Pley-offning dastlabki juftligi aniq bo‘ldi; Janubiy Koreya va Qatar yutqazib qo‘yishi vaziyatni O‘zbekiston uchun yanada yomonlashtirib yubordi. Endi Kannavaro shogirdlari uchinchi o‘rin vakillari reytingida sakkizlikka kirishi uchun kongoliklarni faqat yirik hisobda yengishi talab etiladi.

Jahon chempionatida guruh bosqichi yakuniga yetmoqda, uchinchi turning dastlabki kuni ham voqealarga boy bo‘ldi. 24 iyundan 25 iyunga o‘tar kechasi 6 ta uchrashuv o‘tkazildi hamda A, B va C kvartetlarida jamoalarning yakuniy o‘rinlari ma’lum bo‘lli. Meksika milliy jamoasi Chexiyani yirik hisobda taslim etdi (3:0), JAR Janubiy Koreya ustidan sensatsion g‘alabaga erishdi (1:0), Marokash Haiti bilan o‘yinda kambek amalga oshirdi (4:2), Braziliya Shotlandiyaga hech qanday imkon qoldirmadi (3:0), Shveytsariya Kanadadan ustun keldi (2:1), Bosniya va Hersegovina esa Qatarni uyiga jo‘natdi (3:1).

Maydon tashqarisida ham qiziqarli voqealar bo‘lib o‘tdi: Janni Infantino suv ichib olish uchun qilinayotgan tanaffus FIFAga pul keltirmasligini ma’lum qildi, ganalik shaman esa Harri Keyndan tavqi la’natni «olib tashladi».

A guruhi

Meksika Ochoaga ham imkon berdi

Chexiya – Meksika 0:3

Gollar: Chaves, 55 (0:1). Kiniones, 61 (0:2). Fidalgo, 90+4 (0:3)

Chexiya: Kovarj, Granach, Kreychi, Xolesh (Souchek, 64, Xori, 87), Cherv (Soyka, 87), Sadilek, Dudera, Tsoufal, Shuls, Vishinski (Provod, 56), Glojyek (Shik, 64)

Meksika: Ranhel (Ochoa, 78), Montes, Reyyes, Chaves (Galyardo, 78), Sanches, Alvares, Romo (Vargas, 63), Mora (Fidalgo, 72), Kiniones, Alvarado, Martines (Ximenes, 63)

Ogohlantirishlar: Alvares, 64

1/16 finalga chiqish uchun Chexiyadan haddan tashqari qiyin vazifani uddalash talab etilardi – jahon chempionatidagi eng ishonchli himoya chizig‘ini yorib o‘tish. A guruhida dastlabki ikki turda JAR (2:0) va Janubiy Koreya (1:0) meksikaliklar darvozasiga gol urolmagandi. Bu ish yevropaliklarga ham nasib etmadi.

Birinchi bo‘lim teng kurashlar ostida kechdi, jamoalar chinakamiga xavfli vaziyatlar yarata olishmadi. Ammo tanaffusdan keyin turnir mezbonlaridan biri o‘yinni kuchaytirishdi va raqib darvozasini uch bor ishg‘ol etishdi: Mateo Chaves, Hulian Kinones va Alvaro Fidalgo o‘z nomlariga bittadan gol yozdirib qo‘yishdi.

O‘yin yakunlanishi arafasida meksikalik muxlislar uchun yana bir quvonchli voqea ro‘y berdi: bu chempionatda ilk bor jamoaning afsonaviy darvozaboni Gilermo Ochoa maydonga tushib keldi. 40 yoshli posbon uchun bu faoliyatidagi oltinchi mundial bo‘ldi. U o‘zi munosib bo‘lgan olqishlarga va qariyb 20 daqiqaga ega bo‘ldi.

Chexlar esa ikkinchi bo‘lim davomida ham aytarli vaziyat yarata olmadi. Miroslav Koubek shogirdlari guruhda so‘nggi o‘rinni egallab, turnirni tark etadigan bo‘ldi.

JAR ikkinchi o‘rin bilan pley-offga chiqdi

JAR – Janubiy Koreya 1:0

Gol: Maseko, 63 (1:0)

JAR: Uilyams, Mbokazi, Okon, Modiba, Mudau, Mbata, Sitole, Mofokeng (Adams, 80), Appollis (Moremi, 62), Maseko (Rayners, 75), Makgopa

Janubiy Koreya: Kim Sin Gu, Kim Min Je (Pak Jin Seob, 66), Li Gi Hek, Li Xan Bem, Xvang In Bom, Pek Sin Ho (Kastrop, 46), Li Te Sok (Kim Jin Kyu, 46), Sol Yen U, Hvang Hi Chhang (Son Heung Min, 46), Li Kan In, Hon Gu O (Guye Son Cho, 74)

Ogohlantirishlar: Modiba, 73 – Guye Son Cho, 79

Ikkinchi turda Chexiya bilan durangga erishgan (1:1) janubiy afrikaliklar pley-off yo‘llanmasini kafolatlash imkoniyatidan foydalanishga qaror qilishdi. Ikkinchi o‘rinni egallash uchun jamoadan ikkinchi o‘rin uchun asosiy da’vogar bo‘lgan Janubiy Koreyani mag‘lub etish talab etilardi.

Osiyoliklar jamoasi o‘yinning boshlang‘ich qismini ustunlikda o‘tkazdi, ammo asta-sekin tashabbus JAR qo‘liga o‘ta boshladi. Ugo Bros shogirdlari o‘yinni kuchaytirib borishdi va maydonning ikkinchi qismida ko‘proq ishlab, tez-tez zarbalar bera boshladi. Va ikkinchi bo‘limda o‘zi haqli bo‘lgan golni urishga erishdi: hujumchi Tapelo Maseko o‘z nomini tabloga yozdirib qo‘ydi. Shundan keyin afrikaliklar to‘pni raqibga topshirdi va so‘nggi daqiqalargacha himoyada ishonchli harakat qilishdi.

Minimal g‘alaba va guruhdagi ikkinchi o‘rin jamoani tarixda ilk bor pley-offga olib chiqdi – endi ularni Kanadaga qarshi o‘yin kutmoqda. Sensatsion ravishda yutqazib qo‘ygan janubiy koreyaliklar esa uchinchi o‘ringa tushib ketdi va guruh bosqichi yakunlanishini kutish rejimiga o‘tdi.

Shu bilan birga, osiyoliklarning bu mag‘lubiyati qit’aning boshqa bir vakili – O‘zbekiston uchun qimmatga tushdi. Agar koreyslar o‘z o‘yinida g‘alaba qozonganida JAR 1 ochko bilan uchinchi o‘rinda qolgan bo‘lar va O‘zbekistonga guruhdan chiqish uchun raqobatchi bo‘la olmasdi. Koreya esa endi to‘plar nisbati nisbatan yaxshiligi (-1) hisobiga katta ehtimol bilan uchinchi o‘rin vakillari orasidagi sakkizlikka kira oladi. To‘plar nisbati juda yomon bo‘lgan (-7) O‘zbekiston endi bu sakkizlikka kirishi uchun Kongo DR ustidan juda yirik hisobda g‘alaba qozonishi talab etiladi.

B guruhi

Kelishilgan durang bo‘lmadi

Shveytsariya – Kanada 2:1

Gollar: Vargas, 46 (1:0). Manzambi, 57 (2:0). P. Devid, 76 (2:1)

Shveytsariya: Kobel, Elvedi, Akanji, Rodriges, Hakes (Vidmer, 74), Froyler, Jaka, Manzambi (Fassnaht, 85), Vargas (Ndoy, 80), Sou (Ebisher, 74), Embolo (Itten, 85)

Kanada: Krepo, De Fujyerol, Kornelius, Lareya (Shaffelberg, 83), Jonston, Shuaner (Eushtakiu, 58), Saliba, Ahmad (Millar, 58), Byukenen (P. Devid, 74), Larin (Oluvaseyi, 58), J. Devid

Ogohlantirishlar: Jaka, 32 – Larin, 32. Millar, 87

Kanada ham, Shveytsariya ham ikkinchi turdan keyin 4 tadan ochko jamg‘arib, amalda pley-off masalasini hal qilgandi. So‘nggi turda o‘zaro kechadigan o‘yinda jamoalarni durang ham qoniqtirardi – shunda Bosniya va Hersegovina – Qatar o‘yini natijasidan qat’i nazar birinchi va ikkinchi o‘rinlar saqlab qolingan bo‘lardi.

O‘yinning birinchi bo‘limi davomida amalda ham jamoalar durangga qarshi emasdek ko‘rindi. Ammo ikkinchi bo‘lim boshlanishi bilan shveysarlarning yosh yulduzi Joan Manzambi Ruben Vargasni golli pas bilan ta’minladi va hisob ochildi. Ko‘p o‘tmay jahon chempionati kashfiyotlaridan biri bo‘layotgan yosh vunderkindning o‘zi hisobdagi ustunlikni mustahkamladi.

Ammo turnir mezbonlari shunchaki taslim bo‘lishni istashmadi va zaxiradan o‘yinga qo‘shilgan Devid Promis bitta javob golini urdi. O‘yin oxirigacha hisobni tenglashtirish uchun kanadaliklarda yana bir necha imkoniyat bo‘ldi, ammo o‘yin baribir Shveytsariyaning g‘alabasi bilan yakunlandi (2:1). Shu bilan birga, mag‘lubiyat ham Jyessi Marsh shogirdlarini ikkinchi o‘rindan pastga tushirib yubormadi – bosniyaliklar Kanadadan o‘tib ketishi uchun parallel o‘yinda o‘ta yirik hisobda g‘alaba qozonishi talab etilardi.

Qatar ojizlik qildi

Bosniya va Hersegovina – Qatar 3:1

Gollar: Alaybegovich, 29 (1:0). Abunada, 34 – avtogol (2:0). Al-Haydos, 42 (2:1). Maxmich, 80 (3:1)

Bosniya va Hersegovina: Vasil, Katich (Hajikadunich, 63), Radelich, Kolashinats, Malich (Tahirovich, 46), Bashich, Shunich (Memich, 46), Alaybegovich (Burnich, 82), Bayraktarevich, Demirovich, Jyeko (Maxmich, 63)

Qatar: Abunada, Layye, Huhi, Al-Brake, Pedru Migel, Fati (Al-Mannai, 79), Budiaf (Almuoz Ali, 72), Abdulsalom (Hatim, 46), Al-Haydos (Al-Ganehi, 55), Edmilson Junior (Al-Ayeldin, 79), Afif

Ogohlantirishlar: Maxmich, 82 – Fati, 78

Qatarliklar o‘tgan turda Kanadadan o‘ta yirik hisobda yutqazganiga qaramay (0:6), hamon uchinchi o‘rin orqali pley-offga chiqish imkoniyatini saqlab turgandi. Buning uchun Bosniya va Hersegovinani imkon qadar yirik hisobda mag‘lub etish talab etilardi.

Ammo 18 yoshli Karim Alaybegovich 29-daqiqada qatarliklarning umidlarini so‘ndirdi. U jahon chempionatida gol urgan eng yosh futbolchilar o‘nligiga kirib, Lamin Yamal va Lionel Messini ortda qoldirdi.

Ko‘po‘ o‘tmay Qatar o‘z futbolchisidan ham gol o‘tkazib yubordi: Sulton Al-Brake avtogol muallifiga aylandi. Shundan keyin barcha yevropaliklar hisobni yiriklashtirishiga tayyorlana boshladi (bosniyaliklarga ikkinchi o‘ringa chiqish uchun yana 7 ta gol kerak bo‘lardi), lekin bo‘lim oxirlarida Hasan Al-Haydos hisobni qisqartirdi.

Qatarliklarda bundan ortig‘iga kuch topilmadi. O‘yin oxirida Ermin Maxmich yana bir gol urdi va yakuniy hisobni o‘rnatdi – 3:1.

Qatar kutilganidek guruhda to‘rtinchi o‘rinni egalladi, ammo shu kuni arablarda ham o‘z qit’adoshlari – O‘zbekistonga yordam berish imkoniyati bor edi. Agar bu o‘yinda durang natija qayd etilganida Bosniya va Hersegovina ikki ochko bilan qolar va pley-off uchun kurashdan chiqqan bo‘lardi. Ammo endi to‘rt ochkoga ega bo‘lgan bu jamoa katta ehtimol bilan uchinchi o‘rinlar orasidagi sakkizlikning eng yuqorisida bo‘ladi.

C guruhi

Haiti marokashliklarga muammo tug‘dirdi

Marokash – Haiti 4:2

Gollar: Bunu, 10 – avtogol (0:1). Hakimi, 39 (1:1). Izidor, 43 (1:2). Saybari, 45+1 (2:2). Rahimi, 78 (3:2). Yosin, 89 (4:2)

Marokash: Bunu, Riyoz, Halhal, Salohiddin (Mazraviy, 83), Hakimi, Amrabat, Al-Aynaviy (Al Murabet, 83), Saybari (Unai, 70), Al-Hannus, Dias (Rahimiy, 70), Al-Kaabi (Yosin, 70)

Haiti: Plasid, Ade, Delkrua, Eksperens, Dyuvern (Arkus, 80), Bellegard, Denli (Simon, 80), Providens (Didson, 67), Kazimir, Jozef (Perro, 83), Izidor (Nazon, 67)

Ogohlantirishlar: Plasid, 79. Nazon, 79. Kazimir, 90

C guruhida Marokash va Haiti o‘rtasidagi kechgan o‘yinda esa amalda intriga yo‘q edi. KONKAKAF vakillari dastlabki turlarda yutqazib, pley-offga chiqishdan umid uzgandi, birinchi turda Braziliyadan ochko tortib olgan (1:1) va keyin Shotlandiyani minimal hisobda mag‘lub etgan (1:0) afrikaliklar esa o‘zini juda qulay his qilayotgandi. Bunday o‘yinda futbolchilar muxlislar uchun o‘ynashdi va gollar shousini uyushtirishdi.

Va barchasi Haiti kutilmaganda tezkor gol urishi bilan boshlandi: 10-daqiqadayoq Lenni Jozef qanotdan oshirilgan to‘pga tovoni bilan zarba berdi, to‘p darvozabonga tekkan holda yo‘nalishini o‘zgartirib, to‘rga borib tushdi. Afrikaliklar javob qaytarish uchun oldinga tashlanishdi va bir qancha supervaziyatlar yaratishdi va faqat 39-daqiqaga kelib Ashraf Hakimining sa’y-harakatlari bilan hisobni tenglashtirishdi. Ammo haitiliklar darhol javob qaytarishdi – «Sanderlend» hujumchisi Vilson Izidor to‘qqizlik tomon kuchli zarba yo‘lladi.

Birinchi bo‘limga qo‘shib berilgan daqiqalarda esa Ismoil Saybari yana muvozanatni tikladi (u qatorasiga uch o‘yinda gol urmoqda) va jamoalar tanaffusga 2:2 hisobida yo‘l olishdi.

Ikkinchi bo‘limda o‘yin sur’ati pasaydi. Haitiliklar durang hisobni saqlash va jahon chempionatidagi ilk ochkosini qo‘lga kiritishga harakat qilishdi, ammo buni uddalay olishmadi. O‘yin oxirida marokashliklar zaxirani ishga solib, Sufyon Rahimiy hamda Jasim Yosinning gollari evaziga ishonchli g‘alabaga erishdi – 4:2.

Vinisius Messini ta’qib qilmoqda

Shotlandiya – Braziliya 0:3

Gollar: Vinisius Junior, 7 (0:1). Vinisius Junior, 45+3 (0:2). Kunya, 60 (0:3)

Shotlandiya: Gann, Hendri, Makkenna, Roberson (Tirni, 46), Patterson (Ralston, 81), Fergyuson, Maklin, Maktominay, Makginn (Kertis, 90+1), Douk (Kristi, 81), Shenklend (Adams, 90+1)

Braziliya: Alisson, Gabriel Magalyayns, Markinios, Duglas Santos (Aleks Sandru, 82), Danilu Luis, Kazemiro (Fabinio, 66), Lukas Paketa (Martinelli, 66), Gimarayns, Vinisius Junior, Rayan (Endrik, 82), Kunya (Neymar, 76)

Ogohlantirishlar: Kristi, 89 – Danilu Luis, 62. Fabinio, 82

Parallel bahsda Braziliya guruhda birinchi o‘rinni egallashni maqsad qilgan holda harakat qildi. Shotlandlarning bu o‘yin uchun taktikasi tushunarli edi: ularni kichik hisobdagi mag‘lubiyat ham qoniqtirardi va jamoa ilk daqiqalardan chuqur himoyalanishdi. Ammo bu reja yettinchi daqiqadayoq buzilib ketdi: yevropaliklar qisqa to‘p uzatishlar bilan himoyadan chiqishda xatoga yo‘l qo‘yishdi, pentakampeonlar muvaffaqiyatli pressing uyushtirishdi va Vinisius Junior hisobni ochdi.

Birinchi bo‘lim oxirlarida Braziliyaning bosimi yana natija keltirdi: Brunu Gimarayns «Real» vingeriga havodan to‘p oshirdi – u esa to‘pni o‘ziga bo‘ysundirib, dublni rasmiylashtirdi. Qatorasiga uchinchi o‘yinda gol urayotgan Vini endi to‘purarlar poygasida 4 gol bilan Messini (5) ta’qib etuvchilar guruhiga qo‘shildi (Holand va Mbappeda ham hozircha 4 tadan gol bor). 60-daqiqada esa Mateus Kunya ham o‘z hisobiga gol yozib qo‘yib, janubiy amerikaliklarning yirik hisobdagi g‘alabasini ta’minladi – 3:0.

Shundan keyin jamoalar sur’atni pasaytirishdi va o‘yinning asosiy voqeasi ro‘y berdi: jarohatidan tuzalgan Neymar maydonga olqishlar ostida tushib keldi. Braziliya tarixidagi eng yaxshi to‘purar milliy jamoada 2023 yildan buyon o‘ynamayotgandi, Karlo Anchelotti esa unga imkoniyat berdi.

Futbolchi murabbiyning ishonchini oqladi va o‘ziga berilgan daqiqalarda yo‘qolib qolmadi: sheriklariga vaziyatlar yaratdi va o‘zi ham bir bor zarba berdi. Unda hali gol urish uchun ham imkoniyat bo‘lishi mumkin – jamoa guruhda birinchi o‘rinni olib, pley-offga chiqdi.

FIFA o‘yin vaqtidagi pauzalar orqali pul ishlamayapti

Jahon chempionatida bo‘limlar o‘rtasida yuzaga kelayotgan va uch daqiqa davom etayotgan tanaffuslar muxlislarda ham, murabbiylarda ham norozilik uyg‘otmoqda.

Ko‘pchilik bu qoidada «FIFAning qo‘li borligi»ni, reklama slotlari ko‘payishi evaziga tashkilot ko‘proq pul ishlayotganini taxmin qilgandi. Ammo Janni Infantino bunday ayblovni rad etib chiqdi.

«FIFAda qo‘shimcha daromad yo‘q, chunki barcha tijorat shartnomalari oldindan imzolangan. Biz uchun bu moliyaviy masala emas, balki sof sport masalasi», – deya FIFA rahbarining so‘zlarini keltiradi tashkilot sayti.

Keyndan tavqi la’nat «olib tashlandi»

Ganadan bo‘lgan shaman Nana Kvaku Bonsam o‘z jamoasining Angliya bilan o‘yinidan oldin raqiblar hujumchisi Harri Keynni la’natlaganini aytib chiqqandi. Natijada ushbu futbolchi yaqqol golli vaziyatdan foydalana olmadi va o‘yin durang hisobda yakunlandi (0:0) va ko‘pchilik ushbu shamanning so‘zlariga ishonib qoldi.

O‘yindan keyin esa ushbu sehrgar futbolchiga gol urishda davom etishi mumkinligini bildirdi. «Men dunyodagi eng qudratli shamanman. Endi Angliyaning keyingi o‘yinlarida gol ura olishi uchun Keynni ozod etaman. Mendan xafa bo‘lmasin», – deya Bonsamning so‘zlarini keltirgan Daily Star.

Bellinghem nega chetlatilmadi?

Aynan Gana bilan bo‘lib o‘tgan o‘sha o‘yin (0:0) ortidan Jud Bellinghem mojaroli holat markazida qoldi. U o‘yinning 38-daqiqasida ganaliklar hujumchisi Jordan Ayyu bilan gaplashayotganida og‘zini qo‘li bilan bekitib olgandi, yangi qoidalarga ko‘ra esa bu harakat qizil kartochka bilan jazolanishi kerak.

Turnir davomida xuddi shunday holat uchun Paragvay hujumchisi Migel Almiron maydondan chetlatilgandi. Judning vaziyati esa hakamlar e’tiboridan chetda qoldi.

Paragvay futbol federatsiyasidagilar norozilik bildirib chiqdi.

«Qoida barcha jamoalarga bir xil qo‘llanilishi kerak, aks holda u o‘z obro‘sini yo‘qotadi», – deya tashkilotdagi manbaning so‘zlarini keltiradi AS nashri.

Navbatdagi o‘yinlar

Uchinchi tur avjiga chiqmoqda. 25 iyun kuni kechqurun va 26 iyunga o‘tar kechasi yana oltita o‘yin bo‘lib o‘tadi:

01.00 Kyurasao – Kot-d’Ivuar

01.00 Ekvador – Germaniya

04.00 Tunis – Niderlandiya

04.00 Yaponiya – Shvetsiya

07.00 Paragvay – Avstraliya

07.00 Turkiya – AQSh

Source link

Futbol gohida faqatgina g‘alabalari bilan emas, mag‘lubiyatsi bilan ham tarix yaratadi. 2026 yilgi Jahon chempionatida O‘zbekiston milliy terma jamoasining ishtirok etishi ana shunday unutilmas voqealardan biri bo‘ldi. Ha, hisoblar ko‘ngildagidek bo‘lmayapti. Ammo, yigitlarimiz mamlakat futbolini yangi bosqichga olib chiqqan, millionlab yurtdoshlarga g‘urur va ishonch bag‘ishlagan avlod sifatida tarix sahifalariga muhrlandi.

***

Futbol bir qarashda oddiy to‘p o‘yinidek ko‘rinadi. Bolaligidan bu to‘p ishqiga tushganlar qancha? Sanab bo‘lmaydi. Chunki, bu futbol maydonidagi 22 nafar o‘yinchidan ancha katta tushuncha. U millionlab yuraklarni bir vaqtning o‘zida quvontiradi, yig‘latadi, umid bag‘ishlaydi hamda sinovdan o‘tkazadi. Ba’zan bir g‘alaba butun mamlakatni quvonchga to‘ldirsa, ba’zan bir mag‘lubiyat millionlab yuraklarni ezib qo‘yadi.

2026 yil. O‘zbekiston futboli tarixida zarhal harflar bilan yoziladigan yil bo‘ldi. Jahon chempionatida O‘zbekiston milliy terma jamoasining ishtirok etayotgani, aytish joizki, o‘z-o‘zidan ulkan tarixiy yutuq. Mustaqillikdan keyingi 34 yil davomida orzu qilingan, necha avlod futbolchilari intilib yetolmagan marra zabt etildi. Shuning o‘ziyoq g‘alaba bo‘ldi, shuning o‘ziyoq millionlab o‘zbekistonliklar uchun bayram bo‘ldi. Shu darajaga yetib kelguncha, qancha mehnat, qancha mashaqqat, qancha umid va qancha ko‘z yoshi to‘kilganini faqat shu yo‘ldan o‘tganlar biladi. Shuning uchun ham AQSh stadionlarida “O‘zbekiston!” degan chaqiriqlar yangrashi, bayrog‘imizning dunyo arenasida hilpirashi har bir vatandosh uchun ulkan baxt bo‘ldi.

O‘zbekistonlik futbolchilar bu yo‘lda oson yurishmaganini hammamiz his qilib turibmiz. Saralash bahslarida ular bor kuchini, bor mahoratini ishga solishdi. Har bir o‘yinda yurt sha’ni uchun kurashishdi. Natijada dunyo futbolining eng nufuzli musobaqasi eshiklari O‘zbekiston uchun ochildi.

Birinchi uchrashuvda raqib Kolumbiya edi. Jahon futbolida o‘z o‘rniga ega kuchli jamoa. Shunda ham o‘zbekistonlik futbolchilar maydonga qo‘rqmay otilishdi. Kurashishdi. Harakat qilishdi. Ter to‘kishdi. Uchrashuv 3:1 hisobida raqib foydasiga hal bo‘ldi. Mag‘lubiyat og‘ir kechgani bor gap.  Ammo, aynan, shu o‘yinda – shu o‘yin tribunalarida butun dunyo futbolning eng go‘zal jihatlaridan biri insonparvarlik va do‘stlikka ham guvoh bo‘ldi.

O‘yindan keyin Isfandiyor ismli o‘zbekistonlik kichik muxlisning ko‘z yoshlari millionlab odamlarning yuragini larzaga soldi. Eslasangiz, shu onda kolumbiyalik muxlislar unga tasalli berishdi, bag‘riga bosishdi. “O‘zbekiston! O‘zbekiston” degan hayqiriqlar bilan butun stadionni to‘ldirishdi. Bu lahzada futbol natijalardan ham ustun tura olishini ko‘rsatdi. Turli tillar, turli millatlar, turli qit’alardan kelgan insonlarni birlashtira olgan ana shu manzara futbolning haqiqiy qudratini o‘zida aks ettira oldi.

Keyingi sinov yanada og‘irroq kechdi. O‘zbekiston terma jamoasi Krishtianu Ronaldu boshchiligidagi Portugaliyaga qarshi maydonga tushdi. AQShning Xyuston shahridagi stadionda bo‘lib o‘tgan bahs 5:0 bilan yakunlandi.

Ha, raqamlarga qaralsa,  bu yirik mag‘lubiyat. Biroq, futbolni tushunadiganlar yaxshi biladi: gohida hisob tablosi ham hamma haqiqatni aks ettiravermaydi.

O‘zbekistonlik futbolchilar oxirgi daqiqalargacha kurashdi. Hujum qildi. Imkoniyatlar yaratdi. Azizning darvoza to‘riga yo‘llagan zarbasi raqib futbolchisiga nisbatan ishlatgan kichik qoidabuzarligimiz sababli hisobga olinmadi. Lekin, shu vaziyatning o‘zi ham O‘zbekiston futbolchilari dunyoning eng kuchli jamoalari darvozasiga yo‘l topishi mumkinligini ko‘rsatdi.

Uchrashuvdan keyin jamoa sardori Eldor Shomurodov muxlislardan uzr so‘rab chiqdi. Bu so‘zlarni mag‘lubiyatni tan olish, deb qabul qilmaylik, aslida, bu so‘zlar mamlakat oldidagi mas’uliyatni his qilish namunasi bo‘ldi. Maydonda ham, maydon tashqarisida ham yigitlar mardona turishdi. Yengilishdi, taslim bo‘lishmadi.

To‘g‘ri, Portugaliyaga qarshi o‘yindan keyin butun mamlakat bir lahza sukutga cho‘mgandek bo‘ldi. Ayrim ashaddiy muxlislar ijtimoiy tarmoqlarda keskin fikrlarni yozdi. Ehtiroslar toshdi. Mayli, buniyam yillar davomida yig‘ilgan orzularning og‘riqli aks-sadosi sifatida qabul qilaylik. Axir, futbol o‘zi shunday o‘yin emasmi? U oxirgi hushtakkacha yashaydi.

Nima bo‘lgandayam, to‘g‘ri yo‘lni tanlaylik: haqiqiy muxlislikni g‘azab bilan emas, jamoa yiqilgan kuni uning yonida turish bilan ko‘rsataylik. Faqat g‘alabalardaginamas, mag‘lubiyatda ham bir-birimizni qo‘llab-quvvatlashni o‘rganaylik.

Men ayol jurnalist sifatida, yashirmayman, shu maqolaniyam yig‘lab yozyapman, rosti. Bu hali-hanuz… 12 yoshimdan 54 yoshimga qadar futbol to‘piga ishqibozligimdan emas, Vatanimni sevganimdandir balki… deya, o‘zimni ovutaman. Haligacha qishloqqa borsam, qishloq bolalari bilan keng dala maydonida to‘p tepaman: akamlar xuddi yosh bolaga aytgandek, “bo‘ldi, to‘p tepishni bas qil, kir uyga!” deb ogohlantirishlariga qaramay, futbolni tushunsam-tushunmasam, to‘p tepaveraman, yuguraveraman, hujumga otilaveraman,  himoyaga talpinaveraman… O‘zimiz urgan gollarni ham, darvozamizga yo‘naltirilgan gollarni ham kulgi va “qiy-chuv” bilan qarshilaymiz… Televizor ortidagi chinakam bahslarni tomosha qilish esa boshqa-boshqa narsa. Futbol – bu kecha mening yuragimning hamiyatiga aylandi: yigitlarimiz juda kuchli o‘ynashdi, juda zo‘r o‘yin ko‘rsatishdi….

Bugun O‘zbekiston terma jamoasi g‘alaba qozonmagan bo‘lishi mumkin. Ammo, ular tarix yozishdi. Ular avval hech qaysi o‘zbek futbolchisi yetmagan sahnaga chiqishdi. Ular dunyoning eng kuchli jamoalariga qarshi mamlakat sharafini himoya qilishdi. Ular millionlab bolalarga orzu qilish mumkinligini isbotlashdi. Ehtimol, bu Jahon chempionati O‘zbekiston uchun kubok bilan tugamas. Ammo, u tajriba, ishonch va kelajakni bera oldi.

Aytish joizki, eng katta g‘alabalar ham bir vaqtlar mag‘lubiyatlar bag‘rida tug‘ilgan. Bugungi og‘riq ertangi zafarlarning poydevori ham bo‘lishi mumkin. Shuning uchun ham bu yigitlarimizga tanqiddan ko‘ra, ko‘proq dalda kerak. Shuni unutmaylikki, ular faqatgina futbol o‘ygashmayapti, ular butun mamlakatning yangi futbol tarixi sahifalarini yozishyapti.

Bir lahza O‘zbekiston futbolining bugungi har bir yutug‘i ham oson kechmaganini ko‘z oldimizdan o‘tkazaylik.  Bu yo‘lda faqatgina tiriklarning emas, futbol uchun umrini baxshida etgan insonlarning ham izi bor.

Bugun mana shu yo‘qotishlar, mana shu boy berishlar natijasi o‘laroq, O‘zbekiston nomi Jahon chempionati maydonlarida jaranglamoqda. Ehtimol, stadionlarda yangragan “O‘zbekiston!” degan hayqiriqlar, millionlab muxlislarning qalbidagi faxr va g‘urur tuyg‘ulari o‘sha buyuk yo‘llarning davomidir. Ehtimol, futbol uchun jonini fido qilgan, o‘zbek futboli tarixi sahifalariga nomini yozib ketgan insonlar xotirasi ham ana shu lahzalarda yodga olingandir. Chunki, futbolni faqat bugun maydonga tushgan o‘n bir nafar o‘yinchi emas, u  kecha, bugun va ertani bog‘lab turgan katta qismat yo‘li, deb atasak ham xato bo‘lmaydi. Shu bois, qanday natija qayd etilmasin, bu Jahon chempionatidagi har bir daqiqa o‘zbek futboli tarixidagi ulkan sahifadir. Va bu sahifalarni ko‘rib, o‘z vaqtida orzu qilib ketgan avlodlar xotirasi ham, shubhasiz, munosib ehtirom bilan yod etilishini unutmaylik…

Xullas, men futbolni sevaman, siz-chi? Siz ham sevasizmi: unda jamoamizning g‘alabasida ham, mag‘lubiyatida ham uning yonida turing! 

Laylo Hayitova

Source link

JChning 3-turida ham pley-offga chiqish imkonini saqlab qolishimiz muhim edi. Qadrdonimiz Kolumbiya Kongoni yengib, bizga ana shu imkonni taqdim etdi. To‘g‘ri, hammasi o‘z qo‘limizda emas, boshqa o‘yinlarni kuzatishga majburmiz. Lekin baribir oxirgi o‘yingacha imkon borligi futbolchilarni bo‘shashmay o‘ynashga undaydi. Buning ustiga, oxirgi turdagi raqibimiz Portugaliya kabi qo‘rqinchli emas, ularga tishimiz o‘tadi.

Qay holatda chiqamiz?

Oldingi JChlarida jamoalar soni 32 ta bo‘lgani uchun 8 ta guruhda birinchi va ikkinchi o‘rinni olganlar keyingi bosqichga chiqib, 1/8 final o‘yinlari boshlanardi. Bu gal jamoalar soni 48 ta. 12 ta guruhdan 2 tadan jamoa chiqsa, 24 ta bo‘ladi. 1/8 final uchun jamoalar ko‘p, 1/16 final uchun kam, shu sabab uchinchi o‘rinni olgan jamoalar ichida eng yaxshi natija qayd etgan 8 jamoa ham pley-offga chiqadi. Biz endi ana shu 8 jamoadan biri bo‘lish uchun harakat qilamiz. Bu uchun Kongoni faqat yengishimiz kerak, imkon bo‘lsa yirikroq hisobda.

Vaziyat qanday?

Shvetsiya, Jazoir, Xorvatiya, Paragvay, Shotlandiyada 3 ochkodan bor va ularning imkoniyati yaxshiroq. Lekin hech bir jamoa uchinchi o‘rinlar uchun beriladigan 8 yo‘llanmani naqd qilmagan.

Keling, har bir guruhni qarab chiqib, 3-o‘rinni kim olishi mumkinligiga to‘xtalamiz. Bugungi «A» guruhi o‘yinlarida Janubiy Koreya va Meksikaga muxlislik qilamiz. Ular Chexiya va JARni mag‘lub etishsa, bu guruhning uchinchi jamoasida 1 ochko bo‘ladi, kimdir durang o‘ynasa, 2 ochko. Biz uchun bo‘laveradi.

«B» guruhida ehtimoliy uchinchi o‘rin sohiblari Bosniya va Qatar o‘zaro o‘ynaydi. Bu o‘yinda bizni durang qoniqtiradi. Kimdir yutsa, ochkosi 4 ta bo‘lib, bitta yo‘llanmani naqd qiladi.

«C» guruhidagi Shotlandiya birinchi turda Haitini yengib pley-off tomon katta qadam tashlab bo‘lgan. Oxirgi turda Marokash Haitini yengsa kerak, shotlandlar Braziliyaga juda katta hisobda yutqazmasa, sakkiztalik yo‘llanmaga ilinadi.

«D» guruhida ikkinchi va uchinchi o‘rin uchun Avstraliya hamda Paragvay kurashadi. Biz uchun «kengurular» Paragvayni imkon qadar yirik hisobda yengishi yaxshi. Turkiya va AQSh o‘yini esa biz uchun hech nimani o‘zgartirmaydi, NATOchilar bilgan hisobida o‘ynayversin.

«E» guruhida vaziyat biz uchun yaxshi. Kot-d’Ivuar oxirgi turda Kyurasaoni yengsa kerak. Germaniya ham bo‘shashmay Ekvadorni mag‘lub etishiga umid qilamiz. Shunda bu guruhning uchinchi jamoasi 1 ochko bilan qolib ketadi. «F» guruhini yuqorida esladik, barchasi shvedlarning o‘z qo‘lida. «G» guruhida Eron yoki Belgiya ochko yo‘qotish kerak. Guruh peshqadami Misr Eronni, Belgiya Yangi Zelandiyani yengsa, qit’adoshimiz Eron 2 ochko bilan uchinchi bo‘ladi. Bu bizni qoniqtiradi. Belgiya va Eron o‘rin almashishi ham mumkin. Asosiysi, kimdir 2 ochko bilan uchinchi bo‘lsin.

«H» guruhida Ispaniya va Vozinya boshchilik Kabo-Verdega muslislik qilamiz. Afrikaliklar Saudiyani, Ispaniya Urugvayni yengsa, urugvayliklar 2 ochko bilan uchinchi bo‘ladi. Bu biz uchun yaxshi. «I» guruhida hozircha birorta ochkosi yo‘q Iroq va Senegal uchinchi o‘rin uchun kurashadi. Biz uchun bu o‘yinda durang bo‘lishi eng yaxshi natija.

«J» guruhida Avstriya hamda Jazoir ikkinchi va uchinchi o‘rin uchun kurashadi. Biz uchun bu o‘yinda yevropaliklar imkon qadar yirik hisobda yengishi yaxshi. «L» guruhida Gana va Xorvatiya ikki yo‘llanmani bo‘lib oladi. Katta ehtimol ularning ikkisi ham keyingi bosqichga chiqadi.

Guruhlarda yetakchilar ajralib qoldi va hozir asosiy intriga aynan eng yaxshi uchinchi o‘rinlar orasiga kirish uchun kechmoqda. Hozircha bu borada jadval quyidagicha:

Faqat besh jamoada uch ochkodan bor va sakkiz yo‘llanma uchun ular asosiy da’vogar. Yana ikki jamoada ikki ochkodan bor. Shunday ekan, bizda imkoniyat yomon emas. Bu uchun, albatta, Kongoni yengishimiz kerak, imkon qadar yirik hisobda. Xullas, buyog‘iga o‘rganib qolganimizdek, matematika va futbol birday davom etadi. Toshoynani sindirishdan avval otangizdan qolgan kalkulyatorni topib, changini artib qo‘ying, bugundan rosa asqatadi…

Source link

1 iyuldan pensiya, nafaqa va moddiy yordam to‘lovi, 1 sentabrdan oylik-maoshlar oshiriladi. O‘zbekiston futbol milliy jamoasi jahon chempionatida Portugaliyaga yirik hisobda yutqazdi. Qirg‘iziston va O‘zbekiston o‘zaro kelishuvga ko‘ra hududlarni almashdi. Soliq qo‘mitasi bank siriga keng miqyosda kirish imkoniyatini olmoqchi. Xavfli deb topilgan yonilg‘i shoxobchalari xavfsiz hududlarga ko‘chiriladi. Kunning muhim yangiliklari bilan tanishtiramiz.

1 iyuldan pensiya va nafaqalar, 1 sentabrdan oylik-maoshlar oshadi

Prezident farmoniga ko‘ra, 1 iyuldan pensiya va nafaqa hamda Ijtimoiy reyestrga kiritilgan oila bolalari nafaqasi va moddiy yordam to‘lovi miqdori 7 foizga oshiriladi.

Bunda yoshga doir eng kam pensiya miqdori oyiga 983 ming so‘m, nogironlik pensiyasining eng kam miqdori oyiga 1 mln 83 ming so‘m bo‘ladi.

1 sentabrdan budjet tashkilotlarida ish haqi, shuningdek, stipendiya miqdori ham 7 foizga oshiriladi. Jumladan, mehnatga haq to‘lashning eng kam miqdori oyiga 1 mln 360 ming so‘m, bazaviy hisoblash miqdori 440 ming so‘m etib belgilandi.

Milliy jamoa jahon chempionatida Portugaliyaga yirik hisobda yutqazdi

Bosh murabbiy Fabio Kannavaro shogirdlari JCh-2026 guruh bosqichining 2-turida Yevropaning nomdor vakiliga jiddiy qarshilik ko‘rsata olmadi va 0:5 hisobida yutqazdi. Krishtianu Ronaldu o‘yinda ikkita gol urdi. Shunday bo‘lsa-da, o‘zbekistonliklar guruhdan chiqish imkoniyatini yo‘qotmadi.

O‘yindan keyin Fabio Kannavaro ushbu jahon chempionati futbolchilar uchun tajriba bo‘lishini aytdi. Hujumchi Eldor Shomurodov mag‘lubiyat uchun muxlislardan uzr so‘radi va yakuniy o‘yinda g‘alaba uchun harakat qilishga va’da berdi.

Qirg‘iziston va O‘zbekiston o‘zaro kelishuvga ko‘ra hududlarni almashdi

O‘zbekiston bilan davlat chegarasini demarkatsiya qilish doirasida ikkita aholi punkti – Cho‘ng‘ara va Tosh-Tobo Qirg‘iziston tarkibiga o‘tdi. Ilgari Farg‘ona viloyati tarkibiga kirgan ushbu qishloqlarning 2 ming 500 ga yaqin aholisi etnik qirg‘izlar bo‘lib, endi Qirg‘iziston fuqaroligini oladi. Qirg‘iziston tomoni O‘zbekistonga chegara zonasida teng maydonli yer uchastkalarini bergan.

Eslatib o‘tamiz, ikki davlat tashqi ishlar vazirlari 2022 yil noyabr oyida Qirg‘iziston-O‘zbekiston davlat chegarasining alohida uchastkalari to‘g‘risidagi shartnomani imzolagan, 2023 yil yanvar oyida Shavkat Mirziyoyevning Bishkekka davlat tashrifi doirasida ikki davlat prezidentlari ratifikatsiya yorliqlarini almashgan edi.

Soliq qo‘mitasi bank siriga keng miqyosda kirish imkoniyatini olmoqchi

Soliq qo‘mitasi banklarga mijozlari haqidagi ko‘plab axborotlarni uzatib turish majburiyatini yuklovchi qaror loyihasini muhokamaga qo‘ydi.

Loyihada “Bank-soliq” nomli avtomatlashtirilgan axborot almashish modulini ishlab chiqish va joriy etish masalasi ilgari surilgan. Unda kartasiga oyiga 206 mln so‘mdan ortiq pul o‘tkazilgan fuqarolar haqidagi ma’lumotlar soliq organiga taqdim etib borilishi nazarda tutilgan. Tadbirkorlarning hisobiga naqd yoki terminal orqali har qanday summadagi tushumlar va ularning yirik operatsiyalari haqidagi ma’lumotlar ham soliq organida jamlanishi mumkin.

Hukumat qarori shaklidagi hujjat loyihasi bo‘yicha jamoatchilik muhokamasi 8 iyulgacha davom etadi.

Xavfli deb topilgan yonilg‘i shoxobchalari xavfsiz hududlarga ko‘chiriladi

Vazirlar Mahkamasining tegishli qarori bilan yonilg‘i quyish shoxobchalari va gaz to‘ldirish inshootlarida avariya hamda noxush hodisalarning oldini olishga qaratilgan qo‘shimcha chora-tadbirlar belgilandi. Qarorga muvofiq, hokimliklar 1 sentabrga qadar xavfsizlik, sanoat va yong‘in xavfsizligi, ekologik hamda shaharsozlik normalariga javob bermaydigan yonilg‘i quyish shoxobchalari va gaz to‘ldirish inshootlari reyestrini shakllantiradi.

Shundan so‘ng mazkur obektlarni bosqichma-bosqich xavfsiz hududlarga ko‘chirish bo‘yicha chora-tadbirlar ishlab chiqiladi. Qarorda ko‘chirilgan obektlar joylashgan yer uchastkalariga bo‘lgan huquqlar tadbirkorlar ixtiyorida saqlanib qolishi belgilangan.

Mazkur choralar yonilg‘i quyish shoxobchalari va gaz to‘ldirish inshootlarida xavfsizlik talablarini kuchaytirish, avariyalar xavfini kamaytirish hamda aholi xavfsizligini ta’minlashga qaratilgani ta’kidlanmoqda.

Source link

Mundialning ikkinchi turiga kelib, afsuski, biz qo‘rqqan voqea sodir bo‘ldi. O‘zbekiston Portugaliya bilan o‘yinda bardosh berolmadi, Ronaldu va sheriklari beshta gol urib, bizni yirik hisobda mag‘lub etishdi. Lekin tongda qadrdonimiz Kolumbiya Kongoni ham yengib, bizga yana bir imkon berdi.

Juda kuchli raqib

Portugaliya bilan birinchi turda o‘ynaganimizda, bunaqa yirik hisobda yengilmasdik deb o‘ylayman. Chunki Ronaldu jamoasi birinchi turga qanday chog‘lanish bilan tushganini ko‘rdingiz. Kongo bilan durangdan keyin ular manziliga tanqidlar yog‘ildi, yetmaganiga jamoa ichidagi intrigalar haqida mish-mishlar tarqalib, portugallarni ruhlantirib yubordi.

Musobaqaga asosiy favoritlardan biri sifatida kelgan jamoa birinchi turdagi muvaffaqiyatsizlikdan keyin hammaga zo‘r ekanini isbotlash uchun alam bilan maydonga tushdi. Va tish-tirnog‘igacha qurollangan harbiylarga to‘la tank oldidan biz chiqib qoldik. Boshqa jamoa bo‘lsa ham, bardosh berolmasdi, ishonavering. Chunki raqibda chog‘lanish juda kuchli edi.

Portugaliyaning o‘yinlarini uzoq yillardan beri betaraf muxlis sifatida ko‘rib, zavqlanardik, lekin kecha bu jamoa kuchini yaqindan ko‘rdik. O‘zbekistonning o‘yinini boshqacha diqqat bilan tomosha qilamiz axir. Raqibning barcha chiziqlari kuchli ekanini o‘z tanamizda his qildik. Brunu Fernandesh degan dunyo futbolining eng zo‘r pleymeykeri birgina uzatma bilan 41 yoshli hujumchini yakkama-yakka vaziyatga olib chiqishini ham ko‘rdik.

Raqib bizga qarshi o‘yinga shunaqa zo‘r tayyorlangan ekanki, o‘z uslubida o‘ynash kamlik qiladi deb o‘ylab, standartlarga ham jiddiy e’tibor qaratdi. Ikkinchi golda hamma Ronaldu tepishini kutdi, lekin Mendesh gol urdi. Aslida u himoyachi bo‘lsa ham, zarbasi juda zo‘r, standartlarni yaxshi amalga oshiradi. Internetda Nunu tepgan penaltilarni ko‘rib chiqing, menimcha, xato qilganini topolmaysiz.

To‘rtinchi golni portugallar mashg‘ulotlarda tayyorlangan burchak zarbasidan keyin urishdi. Raqibini kuchsiz demay, standartlarga ham alohida tayyorlangan jamoa, shubhasiz, g‘alabaga munosibdir. Tan olaylik, Portugaliya dunyoning eng kuchli jamoalaridan biri ekanini isbotladi.

Husanovning ko‘z yoshlari…

Albatta, o‘yinda ko‘p xato qildik, hamma golda kimdir xato qiladi, ammo men bu haqda gapirmoqchi emasman. Biz bu o‘yinda hech qanday mashg‘ulotlar, hech qaysi xorijiy yig‘inlar berolmaydigan tajriba orttirdik. Osiyo grandlariga qarshi o‘yinlarda ham mana shunaqa dovdirardik. Ishoning, endi Osiyoning hech bir jamoasiga qarshi oyog‘imiz qaltiramaydi! Chunki biz o‘ynash mumkin bo‘lgan eng kuchli raqibga qarshi o‘ynab bo‘ldik, bundan zo‘ri bo‘lmaydi.

Yanvarda Saudiya Arabistonida Osiyo chempionati boshlanadi. O‘sha musobaqada butkul boshqacha, ruhan o‘sgan, hech kimdan qo‘rqmaydigan O‘zbekistonni ko‘rishimizga ishonaman. Krishtianu va jamoasiga shunchaki tan berish kerak. Ular bizni tezda unutib yuborishar, lekin biz Portugaliyadan olgan katta darsimizni aslo unutmaymiz. Azizning bekor qilingan golini, Eldorning tanasida bor kuchini sarflab yugurganini, Jalol Jayid degan hushtagiga «yopishib olgan» marokashlik hakamni, futbolimiz yulduzi Abduqodir Husanovning ko‘z yoshlarini unutmaymiz. Men bu jamoa bilan yana bir marta o‘ynashimizni juda xohlardim.

Futbolchilarimiz o‘yindan keyin yig‘lashdi, chunki ular o‘yinga butun millat ko‘z tikib turganini bilardi. Raqib Portugaliya, nima qilaylik, deb bir amallab o‘yinni tugatib, keyin Ronaldu bilan rasm tushishga oshiqishmadi. Yutqazib qo‘yishganidan uyalishdi. Lekin siz uyaladigan ish qilmadingiz, yigitlar. Sharafli, lekin mashaqqatli yo‘lni boshlab berdingiz. Bunaqa yo‘llarda hammasi silliq kechmaydi. Raqib «Real», «Barselona», PSJ yulduzlaridan tashkil topgandi. Bizda unaqa imkon yo‘q, tarkibimiz o‘zimizga yarasha, asosiy muammosi futbolchilarga maosh to‘lash bo‘lib qolgan mahalliy chempionatdan futbolchi olishga majburmiz. Lekin hozircha. Bu mundialdan keyin yana bir qator futbolchilarimiz uchun Yevropa eshiklari ochilishiga umid qilamiz.

Kolumbiya yordam qildi

Match day’ning oxirgi o‘yinida Kolumbiya Kongoni 1:0 hisobida yengib muddatidan avval pley-off masalasini hal qildi. Dias jamoasi bu g‘alaba orqali bizga yordam berib yubordi. Endi O‘zbekiston oxirgi turda Kongoni yengsa, pley-offga chiqishi mumkin. Albatta, bu o‘z qo‘limizda emas, boshqa o‘yinlarni ham kutishga majburmiz, lekin baribir uchinchi o‘yinda ham imkoniyatni saqlab qolganimiz juda zo‘r bo‘ldi.

Kecha tunda yana ikki o‘yin o‘tkazildi. Bizning o‘yindan keyin Angliya Karlush Keyrush boshchiligidagi Ganani yenga olmadi — 0:0. Bu durangdan keyin Gana guruhdan chiqish masalasini hal qildi. Angliya ham guruhda qolib ketmasligi aniq. Guruhdagi yana bir o‘yinda Xorvatiya Panamani mag‘lub etdi. Bu guruhdan katta ehtimol uch jamoa pley-offga chiqadi. Bugundan jahon chempionatida 3-tur o‘yinlari boshlanadi.

Source link