Iqtisodiyot

2026 yilda dunyoning eng yirik iqtisodiyotlari

Published

12 months ago

October 28, 2025

Xalqaro valuta jamg‘armasi (XVJ)ning oktyabr oyidagi hisobotiga ko‘ra, 2026 yilda jahon iqtisodiyoti ehtiyotkor o‘sish va ortib borayotgan noaniqlik davriga kirishi kutilyapti.

Tashkilot ta’kidlashicha, jahon taraqqiyoti fragmentatsiyaning kuchayishi va proteksionizmning o‘sishi fonida sekinlashmoqda. Asosiy xavflar qatorida — texnologiya kompaniyalari aksiyalarining ehtimoliy qayta baholanishi va davlat institutlari mustaqilligining susayishi, bu esa iqtisodiy siyosat sifatini izdan chiqarishi mumkin.

Reyting YaIMning amaldagi AQSh dollaridagi nominal qiymatlarini hisobga oladi va har bir iqtisodiyotning nisbiy ulushini aks ettiradi.

AQSh — dunyoning eng yirik iqtisodiyoti. Yuz yildan ortiq vaqt davomida Qo‘shma Shtatlar YaIM bo‘yicha dunyoda birinchi o‘rinni saqlab kelmoqda va, ehtimol, yaqin o‘n yilliklarda ham yetakchi bo‘lib qoladi. 2026 yilda Amerika iqtisodiyoti XVJ bahosiga ko‘ra 31,8 trln dollarga yetadi — bu Xitoy (2-o‘rin), Germaniya (3-o‘rin) va Hindiston (4-o‘rin) YaIM umumiy yig‘indisiga yaqin ko‘rsatkich.

Xitoy 20,7 trln dollarlik YaIM prognozi bilan ikkinchi o‘rinni saqlab qoladi — bu AQShdan 35 foizga kam, ammo uchinchi pog‘onadagi Germaniyadan deyarli uch barobar ko‘p. Biroq Xitoy iqtisodiyotiga tuzilmaviy cheklovlar — aholining qarishi, ko‘chmas mulk bozorining susayishi va eksport bojlari o‘sishi — bosim o‘tkazmoqda. Shu omillar YaIM o‘sishini yillik taxminan 4 foiz atrofigacha, so‘nggi qirq yildagi eng past darajagacha sekinlashtiradi.

Hindiston (4,5 trln dollar) ichki talab hisobiga to‘rtinchi pozitsiyani mustahkamlab, Yaponiyani ortda qoldiradi. Ro‘yxatda Indoneziya va Turkiya ham yuqoriga ko‘tarilmoqda — bu demografik ustunliklar va o‘rta darajadagi rivojlanishga ega iqtisodlardagi islohotlarni aks ettiradi.

Rossiya XVJ ma’lumotlariga ko‘ra 2,5 trln dollarlik YaIM prognozi bilan reytingda to‘qqizinchi o‘rinni egallaydi.

Osiya dunyoning eng yirik iqtisodiy mintaqasiga aylanadi. Xitoy, Yaponiya va Hindiston hisobiga Osiyo jami YaIM bo‘yicha ilk bor Shimoliy Amerikadan o‘tadi. Uchinchi o‘rinda — Yevropa, undan keyin Yaqin Sharq, Janubiy Amerika, Afrika va, nihoyat, Okeaniya bo‘ladi.

Source link

Iqtisodiyot

Shavkat Mirziyoyev Shinjon usulida yetishtirilgan paxta dalasini ko‘zdan kechirdi

Published

1 hour ago

October 21, 2026

xabarlar

Prezident Shavkat Mirziyoyev G‘uzor tumanida «Qashqadaryo Jingu» korxonasi tomonidan Shinjon usulida paxta yetishtirilayotgan dalada bo‘ldi.

Davlatimiz rahbariga chigit ekish, g‘o‘zani sug‘orish va parvarishlashda qo‘llanayotgan texnologiyalar haqida ma’lumot berildi. Bu yerda 2,2 ming gektar maydonga chigit plyonka ostiga qo‘sh qatorlab ekilgan, tomchilatib sug‘orish to‘liq joriy qilingan.

Plyonka tuproqdagi namlik va haroratni saqlab, chigitning erta hamda bir tekis unib chiqishiga yordam beradi. Suv va o‘g‘it esa tomchilatib sug‘orish tizimi orqali bevosita g‘o‘za ildiziga yetkaziladi. Natijada suv sarfi 30-40 foizga, o‘g‘it sarfi qariyb 30 foizga kamayadi. Hosil an’anaviy maydonlarga nisbatan 10-15 kun oldin pishib yetiladi.

Prezidentimiz paxtazorda yetishtirilgan hosil va agrotexnik tadbirlarni tashkil etish jarayoni bilan tanishdi. An’anaviy usulda gektaridan 30-35 sentner paxta olinsa, Shinjon texnologiyasida bu ko‘rsatkich 60-70 sentnergacha yetishi mumkin. Korxona dalalarida hosildorlik gektariga 55 sentnerni, yalpi hosil esa 12,3 ming tonnani tashkil etmoqda.

Dala ishlarida agrodronlardan ham foydalanilmoqda. Bu ayrim agrotexnik tadbirlarni tezroq bajarish, yonilg‘i sarfini kamaytirish imkonini bermoqda.

Xitoy sarmoyasi ishtirokida tashkil etilgan «Qashqadaryo Jingu» agroklasteri Koson, Nishon, G‘uzor, Ko‘kdala va Mirishkor tumanlarida jami 18,3 ming gektar maydonda faoliyat yuritadi. Ushbu yerlarning katta qismi ilgari foydalanilmagan cho‘l va qarovsiz maydonlar bo‘lgan. Loyihaga 128 million dollar investitsiya kiritilib, 50 ta ish o‘rni yaratilgan. Eksport hajmi esa 8,5 million dollarni tashkil etadi.

Shu yerda davlatimiz rahbariga viloyat qishloq xo‘jaligida amalga oshirilayotgan ishlar haqida ham axborot berildi.

Source link

Iqtisodiyot

O‘zbekiston «Wabtec» kompaniyasi bilan lokomotivlar parkini yangilashni muhokama qildi

Published

2 days ago

October 20, 2026

xabarlar

O‘zbekiston Prezidenti Shavkat Mirziyoyev «Wabtec» kompaniyasi direktorlar kengashi raisi va bosh ijrochi direktori Rafael Santanani qabul qildi. Bu haqda Prezident matbuot xizmati xabar berdi.

Uchrashuvda mamlakatda temir yo‘l infratuzilmasi va tranzit salohiyati rivojlanayotganini hisobga olib, lokomotivlar parkini yangilash va kengaytirish masalalari ko‘rib chiqildi.

AQSh moliya institutlari ishtirokida lokomotivlarni uzoq muddatli servis xizmati bilan birga yetkazib berish imkoniyatlari muhokama qilindi.

Shuningdek, O‘zbekistonda texnik xizmat ko‘rsatishni yo‘lga qo‘yish, butlovchi qismlar ishlab chiqarish va mutaxassislar tayyorlash masalalari ko‘rib chiqildi.

Tog‘-kon korxonalari karer texnikasiga xizmat ko‘rsatuvchi servis markazini tashkil etish hamda dizel-generator qurilmalari bo‘yicha hamkorlik qilishga ham e’tibor qaratildi.

«Wabtec» lokomotivlar, temir yo‘l texnikasi, raqamli va servis yechimlarini ishlab chiqarish bo‘yicha jahondagi yetakchi kompaniyalardan biri hisoblanadi. Kompaniya Markaziy Osiyo mamlakatlarida ham loyihalarni amalga oshirmoqda.

Source link

Iqtisodiyot

Saida Mirziyoyeva Gonkongning Henderson Land Group xoldingi boshqaruvi raisi bilan uchrashdi

Published

5 days ago

October 17, 2026

xabarlar

Prezident Administratsiyasi rahbari Saida Mirziyoyeva XXRning Gonkong maxsus ma’muriy hududidagi eng yirik xoldinglardan biri — Henderson Land Group boshqaruvi raisi Piter Li bilan uchrashuv o‘tkazdi.

Tomonlar qayta tiklanuvchi energetika, Yangi Toshkent infratuzilmasini rivojlantirish va ta’lim sohalaridagi istiqbolli qo‘shma loyihalarni muhokama qildi.

«Mamlakatimiz investitsiyalar uchun ochiq va biz Gonkongning yetakchi biznes doiralari bilan hamkorlikdan manfaatdormiz. Sheriklikdagi tashabbuslarni, jumladan, yangi tashkil etilayotgan Toshkent xalqaro moliya markazi orqali ham qo‘llab-quvvatlashga tayyormiz», — deb yozdi Saida Mirziyoyeva.

Administratsiya rahbari O‘zbekiston va Gonkong o‘rtasida uzoq muddatli iqtisodiy hamkorlikni rivojlantirish uchun katta imkoniyatlar borligiga ishonch bildirdi.

Source link