Jamiyat
«Ona, tinchmisiz?» – Urushga yuborilayotgan o‘zbek migrantlarini kim qutqaradi?
Rossiya-Ukraina urushi boshlanishi ortidan o‘ng minglab migrantlar urushga jalb qilindi. Ular, huquqlari eng kam ta’minlangan qatlam o‘laroq turli ayblar bilan qamoqqa olinib, bosim ostida urushga majburan yuborilmoqda. Tahririyatga murojaat qilgan onalar farzandlari musofir yurtda qanday qilib tuzoqqa tushib qolgani, ularning urushga yuborish uchun Rossiya qamoqxonalaridagi azoblari haqida so‘zlab berdi.
{Yii::t(}
O’tkazib yuborish 6s
O’tkazib yuborish
Ma’lumotlarga ko‘ra, ayni paytda Rossiya Federatsiyasining turli nuqtalaridagi qamoqxonalarda minglab o‘zbekistonlik yoshlar jazo muddatini o‘tamoqda. Ozodlikdan mahrum etilgan yoshlarning aksariyati 18 — 35 yoshda. Qamoqxonadagi o‘zbek muhojirlari mahkumlarning Rossiya tomonida turib Ukrainadagi janglarga olib ketishayotgani haqida ota-onalariga telefon qilib aytishgan. Sinovli kunlarni boshidan kechirayotgan ota-onalar farzandlarining qamoqxonalarda ming azobda jazo o‘tayotgani, ular qiyin sharoitda ushlab turilayotgani haqida so‘zlab berishdi:
Navqiron yigitlarimiz tutqunlikda
“Bir necha ming ota-onalar shu kunlarda sinovli kunlarni boshdan kechiryapmiz. Farzandlarimizni musofir yurtda tuhmat bilan qamoqxonaga tiqishdi. Ular yordamga muhtoj. O‘zbekiston fuqarolari, bo‘z yigitlar 18 yoshdan 35 yoshgacha bo‘lgan navqiron, elimizga, yurtimizga manfaati tegadigan, yordami tegadigan yoshlar hozir asirlikda, qamoqda, tutqunlikda, chorasizlikda o‘tirishibdi. Tashqi ishlar vazirligi, Bosh prokuraturaga boryapmiz. Lekin natija yo‘q. Agar qonunda jazo muddatini o‘tayotgan joyidan qaytarib olib kelishning iloji bo‘lmasa, iltimos qilardik, bolalarimizni urush o‘chog‘iga olib ketishmasin. Qamoqxonada kuchli psixologik bosim ta’sirida ko‘p yigitlar o‘z jonini qurbon qilyapti. Rossiya-Ukraina o‘zaro jang qilayotgan bo‘lsa o‘zbek farzandlarining bunga nima aloqasi bor? Nega Rossiya Federatsiyasi bolalarimizni bu urushga olib borib, qurbon qilyapti. Mina maydonlariga qo‘yib yuboryapti. Mening o‘g‘lim urushda emas. Lekin u qamoqxonada. Kafolat bermayman o‘g‘lim urushga bormaydi deb. Chunki juda ko‘p yigitlar ketib qolyapti. Ko‘plari dom-daraksiz yo‘qolib ketyapti. Kimlarningdir o‘ligini olib kelishyapti tobutga solib.
Farzandi qamalab qolgan 7 000 ota-onani bilaman. WhatsApp, Telegram guruhlarda hammamiz birlashib muhokama qilamiz, yordam izlaymiz. Bir-birimizga dalda bo‘lamiz. Bizning boquvchilarimiz shu yoqda. Ko‘pchilik yolg‘iz onalar. Qancha foyda keltiradi shu bolalar O‘zbekistonga? Shu paytgacha foyda keltirgan. Nahotki ularni qaytarishning iloji yo‘q?! Uyqumizda halovat yo‘q, yegan-ichganda halovat yo‘q. Har kuni Toshkent kezamiz. Qaysi eshikni taqillatsak, qaysi biri bizga ochar ekan, kim eshitar ekan bizni deb sog‘ligimizdan ham ayrildik”, deydi hukumatdan najot kutayotgan onalardan biri.
O‘g‘lim oliy ma’lumotli edi
“O‘g‘lim judayam sodda, oliy ma’lumotli edi. Chol-kampir tez-tez davolanib turamiz. O‘g‘lim ish topa olmaganidan 2023 yil 8 yanvar kuni Rossiyaga chiqib ketdi. Uylangan, ikkita farzandi bor. Ishlab yurdi, borib hujjat masalasini hal qilgandir, biletini pulini uzgandir, deb uch, to‘rt oy pul so‘ramadik. Oltinchi oyga o‘tganda kasal bo‘lib shifoxonada yotdim. “Bolam qayt, yaramayapman, shu yerda topganingga qanoat qilib yashaymiz. Uy ishlariga ham yaramayapman, yolg‘izlik qilib, xotining ketib qolgan”, dedim.
Hech qancha o‘tmay otasining oyog‘ini operatsiya qilishga to‘g‘ri keldi. “Qaytgin, yordaming kerak”, desak, “Xo‘p, qaytaman, yana ozgina qoldi, ishlab olay”, dedi. 11 oy davomida 2 500 dollar pul yubordi. “Otamni davolatinglar, onajon, operatsiyani men borganda qildiramiz”, dedi. “Yana ozroq ishlab olay, endi ishim yurishyapti”, dediyu shu bilan aloqaga chiqmay qoldi. Xavotirlana boshladim. Kunora video qilib gaplashib turgan bola birdan yo‘q bo‘lib qoldi. Qarz olib, o‘g‘limni izlab Rossiyaga ketdim. IIBda bolam qayerdaligini topib berishdi. U qamalib qolgan ekan. Borib bolamni ko‘rib, 40 kun turib, hech narsaga erisha olmadim. Pulsiz borganman. Kimlarningdir yordami bilan amallab qaytib keldim. Yana ahvolim yomonlashib, yana shifoxonaga tushdim.
Davlat qo‘ygan advokatning nomeri bor edi. O‘sha orqali bilib turdim. Bolam 228-modda, to‘rtinchi qism bilan ayblangan ekan. 2024 yil oktyabrda sudi bo‘ldi. Yana qarz olib ketdim Rossiyaga. Sudida qatnashdim.
O‘g‘lim Rossiyada ijaraga mashina olib elektr jihozlari “dostavka”sida ishlayapman, degan edi. Menga hatto ishlayotgan joyidagi o‘sha olib borib tushirgan kabellarini ham jo‘natib qo‘ygan videolari bor. Bolam endi men qanday ota-onamni ko‘ziga qarayman deb o‘ziga necha marta tan jarohati yetkazib o‘ldirmoqchi ham bo‘libdi. O‘sha yerda bo‘layotgan qiyinchiliklarni ham gapirmayapti. Yonida o‘tirganlar orqali menga yetib kelyapti. Guruch qaynatib beryapti ekan, na tuzi bor, na yog‘i bor. Kartoshka qaynatib beryapti ekan, na tuzi bor, na yog‘i bor.
O‘g‘lim bilan har zamon telefonda gaplashib turibmiz. “Yaxshiman”, deydi. Lekin yig‘laydi. O‘tgan yakshanba kuni telefon qilib yig‘ladi. “Nega yig‘layapsan, qiynalyapsanmi?” desam, qo‘yib qo‘ydi telefonni.
Bolamning tishi to‘kilib ketgan. Buning sababini so‘rasam turma nazoratchilari o‘g‘lingni o‘zi tishini sug‘urib oldi dedi. Qanday qilib inson o‘zini tishlarini sug‘urib oladi?
Bolalarimiz Rossiyada “podstava” bilan tushyapti. Men iltimos qilar edimki, yoshlarimiz o‘zimizning yurtimizda g‘isht quyib bo‘lsa ham tirikchilik qilsin. Bormasin u yurtlarga, bizga o‘xshagan onalar ko‘paymasin. Qancha onalar farzand dog‘ida ado bo‘lyapmiz. Qamoqdagi ruhiy qiynoqdan keyin urushga ketishga ham rozi bilan o‘lib ketishyapti”, deydi farzandi qamalib qolgan onalardan yana biri.
Yolg‘iz onaman, ikki o‘g‘lim qamoqda…
“Yolg‘iz onaman. Bu dunyoda ikki o‘g‘limdan boshqa yaqinim yo‘q. Katta o‘g‘limni uylantirgan edim, o‘g‘lim qamalib qolganidan keyin kelin ham nevaramni olib ham ketib qoldi.
Ikki farzandim umri bino bo‘lib, sigaret, nos chekkan bolalar emas. Hayronman, qanday qilib 228-moddaga aralashib qoldi ular?! O‘g‘illarim telegram gruppasida Tomskdan kurerlik ishi bo‘yicha reklamani ko‘rib ish topishgan ekan. Mashinada ikki aka-uka kurerlik qila boshlashgan. “Bir narsani bir joydan olib borib berasan”, deb ularga lokatsiyasini tashlaganda, borishganida IIB xodimlari ushlashgan. Ular yetkazgan buyumlar ichida narkotik moddasi bo‘lgan ekan. Shunday qilib o‘zlari ham bilmagan holatda tuhmat bilan qamoqqa tushib qolishdi.
15 kunda ikki daqiqa ovozlarini eshitaman. O‘shanda ham, “Ona, tinchmisiz? Mabodo ozgina pul chiqara olasizmi, kartoshka, piyoz olib, ovqat qilib yesak, ichlarimiz shilinib ketyapti”, deydi. Bu yerda majburlikdan ko‘pchilik urushga ketib qolyapti, ona”, deydi. Endi bolalarim juda ko‘p qiyinchilik ko‘rgani uchun sabrli, chidamli. Ovozidan sezaman ular qanday qiyin holatdaligini, gapidan sezaman. Chunki ular ancha-muncha narsani meni avaylab aytishmaydi. Pul so‘raganidan bilaman ularning holatini. Yuvindi ovqat yeyishganidan pul jo‘natsam shu pulga o‘zlari ovqat tayyorlab yeyishar ekan.
Kichkina o‘g‘lim endi 20 yoshga kirdi. Kollejni tugatib, qo‘liga diplomini olib ishlagani ketgan edi.
Jabrdiyda onalar bir-birimizga dalda bo‘lib, telegramda guruh ochib olganmiz. Kunora “Farzandim urushga ketib qoldi”, deb dodlab yozishadi. “Farzandimning urushdan o‘ligi keldi”, deb yana biri dodlaydi.
Farzandlarining o‘lganini bilmagan onalar qancha? Son-sanog‘i yo‘q. Ikki o‘g‘limni qiynalib boqqanman-da, qiyinchilikda. Eng alam qilgani, ota mehrini ko‘rmagan ular. “Ona, biz ham yaxshi yashaymiz, odamlarga o‘xshab, endi xursand bo‘lib, kulib yuring, ona. Bo‘ldi, endi mazza qilib uyda o‘tiring, biz boqamiz”, degan paytda qamalib qoldi o‘g‘illarim. Ikki bolam soppa-sog‘ kirib kelsa, armonim yo‘q. Shu farzandlarimni ko‘zlarim ko‘rsin, deyman-da.
Qamalib qolgan yigitlarning hech kimga keragi bo‘lmasa. Qamoqda ruhiy bosim bo‘lganidan keyin jonidan to‘yyapti, majbur bo‘lyapti urushga ketishga. “Bu kunimdan ko‘ra borib bitta o‘q yeb o‘lganim yaxshi”, deb majburlikdan ketishyapti”, deydi ikki o‘g‘li qamalib qolgan onalardan yana biri.
Sarvar Ziyoyev,
Kun.uz
Operator va montajchi – Sardor Mamirov.
Joriy yil 24-aprel kuni Yaponiya immigratsiya xizmatlari agentligi Yaponiyada noqonuniy ravishda yashab turgan O‘zbekistonning ikki fuqarosini mamlakatdan chiqarib yubordi. Bu haqda Yaponiyaning O‘zbekistondagi elchixonasi xabar berdi.
Ma’lum bo‘lishicha, fuqarolardan biri Yaponiyaga «talaba» vizasi bilan kirgan, ammo keyinchalik o‘qishdan haydalganiga qaramay, mamlakatda noqonuniy ravishda qolib ketgan va vakolatli rasmiylar tomonidan hibsga olingan.
Ikkinchi fuqaro Yaponiyaga qisqa muddatli viza bilan kirib, ruxsat berilgan qolish muddati tugashiga qaramay mamlakatdan chiqib ketmagan.
Diplomatik vakolatxonaning eslatishicha,«turizm», «yaqinlarni ko‘rish», «biznes (konferensiya, madaniy almashinuv kabi)» maqsadidagi qisqa muddatli viza bilan Yaponiyada ishlash qat’iyan man etiladi. O‘zbekistonda qarz (kredit) olib bo‘lsa ham Yaponiyaga o‘qishga borgan, ammo yapon tilini o‘rgana olmay o‘qishdan chetlatilgan fuqaroning Yaponiyada yashash maqomi bekor qilinadi.
«Yaponiyaga «turizm» yoki «talaba» maqomidagi viza bilan kirib,«uzoq muddat qolish mumkin» yoki «ishlash mumkin» degan chaqiruvlar butunlay yolg‘on. Shu kabi yolg‘on maqsadlar bilan Yaponiyaga kirishga yo‘l qo‘yilmaydi.«Talaba» vizasi ishlash uchun emas, balki faqatgina mamlakatda o‘qish uchungina beriladi», – deyiladi elchixona xabarida.
Ta’kidlanishicha, Yaponiyada noqonuniy ravishda yashayotgan shaxslar aniqlansa, ular politsiya tomonidan hibsga olinadi va bunday shaxslarga nisbatan immigratsiya muassasasida ushlab turish yoki deportatsiya qilish kabi qat’iy choralar ko‘riladi.
«Bundan tashqari, Yaponiya hukumati shu kabi shaxslar haqida O‘zbekiston hukumatiga ma’lumotlarni berib borayotganligi sababli, O‘zbekistonga qaytgandan keyin ham ularga nisbatan tegishli choralar ko‘rilishi mumkin. Shu sababli,«Yaponiyada ishlash mumkin» deb da’vo qiluvchi vositachilarning va’dalariga osonlik bilan ishonib qolmang, ogoh bo‘ling!» – deb ogohlantiradi Yaponiyaning Toshkentdagi elchixonasi.
Mansabdorlar 14 800 metr quvurni qazib olib, o‘zlashtirish yo‘li bilan talon-toroj qilgan.
Toshkent viloyati, Piskent tumanida 14 km quvur suv ta’minoti korxonasi mansabdorlari tomonidan talon-toroj qilindi. Yetkazilgan zarar qariyb 4 milliard so‘m, deb xabar berdi Korrupsiyaga qarshi kurashish agentligi.
Qayd qilinishicha, “Toshkent viloyati suv ta’minoti” AJ Piskent tumani filiali rahbari B.K., “A.” AJ mansabdor shaxslari va boshqalar bilan oldindan jinoiy til biriktirgan holda, umumiy qiymati 3 mlrd 931,2 mln so‘mlik suv quvurlarining 3 mlrd 78,4 mln so‘mlik qismi, ya’ni jami 14 800 metrini qazib olib, o‘zlashtirish yo‘li bilan talon-toroj qilgan.
Qayd etilgan holatlar yuzasidan mansabdor shaxslarga nisbatan Iqtisodiy jinoyatlarga qarshi kurashish departamentining Toshkent viloyat boshqarmasi tomonidan jinoyat kodeksining 167-moddasi uchinchi qismi “a” bandi (Juda ko‘p miqdorda o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilgan. Aybdorlar BHM 300 baravaridan 600 baravarigacha miqdorda jarima yoki uch yilgacha axloq tuzatish ishlari yoxud besh yildan o‘n yilgacha ozodlikdan mahrum qilinishi mumkin.
Qashqadaryo media haftalik loyihasining to‘rtinchi nuqtasiga aylandi. Bu yerda haftalik davomida o‘tilgan har bir media darsi o‘zining kulminatsion yechimini topdi.
Treninglarda fikr, reja, tanqid va xulosa bir xil darajada «ishladi». Natijada xabarlar boshqacha tuzildi, kadrlar yangicha olindi, yondashuv esa tubdan o‘zgardi.
Vohalik soha vakillari va qiziquvchilari yangiliklar tezligini boshqarish, aynan shu tezlik orqali ishonchni qanday shakllantirish mumkinligini anglab yetdi. Axborotni yetkazish emas, balki ta’sir doirasini kengaytirish muhim ekani yanada aniqroq tushunildi.
Qashqadaryo media haftaligi o‘ziga xos jihatlari bilan voha media makoniga yangicha ruh olib kirdi. Jarayonlar davom etadi.
Navbat Samarqandga: 27-aprel – 1-may kunlari media haftalik yana bir hududda yangilanish jarayonlarini boshlab beradi.
O‘zbekistonda psixotrop moddalar savdosi tobora xavfli tus olmoqda. Qo‘lga tushayotganlar – asosan “kurer”lar, katta zanjir egalari esa soyada qolmoqda. Kun.uz 27 yoshli mahkum Bekzod Kerimov va farzandi bu illatga chalingan ota hikoyasi orqali muammoning ichkarisiga nazar tashlaydi.
Ichki ishlar vazirligi huzuridagi Jazoni ijro etish departamenti va Kun.uz taqdim etadi. Qamoq devorlari ortida singan taqdirlar, kechikkan pushaymon va “oson pul”ning asl bahosi haqida hikoya.
Bekzod Kerimov, 27 yoshda. Jazo muddatini o‘tamoqda.
«2009 yilda adam xuddi shu joyda o‘tib qoldi. Esimda bor, uyga tobuti yopilgan holda kelgan edi. Balki psixikam o‘sha paytda buzilgandir, shundan keyin yomon bolalar bilan ko‘chada yurganman, maktabgayam bormaganman deyarli. O‘shanda, 10 yoshimda mana shu tatuirovkalarni chizganman.
Oxiri mana shu yer bo‘ldi, shu yerga tushib odam ko‘p narsani qadriga yetadi. Birinchi navbatda ota-ona, uyidagilarning qadriga yetadi. Ko‘chada yurganimizda shu narsalarni tushunmasdik. Shu kamerada 6 oy o‘tirganman, to‘rt devorda kun bo‘yi o‘zingiz bilan o‘zingiz bo‘lasiz. Osonmas…
Menda hamma narsam – mashinam, uyim hammasi bor edi. To‘qchilikdan kirganman bu yo‘lga. 251-modda menga qo‘yilgan sanksiya, kuchli psixotrop moddalar. Bu narkotikmas – psixotrop».
Bekzod o‘zining 3 mingdan ortiq obunachisi bor yopiq telegram kanali orqali psixotrop moddalar savdosi bilan shug‘ullangan. Uning aytishicha, bu kabi kanallar o‘nlab bo‘lib, haligacha faol. So‘nggi 5 yilda musodara qilingan sintetik narkotiklar hajmi 80 baravarga oshgani qayd etilmoqda. Ammo bu – muammoning faqat ko‘rinayotgan qismi.
“Faqat kurer, “peshka”lar tushadi bu yerga”
“Mushukning ovqati bor – viskas. Masalan bir tonna mushukning ovqati kirayotgan bo‘lsa, ichida 2-3 kg psixotrop bo‘ladi. Ovqat bitta qadoqda 950 gramm bo‘ladi, poroshok turadi, keyin polietilen paket, falgaga o‘raladi. Bojxonada falgada ko‘rinmaydi. Keyin atrofiga mushukning ovqati solinadi. Bemalol o‘tadi bojxonada. Oldin Qirg‘izdan kirardi, hozir eng asosiy yetkazib beruvchi Xitoydan kirib keladi.
2019 yildan bunaqa moddalarni sotish rasman taqiqlandi. Keyin 2020 yilda birinchi bo‘lib psixotroplarni olib kirgan telegram kanal juda taniqli va haliyam ishlayapti. “Toshturma”ni o‘zida minimum 200-300 ta odam o‘tiribdi o‘sha kanaldan. Katta kanallar shunaqa, faqat kurer, “peshka”lar tushadi bu yerga. Kattalar Rossiyada, Shveytsariyada. Chunki kiberxavfsizlik urmaydi. Lokatsiya chiqmaydi. Ularni qanday ushlaydi – faqat kameradan, mashinadan kurerlarni qo‘lga olishadi. Bitta kurerni tutishadi, kamida 10 yil berishadi. Lekin bir soatda kanalga e’lon beriladi, kurer kerakligi haqida. Bo‘ldi, 1 soat o‘tib boshqa odam kanalni ishlatadi.
Ko‘chada yurganimda bagaj to‘la “narsalar” bilan yurardim. Qo‘rqmaganman, chunki pulim bor, istagan paytda vaziyatdan chiqib ketaman deb o‘ylardim. Yo‘q, qancha pulingiz bo‘lsayam bir kun kelarkan, baribir shu yerga tushasiz. Kuniga 400-500 ta tabletka ketardi. Kuniga shunaqa pul keladi, hech narsa qilmaysiz, kafeda o‘tirasiz, tog‘ga chiqasiz. Shu yerga tushib tushundim – bu harom pul. Kuniga 2 ming dollar qo‘limda ushlaganman, kuniga kelardi. Shunaqa ketardi, o‘zim tushunmasdim qayerga ketganini. Hozir ko‘chada oyiga bir million topishga roziman, chunki halol pul bo‘ladi. Shu narsani tushundim. Bu joylarni dushmanimgayam ravo ko‘rmayman.
Ota-onalarning qarg‘ishidan qo‘rqaman, pul odamni jinni qiladi. O‘sha paytda tushunmasdim, ko‘zlarim yopiq edi. Mana shu yerga kelib, kamerada o‘tirib o‘ylab, tushunyapman. Balki mening tabletkalarimni ichib kimdir o‘g‘rilik qilgan, kimdir birovning qiziga zo‘ravonlik qilgan. Hamma narsa bo‘lishi mumkin”.
Rasmiy ma’lumotlarga ko‘ra, har yili dunyoda taxminan 600 ming odam narkotik va psixotrop moddalar oqibatida hayotdan ko‘z yumadi. Eng xavflisi – iste’molchilar orasida voyaga yetmaganlar ulushi ortib bormoqda. Bu raqamlar ortida esa minglab oilalarning parchalangan taqdiri bor.
«Na orzusi bor, na kelajagini o‘ylaydi»
Farzandi shu illatga giriftor bo‘lgan ota hikoyasi:
“Boshida sezganday bo‘ldim, lekin o‘g‘limga ishonganim uchun ahamiyat bermabman.
Orada o‘qituvchilari ko‘p shikoyat qiladigan bo‘lib qoldi. O‘tib ketadi deb o‘yladim. Keyin asta-sekin o‘zgarganini o‘zimam sezdim. Juda passivlashib qoldi, doim jim yuradi, oilaviy suhbatlardan o‘zini opqochadi, bir gap so‘rasam yerga qarab ha-yo‘qdan boshqa narsani bilmaydi. Kuni bilan xonasidan chiqmaydi. Kechga yaqin palonchi o‘rtog‘imdan kitob olishim kerak, pistonchidan narsa olishim kerak desa ishonibman. Maktabdan ko‘p dars qoldiradigan bo‘lib qoldi, uxlab qolibman deydi so‘rasam. Bir kuni xonasiga tasodifan kirsam shu o‘zim eshitgan tabletkani ko‘rdim.
Butun umrim ko‘z oldimdan o‘tdi. Bitta bolani 15 yoshga kirgizish osonmas. Shu bolangiz ko‘z oldingizda hayoti tugab botqoqqa botib borayotganini ko‘rish bu dahshat. Dushmanimgayam ravo ko‘rmayman buni. O‘rtog‘imniki qolib ketgan dedi. Ishonmadim, poylab kuzatishni boshladim. Orqasidan borsam «dom»ning pod’yezdiga borib, hamma yoqni ko‘zdan kechirdi. Keyin o‘sha yerdagi «ogorod»ni kavlashni boshladi. Onasi bilan ne umidda katta qilgan bolamiz o‘zini bilmagan holda tuproq kavlayotganini ko‘rish juda og‘ir edi. Oyog‘idan o‘t chaqnaydigan bolamning ko‘z oldimda so‘lishiga guvoh bo‘lyapman. Na bir orzusi bor, na kelajagini o‘ylaydi.
Bu narsaning orqasidan non yeydiganlar ko‘payib ketdi. Shu narsani olib kirayotganlar, tarqatayotganlar kimligini xalq bilsin. O‘g‘limning aytishicha, tarqatadiganlarning ko‘pchiligi yosh yigitlar, orasida ayollar ham bor ekan. Qorniga narsa bog‘lab, kolyaskaga qo‘g‘irchoq qo‘yib shahar aylanib tarqatib yurisharkan».
Bekzod hikoyasi: «Onamga nimadir bo‘lsa men o‘zimni kechira olmayman»
«Mana shu yerga kelib tushundim ko‘p narsani. Uydan xat kelganda, sud jarayonida uydagilarimni ko‘rganimda hamma yig‘ladi, menam yig‘ladim. Bu yerda har qanday erkak yig‘laydi. Ko‘chada men zo‘rman deganlar ham o‘tirib yig‘laydi bu yerda. Qanchasini ko‘rganman. Aynan shu joyda erkak kishi chin dildan yig‘laydi. Bu yerdaligida onasi vafot etganlar bor. Onamning yoshi katta, qon bosimi kasalligi bor. Agar unga nimadir bo‘lsa men o‘zimni kechira olmayman. U uchun chidayapman hammasiga. Hozir aytib beryapman, badanimga chumoli o‘rmalaganday bo‘ldi. 2 yildan beri qamoqdaman. Balki uylanardim, balki bola-chaqam bo‘lardi shu paytgacha…»
Samarqand shahrida yashovchi, 1993-yilda tug‘ilgan shaxs yer uchastkasini noqonuniy sotishga urinishda qo‘lga olindi. Bu haqda Davlat xavfsizlik xizmati xabar berdi.
Ma’lum qilinishicha, u Samarqand tumanida istiqomat qiluvchi, 1983-yilda tug‘ilgan fuqaro bilan til biriktirgan. Ular mazkur fuqaroning turmush o‘rtog‘iga issiqxona tashkil qilish uchun ajratilgan 2 gektar yer maydonini sotishni rejalashtirgan.
Shaxs xaridorga ushbu yerni 490 ming AQSh dollariga sotishini, shuningdek mansabdor tanishlari orqali hujjatlarni rasmiylashtirib berishini aytib, oldindan 50 ming dollar talab qilgan.
Davlat xavfsizlik xizmati, Iqtisodiy jinoyatlarga qarshi kurashish departamenti va ichki ishlar organlari hamkorligida tezkor tadbir o‘tkazildi. Unda 1993-yilda tug‘ilgan shaxs 50 ming AQSh dollarini olgan vaqtida ashyoviy dalillar bilan ushlandi.
Hozirda mazkur ikki fuqaroga nisbatan jinoyat ishi qo‘zg‘atilgan bo‘lib, tergov harakatlari olib borilmoqda.
Ta’kidlanishicha, yer uchastkalarini ajratish va sotish faqat qonun doirasida amalga oshirilishi kerak. Xususan, barcha jarayonlar faqat «E-AUKSION» elektron savdo platformasi orqali shaffof va rasmiy tarzda o‘tkaziladi.
O‘zbekiston bokschilari Jahon kubogi ilk bosqichida 3 ta medalni qo‘lga kiritdi
Raqobat qo‘mitasi tezkor «arbitraj» tizimini yaratishni taklif qilmoqda
Yaponiyada «turizm» yoki «talaba» vizasi bilan ishlash man etiladi – elchixona
-
Siyosat5 days agoPrezident Mirziyoyev mintaqaviy sammitda yashil savdo yoʻlaklari va yagona iqlim investitsiya strategiyasini taklif qildi
-
Jamiyat5 days ago
Giyohvand moddalar aylanmasini nazorat qilishning milliy tizimi takomillashtiriladi
-
Iqtisodiyot4 days ago“QQSni oson qaytarib olish ta’minlanmasa, stavkani 6 foizga tushirishni taklif qilamiz” – Davron Vahobov
-
Iqtisodiyot4 days ago
Markaziy bank: 24-aprelda dollar pasayadi
-
Dunyodan4 days ago
Buyuk Britaniyada “chekmaydigan avlod” dunyoga keldi
-
Iqtisodiyot4 days agoQirg‘iziston ilk marta Yevropa Ittifoqining sanksiyalarni chetlab o‘tishga qarshi kurashish mexanizmiga tushdi
-
Dunyodan4 days ago
Eron oliy rahbari yuzi va oyog‘idan jiddiy jarohat oldi
-
Dunyodan4 days agoFiribgarlar Hormuzdan yetkazib berishni va’da qilayotganga o’xshaydi