befarq bo‘lmagan har bir insonga o‘z minnatdorligimni bildiraman.
Faqatgina adolat uchun kurashmoqchiman. Hech qaysi ayol nohaqlikdan dodlab yig‘lamasin, tunlari Xudoga iltijo qilmasin, yuzi shuvut bo‘lmasin, hech kimning oilasi buzilmasin.
Nima uchun xalqqa murojaat qildim? Nima uchun ommaga yuzimni ko‘rsatib chiqdim? Chunki ishonamanki, davlatimizda adolat qaror topadi, bunga umid qilaman. Va mana shu sud jarayonlari ham odil o‘tishini istayman. Hozir sud jarayoni ketayotgani sababli ko‘plab dalillarni oshkor qilmayapman. Lekin sud yakunidan keyin har bitta dalilni ommaga taqdim etaman.
Boshimga musibatlar tushgach, adolat izlab ko‘p marta Toshkentga qatnadim. Poytaxtga borib respublika bosh prokurori bilan ko‘risholmay keldim. Ichki ishlar boshqarmasi boshlig‘iga ham murojaat qilganman. Lekin natija bo‘lmagan. Kun.uz tahririyatiga rahmat aytaman. Videomaterial sababli endi mening dodimni hamma eshitdi”, deydi Gulira’no Qosimova.
Gulira’no Qosimovaning advokati Abduqahhor Mahmudov ham sud adolatli hukm chiqarishiga ishonishini ma’lum qildi.
“Jabrlanuvchilar Gulira’no Qosimova, Qurbonali Abdurahmonovga nisbatan qilingan ichki ishlar xodimlarining g‘ayriqonuniy harakatlari natijasida jinoiy ish qo‘zg‘atilib, prokuratura tomonidan tergov olib borildi. Mana, tergov ham yakunlanib, Furqat tumanining sobiq ichki ishlar bo‘limi boshlig‘i, birinchi o‘rinbosari ayblanib, ish jinoyat sudiga ko‘rib chiqish uchun yuborilgan. Bugundan sud jarayoni boshlandi.
Odil sudlovga ishonamiz. Odil sudlov adolatli hukmini chiqaradi. Ommaga e’lon qiladi. Ochiq sud majlisi o‘tkazishga kelishildi. Jamoatchilik nazoratiga ham ruxsat berildi. Suddan adolatli qaror kutyapmiz. Ishonamizki, O‘zbekistonda qonun ustuvorligi ta’minlangan, adolatli hukm chiqarilishiga umid qilamiz”, deydi u.
Jinoyat ishi bo‘yicha keyingi sud majlisi 15 oktyabr kuni o‘tkazilishi belgilandi.
Eslatib o‘tamiz, Kun.uz oldinroq Furqat tumanida maktab direktori bo‘lgan Gulira’no Qosimova bilan sodir bo‘lgan holat haqida surishtiruv e’lon qilgandi. Unda Furqat tumani IIB xodimlari ayolni kaltaklab, kiyimlarini yirtib, yalang‘och holda tasvirga olgani haqida gap boradi. Holat Senat qo‘mitasi tomonidan nazoratga olingan. Ombudsman Furqat tumani IIBning 4 nafar mas’ul xodimi jinoiy javobgarlikdan ozod etilganini ma’lum qilib, holatga aloqador bo‘lgan har bir shaxsning qilmishi to‘liq va xolisona o‘rganilishi ta’minlanishini so‘ragan.
Sarvar Ziyoyev,
Kun.uz
Operator va montajchi – Sardor Mamirov.
Raqobat qo‘mitasi tomonidan 2026 yilning dastlabki sakkiz oyida o‘tkazilgan tekshiruvlar davomida 73 nomdagi mahsulot sifat va xavfsizlik talablariga javob bermasligi aniqlandi. Bu haqda qo‘mita matbuot xizmati xabar berdi.
Ma’lum qilinishicha, qo‘mita hamkor tashkilotlar bilan birgalikda chakana savdo nuqtalarida sotilayotgan xalq iste’moli tovarlarining sifat va xavfsizlik talablariga muvofiqligini tekshirish uchun muntazam ravishda nazorat xaridlarini o‘tkazib kelmoqda. Xarid qilingan mahsulotlar akkreditatsiyadan o‘tgan laboratoriyalarda tekshirilib, ularning davlat standartlari hamda normativ-texnik hujjatlar talablariga mosligi baholanadi.
Xususan, 2026 yilning sakkiz oyida 60 turdagi jami 558 nomdagi mahsulot laboratoriya ekspertizasidan o‘tkazilgan. Natijada ulardan 73 nomdagisi belgilangan normativ-texnik talablarga javob bermasligi ma’lum bo‘lgan.
Ushbu mahsulotlarni savdo rastalaridan qaytarib olish va qonunchilikka muvofiq choralar ko‘rish uchun tegishli materiallar O‘zbekiston texnik jihatdan tartibga solish agentligi hamda Sanitariya-epidemiologik osoyishtalik va jamoat salomatligi qo‘mitasiga yuborilgan.
Qonunchilik palatasi deputatlari bugungi majlisida moliyaviy jarimalarni qo‘llash tartibini yengillashtirishga qaratilgan qonun loyihasini uchinchi o‘qishda qabul qilib, Senatga yubordi.
Hujjatga ko‘ra, tadbirkorlar jarima solish to‘g‘risidagi qaror topshirilgan kundan boshlab bir oy ichida jarimaning 50 foizini ixtiyoriy to‘lasa, qolgan qismini to‘lashdan ozod etilishi mumkin.
Shuningdek, jarimani 6 oy davomida bo‘lib-bo‘lib to‘lash imkoniyati nazarda tutilmoqda.
Agar jarima to‘g‘risidagi qaror bekor qilinsa yoki haqiqiy emas deb topilsa, noqonuniy undirilgan mablag‘ qaytariladi. Qaytarish kechiktirilgan taqdirda, Markaziy bank asosiy stavkasining uch yuzdan biri miqdorida foiz to‘lash tartibi joriy etiladi.
Hozircha bu qoidalar qonun loyihasida nazarda tutilgan, kuchga kirmagan.
O‘zbekistonda moda va dizayn sohasi uchun malakali mutaxassislar tayyorlashga ixtisoslashgan yangi davlat oliy ta’lim muassasasi tashkil etiladi.
Prezidentning 2026-yil 16-oktyabrdagi PQ–378-son qaroriga muvofiq, Toshkent xalqaro moda akademiyasi tashkil etiladi. Akademiya Yengil sanoatni rivojlantirish agentligi tizimida faoliyat yuritadi.
Yangi oliygoh Toshkent to‘qimachilik va yengil sanoat instituti hamda Parij xalqaro moda akademiyasining qo‘shma ta’lim dasturi negizida tashkil etiladi.
Mazkur dasturda tahsil olayotgan barcha talabalar o‘qishini yangi akademiyada davom ettiradi. Bitiruvchilarga Toshkent xalqaro moda akademiyasining diplomi beriladi.
O‘quv jarayoni 2026/2027 o‘quv yilidan boshlanadi. Akademiyada xalqaro qo‘shma dasturlar bilan bir qatorda, mustaqil ta’lim dasturlari asosida bakalavr va magistrlar tayyorlashga ham ruxsat etiladi.
2027/2028 o‘quv yilidan boshlab to‘qimachilik, tikuvchilik, trikotaj va charm-poyabzal sohalarida korxonalar buyurtmasi asosida dual ta’lim joriy qilinadi. Bunda talabalar nazariy bilim olish bilan birga ishlab chiqarish jarayonlarida ham ishtirok etadi.
Shuningdek, yengil sanoat yo‘nalishidagi texnikumlarni muvaffaqiyatli tamomlagan, o‘rtacha bahosi akademiya belgilagan talabga javob beradigan bitiruvchilarga bakalavriatning uchinchi bosqichidan to‘lov-kontrakt asosida o‘qishni davom ettirish imkoniyati yaratiladi.
Akademiya bazasida davlat buyurtmasi asosida turli tashkilotlar uchun kiyim-bosh dizaynini ishlab chiqish va milliy brendlarni shakllantirish ham yo‘lga qo‘yiladi.
Qarorda xorijiy mutaxassislar va talabalarni jalb qilish uchun ko‘p martalik vizalar rasmiylashtirish tartibi ham nazarda tutilgan.
Bundan tashqari, 2028-yil yakuniga qadar davlat-xususiy sheriklik asosida 400 o‘rinli talabalar turar joyi quriladi. Ungacha akademiyaga o‘tkazilgan talabalar Toshkent to‘qimachilik va yengil sanoat instituti yotoqxonasidan belgilangan tartibda foydalanishi mumkin.
Xorijda o‘zbek milliy taomlariga ixtisoslashgan restoran yoki oshxona tashkil etgan mahalliy tadbirkorlar ayrim xarajatlarining 50 foizigacha bo‘lgan qismini subsidiya sifatida qaytarib olishi mumkin.
Ushbu xizmat Turizm qo‘mitasi tomonidan my.gov.uz Yagona interaktiv davlat xizmatlari portali orqali bepul ko‘rsatiladi.
Subsidiya O‘zbekistonda davlat ro‘yxatidan o‘tgan va xorijda milliy restoran tashkil etgan tadbirkorlik subyektlariga ajratiladi.
Ariza topshirishda restoranning xorijiy davlatda ro‘yxatdan o‘tganini va binodan foydalanish huquqini tasdiqlovchi hujjatlar, sanitariya va yong‘in xavfsizligi talablariga muvofiqlik bo‘yicha ma’lumotlar taqdim etilishi kerak.
Shuningdek, restoranni tashkil etish bilan bog‘liq amalga oshirilgan xarajatlarni tasdiqlovchi hujjatlar, zaruratga qarab O‘zbekistondan mahsulot yetkazib berilganini tasdiqlovchi ma’lumotlar va ularning rasmiy tarjimasi so‘ralishi mumkin.
Restoranning ichki va tashqi ko‘rinishini aks ettiruvchi fotosuratlar ham arizaga ilova qilinadi.
Ariza my.gov.uz portali orqali elektron shaklda yuboriladi va 18 ish kuni ichida ko‘rib chiqiladi. Ijobiy qaror qabul qilinsa, subsidiya mablag‘lari 7 ish kuni ichida tadbirkorning bank hisobvarag‘iga o‘tkaziladi.
Arizada kamchiliklar aniqlangan taqdirda, tadbirkorga ularni bartaraf etib, hujjatlarni qayta taqdim qilish imkoniyati beriladi.
Qoraqalpog‘iston Respublikasidagi Ekologiya va iqlim o‘zgarishi milliy qo‘mitasi huzuridagi «Sayg‘ochiy» kompleks landshaft buyurtma qo‘riqxonasida yovvoyi hayvonlarni suv bilan ta’minlash maqsadida beshta avtonom suv ichish tizimi o‘rnatildi.
Tashabbus Ekologiya qo‘mitasi tomonidan BMT Taraqqiyot dasturi (BMTTD) va Global ekologik jamg‘arma (GEF) bilan hamkorlikda «Aral Sea Wetlands» loyihasi doirasida amalga oshirildi.
Suv resurslari cheklangan Ustyurt cho‘li sharoitida qo‘shimcha suv manbalarining mavjudligi sayg‘oqlar va mahalliy faunaning boshqa vakillarini saqlab qolishda muhim ahamiyatga ega.
Avtonom tizimlar quyosh energiyasida ishlaydi va to‘liq avtomatlashtirilgan. Ularning har biri 3 kub metr sig‘imga ega suv havzalari, nasoslar, datchiklar va hisoblagichlar bilan jihozlangan. Bu markazlashgan elektr energiyasi va suv ta’minoti manbalariga doimiy ulanish zaruratisiz suvni barqaror yetkazib berish imkonini beradi.
Suv ichish tizimlari bilan bir qatorda hududga 10 ta kamera va 10 ta fototuzoq ham o‘rnatildi. Ular hayvonlarni sutka davomida kuzatish, harakatlanishi va suv ichish joylaridan foydalanishini qayd etish, shuningdek, populyasiyalar holatini keyingi monitoring qilish uchun ma’lumot to‘plash imkonini beradi.
Ustyurtning og‘ir tabiiy sharoitida yashaydigan sayg‘oqlar uchun qo‘shimcha suv manbalarining yaratilishi yovvoyi hayvonlar populyasiyalarini saqlash va tiklashda muhim ahamiyat kasb etadi.
Avtonom suv ichish tizimlarining o‘rnatilishi Ustyurtda bioxilma-xillikni asrash bo‘yicha amalga oshirilayotgan chora-tadbirlardan biri bo‘lib, zamonaviy kuzatuv vositalari orqali hayvonlar holatini monitoring qilish va zarur ma’lumotlarni to‘plash imkonini ham beradi.
