Sport
Qizaloq va Lucho: bir muhabbat tarixi
Bugun 31 may. Tun yarmidan oqqanda Myunhenda insoniyat tarixidagi eng zo‘r sport musobaqasi – Yevropa Chempionlar Ligasi finali boshlanadi. Biz tengi yigitlar uchun bu musobaqa o‘zgacha qadrli. Axir endi-endi futbolga qiziqa boshlagan vaqtimizda turnir yangicha formatga o‘tib dunyodagi eng zo‘r musobaqaga aylanayotgandi-da.
{Yii::t(}
O’tkazib yuborish 6s
O’tkazib yuborish
YeChLning afsonaviy musiqasi yangraganda Teddi Sheringhemning yosh bolalarcha golni nishonlab yugurgani, hal qiluvchi penaltini qaytargan Oliver Kanning vajohat bilan baqirgani-yu, Zidanning takrorlab bo‘lmaydigan golini kechagiday eslaymiz.
U vaqtlar «svet» ko‘p o‘chardi, internet zamoni ham boshlanmagan, finallarni doim kimningdir uyida yoki ko‘chada akkumulatormi, «dvijok»mi yoqib, to‘planib ko‘rardik. Shu bois bu ajoyib musobaqa finallarining har bir lahzasini entikib eslaymiz.
Shuncha yil o‘tdi hamki Chempionlar Ligasi finali bo‘ladigan kun yana biz futbol muxlislarining yuragi tez urishni boshlaydi, kimga muxlislik qilishimizdan qat’i nazar. Chunki bugun qaysidir jamoa futbol taxtiga o‘tiradi, kamida bir yilga…
Bugungi finalni tomosha qilish uchun yana bir sabab borki, men mana shu haqda hikoya qilib bermoqchiman.
G‘alabaga eng munosib ota
Bugungi finalda PSJ va «Inter» to‘qnash keladi. Ha, bu mavsumda «Barselona», «Arsenal» yoki «Real» zo‘r o‘yin ko‘rsatgan, finalga loyiqdek ko‘ringandir, lekin ishoning, aynan Yevropaning bugungi kundagi eng munosib ikki jamoasi finalga yetib keldi. «Inter» hatto final yo‘lida «Barsa»ni yengish uchun A seriyaga jiddiy e’tibor qilolmay, skudettoni «Napoli»ga boy berdi. PSJ esa yo‘lidan chiqqan barcha ingliz jamoalarini «yamlamay yutdi», hatto yutib bo‘lmaydigandek ko‘ringan «Liverpul»ni ham.
Parijliklar finalga Messi, Neymar, Mbappe kabi megayulduzlarning javobini berganidan keyin yetib kelgani qanchalik ramziy, a? Xuddi futolning o‘zi unda nomlarning ahamiyati yo‘qligini ko‘rsatib qo‘ygandek. Endi Parijda boshqa yulduz bor – Luis Enrike. Lucho Yevropaning eng zo‘r murabbiylaridan biri ekanini «Barselona»da vaqtidayoq isbotlab bo‘lgan. Lekin o‘shandan keyin murabbiy jiddiy sinovga duch kelgandiki, uni yengib o‘tish hammaning ham qo‘lidan kelmaydi.
Bugungi final ispaniyalik murabbiy uchun ayniqsa ahamiyatli. 2015 yil Luis Enrike «Barselona» bilan Chempionlar Ligasini yutadi. Berlindagi finaldan keyin dunyoda Enrikedan baxtli odam yo‘q edi. U 6 yoshli qizalog‘i Xana bilan g‘alabani nishonlab suratga tushadi. Qizaloq «Barselona» bayrog‘ini ushlab tushgan suratni hamma ko‘rgan bo‘lsa kerak.
Biroq o‘sha baxtli onlardan 4 yil o‘tib Enrikening oilasi jiddiy sinov bilan yuzlashadi. 9 yoshli Xanada saraton aniqlanadi. Suyak saratoni bolalarda kam uchraydigan kasallik edi, shu sabab oila kasallik haqida juda kech xabar topadi. O‘shangacha hech qanday alomat ham sezilmagandi.
Luis qiziga qo‘yilgan tashxisdan Maltada xabar topadi. U Ispaniya milliy jamoasi bilan Yevropa chempionati saralashi o‘yiniga tayyorlanayotgandi. Murabbiy tezda Barselonaga yo‘l oladi. Ko‘p o‘tmay Luis Ispaniya milliy jamoasidan ketadi, chunki qizi og‘ir kasalga chalingani uchun futbolga e’tibor berolmasdi. Keyingi yarim yilni Enrike va oilasi kasalxona koridorlarida o‘tkazadi, murabbiy ozib ketadi.
Qizaloq besh oy davomida kasallik bilan kurashadi, lekin 2019 yil 29 avgust kuni vafot etadi. Bu haqda Enrikening o‘zi xabar beradi. «Qizalog‘imiz Xana og‘ir kasallik bilan besh oy kurashganidan so‘ng bizni tark etdi. Kasalxonadagi shifokorlar, hamshiralar, bizga yordam bergan hammaga rahmat deymiz. Xana, seni sog‘inamiz, qizim. Sen bilan o‘tgan har bir kunimizni eslab yuramiz, sen oilamiz uchun yo‘lchi yulduz bo‘lasan, ruhing orom olsin, Xanita», deb yozadi Enrike.
Luis 4 yil o‘tibgina qizini yo‘qotgandagi hissiyotlarini bo‘lishadi. Ispaniya telekanali u haqda hujjatli film suratga oladi. «Bilasizmi, men o‘zimni baxtli odam deb hisoblayman. Chunki Xanita bilan 9 yil ajoyib damlarni o‘tkazdik. U bilan o‘tgan har bir lahzani eslayman, kulaman. Uni eslatadigan xotiralar, videolar bor.
Bir kuni ota-onamning uylariga bordim. Qarasam, uyda Xananing birorta surati yo‘q. «Ona, nega uning suratini qo‘ymagansiz?», dedim. Onam «Bardosh berolmayman, bolam», dedi. Men esa «Onajon, u jisman bizni tark etgani bilan ruhan doim yonimizda», dedim. Keyin uyga Xananing suratini ilib qo‘ydik», degandi filmda Enrike.
Qaytish
2019 yil noyabrda Ispaniya milliy jamoasiga qaytgan Enrike u yerda o‘zi xohlagandek ishlolmaydi. Jamoa Yevropa chempionati va mundialda muvaffaqiyatsiz qatnashadi. Bu vaqtda Luis Enrikening salomatligi ham yomonlashgandi. 2023 yil murabbiy yana klubdagi murabbiylikka qaytadi.
Lucho jahon yulduzlarini olib kelib ham Chempionlar Ligasini yutolmayotgan PSJni qabul qilib oladi. Bu katta tavakkal edi, chunki klubda ichki muammolar mavjud, Mbappe «chemodan kayfiyatida» o‘ynayotgandi.
Birinchi mavsumida Enrike klub rahbariyatidagi jamoadan ustun turadigan yulduzlar kerak emasligini aniq qilib tushuntiradi. Mbappe ba’zi o‘yinlarda zaxirada qolib, ba’zan o‘yin tugamay zaxiraga olinardi. Keyingi mavsum ham Luis uchun qiyin boshlanadi. Lekin keyinchalik PSJ oldidan chiqqan barchani yengishni boshladi, Usmon Dembele Yevropaning eng yaxshi futbolchilaridan biriga aylandi. Jamoa kim uchundir emas, PSJ uchun o‘ynashni boshlaydi. Buning nomini esa murabbiy jamoasi deyishadi.
Shu tariqa Parij haqli tarzda Chempionlar Ligasi finaliga chiqdi. Bu birinchi final emas, albatta: Mbappe va Neymar avval ham finalga chiqqandi, lekin o‘shanda «Bavariya» yaqqol favorit edi. Endi PSJ klub tarixida ilk marta favorit sifatida YeChL finalida o‘ynaydi.
«Bayroqni yana bir bor ko‘tarishni istayman»
Luis Enrike uchun bu final o‘zgacha. «Arsenal» bilan o‘yindan keyin murabbiy 2015 yildagi finalni yodga oldi. «O‘shanda qizim «Barselona» bayrog‘ini ko‘tarib yugurgani esimdan chiqmaydi. PSJ bilan g‘olib bo‘lsak, yana bayroqni ko‘tarib rasm tushmoqchiman. To‘g‘ri, finalda u jismonan biz bilan bo‘lmaydi, lekin ruhan doim yonimizda. Bu men uchun juda muhim», degandi murabbiy.
Bugungi finalda munosib jamoa g‘olib bo‘lsin, sport shunisi bilan go‘zal. Lekin men bugun Luis Enrikega omad tilayman. Olg‘a, Lucho! Sen Xanita uchun ham bu shalpangquloq kubokni yutishing va bayroqni ko‘tarishing kerak…
O‘tkir Jalolxonov tayyorladi
Tasvirchi va montaj ustasi – Faxriddin Hotamov
Yosinbek Odilov, Asadbek Samandarov va Mohidil O‘ktamjonova O‘zbekistonga oltin medallarni keltirdi.
Toshkentda 12-17 aprel kunlari Taekvondo WT bo‘yicha yoshlar o‘rtasidagi XV Jahon chempionati o‘tkazildi.
Nufuzli musobaqada O‘zbekiston yoshlar terma jamoasi 3 ta oltin, 2 ta kumush va 1 ta bronza medalini qo‘lga kiritdi.
Dastlabki oltin medalga -48 kg vazn toifasida Yosinbek Odilov ega chiqdi. U finalda o‘monlik Dovud Al-Yusufiyni mag‘lub etdi.
-51 kg vazn toifasida Asadbek Samandarov finalda tunislik Malik Mukroniy ustidan g‘alaba qozonib, oltin medalga sazovor bo‘ldi.
-63 kg vazn toifasida Mohidil O‘ktamjonova finalda italiyalik Sofiya Frassikani yengib, oltin medalni qo‘lga kiritdi.
Shuningdek, -68 kg vazn toifasida Ayubxon Nabiyev, +78 kg vazn toifasida Alisher Pak kumush medalga sazovor bo‘ldi.
-45 kg vazn toifasida Shohjahon Xolmurodov bronza medalini qo‘lga kiritdi.
Eron klublari mashg‘ulotlarni qayta boshlashga tayyorgarlik ko‘rmoqda va legionerlarni yig‘inlarga chaqirmoqda.
Eurasia Football xabariga ko‘ra, Eron chempionatida ishtirok etayotgan kamida ikki nafar xorijlik futbolchiga mamlakatga qaytish va o‘z jamoasiga qo‘shilish taklifi bilan rasmiy xatlar yuborilgan. Hujjatlarda qayd etilishicha, yaqinda o‘t ochishni to‘xtatish va vaziyat asta-sekin barqarorlashgandan so‘ng, klublar mavsumga tayyorgarlikni qayta boshladilar.
«Barcha o‘yinchilarimiz va xodimlarimizning xavfsizligi va farovonligi bizning eng ustuvor vazifamiz bo‘lib qolmoqda. Biz vaziyatni diqqat bilan kuzatib bormoqdamiz va qaytishingizga xavfsiz va professional muhit yaratish uchun barcha zarur choralarni ko‘rishni ta’minlash uchun tegishli organlar bilan muvofiqlashtirmoqdamiz», deyiladi futbolchiga yo‘llangan xatda.
Shu bilan birga, ichki chempionatni davom ettirish bo‘yicha yakuniy qaror hali qabul qilinmagan. Manba ma’lumotlariga ko‘ra, Eron futbol federatsiyasi va klublar rahbariyati musobaqani muddatidan oldin yakunlash yoki uni qayta boshlash variantini ko‘rib chiqmoqda. Dastlabki ma’lumotlarga ko‘ra, qaror aprel oyining oxirigacha qabul qilinishi mumkin.
Mamlakatdagi vaziyatning keskinlashuvi fonida xalqaro turnirlarni boykot qilish ehtimoli haqidagi bayonotlar ham yangradi. Xususan, rasmiylar jahon chempionatida ishtirok etishdan bosh tortish, klublar va terma jamoalarning bir qator mamlakatlarga chiqishini cheklash haqida gapirishni boshladi. Biroq bu masalalar bo‘yicha rasmiy qarorlar qabul qilinmadi. Shu tariqa, «Traktor» Saudiya Arabistonida Osiyo Chempionlar ligasi pley-off o‘yinini o‘tkazdi, terma jamoa esa yozda Shimoliy Amerikada bo‘lib o‘tadigan jahon chempionatiga tayyorgarlikni boshladi.
Ayni paytda Eron klublari ro‘yxatida 40 nafar legioner, jumladan, besh nafar o‘zbekistonlik (Jaloliddin Masharipov, Oston O‘runov, Rustam Ashurmatov, Odil Hamrobekov, Igor Sergeyev), ikki nafar tojikistonlik va bir nafar qirg‘izistonlik futbolchi bor. Harbiy qarama-qarshilik boshlanganidan so‘ng, xorijiy o‘yinchilar mamlakatni shoshilinch ravishda, ko‘pincha Turkiya va Ozarboyjon bilan chegaralar orqali tark etgan.
Kiprda o‘tkazilgan Xalqaro shaxmat federatsiyasi Nomzodlar turniri g‘olibi prezident tomonidan taqdirlandi.
Kiprda o‘tkazilgan Xalqaro shaxmat federatsiyasi Nomzodlar turnirida g‘alaba qozongan Javohir Sindarov prezident farmoniga ko‘ra, «Mehnat shuhrati» ordeni bilan mukofotlandi.
«O‘zining yuksak intellektual salohiyati va professional mahoratini yaqqol namoyon etib, dunyoning eng kuchli grossmeysterlari orasida rekord natijalar ko‘rsatgani va muddatidan oldin g‘oliblikni qo‘lga kiritgani uchun shaxmat bo‘yicha O‘zbekiston milliy terma jamoasi a’zosi Sindarov Javohir Sanjarbekovich «Mehnat shuhrati» ordeni bilan mukofotlansin», deyiladi farmonda.
Eslatib o‘tamiz, 20 yoshli grossmeyster Kiprda o‘tkazilgan Xalqaro shaxmat federatsiyasi Nomzodlar turnirida g‘alaba qozonib, shaxmat toji uchun hindistonlik Gukesh Dommaraju bilan kurashish imkoniyatini qo‘lga kiritgan edi.
O‘zbekiston jahon shaxmatidagi bunday ustunlikka qanday qilib erishdi? Shaxmatga ixtisoslashgan «e2e4» kanali ushbu savolga javob izlab ko‘rdi.
O‘ttiz sakkiz million aholiga ega mamlakat 2022-yildan beri gigantlar uddalay olmagan ishni qilmoqda. Ular shunchaki olimpiadani yutibgina qolmay, konveyer kabi vunderkindlarni yetishtiradigan tizimni yaratdilar. Bugun biz bu tizimni ipidan ignasigacha ko‘rib chiqamiz. Uch qahramon, uch taqdir, bir maqsad – shaxmat toji!
Agar O‘zbekistonning bugungi oltin avlodini tasodif deb o‘ylasangiz, qattiq adashasiz. Buni tushunish uchun o‘tmishni bilish kerak. O‘zbekistonda 2004-yili aqlbovar qilmas voqea yuz berdi. Toshkentlik Rustam Qosimjonov ismli yosh yigitga hech kim jiddiy qaramagan edi, ammo u Tripolidagi jahon chempionatiga borib, g‘olib bo‘ldi. Bu G‘arb uchun shok holat edi. O‘shanda bu boshqa hech qachon takrorlanmaydigan bir martalik chaqnash, yagona holatdek tuyulgandi. Ammo o‘sha paytda O‘zbekiston hukumati haqiqiy shaxmat saltanatini qurishga qat’iy qaror qildi.
Toshkentda davlat rahbari tashabbusi bilan respublika ixtisoslashtirilgan bolalar-o‘smirlar shaxmat maktabi ochiladi. Bu oddiy to‘garak emas, elektron doskalar, kompyuterlar va dunyoning istalgan raqibi bilan onlayn o‘yinlar o‘ynash imkoniyatiga ega bo‘lgan yuzlab o‘rinli saroy edi.
2017-yili FIDE bu maktabni mintaqadagi eng yaxshisi deb tan oladi. «Bu sport emas, davlat siyosati», — deya ta’riflagan edi Rossiya shaxmat federatsiyasi prezidenti Andrey Filatov maktabga tashrifidan so‘ng. Yevropada shaxmat boy ota-onalarning farzandlari uchun shunchaki xobbiga aylanib borayotgan bir paytda, O‘zbekistonda istalgan mahalladan chiqqan bolakayni bu intellekt maskaniga yetaklab kelishadi. U yerda ovqatlantirishadi, mashq qildirishadi va buning hammasi bepul. Mana, poydevor. Endi esa bu poydevor qanday natijalarga asos bo‘lganini ko‘ring.
Nodirbek Abdusattorov. U eng kattasi va hozirgi kunda eng sovrindori. 8 yoshida maktab o‘quvchilari o‘rtasida jahon chempioni. 17 yoshida esa haqiqiy tarix yaratadi: rapid bo‘yicha Jahon chempionatida g‘olib chiqadi. Yarim finalda u bir necha yildan so‘ng shaxmat toji uchun kurashadigan Yan Nepomnyashiyni mag‘lub etadi. Eng muhimi, guruhda u Magnus Karlsenni ham dog‘da qoldiradi. O‘shanda shaxmat olami hayratda qolgandi. Kim bu o‘zbek yigiti?!
Javohir Sindarov. Da’vogarlar turnirida barcha nomdor raqiblarini ko‘rdim demasdan, jahon chempionligi sari shahdam qadam tashlayotgan yigit.
Nodirbek Yoqubboyev. Uni ko‘pincha uchlikdagi ortiqcha shaxmatchi deb atashadi, ammo bu noto‘g‘ri, chunki aynan Yoqubboyev bu jamoadagi favoritlarning bosh kushandasi. Bosiq, sovuqqon, hissiyotlarga berilmaydi. Reytingda u, to‘g‘ri, biroz pastroqda, lekin bu uning kuchsiz ekanini anglatmaydi.
Aynan shu uchlik 2022-yili imkonsiz tuyulgan ishni amalga oshirgan jamoaning asosiy o‘zagiga aylanishgandi.
2022-yil avgust. Hindiston, Chennay, 44-Butunjahon shaxmat olimpiadasi. 188 jamoa, jahon darajasidagi yulduzlar. O‘zbekiston – turnirdagi eng yosh terma jamoa. O‘rtacha yosh – 19. Ularning juda bo‘lsa o‘nlikdan joy egallashini bashorat qilishadi, undan ortig‘ini emas. Lekin ular nima qilishadi? Butun turnir davomida birorta ham o‘yinda yutqazishmaydi! Sakkizta g‘alaba, uchta durang va haqli chempionlik!
Prezident Shavkat Mirziyoyev ularga shaxsan qo‘ng‘iroq qilib, shunday deydi: «Sizlar – bizning eng katta boyligimiz, xalqimizning oltin fondisiz».
Keling, bir narsani qayd etib qo‘yaylik: hech kim jiddiy qabul qilmagan jamoa barcha favoritlarni mag‘lub etdi. Ammo raqiblar uchun eng dahshatlisi hali oldinda, chunki bu tasodif emas, bu faqat boshlanishi edi.
2025-yil. Jahon kubogi. Sayyoramizning 206 nafar eng kuchli shaxmatchisi jamlangan. Biz qanday manzaraga guvoh bo‘lyapmiz? Yarim finalda O‘zbekistonning ikki vakili: Javohir Sindarov va Nodirbek Yoqubboyev da’vogarlar turniriga ulardan qaysi biri borishini hal qilishyapti!
«Bu aqlbovar qilmas holat. Bir mamlakatdan, bir shahardan chiqqan ikki yigit butun jahon elitasini turnirdan chiqarib yubordi», – deya izoh berishgandi ekspertlar jonli efirda. Yarim finalda Sindarov kuchliroq chiqdi. Finalda uni xitoylik tajribali Vey I kutib turardi, biroq u ham Sindarovni to‘xtata olmaydi.
Javohir Sindarov shaxmat tarixidagi Jahon kubogining eng yosh g‘olibi. O‘sha paytda u bor-yo‘g‘i 19 yoshda edi va u 2026-yilgi da’vogarlar turniriga yo‘llanmani qo‘lga kiritadi. Ayni damda u ushbu turnirda muddatidan oldin g‘alaba qozonib, Gukesh bilan jang qilishga tayyorlanayapti. Qolganlar-chi? Nodirbek Yoqubboyev elitada. Abdusattorov-chi? Ha, u Jahon kubogidan erta chiqib ketdi, ammo darhol London Chess Classic superturnirida 7 imkoniyatdan 6,5 ochko to‘plab, g‘olib bo‘ldi. Bu tendensiyani his qilyapsizmi?
Kimdir bitta turnirda yutib, soyaga chekinayotgan bir paytda, o‘zbeklar shunchaki o‘rin almashishmoqda. Bugun Sindarov qirol, ertaga Abdusattorov, indinga Yoqubboyev. Bu jamoa emas, bu haqiqiy «shaxmat mafiyasi». Albatta, bu yaxshi ma’noda. Mamlakat ichidagi raqobat shu qadar kuchliki, ularning bo‘shashishga haqlari yo‘q.
Xo‘sh, nega O‘zbekiston maktabi eng yaxshisi? Chunki davlat har bir bola uchun ochiq bo‘lgan jahon darajasidagi infratuzilmani yaratib qo‘ygan. Shuningdek, o‘zbekistonliklar g‘alabalarga juda tashna. Ular juda uzoq vaqt soyada bo‘lishdi va hozir bu yigitlar butun dunyoga isbotlashni xohlashadi: biz ruslardan yomon emasmiz, biz hindlardan yomon emasmiz, biz hammadan yaxshiroqmiz. Albatta, yuqorida nomi tilga olingan uchlikning muvaffaqiyatlari butun mamlakat darajasini ko‘tarmoqda. Shaxmatga yangi bolalar kirib kelmoqda. Qancha ko‘p bola o‘ynasa, shuncha ko‘p kuchli shaxmatchilar yetishib chiqadi.
Shuningdek, bu borada xarakter ham muhim rol o‘ynaydi. O‘zbekistonliklar yulduz shaxmatchilardan qo‘rqishmaydi. Karlsen, Firuzja, Fabi – bular ular uchun shunchaki nomlar. Doskada barcha donalar bir teriladi va barchaning imkoniyati teng. O‘zbek shaxmatchilari buni yaxshi tushunishadi. Da’vogarlar turniri Sindarov hozirda yaqqol favoritlardan biri ekanini isbotladi. Ammo, men esa sizga bundan ham ko‘prog‘ini ayta olaman: katta ehtimol bilan, kelajakdagi jahon chempioni aynan u bo‘ladi.
«Arsenal» va «Yuventus» ning sobiq darvozaboni Aleksandr Manninger poyezd halokatida vafot etdi.
Avstriya terma jamoasining sobiq darvozaboni Aleksandr Manninger 16-aprel kuni ertalab poyezd halokatida vafot etdi. Tutto Mercato Web xabariga ko‘ra, baxtsiz hodisa mahalliy vaqt bilan soat 8:40 atrofida Avstriyaning Nussdorf am Haunsberg shahridagi nazoratsiz temir yo‘l kesishmasida sodir bo‘lgan.
Politsiya ma’lumotlariga ko‘ra, 48 yoshli sobiq darvozabonning mashinasi to‘g‘ridan-to‘g‘ri yaqinlashib kelayotgan poyezd oldida kesishmani kesib o‘tgan. Poyezd mashinani bir necha metrgacha sudrab borgan.
Mashinist va taxminan 25 yo‘lovchi jarohat olmagan.
Turk kompaniyalari Farg‘ona xalqaro aeroportini modernizatsiya qilish bo‘yicha hamkorlik qilmoqda
16:13 “Qo‘rquv bo‘lishi tabiiy, ammo bu sizni to‘xtatmasin”, – 17 yoshida NASA va SpaceX bilan kosmik loyihani amalga oshirgan Akbar hikoyasi
“Ulardan fanga nima foyda?” – O‘zFA prezidenti darrov ilmiy daraja olayotgan mansabdorlar haqida
-
Iqtisodiyot3 days ago
O‘zbekistonga kofe importi keskin kamaydi
-
Iqtisodiyot3 days ago
16-apreldan dollar sezilarli ravishda oshadi
-
Jamiyat4 days agoO‘zbekistonda erkin bond omborlari tashkil etiladi
-
Dunyodan3 days ago
Prezident Tramp Hormuz blokadasi bilan bog‘liq tahdidli so‘zlarni aytdi
-
Sport5 days agoToshkentda taekvondo bo‘yicha yoshlar o‘rtasidagi jahon chempionati start oldi
-
Sport3 days ago
Shavkat Mirziyoyev Sindorovni telefon orqali tabrikladi
-
Iqtisodiyot5 days ago
Dollar, yevro va funt-sterling pasaydi
-
Jamiyat5 days agoEski shaharning yangi Zarqaynari – turizm ko‘chasidan reportaj