Sport
Yangilarning gollari, bahsli qaror va sensatsiya. «Liverpul» mavsumni mag‘lubiyat bilan boshladi
O‘tgan mavsum oxirida «Manchester Siti»ni Angliya kubogi finalida yenggan «Kristal Pelas» endi Angliya superkubogini ham qo‘lga kiritdi – yozda jami 300 million yevrodan oshiq pul sarflangan yangi futbolchilar «Liverpul»ga yordam berolmadi.
Din Henderson – penaltilar seriyasi qiroli.
Angliya superkubogi, 10 avgust, «Uembli»
«Kristal Pelas» – «Liverpul» 2:2, penaltilar seriyasi – 3:2.
Gollar: Mateta (17, penalti), Sarr (77) – Ekitike (4), Frimpong (21).
«Kristal Pelas» – Henderson, Richards, Lakrua, Gehi (Devenni, 90+4), Munyos, Kamada (Hyuz, 29), Uorton (Lerma, 85), Mitchell (Sosa, 79), Sarr, Eze, Mateta.
«Liverpul» – Alisson, Frimpong, Konate, van Deyk, Kerkez (Roberson, 84), Jons (Endo, 71), Soboslai, Virts (Elliot, 84), Saloh, Gakpo, Ekitike (Makallister, 71).
Ogohlantirishlar: Konate (43), Virts (44), Saloh (87).
Yevropada futbol mavsumi nihoyat ochildi! «Liverpul» va «Kristal Pelas» Angliya Superkubogi uchun «Uembli» stadionida kuch sinashdi.
Bu o‘yinda barchaning e’tibori «Liverpul»ga qaratilgandi. Mersisaydliklar mavsumlar oralig‘ida transferlar uchun 300 million yevrodan ortiq mablag‘ sarfladi — bu klub tarixidagi misli ko‘rilmagan transferlar oynasi bo‘ldi va barcha davrlardagi mutlaq rekord o‘rnatildi. Bunday xarajatdan keyin betaraf muxlislar uchun ham bundan qanday natija bo‘lishini ko‘rish qiziq edi.
Jamoa bosh murabbiyi Arne Slot maydalashib o‘tirmadi va barcha yangi futbolchilarni boshlang‘ich tarkibga kiritdi. Himoya qanotlariga Milosh Kerkez (uning uchun 47 million yevro to‘langan) va Jyeremi Frimpong (40 mln yevro), hujum markaziga Yugo Ekitike (95 mln yevro), maydon markaziga esa eng yulduz debyutant — Florian Virs (125 mln yevro) tashlandi.
Ko‘pchilik tomonidan Angliyada yaxshi o‘ynab ketishiga shubha bildirilgan Ekitike esa to‘rtinchi daqiqadayoq hisobni ochdi. Fransuz futbolchisi chap qanotda Virs bilan devor uslubida o‘ynab, undan to‘pni qabul qilib olgach, markaz tomon yurdi va jarima maydoni tashqarisidan turib, yerlatib aniq zarba yo‘lladi, «Kristal Pelas» darvozaboni Din Henderson bu zarba qarshisida ojiz qoldi.
Tezkor gol londonliklarni to‘pni olib, oldinga o‘tishga majbur qildi. 15-daqiqada mersisaydliklar himoyachilari ofsayd chizig‘ini hosil qilishda xato qildi va Mateta Alison bilan yakkama-yakka vaziyatga chiqib ketdi, darvozabon xavfni bartaraf etdi, ammo to‘p Sarrga kelib tushdi, uni esa Virjiyl van Deyk jarima maydoni ichida yiqitdi – hakam 11 metrlik jarima zarbasi belgiladi. Mateta sovuqqonlik bilan kuchli zarba yo‘llab, hisobni tenglashtirdi.
Gol «burgutlar»ni ilhomlantirib yubordi – keyingi daqiqalarda yana bir necha xavfli hujumlar uyushtirildi. Ammo «Liverpul» kutilmaganda o‘yinni o‘zgartirib yubordi – 21 daqiqada jamoaning yana bir yangi futbolchisi Frimpong o‘ng qanotdan hujum uyushtirdi, u katta ehtimol bilan to‘pni jarima maydoni markaziga uzatmoqchi edi, biroq to‘p trayektoriyasi kutilmagan tarzda o‘zgarib, darvoza to‘riga borib tushdi.
Shundan keyin jamoalar hujum qilishdan to‘xtadi, o‘yinda ehtiyotkorlik va qo‘pollik paydo bo‘ldi. 29-daqiqada «Pelas» bosh murabbiyi Oliver Glasner jarohat olgan yarimhimoyachi Kamadani almashtirishga majbur bo‘ldi, uning o‘rniga Uill Hyuz tushirildi. Bo‘limning oxirgi qismida «Liverpul»ning ikki futbolchisi sariq kartochka oldi — avvaliga hakam Ibraim Konateni qo‘pol harakati uchun, keyin esa Virsni bahslashgani uchun ogohlantirdi.
Ikkinchi bo‘limda jamoalar yana hujumkor futbol namoyish eta boshladi, «Liverpul» safida Virs barchadan faolroq harakat qildi, ammo sheriklari uni yetarlicha qo‘llab-quvvatlashmadi va tashabbus asta-sekinlik bilan raqibga o‘ta boshladi.
Ikkinchi bo‘lim o‘rtalarida Slot jamoasi passivligi uchun jazolandi. 62-daqiqada Eze darvoza tomon xavfli zarba yo‘lladi, Alison qiyinchilik bilan seyv ijro etdi. Ammo bu ogohlik qo‘ng‘irog‘i edi. 77-daqiqada «Pelas» baribir o‘z maqsadiga erishdi: qarshi hujum vaqtida Uorton nozik uzatma bilan Sarrni qulay pozitsiyaga chiqardi, bu vaziyatda yana tajribali van Deyk ofsayd chizig‘i hosil qilishga urinib, raqibni oldinga o‘tkazib yubordi, hujumchi esa osonlik bilan hisobni tenglashtirdi 2:2.
Keyin londonliklar g‘alabani ilib ketish uchun bor kuchni maydonga tashladi. Ikki daqiqa o‘tib Sarr dubl rasmiylashtirishi mumkin edi, ammo uning zarbasi yo‘lini Kerkez to‘sishga ulgurdi. Bu hujumda hakam mersisaydliklarni kechirdi, holbuki ushbu jamoa darvozasiga penalti qo‘yilishi kerak edi: to‘p jarima maydoniga oshirilganida Mak Allister qo‘l bilan o‘ynagandi. Ammo VAR vaziyatga aralashmadi va hakamning qarori o‘zgarishsiz qoldi.
Qolgan vaqt davomidagi hujumlar ham golsiz yakunlandi va barchasi penaltilar seriyasida hal qilinadigan bo‘ldi. Birinchi bo‘lib nuqtaga yaqinlashgan Muhammad Saloh esa to‘pni osmonga qarata tepdi. Mateta esa yana bir bor aniq harakat qilib, Henderson Mak Allisterning zarbasini qaytarganida mersisaydliklar 0:2 hisobida ortda qola boshladi.
Londonliklar safida esa Eberechi Eze xato qildi va vaziyat Slot jamoasi uchun biroz yaxshilandi. Ammo Henderson yana o‘zini ko‘rsatdi va Harvi Elliottga ham gol urishga yo‘l qo‘ymadi.
Barchasini Borna Sosa hal qilishi mumkin edi, ammo «Pelas»ning xorvatiyalik yangi futbolchisi asabiylashdi va u tepgan to‘p darvoza to‘siniga bordi, Dominik Soboslai esa aniq harakat qilib, oradagi farqni qisqartirdi. Shundan keyin barcha ish yosh yarimhimoyachi Jastin Devenni zimmasiga tushdi, Glasner uni aynan penaltilar seriyasi uchun maydonga tushirgandi – u esa vazifani uddalab, «Kristal Pelas»ning g‘alabasini ta’minladi – 3:2.
«Burgutlar» uchun bu ilk Angliya Superkubogi bo‘ldi. Umuman, jamoa o‘z tarixidagi ikkinchi sovrinni qo‘lga kiritdi. Bungacha jamoada faqat Angliya Kubogi sovrini bor edi — bu kubok ham shu yil may oyida, «Manchester Siti» bilan o‘yinda yutib olingandi.
«Liverpul» esa o‘z misolida futbolda barchasini pullar hal qilmasligi va yuzlab million yevro doim ham sovrinlar yutishga yordam bera olmasligini ko‘rsatdi. Slot jamoasi endi bu mag‘lubiyatni tahlil qilib, APLning yangi mavsumi startigacha xatolarni to‘g‘rilashga harakat qilishi kerak.
«Inter» ikki mavsumdan so‘ng, yangi bosh murabbiy Kristian Kivu qo‘l ostida chempionlik unvonini qaytarib oldi.
«Inter» A Seriyaning 35-turida «Parma»ni 2:0 hisobida mag‘lub etib, muddatidan oldin Italiya chempioni bo‘ldi.
Bu g‘alabadan so‘ng, bosh murabbiy Kristian Kivu shogirdlari musobaqa yakuniga 3 tur qolganida 82 ochko to‘pladi, eng yaqin ta’qibchi «Napoli» hisobida 70 ochko bor.
Shu tariqa, «Inter» ikki mavsumdan so‘ng chempionlik unvonini qaytarib oldi. Milanliklar oxirgi marta 2023/24-yilgi mavsumda g‘olib bo‘lgan edi.
2025 yil iyun oyida «Inter» bosh murabbiyi bo‘lgan ruminiyalik mutaxassis Kristian Kivu murabbiylik faoliyatidagi ilk sovrinini qo‘lga kiritdi. U Joze Mourinodan keyin (2008/09 va 2009/10-yilgi mavsumlar) A Seriyada g‘alaba qozongan birinchi xorijlik murabbiy bo‘ldi. O‘sha yillarda Kivuning o‘zi portugaliyalik murabbiy qo‘l ostida «Inter» himoyasida o‘ynagan. Shundan beri Italiya chempionatida faqat italiyalik murabbiylar g‘alaba qozongan edi: Massimiliano Allegri, Antonio Konte, Mauritsio Sarri, Stefano Pioli, Luchano Spalletti va Simone Inzagi.
Italiyada skudettolar soni bo‘yicha «Inter» ikkinchi o‘rinda turadi: 21 ta unvon. Rekordchi — «Yuventus» (36 ta sovrin). «Milan»da — 19 ta unvon.
Kivu jamoasida mavsumni oltin dubl bilan yakunlash uchun ajoyib imkoniyat bor. 13 may kuni «neradzurri» Italiya kubogi finalida «Latsio» bilan o‘ynaydi.
Angliya chempionatining 35-turi uchrashuvi oldidan stadionda bo‘lgan Fergyuson o‘zini yomon his qilganidan so‘ng shifoxonaga olib ketilgan. Xabar qilinishicha, gap ehtiyot chorasi haqida bormoqda.
«Manchester Yunayted»ning sobiq murabbiyi ser Aleks Fergyuson jamoaning «Liverpul»ga qarshi bahsi oldidan o‘zini yomon his qildi va shifoxonaga olib ketildi, deb xabar berdi Daily Mail.
Nashr xabariga ko‘ra, 84 yoshli Fergyuson o‘yin boshlanishidan bir soat oldin shifoxonaga yotqizilgan. Unga ehtiyot chorasi sifatida tibbiy kuzatuv tayinlangan. Fergyusonga tez vaqt ichida uyiga javob berilishi kutilmoqda.
Aleks Fergyuson — «Manchester Yunayted» tarixidagi eng sovrindor murabbiy hisoblanadi. U klubni 1986 yildan 2013 yilgacha boshqargan. «Manchester Yunayted» Fergyuson boshqaruvida 13 marta Angliya chempioni bo‘lgan. Shotlandiyalik murabbiy klubdagi 26 yillik faoliyati davomida jami 38ta sovrinni qo‘lga kiritgan.
Murabbiylikdan ketganidan so‘ng Fergyuson «Manchester Yunayted» elchisi va klub direktorlar kengashi a’zosi sifatida faoliyat yuritdi. 2024 yil oktyabrda klubning yangi egasi Jim Retkliff va INEOS kompaniyasi unga elchilik faoliyati uchun yiliga 2,16 mln funt sterlingga teng maosh to‘lashni to‘xtatdi.
«Arsenal» turnir jadvalida «Siti» bilan oradagi farqni 6 ochkoga yetkazdi, Ispaniyada esa bugun «Real» Kataloniyaning «Espanyol» jamoasiga qarshi o‘yinda ochko yo‘qotadigan bo‘lsa, bu turda navbatdagi g‘alabaga erishgan «Barselona» muddatidan oldin chempionlikni nishonlashi mumkin.
Angliya: Tiago Holand bilan poygalashmoqda
«Brentford» – «Vest Hem» 3:0
Gollar: Mavropanos, 15 – avtogol (1:0). Tiago, 54 – penalti (2:0). Damsgor, 82 (3:0)
«Brentford»: Kelleher, van der Berg, Kollinz, Lyuis-Potter (Hiki, 90+1), Kayode, Yyensen, Yarmolyuk, Damsgor (Dasilva, 90+1), Shade (Ayyer, 80), Uattara (Furo, 90), Tiago
«Vest Hem»: Hermansen, Disasi, Mavropanos, Diuf (Traore, 74), Uoker-Piters (Van-Bissaka, 65), Fernandesh, Souchek, Sammervill (Skarlz, 88), Bouen (Magassa, 88), Pablo, Kastelyanos (Uilson, 65)
Ogohlantirishlar: Kayode, 73 – Kastelyanos, 59. Sammervill, 62. Skarlz, 90
Bu mavsumda APLda qolish uchun kurash chempionlik tituli uchun kurashdagi kabi qizg‘in kechmayapti. «Vulverhempton» va «Byornli» chempionshipga tushib ketishi allaqachon aniq bo‘lgan, mavsumning uchinchi omadsiz jamoasi esa katta ehtimol bilan «Vest Hem» klubi bo‘ladi. Shanba kuni ushbu jamoa «Brentford» maydonida ilojsiz ahvolda qoldi va hozirda 18-o‘rinda turgan «Tottenhem»da turnir jadvalining quyi qismini tark etish uchun yaxshi imkoniyat hosil bo‘ldi. «Bolg‘achilar» darvozasiga uchta javobsiz gol urgan «asalarilar» yevrokuboklar yo‘llanmasi uchun kurash olib bormoqda, jamoa to‘purari Igor Tiago mavsumdagi sakkizinchi penaltini aniq ijro etib, to‘purarlar poygasida Holandni quyishda ta’qib etmoqda. Hozircha bu poygada norvegiyalik hujumchi ikkita gol oldinda (24:22), ammo braziliyalik hujumchi hozir pik formasida – u gollarining yarmini 2026 yilda urgan va bu borada hech bir hujumchi unga teng kelolmaydi.
«Arsenal» – «Fulhem» 3:0
Gollar: Yokeresh, 9 (1:0). Saka, 40 (2:0). Yokeresh, 45+4 (3:0)
«Arsenal»: Rayya, Saliba, Gabriel Magalyayns, Kalafiori, Uayt (Moskera, 83), Rays (Subimendi, 64), Lyuis-Skelli, Eze (Douman, 78), Trossar, Saka (Madueke, 46), Yokeresh (Gabriel Jyezus, 64)
«Fulhem»: Leno, Bassi, Andersen, Robinson, Kastan, Rid (Kerni, 63), Lukich, Smit-Rou (Kusi-Asare, 78), Chukvueze (King, 64), Uilson (Bobb, 64), Ximenes (Rodrigu Munis, 73)
Ogohlantirish: Lukich, 23
Chempionlik poygasida qatnashayotgan «Arsenal» esa bu oqshom raqibni yirik hisobda mag‘lub etish uchun maydonga tushgandi va buni birinchi bo‘limdayoq uddaladi. Arteta shu kuni boshlang‘ich tarkibdagi tanlovlari bilan ko‘pchilikni ajablantirdi. Birinchidan, so‘nggi vaqtlarda muntazam ravishda ilk daqiqalardan o‘ynab kelgan Inkapiye zaxirada qoldirildi va uning o‘rnini hujumkorligi bilan farq qiladigan Kalafiori egalladi. Ikkinchidan, bu mavsumda top-5 ligalarda eng ko‘p o‘ynagan yarimhimoyachi bo‘lib turgan Martin Subimendiga dam berildi. Uchinchidan, uning o‘rniga tayanch yarimhimoyasiga Rays o‘tkazildi, Deklanning o‘rniga esa chap qanot himoyachisi Lyuis-Skelli tushirildi. Shu bilan birga, hujumning o‘ng qanotida ancha vaqtdan buyon jarohatini davolagan Saka paydo bo‘ldi. Aynan Saka va Skellining harakatlari o‘yin taqdirini hal qildi. Bukayo o‘z qanotida istagan ishini qildi va uning uzatmasidan keyin Yokeresh tezkor gol bilan hisobni ochdi.
Keyin esa Sakaning o‘zi shvetsiyalik hujumchining uzatmasini golga aylantirdi. Arteta uni seshanba oqshomida YeChL yarimfinalida «Atletiko»ga qarshi kechadigan javob o‘yini uchun asrashga qaror qilib, tanaffusda zaxiraga oldi. Ammo u unga 45 daqiqa ham uchta yubiley natijaga erishish uchun yetarli bo‘ldi – 80 gol, 70 assist va 150 ball. Uning maydonga tushishi Yokereshning ham o‘yinini ochib yubordi, u bo‘lim oxirlarida Trossarning uzatmasi orqali dubl qayd etdi. Bu uning uchun «Arsenal» safida ilk bor bir o‘yinda 2+1 ko‘rsatkich qayd etishi bo‘ldi. Shuningdek, Viktor Aleksis Sanches davridan buyon «Arsenal»dagi ilk mavsumida yigirmadan ortiq gol urgan (21) ilk futbolchiga aylandi.
Bu o‘yin mezbonlarning to‘liq ustunligida o‘tgani quyidagi suratda yaqqol aks etgan: «Arsenal» himoya chizig‘i shu qadar yuqori joylashganki, darvozabon David Rayya maydonning ikkinchi qismiga kelib podkat amalga oshirmoqda.
Bu o‘yindagi yirik hisobdagi g‘alaba chempionlik poygasida qo‘l kelishi mumkin, agar mavsum yakunida «Arsenal» va «Manchester Siti»ning ochkolari teng kelib qolsa, birinchi navbatda to‘plar nisbatiga qaraladi. Hozirda «kanonirlar» +4 ko‘rsatkichiga ega va keyingi raqiblar ham nisbatan osonroq: «Vest Hem» (18-o‘rin), «Byornli» (19-o‘rin) va «Kristal Pelas» (14-o‘rin). «Siti»ning qolgan 5 raqibidan 3 tasi yevrokuboklar uchun kurashmoqda: «Everton» (11-o‘rin), «Brentford» (6-o‘rin), «Bornmut» (8-o‘rin), «Kristal Pelas» (14-o‘rin) va «Aston Villa» (5-o‘rin).
Ispaniya: Simeonening 1000-o‘yini va YeChLga chiqqan «Vilyarreal»
«Vilyarreal» – «Levante» 2:1
Gol: Mikautadze, 38 (1:0). Espi, 51 (1:1). Moleyro, 62 (2:1). Mikautadze, 68 (3:1). Byukenen, 87 (4:1). Pepe, 90 (5:1)
«Vilyarreal»: Tenas, Veyga, Navarro (Kambvala, 81), Pedrasa (Kardona, 74), Frimen, Parexo (Parti, 74), Komesanya, Moleyro, Pepe, J. Moreno (Byukenen, 84), Mikautadze, Peres
«Levante»: Rayan, M. Moreno, Matturro, Pampin, Tolyan, Arriaga (Ragube, 68), Olasagasti, Pablo Martines (Bruge, 77), Romero (Tunde, 46, Etta Eyong, 68), Alvares (Losada, 30), Espi
Ogohlantirishlar: Parexo, 45. Veyga, 55 – Arriaga, 45
Mavsumning katta qismida uchinchi o‘rinni o‘zida saqlab turgan «Vilyarreal» bu turda «Levante»ni yirik hisobda tor-mor etib, valensiyaliklarning ligada qolish imkoniyatlarini amalda nolga tenglashtirdi. O‘z navbatida, «submarinalar» bu g‘alaba orqali qatorasiga ikkinchi mavsumda Chempionlar ligasi umumiy guruh bosqichida ishtirok etishini kafolatladi. Marselino shogirdlarida yevrokubokning bu mavsumidagi muvaffaqiyatsizlikni to‘g‘rilash imkoni bo‘ladi. Shanba oqshomidagi o‘yinni Mikautadzening dubli hal qildi, u avvaliga raqib himoyasidagi qo‘pol xatodan foydalandi, keyin esa Pepening qanotdan uzatmasini darvoza to‘riga to‘g‘rilab yubordi. O‘tgan yozda «Lion»dan Ispaniyaga ko‘chib o‘tgan ushbu gurjistonlik hujumchi ilk mavsumida barcha turnirlar doirasida 13 gol urishga erishdi.
«Valensiya» – Atletiko» 0:2
Gollar: Luke, 74 (0:1). Kubo, 82 (0:2)
«Valensiya»: Dimitriyevski, Tarrega, Pepelu, Xose Gayya (Vaskes, 73), Saraviya (Raba, 82), Rodriges, Gerra, Ugrinich (Duro, 59), Rioxa (Diyego Lopes, 59), Sodiq, Ramazani (Gruneveld, 73)
«Atletiko»: Musso, Langle, Le Norman, Dias, Bonyar (Purich, 90+7), Mendosa (Koke, 73), Vargas, Morsilio (Luke, 63), Almada (Grizmann, 73), Molina, Belaid (Kubo, 63)
Ogohlantirishlar: Tarrega, 67 – Almada, 29. Mendosa, 52. Vargas, 61
«Atletiko» «Valensiya» uchun noqulay raqib sifatidagi maqomini mustahkamlab, qatorasiga beshinchi o‘zaro o‘yinda g‘alaba qozondi. Qolaversa, «matraschilar» o‘yinning birinchi bo‘limida mezbonlarga darvoza sohasi tomon birorta zarba berishga imkon qoldirmadi, ikkinchi bo‘lim oxirida esa shu kuni la ligada debyut qilgan ikki yosh futbolchi «ko‘rshapalaklar» jamoasini nokautga uchratdi. Diyego Simeone YeChL yarimfinali doirasida Londonga safar oldidan asosiy tarkib futbolchilariga dam bergandi va yosh futbolchilar taqdim etilgan imkoniyatdan foydalanishdi.
Avvaliga 20 yoshli forvard Luke o‘z debyutini gol bilan nishonladi, keyin esa 18 yoshli Migel Kubo bu darajadagi ilk o‘yinini madridliklar afsonasi Grizmanning uzatmasi orqali urgan goli bilan eslab qoladigan bo‘ldi. Fransuz hujumchi klublar darajasidagi 800-o‘yinida navbatdagi golli harakatini amalga oshirdi. Bu o‘yin Simeone uchun ham yubiley edi, argentinalik mutaxassis shu kuni murabbiylik faoliyatidagi 1000-o‘yinini o‘tkazdi. Shunday o‘yinda jamoa tarixida 1984 yildan buyon kuzatilmagan holat qayd etildi: 42 yildan buyon «Atletiko» ikki debyutantning ikki goli bilan g‘alaba qozonmagandi.
«Osasuna» – «Barselona» 1:2
Gollar: Levandovski, 81 (0:1). Torres, 86 (0:2). Raul Garsiya, 88 (1:2)
«Osasuna»: Errera, Boyomo, Katena, Galan, Roze, Torro (Osambela, 85), Monkayola (Barxa, 85), Moyses Gomes (Oros, 70), Moro, R. Garsiya (Bretones, 86), Budimir (Raul Garsiya, 70)
«Barselona»: X. Garsiya, Kubarsi, Martin, Joau Kanselu, E. Garsiya (Arauxo, 82), Gavi (de Yong, 62), Pedri (Bernal, 88), Olmo (Torres, 62), Fermin Lopes, Barji (Reshford, 62), Levandovski
Ogohlantirishlar: Monkayola, 74. Krus, 90 – Gavi, 24. E. Garsiya, 60
«Barselona»ning vaziyati juda oddiy – kataloniyaliklar shu turdayoq maydondan tashqarida turib chempion bo‘lishi mumkin. Buning uchun «Real» yakshanba kuni «Espanyol»ga qarshi o‘yinda ochko yo‘qotishi talab etiladi.
Ammo jamoa birinchi navbatda shanba kuni Pamplonada kechadigan o‘yinda g‘alaba qozonishi talab etilardi va bu har qanday raqib uchun oson ish emas. O‘yinning birinchi bo‘limi «Osasuna» nafaqat peshqadamning hujumlarini qaytarib turdi, balki o‘zi ham xavfli qarshi hujumlar uyushtirdi.
O‘yin kartinasi ikkinchi bo‘limda o‘zgara boshladi va Rafinya va Yamal kabi yetakchilar yo‘q sharoitda Reshford ko‘p ishni o‘z gardaniga oldi. Zaxiradan o‘yinga qo‘shilgan ingliz hujumchisi avvaliga o‘zi xavfli zarba berdi, keyinroq qanotdan Levandovskining boshiga ajoyib uzatma berdi. O‘tkazib yuborilgan goldan keyin mezbonlar to‘liq kuch bilan oldinga o‘tib ketishdi va ikkinchi golni o‘tkazib yuborishdi – Fermin Lopes chiziqlar orasidan o‘tkazilgan pas bilan Ferran Torresning goliga assistentlik qildi.
Ikki gol ustunligidan keyin «Barsa» futbolchilari biroz bo‘shashdi va 88-daqiqada jarima maydonida yolg‘iz qoldirilgan Raul Garsiya mezbonlarning hisobni qisqartiruvchi golini urdi.
Shunga qaramay, «Barselona» la ligada qatorasiga 10-g‘alabasini nishonladi va endi bugun «Real» va «Osasuna» o‘yini qanday natijada yakunlanishini kutmoqda. Madridliklar bugun safardan g‘alaba bilan qaytadigan bo‘lsa, «Barselona» keyingi haftada bo‘lib o‘tadigan klasikoda chempionlikni rasmiylashtirishi mumkin.
U ko‘p yillar Farg‘onaning «Neftchi» klubi safida to‘p surgan, O‘zbekiston milliy jamoasi bilan 1994 yilgi Osiyo o‘yinlarida chempion bo‘lgandi.
O‘zbekiston milliy jamoasi sobiq futbolchisi, O‘zbekistonda xizmat ko‘rsatgan sportchi va murabbiy, futbol faxriysi Abdusamad Do‘rmonov 60 yoshda vafot etdi.
Abdusamad Do‘rmonov 1965 yil Termiz shahrida tug‘ilgan. Futbolchilik faoliyati davomida «Paxtakor» (1987-1989), «Surxon» (1990-1991) va «Neftchi» (1992-2002) kabi klublarda to‘p surgan, Farg‘ona klubi jamoasi bilan besh marta O‘zbekiston chempioni bo‘lgan.
Shuningdek, 1992-1994 yillarda O‘zbekiston milliy jamoasiga chaqirilgan, 1994 yil Yaponiyada o‘tkazilgan Osiyo o‘yinlarida g‘olib bo‘lgan.
U futbolchilar oilasi vakili bo‘lib, ukasi Rustam Do‘rmonov ham u bilan birga «Neftchi» klubi sharafini himoya qilgan, yana bir ukasi Ravshan Do‘rmonov esa Termizning «Surxon» klubida o‘ynagan.
Abdusamad Do‘rmonov 2002 yilda futbolchilik faoliyatini yakunlagach, «Neftchi», «Yozyovon lochinlari» va «Istiqlol» kabi klublarda murabbiy sifatida ishlagan, hozirga qadar «Neftchi» klubi murabbiylar shtabida ishlayotgandi.
«Barselona» hujumchisi Robert Levandovski faoliyatini «Yuventus»da davom ettirishi mumkin deb xabar berdi Tuttosport.
Turinliklar va polshalik forvardning agenti muzokara o‘tkazgan.
Xabarga ko‘ra, «Yuventus» kelasi mavsum uchun YChL yo‘llanmasini qo‘lga kiritsa, 37 yoshli futbolchi klubga o‘tish taklifini ko‘rib chiqishga tayyor.
Levandovskining «Barselona» bilan amaldagi shartnomasi 2026-yil yozigacha mo‘ljallangan. Kataloniyaliklar futbolchiga yangi shartnoma taklif qilgan, ammo unda maosh keskin kamaytirilishi ko‘zda tutilgan va bu hujumchiga ma’qul kelmagan.
Prezident Tramp Eron tinchlik rejasini rad etdi
Qatiq iching — qarimaysiz!
O‘zbekiston OTB bilan 12 mlrd dollarlik hamkorlik dasturini imzoladi
-
Siyosat4 days agoPrezident Mirziyoyev energiya tejash vositasi sifatida kommunal xizmatlarni oʻchirishni taqiqlovchi farmonni imzoladi
-
Siyosat4 days agoOʻzbekistonda yil oxiriga qadar 13 ta GES qurish rejalashtirilmoqda, tarmoqni kengaytirish koʻzda tutilmoqda
-
Turk dunyosi4 days agoKurd jangari rasmiysining aytishicha, Turkiya islohotlarning yoʻqligi tufayli tinchlik muzokaralarini toʻxtatib qoʻymoqda
-
Jamiyat4 days ago
Sud jarayonlarini OAVda yoritishni takomillashtirish bo‘yicha dastur boshlandi
-
Jamiyat5 days ago
May oyida qanday ob-havo kutiladi? «O‘zgidromet» izoh berdi
-
Jamiyat5 days agoBuxoro va Surxondaryoda Afg‘onistondan kontrabanda qilingan opiyning katta partiyasi aniqlandi
-
Iqtisodiyot5 days ago
O‘zbekistonda kafe va restoranlar daromadi keskin oshdi
-
Jamiyat3 days agoJinoiy guruh yetakchisidan 2,7 ming dollar olgan profilaktika inspektori ushlandi